LECCIÓN 10
¿Nda̱chun iin ña̱ va̱ʼaní kúú ña̱ ku̱ʼún reunión ña̱ kúúmií na̱ testigo Jehová?
¿Á xa̱a̱ káʼa̱n na̱ testigo Jehová xíʼún ña̱ ku̱ʼún reunión xíʼinna? Tá nda̱a̱ ni iin yichi̱ ta̱ʼán ku̱ʼún reunión kán, sana yíʼviún tá ndákanixi̱níún ña̱ ku̱ʼún. Sana ndákanixi̱níún: “¿Ndáaña kéʼé na̱ testigo tá kúúmiína reunión? ¿Nda̱chun ndáyáʼviní reunión yóʼo nu̱úna? ¿Á xíniñúʼu ku̱ʼi̱n xíʼinna?”. Nu̱ú lección yóʼo sakuaʼún, ña̱ kivi chindeétáʼan ña̱ reunión yóʼo xíʼún ña̱ viíka kutáʼún xíʼin Ndióxi̱.
1. ¿Nda̱chun kúú ña̱ ndákutáʼan na̱ testigo Jehová?
Iin ta̱ ka̱ʼyí Biblia ni̱ka̱ʼa̱nra nda̱chun kúú ña̱ ndáyáʼviní ndakutáʼanyó, ka̱chira: “Nu̱ú ndákutáʼan ku̱a̱ʼána ndasakáʼnui̱ Jehová” (Salmo 26:12). Saátu tiempo vitin na̱ testigo Jehová ndákutáʼanna, ta ña̱yóʼo sákusi̱íníña-inina. Iníísaá ñuyǐví ndiʼi semana ndákutáʼanna ña̱ va̱ʼa ndasakáʼnuna Ndióxi̱. Ña̱ katana nu̱úra ta inkáchi keʼéna oración. Sava yichi̱ ti̱xin iin ku̱i̱ya̱ kéʼéna reunión ña̱ náʼnuka, ta ku̱a̱ʼánína ndákutáʼan.
2. ¿Ndáaña sakuaʼún ti̱xin reunión ña̱ kúúmiíndi̱?
Ña̱ káʼa̱nna xa̱ʼa̱ ti̱xin reunión yóʼo nu̱ú tu̱ʼun Ndióxi̱ kánaña, ta ti̱xin ña̱yóʼo káʼa̱n káxina ndáaña kúni̱ kachi tu̱ʼun Ndióxi̱ (kaʼvi Nehemías 8:8). Tá ná ku̱ʼún reunión ku̱a̱ʼáka ña̱ʼa sakuaʼún xa̱ʼa̱ Jehová, ta saátu xa̱ʼa̱ ña̱ va̱ʼa ña̱ kúúmiíra. Tá ná kunda̱a̱ka-iniún ña̱ kúʼvi̱ní-inira xínira yóʼó, kuni̱kaún xa̱ún koún migora. Ta saátu sakuaʼún ña̱ kivi chindeétáʼanra xíʼún ña̱ viíka koún (Isaías 48:17, 18).
3. ¿Ndáa ki̱ʼva chindeétáʼan na̱ yiví na̱ kuniún ti̱xin reunión xíʼún?
Jehová káʼa̱nra xíʼinyó ña̱ “ná kundi̱ʼi̱-iniyó xa̱ʼa̱ táʼanyó ña̱ va̱ʼa na̱ʼa̱yó ña̱ kúʼvi̱-iniyó xíniyó inkana ta ná keʼéyó ña̱ va̱ʼa, ta ná kǒo sandákooyó ña̱ ndatakayó” (Hebreos 10:24, 25). Ti̱xin reunión ña̱ kúúmiíndi̱ kuniún na̱ yiví na̱ kúʼvi̱ní-ini xínitáʼan, ta nda̱a̱ táki̱ʼva kúni̱ miíún sakuaʼún xa̱ʼa̱ Ndióxi̱ saátu kéʼé na̱kán. Kán kuniso̱ʼún ña̱ ka̱ʼa̱nna xa̱ʼa̱ ña̱ sákuaʼana nu̱ú Biblia ta ña̱yóʼo chika̱a̱ña ndee̱ xíʼún (kaʼvi Romanos 1:11, 12). Ta saátu kivi natúʼún xíʼin na̱ kúa̱an á na̱ xa̱a̱ ti̱ndaʼa̱ na̱ xa̱a̱ ni̱ya̱ʼa nu̱ú ku̱a̱ʼá tu̱ndóʼo. Xa̱ʼa̱ ña̱yóʼo kúú ña̱ kúni̱ Jehová ña̱ ná ku̱ʼu̱nyó reunión.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva íyo reunión ña̱ kúúmií na̱ testigo Jehová, ta nda̱chun ndáyáʼvi chika̱a̱yó ndee̱ ña̱ ku̱ʼu̱nyó.
