1. ¿Ndáaña kivi nda̱ka̱tu̱ʼún miíún tá xa̱a̱ sa̱ndíʼún ka̱ʼviún ña̱ libro yóʼo?

NU̱Ú ña̱ libro yóʼo, xa̱a̱ ku̱a̱ʼání ña̱ va̱xi nu̱ú Biblia sa̱kuaʼún, tá kúú ña̱ káʼa̱n Ndióxi̱ taxira kutakuyó ndiʼi tiempo, ndáa ña̱ ndóʼoyó tá xíʼi̱yó xíʼin ña̱ ndataku na̱ ni̱xi̱ʼi̱ (Eclesiastés 9:5; Lucas 23:43; Juan 5:28, 29; Apocalipsis 21:3, 4). Sana xa̱a̱ xáʼún reunión xíʼin na̱ testigo Jehová, ta kándíxaún ña̱ kúú ña̱yóʼo religión ña̱ nda̱a̱ (Juan 13:35). Ta sanatu xa̱a̱ va̱ʼaní kítáʼún xíʼin Jehová ta kúni̱ún kachíñún nu̱úra. Xa̱ʼa̱ ña̱kán, sana ndáka̱tu̱ʼún  miíún: “¿Ndáaka ña̱ xíniñúʼu keʼíi̱ ña̱ va̱ʼa kachíñui̱ nu̱ú Ndióxi̱?”.

2. ¿Nda̱chun nda̱kuchi iin ta̱a ta̱ ñuu Etiopía?

² Ña̱yóʼo kúú ña̱ ni̱nda̱ka̱tu̱ʼun iin ta̱a ta̱ ñuu Etiopía miíra, ta̱ ni̱xi̱yo tá siglo nu̱ú. Tá xa̱a̱ ni̱ya̱ʼa loʼo tiempo ña̱ nda̱taku ta̱ Jesús, iin discípulora ta̱ xi̱naní Felipe, na̱túʼunra xíʼin ta̱ ta̱a ñuu Etiopía ta ni̱na̱ʼa̱ra nu̱úra ña̱ ta̱ Jesús kúú ta̱ Mesías. Xa̱ʼa̱ ña̱ nda̱kanda̱ní-inira xa̱ʼa̱ ña̱ sa̱kuaʼara ndi̱ku̱n kama ni̱ka̱ʼa̱nra ña̱yóʼo: “Koto. Yóʼo ndíka̱a̱ ti̱kui̱í. ¿Ndáaña sási nu̱úi̱ ña̱ va̱ʼa ndakuchii̱?” (Hechos 8:26-36).

3. a) ¿Ndáa chiñu xa̱ʼnda ta̱ Jesús nu̱ú na̱ xi̱ndiku̱nñaʼá? b) ¿Ndáa ki̱ʼva xíniñúʼu ndakuchi iin na̱ yiví?

³ Ña̱ Biblia káxiní káʼa̱nña, tá kúni̱ún kachíñún nu̱ú Jehová xíniñúʼu ndakuchiún. Ta̱ Jesús xa̱ʼndara chiñu yóʼo nu̱ú na̱ xi̱ndiku̱nñaʼá: “Kúáʼanndó ta sanáʼa̱ndó na̱ yiví ña̱ iníísaá ñuyǐví ña̱ ná kundiku̱nna yi̱ʼi̱”. Ta ni̱ka̱ʼa̱nkara: “Ta sandákuchindóna” (Mateo 28:19). Mií ta̱ Jesús kúú ta̱ chi̱núu yichi̱ nu̱úyó ña̱ xíniñúʼu ndakuchiyó. Soo tá nda̱kuchira, su̱ví xi̱ní kuitíra nísakaana ti̱kui̱í, chi chi̱ka̱a̱ níínara ti̱xin ti̱kui̱í á ni̱sa̱ʼvi nííra ti̱xinrá (Mateo 3:16). Saátu tiempo vitin, tá ndákuchi iin na̱ ndásakáʼnu Ndióxi̱ sáʼvi níína ti̱xin ti̱kui̱í.

