1, 2. ¿Ndáaña kúú sava ña̱ ndáka̱tu̱ʼunyó miíyó?

KU̱A̱ʼÁNÍ ña̱ʼa ndáka̱tu̱ʼun na̱ va̱lí. Tá káʼa̱nyó xíʼinna xa̱ʼa̱ sava ña̱ʼa, ku̱a̱ʼání yichi̱ ndáka̱tu̱ʼunna miíyó “¿Nda̱chun?”. Tá ndákuiinyó yuʼúna, tuku ndáka̱tu̱ʼunna miíyó ta káchina “Ta, ¿nda̱chun?”.

² Ni kúúyó na̱ va̱lí á na̱ xa̱a̱ chée, ndiʼiyó ndáka̱tu̱ʼunyó miíyó xa̱ʼa̱ sava ña̱ʼa. Sana ndáka̱tu̱ʼunyó miíyó xa̱ʼa̱ ndáa ña̱ kuxuyó, ndáa ti̱ko̱to̱ kundixiyó á ndáa ña̱ satáyó. Á sanatu ndáka̱tu̱ʼunyó miíyó xa̱ʼa̱ ña̱ tákuyó vitin á xa̱ʼa̱ ña̱ koo chí nu̱únínu. Soo tá va̱ása ndáni̱ʼíyó ña̱ kúni̱yó kunda̱a̱-iniyó xa̱ʼa̱, sana kǒo nándukúkayó xa̱ʼa̱ña.

3. ¿Nda̱chun ku̱a̱ʼání na̱ yiví va̱ása nándukúna xa̱ʼa̱ ña̱ ndáka̱tu̱ʼunna miína?

³ ¿Á va̱xi sava ña̱ʼa ña̱ ndáka̱tu̱ʼunyó miíyó nu̱ú ña̱ Biblia? Ku̱a̱ʼání na̱ yiví ndákanixi̱nína ña̱ va̱xivaña, soo va̱ása nándukúnaña. ¿Nda̱chun? Saáchi ndákanixi̱nína ña̱ yo̱ʼvi̱ní kunda̱a̱-inina xíʼin ña̱ káʼa̱n Biblia. Ta sanatu ndákanixi̱nína ña̱ nda̱saa na̱ maestro xíʼin na̱ su̱tu̱ veʼe-ñu̱ʼu kúú na̱ xíni̱ xa̱ʼa̱ ña̱yóʼo. Ta inkana va̱ása nándukúna xa̱ʼa̱ ña̱yóʼo, saáchi kúkaʼan nu̱úna ña̱ ka̱ʼa̱nna ña̱ va̱ása xíni̱na. Soo, ¿ndáaña ndákanixi̱ní yóʼó?

4, 5. a) ¿Ndáaña ndáka̱tu̱ʼún miíún sava yichi̱? b) ¿Nda̱chun xíniñúʼu ndakundeékaún nandukún xa̱ʼa̱ña?

⁴ Sana ndáka̱tu̱ʼún miíún ña̱ va̱xi yóʼo: “¿Ndáa xa̱ʼa̱ kúú ña̱ ka̱kuyó ñuyǐví yóʼo? ¿Ndáaña ndóʼoyó tá xíʼi̱yó? ¿Ndáa ki̱ʼva káa Ndióxi̱?”. Ta̱ Jesucristo iin maestro káʼnu xi̱kuura. Ta ta̱yóʼo ni̱ka̱ʼa̱nra: “Ka̱ʼa̱nkandó, ta taxiraña ndaʼa̱ndó; nandukúkandóña, ta ndani̱ʼíndóña; kanindaʼa̱kandó yéʼé, ta  kunáraña nu̱úndó” (Mateo 7:7). Ña̱kán, va̱ása sandákoún nandukún xa̱ʼa̱ña, nda̱a̱ ná xa̱ún kunda̱a̱-iniún ña̱ nda̱a̱.

⁵ Tá ná ndakundeún nandukún xa̱ʼa̱ña, ndani̱ʼívaúnña nu̱ú Biblia (Proverbios 2:1-5). Tasaá kunda̱a̱-iniún ña̱ va̱ása yo̱ʼvi̱ kunda̱a̱-iniún xa̱ʼa̱ña. Ña̱ sakuaʼún nu̱ú Biblia chindeétáʼanña xíʼún ña̱ si̱íní koún tiempo vitin. Ta saátu chindeéña yóʼó ña̱ ndakiʼún ña̱ va̱ʼa chí nu̱únínu. Ná ka̱ʼa̱nyó xa̱ʼa̱ iin pregunta ña̱ sándi̱ʼi̱-ini ku̱a̱ʼání na̱ yiví.

