Tá Ndióxi̱ kúʼvi̱-inira xínira miíyó, ta na̱ veʼe-ñu̱ʼu káʼa̱nna ña̱ sánáʼa̱na xa̱ʼa̱ra ta kéʼéna ña̱ kúni̱ra, ¿nda̱chun kéʼéna ku̱a̱ʼání ña̱ va̱ása va̱ʼa? Saáchi ku̱a̱ʼání religión ña̱ vatáva sánáʼa̱ña. Ta ña̱ kéʼéna íxayaku̱a̱ña ki̱vi̱ Ndióxi̱. ¿Ndáa ki̱ʼva íxayaku̱a̱na ki̱vi̱ra? ¿Ndáaña ndóʼora xa̱ʼa̱ ña̱ kéʼéna ña̱yóʼo? Ta, ¿ndáaña keʼéra ña̱ va̱ása ixayaku̱a̱kana ki̱vi̱ra?

1. ¿Ndáa ki̱ʼva íxayaku̱a̱na ki̱vi̱ Ndióxi̱ xa̱ʼa̱ ña̱ sánáʼa̱na?

Na̱ religión vatá na̱samana ña̱ nda̱a̱ ña̱ káʼa̱n xa̱ʼa̱ Ndióxi̱ ta nda̱sanaña ña̱ vatá (Romanos 1:​25). Tá kúú ku̱a̱ʼání na̱ veʼe-ñu̱ʼu va̱ása sánáʼa̱na na̱ yiví ndáaña kúú ki̱vi̱ Ndióxi̱. Soo ña̱ Biblia káʼa̱nña ña̱ xíniñúʼu kuniñúʼuyó ki̱vi̱ra (Romanos 10:​13, 14). Ku̱a̱ʼání na̱ níʼi yichi̱ nu̱ú na̱ veʼe-ñu̱ʼu káʼa̱nna ña̱ tá kúú iin tu̱ndóʼo mií Ndióxi̱ kúni̱ ña̱ ná koo ña̱yóʼo. Soo ña̱ vatá kúúña. Ndióxi̱ va̱ása kúúmiíra ku̱a̱chi xa̱ʼa̱ ndiʼi tu̱ndóʼo ña̱ kúu (kaʼvi Santiago 1:​13). Soo xa̱ʼa̱ ña̱ káʼa̱nna ña̱ vatá yóʼo sákuxíkana na̱ yiví nu̱ú Ndióxi̱.

2. ¿Ndáa ki̱ʼva íxayaku̱a̱na ki̱vi̱ Ndióxi̱ xíʼin ña̱ kéʼéna?

Na̱ veʼe-ñu̱ʼu vatá va̱ása vií kéʼéna xíʼin na̱ yiví nda̱a̱ táki̱ʼva vií kéʼé Jehová xíʼinna. Ña̱ Biblia káchiña “ku̱a̱chiña ku̱a̱ʼání kúúña ta nda̱a̱ ndiví ni̱xa̱a̱ña” (Apocalipsis 18:5). Na̱ veʼe-ñu̱ʼu xa̱a̱ ku̱a̱ʼání tiempo kíʼvina xíʼin ña̱ política, chíndeétáʼanna xíʼin na̱ yiví ña̱ ku̱ʼu̱nna nu̱ú guerra ta xíʼin ña̱ kéʼéna yóʼo ku̱a̱ʼání na̱ yiví xíʼi̱. Ku̱a̱ʼání na̱ níʼi yichi̱ nu̱ú na̱ veʼe-ñu̱ʼu kúni̱na koo kúikána xa̱ʼa̱ ña̱kán ndúkúna xu̱ʼún nu̱ú na̱ ñúʼu ti̱xin religión ña̱ kúúmiína. Xíʼin ña̱ kéʼéna yóʼo náʼa̱na ña̱ kǒo xíni̱na Ndióxi̱. Xa̱ʼa̱ ña̱kán, ¿á ndixa náʼa̱na ña̱ ndásakáʼnuna Ndióxi̱? (Kaʼvi 1 Juan 4:8).

3. ¿Ndáaña ndóʼo Ndióxi̱ tá xítora ña̱ kéʼé na̱ veʼe-ñu̱ʼu vatá?

