1. ¿Ndáa oración ña̱ xíni̱ ku̱a̱ʼání na̱ yiví ka̱ʼa̱nyó xa̱ʼa̱ nu̱ú capítulo yóʼo?

KU̱A̱ʼÁNÍ na̱ yiví xíni̱na oración ña̱ padrenuestro. Ta̱ Jesús xi̱niñúʼura ña̱yóʼo ña̱ va̱ʼa sanáʼa̱ra na̱ discípulora ndáa ki̱ʼva ka̱ʼa̱nna xíʼin Ndióxi̱. ¿Ndáaña ndu̱kú ta̱ Jesús ti̱xin ña̱ oración yóʼo? ¿Nda̱chun ndáyáʼviní kunda̱a̱-iniyó ndáa ña̱ kúni̱ kachi ña̱ oración yóʼo?

2. ¿Ndáa u̱ni̱ ña̱ʼa ña̱ ndáyáʼviní sa̱náʼa̱ ta̱ Jesús miíyó ndukúyó ti̱xin ña̱ oración?

² Ta̱ Jesús ni̱ka̱ʼa̱nra ña̱yóʼo: “Ndóʼó, siaʼa ka̱ʼa̱nndó xíʼin Ndióxi̱: ‘Yivándi̱ ta̱ íyo chí ndiví, ná nduyi̱i̱ ki̱vi̱ún. Ná kixaa̱ ña̱ kaʼndachíñún. Ta ná koo ña̱ kúni̱ miíún, nda̱a̱ táki̱ʼva íyo chí ndiví, saá ná koo nu̱ú ñuʼú yóʼoʼ” (kaʼvi Mateo 6:9-13). ¿Nda̱chun sa̱náʼa̱ ta̱ Jesús miíyó ña̱ ndukúyó u̱ni̱ ña̱ʼa yóʼo tá káʼa̱nyó xíʼin Ndióxi̱? (Koto nota 20, “Padrenuestro”).

3. ¿Ndáaña ka̱ʼa̱nyó xa̱ʼa̱ nu̱ú ña̱ capítulo yóʼo?

³ Xa̱a̱ sa̱kuaʼayó ña̱ ki̱vi̱ Ndióxi̱ kúú Jehová. Ta saátu, na̱kunda̱a̱-iniyó ndáa ña̱ kúni̱ Ndióxi̱ taxira ndaʼa̱ na̱ yiví, ta ndáa ki̱ʼva kúni̱ra koo nu̱ú ñuʼú yóʼo. Soo, ¿ndáaña xi̱kuni̱ kachi ta̱ Jesús tá ni̱ka̱ʼa̱nra: “Ná kixaa̱ ña̱ kaʼndachíñún”? Nu̱ú ña̱ capítulo yóʼo kunda̱a̱-iniyó ndáa ña̱ kúú Reino Ndióxi̱, ndáa ña̱ʼa keʼéña, ta ndáa ki̱ʼva ndasayi̱i̱ña ki̱vi̱ Ndióxi̱.

4. ¿Ndáaña kúú Reino Ndióxi̱, ta ndáana kaʼndachíñu ti̱xin ña̱ Reino yóʼo?

⁴ Reino Ndióxi̱ kúú ña̱ chíñu ña̱ chi̱ndúʼú Jehová  chí ndiví. Ndióxi̱ nda̱kaxinra se̱ʼera ta̱ Jesús ña̱ kaʼndachíñura ti̱xin ña̱ Reino yóʼo. Ta ña̱ Biblia káʼa̱nña xa̱ʼa̱ ta̱ Jesús ña̱ kúúra Rey nu̱ú ndiʼi na̱ kúú rey ta kúúra táta nu̱ú ndiʼi na̱ xáʼndachíñu (1 Timoteo 6:15). Ku̱a̱ʼáníka ña̱ʼa kivi keʼé ta̱ Jesús xa̱ʼa̱ miíyó nu̱úka ña̱ kivi keʼé na̱ chíñu na̱ íyo nu̱ú ñuʼú yóʼo. Ta saátu, íyoníka ndee̱ra nu̱ú ndiʼi na̱ chíñu yóʼo.

