1. ¿Ndáa ki̱ʼva kúni̱ Ndióxi̱ ná kundoo na̱ yiví?

TÁ I̱XAVA̱ʼA Ndióxi̱ na̱ yiví na̱ nu̱ú, viíkaví xi̱kuni̱ra kundoona. Xi̱kuni̱ra koo ta̱ Adán xíʼin ñá Eva nu̱ú iin ñuʼú ña̱ liviní, ta koo ku̱a̱ʼá se̱ʼena ta ndasalivina iníísaá nu̱ú ñuʼú ta kundaana kití. Ta nda̱a̱ táki̱ʼva xi̱kuni̱ra ná kundoo na̱ yiví tá xa̱ʼa̱, saátu kúni̱ra ná kundoona vitin (Génesis 1:28; 2:8, 9, 15). (Koto nota 6, “Ña̱ kúni̱ Ndióxi̱ koo nu̱ú ñuʼú yóʼo”).

2. a) ¿Nda̱chun va̱ʼa kúnda̱a̱-iniyó ña̱ saxínu Ndióxi̱ ña̱ káʼa̱nra? b) ¿Ndáa na̱ yiví kúú na̱ koo nu̱ú ñuʼú yóʼo, ta nda̱saa tiempo kundoona nu̱úña?

² ¿Á kándíxaún ña̱ kixaa̱ iin ki̱vi̱ ña̱ kundooyó nu̱ú iin ñuʼú livi? Kixaa̱vaña. Jehová káʼa̱nra xíʼinyó: “Yi̱ʼi̱ kúú ta̱ káʼa̱n; ta sáxi̱nui̱ ña̱ káʼi̱n” (Isaías 46:9-11; 55:11). Ndióxi̱ saxínura ña̱ káʼa̱nra ta kǒo nda̱a̱ ni iin ña̱ kivi kasi nu̱úra. Ta saátu íyo iin xa̱ʼa̱ ña̱ i̱xava̱ʼa Jehová ñuʼú yóʼo. “Kǒo ní ixava̱ʼaraña ña̱ koo miíña” (Isaías 45:18). Ndióxi̱ kúni̱ra ña̱ ná kutú nu̱ú ñuʼú yóʼo xíʼin na̱ yiví. Soo, ¿ndáana yiví kúni̱ Ndióxi̱ koo nu̱ú ñuʼú yóʼo, ta nda̱saa tiempo kundoona nu̱úña? Ña̱ Biblia káchiña: “Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:29; Apocalipsis 21:3, 4).

3. ¿Ndáaña kivi nda̱ka̱tu̱ʼunyó miíyó xa̱ʼa̱ ña̱ xítoyó ña̱ kíʼin kue̱ʼe̱ na̱ yiví ta xíʼi̱na?

³ Tiempo vitin na̱ yiví kíʼin kue̱ʼe̱ miína ta xíʼi̱vana. Ku̱a̱ʼání ñuu, na̱ yiví kánitáʼanna ta xáʼní-táʼanna. Ta su̱ví ña̱yóʼo kúú ña̱ níxikuni̱ Ndióxi̱ tá xa̱ʼa̱. Tá saá, ¿ndáaña ku̱u?  ¿Nda̱chun ta̱ʼán xi̱nu ña̱ kúni̱ Ndióxi̱ koo? Iinlá ña̱ Biblia kúú ña̱ kivi natúʼun xíʼinyó xa̱ʼa̱ ña̱yóʼo.

4, 5. a) ¿Ndáana xi̱niñúʼu tí ko̱o̱ ña̱ ni̱ka̱ʼa̱nrí xíʼin ñá Eva? b) ¿Ndáa ki̱ʼva xáa̱ iin na̱ yiví va̱ʼa ndúuna iin na̱ kui̱ʼná?

⁴ Ña̱ Biblia káʼa̱nña xíʼinyó ña̱ íyo iin ta̱ sáa̱-ini xíni Ndióxi̱ ta ta̱yóʼo kúú “ta̱ Ndi̱va̱ʼa”. Nu̱ú jardín ña̱ Edén, ta̱ Ndi̱va̱ʼa xi̱niñúʼura iin tí ko̱o̱ ña̱ ni̱ka̱ʼa̱nrí xíʼin ñá Eva (Apocalipsis 12:9; Génesis 3:1). Sa̱ndáʼvirañá ña̱ va̱ʼa ná ndakanixi̱níñá ña̱ ndixa tí ko̱o̱ kúú tí ni̱ka̱ʼa̱n xíʼinñá. (Koto nota 7, “Ta̱ Ndi̱va̱ʼa”).

