Ki̱vi̱ Ndióxi̱ kúú Jehová, ta ña̱ ki̱vi̱ yóʼo kúni̱ kachiña “kivi keʼéra nda̱a̱ ndáaka ña̱ kúni̱ miíra”. Jehová kúúra iin Ndióxi̱ ta̱ kúúmií ndiʼi ndee̱ ta i̱xava̱ʼara ndiʼi ña̱ʼa. Ta kúúmiíra ndee̱ ña̱ va̱ʼa keʼéra ndiʼi ña̱ kúni̱ra.

Ña̱ tu̱ʼun hebreo ku̱mí letra káʼyi̱ ki̱vi̱ Ndióxi̱. Ta ña̱ tu̱ʼun sáʼán kúúña ku̱mí letra yóʼo YHWH á JHVH (ta saátu kivi kooña ña̱yóʼo YHVH). Tá ni̱ka̱ʼyi̱ Biblia ña̱ tu̱ʼun hebreo tá tiempo xi̱naʼá, ki̱ʼva 7,000 yichi̱ va̱xi ki̱vi̱ Ndióxi̱ nu̱úña. Na̱ yiví na̱ íyo iníísaá ñuyǐví xa̱a̱ síín síín káʼyína ki̱vi̱ Jehová, ta káʼa̱nnaña nda̱a̱ táki̱ʼva íyo tu̱ʼun miína.

▸ Cap. 1, párr. 15, nota ña̱ va̱xi chí xa̱ʼa̱ página

Tu̱ʼun Ndióxi̱ kúú ña̱ Biblia, soo xi̱niñúʼura na̱ ta̱a ña̱ va̱ʼa ka̱ʼyína ña̱yóʼo. Ta ña̱yóʼo íyoña nda̱a̱ táki̱ʼva íyo ña̱ kéʼé iin táta ta̱ xa̱a̱ chée tá káʼa̱nra xíʼin iin ta̱ loʼo se̱ʼeñánira ña̱ ná kaʼyíra iin carta. Ta ta̱ loʼo yóʼo kúú ta̱ káʼyí ña̱ carta yóʼo, soo tu̱ʼun ña̱ va̱xi nu̱úña kúúña tu̱ʼun ta̱ táta. Ta ki̱ʼva saá íyo ña̱ ke̱ʼé Ndióxi̱, chi xi̱niñúʼura espíritu santora ña̱ xi̱niʼiña yichi̱ nu̱ú na̱ ka̱ʼyí Biblia ña̱ va̱ʼa ka̱ʼyína ña̱ kúni̱ra. Saátu íyo ña̱ Biblia saáchi tu̱ʼun Ndióxi̱ kúúña, ta su̱ví tu̱ʼun na̱ ta̱a na̱ ka̱ʼyíña va̱xi nu̱úña. Mií Ndióxi̱ kúú ta̱ xi̱niʼi yichi̱ nu̱úna ña̱ va̱ʼa ka̱ʼyína ña̱ kúni̱ra. Ta espíritu Ndióxi̱ xa̱a̱ síín síín chi̱ndeétáʼanña xíʼinna. Tá kúú, sava yichi̱ xi̱xinina visión á xi̱xanína ta tándi̱ʼi xi̱kaʼyína ña̱yóʼo.

▸ Cap. 2, párr. 5

Ña̱ va̱xi nu̱ú Biblia ku̱a̱ʼání ña̱ʼa va̱ʼa sánáʼa̱ña miíyó. Tá kúú, iin ña̱yóʼo káchiña “na̱ yiví na̱ kǒo kéʼé ña̱ va̱ʼa, kǒo ña̱ va̱ʼa sánáʼa̱na ndóʼó” ña̱yóʼo sánáʼa̱ña miíyó ña̱ na̱ yiví na̱ kítáʼan xíʼinyó kivi chindaʼána miíyó keʼéyó ña̱ va̱ʼa á ña̱ va̱ása va̱ʼa (1 Corintios 15:33). Ta inka ña̱yóʼo káchiña “nda̱a̱ ndáaka  ña̱ chíʼiyó ña̱kán ndakiʼinvayó” ña̱yóʼo sánáʼa̱ña miíyó ña̱ tá kéʼéyó ña̱ va̱ása va̱ʼa xo̱ʼvi̱vayó (Gálatas 6:7).

▸ Cap. 2, párr. 12

Tu̱ʼun Ndióxi̱ kúúña. Ta kivi kooña ña̱ káʼa̱n xa̱ʼa̱ ña̱ kúni̱ Ndióxi̱, ña̱ káʼa̱n ndáa ki̱ʼva kooyó, á kivitu kooña chiñu ña̱ xáʼndara á ña̱ ndatiinra ku̱a̱chi. Saátu kivi kooña ña̱ káʼa̱n xa̱ʼa̱ ña̱ kuu chí nu̱únínu. Ta xa̱a̱ ku̱a̱ʼání profecía ña̱ va̱xi nu̱ú Biblia xa̱a̱ ni̱xi̱nuña.

▸ Cap. 2, párr. 13

Ndiʼi profecía ña̱ va̱xi nu̱ú Biblia, ña̱ káʼa̱n xa̱ʼa̱ ta̱ Mesías ni̱xi̱nuña i̱xaa ta̱ Jesús. Koto tabla ña̱ naní “ Profecía ña̱ káʼa̱n xa̱ʼa̱ ta̱ Mesías”.

▸ Cap. 2, párr. 17, nota ña̱ va̱xi chí xa̱ʼa̱ página

Jehová xi̱kuni̱ra ña̱ ñuʼú yóʼo ná kooña iin ñuʼú livi nu̱ú kundoo na̱ yiví na̱ kúʼvi̱-ini xíniñaʼá. Ta ta̱ʼán nasa̱ma ña̱ kúni̱ra keʼéra, si̱lóʼo kúma̱ní ta sandíʼi-xa̱ʼa̱ra ndiʼi ña̱ va̱ása va̱ʼa, ta taxira ña̱ koo na̱ xíniso̱ʼo ña̱ káʼa̱nra ndiʼi tiempo.

