LECCIÓN 16
¿Ndáaña ke̱ʼé ta̱ Jesús tá ni̱xi̱yora nu̱ú ñuʼú yóʼo?
Ku̱a̱ʼání na̱ yiví ndákanixi̱nína xa̱ʼa̱ ta̱ Jesús ña̱ kúúra iin lée loʼo, iin profeta ta̱ ndíchiní á iin ta̱a ta̱ xa̱a̱ ku̱numí kuvi. Soo tá ná sakuaʼakayó xa̱ʼa̱ ña̱ ke̱ʼéra tá ni̱xi̱yora nu̱ú ñuʼú yóʼo, ¿á su̱ví va̱ʼaníka kunda̱a̱-iniyó xa̱ʼa̱ra? Nu̱ú lección yóʼo sakuaʼakayó xa̱ʼa̱ ña̱ʼa ña̱ ndáyáʼvi ña̱ ke̱ʼé ta̱ Jesús ta saátu ndáa ki̱ʼva chindeétáʼanña xíʼún.
1. ¿Ndáa chiñu kúú ña̱ xi̱ndayáʼvika nu̱ú ta̱ Jesús?
Chiñu ña̱ xi̱ndayáʼvika nu̱ú ta̱ Jesús kúú ña̱ na̱túʼunra “tu̱ʼun va̱ʼa xa̱ʼa̱ Reino Ndióxi̱” xíʼin na̱ yiví (kaʼvi Lucas 4:43). Na̱túʼunra tu̱ʼun va̱ʼa ña̱ chindúʼú Ndióxi̱ iin reino á gobierno ña̱ sandíʼi-xa̱ʼa̱ ndiʼi tu̱ndóʼo ña̱ kúúmií na̱ yiví. a Chi̱ka̱a̱ní ta̱ Jesús ndee̱ ña̱ na̱túʼunra xa̱ʼa̱ tu̱ʼún va̱ʼa yóʼo ti̱xin u̱ni̱ ku̱i̱ya̱ sava (Mateo 9:35).
2. ¿Ndáaña ni̱na̱ʼa̱ milagro ña̱ ke̱ʼé ta̱ Jesús?
Ña̱ Biblia káʼa̱nña “mií Ndióxi̱ kúú ta̱ xi̱niñúʼu ta̱yóʼo ña̱ ke̱ʼéra milagro, ta ke̱ʼéra ña̱ʼa ña̱ nda̱kanda̱-inindó xíʼin” (Hechos 2:22). Tíxa̱ʼvi ña̱ ta̱xi Ndióxi̱ ndee̱ ndaʼa̱ ta̱ Jesús, ku̱chiñura sa̱yáara sa̱vi̱ kini, ta̱xira xi̱xi ku̱a̱ʼání na̱ yiví, sa̱ndáʼara na̱ xi̱kuumií kue̱ʼe̱ ta sa̱ndátakura sava na̱ ni̱xi̱ʼi̱ (Mateo 8:23-27; 14:15-21; Marcos 6:56; Lucas 7:11-17). Milagro ña̱ ke̱ʼé ta̱ Jesús ni̱na̱ʼa̱ káxiña ña̱ mií Ndióxi̱ kúú ta̱ chi̱ndaʼá miíra. Ta saátu milagro yóʼo ni̱na̱ʼa̱ña ña̱ kúúmií Jehová ndee̱ ña̱ ndasaviíra ndiʼi tu̱ndóʼo ña̱ kúúmiíyó.
3. ¿Ndáaña sákuaʼayó xíʼin ki̱ʼva ña̱ ni̱xi̱yo ta̱ Jesús?
Ta̱ Jesús ndiʼi tiempo xi̱niso̱ʼora ña̱ ni̱ka̱ʼa̱n Jehová xíʼinra (kaʼvi Juan 8:29). Nda̱kú ni̱xi̱yo inira xíʼin yivára nda̱a̱ tá ni̱xi̱ʼi̱ra ta ke̱ʼéra ndiʼi ña̱ ni̱ka̱ʼa̱nra xíʼinra ni ku̱a̱ʼána xi̱sasi nu̱úra ña̱ keʼéra ña̱yóʼo. Ni̱na̱ʼa̱ra ña̱ miíyó na̱ yiví kiviva keʼéyó ña̱ káʼa̱n Ndióxi̱ ni yáʼayó nu̱ú tu̱ndóʼo ña̱ ndeéní. Ta saátu ta̱ Jesús va̱ʼaní yichi̱ sa̱ndákoora nu̱úyó ña̱ va̱ʼa keʼéyó ndiʼi ña̱ ke̱ʼéra (1 Pedro 2:21).
