1, 2. ¿Ndáana kúú sava na̱ xi̱kuu migo Jehová?

¿NDÁANA ndaka̱xiún koo migoún? Sana iin na̱ va̱ʼaní kítáʼan xíʼún, iin na̱ va̱ʼaní-ini á iin na̱ kútóoníún ña̱ kéʼé.

² Jehová ndáka̱xinra sava na̱ yiví ña̱ koona migora. Tá kúú ta̱ Abrahán, ta̱yóʼo xi̱kuura migo Jehová (Isaías 41:8; Santiago 2:23). Saátu ta̱ rey David xi̱kuura migo Jehová. Nu̱ú Jehová, ta̱ David iin ta̱a va̱ʼaní xi̱kuura (Hechos 13:22). Ta saátu ta̱ profeta Daniel iin “ta̱ ndáyáʼviní” xi̱kuura nu̱ú Jehová (Daniel 9:23).

3. ¿Nda̱chun xi̱kuu ta̱ Abrahán, ta̱ David xíʼin ta̱ Daniel migo Jehová?

³ ¿Nda̱chun xi̱kuu ta̱ Abrahán, ta̱ David xíʼin ta̱ Daniel migo Jehová? Jehová ni̱ka̱ʼa̱nra xíʼin ta̱ Abrahán: “Yóʼó va̱ʼaní xi̱niso̱ʼún ña̱ ni̱ka̱ʼi̱n xíʼún” (Génesis 22:18). Jehová kúúra migo na̱ vitá-ini ta xíniso̱ʼona ña̱ káʼa̱nra xíʼinna. Ta nda̱a̱ kivi xa̱a̱ra koora migo ndiʼi na̱ ñuu. Jehová ni̱ka̱ʼa̱nra xíʼin na̱ ñuu Israel: “Kuniso̱ʼondó ña̱ káʼi̱n, ta yi̱ʼi̱ xa̱i̱ koi̱ Ndióxi̱ miíndó, ta ndóʼó xa̱a̱ndó koondó na̱ ñui̱” (Jeremías 7:23). Ta saátu yóʼó kivi koún migo Jehová tá xíniso̱ʼún ña̱ káʼa̱nra.

4, 5. ¿Ndáa ki̱ʼva chíndeétáʼan Jehová xíʼin na̱ migora?

⁴ Íyo iin ta̱ sáa̱-ini xíni miíyó ta va̱ása kúni̱ra ña̱ kooyó migo Ndióxi̱. Soo Jehová kúni̱ra chindeétáʼanra xíʼinyó ta kúni̱ra kundaara miíyó (kaʼvi Salmo 55:22). Ña̱ Biblia káʼa̱nña ña̱ ndúkú Jehová ki̱ʼva ña̱ chindeétáʼanra xíʼin na̱ ndinuʼu-ini kúni̱ ndasakáʼnu-ñaʼá (2 Crónicas 16:9). Nu̱ú  Salmo 32:8, Jehová káʼa̱nra xíʼin na̱ migora ña̱ taxira ña̱ ndíchi ndaʼa̱na ta saátu consejo.

⁵ Xa̱ʼa̱ ña̱ kúúyó migora, ndásakáʼnuyóra xíʼin ndiʼi níma̱yó ta nda̱kú íyo iniyó xíʼinra ni ndeéní tu̱ndóʼo yáʼayó nu̱ú. Ta saátu kándíxaníyóra nda̱a̱ táki̱ʼva xi̱kandíxa ta̱ David miíra. Ta̱ David ni̱ka̱ʼa̱nra ña̱yóʼo xa̱ʼa̱ Jehová: “Xa̱ʼa̱ ña̱ íyora chí ndaʼa̱ kúaʼi̱, kǒo ni iin ña̱ʼa kundoʼi̱” (Salmo 16:8; 63:8). ¿Ndáa ña̱ʼa kéʼé ta̱ Ndi̱va̱ʼa ña̱ kasira nu̱úyó ña̱ kooyó migo Jehová?