4. ¿Ndáaña náʼa̱ iinna tá ndákuchina?

⁴ Tá ndákuchi iin na̱ yiví, náʼa̱na nu̱ú inkana ña̱ ndixa kúni̱na koona migo Ndióxi̱ ta kachíñuna nu̱úra (Salmo 40:7, 8). Xa̱ʼa̱ ña̱kán sana ndáka̱tu̱ʼún miíún: “¿Ndáaña xíniñúʼu keʼíi̱ ña̱ va̱ʼa ndakuchii̱?”.

5. a) ¿Ndáaña xíniñúʼu keʼún tá kúma̱níka ndakuchiún? b) ¿Nda̱chun ndáyáʼviní reunión?

⁵ Tá kúma̱níka ndakuchiún xíniñúʼu sakuaʼún xa̱ʼa̱  Jehová ta saátu xa̱ʼa̱ ta̱ Jesús. Xa̱a̱ ki̱xáʼún kéʼún ña̱yóʼo tá ki̱xáʼún káʼviún Biblia (kaʼvi Juan 17:3). Soo íyo inkaka ña̱ xíniñúʼu keʼún. Ña̱ Biblia káchiña ña̱ xíniñúʼu kunda̱a̱ káxi iniún xa̱ʼa̱ ña̱ kúni̱ Ndióxi̱ (Colosenses 1:9). Reunión ña̱ kúúmií na̱ testigo Jehová kivi chindeétáʼanña xíʼún ña̱ viíka kutáʼún xíʼin Jehová. Xa̱ʼa̱ ña̱yóʼo xíniñúʼu ku̱ʼu̱n ni̱ʼún reunión (Hebreos 10:24, 25).

6. ¿Á ndiʼiví ña̱ va̱xi nu̱ú Biblia xíniñúʼu kuxini̱ún ña̱ va̱ʼa ndakuchiún?

⁶ Soo, Jehová va̱ása ndátura ña̱ ná kuxini̱ún xa̱ʼa̱ ndiʼi ña̱ va̱xi nu̱ú Biblia ña̱ va̱ʼa ndakuchiún. Saátu va̱ása níxi̱ndatura ña̱ ná kuxini̱ ta̱ ñuu Etiopía ndiʼi ña̱ va̱xi nu̱ú Biblia ña̱ va̱ʼa ndakuchira (Hechos 8:30, 31). Saáchi nda̱a̱ ni iin ki̱vi̱ va̱ása sandákooyó ña̱ sakuaʼayó xa̱ʼa̱ Jehová (Eclesiastés 3:11). Soo ña̱ va̱ʼa ndakuchiún xíniñúʼu kunda̱a̱-iniún xa̱ʼa̱ sava ña̱ ndáyáʼviní ña̱ va̱xi nu̱ú Biblia ta kandíxaúnña (Hebreos 5:12).

7. ¿Ndáa ki̱ʼva chíndeétáʼan ña̱ sa̱kuaʼún nu̱ú Biblia xíʼún?

⁷ Ña̱ Biblia káchiña: “Tá va̱ása kándíxana Ndióxi̱ kǒo kivi sakúsi̱ína-inira” (Hebreos 11:6). Xa̱ʼa̱ ña̱yóʼo, xíniñúʼu kandíxaún Ndióxi̱ ña̱ va̱ʼa ndakuchiún. Ta saátu káʼa̱n ña̱ Biblia tándi̱ʼi xi̱niso̱ʼo na̱ yiví ña̱ ñuu Corinto ña̱ ni̱ka̱ʼa̱n na̱ xi̱ndiku̱n ta̱ Jesús, savana ka̱ndíxana ña̱ ni̱ka̱ʼa̱nna ta nda̱kuchina (Hechos 18:8). Ki̱ʼva saátu chi̱ndeétáʼan ña̱ sa̱kuaʼún nu̱ú Biblia xíʼún ña̱ kandíxaún ña̱ káʼa̱n Ndióxi̱, ta saátu ña̱ kandíxaún ña̱ ki̱xi ta̱ Jesús ni̱xi̱ʼi̱ra xa̱ʼa̱yó ña̱ va̱ʼa nda̱tavára miíyó nu̱ú ku̱a̱chi xíʼin ña̱ xíʼi̱yó (Josué 23:14; Hechos 4:12; 2 Timoteo 3:16, 17).

