LECCIÓN 22
¿Ndáa ki̱ʼva natúʼún xíʼin inkana xa̱ʼa̱ tu̱ʼun va̱ʼa?
Tá xa̱a̱ kúnda̱a̱-iniún xa̱ʼa̱ ña̱ nda̱a̱ ña̱ va̱xi nu̱ú Biblia sana ndákanixi̱níún: “Ndiʼi na̱ yiví xíniñúʼu kunda̱a̱-inina xa̱ʼa̱ ña̱yóʼo”. Va̱ʼava ndákanixi̱níún saáchi ndiʼi na̱ yiví xíniñúʼu kunda̱a̱-inina xa̱ʼa̱ ña̱yóʼo. Sana yíʼviún tá ndákanixi̱níún ña̱ natúʼún xíʼin inkana xa̱ʼa̱ ña̱ sákuaʼún. Ná kotoyó ndáaña kivi keʼún ña̱ va̱ása yi̱ʼvíún tasaá kutóún kixáʼún ka̱ʼún xíʼin inkana xa̱ʼa̱ tu̱ʼun va̱ʼa ña̱ va̱xi nu̱ú Biblia.
1. ¿Ndáa ki̱ʼva natúʼún xíʼin na̱ xíni̱ún xa̱ʼa̱ ña̱ sákuaʼún?
Na̱ discípulo ta̱ Jesús ni̱ka̱ʼa̱nna: “Kǒo kívi sandákoondi̱ ka̱ʼa̱nndi̱ xa̱ʼa̱ ña̱ʼa ña̱ xi̱nindi̱ xíʼin ña̱ xi̱niso̱ʼondi̱” (Hechos 4:20). Saáchi xi̱ndayáʼviní ña̱ nda̱a̱ nu̱úna ta xi̱kuni̱na natúʼunna xíʼin ndiʼina xa̱ʼa̱ ña̱yóʼo. ¿Á saá kúú ña̱ ndóʼún? Tá saá, ndukú ki̱ʼva ña̱ natúʼún xíʼin na̱ veʼún ta saátu xíʼin na̱ migoún xa̱ʼa̱ ña̱ sákuaʼún soo xíʼin ña̱ to̱ʼó keʼún ña̱yóʼo (kaʼvi Colosenses 4:6).
Sava ña̱ kivi keʼún tá ná kixáʼún
-
Tá ná natúʼún xíʼin iin na̱ veʼún kivi kixáʼún ka̱ʼún xíʼinna xa̱ʼa̱ ña̱ Biblia ta ka̱ʼún ña̱yóʼo xíʼinna: “Semana yóʼo sa̱kuaʼi̱ iin ña̱ ndáyáʼviní”.
-
Tá iin na̱ migoún kúúmiína kue̱ʼe̱ á ndíʼi̱-inina, na̱ʼa̱ iin texto ña̱ va̱xi nu̱ú Biblia nu̱úna ña̱ kivi chika̱a̱ ndee̱ xíʼinna.
-
Tá iin na̱ káchíñu xíʼún ni̱nda̱ka̱tu̱ʼunna yóʼó, ¿ndáaña ke̱ʼún sábado xíʼin domingo? Ka̱ʼa̱n xíʼinna xa̱ʼa̱ ña̱ sa̱kuaʼún nu̱ú Biblia á ña̱ sa̱kuaʼún ti̱xin reunión.
-
Na̱ʼa̱ nu̱ú na̱ migoún sitio ña̱ va̱xi nu̱ú Internet jw.org.
-
Kivi ka̱ʼún xíʼin inkana ña̱ inkáchi ná sákuaʼandó xa̱ʼa̱ ña̱ Biblia á na̱ʼa̱ nu̱úna ndáa ki̱ʼva ndukúna iin na̱ sanáʼa̱ miína nu̱ú jw.org.
2. ¿Nda̱chun ndáyáʼviní kitaún natúʼún xíʼin na̱ congregación xa̱ʼa̱ tu̱ʼun Ndióxi̱?
Na̱ discípulo ta̱ Jesús va̱ása níxinatúʼun kuitína xíʼin na̱ xi̱xini̱na xa̱ʼa̱ tu̱ʼun Ndióxi̱. Ta̱ Jesús “chi̱ndaʼára u̱vi̱ tá u̱vi̱na ña̱ ku̱ʼu̱nna ndiʼi ñuu” ña̱ va̱ʼa natúʼunna xíʼin na̱ yiví (Lucas 10:1). Xa̱ʼa̱ ña̱ viíní xi̱natúʼunna xíʼin na̱ yiví chi̱ndeétáʼanña xíʼin ku̱a̱ʼánína ña̱ ku̱nda̱a̱-inina xa̱ʼa̱ tu̱ʼun va̱ʼa. Ta na̱ discípulo xi̱kusi̱íní-inina ña̱ xi̱kitáʼanna ña̱ xi̱natúʼunna xíʼin na̱ yiví (Lucas 10:17). ¿Á kivi chika̱ún ndeé ña̱ kitaún xíʼin na̱ congregación ña̱ natúʼún xíʼin na̱ yiví xa̱ʼa̱ tu̱ʼun Ndióxi̱?
