1. ¿Ndáana ta̱xi ña̱ tákuyó?

JEHOVÁ kúúra iin Ndióxi̱ ta̱ táku (Jeremías 10:10). Ta̱yóʼo kúú ta̱ i̱xava̱ʼa miíyó ta ta̱xira ña̱ tákuyó. Ña̱ Biblia káʼa̱nña ña̱yóʼo xa̱ʼa̱ Jehová: “Yóʼó kúú ta̱ i̱xava̱ʼa ndiʼi ña̱ʼa, ta xa̱ʼa̱ ña̱ kúni̱ miíún na̱kuva̱ʼa ndiʼi ña̱yóʼo” (Apocalipsis 4:11). Tákuyó saáchi mií Jehová kúú ta̱ ni̱ka̱ʼa̱n saá kooña. Iin regalo ña̱ ta̱xi Ndióxi̱ ndaʼa̱yó kúú ña̱ tákuyó (kaʼvi Salmo 36:9).

2. ¿Ndáaña xíniñúʼu keʼéyó ña̱ va̱ʼa vií kundooyó?

² Jehová kúú ta̱ táxi ndiʼi ña̱ xíniñúʼuyó ña̱ va̱ʼa kutakuyó, tá kúú ña̱ xíxiyó xíʼin ti̱kui̱í tá xíʼiyó (Hechos 17:28). Ta saátu kúni̱ra ña̱ si̱í ná kooyó (Hechos 14:15-17). Ña̱ va̱ʼa vií kundooyó xíniñúʼu kuniso̱ʼoyó ña̱ káʼa̱nra xíʼinyó (Isaías 48:17, 18).

3. ¿Ndáaña ke̱ʼé Jehová tá xa̱ʼní ta̱ Caín ñanira ta̱ Abel?

³ Ña̱ Biblia sánáʼa̱ña miíyó ña̱ ndáyáʼviní ña̱ táku na̱ yiví nu̱ú Jehová. Ná kotoyó ña̱ ke̱ʼé ta̱ Caín, ta̱ xi̱kuu se̱ʼe nu̱ú ta̱ Adán xíʼin ñá Eva. Ta̱ Caín ni̱sa̱a̱níra xíʼin ñanira ta̱ Abel. Xa̱ʼa̱ ña̱kán, Jehová ni̱ka̱ʼa̱nra xíʼin ta̱ Caín ña̱ ná kǒo sa̱a̱níra. Soo ta̱ Caín kǒo níxiinra kuniso̱ʼora. Ndeéní ni̱sa̱a̱ra ta ka̱nira ñanira ta nda̱a̱ xa̱ʼnírara (Génesis 4:3-8). Jehová ta̱xira castigo ndaʼa̱ ta̱ Caín xa̱ʼa̱ ña̱ xa̱ʼníra ta̱ Abel (Génesis 4:9-13). Ña̱yóʼo sánáʼa̱ña miíyó ña̱ iin ña̱ i̱yoní kúú ña̱ sa̱a̱-iniyó kuniyó inkana, chi kivi  xa̱a̱yó ixandi̱va̱ʼayó xíʼinna. Na̱ yiví na̱ kéʼé ña̱yóʼo, va̱ása ndakiʼinna ña̱ kutakuna ndiʼi tiempo (kaʼvi 1 Juan 3:15). Ña̱ va̱ʼa sakúsi̱íyó-ini Jehová xíniñúʼu sakuaʼayó kuʼvi̱-iniyó kuniyó ndiʼi na̱ yiví (1 Juan 3:11, 12).

4. Nda̱a̱ táki̱ʼva káchi iin ña̱ u̱xu̱ ley, ¿á ndáyáʼvi ña̱ tákuyó nu̱ú Ndióxi̱?

⁴ Tá xa̱a̱ ni̱ya̱ʼa ku̱a̱ʼání ku̱i̱ya̱, Jehová ta̱xira u̱xu̱ ley ndaʼa̱ ta̱ Moisés. Iin ña̱ ley yóʼo káchiña: “Va̱ása va̱ʼa kaʼníún” (Deuteronomio 5:17). Na̱ yiví na̱ xi̱xaʼní inkana xa̱ʼa̱ ña̱ kúni̱ miína, xi̱xiniñúʼu kuvina. Ña̱yóʼo sánáʼa̱ña miíyó ña̱ ndáyáʼviní ña̱ tákuyó nu̱ú Jehová.