5. ¿Ndáa ta̱ kaʼndachíñu ti̱xin Reino Ndióxi̱, ta ndáa míí keʼéra ña̱yóʼo?

⁵ Ta̱ Jesús nda̱ndikóra chí ndiví tá ni̱ya̱ʼa 40 ki̱vi̱ ña̱ nda̱takura. Tá ni̱ya̱ʼa tiempo, Jehová ta̱xira chiñu ndaʼa̱ra ña̱ kaʼndachíñura ti̱xin Reinora (Hechos 2:33). Reino Ndióxi̱ nda̱a̱ chí ndiví kaʼndachíñuña nu̱ú ñuʼú yóʼo (Apocalipsis 11:15). Ña̱kán, ña̱ Biblia káʼa̱nña xa̱ʼa̱ Reino Ndióxi̱ ña̱ íyoña chí ndiví (2 Timoteo 4:18).

6, 7. ¿Nda̱chun va̱ʼaníka kaʼndachíñu ta̱ Jesús nu̱ú nda̱a̱ ndáaka na̱ chíñu na̱ íyo nu̱ú ñuʼú yóʼo?

⁶ Ña̱ Biblia káʼa̱nña xa̱ʼa̱ ta̱ Jesús ña̱ va̱ʼaníka kaʼndachíñu ta̱yóʼo nu̱ú nda̱a̱ ndáaka na̱ chíñu na̱ íyo nu̱ú ñuʼú yóʼo, saáchi “iinlá ta̱yóʼo kúú ta̱ va̱ása kuvi” (1 Timoteo 6:16). Ndiʼi na̱ chíñu na̱ íyo nu̱ú ñuʼú yóʼo xíʼi̱na, soo ta̱ Jesús nda̱a̱ ni iin ki̱vi̱ va̱ása kuvira. Xa̱ʼa̱ ña̱yóʼo, ndiʼi ña̱ keʼé ta̱ Jesús xa̱ʼa̱yó ndiʼi tiempo kooña.

⁷ Ta saátu ña̱ Biblia sánáʼa̱ña miíyó xa̱ʼa̱ ta̱ Jesús ña̱ koora iin Rey ta̱ nda̱kúní tiin ku̱a̱chi, ta kundáʼvi-inira kunira miíyó. Iin profecía káchiña: “Ta espíritu Jehová kooña xíʼinra, ña̱ va̱ʼa ndíchi koora ta ku̱a̱ʼá ña̱ʼa kunda̱a̱-inira, koo espíritu xíʼinra ña̱ va̱ʼa taxira consejo ta koo ndee̱ ndaʼa̱ra, espíritu ña̱ kuxini̱ra ku̱a̱ʼá ña̱ʼa ta ixato̱ʼóra Jehová. Ta xíʼin ña̱ si̱í-ini keʼéra ña̱ kúni̱ Jehová. Va̱ása tiinra ku̱a̱chi xíʼin ña̱ xíto kuitíra, ni va̱ása tiinra ku̱a̱chi xa̱ʼa̱ ña̱ xíniso̱ʼo kuitíra. Ta nda̱kúní tiinra ku̱a̱chi xíʼin na̱  ndáʼvi” (Isaías 11:2-4). ¿Á kúsi̱í-iniún ña̱ saá ná koo rey ta̱ kaʼndachíñu nu̱ún?

8. ¿Nda̱chun va̱ʼa kúnda̱a̱-iniyó ña̱ va̱ása kaʼndachíñu iinlá mií ta̱ Jesús?

⁸ Ña̱ Biblia káʼa̱nña ña̱ nda̱kaxin Ndióxi̱ sava na̱ yiví ña̱ va̱ʼa kaʼndachíñuna xíʼin ta̱ Jesús chí ndiví. Tá kúú, ta̱ apóstol Pablo ni̱ka̱ʼa̱nra ña̱yóʼo xíʼin ta̱ Timoteo: “Tá ná kundeé-iniyó, saá kúú ña̱ inkáchi kaʼndachíñuyó xíʼin ta̱kán” (2 Timoteo 2:12). ¿Nda̱saa na̱ yiví kaʼndachíñu xíʼin ta̱ Jesús?