⁵ Tá saá, ¿á Ndióxi̱ kúú ta̱ i̱xava̱ʼa ta̱ Ndi̱va̱ʼa? Su̱ví Ndióxi̱ ní ixava̱ʼa-ñaʼá. Tá i̱xava̱ʼa Ndióxi̱ ñuʼú yóʼo ña̱ va̱ʼa koo ta̱ Adán xíʼin ñá Eva nu̱úña, ku̱a̱ʼání na̱ ángel ni̱xi̱yo chí ndiví. Tá ni̱ya̱ʼa tiempo iin ta̱ ángel ndu̱ura ta̱ Ndi̱va̱ʼa (Job 38:4, 7). ¿Nda̱chun ke̱ʼéra ña̱yóʼo? ¿Á kivi xa̱a̱ iin na̱ yiví va̱ʼa nduuna iin na̱ kui̱ʼná? Nda̱a̱ ni iinna va̱ása kákuna ta xa̱a̱ kúúna na̱ kui̱ʼná. Tá iinna kúni̱na kuumiína ña̱ʼa ña̱ kúúmií inkana, kíxáʼana ndákanixi̱nína xa̱ʼa̱ ña̱yóʼo, tá ndeéka xáʼnuña níma̱na nda̱a̱ xáa̱na íxakuíʼnána ña̱yóʼo. Tasaá kúú ña̱ xáa̱ iin na̱ yiví va̱ʼa ndúuna iin na̱ kui̱ʼná (kaʼvi Santiago 1:13-15). (Koto nota 8, “Na̱ ángel”).

6. ¿Ndáa ki̱ʼva ni̱xa̱a̱ iin ta̱ ángel ndu̱ura ta̱ sáa̱-ini xíni Ndióxi̱?

⁶ Ña̱yóʼo kúú ña̱ ndo̱ʼo ta̱ ángel kán. Tá i̱xava̱ʼa Jehová ta̱ Adán xíʼin ñá Eva, ni̱ka̱ʼa̱nra xíʼinna ña̱ ná koo se̱ʼena tá ná sakutúna nu̱ú ñuʼú yóʼo (Génesis 1:27, 28). Sana ta̱ ángel kán nda̱kanixi̱níra ña̱yóʼo: “Ndiʼi na̱ yiví yóʼo kivi ndasakáʼnuna yi̱ʼi̱ nu̱úka ña̱ ndasakáʼnuna Jehová”. Xa̱ʼa̱ ña̱ nda̱kundeéra nda̱kanixi̱níra xa̱ʼa̱ ña̱yóʼo ki̱xáʼara kúni̱ra koora táki̱ʼva íyo Jehová, ña̱ va̱ʼa ndasakáʼnu na̱ yiví miíra. Xa̱ʼa̱ ña̱kán, ni̱ka̱ʼa̱nra ña̱ vatá xíʼin ñá Eva ta ku̱chiñura sa̱ndáʼvirañá (kaʼvi Génesis 3:1-5). Xa̱ʼa̱ ña̱ ke̱ʼéra  ña̱yóʼo, ndu̱ura ta̱ Ndi̱va̱ʼa. Tasaá ndu̱ura ta̱ sáa̱-ini xíni Ndióxi̱.

7. a) ¿Nda̱chun ni̱xi̱ʼi̱ ta̱ Adán xíʼin ñá Eva? b) ¿Nda̱chun kúchéeyó ta xíʼi̱yó? Ka̱ʼa̱n xa̱ʼa̱ iin ejemplo.