5. ¿Ndáaña ndákanixi̱ní Jehová xa̱ʼa̱ ña̱ sánuuna se̱ʼena?

⁵ ¿Ndáaña ndákanixi̱ní Jehová xa̱ʼa̱ ña̱ sánuuna se̱ʼena? Nu̱ú Jehová ndáyáʼviní ña̱ táku na̱ va̱lí na̱ ta̱ʼán kaku. Káxiní ni̱ka̱ʼa̱nra xa̱ʼa̱ ña̱yóʼo nu̱ú iin ley ña̱ ta̱xira ndaʼa̱ na̱ ñuu Israel, tá iin na̱ yiví sa̱túkue̱ʼe̱na iin ñaʼá ñá ñúʼu se̱ʼe ta ni̱xi̱ʼi̱ ña̱ loʼo se̱ʼeñá, na̱ ke̱ʼé ña̱yóʼo xíniñúʼu kuvina (kaʼvi Éxodo 21:22, 23; Salmo 127:3). Ña̱yóʼo sánáʼa̱ña miíyó ña̱ va̱ása kúni̱ Jehová ña̱ ná sánuuna se̱ʼena. (Koto nota 28, “Ña̱ sánuuna se̱ʼena”).

6, 7. ¿Ndáa ki̱ʼva náʼa̱yó nu̱ú Jehová ña̱ chíndayáʼviyó ña̱ tákuyó?

⁶ ¿Ndáa ki̱ʼva náʼa̱yó nu̱ú Jehová ña̱ chíndayáʼviyó ña̱ tákuyó? Va̱ása xíniñúʼu keʼéyó nda̱a̱ ni iin ña̱ʼa ña̱ kivi kaʼní miíyó á ña̱ kivi kaʼní inkana. Xa̱ʼa̱ ña̱kán, va̱ása xíniñúʼuyó tabaco, ni va̱ása táʼmiyó tíner á pegamento ta saátu va̱ása xíniñúʼuyó droga tá kúú ña̱ marihuana á inkaka ña̱ʼa, saáchi tá ná keʼéyó ña̱yóʼo kivi kiʼinyó kue̱ʼe̱ ta nda̱a̱ kivi kuviyó.

⁷ Xa̱ʼa̱ ña̱ mií Ndióxi̱ kúú ta̱ ta̱xi ña̱ tákuyó ta saátu ku̱ñuyó, xíniñúʼu kuniñúʼu viíyóña nda̱a̱ táki̱ʼva kúni̱ miíra. Xa̱ʼa̱ ña̱yóʼo xíniñúʼu kundaayó ku̱ñuyó. Chi tá va̱ása kéʼéyó ña̱yóʼo, na̱ yaku̱a̱ kooyó nu̱ú Ndióxi̱ (Romanos 6:19;  12:1; 2 Corintios 7:1). Va̱ása kivi ndasakáʼnuyó Ndióxi̱ tá kǒo ndáyáʼvi ña̱ tákuyó nu̱úyó, chi ña̱yóʼo iin regalo ña̱ ta̱xira ndaʼa̱yó kúúña. Ña̱ nda̱a̱ kúú ña̱ kivi ixayo̱ʼvi̱ña xíʼinyó ña̱ sandákooyó ndiʼi ña̱ va̱ása va̱ʼa ña̱ kéʼéyó. Soo tá ndáyáʼvi ña̱ tákuyó nu̱úyó ta chíka̱a̱yó ndee̱ ña̱ sandákooyó ña̱ va̱ása va̱ʼa, Jehová chindeétáʼanvara xíʼinyó.

8. ¿Ndáaña xíniñúʼu keʼéyó ña̱ va̱ása kundoʼoyó iin tu̱ndóʼo ta saátu inkana?