▸ Cap. 3, párr. 1

Ta̱ Ndi̱va̱ʼa kúúra iin ángel ta̱ va̱ása níxiniso̱ʼoka ña̱ ni̱ka̱ʼa̱n Ndióxi̱. Ta ki̱vi̱ ta̱ Ndi̱va̱ʼa kúni̱ kachiña “ta̱ sási”, saáchi ta̱yóʼo sásira nu̱ú Jehová ña̱ keʼéra ña̱ kúni̱ra, ta sáa̱-inira xínirara. Ta saátu ndu̱ura “ta̱ káʼa̱n tu̱ʼun síkí” saáchi káʼa̱nra ña̱ vatá xa̱ʼa̱ Jehová ta sándaʼvira na̱ yiví.

▸ Cap. 3, párr. 4

Siʼnaka na̱ ángel i̱xava̱ʼa Jehová, ta tándi̱ʼi saáví i̱xava̱ʼara ñuʼú yóʼo. Ta i̱xava̱ʼarana ña̱ koona chí ndiví. Yáʼaka 100 millón na̱ ángel íyo (Daniel 7:10). Ndiʼi na̱yóʼo íyo ki̱vi̱na, ta ndiʼina xa̱a̱ síín síín ki̱ʼva íyona. Na̱ ángel na̱ nda̱kú íyo ini xíʼin Jehová, vitá íyo inina ta va̱ása kúni̱na ña̱ ná ndasakáʼnu na̱ yiví miína. Ta na̱ ángel yóʼo xa̱a̱ síín síín chiñu kúúmiína. Sava na̱yóʼo káchíñuna nu̱ú íyo trono Jehová, káʼa̱nna xa̱ʼa̱ ña̱ kúni̱ra, níʼina yichi̱ nu̱ú na̱ káchíñu nu̱ú Jehová nu̱ú ñuʼú yóʼo ta ndáanana, tá ná ka̱ʼa̱n Ndióxi̱ ña̱ sandíʼi-xa̱ʼa̱na iin na̱ yiví na̱ kéʼé ña̱ va̱ása va̱ʼa na̱ ángel kúú na̱ keʼé ña̱yóʼo, saátu chíndeétáʼanna xíʼin na̱ nátúʼun xa̱ʼa̱ Reino Ndióxi̱ (Salmo 34:7; Apocalipsis 14:6; 22:8, 9). Ta chí nu̱únínu, na̱ ángel yóʼo chindeétáʼanna xíʼin ta̱ Jesús ña̱ kanitáʼanna ti̱xin guerra ña̱ Armagedón (Apocalipsis 16:14, 16; 19:14, 15).

▸ Cap. 3, párr. 5; cap. 10, párr. 1

Ña̱ ki̱ʼviyó ku̱a̱chi kúú ña̱ keʼéyó á ndakanixi̱níyó xa̱ʼa̱ ña̱ va̱ása kútóo Jehová. Ta ña̱ ku̱a̱chi yóʼo sákuxíkaña miíyó nu̱úra. Xa̱ʼa̱ ña̱yóʼo, táxira ley ndaʼa̱yó ta saátu tu̱ʼun ña̱ táxi yichi̱ nu̱úyó, ña̱ va̱ʼa chindeétáʼanña xíʼinyó ña̱ va̱ása ki̱ʼviyó ku̱a̱chi xa̱ʼa̱ ña̱ kúni̱ miíyó. Tá xa̱ʼa̱, va̱ʼaní i̱xava̱ʼa Jehová ndiʼi ña̱ʼa. Soo ta̱ Adán xíʼin ñá Eva va̱ása níxiniso̱ʼokana ña̱ ni̱ka̱ʼa̱n Ndióxi̱. Tá ke̱ʼéna ña̱yóʼo, ni̱ki̱ʼvina ku̱a̱chi tasaá ndu̱una na̱ yiví ku̱a̱chi, ta saátu ku̱chéena ta ni̱xi̱ʼi̱na. Xa̱ʼa̱ ña̱ sa̱ndáya̱ʼa ta̱ Adán ku̱a̱chi yóʼo ndaʼa̱yó, nda̱a̱ miíyó kúchéeyó ta xíʼi̱yó.

▸ Cap. 3, párr. 7; cap. 5, párr. 3

Armagedón kúú guerra nu̱ú sandíʼi-xa̱ʼa̱ Ndióxi̱ ñuyǐví ta̱ Ndi̱va̱ʼa xíʼin ndiʼi ña̱ kini ña̱ íyo nu̱úña.

▸ Cap. 3, párr. 13; cap. 8, párr. 18

Ña̱yóʼo kúú iin gobierno ña̱ chi̱ndúʼú Jehová chí ndiví. Ta, ta̱ kúú Rey ti̱xin ña̱ Reino yóʼo kúú ta̱ Jesucristo. Ta chí nu̱únínu, Jehová kuniñúʼura Reinora ña̱ sandíʼi-xa̱ʼa̱ra ndiʼi ña̱ kini ña̱ íyo nu̱ú ñuʼú yóʼo. Ta iinlá Reino Ndióxi̱ kúú ña̱ kaʼndachíñu iníísaá nu̱ú ñuʼú.

▸ Cap. 3, párr. 14

Siʼnaka ta̱ Jesús kúú ta̱ i̱xava̱ʼa Jehová, ta tándi̱ʼi saá kúú ña̱ i̱xava̱ʼara ndiʼika ña̱ʼa. Jehová chi̱ndaʼára ta̱ Jesús nu̱ú ñuʼú yóʼo ña̱ va̱ʼa kuvira xa̱ʼa̱ ndiʼi na̱ yiví. Tá ni̱ya̱ʼa loʼo ña̱ ni̱xi̱ʼi̱ra, Jehová sa̱ndátakurara. Ta vitin, ta̱ Jesús xáʼndachíñura chí ndiví ta kúúra Rey ti̱xin Reino Ndióxi̱.

▸ Cap. 4, párr. 2

Ña̱ Biblia ni̱ka̱ʼa̱nña ama kúú ña̱ kixaa̱ ta̱ Mesías. Kixaa̱ra tá ná ya̱ʼa 69 semana, ta ña̱yóʼo ki̱xáʼaña tá ku̱i̱ya̱ 455 tá tiempo xi̱naʼá (tiempo xi̱naʼá: t.x.) ta ndi̱ʼiña tá ku̱i̱ya̱ 29 tiempo vitin (tiempo vitin: t.v.).

