LECCIÓN 05
Tu̱ʼun Ndióxi̱ kúú ña̱ va̱xi nu̱ú Biblia
Jehová ta̱xira iin regalo ña̱ ndáyáʼviní ndaʼa̱yó: ña̱yóʼo kúú 66 libro ña̱ va̱xi nu̱ú Biblia. Sana ndákanixi̱níún: “¿Ndáa míí ka̱na Biblia? ¿Ndáana ni̱ka̱ʼa̱n ña̱ va̱xi nu̱úña?”. Ña̱ va̱ʼa ndakuiinyó pregunta yóʼo, ná kotoyó ndáa ki̱ʼva ki̱xaa̱ tu̱ʼun Ndióxi̱ nda̱a̱ tiempo vitin.
1. Tá na̱ ta̱a kúú na̱ ka̱ʼyí Biblia, ¿nda̱chun káʼa̱nyó ña̱ kúúña tu̱ʼun Ndióxi̱?
Ki̱ʼva 40 na̱ ta̱a ka̱ʼyí Biblia, ta xa̱a̱ síín síín íyo chiñu ña̱ xi̱keʼéna. Ki̱xáʼaña káʼyi̱ña tá ku̱i̱ya̱ 1513 tiempo xi̱naʼá, ta ndi̱ʼi ni̱ka̱ʼyi̱ña ku̱i̱ya̱ 98 tiempo vitin. Ta ki̱ʼva 1,600 ku̱i̱ya̱ ni̱ka̱ʼyi̱ña. Soo ni saá va̱ása sáma ña̱ káʼa̱nña. ¿Nda̱chun va̱ʼaní íyoña saá? Saáchi Ndióxi̱ kúú ta̱ ni̱ka̱ʼa̱n ña̱ va̱xi nu̱úña (kaʼvi 1 Tesalonicenses 2:13). Na̱ ka̱ʼyí ña̱yóʼo kǒo níkaʼyína ña̱ xi̱ndakanixi̱nína. Saáchi Ndióxi̱ xi̱niñúʼura espíritu santora ña̱ va̱ʼa chi̱ndeétáʼanra xíʼinna ña̱ va̱ʼa ka̱ʼa̱nna xa̱ʼa̱ña (2 Pedro 1:21). a Ta xíʼin espíritu santora, na̱ ta̱a yóʼo ka̱ʼyína ña̱ ndákanixi̱níra (2 Timoteo 3:16).
2. ¿Ndáana kivi kuumií Biblia?
Ndiʼi na̱ yiví ni nda̱a̱ ndáaka ñuuna, á ni nda̱a̱ ndáaka tu̱ʼun káʼa̱nna kivi kunda̱a̱-inina xa̱ʼa̱ tu̱ʼun va̱ʼa ña̱ va̱xi nu̱ú Biblia (kaʼvi Apocalipsis 14:6). Ta mií Ndióxi̱ kúú ta̱ kúni̱ ña̱ ná kooña ku̱a̱ʼání nu̱ú tu̱ʼun. Ta ña̱yóʼo kúú libro ña̱ xa̱a̱ ku̱a̱ʼání nu̱ú tu̱ʼun sándaya̱ʼana. Ta ndiʼi na̱ yiví kivi kunda̱a̱-inina xa̱ʼa̱ ña̱ Biblia, ni nda̱a̱ ndáaka nu̱ú ndóona á ni nda̱a̱ ndáaka tu̱ʼun káʼa̱nna.
3. ¿Ndáa ki̱ʼva xi̱ndaa Jehová ña̱ Biblia?
Ña̱ Biblia ka̱ʼyínaña nu̱ú ña̱ʼa ña̱ kamaní xi̱ndi̱ʼi̱-xa̱ʼa̱. Xi̱niñúʼuna rollo ña̱ xi̱kuva̱ʼa xíʼin ñií kití á xíʼin planta tú naní papiro. Soo na̱ ta̱a na̱ xi̱kuʼvi̱-ini xi̱xini ña̱ Biblia ke̱ʼéna ku̱a̱ʼání copiaña, xíʼin ndaʼa̱na ka̱ʼyínaña ta ki̱ʼinnína kuenta tá ke̱ʼénaña. Ni ku̱a̱ʼání na̱ chíñu xi̱kuni̱na sandíʼi-xa̱ʼa̱naña. Soo ni̱xi̱yo inka na̱ chi̱ka̱a̱-ini ña̱ kuvina xa̱ʼa̱ ña̱yóʼo ña̱ va̱ʼa va̱ása ndiʼi-xa̱ʼa̱ña. Jehová kǒo táxira ña̱ ná kasi nda̱a̱ ni iinna nu̱úra ña̱ va̱ʼa ka̱ʼa̱nra xíʼinyó. Ña̱ Biblia káchiña: “Soo tu̱ʼun Ndióxi̱ miíyó, kooña ndiʼi tiempo” (Isaías 40:8).
