Jehová kúni̱ra ña̱ ná kuxini̱yó familia na̱ íyo chí ndiví. Ta ti̱xin na̱ familia yóʼo ñúʼu na̱ ángel ta saátu nanína se̱ʼe Ndióxi̱ (Job 38:7). ¿Ndáaña sánáʼa̱ ña̱ Biblia xa̱ʼa̱ na̱ ángel? ¿Ndáa ki̱ʼva chíndeétáʼanna xíʼin na̱ yiví? ¿Á ndiʼi na̱ ángel íyo ti̱xin familia Ndióxi̱?

1. ¿Ndáana kúú na̱ ángel?

Tá kúma̱níka ixava̱ʼa Jehová ñuʼú yóʼo siʼnaka na̱ ángel i̱xava̱ʼara. Íyona nda̱a̱ táki̱ʼva íyo miíra, kúúna espíritu ta kǒo kívi kotoyóna ta íyona chí ndiví (Hebreos 1:​14). Ku̱a̱ʼání na̱ ángel íyo ta xa̱a̱ síín síín íyo iin iinna (Apocalipsis 5:​11). Na̱yóʼo kéʼéna ña̱ káʼa̱n Jehová ta xíniso̱ʼona chiñu ña̱ xáʼndara (Salmo 103:​20). Tiempo xi̱naʼá Jehová xi̱ chi̱ndaʼára sava na̱ ángel ña̱ va̱ʼa natúʼunna tu̱ʼunra ta saátu ña̱ chi̱ndeétáʼanna xíʼin na̱ yiví xíʼin ña̱ sa̱kákuna na̱ ñuura. Tiempo vitin, na̱ ángel níʼina yichi̱ nu̱ú na̱ cristiano ña̱ va̱ʼa ndani̱ʼína na̱ yiví na̱ kúni̱ kunda̱a̱-ini xa̱ʼa̱ Ndióxi̱.

2. ¿Ndáa ta̱ kúú ta̱ Ndi̱va̱ʼa xíʼin na̱ ta̱chí ndi̱va̱ʼa?

Sava na̱ ángel sa̱ndákoona ña̱ nda̱kú ni̱xi̱yo inina xíʼin Jehová. Ta̱ nu̱ú, ta̱ va̱ása níxiniso̱ʼoka ña̱ káʼa̱n Ndióxi̱ kúú ta̱ Ndi̱va̱ʼa ta̱ sándaʼvi ndiʼi na̱ yiví na̱ íyo nu̱ú ñuʼú yóʼo (Apocalipsis 12:9). Ta̱ Ndi̱va̱ʼa xi̱kuni̱ra kaʼndachíñura nu̱ú inkana ña̱kán sa̱ndáʼvira na̱ yiví na̱ nu̱ú ku̱va̱ʼa ña̱ ndakutáʼanna xíʼinra. Tá ni̱ya̱ʼa tiempo sa̱ndáʼvira inka na̱ ángel ña̱ ná ndakutáʼanna xíʼinra. Ta na̱ ángel na̱ kǒo níxiniso̱ʼo yóʼo nda̱kunanína na̱ ta̱chí ndi̱va̱ʼa. Jehová kǒo nítaxikara ña̱ koona chí ndiví ta chi̱ndaʼárana nu̱ú ñuʼú yóʼo ta na̱yóʼo ndiʼi-xa̱ʼa̱na (kaʼvi Apocalipsis 12:​9, 12).

3. ¿Ndáa ki̱ʼva sándaʼvi ta̱ Ndi̱va̱ʼa xíʼin na̱ ta̱chí ndi̱va̱ʼa miíyó?

