LECCIÓN 17
¿Ndáa ki̱ʼva íyo ta̱ Jesús?
Tá ná sakuaʼakayó xa̱ʼa̱ ña̱ ke̱ʼé ta̱ Jesús ta saátu ña̱ ni̱ka̱ʼa̱nra tá ni̱xi̱yora nu̱ú ñuʼú yóʼo, kunda̱a̱ka-iniyó xa̱ʼa̱ ña̱ va̱ʼa ña̱ kúúmiíra ña̱ sákuyatinka miíyó nu̱úra ta saátu nu̱ú yivára Jehová. ¿Ndáaña kúú sava ña̱ va̱ʼa ña̱ kúúmiíra? Ta, ¿ndáa ki̱ʼva kivi keʼéyó táʼan ña̱ va̱ʼa ke̱ʼé ta̱ Jesús?
1. ¿Ndáa ki̱ʼva náʼa̱ ta̱ Jesús ña̱ va̱ʼa ña̱ kúúmií yivára?
Xa̱a̱ ku̱a̱ʼání ku̱i̱ya̱ íyo ta̱ Jesús chí ndiví ta xítora ña̱ va̱ʼaní íyo ini yivára ta sákuaʼara xíʼin ña̱ kéʼéra. Xa̱ʼa̱ ña̱kán ndákanixi̱níra ta kéʼéra nda̱a̱ táki̱ʼva kéʼé yivára (kaʼvi Juan 5:19). Xa̱ʼa̱ ña̱ va̱ʼaní náʼa̱ ta̱ Jesús ña̱ va̱ʼa ña̱ kúúmií yivára ni̱ka̱ʼa̱nra ña̱yóʼo: “Na̱ xa̱a̱ xi̱ni yi̱ʼi̱ xa̱a̱ xi̱nituna yivái̱” (Juan 14:9). Tá xíni̱ va̱ʼún ta̱ Jesús, xa̱ún kuxini̱ va̱ʼún Jehová. Tá kúú ta̱ Jesús ku̱ndáʼvi-inira xi̱nira na̱ yiví, ña̱yóʼo náʼa̱ña ña̱ kúndáʼvi-ini Jehová xínira yóʼó.
2. ¿Ndáa ki̱ʼva ni̱na̱ʼa̱ ta̱ Jesús ña̱ kúʼvi̱-inira xínira yivára?
Ta̱ Jesús ni̱ka̱ʼa̱nra: “Soo ña̱ va̱ʼa ná kunda̱a̱-ini na̱ ñuyǐví ña̱ kúʼvi̱-inii̱ xínii̱ yivái̱, kéʼíi̱ nda̱a̱ táki̱ʼva íyo chiñu ña̱ xa̱ʼndara nu̱úi̱” (Juan 14:31). Tá ni̱xi̱yo ta̱ Jesús nu̱ú ñuʼú yóʼo ni̱na̱ʼa̱ra ña̱ kúʼvi̱ní-inira xínira yivára, saáchi xi̱niso̱ʼora ña̱ ni̱ka̱ʼa̱nra xíʼinra ni ni̱ya̱ʼara nu̱ú tu̱ndóʼo ña̱ ndeéní. Ta saátu xi̱kutóoníra natúʼunra xa̱ʼa̱ yivára xíʼin ña̱ chindeétáʼanra xíʼin inkana ña̱ va̱ʼa xa̱a̱na koona migo Ndióxi̱ (Juan 14:23).
3. ¿Ndáa ki̱ʼva ni̱na̱ʼa̱ ta̱ Jesús ña̱ kúʼvi̱-inira xínira na̱ yiví?