¿Nda̱chun va̱ʼa kúnda̱a̱-iniyó ña̱ ndi̱ʼi ña̱ tiempo yóʼo tá ku̱i̱ya̱ 29 ña̱ tiempo vitin? Ña̱ 69 semana ki̱xáʼaña tá ku̱i̱ya̱ 455 tiempo xi̱naʼá, tá ni̱xa̱a̱ ta̱ Nehemías ña̱ ñuu Jerusalén ta ki̱xáʼara ndásava̱ʼara ña̱ ñuu kán (Daniel 9:25; Nehemías 2:1, 5-8). Ña̱ tu̱ʼun semana táxiña ndakanixi̱níyó xa̱ʼa̱ ña̱ número 7, soo semana ña̱ káʼa̱n ña̱ profecía yóʼo xa̱ʼa̱, su̱ví semana ña̱ 7 ki̱vi̱ kúúña, chi semana ña̱ 7 ku̱i̱ya̱ kúúña. Ki̱ʼva saá kúú ña̱ xi̱kaʼvina profecía tá tiempo xi̱naʼá. Chi Ndióxi̱ ni̱ka̱ʼa̱nra ña̱yóʼo: “Iin ki̱vi̱ kúú iin ku̱i̱ya̱” (Números 14:34; Ezequiel 4:6). Ña̱yóʼo kúni̱ kachiña ña̱ iin tá iin semana 7 ku̱i̱ya̱ kúúña, ta ña̱ 69 semana xa̱a̱ña kúúña 483 ku̱i̱ya̱ (7 yichi̱ kaʼviyó 69). Ti̱xin ña̱ ku̱i̱ya̱ 455 tiempo xi̱naʼá nda̱a̱ ku̱i̱ya̱ 29 tiempo vitin, ni̱ya̱ʼa 483 ku̱i̱ya̱ (saáchi kǒo ku̱i̱ya̱ cero). Tá ku̱i̱ya̱ 29, nda̱kuchi ta̱ Jesús ta ndu̱ura ta̱ Mesías (Lucas 3:1, 2, 21, 22).

 Ta mií ña̱ profecía yóʼo káʼa̱n tukuña xa̱ʼa̱ inka semana ña̱ 7 ku̱i̱ya̱. Ta ti̱xin ña̱ tiempo yóʼo kúú ña̱ kuvi ta̱ Mesías. Ta ña̱yóʼo ku̱uña tá ku̱i̱ya̱ 33 ña̱ tiempo vitin. Ta saátu kixáʼana natúʼunna tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ iníísaá ñuyǐví, ta su̱ví kuití xíʼin na̱ judío natúʼunna. Ta ña̱yóʼo ku̱uña tá ku̱i̱ya̱ 36 tiempo vitin (Daniel 9:24-27).

▸ Cap. 4, párr. 7, nota ña̱ va̱xi chí xa̱ʼa̱ página

Ña̱ Biblia sánáʼa̱ña miíyó ña̱ mií Jehová kúú ta̱ i̱xava̱ʼa ndiʼi ña̱ʼa, ta ta̱ nu̱ú i̱xava̱ʼara kúú ta̱ Jesús, ta tándi̱ʼi saá i̱xava̱ʼara ndiʼika ña̱ʼa (Colosenses 1:15, 16). Ña̱kán, su̱ví Ndióxi̱ ta̱ kúúmií ndiʼi ndee̱ kúú ta̱ Jesús. Nda̱a̱ ni iin yichi̱ va̱ása níka̱ʼa̱n ta̱ Jesús ña̱ iin ki̱ʼva íyora xíʼin Ndióxi̱. Chi ña̱ ni̱ka̱ʼa̱nra kúú ña̱yóʼo: “Yivái̱ kúú ta̱ káʼnuka nu̱ú yi̱ʼi̱” (Juan 14:28; 1 Corintios 15:28). Soo na̱ veʼe-ñu̱ʼu vatá sánáʼa̱na xa̱ʼa̱ ña̱ trinidad. Káchina ña̱ ta̱ kúú yivá, ta̱ kúú se̱ʼe xíʼin ña̱ espíritu santo kúúna u̱ni̱ na̱ yiví, ta saátu kúúna iinlá Ndióxi̱. Soo ña̱ tu̱ʼun trinidad kǒoña va̱xi nu̱ú Biblia. Iin ña̱ vatáva kúú ña̱ trinidad.

Ña̱ espíritu santo ndee̱ Ndióxi̱ kúúña. Ta ndee̱ yóʼo kúú ña̱ xíniñúʼura ña̱ va̱ʼa keʼéra ña̱ kúni̱ra. Su̱ví iin na̱ yiví kúú ña̱ espíritu santo, saáchi ña̱ Biblia káchiña na̱ xi̱ndasakáʼnu Ndióxi̱ tá siglo nu̱ú “nda̱kiʼinna espíritu santo”. Ta mií Jehová ni̱ka̱ʼa̱nra ña̱yóʼo: “Taxii̱ espíritui̱ ndaʼa̱ ndiʼi na̱ yiví” (Hechos 2:1-4, 17).

▸ Cap. 4, párr. 12; cap. 15, párr. 17

¿Nda̱chun va̱ása xíniñúʼu na̱ ndixa ndásakáʼnu Ndióxi̱ tú cruz ña̱ ndasakáʼnunara?

