LECCIÓN 07
¿Ndáa ki̱ʼva íyo Jehová?
Tá ndákanixi̱níún xa̱ʼa̱ Jehová, ¿ndáa ki̱ʼva íyora túviún? ¿Á túviún ña̱ káʼnuní Jehová ta xíka íyora nu̱ún, nda̱a̱ táki̱ʼva xíka íyo ki̱mi tí íyo ti̱xin iin galaxia? ¿Á ndákanixi̱níún ña̱ íyoní ndee̱ra nda̱a̱ táki̱ʼva íyo iin taxa ta xa̱ʼa̱ ña̱kán kǒo kívi kunda̱a̱-iniyó ndáa ki̱ʼva íyo inira? Soo mií ña̱ nda̱a̱, ¿ndáa ki̱ʼva íyo Jehová? Nu̱ú tu̱ʼunra ña̱ Biblia náʼa̱ra sava ña̱ va̱ʼa ña̱ kúúmiíra nu̱úyó, ta saátu náʼa̱ra ña̱ ndixa ndíʼi̱-inira xa̱ʼún.
1. ¿Nda̱chun va̱ása kívi kuniyó Ndióxi̱?
Ndióxi̱ iin espíritu kúúra (Juan 4:24). Jehová va̱ása íyora nda̱a̱ táki̱ʼva íyo miíyó na̱ yiví. Chi iin espíritu kúúra ta íyora chí ndiví, ta ni va̱ása kívi kuniyó nu̱ú íyora.
2. ¿Ndáaña kúú sava ña̱ va̱ʼa ña̱ kúúmií Jehová?
Ni va̱ása kívi kuniyó Jehová, soo tá sákuaʼayó xa̱ʼa̱ra, ña̱yóʼo chíndeéña miíyó ña̱ kuʼvi̱-iniyó kuniyóra saáchi ndixa íyora ta va̱ʼaní-inira. Ña̱ Biblia káchiña: “Jehová kúni̱ra xínira na̱ kéʼé ña̱ nda̱kú, ta kǒo sándakoora na̱ ndinuʼu-ini ndíku̱nñaʼá” (Salmo 37:28). Ta saátu “kúʼvi̱ní-ini Jehová xínira miíyó, ta kúndáʼviní-inira xínira miíyó”, ta náʼa̱kara ña̱yóʼo nu̱ú na̱ yiví na̱ xóʼvi̱ (Santiago 5:11). “Jehová íyo yatinra xíʼin na̱ xóʼvi̱, ta chíndeétáʼanra xíʼin na̱ kúsuchí-ini” (Salmo 34:18). ¿Á xa̱a̱ xíni̱ún ña̱ kivi sakusi̱íyó á sakúsuchíyó-ini Jehová xíʼin ña̱ kéʼéyó? Na̱ yiví na̱ ndáka̱xin keʼé ña̱ va̱ása va̱ʼa sándakavana-inira ta sáxo̱ʼvi̱nara (Salmo 78:40, 41). Soo na̱ yiví na̱ kéʼé ña̱ va̱ʼa sákusi̱ínína-inira (kaʼvi Proverbios 27:11).
3. ¿Ndáa ki̱ʼva náʼa̱ Jehová ña̱ kúʼvi̱-inira xínira miíyó?
Iin ña̱ va̱ʼa ña̱ kúúmií Jehová kúú ña̱ kúʼvi̱-inira xínira miíyó. Saáchi “Ndióxi̱ kúúra ña̱ kúʼvi̱-ini” (1 Juan 4:8). Jehová xíniñúʼura ña̱ Biblia ña̱ va̱ʼa na̱ʼa̱ra ña̱ kúʼvi̱-inira xínira miíyó ta saátu xíʼin ña̱ʼa ña̱ i̱xava̱ʼara (kaʼvi Hechos 14:17). Ndakanixi̱ní ndáa ki̱ʼva i̱xava̱ʼara miíyó. Ta̱xira ña̱ ná kotoyó ku̱a̱ʼání color, ña̱ ná kusi̱í-iniyó xíʼin yaa ña̱ xíniso̱ʼoyó ta saátu ta̱xira ña̱ʼa ña̱ xíxiyó ña̱ ya̱sinní. Kúni̱ra ña̱ ná kusi̱í-iniyó xíʼin ña̱ tákuyó.
