LECCIÓN 11
¿Ndáaña kivi keʼún ña̱ va̱ʼa kunda̱a̱ka-iniún xa̱ʼa̱ ña̱ sánáʼa̱ Biblia?
Tá ku̱nda̱a̱-iniún ña̱ kixáʼún keʼún iin chiñu ña̱ yo̱ʼvi̱ní, ¿á ni̱ndi̱ʼi̱ní-iniún? Soo ña̱ va̱ása ixayo̱ʼvi̱ña xíʼún keʼún ña̱yóʼo, sana loʼo tá loʼoña ke̱ʼún tasaá va̱ása ní ixayo̱ʼvi̱ña xíʼún. Ta saátu kivi kundoʼún tá kúni̱ún kaʼviún Biblia. Sana ndákanixi̱níún: “¿Ndáa míí kixáʼíi̱ kaʼvii̱?”. Nu̱ú ña̱ lección yóʼo ka̱ʼa̱nyó xa̱ʼa̱ sava consejo ña̱ kivi chindeétáʼan xíʼún, ña̱ kusi̱í-iniún kaʼviún Biblia.
1. ¿Nda̱chun iin ña̱ va̱ʼaní kúú ña̱ kaʼviyó Biblia ndiʼi ki̱vi̱?
Tá ná kaʼvi na̱ yiví Biblia ndiʼi ki̱vi̱ á “ley Jehová”, si̱íní koona ta va̱ʼaní kana ndiʼi ña̱ kéʼéna (kaʼvi Salmo 1:1-3). Ña̱ va̱ʼa kixáʼún keʼún ña̱yóʼo, kaʼviña sava minuto ndiʼi ki̱vi̱. Tá ná kuxini̱kaún tu̱ʼun Ndióxi̱ kutóokaún kaʼviúnña.
2. ¿Ndáaña chindeétáʼan xíʼún ña̱ viíka kaʼviún ña̱ Biblia?
Ña̱ va̱ʼaka kunda̱a̱-iniyó xíʼin ña̱ káʼviyó nu̱ú Biblia, ná ndakanixi̱níyó xa̱ʼa̱ ña̱ káʼviyó. Va̱ása xíniñúʼu kaʼvi kuitíyó libro yóʼo, saáchi xíniñúʼu ndakanixi̱níyó xa̱ʼa̱ ña̱ káʼa̱nña (Josué 1:8). Tá xa̱a̱ káʼviúnña ndakanixi̱ní xa̱ʼa̱ ña̱yóʼo: “¿Ndáaña sánáʼa̱ ña̱ versículo yóʼo yi̱ʼi̱ xa̱ʼa̱ Jehová? ¿Ndáa ki̱ʼva keʼíi̱ ña̱ káʼa̱nña xíʼi̱n? ¿Ndáa ki̱ʼva kivi kuniñúʼi̱ ña̱yóʼo ña̱ va̱ʼa chindeétáʼi̱n xíʼin inkana?”.
3. ¿Ndáa ki̱ʼva kivi taváún tiempo ña̱ va̱ʼa kaʼviún Biblia?
¿Á íxayo̱ʼvi̱ña xíʼún ña̱ taváún tiempo ña̱ va̱ʼa kaʼviún Biblia? Ku̱a̱ʼáníyó ndóʼo saá. Chika̱a̱ ndee̱ ña̱ viíní kuniñúʼún tiempo ña̱ kúúmiíún (Efesios 5:16). Soo kivi keʼún ña̱yóʼo tá ná taváún loʼo tiempo iin tá iin ki̱vi̱ ña̱ kaʼviún Biblia. Savana káʼvinaña xi̱ta̱a̱n ta inkana káʼvinaña tá xi̱kuá, savatuna káʼvinaña tá ndákindee̱na ña̱ kuxuna. Ta savana káʼvina Biblia tá ñuú tá kúma̱níka ku̱su̱nna. ¿Ama kúú ña̱ kivi keʼé miíún ña̱yóʼo?
