LECCIÓN 21
¿Ndáa ki̱ʼva nátúʼunna xa̱ʼa̱ tu̱ʼun va̱ʼa?
Ndáa si̱lóʼo kúma̱ní ta Jehová kuniñúʼura Reinora ña̱ va̱ʼa sandíʼi-xa̱ʼa̱ra ndiʼi tu̱ndóʼo ña̱ kúúmií na̱ yiví. Xa̱ʼa̱ ña̱kán kúni̱yó ña̱ ná kunda̱a̱-ini inkana xa̱ʼa̱ ña̱yóʼo, ta̱ Jesús xi̱kuni̱ra ña̱ na̱ xi̱ndiku̱n miíra ná natúʼunna xa̱ʼa̱ ña̱yóʼo xíʼin ndiʼi na̱ yiví (Mateo 28:19, 20). ¿Ndáaña xa̱a̱ kéʼé na̱ testigo Jehová ña̱ va̱ʼa saxínuna chiñu ña̱ xa̱ʼnda ta̱ Jesús?
1. ¿Ndáa ki̱ʼva xínu Mateo 24:14 tiempo vitin?
Ta̱ Jesús ni̱ka̱ʼa̱nra: “Natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú” (Mateo 24:14). Ndi̱ʼi̱ na̱ testigo Jehová kútóoníndi̱ keʼéndi̱ chiñu ña̱ ndáyáʼviní yóʼo. Nátúʼunndi̱ xa̱ʼa̱ tu̱ʼun va̱ʼa iníísaá nu̱ú ñuyǐví yáʼaka 1,000 tu̱ʼun. Xíniñúʼu chika̱a̱nína ndee̱ ta saátu ña̱ viíní keʼéna chiñu ña̱ káʼnuní yóʼo, va̱ása kuchiñuvína keʼénaña tá ná kǒo chindeétáʼan Jehová xíʼinna.
2. ¿Ndáaña kéʼéyó ña̱ va̱ʼa natúʼunyó xíʼin na̱ yiví?
Nátúʼunyó xa̱ʼa̱ tu̱ʼun Ndióxi̱ nda̱a̱ ndáaka nu̱ú íyo na̱ yiví. Ta nda̱a̱ táki̱ʼva xi̱keʼé na̱ cristiano na̱ ni̱xi̱yo tá siglo nu̱ú nátúʼunyó “veʼe tá veʼe” (Hechos 5:42). Ta ki̱ʼva siaʼa kúú ña̱ nátúʼunndi̱ xíʼin ku̱a̱ʼání na̱ yiví ku̱i̱ya̱ tá ku̱i̱ya̱. Soo xa̱ʼa̱ ña̱ kǒo na̱ yiví ndóo veʼena, saátu nátúʼunndi̱ xíʼinna nu̱ú xíka ku̱a̱ʼá na̱ yiví. Ndiʼi tiempo ndúkúndi̱ ki̱ʼva ña̱ natúʼunndi̱ xa̱ʼa̱ Jehová ta saátu ña̱ ndákanixi̱níra keʼéra.
3. ¿Ndáana kúú na̱ xíniñúʼu natúʼun xa̱ʼa̱ tu̱ʼun va̱ʼa?
Ndiʼi na̱ ndásakáʼnu Ndióxi̱ xíniñúʼu natúʼunna xa̱ʼa̱ tu̱ʼun va̱ʼa. Ndi̱ʼi̱ ndáyáʼviní chiñu yóʼo nu̱úndi̱. Chíka̱a̱níndi̱ ndee̱ ña̱ natúʼunndi̱ xíʼin na̱ yiví saáchi kúnda̱a̱-inindi̱ ña̱yóʼo sakákuñana (kaʼvi 1 Timoteo 4:16). Nda̱a̱ ni iinna kǒo cháʼvi ndi̱ʼi̱ ña̱ kéʼéndi̱ chiñu yóʼo, saáchi ña̱ Biblia káchiña: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mateo 10:7, 8). Ni su̱ví ndiʼiví na̱ yiví xíniso̱ʼo ña̱ nátúʼunndi̱, ndákundeéndi̱ nátúʼunndi̱ xíʼinna saáchi ña̱yóʼo kúú iin ki̱ʼva ña̱ ndásakáʼnundi̱ Jehová ta saátu ña̱ sákusi̱índi̱-inira.