6. ¿Ndáaña káʼa̱n ta̱ Ndi̱va̱ʼa xa̱ʼa̱ na̱ yiví?

⁶ Nu̱ú capítulo 11 sa̱kuaʼayó ña̱ ni̱ka̱ʼa̱n ta̱ Ndi̱va̱ʼa ña̱ va̱ása va̱ʼa xáʼndachíñu Jehová ta saátu ni̱ka̱ʼa̱nra ña̱ kúúra iin ta̱ vatá. Ta ni̱ka̱ʼa̱ntura ña̱ va̱ása va̱ʼa-ini Jehová, saáchi kǒo nítaxira ña̱ ndaka̱xin mií ta̱ Adán xíʼin ñá Eva ndáa ña̱ kúú ña̱ va̱ʼa ta ndáa ña̱ va̱ása va̱ʼa keʼéna. Nu̱ú libro ta̱ Job káʼa̱nña xíʼinyó ña̱ xíto va̱ʼa ta̱ Ndi̱va̱ʼa ña̱ kéʼé na̱ kúni̱ koo migo Ndióxi̱ ta káʼa̱nra ña̱ va̱ása va̱ʼa xa̱ʼa̱na. Ta káʼa̱nra ña̱ ndásakáʼnuna Ndióxi̱ xa̱ʼa̱ ña̱ʼa ña̱ táxira ndaʼa̱na, ta su̱ví xa̱ʼa̱ ña̱ kúʼvi̱-inina xíninara kúúña. Ta káʼa̱ntura ña̱ kivi sakúxíkara nda̱a̱ ndáaka na̱ yiví nu̱ú Ndióxi̱. Ná kotoyó ndáa ña̱ kivi sakuaʼayó xa̱ʼa̱ ta̱ Job, ta ná kotoyó á nda̱kú ni̱xi̱yo inira xíʼin Jehová.

7, 8. a) ¿Ndáaña xi̱ndakanixi̱ní Jehová xa̱ʼa̱ ta̱ Job? b) ¿Ndáaña ni̱ka̱ʼa̱n ta̱ Ndi̱va̱ʼa xa̱ʼa̱ ta̱ Job?

⁷ ¿Ndáa ta̱a xi̱kuu ta̱ Job? Iin ta̱a va̱ʼa xi̱kuura ta xa̱a̱ yáʼa 3,600 ku̱i̱ya̱ ni̱xi̱yora. Jehová ni̱ka̱ʼa̱nra ña̱ kǒo nda̱a̱ ni iinna níxi̱yo táki̱ʼva ni̱xi̱yo ta̱kán. Chi ta̱ Job xi̱ ixato̱ʼóníra Jehová ta xi̱kundasíra xi̱xinira ña̱ kini (Job 1:8). Ta̱ Job va̱ʼaní xi̱kitáʼanra xíʼin Jehová.

⁸ Ta̱ Ndi̱va̱ʼa ni̱ka̱ʼa̱nra xa̱ʼa̱ ta̱ Job ña̱ xi̱ndasakáʼnura  Jehová xa̱ʼa̱ ña̱ʼa ña̱ xi̱taxira ndaʼa̱ra. Ta̱ Ndi̱va̱ʼa ni̱ka̱ʼa̱nra xíʼin Jehová: “¿Á su̱ví miívaún kúú ta̱ ndáa miíra, ndáún na̱ veʼera ta ndáún ndiʼika ña̱ʼa ña̱ kúúmiíra? Ku̱a̱ʼákaví ña̱ʼa va̱ʼa táxiún ndaʼa̱ra, chi ku̱a̱ʼání kúú kití sa̱na̱ra. Soo kindaa ndiʼi ña̱ʼa ndaʼa̱ra saá kuniún á ndixa kǒo ka̱ʼa̱n chíʼñara xa̱ʼún” (Job 1:10, 11).

9. ¿Ndáaña ta̱xi Jehová ke̱ʼé ta̱ Ndi̱va̱ʼa?