Ña̱ Biblia káʼa̱nña, ña̱ kúʼvi̱ní-ini ta̱ Jesús xínira na̱ yiví (Proverbios 8:31). Ni̱na̱ʼa̱ra ña̱ kúʼvi̱-inira xínira na̱ yiví tá chi̱ndeétáʼanra xíʼinna, soo va̱ása níxi̱ndatura ña̱ ná keʼéna iin ña̱ʼa xa̱ʼa̱ra. Ke̱ʼéra milagro ña̱ va̱ʼa na̱ʼa̱ra ña̱ kúndáʼvi-inira xínira na̱ yiví, ta su̱ví ña̱ na̱ʼa̱ kuitíra ndee̱ ña̱ kúúmiíra (Marcos 1:40-42). Va̱ʼaní ni̱xi̱yo inira ta inkáchi xi̱keʼéra xíʼin ndiʼi na̱ yiví ta xíʼin ña̱ xi̱ka̱ʼa̱nra xi̱sandíkora-inina, ta saátu xi̱ka̱ʼa̱nra xíʼinna ña̱ ndátuna ndakiʼinna iin ña̱ va̱ʼa chí nu̱únínu, nda̱a̱ ni̱xi̱yo tu̱ʼvara ña̱ ni̱xo̱ʼvi̱ra ta saátu ña̱ ni̱xi̱ʼi̱ra xa̱ʼa̱ ña̱ xi̱kuʼvi̱-inira xi̱xinira ndiʼi na̱ yiví, soo kúʼvi̱níka-inira xínira na̱ ndíku̱n ña̱ sa̱náʼa̱ra (kaʼvi Juan 15:13, 14).
NÁ SAKUAʼAKAYÓ XA̱ʼA̱ÑA
Ná kunda̱a̱ va̱ʼaka iniyó ndáa ki̱ʼva íyo ini ta̱ Jesús ta saátu kotoyó ndáa ki̱ʼva kundiku̱nyó yichi̱ra ña̱ kúʼvi̱-inira xínira na̱ yiví ta saátu ña̱ va̱ʼa-inira.
4. Ta̱ Jesús kúʼvi̱ní-inira xínira yivára
Xíʼin ña̱ ke̱ʼé ta̱ Jesús sa̱náʼa̱ra miíyó ndáa ki̱ʼva na̱ʼa̱yó ña̱ kúʼvi̱-iniyó xíniyó Ndióxi̱. Kaʼvindó Lucas 6:12 ta saátu Juan 15:10 xíʼin 17:26. Tándi̱ʼi ka̱ʼvindó iin tá iin texto yóʼo ka̱ʼa̱nndó xa̱ʼa̱ ña̱yóʼo:
-
Tá sákuaʼayó xíʼin ña̱ ke̱ʼé ta̱ Jesús, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó Jehová?
Ta̱ Jesús xi̱kuʼvi̱-inira xínira yivára ta xi̱ka̱ʼa̱nra xíʼinra ndiʼi tiempo.
5. Ta̱ Jesús ndíʼi̱-inira xa̱ʼa̱ na̱ kúma̱ní ña̱ʼa nu̱ú
Ta̱ Jesús xi̱ndi̱ʼi̱ka-inira xa̱ʼa̱ na̱ yiví nu̱úka ña̱ kundi̱ʼi̱-inira xa̱ʼa̱ miíra. Ni xi̱kunaáníra soo ni saá xi̱niñúʼura tiempora xíʼin ndee̱ra ña̱ va̱ʼa chi̱ndeétáʼanra xíʼin inkana. Kaʼvindó Marcos 6:30-44 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káchi ña̱ relato yóʼo, ¿ndáa ki̱ʼva ni̱na̱ʼa̱ ta̱ Jesús ña̱ xi̱ndi̱ʼi̱-inira xa̱ʼa̱ inkana? (Kotondó versículo 31, 34, 41 xíʼin 42).
-
¿Nda̱chun chi̱ndeétáʼan ta̱ Jesús xíʼin na̱ yiví kán? (Kotondó versículo 34).
-
Xa̱ʼa̱ ña̱ náʼa̱ ta̱ Jesús ndáa ki̱ʼva íyo yivára, ¿ndáaña sánáʼa̱ ña̱yóʼo miíún xa̱ʼa̱ Jehová?