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi keʼún ña̱ va̱ʼa kutóokaún kaʼviún Biblia. Yóʼo ndani̱ʼún sava ña̱ kivi chindeétáʼan xíʼún ña̱ kaʼvi kúeún ña̱ va̱ʼa viíka kunda̱a̱-iniún xíʼin ña̱ káʼviún nu̱ú Biblia.
Nda̱a̱ táki̱ʼva kíxáʼayó kútóoyó kuxuyó inka comida, saátu kivi kixáʼayó kutóoyó kaʼviyó Biblia
4. Sakuaʼa ndáa ki̱ʼva kutóokaún kaʼviún ña̱ Biblia
Sana ixayo̱ʼvi̱ña xíʼún ña̱ kixáʼún kaʼviún Biblia. Soo nda̱a̱ táki̱ʼva kíxáʼún kútóún kuxún iin comida, saátu kivi kixáʼún kutóún kaʼviún ña̱ Biblia. Kaʼvindó 1 Pedro 2:2 ta ka̱ʼa̱nndó xa̱ʼa̱ ña̱yóʼo:
-
¿Á túviún ña̱ tá ná kaʼviún Biblia ndiʼi ki̱vi̱ xa̱ún kutóokaún kaʼviúnña?
Kotondó VIDEO ña̱ va̱ʼa kunda̱a̱-iniún ndáaña ke̱ʼé sava na̱ va̱lí kúa̱an ña̱ va̱ʼa ki̱xáʼana kútóokana kaʼvina Biblia. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña i̱xayo̱ʼvi̱ xíʼin na̱ va̱lí kúa̱an na̱ xi̱niyó nu̱ú video, soo ndáaña ku̱chiñuna ke̱ʼéna?
-
¿Ndáaña chi̱ndeétáʼan xíʼinna ña̱ va̱ása nísandákoona ña̱ kaʼvina Biblia?
-
¿Ndáaña ke̱ʼéna ña̱ va̱ʼa kutóokana kaʼvina Biblia?
Ña̱ kivi keʼún tá ná kixáʼún kaʼviún:
-
Ndaka̱xin iin Biblia ña̱ káxi káʼa̱n ta saátu ná kúúmiíña tu̱ʼun ña̱ káʼa̱nna tiempo vitin. Kivi kaʼviún ña̱ Traducción del Nuevo Mundo tá íyoña tu̱ʼun miíún.
-
Kivi kixáʼún kaʼviún ña̱ kútóokaún kunda̱a̱-iniún xa̱ʼa̱. Ndani̱ʼíkaún ña̱ kivi chindeétáʼan xíʼún nu̱ú tabla ña̱ naní “Kaʼvi Biblia ndiʼi ki̱vi̱”.
-
Kivi kaʼyíún ña̱ xa̱a̱ ku̱a̱ʼún káʼviún. Kuniñúʼu tabla ña̱ naní “Ña̱ xa̱a̱ ku̱a̱ʼi̱n káʼvii̱ nu̱ú Biblia”, ña̱ va̱xi nu̱ú tutu yóʼo.
-
Kuniñúʼu ña̱ aplicación JW Library®. Tá ná sánuún ña̱ Biblia nu̱ú celular á tableta á nu̱ú inkaka ña̱ʼa ña̱ kúúmiíún, kivi kaʼviúnña ta kuniso̱ʼúnña nda̱a̱ ndáaka nu̱ú xíkaún.
-
Kuniñúʼu apéndice ña̱ va̱xi nu̱ú ña̱ Traducción del Nuevo Mundo. Nu̱ú ña̱yóʼo ndani̱ʼún mapa, tabla xíʼin iin glosario ña̱ chindeétáʼan xíʼún ña̱ kutóokaún kaʼviún Biblia.
5. Ña̱ kivi keʼún tá kúma̱níka kaʼviún
Kaʼvindó Salmo 119:34 ta ka̱ʼa̱nndó xa̱ʼa̱ ña̱yóʼo:
-
¿Nda̱chun iin ña̱ va̱ʼaníka kúúña tá ná keʼún oración tá kúma̱níka kixáʼún kaʼviún Biblia, á tá ná kaʼvi kúeún xa̱ʼa̱ ña̱ sanáʼa̱na yóʼó?