1. Na̱ veʼe-ñu̱ʼu vatá xa̱a̱ ku̱a̱ʼání tiempo ki̱xáʼana xíniñúʼuna cruz. Ta xi̱xiniñúʼuna cruz ña̱ ndasakáʼnuna ñu̱ʼu, ta saátu xi̱xiniñúʼuna cruz tá xi̱keʼéna ña̱ kini á tá xi̱kisi̱ xíʼin táʼanna ña̱ ndasakáʼnuna ndióxi̱ vatá. Tá ni̱xi̱ʼi̱ ta̱ Jesús va̱ása níxi̱xiniñúʼuna cruz, chi nda̱a̱ tá ni̱ya̱ʼa 300 ku̱i̱ya̱ saáví ki̱xáʼana xíniñúʼunanú, na̱ xi̱ndasakáʼnu Ndióxi̱ va̱ása níxi̱xiniñúʼuna cruz ña̱ ndasakáʼnunara. Soo ta̱ emperador ta̱ ni̱xi̱yo ñuu Roma ta̱ xi̱naní Constantino ki̱xáʼara xíniñúʼura cruz, ña̱ va̱ʼa ku̱a̱ʼáka na̱ yiví ná kandíxana ta̱ Jesús. Soo ta̱ Jesucristo va̱ása níxi̱ʼi̱ra ndaʼa̱ tú cruz. Iin libro ña̱ católica káchiña: “Na̱ yiví xi̱xiniñúʼuna tú cruz xi̱naʼá tá kúma̱níka kaku ta̱ Jesús, ta nda̱a̱ na̱ va̱ása ndíku̱n ta̱ Jesús xíniñúʼuna tú cruz” (New Catholic Encyclopedia).

2.   Ta̱ Jesús va̱ása níxi̱ʼi̱ra ndaʼa̱ iin cruz. Ña̱ tu̱ʼun griego ña̱ kúni̱ kachi “cruz” káʼa̱nña xa̱ʼa̱ iin “poste” á iin “yitu̱n tú nda̱kú”. Tu̱ʼun griego ña̱ ka̱ʼyína tutu ña̱ Nuevo Testamento “nda̱a̱ ni loʼoví va̱ása káʼa̱nña xa̱ʼa̱ u̱vi̱ yitu̱n tú sámatáʼan” (The Companion Bible). Ta̱ Jesús ni̱xi̱ʼi̱ra ndaʼa̱ iin yitu̱n nda̱kú á sii̱nnú.

3. Jehová va̱ása kúni̱ra ña̱ ná kuniñúʼuyó santo á inkaka ña̱ʼa ña̱ ndasakáʼnuyóra (Éxodo 20:4, 5; 1 Corintios 10:14).

▸ Cap. 5, párr. 12

Ta̱ Jesús ni̱ka̱ʼa̱nra xíʼin na̱ discípulora ña̱ ná ndakaʼánna xa̱ʼa̱ ña̱ kuvira. Na̱ ndásakáʼnu Ndióxi̱ kéʼéna ña̱yóʼo ku̱i̱ya̱ tá ku̱i̱ya̱ ña̱ ki̱vi̱ 14 xíka tí yo̱o̱ nisán ña̱ calendario judío, ta nu̱ú calendario ña̱ kúúmií miíyó kúúña yo̱o̱ marzo á abril. Ta mií ki̱vi̱ kán kúú ña̱ xi̱keʼé na̱ ñuu Israel vikó ña̱ Pascua. Tá xíyo ña̱ Conmemoración sáya̱ʼana si̱táva̱ʼa xíʼin tá vino ndaʼa̱ ndiʼi na̱ xáʼa̱n kán, ta ña̱yóʼo ndákiʼinña nu̱ú ku̱ñu ta̱ Jesús xíʼin ni̱i̱ra. Ndiʼi na̱ ku̱ʼu̱n kaʼndachíñu xíʼin ta̱ Jesús chí ndiví xíxina si̱táva̱ʼa ta xíʼina tá vino. Soo ndiʼi na̱ ndátu kundoo ndiʼi tiempo nu̱ú ñuʼú yóʼo, va̱ása xíxina si̱táva̱ʼa ta ni va̱ása xíʼina tá vino tá xáʼa̱nna Conmemoración.

▸ Cap. 5, párr. 21

Ña̱ Traducción del Nuevo Mundo, xíniñúʼuña ña̱ tu̱ʼun níma̱ ña̱ ka̱ʼa̱nña xa̱ʼa̱ 1) na̱ yiví, 2) xa̱ʼa̱ kití á 3) xa̱ʼa̱ ña̱ táku iin na̱ yiví á iin kití. Ná kotoyó sava ejemplo:

• Na̱ yiví. “Tá tiempo ta̱ Noé, [...] loʼo kuití na̱ yiví, á u̱na̱ níma̱ xi̱kuuna, na̱yóʼo kúú na̱ ni̱ka̱ku tá ku̱un sa̱vi̱ kini” (1 Pedro 3:20). Tá káʼa̱n texto yóʼo xa̱ʼa̱ níma̱, xa̱ʼa̱ na̱ yiví kúú ña̱ káʼa̱nña: ta̱ Noé, ñá síʼira, u̱ni̱ ta̱a se̱ʼera xíʼin u̱ni̱ ná xa̱nura.

•  Kití. “Ni̱ka̱ʼa̱n Ndióxi̱: ‘Ná koo ndiʼi nu̱ú kití [á níma̱, nota] nu̱ú ñuʼú yóʼo: kití tí koo ti̱xin veʼe, kití tí kuñuu ti̱xin nu̱ú ñuʼú, xíʼin ndiʼi nu̱ú kití yukúʼ. Tasaá ku̱u” (Génesis 1:24).

• Ña̱ táku iin na̱ yiví á iin kití. Jehová ni̱ka̱ʼa̱nra xíʼin ta̱ Moisés: “Xa̱a̱ ni̱xi̱ʼi̱ ndiʼi na̱ kúni̱ kaʼní yóʼó [á na̱ nándukú níma̱ún, nota]” (Éxodo 4:19). Tá ni̱xi̱yo ta̱ Jesús nu̱ú ñuʼú yóʼo, ka̱chira: “Yi̱ʼi̱ kúíi̱ iin pastor ta̱ va̱ʼa, ta̱ pastor ta̱ va̱ʼa táxira miíra ña̱ kuvira [á níma̱ra, nota] xa̱ʼa̱ tí ndikachi sa̱na̱ra” (Juan 10:11).