9. a) ¿Nda̱saa na̱ yiví kaʼndachíñu xíʼin ta̱ Jesús? b) ¿Ama ki̱xáʼa Jehová ndáka̱xinra na̱ 144,000?

⁹ Nda̱a̱ táki̱ʼva xa̱a̱ sa̱kuaʼayó nu̱ú capítulo 7, ta̱ apóstol Juan xi̱nira ta̱ Jesús nu̱ú iin visión ña̱ kúúra Rey chí ndiví xíʼin 144,000 na̱ kúú rey (kaʼvi Apocalipsis 14:1). ¿Ndáana kúú na̱ 144,000 yóʼo? Mií ta̱ Juan káʼa̱n xíʼinyó ndáa na̱ kúúna: “Na̱yóʼo kúú na̱ ndíku̱n sa̱tá ta̱ íyo nda̱a̱ táki̱ʼva íyo ndikachi ni nda̱a̱ ndáaka nu̱ú ku̱a̱ʼa̱nra”. Ta sa̱tána na̱yóʼo tañu na̱ ñuyǐví yóʼo (Apocalipsis 14:4). Ta̱ íyo nda̱a̱ táki̱ʼva íyo ndikachi kúú ta̱ Jesús. Ta na̱ 144,000 kúú na̱ nda̱kú íyo ini ndásakáʼnu Ndióxi̱, na̱ nda̱kaxinra ña̱ kaʼndachíñuna xíʼin ta̱ Jesús chí ndiví. Tá xíʼi̱na saá kúú ña̱ ndátakuna chí ndiví (Apocalipsis 5:10). Jehová ki̱xáʼara ndáka̱xinra na̱ 144,000 nda̱a̱ tá siglo nu̱ú.

10. ¿Nda̱chun ni̱na̱ʼa̱ Jehová ña̱ kúʼvi̱-inira xínira miíyó tá nda̱kaxinra na̱ 144,000 ña̱ kaʼndachíñuna xíʼin ta̱ Jesús?

¹⁰ Kúʼvi̱ní-ini Jehová xínira miíyó, ña̱kán ta̱xira ña̱ ná kaʼndachíñu na̱ yiví xíʼin ta̱ Jesús. Ta̱yóʼo va̱ʼaní kaʼndachíñura nu̱úyó chi ni̱xi̱yora nda̱a̱ táki̱ʼva íyo miíyó na̱ yiví, ta saátu ni̱xo̱ʼvi̱níra. Ta̱ apóstol Pablo ni̱ka̱ʼa̱nra ña̱ va̱ʼaní kúnda̱a̱-ini ta̱ Jesús xíʼin ndiʼi ña̱ ndóʼoyó, saáchi ndo̱ʼora nda̱a̱ táki̱ʼva ndóʼo miíyó (Hebreos 4:15; 5:8). Ta saátu na̱  144,000 va̱ʼaní kúnda̱a̱-inina xíʼin ña̱ ndóʼoyó, chi saátu na̱yóʼo ni̱xo̱ʼvi̱na xa̱ʼa̱ ña̱ xi̱kuuna na̱ yiví ku̱a̱chi ta saátu xi̱kuumiína kue̱ʼe̱. Ña̱kán, kivi kandíxayó ña̱ kunda̱a̱-ini ta̱ Jesús ta saátu na̱ 144,000 xíʼin ndiʼi ña̱ ndóʼoyó ta saátu xíʼin ndiʼi tu̱ndóʼo ña̱ yáʼayó nu̱ú.

11. ¿Nda̱chun sa̱náʼa̱ ta̱ Jesús na̱ discípulora ña̱ ná ndukúna ña̱ koo ña̱ kúni̱ mií Ndióxi̱ chí ndiví?

