1, 2. ¿Ndáa ki̱ʼva kúni̱ Jehová ná koo na̱ familia?

JEHOVÁ kúú ta̱ chi̱ndúʼú xa̱ʼa̱ ña̱ tíndaʼa̱ na̱ yiví. Ña̱ Biblia káʼa̱nña ña̱ miíra kúú ta̱ i̱xava̱ʼa ñaʼá ñá nu̱ú, ta ta̱xirañá ndaʼa̱ ta̱ Adán. Ta ta̱ Adán ni̱kusi̱íní-inira ta ka̱chira: “Ñáyóʼo ndixa kúú leke miíi̱ xíʼin ku̱ñu miíi̱” (Génesis 2:22, 23). Xa̱ʼa̱ ña̱kán, Jehová kúni̱ra ña̱ si̱íní ná koo na̱ ti̱ndaʼa̱.

² Soo ku̱a̱ʼání na̱ yiví va̱ása si̱í íyona xíʼin na̱ veʼena. Ta nu̱ú Biblia va̱xi ku̱a̱ʼání consejo ña̱ kivi chindeétáʼan xíʼin na̱ familia ña̱ vií kutáʼanna ta si̱í koona (Lucas 11:28).

3, 4. a) ¿Ndáaña xíniñúʼu keʼé ta̱ ti̱ndaʼa̱ xíʼin ñá síʼira? b) ¿Nda̱chun ndáyáʼviní ixakáʼnu-ini na̱ ti̱ndaʼa̱ xa̱ʼa̱ táʼanna?

³ Ña̱ Biblia káchiña, ta̱ íyo ñá síʼi xíniñúʼu kuʼvi̱-inira kunira ñá síʼira ta ixato̱ʼórañá (kaʼvi Efesios 5:25-29). Saátu xíniñúʼu viíní keʼéra xíʼin ñá síʼira. Ta xíniñúʼu kundaarañá ta va̱ása ixandi̱va̱ʼara xíʼinñá.

⁴ ¿Ndáaña xíniñúʼu keʼé ta̱ íyo ñá síʼi tá ke̱ʼé ñá síʼira iin ña̱ va̱ása va̱ʼa? Ña̱ Biblia káʼa̱nña ña̱yóʼo xíʼin ta̱ íyo ñá síʼi: “Ndakundeéndó kuʼvi̱-inindó kunindó ná síʼindó ta kǒo sa̱a̱ndó xíʼinná” (Colosenses 3:19). Ndóʼó ta̱ íyo ñá síʼi, ndakaʼánndó ña̱ saátu miíndó kéʼéndó ña̱ va̱ása va̱ʼa. Tá kúni̱ndó ná ixakáʼnu-ini Ndióxi̱ xa̱ʼa̱ ña̱ kéʼéndó, saátu xíniñúʼu ixakáʼnu-inindó xa̱ʼa̱ ñá síʼindó (Mateo 6:12, 14, 15). Tá u̱vi̱ saá na̱ ti̱ndaʼa̱ íxakáʼnu-inina xa̱ʼa̱ táʼanna, saá kúú ña̱ si̱íníka koona.

5. ¿Nda̱chun xíniñúʼu ixato̱ʼó ta̱ ta̱a ñá síʼira?

⁵ Jehová kúni̱ra ña̱ ná ixato̱ʼó ta̱ ta̱a ñá síʼira. Saátu  xíniñúʼu kiʼinníra kuenta ndáa ña̱ xíniñúʼuñá. Ta ña̱yóʼo ndáyáʼviníña. Tá íxandi̱va̱ʼara xíʼin ñá síʼira, sana va̱ása kuniso̱ʼo Jehová ña̱ káʼa̱nra xíʼinra (1 Pedro 3:7). Jehová va̱ása ndákanixi̱níra ña̱ ndáyáʼvika na̱ ta̱a nu̱ú ná ñaʼá. Nu̱ú ta̱kán, ndiʼi na̱ yiví na̱ kúʼvi̱-ini xíniñaʼá ndáyáʼvinína nu̱úra.