  Ta saátu, tá káʼa̱n ña̱ Biblia ña̱ iin na̱ yiví kéʼéna iin ña̱ʼa xíʼin ndiʼi níma̱na kúni̱ kachiña ña̱ kéʼénaña xíʼin ña̱ si̱í-ini ta vií kéʼénaña (Deuteronomio 6:5; Mateo 22:37). Ña̱ Biblia sava yichi̱ xíniñúʼuña tu̱ʼun níma̱, tá káʼa̱nña xa̱ʼa̱ ña̱ kúni̱ iin na̱ yiví á ña̱ kútóona (Proverbios 23:2, nota; Isaías 56:11, nota). Saátu káʼa̱n ña̱ Biblia ña̱ iin na̱ ni̱xi̱ʼi̱ kúúna “iin níma̱” (Números 6:6, nota; Ageo 2:13, nota). Ña̱ Biblia káxiní káʼa̱nña ña̱ xíʼi̱va níma̱ (Ezequiel 18:4, 20; Santiago 5:20, nota).

▸ Cap. 6, párr. 5, nota ña̱ va̱xi chí xa̱ʼa̱ página; cap. 15, párr. 17

Ña̱ tu̱ʼun hebreo xíʼin griego ña̱ sa̱ndáya̱ʼana “espíritu” nu̱ú ña̱ Traducción del Nuevo Mundo kivi ka̱ʼa̱nña xa̱ʼa̱ ku̱a̱ʼá ña̱ʼa. Soo ndiʼi tiempo káʼa̱nña xa̱ʼa̱ iin ña̱ʼa ña̱ va̱ása kívi kuni na̱ yiví, tá kúú ta̱chí á ta̱chí ña̱ kée yuʼú na̱ yiví á kití. Ta saátu kivi ka̱ʼa̱nña xa̱ʼa̱ na̱ ángel á xa̱ʼa̱ ña̱ espíritu santo ña̱ kúú ndee̱ Ndióxi̱. Ña̱kán, ña̱ Biblia va̱ása káʼa̱nña ña̱ tákuka iin táʼví na̱ yiví tá xíʼi̱na (Éxodo 35:21; Salmo 104:29; Mateo 12:43; Lucas 11:13).

▸ Cap. 6, párr. 5, nota ña̱ va̱xi chí xa̱ʼa̱ página; cap. 15, párr. 17

Ña̱ Gehena tu̱ʼun griego kúúña, soo sava nu̱ú Biblia nda̱saanaña “ndayá á infierno”. Soo Gehena kúú ki̱vi̱ iin yosó ña̱ ni̱xi̱yo yatin chí ñuu Jerusalén, nu̱ú xi̱xaʼmina ta xi̱sandíʼi-xa̱ʼa̱na mi̱ʼí. Tá tiempo ña̱ ni̱xi̱yo ta̱ Jesús, kǒo nda̱a̱ ni iin prueba ña̱ xi̱na̱ʼa̱ ña̱ xi̱xaʼmina kití tí táku á na̱ yiví lugar kán. Xa̱ʼa̱ ña̱kán, ña̱ Gehena su̱ví iin lugar nu̱ú sáxo̱ʼvi̱na á xáʼmina na̱ yiví na̱ ni̱xi̱ʼi̱ kúúña. Tá ni̱ka̱ʼa̱n ta̱ Jesús ña̱ ku̱ʼu̱n sava na̱ yiví lugar ña̱ naní Gehena, ña̱ xi̱kuni̱ kachira kúú ña̱ ndiʼi-xa̱ʼa̱ va̱ʼana ta va̱ása ndatakukana (Mateo 5:22; 10:28).

▸ Cap. 7, párr. 20

Ña̱ padrenuestro kúú iin oración ña̱ xi̱niñúʼu ta̱ Jesús ña̱ sa̱náʼa̱ra na̱ discípulora ndáa ki̱ʼva ka̱ʼa̱nna xíʼin Ndióxi̱. Ta saátu káʼa̱nna ña̱ naníña oración ta̱ táta á oración modelo. Ta̱ Jesús ni̱ka̱ʼa̱nra ña̱ ná ndukúyó ña̱ va̱xi yóʼo á inkaka ña̱ʼa:

• “Ná nduyi̱i̱ ki̱vi̱ún”

  Káʼa̱nyó xíʼin Jehová ña̱ ná nduyi̱i̱ ki̱vi̱ra chi ku̱a̱ʼání ña̱ vatá ni̱ka̱ʼa̱nna xa̱ʼa̱ra. Tasaá, ndiʼi na̱ ndóo chí ndiví xíʼin nu̱ú ñuʼú yóʼo ndasakáʼnuna ki̱vi̱ Ndióxi̱ ta ixato̱ʼónaña.

• “Ná kixaa̱ ña̱ kaʼndachíñún”

  Káʼa̱nyó xíʼin Ndióxi̱ ña̱ ná sandíʼi-xa̱ʼa̱ Reinora ndiʼi ña̱ va̱ása va̱ʼa ña̱ íyo nu̱ú ñuyǐví ta̱ Ndi̱va̱ʼa, ta saátu ña̱ ná kaʼndachíñura nu̱ú ñuʼú yóʼo ta ndasaliviraña.

• “Ná koo ña̱ kúni̱ miíún, [...] nu̱ú ñuʼú yóʼo”

  Káʼa̱nyó xíʼin Ndióxi̱ ña̱ ná saxínura ña̱ kúni̱ra koo nu̱ú ñuʼú yóʼo: ta na̱ yiví na̱ xíniso̱ʼo ña̱ káʼa̱nra kǒoka ku̱a̱chi kuumiína ta koona ndiʼi tiempo nu̱ú ñuʼú livi. Ña̱yóʼo kúú ña̱ xi̱kuni̱ Jehová tá i̱xava̱ʼara na̱ yiví tá xa̱ʼa̱.