¹¹ Ta̱ Jesús sa̱náʼa̱ra na̱ discípulora ña̱ xíniñúʼu ndukúna ña̱ ná koo ña̱ kúni̱ mií Ndióxi̱ nu̱ú ñuʼú yóʼo ta saátu chí ndiví. ¿Nda̱chun xi̱niñúʼu ndukúna nu̱ú Ndióxi̱ ña̱ ná koo ña̱ kúni̱ miíra chí ndiví? Nu̱ú ña̱ capítulo 3 sa̱kuaʼayó xa̱ʼa̱ ta̱ Ndi̱va̱ʼa ña̱ ndu̱ura ta̱ sáa̱-ini xíni Ndióxi̱. Jehová ta̱xira ña̱ ni̱xi̱yo ta̱ Ndi̱va̱ʼa xíʼin na̱ ta̱chí ndi̱va̱ʼa loʼo tiempo chí ndiví. Xa̱ʼa̱ ña̱kán, su̱ví ndiʼi na̱ ni̱xi̱yo chí ndiví níxi̱keʼé ña̱ kúni̱ Ndióxi̱. Nu̱ú ña̱ capítulo 10 sakuaʼakayó xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa.

12. ¿Ndáa u̱vi̱ ña̱ʼa ña̱ ndáyáʼviní káʼa̱n Apocalipsis 12:10 xa̱ʼa̱?

¹² Ña̱ Biblia káʼa̱nña ña̱ ka̱nitáʼan ta̱ Jesús xíʼin ta̱ Ndi̱va̱ʼa tá ni̱ya̱ʼa loʼo tiempo ña̱ ki̱xáʼara xáʼndachíñura ti̱xin Reino Ndióxi̱ (kaʼvi Apocalipsis 12:7-10). Apocalipsis 12:10 káʼa̱nña xa̱ʼa̱ u̱vi̱ ña̱ʼa ña̱ ndáyáʼviní. Ña̱ nu̱ú, ta̱ Jesucristo ki̱xáʼara xáʼndachíñura. Ta ña̱ u̱vi̱, ta̱vára ta̱ Ndi̱va̱ʼa chí ndiví ta chi̱ndaʼárara va̱xira nu̱ú ñuʼú yóʼo. Ta ña̱yóʼo xa̱a̱ ku̱uvaña, nda̱a̱ táki̱ʼva sakuaʼayó vitin.

13. ¿Ndáaña ku̱u chí ndiví tá ki̱ta ta̱ Ndi̱va̱ʼa?

¹³ Na̱ ángel na̱ nda̱kú íyo ini, ni̱kusi̱íní-inina tá ta̱vána ta̱ Ndi̱va̱ʼa xíʼin na̱ ta̱chí ndi̱va̱ʼa chí ndiví. Ña̱ Biblia káchiña: “Kusi̱í-inindó, ndóʼó na̱ ndóo chí ndiví” (Apocalipsis 12:12). Ta vitin va̱ʼaní ndóona chí ndiví ta va̱ʼaní kítáʼanna, chi ndiʼi na̱ íyo kán kéʼéna ña̱ kúni̱ mií Ndióxi̱.

14. ¿Ndáaña ki̱xáʼa kúu nu̱ú ñuʼú yóʼo tá ta̱vána ta̱ Ndi̱va̱ʼa chí ndiví?

 ¹⁴ Soo síínní íyo nu̱ú ñuʼú yóʼo. Saáchi na̱ yiví xóʼvi̱nína, chi ta̱ Ndi̱va̱ʼa íyora nu̱ú ñuʼú yóʼo ta “sáa̱níra chi kúnda̱a̱-inira ña̱ si̱lóʼo kuití tiempo kíndo̱o nu̱úra” ta ndiʼi-xa̱ʼa̱ra (Apocalipsis 12:12). Ta̱ Ndi̱va̱ʼa sáa̱níra chi ta̱vánara chí ndiví, ta kúnda̱a̱-inira ña̱ si̱lóʼo kúma̱ní ta ndiʼi-xa̱ʼa̱ra. Xa̱ʼa̱ ña̱kán sáxo̱ʼvi̱níra na̱ yiví ta táxiníra tu̱ndóʼo ndaʼa̱na.

15. ¿Ndáaña kúni̱ Jehová koo nu̱ú ñuʼú yóʼo?