4. Reunión ña̱ kúúmií na̱ testigo Jehová
Tá siglo nu̱ú, na̱ cristiano xi̱ndakutáʼanna ña̱ va̱ʼa ndasakáʼnuna Jehová (Romanos 16:3-5). Kaʼvindó Colosenses 3:16 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva xi̱ndasakáʼnu na̱ cristiano na̱ ni̱xi̱yo tá siglo nu̱ú, Jehová?
Tiempo vitin na̱ testigo Jehová ndákutáʼan ni̱ʼina veʼe nu̱ú ndásakáʼnuna Ndióxi̱. Ña̱ va̱ʼa kunda̱a̱-iniún ndáa ki̱ʼva xíyo reunión ña̱ kúúmiína, kotondó VIDEO. Tándi̱ʼi kotondó na̱ʼná ña̱ náʼa̱ ndáa ki̱ʼva xíyo reunión ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva kítáʼan ña̱ kéʼé na̱ testigo ti̱xin veʼe nu̱ú ndákutáʼanna xíʼin ña̱ káʼa̱n Colosenses 3:16?
-
Tá xi̱toún video á na̱ʼná, ¿á íyo iin ña̱ ku̱tóoún ndáa ki̱ʼva xíyo reunión ña̱ kúúmiíndi̱?
Kaʼvindó 2 Corintios 9:7 ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ása ndúkúna xu̱ʼún nu̱ú na̱ xáʼa̱n tá xíyo reunión na̱ testigo Jehová?
Koto xíʼin na̱ sánáʼa̱ yóʼó, ndáaña sakuaʼana xa̱ʼa̱ ti̱xin reunión inka semana.
-
¿Ndáaña koo ti̱xin reunión kán kúú ña̱ túviún ña̱ kivi chindeétáʼan xíʼún á ña̱ kúni̱ún kunda̱a̱-iniún xa̱ʼa̱?
¿Á xa̱a̱ xíni̱ún xa̱ʼa̱ ña̱yóʼo?
Nu̱ú jw.org kivi ndani̱ʼún ndáa míí ta ama xíyo reunión xa̱a̱ síín síín ñuu.
-
Ti̱xin reunión ña̱ kúúmiíndi̱ xíyo discurso, ta saátu yáʼa na̱ náʼa̱ ndáa ki̱ʼva natúʼunndi̱ xíʼin na̱ yiví, ta saátu video. Tá kíxáʼa reunión yóʼo xítana iin yaa ta kéʼéna oración, ta saátu kéʼéna tá ndíʼiña.
-
Sava táʼví ña̱ reunión yóʼo na̱ ndákutáʼan kán kivi taxina comentario.
-
Ndiʼi na̱ yiví kivi ku̱ʼu̱n reunión, kúúna ta̱a, ñaʼá, na̱ xa̱a̱ chée xíʼin na̱ va̱lí.
-
Va̱ása ndúkúna xu̱ʼún tá xíyo reunión na̱ testigo Jehová, chi ndiʼivayó kivi ku̱ʼu̱n.