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva na̱túʼun ta̱ Jesús xa̱ʼa̱ tu̱ʼun va̱ʼa ta saátu ndáa ki̱ʼva ke̱ʼéra milagro.
4. Ta̱ Jesús na̱túʼunra xa̱ʼa̱ tu̱ʼun va̱ʼa
Xíkaní ni̱xi̱ka ta̱ Jesús ña̱ va̱ʼa na̱túʼunra xíʼin na̱ yiví xa̱ʼa̱ tu̱ʼun va̱ʼa. Kaʼvindó Lucas 8:1 ta ka̱ʼa̱nndó xa̱ʼa̱ ña̱yóʼo:
-
¿Á na̱túʼun kuití ta̱ Jesús xíʼin na̱ yiví na̱ xi̱xa̱ʼa̱n nu̱úra ña̱ kuniso̱ʼona ña̱ káʼa̱nra?
-
¿Ndáaña xi̱niñúʼu keʼé ta̱ Jesús ña̱ va̱ʼa natúʼunra xíʼin na̱ yiví?
Ndióxi̱ ni̱ka̱ʼa̱nra ña̱ natúʼun ta̱ Mesías xa̱ʼa̱ tu̱ʼun va̱ʼa. Kaʼvindó Isaías 61:1, 2 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva sa̱xínu ta̱ Jesús profecía yóʼo?
-
¿Á ndákanixi̱níún ña̱ xíniñúʼu kuniso̱ʼo na̱ yiví na̱ ndóo tiempo vitin xa̱ʼa̱ tu̱ʼun va̱ʼa yóʼo?
5. Ndáyáʼviní ña̱ sa̱náʼa̱ ta̱ Jesús
Su̱ví nda̱saa tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ nísanáʼa̱ ta̱ Jesús, chi saátu sa̱náʼa̱ra miíyó ña̱ keʼéyó sava ña̱ ndáyáʼviní. Ná kotoyó sava ña̱ ni̱ka̱ʼa̱n ta̱ Jesús chí yuku̱. Kaʼvindó Mateo 6:14, 34 xíʼin 7:12, ta ka̱ʼa̱nndó xa̱ʼa̱ ña̱yóʼo:
-
¿Ndáa consejo va̱ʼaní ta̱xi ta̱ Jesús nu̱ú versículo yóʼo?
-
¿Á túviún ña̱ kivi chindeétáʼan consejo yóʼo xíʼin na̱ yiví tiempo vitin?
6. Ta̱ Jesús ke̱ʼéra milagro
Jehová ta̱xira ndee̱ ndaʼa̱ ta̱ Jesús ña̱ va̱ʼa ke̱ʼéra ku̱a̱ʼá milagro. Ña̱ va̱ʼa kunda̱a̱-inindó xa̱ʼa̱ ña̱yóʼo kaʼvindó Marcos 5:25-34 á kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱toyó nu̱ú video, ¿ndáaña xi̱kandíxaní ñaʼá ñá xi̱kuumií kue̱ʼe̱?
-
¿Ndáaña kúú ña̱ kútóokaún xa̱ʼa̱ milagro yóʼo?
Kaʼvindó Juan 5:36 ta ka̱ʼa̱nndó xa̱ʼa̱ ña̱yóʼo:
-
¿Ndáaña náʼa̱ milagro ña̱ ke̱ʼé ta̱ Jesús?
¿Á xa̱a̱ xíni̱ún xa̱ʼa̱ ña̱yóʼo?
Ndiʼi ña̱ xíni̱yó xa̱ʼa̱ ta̱ Jesús va̱xiña nu̱ú ku̱mi̱ libro ña̱ va̱xi nu̱ú Biblia ña̱ naní Evangelio. Ta̱ ka̱ʼyí ña̱yóʼo kúú ta̱ Mateo, ta̱ Marcos, ta̱ Lucas xíʼin ta̱ Juan ta xa̱a̱ síín síín ña̱ ni̱ka̱ʼa̱nna xa̱ʼa̱ ña̱ ke̱ʼé ta̱ Jesús. Ta ndiʼi ña̱ ka̱ʼyí na̱yóʼo va̱ʼaní kítáʼanña ta chíndeétáʼanña xíʼinyó ña̱ va̱ʼaní sakuaʼayó xa̱ʼa̱ ña̱ ke̱ʼé ta̱ Jesús.