¹⁵ Soo ta̱ʼán nasa̱ma ña̱ kúni̱ Jehová koo nu̱ú ñuʼú yóʼo. Kúni̱ra ña̱ ná ndulivi nu̱ú ñuʼú yóʼo, ta va̱ása kuumiíkayó ku̱a̱chi, ta kutakuyó ndiʼi tiempo (Salmo 37:29). ¿Ndáa ki̱ʼva keʼé Reino Ndióxi̱ ndiʼi ña̱yóʼo?

16, 17. ¿Ndáaña sánáʼa̱ profecía ña̱ va̱xi nu̱ú Daniel 2:44 miíyó xa̱ʼa̱ Reino Ndióxi̱?

¹⁶ Profecía ña̱ va̱xi nu̱ú Daniel 2:44 káchiña: “Ta ki̱vi̱ ná kundoo na̱ chíñu kán, Ndióxi̱ ta̱ íyo chí ndiví chindúʼúra iin ta̱ kaʼndachíñu ta va̱ása ndiʼi-xa̱ʼa̱ ña̱ kaʼndachíñura, ta chiñu ña̱ kuumií ta̱yóʼo va̱ása ndakiʼin inkanaña ndaʼa̱ra. Ta ta̱ chíñu yóʼo sandíʼi-xa̱ʼa̱ra ndiʼi na̱ chíñu ñuyǐví yóʼo, ta iinlá miíra koo ndiʼi tiempo”. ¿Ndáaña sánáʼa̱ ña̱ profecía yóʼo miíyó xa̱ʼa̱ Reino Ndióxi̱?

¹⁷ Ña̱ nu̱ú, sánáʼa̱ña miíyó ña̱ Reino Ndióxi̱ kixáʼaña kaʼndachíñuña “ki̱vi̱ ná kundoo na̱ chíñu”. Ña̱yóʼo kúni̱ kachiña, ña̱ kookava na̱ chíñu nu̱ú ñuʼú yóʼo tá ná kixáʼa kaʼndachíñu Reino Ndióxi̱. Ña̱ u̱vi̱, sánáʼa̱ña miíyó ña̱ Reino Ndióxi̱ ndiʼi tiempo kooña ta va̱ása nasa̱maña. Ta ña̱ u̱ni̱, sánáʼa̱ña miíyó ña̱ na̱ chíñu na̱ íyo nu̱ú ñuʼú yóʼo kanitáʼanna xíʼin Reino Ndióxi̱. Soo Reino Ndióxi̱ kúú ña̱ kuchiñu, ta iinlá ña̱yóʼo kaʼndachíñu nu̱ú ñuʼú yóʼo. Tá ná xi̱nu ña̱ profecía yóʼo, saá kúú ña̱ va̱ʼaní kaʼndachíñuna nu̱úyó.

18. ¿Nda̱saa naní guerra nu̱ú kanitáʼan na̱ chíñu na̱ íyo nu̱ú ñuʼú yóʼo xíʼin Reino Ndióxi̱?

 ¹⁸ ¿Ndáaña kuu tá kúma̱ní si̱lóʼo ña̱ kixáʼa kanitáʼan na̱ chíñu na̱ íyo nu̱ú ñuʼú yóʼo xíʼin Reino Ndióxi̱? Na̱ ta̱chí ndi̱va̱ʼa sandáʼvina “ndiʼi na̱ chíñu ña̱ iníísaá ñuyǐví, ña̱ ndakutáʼanna ña̱ kixáʼa guerra Ndióxi̱ ta̱ kúúmií ndiʼi ndee̱”. Ña̱ guerra yóʼo naníña Armagedón, ta ti̱xin ña̱yóʼo kanitáʼan na̱ chíñu na̱ íyo nu̱ú ñuʼú yóʼo xíʼin Reino Ndióxi̱ (Apocalipsis 16:14, 16). (Koto nota 10, “Armagedón”).

19, 20. ¿Nda̱chun xíniñúʼu kaʼndachíñu Reino Ndióxi̱ nu̱úyó?