⁸ Xa̱a̱ na̱kunda̱a̱-iniyó ña̱ ndáyáʼviní ña̱ tákuyó. Jehová kúni̱ra ña̱ ná chika̱a̱yó ndee̱ ña̱ va̱ása keʼéyó ña̱ʼa ña̱ kivi kaʼní miíyó á ña̱ kivi kaʼní inkana. Xa̱ʼa̱ ña̱yóʼo, xíniñúʼu kiʼinyó kuenta tá kávayó carro á motocicleta, ta saátu va̱ása xíniñúʼu kusíkíyó xíʼin ña̱ʼa ña̱ kivi satúkue̱ʼe̱ miíyó á ña̱ kivi kaʼní miíyó (Salmo 11:5). Saátu xíniñúʼu chika̱a̱yó ndee̱ ña̱ va̱ʼa vií koo veʼeyó. Jehová ni̱ka̱ʼa̱nra ña̱yóʼo xíʼin na̱ ñuu Israel: “Tá íxava̱ʼún iin veʼe xa̱á, xíniñúʼu keʼún iin nama̱ loʼo chí xi̱níña, tasaá kǒo chika̱ún tu̱ndóʼo nu̱ún xíʼin na̱ veʼún tá ná ndakava iinna” (Deuteronomio 22:8).

9. ¿Ndáa ki̱ʼva xíniñúʼu keʼéyó xíʼin kití?

⁹ Ta saátu kúni̱ Jehová ña̱ viíní ná keʼéyó xíʼin tí kití. Jehová táxira ña̱ ná kaʼníyó kití ña̱ kuxuyórí á ña̱ taváyó ti̱ko̱to̱ xíʼin ñii̱rí kundixiyó. Ta saátu táxira ña̱ ná kaʼníyó kití tí kúni̱ satúkue̱ʼe̱ miíyó (Génesis 3:21; 9:3; Éxodo 21:28). Soo va̱ása xíniñúʼu ixandi̱va̱ʼayó xíʼin kití á kaʼníyórí xa̱ʼa̱ ña̱ kúni̱ miíyó, ta ni va̱ása xíniñúʼu sakánitáʼanyórí xíʼin inkarí xa̱ʼa̱ ña̱ kúni̱ mií kuitíyó (Proverbios 12:10).

10. ¿Nda̱chun va̱ʼa kúnda̱a̱-iniyó ña̱ ni̱i̱ kúú ña̱ táxi ña̱ tákuyó?

¹⁰ Ña̱ yi̱i̱ kúú ni̱i̱ nu̱ú Jehová, saáchi ña̱yóʼo kúú ña̱ táxi ña̱ tákuyó. Xa̱ʼa̱ ña̱yóʼo, Jehová ta̱xira castigo ndaʼa̱ ta̱ Caín xa̱ʼa̱ ña̱ xa̱tara ni̱i̱ ñanira á xa̱ʼa̱ ña̱ xa̱ʼnírara (Génesis 4:10). Tándi̱ʼi ku̱un sa̱vi̱ kini, Jehová ni̱ka̱ʼa̱n tukura ña̱  ndáyáʼviní ni̱i̱ chi ña̱yóʼo kúú ña̱ táxi ña̱ tákuyó. Jehová ni̱ka̱ʼa̱nra ña̱ kivi kuxu ta̱ Noé xíʼin na̱ veʼera kití. Ta ni̱ka̱ʼa̱nra xíʼinna: “Ndiʼi kití tí táku va̱ʼava kuxundórí. Nda̱a̱ táki̱ʼva ta̱xii̱ ña̱ kuxundó ndiʼi ña̱ʼa ña̱ xáʼnu nu̱ú ñuʼú, ta saátu va̱ʼa kuxundó kití”. Soo Jehová ni̱ka̱ʼa̱nra xíʼinna ña̱ kǒo keʼéna iin ña̱ʼa, ka̱chira: “Va̱ʼava kuxundó ku̱ñu, soo ni̱i̱, kǒo kívi kuxundóña” (Génesis 1:29; 9:3, 4).

11. ¿Ndáaña ni̱ka̱ʼa̱n Jehová xa̱ʼa̱ ni̱i̱ xíʼin na̱ ñuura?