8. ¿Ndáaña kivi chindeétáʼan xíʼún ña̱ natúʼún xa̱ʼa̱ ña̱ sákuaʼún?

⁸ Ña̱ kándíxaún Ndióxi̱ ndundakúkaña tá ná sakuaʼakaún xa̱ʼa̱ ña̱ sánáʼa̱ Biblia, ta saátu tá ná kiʼún  kuenta ndáa ki̱ʼva chíndeétáʼan ña̱yóʼo xíʼún. Tasaá, kuni̱ún natúʼún xa̱ʼa̱ ña̱ sákuaʼún xíʼin inkana (Jeremías 20:9; 2 Corintios 4:13). Soo, ¿ndáana kivi natúʼún xíʼin?

9, 10. a) ¿Ndáana kivi natúʼún xíʼin xa̱ʼa̱ ña̱ sákuaʼún? b) ¿Ndáaña xíniñúʼu keʼún tá kúni̱ún kitaún xíʼin na̱ congregación ña̱ natúʼún xíʼin na̱ yiví?

⁹ Sana kivi natúʼún xa̱ʼa̱ ña̱ sákuaʼún xíʼin na̱ veʼún, na̱ migoún, na̱ íyo yatin xíʼún, na̱ káʼvi xíʼún á na̱ káchíñu xíʼún. Ta iin ña̱ va̱ʼaní kúú ña̱yóʼo. Soo ndakaʼún ña̱ xíniñúʼu viíní ka̱ʼún xíʼinna ta xíʼin ña̱ to̱ʼó keʼúnña. Ta, tá ná ya̱ʼa tiempo kivi kixáʼún kitaún xíʼin na̱ congregación ña̱ natúʼún xíʼin na̱ yiví xa̱ʼa̱ Ndióxi̱. Tá túviún ña̱ xa̱a̱ íyo tu̱ʼvaún ña̱ keʼún ña̱yóʼo, kivi ka̱ʼún xíʼin na̱ sánáʼa̱ yóʼó xa̱ʼa̱ Biblia ña̱ kúni̱ún kitaún xíʼin na̱ congregación ña̱ natúʼún xíʼin na̱ yiví xa̱ʼa̱ Ndióxi̱. Tá na̱ sánáʼa̱ yóʼó xa̱ʼa̱ Biblia túvina ña̱ xa̱a̱ íyo tu̱ʼvaún ña̱ natúʼún xíʼin na̱ yiví, ta kéʼún ña̱ káʼa̱n Biblia, u̱vi̱ndó saá ndakutáʼanndó ña̱ ka̱ʼa̱nndó xa̱ʼa̱ ña̱yóʼo xíʼin u̱vi̱ na̱ anciano ti̱xin congregación.

¹⁰ Ta ti̱xin ña̱ reunión yóʼo, na̱ anciano ka̱ʼa̱nna xíʼún ña̱ va̱ʼa kotona á kúnda̱a̱-iniún ta kándíxaún ña̱ nda̱a̱ ña̱ sánáʼa̱ Biblia ta kéʼún ña̱ káʼa̱nña. Ta saátu kiʼinna kuenta á ndixa kúni̱ún koún testigo Jehová. Ndakaʼún ña̱ na̱ anciano ndáana ndiʼi na̱ hermano na̱ ñúʼu ti̱xin congregación, ta saátu ndáana miíún. Xa̱ʼa̱ ña̱yóʼo, va̱ása yi̱ʼvíún ña̱ ka̱ʼún xíʼinna (Hechos 20:28; 1 Pedro 5:2, 3). Tá ná ndiʼi ña̱ reunión yóʼo, na̱ anciano ka̱ʼa̱nna xíʼún á xa̱a̱ kivi kitaún xíʼin na̱ congregación ña̱ natúʼunndó xíʼin na̱ yiví xa̱ʼa̱ Ndióxi̱.