⁹ Ta̱ Ndi̱va̱ʼa ni̱ka̱ʼa̱nra ña̱ ta̱ Job xi̱ndasakáʼnu kuitíra Jehová xa̱ʼa̱ ña̱ʼa ña̱ xi̱taxira ndaʼa̱ra. Ta ni̱ka̱ʼa̱ntura ña̱ kivi sakúxíkara ta̱ Job nu̱ú Jehová ta va̱ása ndasakáʼnukarara. Ni kǒo níkandíxa Jehová ña̱ va̱ása va̱ʼa ña̱ ni̱ka̱ʼa̱n ta̱ Ndi̱va̱ʼa xa̱ʼa̱ ta̱ Job, soo ta̱xivara ña̱ kotondosórara. Tasaá kindo̱o káxiña á ndixa xa̱ʼa̱ ña̱ kúʼvi̱-ini ta̱ Job xínira Jehová kúú ña̱ ndásakáʼnurara.

10. a) ¿Ndáaña ke̱ʼé ta̱ Ndi̱va̱ʼa xíʼin ta̱ Job? b) ¿Ndáaña ke̱ʼé ta̱ Job?

¹⁰ Ña̱ siʼna ke̱ʼé ta̱ Ndi̱va̱ʼa kúú ña̱ xi̱niñúʼura na̱ yiví ña̱ i̱xakuíʼnána kití sa̱na̱ ta̱ Job, ta tí sava tí ki̱ndoo ni̱xi̱ʼi̱ ndiʼirí. Ta saátu xa̱ʼnína ku̱a̱ʼání na̱ xi̱kachíñu nu̱úra. Ta ndi̱ʼi-xa̱ʼa̱ ndiʼi ña̱ xi̱kuumiíra. Tándi̱ʼi, ta̱ Ndi̱va̱ʼa xa̱ʼníra 10 saá na̱ se̱ʼe ta̱ Job xíʼin ta̱chí ña̱ ndeéní. Soo ta̱ Job nda̱kúní ni̱xi̱yo inira xíʼin Jehová. Ña̱ Biblia káʼa̱nña xa̱ʼa̱ “ta̱ Job ña̱ kǒo ku̱a̱chi níki̱ʼvira ta ni kǒo níchika̱a̱ra ku̱a̱chi Ndióxi̱ xa̱ʼa̱ ndiʼi ña̱ ki̱xi nu̱úra” (Job 1:12-19, 22).

11. a) ¿Ndáaka ña̱ ke̱ʼé ta̱ Ndi̱va̱ʼa xíʼin ta̱ Job? b) ¿Ndáaña ke̱ʼé ta̱ Job?

¹¹ Ta̱ Ndi̱va̱ʼa kǒo nísandákoora ña̱ keʼéra ña̱ va̱ása va̱ʼa xíʼin ta̱ Job. Nda̱a̱ ni̱ka̱ʼa̱nra xíʼin Ndióxi̱: “Tá ná taxiún iin kue̱ʼe̱ ndaʼa̱ra á ndixa kǒo ka̱ʼa̱n chíʼñara xa̱ʼún”. Tasaá ta̱xi ta̱ Ndi̱va̱ʼa iin kue̱ʼe̱ ndeéní ndaʼa̱ ta̱ Job (Job 2:5, 7). Soo ni ndo̱ʼora ña̱yóʼo nda̱kú ni̱xi̱yo inira xíʼin Jehová. Ta ni̱ka̱ʼa̱nra ña̱ nda̱kú koo inira nda̱a̱ ná kuvira (Job 27:5).

12. ¿Ndáa ki̱ʼva ni̱na̱ʼa̱ ta̱ Job ña̱ vatá kúú ña̱ káʼa̱n ta̱ Ndi̱va̱ʼa?