-
TA̱ MATEO
kúú ta̱ nu̱ú ka̱ʼyí iin ña̱ Evangelio. Libro ña̱ ka̱ʼyíra káʼa̱nkaña xa̱ʼa̱ ña̱ sa̱náʼa̱ ta̱ Jesús tá kúú xa̱ʼa̱ Reino Ndióxi̱.
-
TA̱ MARCOS
kúú ta̱ ka̱ʼyí ña̱ Evangelio ña̱ loʼoka. Soo ka̱ʼyíra ña̱ʼa ña̱ ndákanda̱ní-iniyó xíʼin.
-
TA̱ LUCAS
káʼa̱nra xa̱ʼa̱ ña̱ ndáyáʼviní keʼéyó oración ta saátu káʼa̱nra xa̱ʼa̱ ña̱ va̱ʼaní ke̱ʼé ta̱ Jesús xíʼin ná ñaʼá.
-
TA̱ JUAN
ni̱ka̱ʼa̱nkara xa̱ʼa̱ ndáa ki̱ʼva íyo ini ta̱ Jesús, saáchi káʼa̱nkara xa̱ʼa̱ ña̱ na̱túʼun ta̱ Jesús xíʼin na̱ migora ta saátu xíʼin inkaka na̱ yiví.
ÑA̱ KÁʼA̱N SAVA NA̱ YIVÍ: “Ta̱ Jesús iin ta̱a va̱ʼa kuití xi̱kuura”.
-
¿Ndáaña ndákanixi̱ní miíún xa̱ʼa̱ ña̱yóʼo?
ÑA̱ XA̱A̱ SA̱KUAʼAYÓ
Ta̱ Jesús na̱túʼunra xa̱ʼa̱ Reino Ndióxi̱, ke̱ʼéra milagro ta ndiʼi tiempo xi̱niso̱ʼora ña̱ ni̱ka̱ʼa̱n Jehová.
Ná ndakaʼányó xa̱ʼa̱ ña̱yóʼo
-
¿Ndáa chiñu ña̱ ndáyáʼviníka ke̱ʼé ta̱ Jesús tá ni̱xi̱yora nu̱ú ñuʼú yóʼo?
-
¿Ndáaña ni̱na̱ʼa̱ milagro ña̱ ke̱ʼé ta̱ Jesús?
-
¿Ndáaña va̱ʼaní sa̱náʼa̱ ta̱ Jesús ña̱ kivi keʼéyó?
NANDUKÚKA XA̱ʼA̱ÑA
¿Ndáaña kúú ña̱ ndáyáʼvika na̱túʼun ta̱ Jesús xa̱ʼa̱?
“¿Nda̱chun ndáyáʼviní Reino Ndióxi̱ nu̱ú ta̱ Jesús?” (La Atalaya, 1 tí octubre ku̱i̱ya̱ 2014)
Koto nda̱chun ndixa ku̱u milagro ña̱ ke̱ʼé ta̱ Jesús.
Kaʼvi xa̱ʼa̱ ndáa ki̱ʼva na̱sama iin ta̱a tá sa̱kuaʼara ña̱ va̱ása níxindi̱ʼi̱-ini ta̱ Jesús xa̱ʼa̱ iinlá miíra.
“Iinlá xa̱ʼa̱ miíi̱ xi̱ndi̱ʼi̱-inii̱” (La Atalaya, 1 tí octubre ku̱i̱ya̱ 2014)
Koto ndáa ki̱ʼva yiku̱n ni̱xi̱yo ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo.
“Tá ni̱xi̱yo ta̱ Jesús nu̱ú ñuʼú” (Ña̱ táxi yichi̱ nu̱úyó ña̱ va̱ʼa sakuaʼakayó xa̱ʼa Biblia 4)
a Nu̱ú lección 31 xíʼin 33 káʼa̱nkaña xa̱ʼa̱ ndáaña kúú Reino Ndióxi̱.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