11. ¿Nda̱chun ndáyáʼviní nasamaún savaka ña̱ kéʼún tá kúma̱níka kitaún xíʼin na̱ congregación ña̱ natúʼún xíʼin na̱ yiví?

¹¹ Sana kivi ka̱ʼa̱n na̱ anciano xíʼún, ña̱ xíniñúʼu  nasamaún savaka ña̱ kéʼún ña̱ va̱ʼa kitaún xíʼin na̱ congregación ña̱ natúʼún xíʼin na̱ yiví xa̱ʼa̱ Ndióxi̱. ¿Nda̱chun ndáyáʼviní keʼún ña̱yóʼo? Tá nátúʼunyó xíʼin na̱ yiví, chiñu Ndióxi̱ kúú ña̱ kéʼéyó, xa̱ʼa̱ ña̱yóʼo viíní xíniñúʼu koo ña̱ kéʼéyó ña̱ va̱ʼa ndasakáʼnuyó ki̱vi̱ra (1 Corintios 6:9, 10; Gálatas 5:19-21).

12. ¿Nda̱chun xíniñúʼu ndikó-ini ndiʼiyó xa̱ʼa̱ ku̱a̱chiyó?

¹² Soo íyo inkaka ña̱ xíniñúʼu keʼún tá kúma̱níka ndakuchiún. Ta̱ apóstol Pedro ka̱chira: “Ndikó-inindó ta ndikóndó nu̱ú Ndióxi̱ ña̱ va̱ʼa ná ndoo ku̱a̱chindó” (Hechos 3:19). ¿Ndáaña kúni̱ kachi ña̱ ndikó-iniyó? Ña̱ xíniñúʼu kusuchí-iniyó xa̱ʼa̱ ña̱ ke̱ʼéyó ña̱ va̱ása va̱ʼa. Tá yóʼó ke̱ʼún ña̱ kini xíʼin inkana á ni̱ki̱si̱ún xíʼinna, xíniñúʼu ndandikó-iniún xa̱ʼa̱ ña̱yóʼo. Ta ni ndiʼi tiempo chíka̱ún ndee̱ ña̱ keʼún ña̱ va̱ʼa, ni saá xíniñúʼu ndikó-iniún saáchi ndiʼiyó kúúyó na̱ yiví ku̱a̱chi ta xíniñúʼu ka̱ʼa̱nyó xíʼin Ndióxi̱ ña̱ ixakáʼnu-inira xa̱ʼa̱yó (Romanos 3:23; 5:12).

13. ¿Ndáaña kúni̱ kachi ña̱ ndikóyó nu̱ú Ndióxi̱?

¹³ ¿Á xíniñúʼu ndandikó kuití iniyó xa̱ʼa̱ ña̱ ke̱ʼéyó ta xa̱a̱ va̱ʼaví? Va̱ása. Ta̱ apóstol Pedro ni̱ka̱ʼa̱nkara ña̱yóʼo: “Ndikóndó nu̱ú Ndióxi̱”. Ña̱yóʼo kúni̱ kachiña ña̱ xíniñúʼu sandákoún ndiʼi ña̱ va̱ása va̱ʼa ña̱ xi̱keʼún tá ya̱chi̱ ta kixáʼún keʼún ña̱ va̱ʼa. Ndakanixi̱ní xa̱ʼa̱ ña̱yóʼo: ná kachiyó ña̱ nu̱ú yichi̱ kúú ña̱ ku̱a̱ʼún iin lugar, ta tá ni̱ya̱ʼa loʼo ki̱ʼún kuenta ña̱ su̱ví yichi̱ va̱ʼa kúú ña̱ ku̱a̱ʼún. ¿Ndáaña keʼún? Sana kundatún, ta ndikóko̱ún ta ndakiʼún ku̱ʼún chí yichi̱ va̱ʼa. Ki̱ʼva saá íyo ña̱yóʼo, tá káʼviún Biblia kivi kiʼún kuenta ña̱ kéʼékaún sava ña̱ va̱ása va̱ʼa ta xíniñúʼu nasamaún ña̱yóʼo. Ña̱kán, chika̱ún ndee̱ ña̱ nasamaún ña̱ kéʼún ta kixáʼún keʼún ña̱ va̱ʼa.