⁷ Ndióxi̱ ni̱ka̱ʼa̱nra xíʼin ta̱ Adán ta saátu xíʼin ñá Eva ña̱ va̱ása kaxína ku̱i̱ʼi ndaʼa̱ iin yitu̱n tú níndichi jardín. Ta ni̱ka̱ʼa̱nra xíʼinna tá ná kaxínarí kuvivana. Soo na̱kán ni̱ya̱ʼandosóna ña̱ ni̱ka̱ʼa̱nra xíʼinna ta xa̱xívanarí (Génesis 2:17; 3:6). Ta̱ Adán xíʼin ñá Eva ni̱ki̱ʼvina ku̱a̱chi ta ni̱ya̱ʼa tiempo ni̱xi̱ʼi̱vana, nda̱a̱ táki̱ʼva ni̱ka̱ʼa̱n Jehová xíʼinna (Génesis 3:17-19). Tá ka̱ku se̱ʼe ta̱ Adán xíʼin ñá Eva saátu na̱yóʼo ndu̱una na̱ ku̱a̱chi, ña̱kán ni̱xi̱ʼi̱tu na̱yóʼova (kaʼvi Romanos 5:12). ¿Ndáa ki̱ʼva ni̱xa̱a̱ na̱ se̱ʼe ta̱ Adán xíʼin ñá Eva ndu̱una na̱ yiví ku̱a̱chi? Ná ndakanixi̱níyó xa̱ʼa̱ ña̱yóʼo: ná kachiyó ña̱ íxava̱ʼún si̱táva̱ʼa ini iin ka̱a ña̱ ni̱cho̱ʼmá á ña̱ ku̱yakuaá. ¿Ndáa ki̱ʼva kana si̱táva̱ʼa yóʼo? Nda̱a̱ táki̱ʼva káa mií ka̱a yóʼo saá kanaña. Tá ni̱ya̱ʼandosó ta̱ Adán ña̱ ni̱ka̱ʼa̱n Ndióxi̱ xíʼinra ndu̱ura ta̱ ku̱a̱chi. Xa̱ʼa̱ ña̱ kúúyó se̱ʼera ndiʼiyó kúúyó na̱ yiví ku̱a̱chi. Xa̱ʼa̱ ña̱kán, ndiʼiyó kúchéeyó ta xíʼi̱yó (Romanos 3:23). (Koto nota 9, “Ku̱a̱chi”).

8, 9. a) ¿Ndáaña xi̱kuni̱ ta̱ Ndi̱va̱ʼa ná ndakanixi̱ní ta̱ Adán xíʼin ñá Eva? b) ¿Nda̱chun va̱ása ndi̱ku̱n nísandiʼi-xa̱ʼa̱ Jehová u̱ni̱ saá na̱ ni̱ya̱ʼandosó ña̱ ni̱ka̱ʼa̱nra?

⁸ Xa̱ʼa̱ ña̱ ku̱chiñu ta̱ Ndi̱va̱ʼa sa̱ndáʼvira ta̱ Adán xíʼin ñá Eva ndu̱ura ta̱ sáa̱-ini xíni Ndióxi̱. Ta̱kán xi̱kuni̱ra ná ndakanixi̱ní ta̱ Adán xíʼin ñá Eva ña̱ ta̱ vatá kúú Ndióxi̱, ta va̱ása va̱ʼa xáʼndachíñura ta ni va̱ása kúni̱ra vií koona. Xíʼin ña̱ tu̱ʼun yóʼo xi̱kuni̱ kachi ta̱ Ndi̱va̱ʼa, ña̱ va̱ása xíniñúʼu ka̱ʼa̱n Ndióxi̱ xíʼin na̱ yiví ndáa ña̱ keʼéna. Saátu xi̱kuni̱ kachira, ña̱ kivi ndaka̱xin mií ta̱ Adán xíʼin ñá Eva ndáa ña̱ kúni̱na keʼéna kúúña ña̱ va̱ʼa á ña̱ va̱ása va̱ʼa. ¿Ndáaña kivi keʼé Jehová xa̱ʼa̱ ña̱yóʼo? Kiviva sandíʼi-xa̱ʼa̱rana tasaá ndiʼi ku̱a̱chi. Soo tá saá níkeʼéra, va̱ása kivi kunda̱a̱-iniyó xa̱ʼa̱ ta̱ Ndi̱va̱ʼa ña̱ kúúra iin ta̱ vatá.