6. ¿Nda̱chun ku̱a̱ʼání na̱ yiví ndákanixi̱nína ña̱ va̱ása ndíʼi̱-ini Ndióxi̱ xa̱ʼa̱yó?

⁶ Ku̱a̱ʼání na̱ yiví ndákanixi̱nína ña̱ va̱ása ndíʼi̱-ini Ndióxi̱ xa̱ʼa̱yó. Ndákanixi̱nína ña̱yóʼo: “Tá ndixa ndíʼi̱-ini Ndióxi̱ xa̱ʼa̱yó, va̱ʼava koo ñuyǐví yóʼo”. Tiempo vitin íyoní guerra, íyo na̱ sáa̱-ini xínitáʼan saátu íyoní na̱ ndáʼvi. Ta kíʼin kue̱ʼe̱ na̱ yiví, xóʼvi̱na ta xíʼi̱na. Ña̱kán, savana ndáka̱tu̱ʼunna miína: “Tá ndixa ndíʼi̱-ini Ndióxi̱ xa̱ʼa̱yó, ¿nda̱chun kǒo sándiʼi-xa̱ʼa̱ra tu̱ndóʼo ña̱ íyo nu̱úyó?”.

7. a) ¿Nda̱chun ku̱a̱ʼání na̱ yiví ndákanixi̱nína ña̱ ndi̱va̱ʼaní-ini Ndióxi̱? b) ¿Nda̱chun va̱ʼa kúnda̱a̱-iniyó ña̱ su̱ví Ndióxi̱ kúú ta̱ chíndaʼá tu̱ndóʼo va̱xi nu̱úyó?

⁷ Tá kúu iin tu̱ndóʼo, na̱ su̱tu̱ veʼe-ñu̱ʼu káʼa̱nna ña̱ mií Ndióxi̱ kúú ta̱ kúni̱ saá kooña. Káchina ña̱ miíra kúú ta̱ kúni̱ koo ña̱yóʼo. Tá káʼa̱nna ña̱yóʼo nda̱a̱ táki̱ʼva íyo na̱ chíka̱a̱ ku̱a̱chi Ndióxi̱ saá íyona. Xa̱ʼa̱ ña̱yóʼo, na̱ yiví ndákanixi̱nína ña̱ ndi̱va̱ʼaní-ini Ndióxi̱. Soo ña̱ Biblia sánáʼa̱ña miíyó, ña̱ su̱ví Ndióxi̱ kúú ta̱ chíndaʼá tu̱ndóʼo va̱xi nu̱úyó. Santiago 1:13 káchiña: “Tá yáʼa iinna nu̱ú tu̱ndóʼo, ná kǒo ka̱ʼa̱nna: ‘Ndióxi̱ xítondosó yi̱ʼi̱ʼ. Chi Ndióxi̱ kǒo xítondosóra ni iin na̱ yiví xíʼin tu̱ndóʼo”. Ña̱ nda̱a̱ kúú ña̱ va̱ása sási Ndióxi̱ ña̱ kixi tu̱ndóʼo nu̱úyó, soo su̱ví ta̱yóʼo kúú ta̱  chíndaʼáña va̱xiña nu̱úyó (kaʼvi Job 34:10-12). Ná ka̱ʼa̱nyó xa̱ʼa̱ iin ejemplo ña̱ va̱ʼa kunda̱a̱ka-iniyó xa̱ʼa̱ ña̱yóʼo.

8, 9. ¿Nda̱chun va̱ása va̱ʼa chika̱a̱ ku̱a̱chiyó Ndióxi̱ xa̱ʼa̱ ña̱ ndóʼoyó? Ka̱ʼa̱n xa̱ʼa̱ iin ejemplo.