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi chindeétáʼan xíʼún ña̱ va̱ása yi̱ʼvíún ta kusi̱í-iniún tá ná natúʼún xa̱ʼa̱ tu̱ʼun va̱ʼa.
3. Jehová koora xíʼún
Sava na̱ yiví na̱ kúni̱ natúʼun xa̱ʼa̱ tu̱ʼun Ndióxi̱ ndíʼi̱-inina xa̱ʼa̱ ndáaña keʼé na̱ yiví xíʼinna á ndáaña ndakanixi̱nína xa̱ʼa̱na.
-
Ta miíún, tá ndákanixi̱níún ña̱ ka̱ʼún xíʼin inkana xa̱ʼa̱ ña̱ ku̱a̱ʼún sákuaʼún, ¿á yíʼviún á va̱ása? Ta, ¿nda̱chun?
Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña ke̱ʼé na̱ va̱lí na̱ xi̱niyó nu̱ú video ña̱ va̱ása yi̱ʼvíkana?
Kaʼvindó Isaías 41:10 ta ka̱ʼa̱nndó xa̱ʼa̱ ña̱yóʼo:
-
¿Nda̱chun xíniñúʼu keʼún oración tá yíʼviún natúʼún xíʼin na̱ yiví?
¿Á xa̱a̱ xíniún xa̱ʼa̱ ña̱yóʼo?
Ku̱a̱ʼání na̱ kúú testigo Jehová tiempo vitin, xi̱ndakanixi̱nína ña̱ va̱ása kuchiñuna natúʼunna xíʼin na̱ yiví xa̱ʼa̱ Ndióxi̱. Tá kúú iin ta̱a ta̱ naní Sergey xi̱ndakanixi̱níra ña̱ va̱ása ndáyáʼvira ta xi̱ ixayo̱ʼvi̱ña xíʼinra ña̱ natúʼunra xíʼin inkana xa̱ʼa̱ Ndióxi̱. Soo iin ki̱vi̱ ki̱xáʼara sákuaʼara xa̱ʼa̱ Biblia. Ta̱yóʼo káchira: “Ni xi̱yiʼvíi̱, chi̱ka̱i̱ ndee̱ ña̱ natúʼi̱n xíʼin inkana xa̱ʼa̱ ña̱ sákuaʼi̱. Iin ki̱ʼva ña̱ chi̱ndeétáʼanña xíʼi̱n kúú ña̱ va̱ása ní ndákavaka-inii̱ ta nda̱a̱ níma̱i̱ ni̱xa̱a̱ ña̱ sánáʼa̱ ña̱ Biblia”.
4. To̱ʼó koún
Tá kúma̱níka ka̱ʼún xíʼin iinna xa̱ʼa̱ tu̱ʼun Ndióxi̱ va̱ása ndakani kuití xi̱niún ndáaña ka̱ʼún xíʼinna saáchi xíniñúʼu ndakanixi̱níún ndáa ki̱ʼva ka̱ʼún xíʼinna. Kaʼvindó 2 Timoteo 2:24 xíʼin 1 Pedro 3:15, ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva keʼún ña̱ káʼa̱n ña̱ versículo yóʼo tá ná ka̱ʼún xíʼin inka na̱ yiví xa̱ʼa̱ ña̱ káʼa̱n Biblia?
-
Sava na̱ veʼún á na̱ migoún va̱ása kútóona ki̱ʼva ña̱ ndákanixi̱níún. ¿Ndáaña kivi keʼún? Ta, ¿ndáaña va̱ása xíniñúʼu keʼún?
-
¿Nda̱chun va̱ʼaníka tá xíʼin ña̱ to̱ʼó ná ka̱ʼa̱nyó xíʼinna nu̱úka ña̱ ka̱ʼa̱nyó xíʼinna ndáaña xíniñúʼu keʼéna?
5. Ña̱ ka̱ʼa̱nyó xa̱ʼa̱ tu̱ʼun va̱ʼa sákusi̱íña-iniyó
Jehová ta̱xira chiñu ndaʼa̱ ta̱ Jesús ña̱ natúʼunra xa̱ʼa̱ tu̱ʼun va̱ʼa. ¿Ndáa ki̱ʼva xi̱xito ta̱ Jesús chiñu yóʼo? Kaʼvindó Juan 4:34 ta ka̱ʼa̱nndó xa̱ʼa̱ ña̱yóʼo:
-
Tá vií íyo ña̱ xíxiyó chíndeétáʼanña xíʼinyó ña̱ kutakuyó ta kusi̱í-iniyó. ¿Nda̱chun ni̱ka̱ʼa̱n ta̱ Jesús ña̱ keʼéyó ña̱ kúni̱ Ndióxi̱, tá kúú ña̱ natúʼunyó xa̱ʼa̱ tu̱ʼun va̱ʼa íyoña nda̱a̱ táki̱ʼva íyo ña̱ xíxiyó?