 ⁹ Va̱ása ndi̱ku̱n nísandiʼi-xa̱ʼa̱ Jehová na̱ ke̱ʼé ña̱yóʼo, ta̱xivara tiempo ndaʼa̱ na̱ yiví ña̱ ná kaʼndachíñuna nu̱ú inka na̱ yiví. ¿Nda̱chun ke̱ʼéra ña̱yóʼo? Saáchi saá kúú ña̱ kivi kunda̱a̱-iniyó ña̱ iin ta̱ vatá kúú ta̱ Ndi̱va̱ʼa, ta iinlá Jehová kúú ta̱ xíni̱ ndáa ki̱ʼva va̱ʼa kundooyó. Sakuaʼakayó xa̱ʼa̱ ña̱yóʼo nu̱ú capítulo 11. Ta yóʼó, ¿ndáaña ndákanixi̱níún xa̱ʼa̱  ña̱ ke̱ʼé ta̱ Adán xíʼin ñá Eva? ¿Á va̱ʼa ke̱ʼéna ña̱ ka̱ndíxana ña̱ ni̱ka̱ʼa̱n ta̱ Ndi̱va̱ʼa ta va̱ása níkeʼéna ña̱ ni̱ka̱ʼa̱n Ndióxi̱? Jehová kúú ta̱ ta̱xi ndiʼi ña̱ʼa va̱ʼa ndaʼa̱na, i̱xava̱ʼara iin ñuʼú livi nu̱ú kundoona, ta ni̱ka̱ʼa̱nra xíʼinna ná kundaana kití ta saátu i̱xava̱ʼarana ña̱ koona ndiʼi tiempo. Soo ta̱ Ndi̱va̱ʼa kǒo nda̱a̱ ni iin ña̱ʼa va̱ʼa nítaxira ndaʼa̱na. Tá miíún níxi̱yoún kán, ¿ndáaña keʼún?

10. ¿Ndáaña xíniñúʼu ndaka̱xinyó keʼéyó?

¹⁰ Nda̱a̱ táki̱ʼva ni̱xi̱yo na̱kán saátu íyo miíyó, chi xíniñúʼu ndaka̱xinyó á kandíxayó Jehová á ta̱ Ndi̱va̱ʼa. Tá ná ndaka̱xinyó ña̱ kaʼndachíñu Jehová nu̱úyó, na̱ʼa̱yó ña̱ iin ta̱ vatá kúú ta̱ Ndi̱va̱ʼa (Salmo 73:28; kaʼvi Proverbios 27:11). Nu̱ú ñuyǐví yóʼo, loʼova kúú na̱ yiví na̱ kéʼé ña̱ kúni̱ Ndióxi̱. Ta su̱ví ta̱yóʼo kúú ta̱ xáʼndachíñu ñuyǐví yóʼo. Tá su̱ví Ndióxi̱ kúú ta̱ xáʼndachíñu, ¿ndáana xáʼndachíñu?

11, 12. a) ¿Ndáaña sákuaʼayó xíʼin ña̱ ke̱ʼé ta̱ Ndi̱va̱ʼa xíʼin ta̱ Jesús? b) ¿Ndáa texto kúú ña̱ náʼa̱ nu̱úyó ña̱ xáʼndachíñu ta̱ Ndi̱va̱ʼa ñuyǐví yóʼo?

¹¹ Ta̱ Jesús xi̱kunda̱a̱ va̱ʼa inira ndáa na̱ xáʼndachíñu ñuyǐví yóʼo. Iin ki̱vi̱ ta̱ Ndi̱va̱ʼa ni̱na̱ʼa̱ra nu̱ú ta̱ Jesús “ndiʼi ñuu náʼnu ña̱ íyo ñuyǐví yóʼo xíʼin ña̱ ku̱i̱ká”. Ta ni̱ka̱ʼa̱nra xíʼinra: “Ndiʼi ña̱yóʼo taxii̱ ndaʼún tá ná kuxítíún nu̱úi̱ ta ndasakáʼnún yi̱ʼi̱” (Mateo 4:8, 9; Lucas 4:5, 6). Ndakanixi̱ní xa̱ʼa̱ ña̱yóʼo, tá su̱ví kuenta ta̱ Ndi̱va̱ʼa kúú ña̱ íyo ñuyǐví yóʼo, ¿á ka̱ʼa̱nra taxiraña ndaʼa̱ ta̱ Jesús? Xíʼin ña̱yóʼo kúnda̱a̱ káxi iniyó ña̱ ndiʼi na̱ chíñu kuenta ta̱ Ndi̱va̱ʼa kúúna.

