LECCIÓN 20
¿Ndáa ki̱ʼva viíní íyo ña̱ congregación?
Jehová viíní kútóora keʼéra ndiʼi ña̱ʼa (1 Corintios 14:33). Xa̱ʼa̱ ña̱kán vií xíniñúʼu koo ña̱ kéʼé na̱ ñuura. ¿Ndáa ki̱ʼva vií íyo ña̱ congregación? ¿Ndáaña kivi keʼéyó ña̱ va̱ʼa vií kana ndiʼi chiñu?
1. ¿Ndáana níʼi yichi̱ nu̱ú na̱ congregación?
Ta̱ Cristo kúú ta̱ níʼi “yichi̱ nu̱ú ña̱ congregación” (Efesios 5:23). Ta̱ Jesús íyora chí ndiví ta kíʼinra kuenta xíʼin ndiʼi ña̱ kéʼé na̱ ñuu Jehová na̱ íyo iníísaá ñuyǐví. Ta saátu ta̱xira chiñu ndaʼa̱ ta̱ “esclavo ta̱ nda̱kúní-ini ta̱ ndíchiní”, na̱yóʼo kúú iin tiʼvi loʼo na̱ anciano na̱ xa̱a̱ ku̱a̱ʼání ku̱i̱ya̱ káchíñu nu̱ú Ndióxi̱ ta saátu nanína Cuerpo Gobernante (kaʼvi Mateo 24:45-47). Nda̱a̱ táki̱ʼva xi̱keʼé na̱ apóstol xíʼin na̱ anciano na̱ ni̱xi̱yo chí ñuu Jerusalén tá siglo nu̱ú, saátu kéʼé na̱ Cuerpo Gobernante chi káʼa̱nna xíʼin na̱ congregación na̱ íyo iníísaá ñuyǐví ndáaña keʼéna (Hechos 15:2). Soo su̱ví na̱yóʼo kúú na̱ níʼi yichi̱ nu̱ú na̱ ñuu Jehová, chi ña̱ kéʼéna kúú ña̱ káʼvina Biblia ña̱ va̱ʼa kunda̱a̱-inina ndáaña kúni̱ Jehová ná keʼéna ta saátu kéʼéna ña̱ káʼa̱n ta̱ Jesús.
2. ¿Ndáa chiñu kúú ña̱ kéʼé na̱ anciano?
Na̱ anciano na̱ xa̱a̱ xu̱xa-ini xíʼin tu̱ʼun Ndióxi̱ xíniñúʼuna Biblia ña̱ sanáʼa̱na na̱ congregación, ta saátu chíndeétáʼanna xíʼinna ta chíka̱a̱na ndee̱ xíʼinna. Ta na̱yóʼo kǒo xu̱ʼún kíʼinna xa̱ʼa̱ chiñu ña̱ kéʼéna. Chi na̱yóʼo xíʼin ndinuʼu-inina kéʼénaña nu̱ú Ndióxi̱, ta ni va̱ása kéʼénaña xa̱ʼa̱ ña̱ kútóonína kuumiína ku̱a̱ʼání ña̱ʼa, chi xíʼin ña̱ si̱í-ini kéʼénaña (1 Pedro 5:1, 2). Ta na̱ chíndeétáʼan xíʼin na̱ anciano kúú na̱ siervo ministerial, soo tá yáʼa tiempo saátu na̱yóʼo kivi xa̱a̱na koona anciano.
Na̱ Cuerpo Gobernante kúú na̱ ndáka̱xin sava na̱ anciano ña̱ va̱ʼa xa̱a̱na koona superintendente ña̱ circuito. Ta na̱ hermano yóʼo xáʼa̱nna xítona ku̱a̱ʼá congregación ta káʼa̱nna xíʼinna ndáaña keʼéna, ta saátu chíka̱a̱na ndee̱ xíʼinna. Ta saátu ndáka̱xinna na̱ koo anciano xíʼin siervo ministerial, ta ndíku̱nna ña̱ káʼa̱n ña̱ Biblia ña̱ va̱ʼa keʼéna ña̱yóʼo (1 Timoteo 3:1-10, 12; Tito 1:5-9).
3. ¿Ndáa chiñu kúú ña̱ kéʼé iin tá iin na̱ testigo?
Ndiʼi na̱ congregación “ndásakáʼnuna ki̱vi̱ Jehová” tá táxina comentario ti̱xin reunión. Ta saátu kéʼéna ña̱yóʼo tá chíka̱a̱na ndee̱ ña̱ natúʼunna xíʼin na̱ yiví xa̱ʼa̱ Ndióxi̱ (kaʼvi Salmo 148:12, 13).
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva níʼi ta̱ Jesús yichi̱ nu̱úyó, ta ndáa ki̱ʼva ndíku̱n na̱ anciano yichi̱ra, ta saátu ndáa ki̱ʼva inkáchi kachíñuyó xíʼinna.
4. Ta̱ Jesús va̱ʼaní níʼira yichi̱ nu̱úyó saáchi sándi̱kora-iniyó
Ta̱ Jesús káʼa̱nra xíʼinyó ña̱ ná keʼéyó ña̱ káʼa̱nra. Kaʼvindó Mateo 11:28-30 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva níʼi ta̱ Jesús yichi̱ nu̱úyó? Ta, ¿ndáa ki̱ʼva kúni̱ra ña̱ ná kuniyó?
¿Ndáa ki̱ʼva ndíku̱n na̱ anciano yichi̱ ta̱ Jesús? Kotondó VIDEO.
Ña̱ Biblia káʼa̱n káxiña ndáa ki̱ʼva xíniñúʼu keʼé na̱ anciano chiñuna.