5. Chika̱a̱ ndee̱ ña̱ ku̱ʼún reunión
Ná ndakanixi̱níyó xa̱ʼa̱ na̱ xi̱kuu familia ta̱ Jesús. Na̱yóʼo ni̱xi̱yona ñuu Nazaret, ta ña̱ va̱ʼa ku̱ʼu̱nna templo ña̱ íyo ñuu Jerusalén ku̱i̱ya̱ tá ku̱i̱ya̱, xi̱xiniñúʼu ku̱ʼu̱n xáʼana u̱ni̱ ki̱vi̱ ta xi̱xiniñúʼu ku̱ʼu̱nna chí yuku̱. Kaʼvindó Lucas 2:39-42 ta ka̱ʼa̱nndó xa̱ʼa̱ ña̱yóʼo:
-
¿Á túviún ña̱ xi̱niñúʼu chika̱a̱nína ndee̱ ña̱ va̱ʼa ku̱ʼu̱nna nda̱a̱ ñuu Jerusalén?
-
¿Ndáaña kivi ixayo̱ʼvi̱ xíʼún ña̱ va̱ʼa ku̱ʼún reunión?
-
¿Á túviún ña̱ ndáyáʼvi chika̱ún ndee̱ ña̱ va̱ʼa ku̱ʼún reunión? Ta, ¿nda̱chun ndákanixi̱níún saá?
Ña̱ Biblia sánáʼa̱ña, ña̱ ndáyáʼviní ndakutáʼanyó ña̱ ndasakáʼnuyó Jehová. Kaʼvindó Hebreos 10:24, 25 ta ka̱ʼa̱nndó xa̱ʼa̱ ña̱yóʼo:
-
¿Nda̱chun xíniñúʼu ku̱ʼu̱n ni̱ʼiyó reunión?
ÑA̱ KÁʼA̱N SAVA NA̱ YIVÍ: “Va̱ása xíniñúʼuví ndakutáʼanyó xíʼin inkana ña̱ va̱ʼa ndasakáʼnuyó Ndióxi̱”.
-
¿Ndáa texto á ejemplo ña̱ va̱xi nu̱ú Biblia náʼa̱ ña̱ kuni Jehová ná keʼéyó?
ÑA̱ XA̱A̱ SA̱KUAʼAYÓ
Tá ná ku̱ʼún reunión, ña̱yóʼo chindeétáʼanña xíʼún ña̱ sakuaʼakaún xa̱ʼa̱ Jehová, viíka kutáʼún xíʼinra ta saátu inkáchi ndasakáʼnúnra xíʼin inkana.
Ná ndakaʼányó xa̱ʼa̱ ña̱yóʼo
-
¿Nda̱chun káʼa̱n Jehová xíʼinyó ña̱ ku̱ʼu̱nyó reunión?
-
¿Ndáaña sakuaʼún ti̱xin reunión ña̱ kúúmií na̱ testigo Jehová?
-
¿Ndáa inka ki̱ʼva kivi chindeétáʼan ña̱ reunión xíʼún túviún?
NANDUKÚKA XA̱ʼA̱ÑA
¿Á yíʼviún tá ndákanixi̱níún ña̱ ku̱ʼún reunión? Iin ta̱a ta̱ xi̱ndoʼo saá tá ni̱ya̱ʼa tiempo ki̱xáʼa kútóoníra ku̱ʼu̱nra. Koto nda̱chun.
Koto ña̱ ndo̱ʼo iin ta̱ loʼo ta̱ xi̱kutóoní ku̱ʼu̱n reunión, ta saátu ndáaña ke̱ʼéra ña̱ va̱ʼa chika̱a̱kara ndee̱ ña̱ ku̱ʼu̱nra reunión.
Kaʼvi ña̱ káʼa̱n xa̱ʼa̱ ña̱ ndákanixi̱ní inkana xa̱ʼa̱ reunión.
“¿Nda̱chun iin ña̱ va̱ʼaníka kúú ña̱ ndakutáʼanyó ti̱xin salón?” (Artículo ña̱ va̱xi nu̱ú jw.org)
Koto ndáa ki̱ʼva na̱sama iin ta̱a ña̱ va̱ása va̱ʼa xi̱keʼéra tá ki̱xáʼara ni̱xa̱ʼa̱nra reunión ña̱ kúúmií na̱ testigo Jehová.
“Nda̱a̱ ndáaka nu̱ú xi̱xaʼi̱n xi̱niʼi̱ tu̱xi̱í” (La Atalaya, 1 tí julio ku̱i̱ya̱ 2014)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