NÁ SAKUAʼAKAYÓ XA̱ʼA̱ÑA
Ná sakuaʼakayó ndáa ki̱ʼva chi̱ndeétáʼan Ndióxi̱ xíʼin na̱ ta̱a ña̱ va̱ʼa ka̱ʼyína ña̱ Biblia, ta saátu ná kotoyó ndáa ki̱ʼva xi̱ndaaraña ña̱ va̱ʼa kuumií ndiʼi na̱ yiví ña̱yóʼo.
4. Ña̱ Biblia káʼa̱nña xíʼinyó ndáana ni̱ka̱ʼa̱n tu̱ʼun ña̱ va̱xi nu̱úña
Kotondó VIDEO. Tándi̱ʼi kaʼvindó 2 Timoteo 3:16 ta ka̱ʼa̱nndó xa̱ʼa̱ ña̱yóʼo:
-
Tá na̱ ta̱a kúú na̱ ka̱ʼyí ña̱ Biblia, ¿nda̱chun káʼa̱nyó ña̱ kúúña tu̱ʼun Ndióxi̱?
-
¿Á kándíxaún ña̱ mií Ndióxi̱ kúú ta̱ ni̱ka̱ʼa̱n xíʼin na̱ ta̱a ña̱ ná kaʼyína ña̱ ndákanixi̱níra?
Ta̱ secretario káʼyíra carta soo tu̱ʼun ña̱ va̱xi nu̱úña tu̱ʼun ta̱ xáʼndachíñu nu̱úra kúúña, chi ta̱yóʼo káʼa̱n xíʼinra ndáaña kaʼyíra. Ki̱ʼva saá íyo ña̱ Biblia, na̱ ta̱a kúú na̱ ka̱ʼyíña soo tu̱ʼun Ndióxi̱ kúú ña̱ va̱xi nu̱úña.
5. Ña̱ Biblia va̱ása níndiʼi-xa̱ʼa̱ña ni ku̱a̱ʼání yichi̱ xi̱kuni̱na sandíʼi-xa̱ʼa̱naña
Tá tu̱ʼun mií Ndióxi̱ kúú ña̱ Biblia xíniñúʼu kundaavaraña. Xa̱a̱ íyo ku̱a̱ʼání ku̱i̱ya̱, ku̱a̱ʼání na̱ chíñu xi̱kuni̱na sandíʼi-xa̱ʼa̱na ña̱ Biblia. Ta saátu sava na̱ xi̱niʼi yichi̱ nu̱ú na̱ veʼe-ñu̱ʼu va̱ása níxikuni̱na ña̱ ná kaʼvi na̱ yiví ña̱yóʼo. Soo ni saá, ku̱a̱ʼánína chi̱ka̱a̱-inina ña̱ kundaanaña ni ni̱xi̱yo na̱ xi̱sa̱a̱-ini xi̱xiniñaʼá ta xi̱kuni̱na kaʼnínana. Ña̱ va̱ʼa kunda̱a̱-iniún xa̱ʼa̱ iin ta̱a ta̱ ke̱ʼé ña̱yóʼo, kotondó VIDEO ta ka̱ʼa̱nndó xa̱ʼa̱ ña̱yóʼo:
-
Xa̱ʼa̱ ña̱ na̱kunda̱a̱-iniún ña̱ chi̱ka̱a̱nína ndee̱ ña̱ xi̱ndaana ña̱ Biblia, ¿á kútóokaún kaʼviúnña? Ta, ¿nda̱chun?
Kaʼvindó Salmo 119:97 ta ka̱ʼa̱nndó xa̱ʼa̱ ña̱yóʼo:
-
¿Nda̱chun ku̱a̱ʼání na̱ yiví va̱ása níyi̱ʼvína kuvina ña̱ va̱ʼa sandáya̱ʼana ña̱ Biblia inka tu̱ʼun ta saátu ña̱ xaxánaña?