6. ¿Ndáaña kúni̱ kachi ña̱ iinlá ndu̱u na̱ ti̱ndaʼa̱?

⁶ Ta̱ Jesús ni̱ka̱ʼa̱nra ña̱ na̱ ti̱ndaʼa̱ “su̱ví u̱vi̱ka kúúna chi iinláva ndu̱una” (Mateo 19:6, nota). Ña̱yóʼo kúni̱ kachiña na̱ ti̱ndaʼa̱ xíniñúʼu nda̱kú koo inina xíʼin táʼanna. Ta va̱ása xíniñúʼu kakana xíʼin inkana ta sandáʼvina na̱ ti̱ndaʼa̱ xíʼinna (Proverbios 5:15-21; Hebreos 13:4). Iin tá iinna xíniñúʼu kundi̱ʼi̱-inina xa̱ʼa̱ ña̱ ku̱su̱nna xíʼin na̱ ti̱ndaʼa̱ xíʼinna, ta va̱ása kundi̱ʼi̱-inina xa̱ʼa̱ iinlá mií kuitína (1 Corintios 7:3-5). Ña̱ Biblia káchiña: “Ta̱ íyo ñá síʼi xíniñúʼu kuʼvi̱-inira kunira ñá síʼira nda̱a̱ táki̱ʼva kúʼvi̱-inira xínira miíra”. Ta káʼa̱ntuña: “Nda̱a̱ ni iinna kǒo sáa̱-inina xínina ku̱ñuna, chi sákuxunaña ta viíní ndáanaña”. Xa̱ʼa̱ ña̱kán, ta̱ íyo ñá síʼi xíniñúʼu kuʼvi̱-inira kunira ñá síʼira ta viíní keʼéra xíʼinñá. Ña̱ kútóoka iin ñaʼá kúú ña̱ viíní ná koo ini yiíñá xíʼinñá (Efesios 5:28, 29).

7. ¿Nda̱chun xíniñúʼu na̱ familia iin na̱ kuniʼi yichi̱ nu̱úna?

⁷ Ña̱ va̱ʼa vií koo iin na̱ familia xíniñúʼuna iin na̱ kuniʼi yichi̱ nu̱úna. Ña̱ Biblia káʼa̱nña ña̱yóʼo nu̱ú 1 Corintios 11:3: “Ta̱ xáʼndachíñu nu̱ú ta̱a kúú ta̱ Cristo, ta ta̱a kúú ta̱ xáʼndachíñu nu̱ú ñaʼá, ta Ndióxi̱ kúú ta̱ xáʼndachíñu nu̱ú ta̱ Cristo”.

8. ¿Ndáa ki̱ʼva náʼa̱ ñá ñaʼá ña̱ íxato̱ʼóñá yiíñá?

⁸ Ña̱ nda̱a̱ kúú ña̱ ndiʼi ta̱ íyo ñá síʼi kéʼéra ña̱ va̱ása va̱ʼa.  Soo tá chíndeétáʼan ñá ñaʼá xíʼin yiíñá xa̱ʼa̱ ña̱ ndáka̱xinra keʼéra, ndiʼi na̱ veʼena ndákiʼin ña̱ va̱ʼa (1 Pedro 3:1-6). Ña̱ Biblia káchiña: “Ñá ñaʼá xíniñúʼu ixato̱ʼóníñá yiíñá” (Efesios 5:33). Soo, ¿ndáaña keʼéñá tá va̱ása ndásakáʼnu yiíñá Ndióxi̱? Ni saá xíniñúʼu na̱ʼa̱ñá ña̱ íxato̱ʼóñára. Saátu káʼa̱n ña̱ Biblia: “Ndóʼó ná ñaʼá ná xa̱a̱ ti̱ndaʼa̱ kuniso̱ʼondó ña̱ káʼa̱n yiíndó, tá savana su̱ví na̱ káʼvi tu̱ʼun Ndióxi̱ kúúna, va̱ʼa xa̱a̱na sakuaʼana xa̱ʼa̱ Ndióxi̱, xa̱ʼa̱ ña̱ kéʼéndó, xa̱ʼa̱ ña̱ xi̱nina ña̱ va̱ʼa-inindó ta íxato̱ʼóndóna” (1 Pedro 3:1, 2). Xíʼin ña̱ kéʼé ñá ñaʼá kivi chindeétáʼanñá xíʼin yiíñá ña̱ kunda̱a̱-inira xa̱ʼa̱ Ndióxi̱, ta ixato̱ʼóra ña̱ kándíxañá.