¹² Sana miíún ndákanixi̱níún: “¿Á mií ña̱ nda̱a̱ ta̱ Ndi̱va̱ʼa kúú ta̱ xáʼndachíñu ñuyǐví yóʼo? ¿Á su̱ví Jehová ta̱ íyo ndiʼi ndee̱ kúú ta̱ ní ixava̱ʼa ñuyǐví yóʼo?” (Apocalipsis 4:11). Jehová kúú ta̱ i̱xava̱ʼavaña. Soo ta̱ Jesús káxiní ni̱ka̱ʼa̱nra xa̱ʼa̱ ta̱ Ndi̱va̱ʼa ña̱ kúúra ta̱ xáʼndachíñu ñuyǐví yóʼo (Juan 12:31;  14:30; 16:11). Ta̱ apóstol Pablo ni̱ka̱ʼa̱nra ta̱ Ndi̱va̱ʼa kúú ndióxi̱ nu̱ú ñuyǐví yóʼo (2 Corintios 4:3, 4). Ta ta̱ apóstol Juan ni̱ka̱ʼa̱nra ña̱ “ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa” (1 Juan 5:19).

13. ¿Nda̱chun xíniñúʼuyó iin ñuyǐví xa̱á?

¹³ Ñuyǐví yóʼo ndeéníka kini ku̱a̱ʼa̱n ndúuña. Iníí íyo guerra, íyo na̱ yiví na̱ sándaʼvi, na̱ káʼa̱n ña̱ vatá, xíʼin na̱ kánitáʼan. Ni ndeéníva chíka̱a̱ na̱ yiví ndee̱ kǒo kúchiñuna sandíʼi-xa̱ʼa̱na ndiʼi tu̱ndóʼo ña̱ íyo. Xa̱ʼa̱ ña̱kán, xa̱a̱ ku̱nu̱mí sandíʼi-xa̱ʼa̱ Ndióxi̱ ndiʼi ña̱ kini ña̱ íyo ñuyǐví yóʼo ti̱xin guerra ña̱ Armagedón, ta ndasaxa̱ára ñuyǐví yóʼo ta kǒoka ña̱ kini koo (Apocalipsis 16:14-16). (Koto nota 10, “Armagedón”).

14. a) ¿Ndáa ta̱ nda̱kaxin Ndióxi̱ koo Rey? b) ¿Ndáaña ni̱ka̱ʼa̱n Biblia xa̱ʼa̱ ta̱ Jesús?

¹⁴ Reino Ndióxi̱ ña̱ íyo chí ndiví sandaviíña ñuyǐví yóʼo. Ta Jehová nda̱kaxinra ta̱ Jesús ña̱ koora Rey chí ndiví. Xa̱a̱ ku̱a̱ʼání ku̱i̱ya̱ chí sa̱tá, ña̱ Biblia ni̱ka̱ʼa̱nña xa̱ʼa̱ ta̱ Jesús ña̱ kaʼndachíñura, ta ndiʼi tiempo kaʼndachíñura (Isaías 9:6, 7). Ta̱ Jesús sa̱náʼa̱ra na̱ discípulora ña̱ ná ka̱ʼa̱nna xíʼin Ndióxi̱ xa̱ʼa̱ ña̱ Reino, tá ni̱ka̱ʼa̱nra ña̱yóʼo: “Ná kixaa̱ ña̱ kaʼndachíñún. Ta ná koo ña̱ kúni̱ miíún, nda̱a̱ táki̱ʼva íyo chí ndiví, saá ná koo nu̱ú ñuʼú yóʼo” (Mateo 6:10). Nu̱ú capítulo 8 sakuaʼayó xa̱ʼa̱ Reino Ndióxi̱ ña̱ sandíʼi-xa̱ʼa̱ña ndiʼi na̱ chíñu ñuyǐví yóʼo, ta iinlá miíña kaʼndachíñu nu̱ú ñuʼú yóʼo (kaʼvi Daniel 2:44). Tasaá kúú ña̱ ndasalivi Reino Ndióxi̱ nu̱ú ñuʼú yóʼo. (Koto nota 11, “Reino Ndióxi̱”).

15. ¿Ndáaña kúni̱ kachi “ñuʼú xa̱á”?