¹¹ Tá xa̱a̱ ni̱ya̱ʼa 800 ku̱i̱ya̱ ña̱ ni̱ka̱ʼa̱n Jehová xíʼin ta̱ Noé ña̱ va̱ása kuxuna ni̱i̱, Jehová ni̱ka̱ʼa̱n tukura xíʼin na̱ ñuura: “Tá iin na̱ ñuu Israel á iin na̱ inka ñuu na̱ íyo xíʼinndó xáʼnína á tíinna iin kití yukú á iin tí ndáchí tí kivi kuxuna, xíniñúʼu katana ni̱i̱rí ta ndakasina nu̱úña xíʼin ñuʼú”. Saá kúú ña̱ ni̱ka̱ʼa̱nra xíʼinna ña̱ va̱ása kuxuna ni̱i̱ (Levítico 17:13, 14). Jehová xi̱kuni̱ra ña̱ ná kundayáʼvi ni̱i̱ nu̱ú na̱ ñuura. Ta va̱ʼava kuxuna ku̱ñu soo va̱ása xíniñúʼu kuxuna ni̱i̱. Tá xi̱xaʼnína iin kití ña̱ va̱ʼa kuxunarí xi̱xiniñúʼu katana ni̱i̱rí nu̱ú ñuʼú.

12. ¿Ndáa ki̱ʼva íyo ni̱i̱ nu̱ú na̱ ndásakáʼnu Ndióxi̱?

¹² Tá xa̱a̱ ni̱ya̱ʼa loʼo ku̱i̱ya̱ ña̱ ni̱xi̱ʼi̱ ta̱ Jesús, na̱ apóstol xíʼin na̱ anciano ti̱xin congregación ña̱ ñuu Jerusalén nda̱takana ña̱ va̱ʼa kotona, ndáa ley ña̱ ta̱xi Ndióxi̱ ndaʼa̱ na̱ ñuu Israel kúú ña̱ xíniñúʼu kundiku̱nkana (kaʼvi Hechos 15:28, 29; 21:25). Jehová chi̱ndeétáʼanra xíʼinna ña̱ kunda̱a̱-inina ña̱ ndáyáʼviní ni̱i̱ nu̱úra, ta saátu xíniñúʼu kundayáʼviña nu̱ú na̱ ndásakáʼnu miíra. Na̱ cristiano na̱ xi̱ndoo tá siglo nu̱ú kǒo níxi̱xiniñúʼu kuxuna ni̱i̱. Ta saátu va̱ása níxiniñúʼu kuxuna ku̱ñu ña̱ ñúʼuka ni̱i̱ xíʼin. Ña̱ kuxuna ni̱i̱ iin ña̱ kininí kúúña, saáchi nda̱a̱ táki̱ʼva íyo na̱ ndásakáʼnu inka ndióxi̱ saá íyona á nda̱a̱ táki̱ʼva íyo na̱ kísi̱ xíʼin inkana saá íyona nu̱ú Jehová. Xa̱ʼa̱ ña̱kán, tiempo vitin na̱ ndásakáʼnu Ndióxi̱ va̱ása xíxina ni̱i̱.  Chi nu̱ú Jehová ña̱ yi̱i̱ kúú ña̱yóʼo ña̱kán kúni̱ra yi̱i̱ ná kooña nu̱úyó.

13. ¿Nda̱chun va̱ása xíín na̱ ndásakáʼnu Ndióxi̱ nde̱e ni̱i̱ miína?

¹³ ¿Á kúni̱ kachi ña̱yóʼo ña̱ va̱ása xíniñúʼu nde̱e ni̱i̱ na̱ ndásakáʼnu Ndióxi̱? Ndixava, kǒo xíniñúʼu nde̱e ni̱i̱na. Jehová káʼa̱nra ña̱ va̱ása xíniñúʼu kuxuyó ni̱i̱. Ndakanixi̱ní xa̱ʼa̱ ña̱yóʼo: tá ná ka̱ʼa̱n na̱ doctor xíʼún ña̱ kǒo xíniñúʼu koʼún ndixi, ¿á va̱ʼa nde̱erá ku̱ñún? Va̱ása va̱ʼa. Ki̱ʼva saá íyo ña̱ ni̱ka̱ʼa̱n Ndióxi̱ xíʼin na̱ ñuura, tá ni̱ka̱ʼa̱nra xíʼinna ña̱ va̱ása va̱ʼa kuxuna ni̱i̱ chi iin kúúña xíʼin ña̱ nde̱e ni̱i̱ miína. (Koto nota 29, “Ña̱ nde̱e ni̱i̱ ku̱ñuna”).