NÁ SAKUAʼAKAYÓ XA̱ʼA̱ÑA
Ná kotoyó ndáaña xi̱niñúʼu Jehová ña̱ va̱ʼa i̱xava̱ʼara ña̱ʼa ña̱ liviní. Ta saátu sakuaʼayó ndáa ki̱ʼva náʼa̱ra nu̱úyó ña̱ va̱ʼa ña̱ kúúmiíra.
4. Ña̱ espíritu santo: kúú ndee̱ Ndióxi̱ ta xíniñúʼuraña ña̱ keʼéra ku̱a̱ʼá ña̱ʼa
Miíyó xíniñúʼuyó ndaʼa̱yó ña̱ va̱ʼa kachíñuyó, soo Jehová xíniñúʼura espíritu santora ña̱ va̱ʼa keʼéra ña̱ʼa. Ña̱ Biblia va̱ása káʼa̱nña, ña̱ espíritu santo kúúña iin na̱ yiví, saáchi ña̱yóʼo kúú ndee̱ ña̱ xíniñúʼu Ndióxi̱ ña̱ va̱ʼa keʼéra ndiʼi ña̱ʼa. Kaʼvindó Lucas 11:13 xíʼin Hechos 2:17, ta ka̱ʼa̱nndó xa̱ʼa̱ ña̱yóʼo:
-
Ndióxi̱ taxira espíritu santora ndaʼa̱ na̱ ndúkúña nu̱úra. Ña̱kán, ¿á ndákanixi̱níún ña̱ iin na̱ yiví kúú espíritu santo, á ndee̱ Ndióxi̱ ña̱ xíniñúʼura ña̱ keʼéra iin ña̱ʼava kúúña? ¿Nda̱chun ndákanixi̱níún saá?
Jehová xíniñúʼura espíritu santora ña̱ va̱ʼa keʼéra ña̱ʼa ña̱ liviní. Kaʼvindó Salmo 33:6 xíʼin 2 Pedro 1:20, 21, ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva xíniñúʼu Jehová espíritu santora?
5. Ña̱ va̱ʼa ña̱ kúúmií Jehová sákuyatinña miíyó nu̱úra
Ta̱ Moisés nda̱kúní ka̱chíñura nu̱ú Ndióxi̱. Soo ni saá xi̱kuni̱kara kunda̱a̱-inira xa̱ʼa̱ ta̱ i̱xava̱ʼa miíra. Xa̱ʼa̱ ña̱kán, ta̱ Moisés ni̱ka̱ʼa̱nra xíʼinra: “Sanáʼa̱ yi̱ʼi̱ yichi̱ ña̱ va̱ʼa, ña̱ va̱ʼa ná kundaa-inii̱ xa̱ʼún” (Éxodo 33:13). Jehová nda̱kuiinra yuʼú ta̱ Moisés ta ni̱ka̱ʼa̱nra xa̱ʼa̱ sava ña̱ va̱ʼa ña̱ kúúmiíra. Kaʼvindó Éxodo 34:4-6 ta ka̱ʼa̱nndó xa̱ʼa̱ ña̱yóʼo:
-
¿Ndáaña va̱ʼa ña̱ kúúmií Jehová kúú ña̱ ni̱ka̱ʼa̱nra xa̱ʼa̱ xíʼin ta̱ Moisés?
-
¿Ndáaña va̱ʼa ña̱ kúúmií Jehová kúú ña̱ kútóokaún?
