1-3. a) ¿Ndáaña ndáka̱tu̱ʼunyó miíyó tá xíʼi̱ iin na̱ yiví? b) ¿Ndáaña ndóʼoyó tá xíʼi̱yó káchi sava na̱ veʼe-ñu̱ʼu?

TU̱ʼUN Ndióxi̱ káʼa̱nña xíʼinyó ña̱ chí nu̱únínu “va̱ása kuvikayó” (Apocalipsis 21:4). Nu̱ú capítulo 5 sa̱kuaʼayó ña̱ tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó kivi ni̱ʼíyó ña̱ kutakuyó ndiʼi tiempo. Soo xíʼi̱kavayó tiempo vitin (Eclesiastés 9:5). Ña̱kán iin ña̱ ndáyáʼviní ña̱ ndáka̱tu̱ʼunyó miíyó kúú “¿Ndáaña ndóʼoyó tá xíʼi̱yó?”.

² Ña̱ kunda̱a̱-iniyó xa̱ʼa̱ ña̱yóʼo ndáyáʼviníña, tá xíʼi̱ iin na̱ táʼanyó á iin na̱ migoyó, sana kivi nda̱ka̱tu̱ʼunyó miíyó: “¿Ndáa míí ñúʼuna? ¿Á xítona miíyó? ¿Á xóʼvi̱na? ¿Á kivi chindeétáʼanna xíʼinyó? ¿Á kixaa̱ iin ki̱vi̱ ndikó tukuyó kuniyóna?”.

³ Na̱ veʼe-ñu̱ʼu xa̱a̱ síín síín káʼa̱nna xa̱ʼa̱ ña̱yóʼo. Savana káʼa̱nna na̱ yiví va̱ʼa chí ndiví ku̱a̱ʼa̱nna ta na̱ yiví na̱ va̱ása va̱ʼa chí ndayá á infierno ku̱a̱ʼa̱nna. Inkana káʼa̱nna, ña̱ tá xíʼi̱yó ndúuyó espíritu tasaá ndákutáʼanyó xíʼin na̱ táʼanyó na̱ xa̱a̱ ni̱xi̱ʼi̱. Ta inkana káʼa̱nna, ña̱ tá xa̱a̱ xíʼi̱yó tíinna ku̱a̱chi xíʼinyó á ndátakuyó ta ndúuyó inka ña̱ʼa. Káʼa̱nna ña̱ kivi nduuyó inka na̱ yiví á nda̱a̱ kivi nduuyó iin kití.

4. ¿Ndáaña sánáʼa̱ ndiʼi na̱ veʼe-ñu̱ʼu xa̱ʼa̱ ña̱ xíʼi̱yó?

⁴ Ni xa̱a̱ síín síín ña̱ʼa káʼa̱n na̱ veʼe-ñu̱ʼu xa̱ʼa̱ ña̱ xíʼi̱yó, soo ndiʼivana sánáʼa̱na ña̱ tá xíʼi̱yó iin táʼví miíyó va̱ása xíʼi̱ña. Soo, ¿á ña̱ ndixa kúú ña̱yóʼo?

5, 6. ¿Ndáaña ndóʼoyó tá xíʼi̱yó?

⁵ Jehová kúnda̱a̱-inira ndáa ña̱ ndóʼoyó tá xíʼi̱yó. Nu̱ú  ña̱ Biblia sánáʼa̱ Jehová miíyó, ña̱ tá xíʼi̱yó va̱ása tákukayó. Tá xíʼi̱yó va̱ása xítokayó, va̱ása xíniso̱ʼokayó ta va̱ása ndákanikaxi̱níyó. Ndiʼi ña̱ ndákanixi̱níyó xíʼin ña̱ ndákaʼányó xa̱ʼa̱ kǒokaña íyo. Ta va̱ása xáʼa̱n níma̱yó inka lugar. *

⁶ Ta̱ rey Salomón ni̱ka̱ʼa̱nra “na̱ ni̱xi̱ʼi̱ kǒoka ña̱ xíni̱na xa̱ʼa̱”. Ña̱kán na̱ ni̱xi̱ʼi̱ va̱ása kúʼvi̱ka-inina xínina inkana ni va̱ása sáa̱na. Saátu ni̱ka̱ʼa̱n ta̱ Salomón ña̱ kǒo chiñu ni ña̱ ndíchi íyo ya̱vi̱ nu̱ú ku̱a̱ʼa̱nna (kaʼvi Eclesiastés 9:5, 6, 10). Salmo 146:4 káʼa̱nña tá xíʼi̱ iin na̱ yiví “ña̱ ndákanixi̱nína” ndíʼi-xa̱ʼa̱ña.

7. ¿Ndáaña chi̱táʼan ta̱ Jesús xíʼin ña̱ xíʼi̱yó?

⁷ Tá ni̱xi̱ʼi̱ ta̱ Lázaro, ta̱ Jesús ni̱ka̱ʼa̱nra xíʼin na̱ discípulora: “Migoyó ta̱ Lázaro ta̱ kísi̱ naá kúúra”. ¿Ndáaña xi̱kuni̱ kachira xíʼin ña̱yóʼo? Tándi̱ʼi saá ni̱ka̱ʼa̱nra ña̱yóʼo: “Ta̱ ni̱xi̱ʼi̱ kúú ta̱ Lázaro” (Juan 11:11-14). Ta̱ Jesús chi̱táʼanra ña̱ xíʼi̱yó xíʼin ña̱ kísi̱ naáyó. Ta̱ Jesús va̱ása níka̱ʼa̱nra ña̱ chí ndiví ndíka̱a̱ ta̱ Lázaro á ndíka̱a̱ra xíʼin na̱ táʼanra na̱ xa̱a̱ ni̱xi̱ʼi̱. Ta ni va̱ása níka̱ʼa̱nra ña̱ ndíka̱a̱ ta̱ Lázaro chí ndayá á infierno, ni ña̱ nda̱takura ti̱xin inka na̱ yiví á ti̱xin kití. Ña̱ ni̱ka̱ʼa̱nra kúú ña̱ nda̱a̱ táki̱ʼva íyo ta̱ kísi̱ naá saá íyo ta̱ Lázaro. Inka texto ña̱ va̱xi nu̱ú Biblia chítáʼanña ña̱ xíʼi̱yó xíʼin ña̱ kísi̱yó. Ña̱ Biblia káʼa̱nña tá xa̱ʼnína ta̱ discípulo Esteban nda̱a̱ táki̱ʼva íyo ta̱ ni̱ki̱si̱ saá ni̱xi̱yora (Hechos 7:60). Ta̱ apóstol Pablo ka̱ʼyíra ña̱ sava na̱ cristiano “ni̱ki̱si̱na tá ni̱xi̱ʼi̱na” (1 Corintios 15:6).

8. ¿Nda̱chun va̱ʼa kúnda̱a̱-iniyó ña̱ va̱ása ní ixava̱ʼa Ndióxi̱ miíyó ña̱ kuviyó?

 ⁸ ¿Á i̱xava̱ʼa Ndióxi̱ na̱ yiví ña̱ kuvina? Va̱ása. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Jehová i̱xava̱ʼara ta̱ Adán xíʼin ñá Eva ña̱ kutakuna ndiʼi tiempo ta va̱ása kiʼinna kue̱ʼe̱. Ta saátu i̱xava̱ʼarana ña̱ kuni̱na koona ndiʼi tiempo (Eclesiastés 3:11). Nda̱a̱ ni iin na̱ íyo se̱ʼe va̱ása kútóona kotona ña̱ kiʼin kue̱ʼe̱ se̱ʼena ta kuvina. Ki̱ʼva saá íyo ña̱ ndóʼo yiváyó Jehová, va̱ása kútóora ña̱ kiʼin kue̱ʼe̱ miíyó ta kuviyó. Soo tá Ndióxi̱ i̱xava̱ʼara miíyó ña̱ kutakuyó ndiʼi tiempo, ¿nda̱chun xíʼi̱yó?

9. ¿Nda̱chun iin ña̱ va̱ʼa kúú ña̱ ni̱ka̱ʼa̱n Ndióxi̱ xíʼin ta̱ Adán ta saátu xíʼin ñá Eva?

⁹ Ndiʼi ña̱yóʼo ki̱xáʼaña nu̱ú jardín ña̱ Edén. Jehová ni̱ka̱ʼa̱nra xíʼin ta̱ Adán: “Kivi kaxíún ña̱ íyo ndaʼa̱ ndiʼi yitu̱n tú íyo jardín yóʼo nda̱a̱ ná kutú ti̱xiún. Soo va̱ása xíniñúʼu kaxíún ña̱ íyo ndaʼa̱ yitu̱n tú kúúmií ña̱ kunda̱a̱-iniún xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa, saáchi mií ki̱vi̱ ña̱ ná kaxíún ña̱ íyo ndaʼa̱ túyóʼo kuvivaún” (Génesis 2:9, 16, 17). Ta su̱ví ña̱ yo̱ʼvi̱ kúú ña̱ ni̱ka̱ʼa̱nra xíʼinna. Ta saátu, Jehová kúú ta̱ i̱xava̱ʼa-ñaʼá ta kúúmiíra yichi̱ ña̱ ka̱ʼa̱nra xíʼinna ndáa ña̱ kúú ña̱ va̱ʼa xíʼin ña̱ va̱ása va̱ʼa. Tá níxiniso̱ʼo ta̱ Adán xíʼin ñá Eva ña̱ ni̱ka̱ʼa̱n Jehová, na̱ʼa̱na ña̱ íxato̱ʼónara ta táxina tíxa̱ʼvi xa̱ʼa̱ ndiʼi ña̱ʼa ña̱ ta̱xira ndaʼa̱na.

10, 11. a) ¿Ndáa ki̱ʼva sa̱ndáʼvi ta̱ Ndi̱va̱ʼa ta̱ Adán xíʼin ñá Eva ña̱ va̱ása kuniso̱ʼona ña̱ ni̱ka̱ʼa̱n Ndióxi̱? b) ¿Nda̱chun va̱ása kivi ka̱ʼa̱nyó ña̱ kǒo níkeʼé ta̱ Adán xíʼin ñá Eva ña̱yóʼo?

¹⁰ Soo ta̱ Adán xíʼin ñá Eva va̱ása níxiinna kuniso̱ʼona. Ta̱ Ndi̱va̱ʼa ni̱ka̱ʼa̱nra xíʼin ñá Eva: “¿Á ña̱ nda̱a̱ kúú ña̱ ni̱ka̱ʼa̱n Ndióxi̱ xíʼinndó ña̱ va̱ása kivi kaxíndó ku̱i̱ʼi ña̱ íyo ndaʼa̱ ndiʼi yitu̱n tú íyo nu̱ú jardín yóʼo?”. Ta ñá Eva nda̱kuiinñá: “Kiviva kaxíndi̱ ku̱i̱ʼi ña̱ íyo ndaʼa̱ yitu̱n tú íyo nu̱ú jardín yóʼo. Soo, ku̱i̱ʼi ña̱ íyo ndaʼa̱ yitu̱n tú níndichi ma̱ʼñú jardín, Ndióxi̱ ni̱ka̱ʼa̱nra xíʼinndi̱: ‘Va̱ása xíniñúʼu kaxíndó ku̱i̱ʼi ña̱ íyo ndaʼa̱ túyóʼo; ta ni va̱ása xíniñúʼu tiinndó ku̱i̱ʼi yóʼo. Chi tá ná keʼéndó ña̱yóʼo, kuvindóʼ” (Génesis 3:1-3).

¹¹ Tasaá ta̱ Ndi̱va̱ʼa ni̱ka̱ʼa̱nra xíʼin ñá Eva: “Va̱ása kuvindó. Saáchi, Ndióxi̱ xíni̱ra ña̱ mií ki̱vi̱ ña̱ ná kaxíndó ku̱i̱ʼi ña̱ íyo ndaʼa̱nú ndakuna̱ nu̱úndó ta xa̱a̱ndó koondó nda̱a̱ táki̱ʼva íyo mií Ndióxi̱: kunda̱a̱-inindó xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa” (Génesis 3:4-6). Ta̱ Ndi̱va̱ʼa xi̱kuni̱ra ña̱ ná kandíxa ñá Eva ña̱ kivi keʼéñá ña̱ kúni̱ miíñá kúúña  ña̱ va̱ʼa á ña̱ va̱ása va̱ʼa. Soo saátu sa̱ndáʼvi ta̱ Ndi̱va̱ʼa ñá Eva, chi va̱ása níka̱ʼa̱nra xíʼinñá xa̱ʼa̱ ña̱ kundoʼoñá tá ná ixaso̱ʼoñá. Ni̱ka̱ʼa̱nra xíʼinñá ña̱ va̱ása kuviñá, ña̱kán xa̱xíñá ña̱ ku̱i̱ʼi yóʼo. Tándi̱ʼi, ñáyóʼo ta̱xiñá ña̱ ku̱i̱ʼi yóʼo xa̱xí yiíñá. Ta̱ Adán xíʼin ñá Eva xi̱xini̱na ña̱ ni̱ka̱ʼa̱n Jehová xíʼinna ña̱ va̱ása kaxína ña̱ ku̱i̱ʼi yóʼo. Ta káxiní ni̱ka̱ʼa̱nra xíʼinna, soo na̱yóʼo nda̱kaxinna ña̱ ixaso̱ʼona ña̱ ni̱ka̱ʼa̱nra. Xíʼin ña̱ ke̱ʼé ta̱ Adán ta saátu ñá Eva, ni̱na̱ʼa̱na ña̱ va̱ása ní ixato̱ʼóna yivána ta̱ íyo chí ndiví. Soo va̱ása kivi ka̱ʼa̱nna ña̱ kǒo ku̱a̱chi kúúmiína.

12. ¿Nda̱chun nda̱kavaní-ini Jehová xíʼin ña̱ ke̱ʼé ta̱ Adán xíʼin ñá Eva?

¹² Nda̱kavaní-ini Jehová xíʼin ña̱ ke̱ʼé ta̱ Adán ta saátu ñá Eva. Ta̱yóʼo kúú yivána, soo na̱yóʼo ni̱na̱ʼa̱na ña̱ va̱ása ní ixato̱ʼónara. Na̱ ka̱ʼa̱nyó xa̱ʼa̱ iin ejemplo, ndakanixi̱ní ña̱ chíka̱a̱níún ndee̱ ña̱ vií sakuaʼnún se̱ʼún. Soo na̱yóʼo ndáka̱xinna ña̱ va̱ása kuniso̱ʼona yóʼó ta kéʼéna ña̱ kúni̱ miína. ¿Á su̱ví ña̱ nda̱a̱ kúú ña̱ kusuchíní-iniún?

13. ¿Ndáaña xi̱kuni̱ kachi Jehová tá ni̱ka̱ʼa̱nra xíʼin ta̱ Adán ña̱ ndikó tukura nduura ñuʼú?

¹³ Tá i̱xaso̱ʼo ta̱ Adán xíʼin ñá Eva, va̱ása níkivika koona ndiʼi tiempo. Jehová ni̱ka̱ʼa̱nra xíʼin ta̱ Adán: “Saáchi ñuʼú kúún ta ñuʼú ndikó tukún nduún” (kaʼvi Génesis 3:19). Ta̱ Adán na̱kuva̱ʼara xíʼin ñuʼú, ña̱kán ni̱ka̱ʼa̱n Jehová ña̱ ndikó tukura nduura ñuʼú, ta  koora nda̱a̱ táki̱ʼva íyo iin na̱ va̱ása níxi̱taku (Génesis 2:7). Ña̱kán, tá ni̱xi̱ʼi̱ra ndi̱ʼi-xa̱ʼa̱ va̱ʼara.

14. ¿Nda̱chun xíʼi̱yó?