▸ Cap. 8, párr. 2

Jehová cha̱ʼvira xa̱ʼa̱yó ña̱ va̱ʼa ndatavára miíyó nu̱ú ku̱a̱chi xíʼin ña̱ xíʼi̱yó. Ta ña̱ cha̱ʼvira kúú ña̱ táku iin na̱ yiví na̱ kǒo ku̱a̱chi, ta na̱yóʼo xi̱niñúʼu kuvina ña̱ va̱ʼa chaʼvina xa̱ʼa̱ ña̱ ke̱ʼé ta̱ Adán tasaá ndatavána miíyó nu̱ú ku̱a̱chi. Ta saátu ña̱ va̱ʼa ndakutáʼan viíyó xíʼin Ndióxi̱. Jehová ta̱xira se̱ʼera ña̱ kuvira xa̱ʼa̱ ndiʼi na̱ yiví ku̱a̱chi. Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, ndiʼiyó kivi ndakiʼinyó ña̱ kooyó ndiʼi tiempo ta kǒoka ku̱a̱chi kuumiíyó.

▸ Cap. 8, párr. 21; cap. 9, párr. 13

Profecía ña̱ va̱xi nu̱ú capítulo 4 ña̱ libro ta̱ Daniel, sánáʼa̱ña miíyó ña̱ ki̱xáʼa Reino Ndióxi̱ xáʼndachíñuña tá ku̱i̱ya̱ 1914.

Profecía. Jehová ta̱xira ña̱ ná xa̱ní ta̱ Nabucodonosor ta̱ rey ña̱ ñuu Babilonia iin xa̱ni ña̱ káʼa̱n xa̱ʼa̱ profecía. Ta ti̱xin ña̱ xa̱ni yóʼo, ta̱ rey xi̱nira ña̱ xáʼndana iin yitu̱n káʼnu. Tándi̱ʼi, xa̱ʼa̱ tú yitu̱n yóʼo ña̱ ni̱ndo̱o ka̱túnnaña xíʼin ka̱a ña̱ kúú hierro xíʼin cobre ña̱ va̱ʼa ná va̱ása kuaʼnunú “u̱xa̱ tiempo”. Ta nda̱a̱ ná ndiʼi ña̱ “u̱xa̱ tiempo” saáví ndikó tuku tú yitu̱n yóʼo kuaʼnunú (Daniel 4:1, 10-16).

Ña̱ kúni̱ kachiña. Su̱ví ndixa xa̱ʼa̱ yitu̱n káʼa̱n ña̱yóʼo chi xa̱ʼa̱ Reino Ndióxi̱ káʼa̱nña. Ku̱a̱ʼání ku̱i̱ya̱ xi̱niñúʼu Ndióxi̱ na̱ rey na̱ xi̱xaʼndachíñu ña̱ ñuu Jerusalén ña̱ va̱ʼa kuniʼira yichi̱ nu̱ú na̱ ñuu Israel (1 Crónicas 29:23). Soo na̱ rey yóʼo va̱ása níxi̱xiniso̱ʼona ña̱ xi̱ka̱ʼa̱n Ndióxi̱, xa̱ʼa̱ ña̱kán va̱ása níxaʼndachíñukana. Ña̱ ñuu Jerusalén ndi̱ʼi-xa̱ʼa̱ña tá ku̱i̱ya̱ 607 tá tiempo xi̱naʼá (tiempo xi̱naʼá: t.x.). Ta ku̱i̱ya̱ saá kúú ña̱ ki̱xáʼa ña̱ “u̱xa̱ tiempo” (2 Reyes 25:1, 8-10; Ezequiel 21:25-27). Ta̱ Jesús ni̱ka̱ʼa̱nra ña̱ ndiʼi-xa̱ʼa̱ ña̱ ñuu Jerusalén ixaa na̱ inka ñuu nda̱a̱ ná xi̱nu ña̱ “u̱xa̱ tiempo” (Lucas 21:24). Xa̱ʼa̱ ña̱kán, ña̱ u̱xa̱ tiempo va̱ása níndiʼiña tá ni̱xi̱yo ta̱ Jesús nu̱ú ñuʼú yóʼo. Jehová ni̱ka̱ʼa̱nra ña̱ ndaka̱xinra iin ta̱ koo Rey tá ná ndiʼi ña̱ “u̱xa̱ tiempo”. Ta ta̱ Rey yóʼo kúú ta̱ Jesús. Tá ná kaʼndachíñura ku̱a̱ʼání ña̱ va̱ʼa ndakiʼin na̱ káchíñu nu̱ú Ndióxi̱ nu̱ú ñuʼú yóʼo (Lucas 1:30-33).

 Ni̱xi̱yoña. Ña̱ “u̱xa̱ tiempo” ni̱xi̱yoña 2,520 ku̱i̱ya̱. ¿Nda̱chun va̱ʼa kúnda̱a̱-iniyó ña̱ “u̱xa̱ tiempo” kúúña 2,520 ku̱i̱ya̱? Ña̱ Biblia káchiña u̱ni̱ tiempo sava kúú 1,260 ki̱vi̱ (Apocalipsis 12:6, 14). Xa̱ʼa̱ ña̱yóʼo, ña̱ “u̱xa̱ tiempo” kúúña 2,520 ki̱vi̱. Ki̱ʼva saá kúú ña̱ xi̱kaʼvina profecía tá tiempo xi̱naʼá. Chi Ndióxi̱ ni̱ka̱ʼa̱nra ña̱yóʼo: “Iin ki̱vi̱ kúú iin ku̱i̱ya̱” (Números 14:34; Ezequiel 4:6). Ña̱kán ña̱ 2,520 ki̱vi̱ kúúña 2,520 ku̱i̱ya̱.

Tá ná kixáʼayó kaʼviyó ña̱ ku̱i̱ya̱ 607 tiempo xi̱naʼá ta nda̱a̱ ku̱i̱ya̱ 1914 ña̱ tiempo vitin, ni̱ya̱ʼa 2,520 ku̱i̱ya̱ (chi kǒo ña̱ ku̱i̱ya̱ cero). Tá ku̱i̱ya̱ 1914, Jehová nda̱saara ta̱ Jesucristo Rey chí ndiví.

▸ Cap. 8, párr. 23

Ña̱ tu̱ʼun arcángel kúni̱ kachiña “ta̱ xáʼndachíñu nu̱ú na̱ ángel”. Ña̱ Biblia káʼa̱nña ña̱ iinlá kuití kúú ta̱ arcángel, ta ki̱vi̱ra kúú Miguel (Daniel 12:1; Judas 9).