⁸ Ndakanixi̱ní xa̱ʼa̱ iin táta ta̱ kúni̱ní xíni se̱ʼe ta sánáʼa̱rara ña̱ vií ná ndaka̱xinra ña̱ keʼéra. Soo tá xa̱a̱ ku̱chée ta̱ loʼo se̱ʼera, va̱ása xíínkara kuniso̱ʼora ña̱ káʼa̱n yivára ta kítara ku̱a̱ʼa̱nra koora inka veʼe. Ta̱ loʼo yóʼo kíxáʼara kéʼéra ña̱ va̱ása va̱ʼa ta ku̱a̱ʼání tu̱ndóʼo va̱xi nu̱úra. ¿Á kivi ka̱ʼa̱nyó ña̱ yivára kúú ta̱ kúúmií ku̱a̱chi xa̱ʼa̱ ña̱ xóʼvi̱ra, chi va̱ása nísasira nu̱úra tá ki̱tara ku̱a̱ʼa̱nra? Su̱ví yivára kúú ta̱ kúúmií ku̱a̱chi (Lucas 15:11-13). Ta ki̱ʼva saá va̱ása xíniñúʼu chika̱a̱yó ku̱a̱chi Ndióxi̱ xa̱ʼa̱ ña̱ ndóʼoyó. Nda̱a̱ táki̱ʼva ke̱ʼé ta̱ íyo se̱ʼe, saá kéʼé Ndióxi̱ chi va̱ása sásira nu̱ú na̱ yiví ña̱ keʼéna ña̱ va̱ása va̱ʼa. Ña̱kán, tá yáʼayó nu̱ú tu̱ndóʼo ná ndakaʼányó ña̱ su̱ví Ndióxi̱ kúú ta̱ chíndaʼáña va̱xiña nu̱úyó.

⁹ Ña̱ nda̱a̱ kúú ña̱ va̱ása sási Ndióxi̱ ña̱ kixi tu̱ndóʼo nu̱úyó, soo íyo iin xa̱ʼa̱ kúú ña̱ kéʼéraña. Nu̱ú ña̱ capítulo 11 sakuaʼakaún ña̱ káʼa̱n Biblia xa̱ʼa̱ ña̱yóʼo. Soo va̱ása kaka-iniún chi kúʼvi̱níva-ini Ndióxi̱ xínira miíyó, ta su̱ví ta̱yóʼo kúú ta̱ chíndaʼá tu̱ndóʼo va̱xiña nu̱úyó. Ta iinlá ta̱yóʼo kúú ta̱ kuchiñu sandíʼi-xa̱ʼa̱ ndiʼi tu̱ndóʼo (Isaías 33:2).

10. ¿Nda̱chun va̱ʼa kúnda̱a̱-iniyó ña̱ kuchiñu Ndióxi̱ ndasaviíra ndiʼi ña̱ kéʼé na̱ yiví na̱ va̱ása va̱ʼa?

¹⁰ Ña̱ Biblia káchiña iin ta̱ yi̱i̱ kúú Ndióxi̱ (Isaías 6:3). Xa̱ʼa̱ ña̱yóʼo, ndiʼi ña̱ kéʼéra nina ña̱ va̱ʼa kúúña. Ña̱kán, kiviva kandíxayó ña̱ káʼa̱nra, soo va̱ása kivi kandíxayó ña̱ káʼa̱n na̱ yiví táʼan miíyó. Chi sava yichi̱ ndiʼivayó kéʼé ña̱ va̱ása va̱ʼa. Nda̱a̱ na̱ chíñu na̱ ndixa kúni̱ keʼé ña̱ va̱ʼa, kǒo ndee̱ kúúmiína ña̱ ndasaviína ña̱ kéʼé na̱ yiví na̱ va̱ása va̱ʼa. Iinlá Ndióxi̱ kúú ta̱ kúúmií ndee̱ ña̱ ndasaviíra ndiʼi ña̱yóʼo. Xa̱ʼa̱ ña̱yóʼo, kivi kandíxayó ña̱ kuchiñu Ndióxi̱ ndasaviíra ndiʼi  ña̱ kéʼé na̱ yiví na̱ va̱ása va̱ʼa. Ndióxi̱ sandíʼi-xa̱ʼa̱ra ndiʼi tu̱ndóʼo yóʼo, ta va̱ása kookaña (kaʼvi Salmo 37:9-11).

11. ¿Ndáaña ndóʼo Ndióxi̱ tá xítora ña̱ xóʼvi̱yó?