14. ¿Ndáaña xíniñúʼu keʼéyó ña̱ va̱ʼa ndataxiyó miíyó ndaʼa̱ Ndióxi̱?

¹⁴ Inka ña̱ ndáyáʼviní ña̱ xíniñúʼu keʼún tá kúma̱níka ndakuchiún kúú ña̱ ndataxiún miíún ndaʼa̱ Ndióxi̱. Tá kúni̱ iinna ndataxina miína ndaʼa̱ Jehová, kéʼéna iin oración nu̱ú káʼa̱nna xíʼinra ña̱ ndasakáʼnuna iinlá miíra ta ña̱ kachíñuna nu̱úra kúú ña̱ kundayáʼviníka nu̱úna (Lucas 4:8).

15, 16. ¿Ndáa xa̱ʼa̱ kúú ña̱ ndátaxi iin na̱ yiví miína ndaʼa̱ Ndióxi̱?

¹⁵ Ña̱ ka̱ʼún xíʼin Jehová ña̱ iinlá nu̱ú miíra kachíñún, íyoña nda̱a̱ táki̱ʼva íyo ña̱ ka̱ʼún xíʼin iin na̱ yiví na̱ kúni̱níún xíniún ña̱ koún xíʼinna ndiʼi tiempo. Ndakanixi̱ní xa̱ʼa̱ iin na̱ kúú novio. Tá ku̱a̱ʼáka tiempo kítáʼan iin ta̱a xíʼin ñá noviara, xáa̱ra kúʼvi̱níka-inira xínirañá ta kúni̱ra tindaʼa̱ra xíʼinñá. Ta ña̱ kúni̱ra keʼéra su̱ví iin si̱ki kúúña, soo ni saá tíndaʼa̱vara xíʼinñá chi kúʼvi̱ní-inira xínirañá.

¹⁶ Ta saátu, tá ku̱a̱ʼáka tiempo sákuaʼún xa̱ʼa̱ Jehová xáún kúʼvi̱ka-iniún xíniúnra ta kúni̱ún chika̱ún ndee̱ ña̱ kachíñún nu̱úra. Ta ña̱yóʼo chindaʼá yóʼó ña̱ xa̱ún ndataxiún miíún ndaʼa̱ Ndióxi̱. Ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Tá iinndó kúni̱ndó koondó discípuloi̱, sandákoondó keʼéndó ña̱ kúni̱ miíndó” (Marcos 8:34, nota). Ña̱yóʼo kúni̱ kachiña ña̱ iinlá Jehová kúú ta̱ xíniñúʼu kandíxayó. Xa̱ʼa̱ ña̱kán, ña̱ kundayáʼvika nu̱ún kúú ña̱ kúni̱ Jehová ta su̱víka ña̱ kúni̱ miíún (kaʼvi 1 Pedro 4:2).

17. ¿Nda̱chun va̱ása ndátaxi sava na̱ yiví miína ndaʼa̱ Jehová?

¹⁷ Sava na̱ yiví va̱ása ndátaxina miína ndaʼa̱ Jehová, saáchi yíʼvina ña̱ va̱ása saxínuna ña̱ ni̱ka̱ʼa̱nna  kachíñuna nu̱úra. Sana va̱ása kúni̱na sandákavana-inira. Á sanatu ndákanixi̱nína ña̱ tá ke̱ʼéna iin ña̱ va̱ása va̱ʼa kǒo ndataxina kuenta ndaʼa̱ Jehová, chi va̱ása níndataxina miína ndaʼa̱ra.