Ta̱ Miguel kúú ta̱ níʼi yichi̱ nu̱ú na̱ ángel na̱ nda̱kú íyo ini xíʼin Ndióxi̱. Ña̱ Biblia káchiña: “Ta̱ Miguel xíʼin na̱ ángel na̱ kítáʼan xíʼinra ka̱nitáʼanna xíʼin tí dragón [...] xíʼin na̱ ángel na̱ kítáʼan xíʼinrí” (Apocalipsis 12:7). Ta saátu káʼa̱nña, ta̱ Jesús kúú ta̱ níʼi yichi̱ nu̱ú ndiʼi na̱ ángel se̱ʼe Ndióxi̱. Xa̱ʼa̱ ña̱yóʼo, Miguel kúú inka ki̱vi̱ ta̱ Jesús (Apocalipsis 19:14-16).

▸ Cap. 9, párr. 4, nota ña̱ va̱xi chí xa̱ʼa̱ página

Ki̱vi̱ nu̱ú ndíʼi kúú tiempo ña̱ xa̱a̱ ku̱nu̱mí sandíʼi-xa̱ʼa̱ Reino Ndióxi̱ ñuyǐví ta̱ Ndi̱va̱ʼa. Ta ti̱xin ña̱ tiempo yóʼo ku̱a̱ʼání ña̱ʼa kuu nu̱ú ñuʼú yóʼo. Profecía ña̱ va̱xi nu̱ú Biblia xíniñúʼuña inkáchi tu̱ʼun ña̱ ka̱ʼa̱nña xa̱ʼa̱ iin ña̱ʼa, tá kúú ña̱ “xa̱a̱ ku̱yatin ndiʼi-xa̱ʼa̱ ña̱ íyo nu̱ú ñuyǐví yóʼo” xíʼin ña̱ “kixaa̱ ta̱ kúú se̱ʼe ta̱a” (Mateo 24:3, 27, 37). Ña̱ “ki̱vi̱  nu̱ú ndíʼi” ki̱xáʼaña tá xi̱kundúʼú Reino Ndióxi̱ chí ndiví tá ku̱i̱ya̱ 1914, ta ndiʼiña tá ná ndiʼi-xa̱ʼa̱ ñuyǐví ta̱ Ndi̱va̱ʼa ti̱xin guerra ña̱ Armagedón (2 Timoteo 3:1; 2 Pedro 3:3).

▸ Cap. 9, párr. 2

Iinlá Ndióxi̱ kúú ta̱ kúúmií ndee̱ ña̱ sandátakura na̱ ni̱xi̱ʼi̱. Ña̱ Biblia káʼa̱nña xa̱ʼa̱ i̱i̱n na̱ yiví na̱ nda̱taku. Ndióxi̱ ta̱xira ndee̱ ndaʼa̱ ta̱ Elías, ta̱ Eliseo, ta̱ Jesús, ta̱ Pedro xíʼin ta̱ Pablo ña̱ va̱ʼa sa̱ndátakuna na̱ ni̱xi̱ʼi̱. Jehová káʼa̱nra ña̱ sandátakura na̱ yiví na̱ sa̱kuaʼa xa̱ʼa̱ra ta saátu na̱ va̱ása nísakuaʼa xa̱ʼa̱ra ña̱ kundoona nu̱ú ñuʼú yóʼo (Hechos 24:15). Ta saátu káʼa̱n ña̱ Biblia ña̱ sava na̱ yiví ndátakuna ña̱ koona chí ndiví. Na̱yóʼo kúú na̱ nda̱kaxin Ndióxi̱ ña̱ kaʼndachíñuna xíʼin ta̱ Jesús chí ndiví (Juan 5:28, 29; 11:25; Filipenses 3:11; Apocalipsis 20:5, 6).

▸ Cap. 9, párr. 13

Ña̱ espiritismo kúú ña̱ kéʼé na̱ yiví tá káʼa̱nna xíʼin na̱ ni̱xi̱ʼi̱, á tá ku̱a̱ʼa̱nna nu̱ú iin na̱ ndákuati á iin na̱ tási ña̱ va̱ʼa ka̱ʼa̱nna xíʼinna xa̱ʼa̱ na̱ ni̱xi̱ʼi̱. Ta su̱ví ña̱ va̱ʼa kúú ña̱yóʼo. Na̱ káʼa̱n xíʼin na̱ ni̱xi̱ʼi̱ ndákanixi̱nína ña̱ tákuka iin táʼví na̱ yiví tá xíʼi̱na, ta ndúuna iin espíritu ña̱ ndakúní. Soo iin ña̱ vatáva kúú ña̱yóʼo. Na̱ ta̱chí ndi̱va̱ʼa kúni̱na ña̱ ná va̱ása kuniso̱ʼo na̱ yiví ña̱ káʼa̱n Ndióxi̱. Na̱ ta̱chí ndi̱va̱ʼa kúú na̱ chíndeétáʼan xíʼin na̱ ndákuati ña̱ sandáʼana na̱ ndeé ndóʼo á ña̱ chika̱a̱na chiʼña inkana. Na̱ tási sava yichi̱ ndúkúna ti̱ko̱to̱ na̱ yiví, á na̱ʼnána, á yixí xi̱nína á inkaka ña̱ʼa ña̱ kivi kuniñúʼuna ña̱ ixatásina xíʼinna, ta inkatu na̱ yiví káchina ña̱ tá kininí xáku tí ti̱na kúni̱ kachiña ña̱ kixi iin tu̱ndóʼo nu̱úna, ta savatuna chínundaana iin cruz yéʼéna ña̱ kǒo tu̱ndóʼo kixi nu̱úna. Ku̱a̱ʼání libro, revista xíʼin yaa káʼa̱nña xa̱ʼa̱ magia ta saátu  káʼa̱nña xa̱ʼa̱ na̱ ta̱chí ndi̱va̱ʼa. Na̱ yiví ndákanixi̱nína ña̱ íyo nu̱ú ku̱a̱ʼa̱n na̱ ni̱xi̱ʼi̱, ña̱kán kúú ña̱ ku̱a̱ʼání ña̱ʼa kéʼéna tá xíʼi̱ iin na̱ yiví. Sava ña̱yóʼo kúú, ña̱ kéʼéna iin misa xa̱ʼa̱ na̱ ni̱xi̱ʼi̱, á ña̱ kéʼéna vikó ndi̱i. Ña̱ va̱ʼa kuniñúʼu na̱ yiví ndee̱ na̱ ta̱chí ndi̱va̱ʼa xíniñúʼuna droga á xíʼina ku̱a̱ʼání ndixi, ta ndiʼi ña̱yóʼo su̱ví ña̱ va̱ʼa kúúña (Gálatas 5:20, 21; Apocalipsis 21:8).