¹¹ ¿Ndáaña ndóʼo Ndióxi̱ tá xítora ndiʼi ña̱ kúu ñuyǐví yóʼo ta saátu tá xítora ña̱ íyo tu̱ndóʼo nu̱úyó? Ña̱ Biblia káʼa̱nña xíʼinyó ña̱ iin Ndióxi̱ ta̱ kéʼé ña̱ nda̱kú kúú Jehová (Salmo 37:28). Ta̱kán kíʼinra kuenta xíʼin ndiʼi ña̱ kúu, kúúña ña̱ va̱ʼa á ña̱ va̱ása va̱ʼa. Ta kúsuchíní-inira tá xítora xóʼvi̱yó. Ña̱ Biblia káʼa̱nña xíʼinyó ña̱ ni̱kusuchíkaví-ini Ndióxi̱ tá xi̱nira nda̱kutú ña̱ kini nu̱ú ñuʼú yóʼo tá tiempo xi̱naʼá (Génesis 6:5, 6). Ta nda̱a̱ táki̱ʼva xi̱ndoʼo Ndióxi̱ tá ya̱chi̱ saátu ndóʼora vitin (Malaquías 3:6). Ña̱ Biblia káʼa̱nña xíʼinyó ña̱ ndixa ndíʼi̱ní-ini Ndióxi̱ xa̱ʼa̱yó (kaʼvi 1 Pedro 5:7).

12, 13. a) ¿Nda̱chun kúʼvi̱-iniyó xíniyó na̱ yiví? b) ¿Ndáaña ndóʼoyó tá xítoyó íyo tu̱ndóʼo ñuyǐví yóʼo? c) ¿Nda̱chun kivi kandíxayó ña̱ sandíʼi-xa̱ʼa̱ Ndióxi̱ ndiʼi tu̱ndóʼo ña̱ íyo ñuyǐví yóʼo?

¹² Saátu káʼa̱n ña̱ Biblia ña̱ i̱xava̱ʼa Ndióxi̱ miíyó nda̱a̱ táki̱ʼva íyo miíra (Génesis 1:26). Ña̱yóʼo kúni̱ kachiña ña̱ i̱xava̱ʼara miíyó ña̱ kuumiíyó táʼan ña̱ va̱ʼa ña̱ kúúmiíra. Ta ña̱ Biblia káʼa̱nña xíʼinyó “ña̱ kúʼvi̱-inira xínira miíyó” (1 Juan 4:8). Ndiʼi ña̱ kéʼé Ndióxi̱, kéʼéraña xa̱ʼa̱ ña̱ kúʼvi̱-inira xínira ndiʼiyó. Xa̱ʼa̱ ña̱yóʼo, kúʼvi̱-iniyó xínitáʼanyó saáchi Ndióxi̱ kúʼvi̱-inira xínira miíyó. Ña̱kán, tá kúndáʼvi-iniyó xíniyó na̱ yiví tá yáʼana nu̱ú tu̱ndóʼo, ndeéka kúsuchí-ini Ndióxi̱ tá xítora ndóʼona ña̱yóʼo.

¹³ Ndakanixi̱ní xa̱ʼa̱ ña̱yóʼo, ná kachiyó ña̱ kúúmiíún ndee̱ ña̱ sandíʼi-xa̱ʼún ndiʼi tu̱ndóʼo ña̱ íyo ñuyǐví yóʼo, ¿á sandíʼi-xa̱ʼúnña? Keʼévaúnña xa̱ʼa̱ ña̱ kúʼvi̱-iniún xíniún na̱ yiví. Soo Ndióxi̱ kuchiñuvara sandíʼi-xa̱ʼa̱ra ndiʼi tu̱ndóʼo, chi kúʼvi̱ní-inira xínira miíyó ta saátu kúúmiíra ndee̱  ña̱ keʼéra ña̱yóʼo. Xa̱ʼa̱ ña̱kán, kǒo kaka-iniún chi ndiʼi ña̱ na̱kunda̱a̱-iniún xa̱ʼa̱ chí nu̱ú ki̱xáʼa ña̱ libro yóʼo, ña̱ xi̱nu kúúvaña. Soo ña̱ va̱ʼa kandíxaún ña̱ saxínu Ndióxi̱ ndiʼi ña̱ káʼa̱nra, xíniñúʼu sakuaʼakaún xa̱ʼa̱ra.

14. ¿Nda̱saa naní Ndióxi̱, ta nda̱chun va̱ʼa kúnda̱a̱-iniyó ña̱ kúni̱ra ná kuniñúʼuyó ki̱vi̱ra?