9. a) ¿Ndáaña xíniñúʼu keʼé ñá ñaʼá tá va̱ása kútóoñá ña̱ nda̱kaxin yiíñá keʼéra? b) ¿Ndáa consejo ña̱ kivi chindeétáʼan xíʼin ná íyo yií va̱xi nu̱ú Tito 2:4, 5?

⁹ Soo, ¿ndáaña kuu tá va̱ása inkáchi ndákanixi̱ní ñá ñaʼá xíʼin yiíñá xa̱ʼa̱ iin ña̱ʼa? Xíniñúʼu ka̱ʼa̱nñá xíʼinra xa̱ʼa̱ ña̱ ndákanixi̱níñá, ta xíʼin ña̱ to̱ʼó keʼéñá ña̱yóʼo. Tá kúú ñá Sara ni̱ka̱ʼa̱nñá xíʼin ta̱ Abrahán xa̱ʼa̱ iin  ña̱ʼa ña̱ va̱ása níkutóora. Soo Jehová ni̱ka̱ʼa̱nra ña̱yóʼo xíʼin ta̱ Abrahán: “Kuniso̱ʼo ña̱ káʼa̱nñá” (Génesis 21:9-12). Ñá ñaʼá xíniñúʼu chindeétáʼanñá xíʼin yiíñá xíʼin ña̱ ndáka̱xinra keʼéra, soo tá kǒo íyo ña̱yóʼo contra ña̱ káʼa̱n Biblia (Hechos 5:29; Efesios 5:24). Ta saátu ñaʼá ñá íyo yií xíniñúʼu viíní kundaañá na̱ veʼeñá (kaʼvi Tito 2:4, 5). Tá ná kuni yiíñá xíʼin na̱ va̱lí se̱ʼeñá ndiʼi ña̱ va̱ʼa ña̱ kéʼéñá xa̱ʼa̱na, kuʼvi̱níka-inina kuninañá ta ixato̱ʼónañá (Proverbios 31:10, 28).

10. ¿Ndáaña káʼa̱n Biblia xa̱ʼa̱ ña̱ sandákootáʼanna xíʼin ña̱ kaʼndana tutu ña̱ ti̱ndaʼa̱na?

¹⁰ Ta sava na̱ ti̱ndaʼa̱ xa̱a̱ ndi̱ku̱n sándakootáʼanna á xáʼndana tutu ña̱ ti̱ndaʼa̱na. Soo ña̱ Biblia káchiña: “Ñá ñaʼá ná kǒo sandákooñá yiíñá”. Ta káʼa̱nkaña: “Ta̱ ta̱a ná kǒo sandákoora ñá síʼira” (1 Corintios 7:10, 11). Sava yichi̱ tá íyo tu̱ndóʼo ña̱ ndeéní nu̱ú na̱ ti̱ndaʼa̱ sana nda̱a̱ kivi xa̱a̱na sandákootáʼanna, soo xíniñúʼu viíní ndakanixi̱nína xa̱ʼa̱ ña̱yóʼo chi su̱ví iin si̱ki kúúña. * Ta, ¿ndáaña kivi ka̱ʼa̱nyó xa̱ʼa̱ ña̱ kaʼndana tutu ña̱ ti̱ndaʼa̱na? Ña̱ Biblia sánáʼa̱ña miíyó, iin xa̱ʼa̱ ña̱ kivi kaʼnda na̱ ti̱ndaʼa̱ tutu ña̱ ti̱ndaʼa̱na kúú tá iinna ni̱ki̱si̱na xíʼin iin na̱ va̱ása kúú ñá síʼina á yiína (Mateo 19:9).