18. ¿Ndáaña chindeétáʼan xíʼún ña̱ va̱ása sandákavaún-ini Jehová?

¹⁸ Ña̱ kúʼvi̱-iniún xíniún Jehová kúú ña̱ chindeétáʼan xíʼún ña̱ va̱ása sandákavaún-inira. Ta saátu chindeétáʼanña xíʼún ña̱ chika̱ún ndee̱ ña̱ saxínún ña̱ ni̱ka̱ʼún keʼún (Eclesiastés 5:4; Colosenses 1:10). Ta va̱ása ixayo̱ʼvi̱ña xíʼún ña̱ keʼún ña̱ kúni̱ra. Ta̱ apóstol Juan ka̱chira: “Ña̱yóʼo kúni̱ kachi ña̱ kúʼvi̱-iniyó xíniyó Ndióxi̱: ña̱ ná kuniso̱ʼoyó chiñu ña̱ xáʼndara nu̱úyó; ta chiñu ña̱ xáʼndara su̱ví ña̱ ve̱e kúúña”. Ta su̱ví ña̱ yo̱ʼvi̱ saxínuyó kúúña (1 Juan 5:3).

19. ¿Nda̱chun va̱ása xíniñúʼu yi̱ʼvíún ña̱ ndataxiún miíún ndaʼa̱ Jehová?

¹⁹ Ni kúúyó na̱ yiví ku̱a̱chi kiviva ndataxiyó miíyó ndaʼa̱ Jehová. Ta kúnda̱a̱va-inira ndáa ña̱ kivi keʼéyó ta ndáa ña̱ va̱ása kivi keʼéyó (Salmo 103:14). Ta saátu chindeétáʼan Jehová xíʼinyó ña̱ keʼéyó ña̱ va̱ʼa (Isaías 41:10). Nda̱a̱ táki̱ʼva káchi ña̱ Biblia: “Miíra na̱ʼa̱ yichi̱ nu̱ún”. Xa̱ʼa̱ ña̱kán, kandíxa Jehová xíʼin ndiʼi níma̱ún (Proverbios 3:5, 6).

20. ¿Ndáaña xíniñúʼu keʼún tá xa̱a̱ nda̱taxiún miíún ndaʼa̱ Jehová?

²⁰ ¿Á túviún ña̱ xa̱a̱ íyo tu̱ʼvaún ña̱ ndataxiún miíún ndaʼa̱ Jehová? Tá saá íyoña, tá ná ndataxiún miíún ndaʼa̱ Jehová saá kúú ña̱ koo tu̱ʼvaún ña̱ ndakuchiún.

21, 22. ¿Ndáa ki̱ʼva kivi na̱ʼún nu̱ú ndiʼina ña̱ nda̱taxiún miíún ndaʼa̱ Jehová?

²¹ Ka̱ʼa̱n xíʼin ta̱ anciano ta̱ kúú coordinador ti̱xin congregación ña̱ xa̱a̱ nda̱taxiún miíún ndaʼa̱ Jehová ta  kúni̱ún ndakuchiún. Ta̱yóʼo ka̱ʼa̱nra xíʼin sava na̱ anciano ña̱ ná nda̱ka̱tu̱ʼunna yóʼó xa̱ʼa̱ sava ña̱ va̱xi nu̱ú Biblia. Tá na̱yóʼo xi̱nina ña̱ xa̱a̱ íyo tu̱ʼvaún, ka̱ʼa̱nna xíʼún ña̱ kivi ndakuchiún tá ná koo iin asamblea na̱ testigo Jehová. Ti̱xin ña̱ asamblea yóʼo ya̱ʼa iin discurso ña̱ káʼa̱n xa̱ʼa̱ ndáa ña̱ kúni̱ kachi ña̱ ndakuchiyó. Ta̱ hermano ta̱ taxi ña̱ discurso yóʼo keʼéra u̱vi̱ pregunta xíʼin ndiʼi na̱ ndakuchi. Tá ná ndakuiún  ña̱ pregunta yóʼo, saá na̱ʼún nu̱ú ndiʼina ña̱ kándíxaún Ndióxi̱ (Romanos 10:10).