¹⁴ Tá kúni̱ún koún migo iinna, ¿ndáaña kúú ña̱ siʼna káʼún? Sana siʼna ki̱vi̱ún káʼún xíʼinna. Soo, ¿á íyo ki̱vi̱ Ndióxi̱? Ku̱a̱ʼání na̱ veʼe-ñu̱ʼu káʼa̱nna ña̱ naníra Ndióxi̱ á táta, soo su̱ví ki̱vi̱ra kúú ña̱yóʼo. Nda̱a̱ táki̱ʼva káʼa̱nyó xíʼin iin na̱ rey á presidente, soo su̱ví ki̱vi̱na kúú ña̱yóʼo. Ndióxi̱ káʼa̱nra xíʼinyó ña̱ naníra Jehová. Ña̱ Biblia káchiña: “Ná kunda̱a̱-ini na̱ yiví ña̱ ki̱vi̱ yóʼó kúú Jehová, ña̱ iinlá yóʼó kúú ta̱ káʼnu iníísaá ñuyǐví” (Salmo 83:18 [82:19 nu̱ú sava Biblia]). Ndióxi̱ kúni̱ra ña̱ ná kunda̱a̱-iniyó xa̱ʼa̱ ki̱vi̱ra ta ná kuniñúʼuyóña. ¿Nda̱chun va̱ʼa xíni̱yó xa̱ʼa̱ ña̱yóʼo? Saáchi na̱ ka̱ʼyí Biblia ku̱a̱ʼání yichi̱ xi̱niñúʼunaña (Éxodo 3:15; 6:3). Ndióxi̱ káʼa̱nra ki̱vi̱ra xíʼinyó ña̱ va̱ʼa xa̱a̱yó kooyó migora.

15. ¿Ndáaña kúni̱ kachi ki̱vi̱ Jehová?

¹⁵ Íyo iin ña̱ kúni̱ kachi ki̱vi̱ Jehová. Kúni̱ kachiña ña̱ kivi sáxi̱nura ndiʼi ña̱ ni̱ka̱ʼa̱nra á ndiʼi ña̱ kúni̱ra keʼéra, ta nda̱a̱  ni iinna kǒo kivi kasi nu̱úra. Iinlá mií Jehová kúú ta̱ xíniñúʼu kuniʼi ki̱vi̱ yóʼo. *

16, 17. a) ¿Nda̱chun kúú Jehová “ta̱ kúúmií ndiʼi ndee̱”? b) ¿Nda̱chun kúúra “rey ta̱ íyo ndiʼi tiempo”? c) ¿Nda̱chun kúúra “ta̱ i̱xava̱ʼa ndiʼi ña̱ʼa”?

¹⁶ Nda̱a̱ táki̱ʼva xi̱niyó, ña̱ Salmo 83:18 káʼa̱nña xa̱ʼa̱ Jehová, káchiña: “Iinlá yóʼó kúú ta̱ káʼnu”. Ña̱ Biblia  xíniñúʼuña inkaka título ña̱ ka̱ʼa̱nña xa̱ʼa̱ Jehová. Tá kúú, Apocalipsis 15:3 káchiña: “Náʼnuní ta liviní ña̱ʼa i̱xava̱ʼún, Jehová Ndióxi̱, ta̱ kúúmií ndiʼi ndee̱”. ¿Ndáaña kúni̱ kachi tu̱ʼun “ta̱ kúúmií ndiʼi ndee̱”? Kúni̱ kachiña ña̱ iinlá Jehová kúú ta̱ kúúmií ku̱a̱ʼání ndee̱ nu̱ú ndiʼina. Ta 1 Timoteo 1:17 káʼa̱nña xa̱ʼa̱ Jehová ña̱ kúúra “rey ta̱ íyo ndiʼi tiempo”. Ña̱yóʼo kúni̱ kachiña ña̱ ndiʼi tiempo íyo Jehová. Ta saátu Salmo 90:2 ka̱ʼa̱nña ña̱ “ndiʼi tiempo íyo Ndióxi̱ ta ndiʼi tiempo koora”. ¿Á su̱ví ndákanda̱ní-iniyó tá kúnda̱a̱-iniyó xa̱ʼa̱ ña̱yóʼo?