14, 15. Ni ndáyáʼviní ña̱ tákuyó nu̱úyó, ¿nda̱chun va̱ása yáʼandosóyó ña̱ káʼa̱n Ndióxi̱ xa̱ʼa̱ ña̱ kúni̱yó kutakuyó ku̱a̱ʼáka tiempo?

¹⁴ Soo, ¿ndáaña keʼéyó tá ná ka̱ʼa̱n na̱ doctor xíʼinyó ña̱ kuviyó tá ná kǒo nde̱e ni̱i̱ miíyó? Iin ta iin miíyó xíniñúʼu ndaka̱xin á kundiku̱nyó ley Ndióxi̱ ña̱ káʼa̱n xa̱ʼa̱ ni̱i̱ á va̱ása. Nu̱ú miíyó na̱ ndásakáʼnu Ndióxi̱ iin regalo ña̱ ta̱xira ndaʼa̱yó kúú ña̱ tákuyó ta íxato̱ʼóníyó ña̱yóʼo. Xa̱ʼa̱ ña̱kán ndúkúyó inka ta̱tán ña̱ kivi chindeétáʼan xíʼinyó ña̱ va̱ása kuviyó, soo kǒo táxiyó nde̱e ni̱i̱ miíyó.

¹⁵ Ña̱kán chíka̱a̱yó ndee̱ ña̱ kundaayó miíyó ta kǒo kiʼin kue̱ʼe̱ miíyó. Ni̱i̱ kúú ña̱ táxi ña̱ tákuyó ta ña̱ yi̱i̱ kúúña nu̱ú Ndióxi̱, xa̱ʼa̱ ña̱kán va̱ása táxiyó ndee̱ ni̱i̱ miíyó. Nu̱ú miíyó ña̱ ndáyáʼvika kúú ña̱ kuniso̱ʼoyó ña̱ káʼa̱n Jehová, nu̱úka ña̱ kuni̱yó kutakuyó ku̱a̱ʼá tiempo ta ya̱ʼandosóyó ña̱ káʼa̱nra. Ta̱ Jesús ni̱ka̱ʼa̱nra: “Na̱ kúni̱ sakǎku miína na̱ ndiʼi-xa̱ʼa̱va kúúna, soo na̱ xíʼi̱ xa̱ʼa̱ yi̱ʼi̱, ka̱kuvana” (Mateo 16:25). Kúni̱yó kuniso̱ʼoyó ña̱ káʼa̱n Jehová saáchi kúʼvi̱-iniyó xíniyóra. Ta saátu xíni̱ra ndáa ña̱ kúú ña̱ va̱ʼa miíyó. Nda̱a̱ táki̱ʼva ndáyáʼvi ña̱ tákuyó nu̱úra, saátu ndáyáʼviña nu̱ú miíyó chi ña̱ yi̱i̱ kúúña (Hebreos 11:6).

16. ¿Nda̱chun xíniso̱ʼoyó ña̱ káʼa̱n Ndióxi̱?

 ¹⁶ Na̱ ndásakáʼnu Ndióxi̱ kúni̱na kuniso̱ʼona ña̱ káʼa̱n leyra xa̱ʼa̱ ni̱i̱. Ña̱kán, va̱ása xíxina ni̱i̱ ta ni va̱ása táxina nde̱e ni̱i̱ miína. * Soo xíniñúʼuvana inka ta̱tán ña̱ kivi chindeétáʼan xíʼinna ña̱ va̱ʼa kutakuna. Ndióxi̱ kúú ta̱ i̱xava̱ʼa ni̱i̱ ta táxira ña̱ tákuyó, xa̱ʼa̱ ña̱kán kándíxayó ña̱ xíni̱ra ndáa ña̱ kúú ña̱ va̱ʼa miíyó. Ta yóʼó, ¿á kándíxaún ña̱ xíni̱ Ndióxi̱ ndáa ña̱ kivi chindeétáʼan xíʼún?

17. ¿Ndáa xa̱ʼa̱ kúú ña̱ xi̱taxi Jehová kuniñúʼu na̱ ñuu Israel ni̱i̱?