 ¹² Ta̱ Job kǒo níkunda̱a̱-inira xa̱ʼa̱ ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra, ta ni va̱ása níkunda̱a̱-inira ndáa xa̱ʼa̱ kúú ña̱ ni̱xo̱ʼvi̱níra. Nda̱a̱ nda̱kanixi̱níra ña̱ miíva Jehová kúú ta̱ ta̱xi ndiʼi tu̱ndóʼo kán ndaʼa̱ra (Job 6:4; 16:11-14). Soo ni saáví nda̱kú ni̱xi̱yo inira xíʼin Jehová. Xíʼin ña̱yóʼo ki̱ndoo káxiña, ña̱ su̱ví xa̱ʼa̱ ña̱ táxi Jehová ña̱ʼa ndaʼa̱ ta̱ Job kúú ña̱ xi̱ndasakáʼnurara. Chi ta̱ Job xi̱kuura migo Jehová xa̱ʼa̱ ña̱ ndixa xi̱kuʼvi̱-inira xi̱xinirara. Ta ki̱ndoo káxituña ña̱ ndiʼi ña̱ káʼa̱n ta̱ Ndi̱va̱ʼa ña̱ vatá kúúña.

13. ¿Ndáaña ni̱na̱ʼa̱ ta̱ Job xa̱ʼa̱ ña̱ nda̱kú ni̱xi̱yo inira?

¹³ Ni va̱ása níkunda̱a̱-ini ta̱ Job xa̱ʼa̱ ña̱ ni̱ka̱ʼa̱n ta̱ Ndi̱va̱ʼa xíʼin Ndióxi̱ chí ndiví, nda̱kúva ni̱xi̱yo inira tasaá ni̱na̱ʼa̱ra ña̱ ndiʼi ña̱ káʼa̱n ta̱ Ndi̱va̱ʼa ña̱ vatá kúúña. Ku̱a̱ʼání ña̱ va̱ʼa ta̱xi Jehová ndaʼa̱ ta̱ Job xa̱ʼa̱ ña̱ va̱ʼaní xi̱kitáʼanra xíʼinra ta nda̱kú ni̱xi̱yo inira (Job 42:12-17).

14, 15. ¿Ndáaña káʼa̱n ta̱ Ndi̱va̱ʼa xa̱ʼa̱ ndiʼi na̱ yiví?

¹⁴ Kivi sakuaʼayó ku̱a̱ʼání ña̱ʼa xíʼin ña̱ ndo̱ʼo ta̱ Job. Tiempo vitin, ta̱ Ndi̱va̱ʼa káʼa̱nra ña̱ va̱ása va̱ʼa xa̱ʼa̱ ndiʼi na̱ ndásakáʼnu Ndióxi̱. Káʼa̱nra ña̱ ndásakáʼnuyó Ndióxi̱ xa̱ʼa̱ ña̱ kúni̱yó ná taxira ña̱ʼa ndaʼa̱yó. Ta̱ Ndi̱va̱ʼa káchira: “Ndiʼi ña̱ kúúmií na̱ yiví taxinaña xa̱ʼa̱ ña̱ kúni̱na kutakuna” (Job 2:4). Xa̱ʼa̱ ña̱kán, ta̱ Ndi̱va̱ʼa káʼa̱nra xa̱ʼa̱ ndiʼiyó ña̱ ndásakáʼnuyó Ndióxi̱ xa̱ʼa̱ ña̱ʼa ña̱ táxira ndaʼa̱yó, ta su̱ví iinlá xa̱ʼa̱ ta̱ Job níka̱ʼa̱nra saá. Tá xa̱a̱ ni̱ya̱ʼa ku̱a̱ʼání ku̱i̱ya̱ ña̱ ni̱xi̱ʼi̱ ta̱ Job, ta̱ Ndi̱va̱ʼa xi̱ka̱ʼa̱nkara ña̱ va̱ása va̱ʼa xa̱ʼa̱ Jehová ta saátu xa̱ʼa̱ na̱ xi̱ndasakáʼnu-ñaʼá. Kúnda̱a̱-iniyó xa̱ʼa̱ ña̱yóʼo saáchi nu̱ú Proverbios 27:11 Jehová káchira: “Se̱ʼe miíi̱ vií va̱ʼa ndakanixi̱níún, ta sakúsi̱íún inii̱, ña̱kán va̱ʼa ndakuii̱n yuʼú na̱ kúsi̱kindaa yi̱ʼi̱”.