11. ¿Ndáaña kúú ña̱ xíniñúʼuníka na̱ va̱lí?

¹¹ Ndóʼó na̱ íyo se̱ʼe, tavándó tiempo ña̱ koondó xíʼin na̱ va̱lí se̱ʼendó, saáchi na̱ va̱lí yóʼo xíniñúʼuna ndóʼó. Ta ña̱ ndáyáʼviníka kúú ña̱ xíniñúʼu sanáʼa̱ndóna xa̱ʼa̱ Jehová (Deuteronomio 6:4-9).

12. ¿Ndáaña xíniñúʼu keʼé na̱ íyo se̱ʼe ña̱ kundaana na̱ va̱lí se̱ʼena?

 ¹² Ku̱a̱ʼáníka ña̱ va̱ása va̱ʼa íyo nu̱ú ñuyǐví ta̱ Ndi̱va̱ʼa yóʼo. Íyo na̱ yiví na̱ kúni̱ saxóʼvi̱ na̱ va̱lí se̱ʼeyó. Savana kúni̱na keʼéna ña̱ kini xíʼin na̱ va̱lí yóʼo á ña̱ ku̱su̱nna xíʼinna. Soo sava na̱ íyo se̱ʼe íxayo̱ʼvi̱ña xíʼinna ña̱ ka̱ʼa̱nna xa̱ʼa̱ ña̱yóʼo xíʼin na̱ va̱lí se̱ʼena, soo xíniñúʼu ka̱ʼa̱nna xíʼin se̱ʼena xa̱ʼa̱ na̱ yiví na̱ kéʼé ña̱ kini, ta sanáʼa̱nana ndáa ki̱ʼva kundaana miína nu̱ú na̱yóʼo. Ndóʼó na̱ íyo se̱ʼe xíniñúʼu kundaandó na̱ va̱lí se̱ʼendó (1 Pedro 5:8). *

13. ¿Ndáa ki̱ʼva xíniñúʼu sanáʼa̱ na̱ íyo se̱ʼe na̱ va̱lí se̱ʼena?

 ¹³ Na̱ íyo se̱ʼe kúú na̱ xíniñúʼu sanáʼa̱ na̱ va̱lí se̱ʼena ña̱ vií keʼéna. ¿Ndáa ki̱ʼva keʼún ña̱yóʼo? Na̱ va̱lí xíniñúʼuna ña̱ ná sanáʼúnna ta kuniʼún yichi̱ nu̱úna, soo tá ke̱ʼéna iin ña̱ va̱ása va̱ʼa, vií ka̱ʼún xíʼinna ta va̱ása ixandi̱va̱ʼún xíʼinna (Jeremías 30:11). Xa̱ʼa̱ ña̱kán, va̱ása taxiún consejo ndaʼa̱na tá sáún. Saáchi sana kivi ka̱ʼún xíʼinna tu̱ʼun yo̱ʼvi̱ ña̱ kivi saxóʼvi̱-inina (Proverbios 12:18). Chindeétáʼan xíʼinna ña̱ kunda̱a̱-inina nda̱chun xíniñúʼu kuniso̱ʼona ña̱ káʼún (Efesios 6:4; Hebreos 12:9-11). (Koto nota 30, “Consejo”).

14, 15. ¿Nda̱chun xíniñúʼu kuniso̱ʼo na̱ va̱lí ña̱ káʼa̱n na̱ yivána?

¹⁴ Ndiʼi tiempo xi̱niso̱ʼo ta̱ Jesús ña̱ ni̱ka̱ʼa̱n yivára, ni xi̱ ixayo̱ʼvi̱ña xíʼinra (Lucas 22:42; Juan 8:28, 29). Jehová kúni̱ra ña̱ ná kuniso̱ʼo na̱ va̱lí ña̱ káʼa̱n na̱ yivána (Efesios 6:1-3).