¹⁹ ¿Nda̱chun xíniñúʼu kaʼndachíñu Reino Ndióxi̱ nu̱úyó? Xa̱ʼa̱ u̱ni̱ ña̱ʼa. Ña̱ nu̱ú, xa̱ʼa̱ ña̱ kúúyó na̱ yiví ku̱a̱chi kíʼin kue̱ʼe̱ miíyó ta xíʼi̱yó. Soo tá ná kaʼndachíñu Reino Ndióxi̱ saá kúú ña̱ kutakuyó ndiʼi tiempo. Ta ña̱ Biblia káchiña: “Saáchi ni̱kuʼvi̱ní-ini Ndióxi̱ xi̱nira ndiʼi na̱ yiví ña̱kán ta̱xira se̱ʼera ta̱ mitúʼun ña̱ kuvira xa̱ʼa̱na, ta xa̱ʼa̱ ña̱yóʼo ndiʼi na̱ kándíxañaʼá va̱ása ndiʼi-xa̱ʼa̱na chi kutakuna ndiʼi tiempo” (Juan 3:16).

²⁰ Ña̱ u̱vi̱, saáchi ñuyǐví nu̱ú ndóoyó íyoní na̱ yiví na̱ kéʼé ña̱ va̱ása va̱ʼa. Ku̱a̱ʼánína káʼa̱nna tu̱ʼun vatá, sándaʼvina ta kéʼéna ña̱ kini, ta miíyó va̱ása kívi kasiyó nu̱úna ña̱ keʼéna ña̱yóʼo. Soo Jehová kiviva keʼéra ña̱yóʼo. Ta tá va̱ása xíínna nasamana ña̱ kéʼéna, sandíʼi-xa̱ʼa̱ Jehová na̱yóʼo ti̱xin guerra ña̱ Armagedón (kaʼvi Salmo 37:10). Ña̱ u̱ni̱, xíniñúʼu kaʼndachíñu Reino Ndióxi̱ nu̱úyó saáchi na̱ chíñu na̱ íyo nu̱ú ñuʼú yóʼo ndi̱va̱ʼaní-inina, kéʼéna ña̱ va̱ása va̱ʼa ta kǒo kúchiñuna sandíʼi-xa̱ʼa̱na ndiʼi tu̱ndóʼo ña̱ íyo nu̱ú na̱ yiví. Ta saátu kǒo kúni̱na chindeétáʼanna xíʼin na̱ yiví ña̱ kuniso̱ʼona ña̱ káʼa̱n Ndióxi̱. Xa̱ʼa̱ ña̱kán káʼa̱n ña̱ Biblia ña̱yóʼo: “Xa̱ʼa̱ ña̱ xáʼndachíñu na̱ yiví nu̱ú táʼan miína nina tu̱ndóʼova íyo” (Eclesiastés 8:9).

21. ¿Ndáa ki̱ʼva saxínu Reino Ndióxi̱ ña̱ kúni̱ra koo nu̱ú ñuʼú yóʼo?

 ²¹ Tá ná ndiʼi guerra ña̱ Armagedón, Reino Ndióxi̱ kuchiñuña saxínuña ndiʼi ña̱ kúni̱ra koo nu̱ú ñuʼú yóʼo. Ta, ta̱ Ndi̱va̱ʼa xíʼin na̱ ta̱chí ndi̱va̱ʼa ndasina (Apocalipsis 20:1-3). Tasaá, va̱ása kiʼinka kue̱ʼe̱ nda̱a̱ ni iin na̱ yiví ta ni va̱ása kuvikana. Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, ndiʼi na̱ yiví na̱ kándíxa Ndióxi̱ koona ndiʼi tiempo nu̱ú ñuʼú livi (Apocalipsis 22:1-3). Ta saátu, Reino Ndióxi̱ ndasayi̱i̱ña ki̱vi̱ Jehová. ¿Ndáaña kúni̱ kachi ña̱yóʼo? Ña̱ tá ná kaʼndachíñu Reino Ndióxi̱ nu̱ú ñuʼú yóʼo, ndiʼi na̱ yiví ixato̱ʼóna ki̱vi̱ Ndióxi̱. (Koto nota 21, “Ña̱ ni̱xi̱ʼi̱ ta̱ Jesús xa̱ʼa̱yó”).

22. ¿Nda̱chun va̱ʼa kúnda̱a̱-iniyó ña̱ va̱ása níkixáʼa ta̱ Jesús kaʼndachíñura tá ni̱xi̱yora nu̱ú ñuʼú yóʼo ni tá sa̱kán ndi̱kóra chí ndiví?