 ¹⁵ Yóʼó kivi ndaka̱xiún ndasakáʼnún Jehová ta koún migora. Tasaá na̱ʼún ña̱ iin ta̱ vatá kúú ta̱ Ndi̱va̱ʼa. Sana xíniñúʼu nasamaún ku̱a̱ʼá ña̱ʼa ña̱ kéʼún ña̱ va̱ʼa xa̱ún koún migo Ndióxi̱, ta ña̱yóʼo kúú mií ña̱ va̱ʼaníka. Ña̱yóʼo ndáyáʼviníña, chi ta̱ Ndi̱va̱ʼa káʼa̱nra ña̱ va̱ása nda̱kú koo iniún xíʼin Ndióxi̱ tá ná kixi tu̱ndóʼo nu̱ún. Ta̱kán ku̱a̱ʼání ña̱ʼa kéʼéra ña̱ va̱ʼa sandáʼvira miíyó ña̱ kǒo kuniso̱ʼoyó ña̱ káʼa̱n Ndióxi̱. ¿Ndáa ki̱ʼva kéʼéraña?

16. a) ¿Ndáaña xíniñúʼu ta̱ Ndi̱va̱ʼa ña̱ va̱ʼa sandákooyó ña̱ ndasakáʼnuna Jehová? b) ¿Ndáaña kivi kuniñúʼura xíʼin miíún ña̱ va̱ʼa sandákoún ña̱ ndasakáʼnún Jehová?

¹⁶ Ta̱ Ndi̱va̱ʼa ku̱a̱ʼání ña̱ʼa xíniñúʼura ña̱ va̱ʼa sandákooyó ña̱ kooyó migo Jehová. Ta̱yóʼo kéʼéra nda̱a̱ “táki̱ʼva íxaa iin tí león tí xíʼi̱ so̱ko chi kúni̱rí kaxírí iinna” (1 Pedro 5:8). Ña̱kán, va̱ása ndakanda̱-iniún tá iin na̱ migoún, iin na̱ veʼún á inkaka na̱ yiví kúni̱na ña̱ ná sandákoún ña̱ kaʼviún Biblia xíʼin ña̱ keʼún ña̱ʼa va̱ʼa. Sana nda̱a̱ kivi ndakanixi̱níún ña̱ mií ta̱ Ndi̱va̱ʼa kúú ta̱ kéʼé saá xíʼún (Juan 15:19, 20). * Sava yichi̱, ta̱ Ndi̱va̱ʼa násamara miíra ña̱ va̱ʼa sandáʼvira na̱ yiví ta ndakanixi̱nína ña̱ kúúra iin ángel ta̱ va̱ʼa. Ta kúni̱ra sandáʼvira miíyó ña̱ kǒo kuniso̱ʼoyó ña̱ káʼa̱n Jehová (2 Corintios 11:14). Inkatu ña̱ xíniñúʼura ña̱ va̱ʼa sandákooyó ña̱ ndasakáʼnuyó Jehová kúú, ña̱ ná ndakanixi̱níyó ña̱ su̱ví na̱ yiví va̱ʼa kúúyó ña̱ ndasakáʼnuyó Jehová (Proverbios 24:10).

17. ¿Nda̱chun xíniso̱ʼoyó ña̱ káʼa̱n Jehová?

¹⁷ Tá xíniso̱ʼoyó ña̱ káʼa̱n Jehová saá náʼa̱yó ña̱ iin ta̱ vatá kúú ta̱ Ndi̱va̱ʼa. ¿Ndáaña chindeétáʼan xíʼinyó ña̱ va̱ʼa  kuniso̱ʼoyó ña̱ káʼa̱n Ndióxi̱? Ña̱ Biblia káchiña: “Kuʼvi̱-iniún kuniún Jehová xíʼin ndiʼi níma̱ún, xíʼin ndiʼi ña̱ tákún ta xíʼin ndiʼi ndeún” (Deuteronomio 6:5). Xíniso̱ʼoyó ña̱ káʼa̱n Jehová xa̱ʼa̱ ña̱ kúʼvi̱-iniyó xíniyóra. Tá ná kuaʼnuka ña̱ kúʼvi̱-iniyó xíniyóra ndeéka kuni̱yó keʼéyó ndiʼi ña̱ káʼa̱nra xíʼinyó. Ta̱ apóstol Juan ni̱ka̱ʼa̱nra: “Ña̱yóʼo kúni̱ kachi ña̱ kúʼvi̱-iniyó xíniyó Ndióxi̱: ña̱ ná kuniso̱ʼoyó chiñu ña̱ xáʼndara nu̱úyó; ta chiñu ña̱ xáʼndara su̱ví ña̱ ve̱e kúúña”. Ta su̱ví ña̱ yo̱ʼvi̱ kúú ña̱ káʼa̱nra (1 Juan 5:3).