-
¿Ndáa ki̱ʼva kivi na̱ʼa̱yó ña̱ ndíʼi̱-iniyó xa̱ʼa̱ inkana nda̱a̱ táki̱ʼva ke̱ʼé ta̱ Jesús?
6. Ta̱ Jesús va̱ʼaní-inira
Ta̱ Jesús va̱ʼa ni̱xi̱yo inira ni va̱ása ku̱a̱ʼá ña̱ʼa níxikuumiíra, ta káʼa̱nra xíʼinyó ña̱ saá ná keʼéyó. Kaʼvindó Hechos 20:35 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva íyo ña̱ ni̱ka̱ʼa̱n ta̱ Jesús, ¿ndáaña sákusi̱í-ini miíyó?
Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva taxiyó ña̱ʼa ndaʼa̱ inkana ni kǒo ku̱a̱ʼá ña̱ʼa kúúmiíyó?
¿Á xa̱a̱ xíni̱ún xa̱ʼa̱ ña̱yóʼo?
Ña̱ Biblia sánáʼa̱ña ña̱ xíniñúʼu kuniñúʼuyó ki̱vi̱ ta̱ Jesús tá kéʼéyó oración nu̱ú Jehová (kaʼvindó Juan 16:23, 24). Saá náʼa̱yó ña̱ ndáyáʼviní ña̱ ke̱ʼé ta̱ Jesús nu̱úyó ña̱ va̱ʼa xa̱a̱yó kooyó migo Jehová.
ÑA̱ KÁʼA̱N SAVA NA̱ YIVÍ: “Va̱ása ndíʼi̱ví-ini Ndióxi̱ xa̱ʼa̱ na̱ yiví tá ndóʼona tu̱ndóʼo”.
-
Xa̱ʼa̱ ña̱ náʼa̱ ta̱ Jesús ndáa ki̱ʼva íyo ini yivára, ¿ndáa ki̱ʼva náʼa̱ ña̱ ke̱ʼéra ña̱ ndáyáʼviyó nu̱ú Jehová?
ÑA̱ XA̱A̱ SA̱KUAʼAYÓ
Ta̱ Jesús kúʼvi̱-inira xínira Jehová ta saátu kúʼvi̱-inira xínira na̱ yiví. Xa̱ʼa̱ ña̱ va̱ʼaní íyo inira nda̱a̱ táki̱ʼva íyo ini yivára, tá ná kunda̱a̱ka-iniún xa̱ʼa̱ ta̱ Jesús, va̱ʼaníka kuxini̱ún Jehová.
Ná ndakaʼányó xa̱ʼa̱ ña̱yóʼo
-
Tá ná kundiku̱nyó yichi̱ ta̱ Jesús, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó Jehová?
-
Tá ná kundiku̱nyó yichi̱ ta̱ Jesús, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó na̱ yiví?
-
¿Ndáaña ke̱ʼé ta̱ Jesús kúú ña̱ kútóokaún?
NANDUKÚKA XA̱ʼA̱ÑA
Koto sava ña̱ va̱ʼa ña̱ kúúmií ta̱ Jesús ña̱ kivi keʼéyó.
“Ná kundiku̱nyó yichi̱ ta̱ Jesús” (Jesús: el camino, la verdad y la vida, página 317)
Koto nda̱chun ndáyáʼviní ña̱ kuniñúʼuyó ki̱vi̱ ta̱ Jesús tá kéʼéyó oración.
¿Á káʼa̱n ña̱ Biblia ndáa ki̱ʼva xi̱na̱ʼa̱ ta̱ Jesús?
“¿Ndáa ki̱ʼva xi̱na̱ʼa̱ ta̱ Jesús?” (Artículo ña̱ va̱xi nu̱ú jw.org)
¿Ndáaña sákuaʼayó xíʼin ña̱ viíní xi̱keʼé ta̱ Jesús xíʼin ná ñaʼá?
“Ndióxi̱ íxato̱ʼóra ná ñaʼá ta ndáyáʼviná nu̱úra” (La Atalaya, 1 tí septiembre ku̱i̱ya̱ 2012)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
