LECCIÓN 33
Ña̱ keʼé Reino Ndióxi̱
Reino Ndióxi̱ xa̱a̱ xáʼndachíñuña. Si̱lóʼo kúma̱ní ta kaʼndachíñuña nu̱ú ñuʼú yóʼo. Ná kotoyó sava ña̱ kuchiñu Reino Ndióxi̱ keʼéña ta ná kaʼndachíñuña ta xíʼin ña̱ si̱í-ini kundatún ña̱yóʼo.
1. ¿Ndáaña keʼé Reino Ndióxi̱ ña̱ va̱ʼaní kooyó ta va̱ása kooka ña̱ kini nu̱ú ñuʼú yóʼo?
Ti̱xin guerra ña̱ Armagedón, ta̱ Jesús ta̱ kúú Rey ti̱xin Reino Ndióxi̱ sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa ta saátu na̱ xáʼndachíñu nu̱ú ñuʼú yóʼo (Apocalipsis 16:14, 16). Tiempo saá, xi̱nu ndiʼi ña̱ káʼa̱n Biblia ta kúú ña̱yóʼo: “Si̱lóʼova tiempo kúma̱ní, ta na̱ yiví na̱ kéʼé ña̱ va̱ása va̱ʼa ndiʼi-xa̱ʼa̱na” (Salmo 37:10). Tá ná kaʼndachíñu ta̱ Jesús viíní kundooyó ta kǒo na̱ keʼé ña̱ va̱ása va̱ʼa iníísaá nu̱ú ñuyǐví (kaʼvi Isaías 11:4).
2. ¿Ndáa ki̱ʼva kundooyó nu̱ú ñuʼú yóʼo tá ná xi̱nu ña̱ kúni̱ Ndióxi̱?
Tá ná kaʼndachíñu Reino Ndióxi̱, “na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:29). Ndakanixi̱ní ndáa ki̱ʼva koo na̱ yiví tá ndiʼina ná keʼéna ña̱ va̱ʼa, kuʼvi̱-inina kunina Jehová ta saátu kuʼvi̱-inina kunina inkana, nda̱a̱ ni iinna va̱ása kuumií kue̱ʼe̱ ta ndiʼina kutaku ndiʼi tiempo, liviní kooña.
3. ¿Ndáaña va̱ʼa taxi Reino Ndióxi̱ tá ná sandíʼi-xa̱ʼa̱ña na̱ kéʼé ña̱ va̱ása va̱ʼa?
Tá ná ndiʼi-xa̱ʼa̱ na̱ yiví na̱ kéʼé ña̱ va̱ása va̱ʼa ta̱ Jesús koora Rey ti̱xin 1,000 ku̱i̱ya̱. Tiempo kán, ta̱ Jesús xíʼin na̱ 144,000 na̱ kaʼndachíñu xíʼinra chindeétáʼanna xíʼin na̱ yiví ña̱ ka̱kuna ndaʼa̱ ku̱a̱chi. Tá ná ndiʼi tiempo kán, ñuyǐví nduliviña ta na̱ yiví si̱íní kundoona nu̱úña saáchi kandíxana ley Jehová. