1, 2. ¿Nda̱chun káʼa̱nyó ña̱ iin regalo ña̱ va̱ʼaní kúú ña̱ Biblia?

¿NDÁAÑA ndóʼún tá táxi iin na̱ migoún iin regalo ndaʼún? Sana ndi̱ku̱n kúni̱ún kunáúnña. Ta kúsi̱íní-iniún xa̱ʼa̱ ña̱ nda̱kaʼán na̱ migoún xa̱ʼún, ta táxiníún tíxa̱ʼvi ndaʼa̱na.

² Iin regalo ña̱ ta̱xi Jehová ndaʼa̱yó kúú ña̱ Biblia. Ku̱a̱ʼání ña̱ʼa va̱xi nu̱úña, ta kǒo inkaka nu̱ú kivi ndani̱ʼíyó táʼan ña̱yóʼo. Saátu káʼa̱nña xíʼinyó ña̱ mií Ndióxi̱ kúú ta̱ i̱xava̱ʼa ndiví xíʼin ñuʼú yóʼo, ta saátu i̱xava̱ʼara ta̱a ta̱ nu̱ú xíʼin ñaʼá ñá nu̱ú. Nu̱ú Biblia va̱xi consejo ña̱ kivi chindeétáʼan xíʼinyó tá íyo tu̱ndóʼo nu̱úyó. Ta káʼa̱ntuña xíʼinyó ña̱ kúni̱ Ndióxi̱ ndasaviíra ñuʼú yóʼo, ta saátu káʼa̱nña xíʼinyó ndáa ki̱ʼva keʼéraña.

3. ¿Ndáaña sakuaʼún tá ná kaʼviún Biblia?

³ Tá ná kaʼviún Biblia, kunda̱a̱-iniún ña̱ kúni̱ Ndióxi̱ ná koún migora. Tá ná kunda̱a̱ va̱ʼaka iniún xa̱ʼa̱ra, xa̱ún kuyatinkaún nu̱úra.

4. ¿Ndáaña káʼa̱nna xa̱ʼa̱ Biblia ndákanda̱-iniún xíʼin?

⁴ Ña̱ Biblia xa̱a̱ yáʼaka 3,000 nu̱ú tu̱ʼun kánaña, ta ku̱a̱ʼání ña̱yóʼo távána. Ku̱a̱ʼánítu na̱ yiví na̱ ndóo iníísaá ñuyǐví kivi kaʼvina Biblia tu̱ʼun miína. Semana tá semana yáʼaka iin millón Biblia xáxana ndaʼa̱ na̱ yiví. Xíʼin ña̱yóʼo kúnda̱a̱-iniyó ña̱ kǒo inka libro ña̱ kítáʼan xíʼin Biblia.

5. ¿Nda̱chun káʼa̱nyó ña̱ xíʼin ta̱chí yi̱i̱ Ndióxi̱ ni̱ka̱ʼyi̱ ña̱ Biblia?

⁵ Ña̱ Biblia “xíʼin ta̱chí yi̱i̱ Ndióxi̱ ni̱ka̱ʼyi̱ña” (kaʼvi 2 Timoteo 3:16). Savana káchina: “¿Nda̱chun káʼa̱nna ña̱  tu̱ʼun Ndióxi̱ kúú ña̱ Biblia, ta na̱ ta̱a kúú na̱ ka̱ʼyíña?”. Ña̱ Biblia káchiña, Ndióxi̱ ta̱xira espíritu santora ndaʼa̱ na̱ ta̱a ña̱ va̱ʼa ka̱ʼyína ña̱ ni̱ka̱ʼa̱nra (2 Pedro 1:21). Ta miíra kúú ta̱ xi̱niʼi yichi̱ nu̱úna. Ná ka̱ʼa̱nyó xa̱ʼa̱ iin ejemplo ña̱ va̱ʼa kunda̱a̱ka-iniyó xíʼinña, iin táta ta̱ xa̱a̱ chée káʼa̱nra xíʼin iin ta̱ loʼo se̱ʼeñánira ña̱ ná kaʼyíra iin carta. Tá ná sandíʼi ta̱ loʼo yóʼo kaʼyíra ña̱ carta yóʼo, ¿ndáana ni̱ka̱ʼa̱n tu̱ʼun ña̱ va̱xi nu̱úña, ta̱ táta á ta̱ loʼova? Tu̱ʼun ta̱ táta kúúña. Saátu íyo ña̱ Biblia saáchi tu̱ʼun Ndióxi̱ kúúña, ta su̱ví tu̱ʼun na̱ ta̱a na̱ ka̱ʼyíña va̱xi nu̱úña. Mií Ndióxi̱ kúú ta̱ xi̱niʼi yichi̱ nu̱úna ña̱ va̱ʼa ka̱ʼyína ña̱ kúni̱ra. Ña̱kán kivi ka̱ʼa̱nyó ña̱ ndixa “tu̱ʼun Ndióxi̱” kúú ña̱ Biblia (1 Tesalonicenses 2:13). (Koto nota 2, “Xíʼin ta̱chí yi̱i̱ Ndióxi̱ ni̱ka̱ʼyi̱ ña̱ Biblia”).

6, 7. ¿Nda̱chun va̱ása sáma ña̱ va̱xi nu̱ú Biblia?

⁶ Nani tá ki̱xáʼana káʼyína ña̱ Biblia iinsaá nda̱a̱ tá sa̱ndíʼina ka̱ʼyínaña ni̱ya̱ʼa 1,600 ku̱i̱ya̱. Ta ndiʼi na̱ ka̱ʼyí ña̱yóʼo xa̱a̱ síín síín tiempo ni̱xi̱yona. Savana ka̱ʼvi va̱ʼana ta savatuna va̱ása níkaʼvina. Tá kúú ta̱ Lucas doctor xi̱kuura. Inkana xi̱ndaana kití, xi̱tiinna ti̱a̱ká, xi̱ndaana ndikachi, xi̱kuuna profeta, xi̱tiinna ku̱a̱chi á xi̱xaʼndachíñuna. Ni xa̱a̱ síín síín na̱ ka̱ʼyíña, va̱ása sáma ña̱ káʼa̱nña. ¿Nda̱chun káʼa̱nyó ña̱yóʼo? Saáchi iin káʼa̱n ndiʼiña nda̱a̱ nu̱ú kíxáʼaña iinsaá nda̱a̱ nu̱ú ndíʼiña. *

⁷ Capítulo ña̱ va̱xi chí nu̱ú kíxáʼa libro ña̱ Génesis káʼa̱nña ndáa ki̱ʼva ki̱xáʼa tu̱ndóʼo ñuyǐví yóʼo. Ta ña̱ capítulo ña̱ va̱xi chí nu̱ú ndíʼi libro ña̱ Apocalipsis káʼa̱nña ndáa ki̱ʼva ndasavií Ndióxi̱ ndiʼi tu̱ndóʼo ña̱ íyo ñuyǐví yóʼo, ta ndasalivira ñuʼú yóʼo. Ndiʼi ña̱ va̱xi nu̱ú Biblia ku̱a̱ʼání ku̱i̱ya̱ káʼa̱nña xa̱ʼa̱, ta náʼa̱ña nu̱úyó ña̱ ndiʼi yichi̱ sáxi̱nu Ndióxi̱ ña̱ káʼa̱nra.

8. ¿Ndáa ejemplo ña̱ va̱xi nu̱ú Biblia kúú ña̱ náʼa̱ ña̱ káxiní káʼa̱n ña̱ Biblia xa̱ʼa̱ ña̱ ciencia?

⁸ Ña̱ Biblia va̱ása níka̱ʼyi̱ña ña̱ sanáʼa̱ña xa̱ʼa̱ ña̱ ciencia ta ni va̱ása kúúña iin libro ña̱ káʼvina ti̱xin escuela. Soo nina ña̱ nda̱a̱ káʼa̱nña xa̱ʼa̱ ña̱ ciencia. Tasaá kúni̱yó ná kooña chi tu̱ʼun Ndióxi̱ kúúña. Tá kúú, libro ña̱ Levítico káʼa̱nña xa̱ʼa̱ ña̱ ni̱ka̱ʼa̱n Ndióxi̱ xíʼin na̱ ñuu Israel, ndáa ña̱ xi̱xiniñúʼu keʼéna ña̱ va̱ʼa ná kǒo kiʼin kue̱ʼe̱ xíkun inkana. Ta ña̱yóʼo ni̱ka̱ʼyi̱ña tá kúma̱níka kunda̱a̱-ini na̱ yiví ndáa ki̱ʼva tává bacteria xíʼin virus kue̱ʼe̱. Saátu káxiní káʼa̱n ña̱  Biblia xa̱ʼa̱ ñuʼú yóʼo, ña̱ kǒo nda̱a̱ ni iin ña̱ʼa tíinña (Job 26:7). Ni̱xi̱yo iin tiempo ña̱ ku̱a̱ʼání na̱ yiví xi̱ka̱ʼa̱nna ña̱ ñuʼú yóʼo iin yosó kúúña, soo ña̱ Biblia káʼa̱nña ñuʼú yóʼo tá káa pelota saá káaña (Isaías 40:22).

9. ¿Ndáaña náʼa̱ nu̱úyó ña̱ nina ña̱ nda̱a̱ ni̱ka̱ʼa̱n na̱ ka̱ʼyí Biblia?

⁹ Tá káʼa̱n ña̱ Biblia xa̱ʼa̱ ña̱ historia, nina ña̱ nda̱a̱ káʼa̱nña. Soo ku̱a̱ʼání libro ña̱ historia va̱ása káʼa̱nña ña̱ nda̱a̱, saáchi na̱ ka̱ʼyíña va̱ása níkaʼyína ndiʼi ña̱ nda̱a̱. Tá kúú, savana va̱ása níkaʼyína xa̱ʼa̱ ña̱ ndo̱ʼo na̱ ñuuna tá va̱ása níkuchiñuna kanitáʼanna xíʼin na̱ inka ñuu. Soo na̱ ka̱ʼyí ña̱ Biblia, va̱ása níchise̱ʼé yuʼúna xa̱ʼa̱ ndiʼi ña̱ ndo̱ʼo na̱ ñuuna, tá kúú tá kǒo níkuchiñu na̱ ñuu Israel kanitáʼanna xíʼin na̱ inka ñuu. Ta saátu ka̱ʼyína xa̱ʼa̱ ku̱a̱chi ña̱ ni̱ki̱ʼvi miína. Tá kúú ña̱ Salmo 51 káʼa̱nña ña̱ nda̱kuni ta̱ David ña̱ ni̱ki̱ʼvira iin ku̱a̱chi ndeé. Xa̱ʼa̱ ña̱ nina ña̱ nda̱a̱ ni̱ka̱ʼa̱n na̱ ka̱ʼyí ña̱ Biblia, náʼa̱ña nu̱úyó ña̱ ndixa tu̱ʼun Ndióxi̱ kúúña ta kiviva kandíxayó ña̱ káʼa̱nña.

10. ¿Nda̱chun va̱ʼaní chíndeé consejo ña̱ va̱xi nu̱ú Biblia miíyó nda̱a̱ tiempo vitin?

¹⁰ Ña̱ Biblia “xíʼin ta̱chí yi̱i̱ Ndióxi̱ ni̱ka̱ʼyi̱ña, ta va̱ʼaní sánáʼa̱ña, ta chíka̱a̱ña miíyó yichi̱ nda̱kú” (2 Timoteo 3:16). Consejo ña̱ va̱xi nu̱ú Biblia nda̱a̱ tiempo vitin va̱ʼaní chíndeétáʼanña xíʼinyó, saáchi consejo Jehová kúúña. Xa̱ʼa̱ ña̱ miíra kúú ta̱ i̱xava̱ʼa miíyó va̱ʼaní kúnda̱a̱-inira xíʼin ña̱ ndákanixi̱níyó, xíʼin ña̱ ndóʼoyó, ta saátu va̱ʼaníka xíni̱ra miíyó ta kúni̱ra ña̱ si̱í ná kooyó. Ta xíni̱ra ndáa ña̱ kivi chindeé miíyó tá ndáa ña̱ va̱ása kivi chindeé miíyó.

11, 12. a) ¿Ndáa consejo ña̱ ta̱xi ta̱ Jesús kúú ña̱ ndáni̱ʼíyó nu̱ú Mateo 5 nda̱a̱ 7? b) ¿Ndáa inkaka consejo ndáni̱ʼíyó nu̱ú Biblia?

¹¹ Nu̱ú Mateo 5 nda̱a̱ 7 va̱ʼaní consejo va̱xi. Nu̱ú ña̱yóʼo káʼa̱n ta̱ Jesús xíʼinyó ndáa ña̱ kivi keʼéyó ña̱ va̱ʼa si̱í kooyó,  ndáa ki̱ʼva kivi kutáʼan viíyó xíʼin inkana, ndáa ki̱ʼva ka̱ʼa̱nyó xíʼin Ndióxi̱, ta ndáa ki̱ʼva ndakanixi̱níyó xa̱ʼa̱ xu̱ʼún. Ni xa̱a̱ íyo 2,000 ku̱i̱ya̱ ña̱ ta̱xi ta̱ Jesús consejo yóʼo, nda̱a̱ tiempo vitin va̱ʼaní chíndeétáʼanña xíʼinyó.

¹² Nu̱ú Biblia ndáni̱ʼíyó texto ña̱ chíndeétáʼan xíʼinyó ña̱ vií kooyó xíʼin na̱ veʼeyó, ña̱ va̱ʼaka kachíñuyó ta vií kutáʼanyó xíʼin inkana. Ndiʼi yichi̱ kivi chindeé consejo ña̱ va̱xi nu̱ú Biblia miíyó, ni nda̱a̱ ndáaka na̱ yiví kúúyó, ni nda̱a̱ ndáaka nu̱ú ndóoyó á ni nda̱a̱ ndáaka tu̱ndóʼo íyo nu̱úyó (kaʼvi Isaías 48:17). (Koto nota 3, “Tu̱ʼun ña̱ táxi yichi̱ nu̱úyó”).

13. ¿Ndáaña ni̱ka̱ʼa̱n ta̱ Isaías xa̱ʼa̱ ña̱ ñuu Babilonia?

¹³ Ku̱a̱ʼání profecía ña̱ va̱xi nu̱ú Biblia xa̱a̱ ni̱xi̱nuña. Tá kúú, ta̱ profeta Isaías ni̱ka̱ʼa̱nra ña̱ ndiʼi-xa̱ʼa̱ ña̱ ñuu Babilonia ta saátu ni̱ka̱ʼa̱n káxira ndáa ki̱ʼva kuu ña̱yóʼo (Isaías 13:19). Ña̱ ñuu Babilonia xi̱ndasiña xíʼin iin yéʼé káʼnuní ta iníí sa̱táña xi̱ndika̱a̱ yu̱ta. Ta̱ Isaías ni̱ka̱ʼa̱nra ña̱ yi̱chi̱ tá yu̱ta yóʼo ta kununá yéʼé ña̱ ñuu yóʼo. Ta saátu ni̱ka̱ʼa̱nra ña̱ na̱ ku̱ʼu̱n sandíʼi-xa̱ʼa̱ ña̱ ñuu kán va̱ása kanitáʼanna. Nda̱a̱ ni̱ka̱ʼa̱n ta̱ Isaías ña̱ ta̱ ku̱ʼu̱n sandíʼi-xa̱ʼa̱ ña̱ ñuu kán kunaníra Ciro (kaʼvi Isaías 44:27-45:2). (Koto nota 4, “Profecía”).

14, 15. ¿Ndáa ki̱ʼva ni̱xi̱nu ña̱ ni̱ka̱ʼa̱n ta̱ Isaías?

¹⁴ Tá xa̱a̱ ni̱ya̱ʼa 200 ku̱i̱ya̱ ña̱ ka̱ʼyí ta̱ Isaías ña̱ profecía yóʼo, saá ki̱xaa̱ ku̱a̱ʼání na̱ soldado ña̱ sandíʼi-xa̱ʼa̱na ña̱ ñuu Babilonia. ¿Ndáana xi̱niʼi yichi̱ nu̱úna? Ta̱ rey ña̱ ñuu Persia. ¿Nda̱saa xi̱naníra? Ciro xi̱naníra nda̱a̱ táki̱ʼva ni̱ka̱ʼa̱n ña̱ profecía. Ndiʼi ña̱yóʼo ku̱uña ña̱ va̱ʼa xi̱nu ña̱ ni̱ka̱ʼa̱n ña̱ profecía.

¹⁵ Mií ñuú saá, na̱ ñuu Babilonia vikóva kéʼéna. Ni loʼo  kǒo ña̱ níxindi̱ʼi̱-inina xa̱ʼa̱, chi xi̱ndaa-inina nama̱ ña̱ xi̱ndika̱a̱ sa̱tá ñuuna xíʼin yu̱ta tá xi̱yaʼa sa̱táña. Chí sa̱tá ñuu, ta̱ Ciro xíʼin na̱ soldado na̱ ku̱a̱ʼa̱n xíʼinra, i̱xava̱ʼana iin chi̱chi ña̱ va̱ʼa tavána ti̱kui̱í yu̱ta tasaá va̱ʼa ya̱ʼana. Tá xa̱a̱ nu̱u tá ti̱kui̱í yóʼo, na̱ soldado ña̱ ñuu Persia va̱ʼa ni̱ya̱ʼana. Soo, ¿ndáaña keʼéna ña̱ va̱ʼa ya̱ʼana sa̱tá ña̱ nama̱ yóʼo? Nda̱a̱ táki̱ʼva ni̱ka̱ʼa̱n ña̱ profecía, yéʼé ña̱ ñuu kán  xi̱nunávaña. Xa̱ʼa̱ ña̱kán, na̱ soldado va̱ása níkanitáʼanna xíʼinna ña̱ va̱ʼa ni̱ki̱ʼvina.

16. a) ¿Ndáaña ni̱ka̱ʼa̱n ta̱ Isaías xa̱ʼa̱ ña̱ ñuu Babilonia? b) ¿Nda̱chun va̱ʼa kúnda̱a̱-iniyó ña̱ ni̱xi̱nu ña̱ ni̱ka̱ʼa̱n ta̱ Isaías?

¹⁶ Ta̱ Isaías ni̱ka̱ʼa̱nra, tá ná ya̱ʼa tiempo nda̱a̱ ni iinna kǒo kundooka ña̱ ñuu Babilonia. Ta̱yóʼo ka̱ʼyíra: “Nda̱a̱ ni iin ki̱vi̱ kǒo na̱ yiví kundoo nu̱úña” (Isaías 13:20). ¿Á ni̱xi̱nu ña̱ ni̱ka̱ʼa̱nra? Ni̱xi̱nuvaña. Ña̱ ñuu Babilonia xi̱ndika̱a̱ña ki̱ʼva 80 kilómetro chí sur ña̱ ñuu Bagdad (Irak) ña̱ íyo tiempo vitin. Soo tiempo vitin nda̱a̱ ni iinna kǒo íyo kán. Nda̱a̱ táki̱ʼva káchi Biblia, Jehová sa̱ndíʼi-xa̱ʼa̱ra “ndiʼi ña̱ʼa ña̱ íyo nu̱úña” (Isaías 14:22, 23). *

17. ¿Nda̱chun kivi kandíxayó ndiʼi ña̱ káʼa̱n Ndióxi̱ xíʼinyó?

¹⁷ Ku̱a̱ʼání profecía ña̱ va̱xi nu̱ú Biblia xa̱a̱ ni̱xi̱nuña. Ña̱kán kivi kandíxayó ña̱ káʼa̱n Biblia xa̱ʼa̱ ña̱ koo chí nu̱únínu. Ná kandíxaníyó ña̱ xi̱nuva ña̱ ni̱ka̱ʼa̱n Jehová ña̱ ndasalivira nu̱ú ñuʼú yóʼo (kaʼvi Números 23:19). Ndióxi̱  káʼa̱nra xíʼinyó ña̱ kutakuyó ndiʼi tiempo, ta “kǒo kívi sándaʼvira” miíyó (Tito 1:2). *

18. ¿Ndáaña ni̱ka̱ʼa̱n ta̱ apóstol Pablo xa̱ʼa̱ “tu̱ʼun Ndióxi̱”?

¹⁸ Xa̱a̱ na̱kunda̱a̱-iniyó ña̱ kǒo inka libro ña̱ kítáʼan xíʼin Biblia. Va̱ʼaní kítáʼan ndiʼi ña̱ va̱xi nu̱úña ta ni loʼo va̱ása sámaña, ta nina ña̱ nda̱a̱ káʼa̱nña tá káʼa̱nña xa̱ʼa̱ ña̱ ciencia xíʼin ña̱ historia. Ta va̱ʼaní consejo táxiña ndaʼa̱yó, ta ku̱a̱ʼání profecía ña̱ va̱xi nu̱úña xa̱a̱ ni̱xi̱nuña. Soo su̱ví ña̱yóʼo kúú ndiʼiña. Ta̱ apóstol Pablo ni̱ka̱ʼa̱nra: “Tu̱ʼun Ndióxi̱ ña̱ táku kúúña, ta kúúmiíña ndee̱”. ¿Ndáaña kúni̱ kachi ña̱yóʼo? (Kaʼvi Hebreos 4:12).

19, 20. a) ¿Nda̱saa kivi chindeétáʼan Biblia xíʼún ña̱ kunda̱a̱-iniún ndáa ki̱ʼva íyoún? b) ¿Ndáa ki̱ʼva na̱ʼún ña̱ táxiún tíxa̱ʼvi ndaʼa̱ Ndióxi̱ xa̱ʼa̱ ña̱ kúúmiíún Biblia?

¹⁹ Ña̱ Biblia kivi nasamaña yóʼó. Ta kivi chindeétáʼanña xíʼún ña̱ va̱ʼa kunda̱a̱-iniún ndáa ki̱ʼva íyoún. ¿Ndáa ki̱ʼva kivi chindeétáʼanña xíʼinyó? Kivi chindeétáʼanña xíʼinyó ña̱ kunda̱a̱-iniyó xíʼin ña̱ ndákanixi̱níyó ta saátu xíʼin ña̱ ndóʼoyó. Ná ka̱ʼa̱nyó xa̱ʼa̱ ña̱yóʼo, sana ndákanixi̱níyó ña̱ kúʼvi̱va-iniyó xíniyó Ndióxi̱. Soo tá ná kaʼviyó Biblia, kiʼinyó kuenta ña̱ xíniñúʼu na̱ʼa̱yó xíʼin ña̱ kéʼéyó ña̱ kúʼvi̱-iniyó xíniyóra, ta saátu xíniñúʼu kuniso̱ʼoyó ña̱ káʼa̱n Biblia.

²⁰ Mií ña̱ nda̱a̱ tu̱ʼun Ndióxi̱ kúú ña̱ Biblia. Ta̱kán kúni̱ra ña̱ ná kaʼviún Biblia, sakuaʼún xa̱ʼa̱ña ta kuʼvi̱-iniún kuniúnña. Taxi tíxa̱ʼvi ndaʼa̱ Ndióxi̱ xa̱ʼa̱ ña̱ ta̱xira regalo yóʼo ndaʼún. Ta kǒo sandákoún ña̱ kaʼviún ña̱yóʼo. Saá kúú ña̱ kunda̱a̱-iniún ndáa ña̱ kúni̱ Ndióxi̱ taxira ndaʼa̱ na̱ yiví. Nu̱ú ña̱ inka capítulo sakuaʼayó xa̱ʼa̱ ña̱yóʼo.