Nda̱a̱ táki̱ʼva ku̱nda̱a̱-iniyó su̱ví ndiʼiví religión va̱ʼa nu̱ú Ndióxi̱. Kiviva ndasakáʼnuyó Ndióxi̱ nda̱a̱ táki̱ʼva kúni̱ miíra tasaá sakusi̱íyó-inira. ¿Ndáa “ki̱ʼva kúni̱ Ndióxi̱ ndasakáʼnuyóra” á ndáa “religión” kúú ña̱ va̱ʼa nu̱úra? (Santiago 1:​27; nota). Ná kotoyó ndáaña sánáʼa̱ ña̱ Biblia.

1. ¿Ndáa míí káʼa̱nña ndáa ki̱ʼva ndasakáʼnuyó Ndióxi̱?

Nu̱ú ña̱ Biblia káʼa̱nña ndáa ki̱ʼva ndasakáʼnuyó Ndióxi̱. Ta̱ Jesús ni̱ka̱ʼa̱nra xíʼin Ndióxi̱ ka̱chira: “Tu̱ʼún ña̱ nda̱a̱ kúúña” (Juan 17:​17). Sava religión va̱ása kíʼinna kuenta xíʼin ña̱ nda̱a̱ ña̱ ndáni̱ʼíyó nu̱ú tu̱ʼun Ndióxi̱, ña̱ Biblia; saáchi ña̱ kéʼéna kúú ña̱ ndíku̱nna costumbre na̱ yiví. Soo Jehová kǒo kútóora ña̱ yáʼandosóna chiñu ña̱ xáʼndara (kaʼvi Marcos 7:9). Soo sákusi̱ívayó-inira tá kíʼinyó kuenta xíʼin ña̱ káʼa̱n ña̱ Biblia ta saátu tá xíniso̱ʼoyó consejora.

2. ¿Ndáa ki̱ʼva xíniñúʼu ndasakáʼnuyó Jehová?

Xa̱ʼa̱ ña̱ mií Jehová kúú ta̱ i̱xava̱ʼa miíyó, iinlá miíra xíniñúʼu ndasakáʼnuyó (Apocalipsis 4:​11). Ña̱yóʼo kúni̱ kachiña ña̱ xíniñúʼu kuʼvi̱-iniyó kuniyó miíra ta ndasakáʼnuyó iinlá miíra, va̱ása xíniñúʼu kuniñúʼuyó santo á imagen á inkaka ña̱ʼa ña̱ ndasakáʼnuyóra (kaʼvi Isaías 42:8).

Ña̱ ndásakáʼnuyó Jehová xíniñúʼu yi̱i̱ kooña ta ná kusi̱í-inira xíʼinña (Romanos 12:1). Ña̱yóʼo kúni̱ kachiña ña̱ xíniñúʼu keʼéyó ña̱ káʼa̱n Ndióxi̱ xíʼinyó. Tá kúú, na̱ kúʼvi̱-ini xíni Jehová xíniso̱ʼona ña̱ káʼa̱nra xíʼin na̱ xa̱a̱ ti̱ndaʼa̱ ta ndáyáʼviní ña̱yóʼo nu̱úna. Ta saátu kǒo kéʼéna ña̱ va̱ása va̱ʼa tá kúú ña̱ kuniñúʼuna droga ña̱ kaʼmina cigarro xíʼin ña̱ koʼona ndixi nda̱a̱ xi̱nina. a

3. ¿Nda̱chun xíniñúʼu ndasakáʼnuyó Jehová xíʼin na̱ yiví na̱ kúni̱ kuniso̱ʼo ña̱ káʼa̱nra?

Ti̱xin reunión ña̱ xíkuumiíndi̱ ndiʼi semana kán kúú nu̱ú ndásakáʼnundi̱ Jehová xíʼin ndiʼi na̱ congregación (Salmo 111:​1, 2). Ta iin ki̱ʼva ña̱ kéʼéndi̱ ña̱yóʼo kúú ña̱ xítandi̱ yaa nu̱ú Ndióxi̱ (kaʼvi Salmo 104:​33). Jehová kúni̱ra ña̱ ná ku̱ʼu̱nyó reunión saáchi kúʼvi̱-inira xínira miíyó, ta kúnda̱a̱-inira ña̱ kivi chindeétáʼan reunión kán xíʼinyó ña̱ koo si̱íyó ndiʼi tiempo. Tá ndákutáʼanndi̱ táxiníña ndee̱ ndaʼa̱ndi̱ ta saátu chíka̱a̱ndi̱ ndee̱ xíʼin inkana.

 NÁ SAKUAʼAKAYÓ XA̱ʼA̱ÑA

4. Va̱ása va̱ʼa kuniñúʼuyó imagen tá ndásakáʼnuyó Ndióxi̱

5. Tá iinlá Jehová ndásakáʼnuyó va̱ása kandíxayó ña̱ vatá ña̱ sánáʼa̱ na̱ yiví

 6. Ndásakáʼnuyó Jehová tá xáʼa̱nyó reunión

Tá xítayó ta saátu tá táxiyó comentario ti̱xin reunión, ndásakáʼnuyó Jehová ta táxiyó ndee̱ ndaʼa̱ táʼanyó. Kaʼvindó Salmo 22:​22 ta ka̱ʼa̱nndó xa̱ʼa̱ ña̱yóʼo:

• ¿Á kúsi̱í-iniún xíʼin comentario ña̱ táxina ti̱xin reunión?

• ¿Á kúsi̱í-iniún taváún iin comentario ta ka̱ʼúnña ti̱xin reunión?

7. Jehová kúsi̱íní-inira tá ná ka̱ʼa̱nyó xíʼin inkana xa̱ʼa̱ ña̱ sákuaʼayó

Ku̱a̱ʼání ki̱ʼva kivi natúʼunyó xíʼin inkana xa̱ʼa̱ ña̱ sánáʼa̱ ña̱ Biblia. Kaʼvindó Salmo 9:1 xíʼin 34:1, ta ka̱ʼa̱nndó xa̱ʼa̱ ña̱yóʼo:

• Ndiʼi ña̱ xa̱a̱ sákuaʼún nu̱ú Biblia, ¿ndáaña kúni̱ún natúʼún xíʼin inkana?

 ÑA̱ XA̱A̱ SA̱KUAʼAYÓ

Sákusi̱íyó-ini Ndióxi̱ tá ndásakáʼnuyó iinlá miíra, tá ndásakáʼnuyóra ti̱xin reunión ta saátu tá nátúʼunyó xíʼin inkana xa̱ʼa̱ ña̱ sákuaʼayó.

Ná ndakaʼányó xa̱ʼa̱ ña̱yóʼo

• ¿Ndáa míí káʼa̱nña ndáa ki̱ʼva kúni̱ Ndióxi̱ ndasakáʼnura?

• ¿Nda̱chun xíniñúʼu ndasakáʼnuyó iinlá mií Jehová?

• ¿Nda̱chun xíniñúʼu ndasakáʼnuyó Ndióxi̱ xíʼin na̱ yiví na̱ kúni̱ kuniso̱ʼo ña̱ káʼa̱nra?