Kaʼvindó Isaías 32:2 xíʼin 1 Pedro 5:1-3, ta ka̱ʼa̱nndó xa̱ʼa̱ ña̱yóʼo:
-
Ta̱ Jesús xi̱sandíkora-ini inkana, ¿ndáaña ndóʼún tá kúnda̱a̱-iniún ña̱ ki̱ʼva saá kéʼétu na̱ anciano?
-
¿Ndáa inka ki̱ʼva ndíku̱n na̱ anciano yichi̱ ta̱ Jesús?
5. Na̱ anciano kéʼéna nda̱a̱ táki̱ʼva íyo ña̱ sánáʼa̱na
¿Ndáa ki̱ʼva kúni̱ ta̱ Jesús ña̱ ná ndakanixi̱ní na̱ anciano xa̱ʼa̱ chiñu ña̱ kúúmiína? Kotondó VIDEO.
Ta̱ Jesús káxiní ni̱ka̱ʼa̱nra ndáaña xíniñúʼu keʼé na̱ hermano na̱ kúúmií iin chiñu ti̱xin ña̱ congregación. Kaʼvindó Mateo 23:8-12 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva káʼa̱n ña̱ Biblia ña̱ xíniñúʼu keʼé na̱ anciano? ¿Á kéʼé na̱ su̱tu̱ xíʼin inka na̱ níʼi yichi̱ nu̱ú na̱ veʼe-ñu̱ʼu ña̱yóʼo?
-
Na̱ anciano íxandakúna ña̱ kítáʼanna xíʼin Jehová ta chíndeétáʼanna xíʼin na̱ veʼena ña̱ saá ná keʼéna.
-
Na̱ anciano ndíʼi̱-inina xa̱ʼa̱ ndiʼi na̱ ñúʼu ti̱xin congregación.
-
Na̱ anciano chi̱tun nátúʼunna xíʼin na̱ yiví xa̱ʼa̱ tu̱ʼun Ndióxi̱.
-
Na̱ anciano sánáʼa̱na. Ta saátu chíndeétáʼanna ña̱ ndatiʼvína á keʼéna inkaka chiñu.
6. Inkáchi chíndeétáʼanndi̱ xíʼin na̱ anciano
Ña̱ Biblia káʼa̱nña nda̱chun inkáchi xíniñúʼu kachíñuyó xíʼin na̱ anciano. Kaʼvindó Hebreos 13:17 ta ka̱ʼa̱nndó xa̱ʼa̱ ña̱yóʼo:
-
¿Nda̱chun káʼa̱n ña̱ Biblia ña̱ xíniñúʼu kuniso̱ʼoyó ña̱ káʼa̱n na̱ kúúmií chiñu ti̱xin ña̱ congregación? ¿Nda̱chun iin ña̱ va̱ʼaní kúú ña̱ keʼéyó ña̱yóʼo?
Kaʼvindó Lucas 16:10 ta ka̱ʼa̱nndó xa̱ʼa̱ ña̱yóʼo:
-
¿Nda̱chun ndáyáʼviní chindeétáʼanyó xíʼin na̱ anciano ni iin chiñu loʼo kúú ña̱yóʼo?
ÑA̱ KÁʼA̱N SAVA NA̱ YIVÍ: “Va̱ása xíniñúʼuví kutáʼanyó xíʼin iin religión”.
-
¿Nda̱chun iin ña̱ va̱ʼaní kúú ña̱ kutáʼanyó xíʼin iin na̱ congregación ña̱ ndasakáʼnuyó Ndióxi̱?
ÑA̱ XA̱A̱ SA̱KUAʼAYÓ
Ta̱ Jesús kúú ta̱ níʼi yichi̱ nu̱ú na̱ congregación. Ta na̱ anciano xíniso̱ʼona ña̱ káʼa̱nra ta saátu miíyó chíndeétáʼanyó xíʼinna saáchi ndáana miíyó ta chínúuna iin yichi̱ va̱ʼa nu̱úyó.
Ná ndakaʼányó xa̱ʼa̱ ña̱yóʼo
-
¿Ndáana kúú na̱ níʼi yichi̱ nu̱ú na̱ congregación?
-
¿Ndáa ki̱ʼva chíndeétáʼan na̱ anciano xíʼin na̱ congregación?
-
¿Ndáa chiñu kúú ña̱ kéʼé iin tá iin na̱ káchíñu nu̱ú Jehová?
NANDUKÚKA XA̱ʼA̱ÑA
Koto ña̱ náʼa̱ ña̱ ndíʼi̱ní-ini na̱ Cuerpo Gobernante xíʼin na̱ anciano xa̱ʼa̱ na̱ hermano.
Ndásandakúna-ini na̱ hermano tá íyo na̱ íxandi̱va̱ʼa xíʼinna (4:22)
Koto ndáa chiñu kúú ña̱ kéʼé na̱ superintendente ña̱ circuito.
Ña̱ kéʼé iin na̱ superintendente ña̱ circuito iin ñuu ña̱ xíkaní kíndo̱o (4:51)
Kaʼvi ndáa chiñu kúú ña̱ kúúmií ná ñaʼá ti̱xin ña̱ congregación.
“¿Á sánáʼa̱ ná ñaʼá ná kúú testigo Jehová?” (La Atalaya, 1 tí septiembre ku̱i̱ya̱ 2012)
Koto ndáaña kéʼé na̱ anciano ña̱ va̱ʼa chika̱a̱na ndee̱ xíʼin na̱ hermano.
“Na̱ anciano chíndeétáʼanna xíʼinyó ña̱ va̱ʼa kusi̱í-iniyó” (La Atalaya, 15 tí enero ku̱i̱ya̱ 2013)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