¹⁵ Ña̱ Biblia káʼa̱nña xíʼinyó: “Soo íyo iin ndiví xa̱á xíʼin  iin ñuʼú xa̱á ña̱ ndátuyó, ña̱ ni̱ka̱ʼa̱nra xa̱ʼa̱, tasaá koo ña̱ nda̱kú” (2 Pedro 3:13; Isaías 65:17). Sava yichi̱, tá káʼa̱n ña̱ Biblia xa̱ʼa̱ ña̱ tu̱ʼun “ñuʼú” xa̱ʼa̱ na̱ yiví na̱ ndóo nu̱úvaña káʼa̱nña xa̱ʼa̱ (Génesis 11:1). Ña̱kán, tá káʼa̱nña xa̱ʼa̱ “ñuʼú xa̱á” káʼa̱nña xa̱ʼa̱ na̱ yiví na̱ xíniso̱ʼo ña̱ káʼa̱n Ndióxi̱. Ta ndiʼi na̱yóʼo kúú na̱ kundoo nu̱ú ñuʼú livi.

16. a) ¿Ndáaña taxi Ndióxi̱ ndaʼa̱ na̱ koo nu̱ú ñuyǐví xa̱á? b) ¿Ndáaña xíniñúʼu keʼéyó ña̱ va̱ʼa kutakuyó ndiʼi tiempo?

¹⁶ Ta̱ Jesús ni̱ka̱ʼa̱nra ña̱ taxi Ndióxi̱ kutaku na̱ kundoo nu̱ú ñuyǐví xa̱á ndiʼi tiempo (Marcos 10:30). ¿Ndáaña xíniñúʼu keʼéyó ña̱ va̱ʼa kutakuyó ndiʼi tiempo? Kivi kunda̱a̱-iniyó xa̱ʼa̱ ña̱yóʼo nu̱ú Juan 3:16 xíʼin 17:3 (kaʼviña). Ta vitin ná kotoyó ndáa ki̱ʼva koo ñuyǐví xa̱á káchi ña̱ Biblia.

17, 18. ¿Nda̱chun va̱ʼa kúnda̱a̱-iniyó ña̱ kǒoka tu̱ndóʼo koo nu̱ú ñuyǐví xa̱á ta ni va̱ása yi̱ʼvíkayó?

¹⁷ Kǒoka ña̱ kini koo, ni guerra, ni tu̱ndóʼo. Va̱ása kooka na̱ yiví na̱ ndi̱va̱ʼa-ini nu̱ú ñuʼú yóʼo (Salmo 37:10, 11). Na̱ yiví na̱ kundoo nu̱ú ñuʼú yóʼo kúú na̱ kúʼvi̱-ini xíni Ndióxi̱ ta xíniso̱ʼona ña̱ káʼa̱nra. Ta ndiʼi tiempo va̱ʼaní kundoona (Salmo 72:7). Ndióxi̱ sandíʼi-xa̱ʼa̱ra ndiʼi guerra (Salmo 46:9; Isaías 2:4).

¹⁸ Na̱ ñuu Jehová va̱ása yi̱ʼvíkana. Tá tiempo xi̱naʼá tá xi̱xiniso̱ʼo na̱ ñuu Israel ña̱ xi̱ka̱ʼa̱n Jehová xíʼinna, va̱ʼaní xi̱ndaarana ta kǒo nda̱a̱ ni iin ña̱ʼa níxi̱yiʼvína nu̱ú (Levítico 25:18, 19). Saátu nu̱ú ñuyǐví xa̱á, nda̱a̱ ni iin ña̱ʼa va̱ása yi̱ʼvíyó nu̱ú. Ndiʼi tiempo va̱ʼaní kundooyó (kaʼvi Isaías 32:18; Miqueas 4:4).

19. ¿Nda̱chun va̱ʼa kúnda̱a̱-iniyó ña̱ koo ku̱a̱ʼání ña̱ kuxu ndiʼina nu̱ú ñuyǐví xa̱á?

¹⁹ Koo ku̱a̱ʼání ña̱ kuxu ndiʼina. Ña̱ Biblia káchiña: “Nu̱ú ñuʼú ku̱a̱ʼání ña̱ʼa koo kuxuna, chí yuku̱ ku̱a̱ʼáka ña̱ koo” (Salmo 72:16). Jehová “taxira bendición ndaʼa̱yó” ta “ku̱a̱ʼání ña̱ʼa koo nu̱ú ñuʼú” (Salmo 67:6).