¹⁷ Ta saátu káʼa̱n ña̱ Biblia ña̱ iinlá Jehová kúú ta̱ i̱xava̱ʼa ndiʼi ña̱ʼa. Apocalipsis 4:11 káchiña: “Jehová Ndióxi̱ miíndi̱, iinlá yóʼó kúú ta̱ xíniñúʼu ndasakáʼnundi̱, yóʼó kúú ta̱ xíniñúʼu taxindi̱ ña̱ to̱ʼó ndaʼa̱ ta saátu ndiʼi ndee̱ndi̱, saáchi yóʼó kúú ta̱ i̱xava̱ʼa ndiʼi ña̱ʼa, ta xa̱ʼa̱ ña̱ kúni̱ miíún na̱kuva̱ʼa  ndiʼi ña̱yóʼo”. Saá íyoña, Jehová kúú ta̱ i̱xava̱ʼa ndiʼi ña̱ʼa, tá kúú na̱ ángel, ki̱mi tí íyo chí ndiví, ti̱a̱ká tí íyo ini tá mar xíʼin ku̱i̱ʼi ña̱ íyo ndaʼa̱ yitu̱n.

18. a) ¿Nda̱chun ndákanixi̱ní sava na̱ yiví ña̱ va̱ása kivi xa̱a̱yó kooyó migo Jehová? b) Soo, ¿ndáaña káʼa̱n Biblia?

¹⁸ Sava na̱ yiví yíʼvina tá kúnda̱a̱-inina xa̱ʼa̱ ña̱ va̱ʼa ña̱ kúúmií Jehová. Ndákanixi̱nína ña̱ íyoní ndee̱ra, ña̱ káʼnuníra ta xíkaní íyora nu̱úyó ta va̱ása ndíʼi̱-inira xa̱ʼa̱yó. Soo Ndióxi̱ kǒo kúni̱ra ña̱ ná ndakanixi̱níyó saá. Ta̱yóʼo kúni̱ra koora migoyó. Ña̱ Biblia káʼa̱nña xíʼinyó ña̱ “va̱ása xíka íyora nu̱ú iin iinyó” (Hechos 17:27). Ndióxi̱ kúni̱ra ña̱ ná sakuaʼún xa̱ʼa̱ra. Tá saá ná keʼún, Ndióxi̱ káʼa̱nra ña̱ “kuyatinra” nu̱ún ta koora migoún (Santiago 4:8).

19. a) ¿Ndáaña kivi keʼún ña̱ va̱ʼa koún migo Jehová? b) ¿Ndáaña va̱ʼa ña̱ kúúmií Jehová kúú ña̱ kútóokaún?

¹⁹ ¿Ndáaña kivi keʼún ña̱ va̱ʼa xa̱ún koún migo Jehová? Ta̱ Jesús ni̱ka̱ʼa̱nra xa̱ʼa̱ ña̱yóʼo tá ka̱chira: “Ña̱ va̱ʼa kutakuna ndiʼi tiempo, xíniñúʼu xa̱a̱na sakuaʼana xa̱ʼa̱ yóʼó, mitúʼun Ndióxi̱ ta̱ nda̱a̱, ta saátu xa̱ʼa̱ ta̱ chi̱ndaʼún nu̱ú ñuʼú yóʼo, ta̱ Jesucristo” (Juan 17:3). Tá ná ndakundeún sakuaʼún xa̱ʼa̱ Jehová xíʼin ta̱ Jesús, xa̱ún kuxini̱ va̱ʼakaúnna ta koún migona. Ta saátu kivi xa̱ún kutakún ndiʼi tiempo. Xa̱a̱ sa̱kuaʼún, ña̱ kúʼvi̱ní-ini Ndióxi̱ xínira miíyó (1 Juan 4:16). Soo íyo ku̱a̱ʼáka ña̱ va̱ʼa kúúmiíra. Ña̱ Biblia sánáʼa̱ña miíyó xa̱ʼa̱ Jehová ña̱ kúúra iin Ndióxi̱ ta̱ kúndáʼvi-ini xíni na̱ yiví, ta̱ kúee íyo ini, ta nda̱kú íyo ña̱ kúʼvi̱-inira xínira miíyó ta ña̱ nda̱a̱ kúú ña̱ káʼa̱nra (Éxodo 34:6). Saátu sánáʼa̱ña miíyó ña̱ va̱ʼaní-ini Jehová ta íyo tu̱ʼvara ña̱ ixakáʼnu-inira xa̱ʼa̱yó (Salmo 86:5). Kúeení-inira va̱ása sáa̱ kamara ta nda̱kúní íyo ña̱ kéʼéra (2 Pedro 3:9; Apocalipsis 15:4). Íyo ku̱a̱ʼáníka ña̱ kivi sakuaʼún xa̱ʼa̱ra tá ná kaʼviún Biblia.