¹⁵ Sana íxayo̱ʼvi̱ña xíʼún ña̱ kuniso̱ʼún ña̱ káʼa̱n na̱ yiváún. Soo ndakaʼún, ña̱ tá xíniso̱ʼún sákusi̱íún-ini Jehová xíʼin na̱ yiváún (Proverbios 1:8; 6:20; 23:22-25). *

16. a) ¿Ndáaña kéʼé ta̱ Ndi̱va̱ʼa ña̱ sandákavara-ini na̱ va̱lí ña̱ keʼéna ña̱ va̱ása va̱ʼa? b) ¿Nda̱chun ndáyáʼviní ña̱ ná koo na̱ migoún na̱ kuʼvi̱-ini xíni Jehová?

¹⁶ Ta̱ Ndi̱va̱ʼa kivi kuniñúʼura na̱ migoún xíʼin inkaka na̱ va̱lí ña̱ ka̱ʼa̱nna xíʼún ña̱ keʼún ña̱ʼa ña̱ va̱ása va̱ʼa. Chi ta̱ Ndi̱va̱ʼa xíni̱ra ña̱ va̱ása ixayo̱ʼvi̱ña xíʼún ña̱ keʼún ña̱yóʼo. Ná kotoyó ña̱ ndo̱ʼo ñá Dina ñá xi̱kuu se̱ʼe ta̱ Jacob. Ñáyóʼo ni̱xi̱yo migoñá na̱ va̱ása kúʼvi̱-ini xíni Jehová, ta ña̱yóʼo sa̱xóʼvi̱ña miíñá ta saátu na̱ veʼeñá (Génesis 34:1, 2). Tá na̱ migoún va̱ása kúʼvi̱-inina xínina Jehová, kivi  ka̱ʼa̱nna xíʼún ña̱ keʼún ña̱ʼa ña̱ kǒo kútóora. Ta ña̱yóʼo kivi saxóʼvi̱ña yóʼó, na̱ veʼún ta saátu Jehová (Proverbios 17:21, 25). Xa̱ʼa̱ ña̱yóʼo, ndáyáʼviní ña̱ na̱ migoún ná koona na̱ kuʼvi̱-ini xíni Jehová (1 Corintios 15:33).

17. ¿Ndáaña xíniñúʼu keʼé iin tá iin na̱ íyo ti̱xin iin familia?

¹⁷ Tá ndiʼi na̱ familia xíniso̱ʼona consejo ña̱ táxi Ndióxi̱ va̱ʼaní ndóona, ta kǒo ku̱a̱chi nu̱úna. Tá yóʼó íyo ñá síʼún kuʼvi̱-iniún kuniúnñá ta vií keʼún xíʼinñá. Tá yóʼó íyo yiíún ixato̱ʼúnra ta chindeétáʼún xíʼinra xíʼin ña̱ ndáka̱xinra keʼéra, ta kundiku̱ún yichi̱ ñá íyo yií ñá káʼa̱nna xa̱ʼa̱ nu̱ú Proverbios 31:10-31. Tá íyo se̱ʼún sanáʼa̱na ña̱ kuʼvi̱-inina kunina Ndióxi̱ (Proverbios 22:6). Yóʼó ta̱ íyo ñá síʼi viíní kuniʼún yichi̱ nu̱ú na̱ veʼún (1 Timoteo 3:4, 5; 5:8). Ta ndóʼó na̱ va̱lí kuniso̱ʼondó ña̱ káʼa̱n na̱ yivándó (Colosenses 3:20). Ná ndakaʼányó chi ndiʼi na̱ veʼeyó kéʼéna ña̱ va̱ása va̱ʼa, ña̱kán vitá ná koo iniyó ta ndukúyó ña̱ káʼnu-ini nu̱úna. Nda̱a̱ táki̱ʼva na̱kunda̱a̱-iniyó, nu̱ú Biblia va̱xi consejo ña̱ táxi Jehová ndaʼa̱ ndiʼi na̱ familia.