20. ¿Nda̱chun va̱ʼa kúnda̱a̱-iniyó ña̱ iníísaá ñuʼú yóʼo liviní kooña?

 ²⁰ Iníísaá ñuʼú yóʼo liviní kooña. Liviní koo veʼeyó ta saátu liviní koo jardín ña̱ kuumiíyó (kaʼvi Isaías 65:21-24; Apocalipsis 11:18). Iníísaá nu̱ú ñuʼú yóʼo liviní kooña nda̱a̱ táki̱ʼva ni̱xi̱yo jardín ña̱ Edén. Jehová taxira ndiʼi ña̱ xíniñúʼuyó. Ña̱ Biblia káʼa̱nña ña̱yóʼo xa̱ʼa̱ Ndióxi̱: “Xúnaún ndaʼún ta táxiún ña̱ʼa ña̱ xíniñúʼu ndiʼi ña̱ táku” (Salmo 145:16).

21. ¿Nda̱chun va̱ʼa kúnda̱a̱-iniyó ña̱ kǒoka ña̱ keʼé na̱ yiví xíʼin tí kití, ta ni tíyóʼo kǒo ña̱ keʼérí xíʼinna?

²¹ Kǒoka ña̱ keʼé na̱ yiví xíʼin tí kití, ta ni tíyóʼo kǒoña keʼérí xíʼinna. Tí kití va̱ása kue̱ʼe̱ka koorí xíʼin na̱ yiví, ta na̱yóʼo kǒoka ña̱ keʼéna xíʼinrí. Ta kití tí kue̱ʼe̱ní tí íyo tiempo vitin kǒoka ña̱ keʼérí xíʼin na̱ va̱lí (kaʼvi Isaías 11:6-9; 65:25).

22. ¿Ndáaña keʼé ta̱ Jesús xíʼin na̱ kúúmií kue̱ʼe̱?

²² Va̱ása kuumiíka na̱ yiví kue̱ʼe̱. Tá ni̱xi̱yo ta̱ Jesús nu̱ú ñuʼú yóʼo ku̱a̱ʼání na̱ yiví sa̱ndáʼara (Mateo 9:35; Marcos 1:40-42; Juan 5:5-9). Soo xa̱ʼa̱ ña̱ kúúra Rey ti̱xin Reino Ndióxi̱ sandáʼara ndiʼi na̱ kúúmií kue̱ʼe̱. Ta nda̱a̱ ni iinna va̱ása ka̱ʼa̱nkana: “Kue̱ʼe̱ kúúmiíi̱” (Isaías 33:24; 35:5, 6).

23. ¿Ndáaña keʼé Ndióxi̱ xíʼin na̱ ni̱xi̱ʼi̱?

²³ Na̱ ni̱xi̱ʼi̱ ndatakuna. Ndióxi̱ káʼa̱nra ña̱ sandátakura ku̱a̱ʼání na̱ yiví. Ndataku na̱ yiví na̱ sa̱kuaʼa xa̱ʼa̱ Ndióxi̱ ta saátu na̱ va̱ása nísakuaʼa xa̱ʼa̱ra (Hechos 24:15; kaʼvi Juan 5:28, 29).

24. ¿Ndáaña ndákanixi̱níún xa̱ʼa̱ ña̱ kooyó nu̱ú ñuyǐví xa̱á?

²⁴ Ndiʼiyó kivi ndaka̱xinyó ndáa ña̱ keʼéyó: ¿á sakuaʼayó xa̱ʼa̱ Jehová ta keʼéyó ña̱ káʼa̱nra á keʼéyó ña̱ kúni̱ miívayó? Tá ná keʼéyó ña̱ káʼa̱n Jehová si̱íní kooyó chí nu̱únínu. Ta̱ Jesús ni̱ka̱ʼa̱nra ña̱yóʼo xíʼin iin ta̱a ta̱ xi̱tikaa sii̱nra: “Koún xíʼi̱n nu̱ú ñuʼú livi” (Lucas 23:43). Ná sakuaʼakayó xa̱ʼa̱ ta̱ Jesucristo ta saátu xa̱ʼa̱ ña̱ keʼéra ña̱ va̱ʼa xi̱nu ña̱ kúni̱ Ndióxi̱.