18, 19. a) ¿Ndáaña kúú sava ña̱ʼa ña̱ va̱ása va̱ʼa káchi Jehová? b) ¿Nda̱chun va̱ʼa kúnda̱a̱-iniyó ña̱ kǒo káʼa̱n Jehová xíʼinyó keʼéyó iin ña̱ʼa ña̱ va̱ása kuchiñuyó keʼéyó?

¹⁸ Jehová káʼa̱nra xíʼinyó ña̱ va̱ása va̱ʼa sava ña̱ʼa. Nu̱ú recuadro ña̱ naní “ Kǒo keʼún ña̱ kúndasí Jehová xínira” kunda̱a̱-iniún ndáa ña̱ kúú savaña. Tá ná kotoún ña̱yóʼo sana ndakanixi̱níún ña̱ su̱ví ña̱ kiniví kúúña. Soo tá ná kaʼviún texto ña̱ va̱xi nu̱ú Biblia ta ndakanixi̱níún xa̱ʼa̱ña,  saá kunda̱a̱-iniún nda̱chun iin ña̱ va̱ʼaní kúú ña̱ kandíxaún ley Jehová. Ta sanatu kiʼún kuenta ña̱ xíniñúʼu nasamaún sava ña̱ kéʼún. Sava yichi̱ sana ixayo̱ʼvi̱ña xíʼún. Soo tá ná chika̱ún ndee̱ ña̱ nasamaún miíún, si̱íní xa̱ún koún nda̱a̱ táki̱ʼva íyo na̱ migo Jehová (Isaías 48:17, 18). ¿Nda̱chun va̱ʼa kúnda̱a̱-iniyó ña̱ kiviva nasamayó ña̱ kéʼéyó?

¹⁹ Jehová kǒo káʼa̱nra xíʼinyó ña̱ keʼéyó iin ña̱ʼa ña̱ va̱ása kuchiñuyó keʼéyó (Deuteronomio 30:11-14). Jehová va̱ʼaní migo kúúra ta va̱ʼaní xíni̱ra miíyó, xíni̱ra ndáa ña̱ va̱ʼa kúú ña̱ kúúmiíyó ta ndáa ña̱ kúú ña̱ va̱ása va̱ʼa (Salmo 103:14). Ta̱ apóstol Pablo ni̱ka̱ʼa̱nra ña̱yóʼo: “Ndióxi̱ va̱ʼaní-inira, ta va̱ása sandákoo mitúʼunra ndóʼó ña̱ ya̱ʼandó nu̱ú tu̱ndóʼo ña̱ kǒo kundeé-inindó xíʼin, tá ná kixaa̱ tu̱ndóʼo nu̱úndó taxira ndee̱ ndaʼa̱ndó ña̱ va̱ʼa ndakú koo inindó nu̱úña” (1 Corintios 10:13). Kivi kandíxayó ña̱ taxi Jehová ndee̱ ndaʼa̱yó ña̱ keʼéyó ña̱ va̱ʼa. Ta saátu taxira ndee̱ra ndaʼa̱yó ña̱ va̱ʼa ya̱ʼayó nu̱ú tu̱ndóʼo (2 Corintios 4:7). Tá ni̱ya̱ʼa ta̱ Pablo nu̱ú  tu̱ndóʼo, Jehová chi̱ndeétáʼanra xíʼinra. Xa̱ʼa̱ ña̱yóʼo ta̱ Pablo ka̱chira: “Ndiʼi ña̱ʼa va̱ʼa kéʼíi̱ña chi Ndióxi̱ táxi ndee̱ ndaʼíi̱” (Filipenses 4:13).