¹⁴ Tá níxiniso̱ʼo ta̱ Adán xíʼin ñá Eva ña̱ ni̱ka̱ʼa̱n Ndióxi̱, tákukavana vitin. Soo tá i̱xaso̱ʼona, ni̱ki̱ʼvina ku̱a̱chi ta tá ni̱ya̱ʼa tiempo ni̱xi̱ʼi̱na. Ña̱ ku̱a̱chi yóʼo nda̱a̱ táki̱ʼva íyo iin kue̱ʼe̱ ña̱ sa̱ndáya̱ʼana ndaʼa̱yó saá íyoña. Ña̱kán xíʼi̱yó, saáchi nda̱a̱ tá kákuvíyó kúúyó na̱ yiví ku̱a̱chi (Romanos 5:12). Soo Jehová va̱ása níkuni̱ra ña̱ ná kuvi na̱ yiví. Xa̱ʼa̱ ña̱yóʼo ña̱ Biblia káʼa̱nña, ña̱ xíʼi̱yó nda̱a̱ táki̱ʼva íyo ña̱ sáa̱-ini xíni miíyó saá íyoña (1 Corintios 15:26).

15. ¿Ndáaña vatá sáña̱yó nu̱ú tá kúnda̱a̱-iniyó ña̱ nda̱a̱ xa̱ʼa̱ na̱ ni̱xi̱ʼi̱?

¹⁵ Ku̱a̱ʼání na̱ veʼe-ñu̱ʼu vatá sánáʼa̱na ña̱ tákukava na̱ ni̱xi̱ʼi̱ inka lugar, ta kivi chindeétáʼanyó xíʼinna. Tá xíʼi̱ iin na̱ yiví, na̱ veʼena táxina xu̱ʼún ndaʼa̱ na̱ su̱tu̱ ña̱ ná keʼéna oración xa̱ʼa̱ na̱ ni̱xi̱ʼi̱ á keʼéna iin misana. Soo ña̱ Biblia sánáʼa̱ña ña̱ va̱ása xóʼvi̱ka na̱ ni̱xi̱ʼi̱ ta ni va̱ása kúsuchí-inina. Ta miíyó va̱ása kivi ka̱ʼa̱nyó xíʼinna ta ni va̱ása kivi chindeétáʼanyó xíʼinna. Saátu na̱kán va̱ása kivi ka̱ʼa̱nna xíʼinyó, ni va̱ása kivi chindeétáʼanna xíʼinyó, ta ni kǒo kivi keʼéna ña̱ va̱ása va̱ʼa xíʼinyó. Ña̱kán va̱ása xíniñúʼu yi̱ʼvíyó na̱yóʼo. Ña̱ kúnda̱a̱-iniyó ña̱ nda̱a̱ xa̱ʼa̱ na̱ ni̱xi̱ʼi̱ sáñáña miíyó nu̱ú ña̱ vatá yóʼo.

16. ¿Ndáaña vatá kúú ña̱ sánáʼa̱ ku̱a̱ʼání na̱ veʼe-ñu̱ʼu xa̱ʼa̱ na̱ ni̱xi̱ʼi̱?

¹⁶ Ta̱ Ndi̱va̱ʼa xíniñúʼura na̱ veʼe-ñu̱ʼu vatá ña̱ sandáʼvira miíyó ta kandíxayó ña̱ tákuka na̱ ni̱xi̱ʼi̱. Tá kúú, sava na̱ veʼe-ñu̱ʼu sánáʼa̱na ña̱ tá xíʼi̱yó tákuka iin táʼvíyó inka lugar. ¿Á sánáʼa̱ religión ña̱ ndíku̱ún ña̱yóʼo, á ña̱ káʼa̱n Biblia kúú ña̱ sánáʼa̱ña? Ta̱ Ndi̱va̱ʼa xíniñúʼura ña̱ vatá yóʼo ña̱ sakúxíkara na̱ yiví nu̱ú Ndióxi̱, ta saátu xíniñúʼura ku̱a̱ʼáka ña̱ʼa ña̱ keʼéra ña̱yóʼo.

17. ¿Nda̱chun káʼa̱n na̱ veʼe-ñu̱ʼu ña̱ va̱ása va̱ʼa xa̱ʼa̱ Jehová, tá sánáʼa̱na xa̱ʼa̱ na̱ ni̱xi̱ʼi̱?