6. Jehová ndíʼi̱-inira xa̱ʼa̱ na̱ yiví
Na̱ ñuu Ndióxi̱ na̱ ni̱xi̱yo tá tiempo xi̱naʼá ni̱xo̱ʼvi̱nína tá xi̱kuuna esclavo chí ñuu Egipto. ¿Ndáaña ndo̱ʼo Jehová tá xi̱nira ni̱xo̱ʼvi̱ na̱ ñuura? Kuniso̱ʼondó AUDIO ta kundiku̱nndó lectura á kaʼvindó Éxodo 3:1-10. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña sánáʼa̱ ña̱yóʼo miíyó tá xíto Jehová xóʼvi̱ na̱ yiví? (Kotondó versículo 7 xíʼin 8).
-
¿Á túviún ña̱ ndixa kúni̱ Jehová chindeétáʼanra xíʼin na̱ yiví? ¿Á kándíxaún ña̱ kuchiñura keʼéra ña̱yóʼo? Ta, ¿nda̱chun ndákanixi̱níún saá?
7. Ña̱ʼa ña̱ íyo nu̱ú ñuʼú yóʼo náʼa̱ña ña̱ va̱ʼa ña̱ kúúmií Jehová
Jehová sánáʼa̱ra miíyó xa̱ʼa̱ ña̱ va̱ʼa ña̱ kúúmiíra xíʼin ña̱ʼa ña̱ ke̱ʼéra. Kotondó VIDEO. Tándi̱ʼi kaʼvindó Romanos 1:20 ta ka̱ʼa̱nndó xa̱ʼa̱ ña̱yóʼo:
-
¿Ndáaña va̱ʼa kúúmií Jehová xítoún xa̱ʼa̱ ndiʼi ña̱ʼa ña̱ i̱xava̱ʼara?
ÑA̱ KÁʼA̱N SAVA NA̱ YIVÍ: “Ndióxi̱ íyoní ndee̱ra ta íyora ndiʼi lugar xa̱ʼa̱ ña̱kán va̱ása kívi kuniyóra”.
-
¿Ndáaña ndákanixi̱ní miíún?
-
¿Nda̱chun ndákanixi̱níún saá?
ÑA̱ XA̱A̱ SA̱KUAʼAYÓ
Jehová iin espíritu kúúra, xa̱ʼa̱ ña̱kán va̱ása kívi kuniyóra. Kúúmiíra ku̱a̱ʼá ña̱ va̱ʼa ña̱ sákuyatin miíyó nu̱úra, ta iin ña̱ ndáyáʼviní kúú ña̱ kúʼvi̱-inira xínira miíyó.
Ná ndakaʼányó xa̱ʼa̱ ña̱yóʼo
-
¿Nda̱chun va̱ása kívi kuniyó Jehová?
-
¿Ndáaña kúú espíritu santo?
-
¿Ndáaña kúú sava ña̱ va̱ʼa ña̱ kúúmií Jehová?
NANDUKÚKA XA̱ʼA̱ÑA
Kunda̱a̱ka-iniún ndáa ki̱ʼva íyo Jehová tá ná kaʼviún xa̱ʼa̱ ku̱mí ña̱ va̱ʼa ña̱ kúúmiíra ña̱ ndáyáʼviní.
Koto ndáaña náʼa̱ ña̱ va̱ása íyo Jehová ndiʼi lugar.
“¿Á ndiʼi lugar íyo Ndióxi̱?” (Artículo ña̱ va̱xi nu̱ú jw.org)
Koto nda̱chun nu̱ú Biblia chítáʼanña espíritu santo xíʼin “ndaʼa̱” Ndióxi̱.
“¿Ndáaña kúú espíritu santo?” (Artículo ña̱ va̱xi nu̱ú jw.org)
Iin ta̱a ta̱ va̱ása kívi koto xi̱ ixayo̱ʼvi̱ña xíʼinra ña̱ kandíxara ña̱ ndixa ndíʼi̱-ini Ndióxi̱ xa̱ʼa̱ra. Koto ndáa ña̱ chi̱ndeétáʼan xíʼinra ña̱ va̱ʼa na̱samara ña̱ ndákanixi̱níra.
“Vitin va̱ʼa chíndeétáʼi̱n xíʼin inkana” (La Atalaya, 1 tí octubre ku̱i̱ya̱ 2015)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