20. ¿Ndáaña va̱ʼa ña̱ kúúmií Jehová kúú ña̱ xíniñúʼu kuumiíyó, ta nda̱chun?

²⁰ Tá kúni̱yó kooyó migo Jehová, su̱ví kuití ña̱ʼa ña̱ va̱ása va̱ʼa xíniñúʼu sandákooyó keʼéyó. Chi xíniñúʼu keʼéyó inkaka ña̱ʼa (Romanos 12:9). Na̱ kúú migo Ndióxi̱ kúʼvi̱-inina xínina ña̱ʼa ña̱ kútóora. Ta náʼa̱na ña̱ va̱ʼa ña̱ kúúmiíra, tá kúú ña̱ “kuʼvi̱-iniyó kunitáʼanyó, si̱í kooyó, táxi̱n kooyó, kúee koo iniyó, vií koo iniyó, va̱ʼa koo iniyó, kandíxayó Ndióxi̱, vitá koo iniyó, ka̱ʼnu̱-iniyó” (Gálatas 5:22, 23). Ña̱ va̱ʼa kunda̱a̱-iniún ndáa ki̱ʼva íyo na̱ migo Ndióxi̱, kaʼvi Salmo 15:1-5.

21. ¿Ndáaña chindeétáʼan xíʼún ña̱ na̱ʼún ña̱ va̱ʼa ña̱ kútóo Jehová?

²¹ ¿Ndáaña chindeétáʼan xíʼún ña̱ va̱ʼa na̱ʼún ña̱ va̱ʼa ña̱ kúúmií Jehová? Ña̱ sakuaʼún xa̱ʼa̱ ña̱ kútóora. Xa̱ʼa̱ ña̱yóʼo, xíniñúʼu kaʼviún Biblia ndiʼi ki̱vi̱ (Isaías 30:20, 21). Tá ná keʼún ña̱yóʼo, xa̱ún kuʼvi̱ka-iniún kuniún Jehová. Ta xa̱ʼa̱ ña̱yóʼo kuni̱ún kuniso̱ʼún ndiʼi ña̱ káʼa̱nra.

22. ¿Ndáaña va̱ʼa ndakiʼinyó tá xíniso̱ʼoyó ña̱ káʼa̱n Jehová?

²² Ña̱ nasamayó ki̱ʼva ña̱ íyoyó nda̱a̱ táki̱ʼva íyo ña̱ nasamayó ti̱ko̱to̱ yatá ña̱ ndíxiyó ta ndakundixiyó ti̱ko̱to̱ xa̱á saá íyoña. Ña̱ Biblia káchiña ña̱ xíniñúʼu sandákooyó ndiʼi ña̱ xi̱keʼéyó tá ya̱chi̱, ta vitin keʼéyó ña̱ va̱ʼa (Colosenses 3:9, 10). Ni yo̱ʼvi̱ní keʼéyó ña̱yóʼo, soo Jehová káʼa̱nra ña̱ taxira ña̱ va̱ʼa ndaʼa̱yó tá ná nasamayó ña̱ kéʼéyó ta kuniso̱ʼoyó ña̱ káʼa̱nra (Salmo 19:11). Kuniso̱ʼo ña̱ káʼa̱n Jehová xa̱ʼa̱ ña̱ kúʼvi̱-iniún xíniúnra xíʼin ndiʼi níma̱ún, ta va̱ása keʼúnña xa̱ʼa̱ ña̱ kúni̱ún ná taxira ña̱ va̱ʼa ndaʼún chí nu̱únínu. Ta ña̱ va̱ʼa ndakiʼún kúú ña̱ xa̱ún koún migo Jehová, ta na̱ʼún ña̱ iin ta̱ vatá kúú ta̱ Ndi̱va̱ʼa.