 ¹⁷ Ku̱a̱ʼání na̱ veʼe-ñu̱ʼu káʼa̱nna ña̱ va̱ása va̱ʼa xa̱ʼa̱ Jehová tá sánáʼa̱na xa̱ʼa̱ na̱ ni̱xi̱ʼi̱. Tá kúú sava na̱ veʼe-ñu̱ʼu sánáʼa̱na, ña̱ na̱ kéʼé ña̱ va̱ása va̱ʼa kokona ti̱xin ndayá á infierno. Soo ña̱yóʼo su̱ví ña̱ nda̱a̱ kúúña. Jehová nda̱a̱ ni iin yichi̱ va̱ása sáxo̱ʼvi̱ra na̱ yiví (kaʼvi 1 Juan 4:8). ¿Ndáaña ndakanixi̱níún xa̱ʼa̱ iin yivá ta̱ xáʼmi ndaʼa̱ se̱ʼe? Sana ndakanixi̱níún ña̱ ndi̱va̱ʼaní-inira, ta va̱ása kuni̱ún koún migora. Ta̱ Ndi̱va̱ʼa kúni̱ra ná ndakanixi̱níyó saá xa̱ʼa̱ Jehová.

18. ¿Nda̱chun va̱ása xíniñúʼu yi̱ʼvíyó kuniyó na̱ ni̱xi̱ʼi̱?

¹⁸ Sava na̱ veʼe-ñu̱ʼu vatá káʼa̱nna ña̱ tá xíʼi̱yó ndúuyó espíritu. Ta saátu káʼa̱nna ña̱ xíniñúʼu ixato̱ʼóyó na̱ espíritu yóʼo ta yi̱ʼvíyó kuniyóna, saáchi kivi koona migoyó na̱ ndakúní á kivitu koona na̱ sáa̱-ini xíni miíyó. Xa̱ʼa̱ ña̱ ku̱a̱ʼání na̱ yiví kándíxa ña̱ vatá yóʼo, yíʼvina xínina na̱ ni̱xi̱ʼi̱. Xa̱ʼa̱ ña̱yóʼo, ku̱a̱ʼání na̱ yiví ndásakáʼnuna na̱ ni̱xi̱ʼi̱ nu̱úka ña̱ ndasakáʼnuna Jehová. Soo ndakaʼún ña̱ va̱ása kívika keʼé na̱ ni̱xi̱ʼi̱ nda̱a̱ ni iin ña̱ʼa. Xa̱ʼa̱ ña̱yóʼo, va̱ása xíniñúʼu yi̱ʼvíyó kuniyóna. Jehová kúú ta̱ i̱xava̱ʼa miíyó ta kúúra Ndióxi̱ ta̱ nda̱a̱, ta iinlá miíra xíniñúʼu ndasakáʼnuyó (Apocalipsis 4:11).

19. Ña̱ kúnda̱a̱-iniyó ña̱ nda̱a̱ xa̱ʼa̱ na̱ ni̱xi̱ʼi̱, ¿ndáa ki̱ʼva chíndeétáʼanña xíʼinyó?

¹⁹ Ña̱ kúnda̱a̱-iniyó ña̱ nda̱a̱ xa̱ʼa̱ na̱ ni̱xi̱ʼi̱ sáñáña miíyó nu̱ú ña̱ vatá ña̱ sánáʼa̱ na̱ veʼe-ñu̱ʼu. Saátu chíndeétáʼanña xíʼinyó ña̱ kunda̱a̱ va̱ʼaka iniyó xa̱ʼa̱ ña̱ káʼa̱n Jehová keʼéra chí nu̱únínu.

20. ¿Ndáa pregunta kúú ña̱ ndakuiinyó nu̱ú ña̱ inka capítulo?

²⁰ Xa̱a̱ íyo ku̱a̱ʼání tiempo, iin ta̱ xi̱ndasakáʼnu Ndióxi̱ ta̱ xi̱naní Job ni̱nda̱ka̱tu̱ʼunra: “Tá ná kuvi iin ta̱a, ¿á kivi ndatakura?” (Job 14:14). Nu̱ú ña̱ inka capítulo kunda̱a̱-iniyó ña̱ káʼa̱n Biblia xa̱ʼa̱ ña̱yóʼo.