Ta̱ Ndi̱va̱ʼa xíʼin na̱ ta̱chí ndi̱va̱ʼa xíniñúʼuna ña̱ tási á inkaka ña̱ʼa ña̱ va̱ʼa sandáʼvina ku̱a̱ʼání na̱ yiví soo xa̱ʼa̱ ña̱ kéʼé na̱ yiví ña̱ va̱ása va̱ʼa yóʼo sákuyatinña miína nu̱ú na̱ ta̱chí ndi̱va̱ʼa. Sava na̱ yiví xáʼa̱nna nu̱ú na̱ astrólogo, na̱ adivino á na̱ ndáku, na̱ ndákuati xíʼin nu̱ú na̱ brujo. Ta íyo sava na̱ ndúkú ta̱tán ña̱ kítáʼan xíʼin ña̱ tási. Ta savana ndákanixi̱nína ña̱ kivi ka̱ʼa̱nna xíʼin na̱ ni̱xi̱ʼi̱. Jehová káʼa̱nra xíʼinyó, ña̱ ná va̱ása ka̱ʼa̱nyó xíʼin na̱ ni̱xi̱ʼi̱ ni na̱ adivino (Levítico 19:​31). Saáchi kúni̱ra kundaara miíyó nu̱ú ta̱ Ndi̱va̱ʼa ta saátu nu̱ú na̱ ta̱chí ndi̱va̱ʼa chi na̱yóʼo sáa̱-inina xínina Jehová ta kúni̱na keʼéna ña̱ va̱ása va̱ʼa xíʼinyó.

 NÁ SAKUAʼAKAYÓ XA̱ʼA̱ÑA

6. Kuchiñuvaún nu̱ú ta̱ Ndi̱va̱ʼa ta saátu nu̱ú na̱ ta̱chí ndi̱va̱ʼa

Ta̱ Ndi̱va̱ʼa kúú ta̱ xáʼndachíñu nu̱ú na̱ ta̱chí ndi̱va̱ʼa. Soo na̱ ángel na̱ nda̱kú íyo ini xíʼin Ndióxi̱, ta̱ arcángel Miguel kúú ta̱ níʼi yichi̱ nu̱úna, ña̱yóʼo kúú inka ki̱ʼva ña̱ káʼa̱nna xíʼin ta̱ Jesús. ¿Nda̱saa ndee̱ kúúmií ta̱ Miguel? Kaʼvindó Apocalipsis 12:​7-9 ta ka̱ʼa̱nndó xa̱ʼa̱ ña̱yóʼo.

• ¿Ndáana kúú na̱ ndakúka: ta̱ Miguel xíʼin na̱ ángel á ta̱ Ndi̱va̱ʼa xíʼin na̱ ta̱chí ndi̱va̱ʼa?

• ¿Á xíniñúʼu yi̱ʼví na̱ ndíku̱n ta̱ Cristo kunina ta̱ Ndi̱va̱ʼa xíʼin na̱ ta̱chí ndi̱va̱ʼa?

Kuchiñuvaún nu̱ú ta̱ Ndi̱va̱ʼa xíʼin na̱ ta̱chí ndi̱va̱ʼa. Kaʼvindó Santiago 4:7 ta ka̱ʼa̱nndó xa̱ʼa̱ ña̱yóʼo:

• ¿Ndáa ki̱ʼva kundaún miíún nu̱ú ta̱ Ndi̱va̱ʼa ta saátu nu̱ú na̱ ta̱chí ndi̱va̱ʼa?

 ÑA̱ XA̱A̱ SA̱KUAʼAYÓ

Na̱ ángel na̱ nda̱kú íyo ini xíʼin dióxi̱ chíndeétáʼanna xíʼinyó. Ta̱ Ndi̱va̱ʼa xíʼin na̱ ta̱chí ndi̱va̱ʼa sáa̱-inina xínina Jehová, ta xíniñúʼuna ña̱ tási ña̱ va̱ʼa sandáʼvina na̱ yiví.

Ná ndakaʼányó xa̱ʼa̱ ña̱yóʼo

• Ña̱ va̱ʼa xa̱a̱ na̱ yiví kuxini̱na Jehová, ¿ndáaña kéʼé na̱ ángel?

• ¿Ndáa ta̱ kúú ta̱ Ndi̱va̱ʼa xíʼin na̱ ta̱chí ndi̱va̱ʼa?

• ¿Nda̱chun va̱ása xíniñúʼu ku̱ʼún nu̱ú na̱ kéʼé ña̱ tási?