NÁ SAKUAʼAKAYÓ XA̱ʼA̱ÑA
Ná kotoyó ndiʼi ña̱ kéʼé na̱ testigo Jehová ña̱ va̱ʼa natúʼunna iníísaá ñuyǐví ta saátu ndáa ki̱ʼva chíndeétáʼan Jehová xíʼinndi̱.
Nátúʼunndi̱ xíʼin na̱ yiví iníísaá ñuyǐví: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Chíka̱a̱ndi̱ ndee̱ ña̱ natúʼunndi̱ xíʼin ndiʼi na̱ yiví
Ndi̱ʼi̱ na̱ testigo Jehová chíka̱a̱ndi̱ ndee̱ ña̱ natúʼunndi̱ xíʼin na̱ yiví ni nda̱a̱ ndáaka nu̱ú ndóona. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña kúú ña̱ kútóokaún ña̱ kéʼéndi̱ na̱ testigo Jehová ña̱ va̱ʼa natúʼunndi̱ xíʼin na̱ yiví xa̱ʼa̱ Ndióxi̱?
Kaʼvindó Mateo 22:39 xíʼin Romanos 10:13-15, ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva náʼa̱ ña̱ nátúʼunndi̱ xa̱ʼa̱ Ndióxi̱ xíʼin na̱ yiví ña̱ kúʼvi̱-inindi̱ xínindi̱na?
-
¿Ndáa ki̱ʼva xíto Jehová na̱ nátúʼun xa̱ʼa̱ tu̱ʼun va̱ʼa? (Kotondó versículo 15).
5. Inkáchi káchíñundi̱ xíʼin Ndióxi̱
Ku̱a̱ʼání ña̱ náʼa̱ ña̱ mií Jehová kúú ta̱ chíndeétáʼan xíʼinndi̱ ña̱ va̱ʼa natúʼunndi̱ xíʼin na̱ yiví. Ná kotoyó ña̱ ku̱u chí Nueva Zelanda. Iin xi̱kuá iin ta̱ kúú testigo ta̱ nani Paul ni̱xa̱ʼa̱nra na̱túʼunra veʼe tá veʼe ta nda̱ni̱ʼíra iin ñá nána. Mií xi̱ta̱a̱n ki̱vi̱ saá ke̱ʼéñá iin oración ta xi̱niñúʼuñá ki̱vi̱ Ndióxi̱ Jehová, ta ni̱ka̱ʼa̱nñá xíʼinra ña̱ iinna ná chindeétáʼan xíʼinñá ña̱ kuxini̱ñára. Ta̱ Paul káchira: “Tá ni̱ya̱ʼa u̱ni̱ hora ni̱xa̱ʼi̱n ka̱nindaʼíi̱ yéʼéñá”.
Kaʼvindó 1 Corintios 3:9 ta káʼa̱nndó xa̱ʼa̱ ña̱yóʼo:
-
¿Ndáa ki̱ʼva náʼa̱ ña̱yóʼo ña̱ mií Jehová kúú ta̱ chíndeétáʼan xíʼinyó ña̱ va̱ʼa natúʼunyó xíʼin na̱ yiví?
Kaʼvindó Hechos 1:8 ta káʼa̱nndó xa̱ʼa̱ ña̱yóʼo:
-
¿Nda̱chun xíniñúʼuyó ña̱ chindeétáʼan Jehová xíʼinyó ña̱ natúʼunyó xíʼin na̱ yiví?
¿Á xa̱a̱ xíni̱ún xa̱ʼa̱ ña̱yóʼo?
Ti̱xin reunión ña̱ xíyo ma̱ʼñú semana ndiʼi yichi̱ sánáʼa̱na ndi̱ʼi̱ ndáa ki̱ʼva natúʼunndi̱ xíʼin na̱ yiví. Tá xa̱a̱ ni̱xa̱ʼún iin reunión yóʼo, ¿ndáaña túviún xa̱ʼa̱ ña̱ sánáʼa̱na ndi̱ʼi̱?