-
Ña̱ ndákanixi̱ní miíún, ña̱ natúʼún xa̱ʼa̱ tu̱ʼun va̱ʼa, ¿ndáa ki̱ʼva kivi sakúsi̱í ña̱yóʼo iniún?
Keʼé ña̱yóʼo
-
Reunión ña̱ xíyo ma̱ʼñú semana, koto sava ña̱ kivi keʼún ña̱ kixáʼún natúʼún xíʼin na̱ yiví.
-
Ka̱ʼa̱n xíʼin na̱ sánáʼa̱ yóʼó ndáa ki̱ʼva kivi ya̱ʼún ti̱xin reunión ña̱ xíyo ma̱ʼñú semana. Ña̱ ya̱ʼún ti̱xin reunión chindeétáʼanña xíʼún ña̱ koo tu̱ʼvaún ña̱ ka̱ʼún xíʼin inkana xa̱ʼa̱ ña̱ sákuaʼún.
-
Kuniñúʼu nu̱ú káʼa̱nña “Ña̱ káʼa̱n sava na̱ yiví” xíʼin “Ña̱ ndáka̱tu̱ʼun sava na̱ yiví” ña̱ va̱xi nu̱ú tutu yóʼo ña̱ va̱ʼa sakúaʼún ndáa ki̱ʼva ndakuiún yuʼú na̱ yiví.
ÑA̱ NDÁKA̱TU̱ʼUN SAVA NA̱ YIVÍ: “¿Á íyo va̱ʼún? ¿Ndáaña kúú ña̱ ke̱ʼún ki̱vi̱ ni̱ya̱ʼa?”.
-
¿Ndáa ki̱ʼva kivi kuniñúʼún ña̱yóʼo ña̱ natúʼún xíʼinna xa̱ʼa̱ ña̱ xa̱a̱ ku̱a̱ʼún sákuaʼún nu̱ú Biblia?
ÑA̱ XA̱A̱ SA̱KUAʼAYÓ
Ña̱ ka̱ʼa̱nyó xa̱ʼa̱ tu̱ʼun va̱ʼa sákusi̱íña-iniyó, ta ña̱ va̱ʼa kixáʼún keʼún ña̱yóʼo va̱ása yo̱ʼvi̱ví íyoña nda̱a̱ táki̱ʼva ndákanixi̱níún.
Ná ndakaʼányó xa̱ʼa̱ ña̱yóʼo
-
¿Ndáaña kivi chindeétáʼan xíʼún ña̱ natúʼún xa̱ʼa̱ tu̱ʼun va̱ʼa?
-
¿Ndáa ki̱ʼva na̱ʼún ña̱ íxato̱ʼúnna tá nátúʼún xíʼinna?
-
¿Ndáaña kivi keʼún ña̱ va̱ása yi̱ʼvíkaún?
NANDUKÚKA XA̱ʼA̱ÑA
Koto ku̱mí ki̱ʼva ña̱ kuniñúʼuyó tarjeta ña̱ káʼa̱n xa̱ʼa̱ ña̱ ki̱ʼvina nu̱ú jw.org tá nátúʼunyó xíʼin na̱ yiví.
Ki̱ʼva ña̱ taxiyó tarjeta ña̱ káʼa̱n xa̱ʼa̱ ña̱ ki̱ʼvina nu̱ú jw.org (1:43)
Kunda̱a̱-ini xa̱ʼa̱ ku̱mí ña̱ va̱ʼa ña̱ kivi chindeétáʼan xíʼún ña̱ ka̱ʼún xíʼin na̱ yiví xa̱ʼa̱ tu̱ʼun va̱ʼa.
“¿Á kúni̱ún nandukún na̱ yiví?” (Tutu Ña̱ Nátúʼun xíʼinyó, tí septiembre ku̱i̱ya̱ 2020)
Koto ña̱ káʼa̱n ña̱ Biblia xa̱ʼa̱ ña̱ kivi chindeétáʼan xíʼinyó ña̱ ndakú koo iniyó natúʼunyó xíʼin na̱ yiví ni válíyó.
Kaʼvi ndáa ki̱ʼva ka̱ʼún xa̱ʼa̱ Biblia xíʼin na̱ veʼún na̱ va̱ása xíni̱ xa̱ʼa̱ Jehová.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