▸ Cap. 10, párr. 12; cap. 16, párr. 4

Jehová kúúra iin Ndióxi̱ ta̱ kúúmií ndiʼi ndee̱ ta i̱xava̱ʼara ndiʼi ña̱ʼa (Apocalipsis 15:3). Xa̱ʼa̱ ña̱kán, ndiʼi ña̱ʼa kuenta miíra kúúña. Ta miíra kúú ta̱ kúúmií derecho ña̱ kaʼndachíñura nu̱ú ndiʼi ña̱ʼa ña̱ i̱xava̱ʼara (Salmo 24:1; Isaías 40:21-23; Apocalipsis 4:11). Jehová ta̱xira ley ndaʼa̱ ndiʼi ña̱ i̱xava̱ʼara. Ta saátu kúúmiíra derecho ña̱ ndaka̱xinra inka na̱ kaʼndachíñu. Tá kúʼvi̱-iniyó xíniyó Ndióxi̱ ta xíniso̱ʼoyó ndiʼi ña̱ káʼa̱nra xíʼinyó, náʼa̱yó ña̱ chíndeétáʼanyó xíʼin ña̱ xáʼndachíñura (1 Crónicas 29:11).

▸ Cap. 11, párr. 10

Sava ná ñaʼá ná ñúʼu se̱ʼe va̱ása kúni̱ná ña̱ ná kaku ña̱ loʼo se̱ʼená. Xa̱ʼa̱ ña̱yóʼo, xíʼiná sava ña̱ʼa ña̱ va̱ʼa sánuuná se̱ʼená, á ña̱ kaʼníná ña̱ loʼo yóʼo tá kúma̱níka kakuña. Soo Jehová sáa̱-inira xínira ña̱yóʼo, saáchi tá sa̱kán ni̱ke̱e se̱ʼe iin ñaʼá xa̱a̱ iin na̱ yiví kúú ña̱yóʼo nu̱ú Jehová. Ña̱kán, iin ku̱a̱chi káʼnu kúú ña̱ kaʼnína iin ña̱ loʼo ña̱ ta̱ʼán kaku.

▸ Cap. 13, párr. 5

Ña̱yóʼo kúú ña̱ kéʼé na̱ doctor tá ndátaánna ni̱i̱ iin na̱ yiví á tá ndátaánna sava táʼví ni̱i̱ miína, tá kúú ña̱ plasma, glóbulos rojos, glóbulos blancos xíʼin plaquetas. Ta ña̱yóʼo  kivi kooña ni̱i̱ mií na̱ yiví kán, ta kivitu kooña ni̱i̱ inka na̱ yiví ña̱ xa̱a̱ nda̱taán va̱ʼana tá ya̱chi̱.

▸ Cap. 13, párr. 13

Nu̱ú Biblia, ña̱ tu̱ʼun consejo va̱ása xíniñúʼu kuitínaña ña̱ ka̱ʼa̱nna xa̱ʼa̱ castigo. Tá táxina consejo ndaʼa̱yó sánáʼa̱na miíyó, ta tá va̱ása va̱ʼa ña̱ kéʼéyó chíndeétáʼanna xíʼinyó ña̱ nasamayóña. Tá táxi Jehová consejo ndaʼa̱yó viíní kéʼéraña (Proverbios 4:1, 2). Consejo ña̱ táxi Jehová ndaʼa̱yó va̱ʼaníña, ta nda̱a̱ kivi xa̱a̱ iin na̱ yiví kuʼvi̱-inina kunina ña̱yóʼo (Proverbios 12:1). Jehová sánáʼa̱ra na̱ káchíñu nu̱úra, ta táxira consejo ndaʼa̱na saáchi kúʼvi̱ní-inira xínirana. Káʼa̱nra xíʼinna ndáa ki̱ʼva nasamana ña̱ va̱ása va̱ʼa ña̱ ndákanixi̱nína, ta ña̱yóʼo sánáʼa̱ñana ña̱ vií ndakanixi̱nína ta keʼéna ña̱ kúni̱ Ndióxi̱. Tá táxi na̱ íyo se̱ʼe consejo ndaʼa̱ na̱ va̱lí se̱ʼena xíniñúʼu kundiku̱nna yichi̱ Jehová. Xíniñúʼu chindeétáʼanna xíʼin na̱ va̱lí yóʼo ña̱ kunda̱a̱-inina nda̱chun xíniñúʼu kuniso̱ʼona ña̱ káʼa̱nna xíʼinna. Ta saátu xíniñúʼu sanáʼa̱na na̱ va̱lí yóʼo ña̱ kuʼvi̱-inina kunina Jehová xíʼin tu̱ʼunra ña̱ Biblia, ta saátu chindeétáʼanna xíʼinna ña̱ kunda̱a̱-inina xa̱ʼa̱ ña̱ káʼa̱n Biblia.

▸ Cap. 14, párr. 13

Na̱ ta̱chí ndi̱va̱ʼa kǒo kívi kuniyóna ta íyoní ndee̱na. Tá kǒo níxiniso̱ʼoka na̱ ángel yóʼo ña̱ ni̱ka̱ʼa̱n Ndióxi̱, ndu̱una na̱ ndi̱va̱ʼa-ini ta ki̱xáʼana sáa̱-inina xíninara (Génesis 6:2; Judas 6). Ta nda̱kutáʼanna xíʼin ta̱ Ndi̱va̱ʼa ta kǒo xíniso̱ʼokana ña̱ káʼa̱n Jehová (Deuteronomio 32:17; Lucas 8:30; Hechos 16:16; Santiago 2:19).

▸ Cap. 16, párr. 4