20, 21. ¿Nda̱saa kivi xa̱ún koún migo Jehová tá kǒo kívi kuniúnra?

 ²⁰ ¿Nda̱saa kivi xa̱ún koún migo Jehová tá kǒo kívi kuniúnra? (Juan 1:18; 4:24; 1 Timoteo 1:17). Tá ná kaʼviún Biblia xa̱ún kunda̱a̱-iniún ña̱ ndixa íyo Jehová (Salmo 27:4; Romanos 1:20). Tá ná sakuaʼakaún xa̱ʼa̱ Jehová, ndeéka xa̱ún kuʼvi̱-iniún kuniúnra ta yatinka xa̱ún koún xíʼinra.

²¹ Saátu sakuaʼún xa̱ʼa̱ Jehová ña̱ kúúra yiváyó (Mateo 6:9). Ta̱kán kúú ta̱ i̱xava̱ʼa miíyó ta kúni̱ra ña̱ viíní ná kundooyó. Táʼan ña̱yóʼo kúú ña̱ kúni̱ iin táta ta̱ kúʼvi̱ní-ini xíni se̱ʼe, kúni̱ra ña̱ va̱ʼaní ná kundoona (Salmo 36:9). Ña̱ Biblia káʼa̱nña, ña̱ kivi xa̱ún koún migo Jehová (Santiago 2:23). Ndakanixi̱ní xa̱ʼa̱ ña̱yóʼo, ta̱ i̱xava̱ʼa ñuyǐví yóʼo kúni̱ra ña̱ ná koún migora.

22. ¿Ndáaña kivi keʼé sava na̱ yiví tá xítona ña̱ káʼviún Biblia?

²² Sava na̱ yiví kuni̱na ña̱ ná sandákoún ña̱ kaʼviún Biblia. Sana ndíʼi̱-inina xa̱ʼa̱ ña̱ nasamaún religión ña̱ ndíku̱ún. Soo va̱ása taxiún ña̱ ná kasi nda̱a̱ ni iinna nu̱ún ña̱ koún migo Jehová. Ña̱ koún migo Jehová kúú ña̱ va̱ʼaníka nu̱ú ndiʼi ña̱ʼa.

23, 24. a) ¿Nda̱chun xíniñúʼu ndakundeún nda̱ka̱tu̱ʼún xa̱ʼa̱ ña̱ kúni̱ún kunda̱a̱-iniún? b) ¿Ndáaña sakuaʼayó nu̱ú ña̱ inka capítulo?

²³ Tá ná kixáʼún kaʼviún Biblia sana ndani̱ʼún sava ña̱ʼa ña̱ va̱ása kunda̱a̱-iniún xíʼin. Tá saá ná ndoʼún, nda̱ka̱tu̱ʼun inkana ta ka̱ʼa̱n xíʼinna ña̱ ná chindeétáʼanna xíʼún. Ta̱ Jesús ni̱ka̱ʼa̱nra ña̱ xíniñúʼu vitá koo iniyó nda̱a̱ táki̱ʼva íyo na̱ va̱lí. Nda̱a̱ táki̱ʼva xi̱niyó chí nu̱ú kíxáʼa ña̱ capítulo yóʼo, na̱ va̱lí ku̱a̱ʼání ña̱ʼa ndáka̱tu̱ʼunna (Mateo 18:2-4). Ndióxi̱ kúni̱ra ña̱ ná ndani̱ʼún ña̱ kúni̱ún kunda̱a̱-iniún xa̱ʼa̱. Ña̱kán, viíní kaʼviún Biblia ña̱ va̱ʼa kunda̱a̱-iniún á ndixa ña̱ nda̱a̱ kúú ña̱ sákuaʼún (kaʼvi Hechos 17:11).

²⁴ Ña̱ kivi chindeétáʼan xíʼún ña̱ kunda̱a̱ka-iniún xa̱ʼa̱ Jehová kúú ña̱ kaʼviún Biblia. Nu̱ú ña̱ inka capítulo sakuaʼayó nda̱chun kǒo inka libro ña̱ kítáʼan xíʼin Biblia.