6. Tá nátúʼunyó xíʼin na̱ yiví kéʼéyó ña̱ ni̱ka̱ʼa̱n Ndióxi̱
Tá siglo nu̱ú na̱ xi̱sa̱a̱-ini xi̱xini na̱ xi̱ndiku̱n ta̱ Jesús xi̱kuni̱na kasina nu̱úna tasaá va̱ása natúʼunkana xíʼin na̱ yiví. Na̱ nu̱ú xi̱kuu cristiano xi̱chika̱a̱na ndee̱ ña̱ natúʼunna xíʼin na̱ yiví xa̱ʼa̱ tu̱ʼun va̱ʼa “nda̱a̱ táki̱ʼva káʼa̱n ley ña̱ va̱ʼa kǒo ni iin ña̱ʼa kivi kasi nu̱ú ña̱yóʼo” (Filipenses 1:7). Tiempo vitin saátu íyo ña̱ kéʼé na̱ testigo Jehová. a
Kaʼvindó Hechos 5:27-42 ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ása sandákoondi̱ natúʼunndi̱ xíʼin na̱ yiví? (Kotondó versículo 29, 38 xíʼin 39).
ÑA̱ NDÁKA̱TU̱ʼUN SAVA NA̱ YIVÍ: “¿Nda̱chun kúú ña̱ ku̱a̱ʼa̱n na̱ testigo Jehová veʼe tá veʼe?”.
-
¿Ndáaña ndakuiún?
ÑA̱ XA̱A̱ SA̱KUAʼAYÓ
Ta̱ Jesús xa̱ʼndara chiñu nu̱ú na̱ xi̱ndiku̱n miíra ña̱ ná natúʼunna xa̱ʼa̱ tu̱ʼun va̱ʼa iníísaá ñuyǐví. Jehová chíndeétáʼanra xíʼin na̱ ñuura ña̱ va̱ʼa keʼéna chiñu yóʼo.
Ná ndakaʼányó xa̱ʼa̱ ña̱yóʼo
-
¿Ndáaña xa̱a̱ kéʼéna ña̱ va̱ʼa natúʼunna xa̱ʼa̱ tu̱ʼun va̱ʼa iníísaá nu̱ú ñuʼú?
-
¿Ndáa ki̱ʼva náʼa̱ ña̱ xíkayó nátúʼunyó xíʼin na̱ yiví xa̱ʼa̱ Ndióxi̱ ña̱ kúʼvi̱-iniyó xíniyóna?
-
¿Á ndákanixi̱níún ña̱ nátúʼunyó xíʼin na̱ yiví kivi taxiña si̱í koo iniyó? ¿Nda̱chun?
NANDUKÚKA XA̱ʼA̱ÑA
Koto ndáa ki̱ʼva nátúʼun na̱ testigo Jehová ñuu náʼnu.
¿Ndáa ki̱ʼva nátúʼun na̱ testigo Jehová xíʼin na̱ yiví na̱ ke̱e inka ñuu?
Sándi̱koyó-ini na̱ ke̱e inka ñuu xíʼin tu̱ʼun Ndióxi̱ (5:59)
Koto ndáa ki̱ʼva íyo ña̱ kéʼé iin ñá nátúʼun xa̱ʼa̱ Ndióxi̱ ndiʼi tiempo.
Kunda̱a̱-ini xa̱ʼa̱ ku̱a̱chi ña̱ ku̱chiñuna nu̱ú na̱ chíñu ña̱ va̱ʼa natúʼunkana xa̱ʼa̱ tu̱ʼun va̱ʼa.
a Ndióxi̱ kúú ta̱ xáʼndachíñu nu̱úyó ña̱ natúʼunyó xíʼin na̱ yiví. Xa̱ʼa̱ ña̱kán na̱ testigo Jehová va̱ása ndúkúna permiso nu̱ú na̱ chíñu ña̱ va̱ʼa natúʼunna xa̱ʼa̱ tu̱ʼun va̱ʼa xíʼin na̱ yiví.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