¿Ndáaña kivi keʼún ña̱ va̱ʼa viíka kunda̱a̱-iniún xíʼin ña̱ sánáʼa̱na yóʼó? Tá ná kaʼviún lección ña̱ va̱xi nu̱ú tutu yóʼo, keʼé ña̱yóʼo.
-
Kaʼvi ndiʼi párrafo ña̱ va̱xi nu̱ú kíxáʼa iin tá iin lección.
-
Nandukú texto ña̱ va̱xi nu̱úña, kaʼviña ta koto ndáa ki̱ʼva kítáʼanña xíʼin ña̱ káʼviún.
-
Kaʼyí ña̱ káʼa̱n xa̱ʼa̱ pregunta. Ña̱yóʼo chindeétáʼanña xíʼún tá xa̱a̱ ná kaʼviún xíʼin na̱ sánáʼa̱ yóʼó.
¿Á xa̱a̱ xíni̱ún xa̱ʼa̱ ña̱yóʼo?
Ndi̱ʼi̱ na̱ testigo Jehová xa̱a̱ xíniñúʼundi̱ ku̱a̱ʼá Biblia, soo kútóokandi̱ kuniñúʼundi̱ ña̱ Traducción del Nuevo Mundo saáchi káxiní káʼa̱nña ta va̱xi ki̱vi̱ Ndióxi̱ nu̱úña (koto ña̱ artículo yóʼo nu̱ú jw.org “¿Á kúúmií na̱ testigo Jehová Biblia miína?”).
ÑA̱ KÁʼA̱N SAVA NA̱ YIVÍ: “Íxayo̱ʼvi̱níña xíʼi̱n kaʼvii̱ Biblia saáchi kǒo tiempo nu̱úi̱. Ta ni va̱ása kútói̱ kaʼvii̱ña”.
-
¿Ndáaña ndákanixi̱níún xa̱ʼa̱ ña̱yóʼo?
ÑA̱ XA̱A̱ SA̱KUAʼAYÓ
Ña̱ va̱ʼa kunda̱a̱ka-iniún xa̱ʼa̱ ña̱ káʼa̱n Biblia, tavá tiempo ña̱ kaʼviúnña. Ka̱ʼa̱n xíʼin Ndióxi̱ ña̱ ná chindeétáʼanra xíʼún ña̱ kunda̱a̱-iniún xíʼin ña̱ káʼviún, ta saátu ña̱ kaʼvi kúeún xa̱ʼa̱ ña̱ sanáʼa̱na yóʼó.
Ná ndakaʼányó xa̱ʼa̱ ña̱yóʼo
-
¿Ndáaña chindeétáʼan xíʼún ña̱ va̱ʼa kunda̱a̱ka-iniún xa̱ʼa̱ ña̱ sánáʼa̱ Biblia?
-
¿Ama kivi taváún tiempo ña̱ kaʼviún Biblia?
-
¿Nda̱chun va̱ʼaníka tá ná kaʼvi kúeún tá kúma̱níka sánáʼa̱na yóʼó xa̱ʼa̱ Biblia?
NANDUKÚKA XA̱ʼA̱ÑA
Ndakaʼán xa̱ʼa̱ ña̱ sa̱kuaʼún nu̱ú lección yóʼo, ña̱ kivi chindeétáʼan xíʼún ña̱ viíka kunda̱a̱-iniún xíʼin ña̱ káʼviún nu̱ú Biblia.
“Kivi kusi̱íka-iniún ña̱ kaʼviún ña̱ Biblia” (La Atalaya, núm. 1, 2017)
Koto u̱ni̱ ña̱ kivi chindeétáʼan xíʼún ña̱ va̱ʼa kaʼviún ña̱ Biblia.
Koto ndáa ki̱ʼva kusi̱í-iniún tá káʼviún ña̱ Biblia.
Koto ndáaña káʼa̱n sava na̱ xa̱a̱ ku̱a̱ʼá tiempo káʼvi Biblia.
Ndáa ki̱ʼva kaʼviyó Biblia ta va̱ʼaní kunda̱a̱-iniyó xíʼin ña̱ káʼa̱nña (2:06)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