²² Tasaá kúú ña̱ ndakuchiún. Ta chika̱a̱ níína yóʼó ti̱xin ti̱kui̱í á sa̱ʼvi níún ti̱xinrá. Ña̱ ndakuchiún kúú ña̱ na̱ʼa̱ nu̱ú ndiʼina ña̱ nda̱taxiún miíún ndaʼa̱ Ndióxi̱ tasaá nduún testigo Jehová.

23. ¿Ndáaña kúni̱ kachi ña̱ ndakuchiyó “xíʼin ki̱vi̱ yiváyó, xíʼin ki̱vi̱ se̱ʼera ta saátu xíʼin ki̱vi̱ espíritu santo”?

²³ Ta̱ Jesús ni̱ka̱ʼa̱nra ña̱ na̱ discípulora ndakuchina “xíʼin ki̱vi̱ yiváyó, xíʼin ki̱vi̱ se̱ʼera ta saátu xíʼin ki̱vi̱ espíritu santo” (kaʼvi Mateo 28:19). ¿Ndáaña kúni̱ kachi ña̱ tu̱ʼun yóʼo? Ña̱ ndakuniyó ña̱ mií Jehová kúú ta̱ xáʼndachíñu, ta ndakunituyó ndáa chiñu kúú ña̱ ta̱xi Jehová ndaʼa̱ ta̱ Jesús, ta saátu ndáa ki̱ʼva xíniñúʼu Jehová espíritu santora ña̱ saxínura ña̱ kúni̱ra (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Ndáaña kúni̱ kachi ña̱ ndákuchiyó?

²⁴ Ña̱ ndakuchiyó ndáyáʼviníña. Tá chíka̱a̱ níína yóʼó ti̱xin ti̱kui̱í á tá sáʼvi níún ti̱xinrá nda̱a̱ táki̱ʼva íyo na̱ “ni̱xi̱ʼi̱” saá íyoún, saáchi sándakoún ndiʼi ña̱ va̱ása va̱ʼa ña̱ xi̱keʼún tá ya̱chi̱. Ta, tándi̱ʼi ki̱taún ti̱xin ti̱kui̱í saá kúú ña̱ kixáʼún keʼún ña̱ kúni̱ Jehová. Tasaá kúú ña̱ na̱ʼún ña̱ kúún iin na̱ káchíñu nu̱ú Ndióxi̱. Ta ndakaʼún ña̱ va̱ása níndataxiún miíún ndaʼa̱ iin na̱ yiví, chi ndaʼa̱ Jehová kúú ña̱ nda̱taxiún miíún.

25. ¿Ndáaña kunda̱a̱-iniyó xa̱ʼa̱ nu̱ú ña̱ so̱ndíʼi capítulo?

²⁵ Ña̱ ndataxiún miíún ndaʼa̱ Jehová chindeétáʼanña xíʼún ña̱ viíka kutáʼún xíʼinra (Salmo 25:14). Soo tá xa̱a̱ nda̱kuchiyó va̱ása kúni̱ kachiña ña̱ xa̱a̱ ni̱ka̱kuyó. Ta̱ apóstol Pablo ka̱ʼyíra ña̱yóʼo: “Ndakundeéndó chika̱a̱ndó ndee̱ ña̱ va̱ʼa ndakiʼinndó ña̱ ka̱kundó” (Filipenses 2:12). Tá ndákuchiyó saáví kúú ña̱ kíxáʼayó káchíñuyó nu̱ú Jehová. ¿Ndáaña kivi keʼún ña̱ va̱ʼa ndakundeún koún migo Jehová? Nu̱ú ña̱ inka capítulo kunda̱a̱-iniyó xa̱ʼa̱ ña̱yóʼo.