Tá miíún va̱ása kútóún ña̱ kéʼé na̱ veʼe-ñu̱ʼu vatá, ndakanixi̱ní ndáaña ndóʼo Jehová xa̱ʼa̱ ña̱yóʼo. Ndióxi̱ kúʼvi̱-inira xínira na̱ yiví, soo sáa̱ra xíʼin na̱ níʼi yichi̱ nu̱ú na̱ veʼe-ñu̱ʼu na̱ íxayaku̱a̱ ki̱vi̱ra ta íxandi̱va̱ʼana xíʼin na̱ yiví na̱ kándíxa ña̱ sánáʼa̱na. Ndióxi̱ káʼa̱nra ña̱ sandíʼi-xa̱ʼa̱ra na̱ veʼe-ñu̱ʼu vatá “ta va̱ása ndikókana kuninaña” (Apocalipsis 18:​21). Si̱lóʼo tiempo kúma̱ní ta sandíʼi-xa̱ʼa̱ra ndiʼi na̱ veʼe-ñu̱ʼu vatá (Apocalipsis 18:8).

 NÁ SAKUAʼAKAYÓ XA̱ʼA̱ÑA

4. Su̱ví ndiʼi religión va̱ʼa nu̱ú Ndióxi̱

Ku̱a̱ʼání na̱ yiví ndákanixi̱nína ña̱ ndiʼiva religión sákuyatinña miíyó nu̱ú Ndióxi̱. Soo, ¿á ña̱ nda̱a̱ kúú ña̱yóʼo? Kaʼvindó Mateo 7:​13, 14 ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káchi ña̱ Biblia, ¿ndáa ki̱ʼva íyo yichi̱ ña̱ taxi ña̱ kutakuyó?

Kotondó VIDEO ta ka̱ʼa̱nndó xa̱ʼa̱ ña̱yóʼo:

• ¿Á sánáʼa̱ ña̱ Biblia ña̱ va̱ʼa ndiʼi religión nu̱ú Ndióxi̱?

 6. Ndióxi̱ kúni̱ra chindeétáʼanra xíʼin na̱ yiví ña̱ ná keena ti̱xin veʼe-ñu̱ʼu vatá

Kaʼvindó Apocalipsis 18:4 a ta ka̱ʼa̱nndó xa̱ʼa̱ ña̱yóʼo:

• Ndióxi̱ kúni̱ra sakǎkura na̱ yiví na̱ sa̱ndáʼvi na̱ veʼe-ñu̱ʼu vatá. ¿Ndáaña ndákanixi̱níún xa̱ʼa̱ ña̱ kúni̱ra keʼéra ña̱yóʼo?

7. Va̱ása sandákoún ña̱ sakuaʼún xa̱ʼa̱ Ndióxi̱ ta̱ nda̱a̱

¿Á xíniñúʼu ndakanixi̱níyó ña̱ va̱ása va̱ʼa xa̱ʼa̱ Ndióxi̱ xíʼin ndiʼi ña̱ va̱ása va̱ʼa ña̱ kéʼé na̱ veʼe-ñu̱ʼu vatá? Ndakanixi̱ní xa̱ʼa̱ iin ta̱ loʼo ta̱ va̱ása xíín kuniso̱ʼo consejo ña̱ táxi yivára, sándakoora veʼera ta kíxáʼara kéʼéra ña̱ va̱ása va̱ʼa ta yivá ta̱ loʼo yóʼo kǒo kútóora ña̱ kéʼéra. ¿Á kivi chika̱a̱yó ku̱a̱chi yivá ta̱ loʼo yóʼo xa̱ʼa̱ ña̱ va̱ása va̱ʼa kéʼé se̱ʼera?

• ¿Á kivi chika̱a̱yó ku̱a̱chi Jehová xa̱ʼa̱ ndiʼi ña̱ kéʼé na̱ veʼe-ñu̱ʼu vatá, ta sandákooyó ña̱ sakuaʼayó xa̱ʼa̱ra?

 ÑA̱ XA̱A̱ SA̱KUAʼAYÓ

Na̱ veʼe-ñu̱ʼu vatá íxayaku̱a̱na ki̱vi̱ Ndióxi̱ xíʼin ndiʼi ña̱ vatá ña̱ sánáʼa̱na xíʼin ndiʼika ña̱ kéʼéna. Ta xa̱a̱ kunumí sandíʼi-xa̱ʼa̱rana.

Ná ndakaʼányó xa̱ʼa̱ ña̱yóʼo

• ¿Ndáaña ndákanixi̱níún xa̱ʼa̱ ña̱ kéʼé na̱ veʼe-ñu̱ʼu vatá xíʼin ña̱ sánáʼa̱na?

• ¿Ndáaña ndákanixi̱ní Jehová xa̱ʼa̱ na̱ veʼe-ñu̱ʼu vatá?

• ¿Ndáaña keʼé Ndióxi̱ xíʼin na̱ veʼe-ñu̱ʼu vatá yóʼo?