²² Tá ni̱xi̱yo ta̱ Jesús nu̱ú ñuʼú yóʼo, sa̱náʼa̱ra na̱ discípulora ña̱ ná ndukúna ña̱yóʼo nu̱ú Ndióxi̱: “Ná kixaa̱ ña̱ kaʼndachíñún”. Ña̱yóʼo kúni̱ kachiña ña̱ xi̱kuma̱níva kixaa̱ ña̱ Reino yóʼo. Chi siʼna xi̱niñúʼu taxi Ndióxi̱ chiñu yóʼo nda̱ʼa ta̱ Jesús ña̱ va̱ʼa koora Rey. ¿Á ndi̱ku̱n tá ndi̱kó ta̱ Jesús chí ndiví ndu̱ura Rey? Va̱ása. Ta̱ Jesús xi̱niñúʼu kundatura. Nu̱ú profecía ña̱ va̱xi nu̱ú Salmo 110:1,  Jehová ni̱ka̱ʼa̱nra ña̱yóʼo: “Koo chí ndaʼa̱ kúaʼíi̱ ta kundatún nda̱a̱ ná chindoi̱ na̱ sáa̱-ini xíni yóʼó ti̱xin xa̱ʼún”. Tá ni̱ya̱ʼa loʼo ña̱ nda̱taku ta̱ Jesús, ta̱ apóstol Pedro xíʼin ta̱ Pablo ni̱ka̱ʼa̱nna ña̱ ta̱ Jesús kúú ta̱ saxínu ña̱ profecía yóʼo (Hechos 2:32-35; Hebreos 10:12, 13). Ña̱yóʼo kúni̱ kachiña, ña̱ xíniñúʼu kundatu ta̱ Jesús nda̱a̱ ná ka̱ʼa̱n Jehová xíʼinra ña̱ koora Rey.

23. a) ¿Ama ki̱xáʼa ta̱ Jesús xáʼndachíñura ti̱xin Reino Ndióxi̱? b) ¿Ndáaña sakuaʼayó nu̱ú ña̱ inka capítulo?

²³ ¿Ama ki̱xáʼa ta̱ Jesús xáʼndachíñura? Tá ku̱i̱ya̱ 1914. Ku̱a̱ʼání ku̱i̱ya̱ chí sa̱tá, iin tiʼvi loʼo na̱ xi̱ndasakáʼnu Ndióxi̱ na̱kunda̱a̱-inina ña̱ ku̱i̱ya̱ 1914 xi̱nu ku̱a̱ʼání profecía ña̱ va̱xi nu̱ú Biblia. Ña̱ ki̱xáʼa kúu nu̱ú ñuʼú yóʼo nda̱a̱ tá ku̱i̱ya̱ 1914, náʼa̱ña ña̱ ndixa kúú ña̱ na̱kunda̱a̱-ini na̱ xi̱ndasakáʼnu Ndióxi̱ xa̱ʼa̱ ña̱ profecía yóʼo. Ta̱ Jesús ki̱xáʼara xáʼndachíñura ku̱i̱ya̱ saá (Salmo 110:2). Tá ni̱ya̱ʼa loʼo, ta̱xína ta̱ Ndi̱va̱ʼa va̱xira nu̱ú ñuʼú yóʼo ta vitin ndáa si̱lóʼo tiempo kíndo̱o nu̱úra ta ndiʼi-xa̱ʼa̱ra (Apocalipsis 12:12). Nu̱ú ña̱ inka capítulo kunda̱a̱-iniyó ndáa ña̱ʼa kúú ña̱ náʼa̱ nu̱úyó ña̱ xa̱a̱ ndóoyó ki̱vi̱ nu̱ú ndíʼi. Ta saátu kunda̱a̱-iniyó ña̱ si̱lóʼo kúma̱ní ta saxínu Reino Ndióxi̱ ña̱ kúni̱ra koo nu̱ú ñuʼú yóʼo. (Koto nota 22, “¿Nda̱chun ndáyáʼviní ña̱ ku̱i̱ya̱ 1914?”).