6. Iin libro ña̱ kivi kuniñúʼu ndiʼi na̱ yiví
Ña̱ Biblia kúú iin libro ña̱ xa̱a̱ ku̱a̱ʼání nu̱ú tu̱ʼun sándaya̱ʼana ta saátu ku̱a̱ʼáníña xáxana. Kaʼvindó Hechos 10:34, 35 ta ka̱ʼa̱nndó xa̱ʼa̱ ña̱yóʼo:
-
¿Nda̱chun kúni̱ Ndióxi̱ ña̱ ná sandáya̱ʼana tu̱ʼunra ku̱a̱ʼání nu̱ú tu̱ʼun ta saátu ña̱ ná xaxánaña ku̱a̱ʼání lugar?
-
¿Ndáaña káʼa̱n xa̱ʼa̱ Biblia kúú ña̱ kútóokaún?
Ndiʼi
na̱ ndóo
nu̱ú ñuʼú yóʼo
kivi kaʼvina Biblia tu̱ʼun miína
Xa̱a̱
3,000
nu̱ú tu̱ʼun íyoña.
inííña á iin táʼvíña
5,000 millón
Kúú Biblia ña̱ xa̱a̱ ka̱na.
Ta ña̱yóʼo kúú ña̱ ku̱a̱ʼáníka kána nu̱ú inkaka libro
ÑA̱ KÁʼA̱N SAVA NA̱ YIVÍ: “Ña̱ Biblia iin libro yatá ña̱ ka̱ʼyí na̱ ta̱ava kúúña”.
-
¿Ndáaña ndákanixi̱níún xa̱ʼa̱ ña̱yóʼo?
-
¿Ndáaña náʼa̱ ña̱ tu̱ʼun Ndióxi̱ kúúña?
ÑA̱ XA̱A̱ SA̱KUAʼAYÓ
Ña̱ Biblia tu̱ʼun Ndióxi̱ kúúña ta táxira ña̱ ná kuumií ndiʼi na̱ yiví ña̱yóʼo.
Ná ndakaʼányó xa̱ʼa̱ ña̱yóʼo
-
¿Ndáaña kúni̱ kachi ña̱ chi̱ndeétáʼan Ndióxi̱ xíʼin na̱ ta̱a ña̱ ka̱ʼyína Biblia?
-
¿Ndáaña kútóokaún ña̱ káʼa̱n xa̱ʼa̱ ña̱ ni̱ka̱ku Biblia ni xi̱kuni̱na sandíʼi-xa̱ʼa̱naña? Ta, ¿ndáaña kivi ka̱ʼún xa̱ʼa̱ ña̱ sándaya̱ʼanaña ku̱a̱ʼání nu̱ú tu̱ʼun ta saátu ña̱ xáxanaña?
-
¿Ndáaña ndákanixi̱níún xa̱ʼa̱ ndiʼi ña̱ ke̱ʼé Ndióxi̱ ña̱ va̱ʼa ka̱ʼa̱nra xíʼún?
NANDUKÚKA XA̱ʼA̱ÑA
Kivi kunda̱a̱-iniún xa̱ʼa̱ historia ña̱ káʼa̱n xa̱ʼa̱ Biblia, nda̱a̱ tá ki̱xáʼana káʼyínaña xíʼin ndaʼa̱na tasaá nda̱a̱ ña̱ íyo tiempo vitin.
Kaʼvi ndáa ki̱ʼva ni̱ka̱ku ña̱ Biblia nu̱ú u̱ni̱ na̱ xi̱kuni̱ sandíʼi-xa̱ʼa̱ña.
“Historia ña̱ káʼa̱n ndáa ki̱ʼva ni̱ka̱ku ña̱ Biblia” (La Atalaya, núm. 4, 2016)
Koto ndáa tu̱ndóʼo ni̱ya̱ʼa sava na̱ yiví nu̱ú ña̱ va̱ʼa sa̱ndáya̱ʼana ña̱ Biblia inka tu̱ʼun.
Ku̱a̱ʼání tu̱ʼun sándaya̱ʼana ña̱ Biblia ta saátu íyo ku̱a̱ʼání copiaña. ¿Nda̱chun kivi kandíxaún ña̱ ta̱ʼán nasa̱ma tu̱ʼun Ndióxi̱?
“¿Á na̱samana ña̱ va̱xi nu̱ú Biblia?” (Artículo ña̱ va̱xi nu̱ú jw.org)
a Ña̱ espíritu santo kúú ndee̱ Ndióxi̱, ta ña̱yóʼo kúú ña̱ xíniñúʼura ña̱ va̱ʼa keʼéra iin ña̱ʼa, nda̱a̱ táki̱ʼva káʼa̱nña xa̱ʼa̱ ña̱yóʼo nu̱ú ña̱ lección 07.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