¹⁷ Nu̱ú ley ña̱ ta̱xi Jehová ndaʼa̱ ta̱ Moisés ni̱ka̱ʼa̱nra ña̱yóʼo xíʼin na̱ ñuu Israel: “Ni̱i̱ kúú ña̱ táxi ña̱ tákundó, ta yi̱ʼi̱ táxii̱ña ña̱ va̱ʼa kuniñúʼundóña nu̱ú altar ña̱ va̱ʼa ndoo ku̱a̱chindó, chi ni̱i̱ yóʼo kúú ña̱ va̱ʼa chaʼvi xa̱ʼa̱ndó”, á ña̱ va̱ʼa ixakáʼnu-inira xa̱ʼa̱ ku̱a̱china (Levítico 17:11). Tá xi̱kiʼvi na̱ ñuu Israel iin ku̱a̱chi, kivi ixakáʼnu-ini Jehová xa̱ʼa̱ ku̱a̱china tá ná kuniʼina iin kití ku̱ʼu̱n xíʼinna ini templo ña̱ va̱ʼa kaʼní ta̱ su̱tu̱ tíyóʼo ta katara ni̱i̱rí nu̱ú altar. Iinlá xa̱ʼa̱ ña̱yóʼo ta̱xi Jehová ña̱ kuniñúʼu na̱ ñuu Israel ni̱i̱.

18. ¿Ndáaña kivi ndakiʼinyó tíxa̱ʼvi ña̱ ni̱xi̱ʼi̱ ta̱ Jesús?

¹⁸ Tá ki̱xi ta̱ Jesús nu̱ú ñuʼú yóʼo, ta̱xira miíra ña̱ ni̱xi̱ʼi̱ra xa̱ʼa̱yó ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱chiyó. Tándi̱ʼi, va̱ása níxiniñúʼuka kaʼnína kití xa̱ʼa̱ ku̱a̱china. Ta kǒo níkeʼékana ña̱ xi̱ka̱ʼa̱n ley ña̱ ta̱xi Ndióxi̱ ndaʼa̱ ta̱ Moisés (Mateo 20:28; Hebreos 10:1). Ña̱ xi̱taku ta̱ Jesús iin ña̱ ndáyáʼviní xi̱kuuña, ta tíxa̱ʼvi ña̱ ni̱xi̱ʼi̱ra taxi Jehová ña̱ kutakuyó ndiʼi tiempo (Juan 3:16; Hebreos 9:11, 12; 1 Pedro 1:18, 19).

19. ¿Ndáaña xíniñúʼu keʼéyó ña̱ va̱ása kuníkáyó xa̱ʼa̱ ni̱i̱ ni iin na̱ yiví?

 ¹⁹ Táxiníyó tíxa̱ʼvi ndaʼa̱ Jehová xa̱ʼa̱ ña̱ táxira ña̱ tákuyó. Xa̱ʼa̱ ña̱kán, kúni̱yó natúʼunyó xíʼin na̱ yiví ña̱ ná kandíxana ña̱ ni̱xi̱ʼi̱ ta̱ Jesús xa̱ʼa̱na chi saá kivi ndakiʼinna ña̱ koona ndiʼi tiempo. Xa̱ʼa̱ ña̱ kúʼvi̱-iniyó xíniyó na̱ yiví, chíka̱a̱yó ndee̱ ña̱ sanáʼa̱yóna xa̱ʼa̱ ña̱ xíniñúʼu keʼéna ña̱ va̱ʼa ndakiʼinna ña̱ koona ndiʼi tiempo (Ezequiel 3:17-21). Saá kúú ña̱ kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ apóstol Pablo: “Va̱ása níkái̱ xa̱ʼa̱ ni̱i̱ ni iin na̱ yiví, saáchi ndiʼi tiempo xi̱ka̱ʼi̱n xíʼinna xa̱ʼa̱ ña̱ kúni̱ Ndióxi̱” (Hechos 20:26, 27). Tá káʼa̱nyó xíʼin na̱ yiví xa̱ʼa̱ Jehová xíʼin xa̱ʼa̱ ña̱ ndáyáʼviní ña̱ tákuyó nu̱úra, náʼa̱yó ña̱ íxato̱ʼóyó ña̱ tákuyó ta saátu ni̱i̱.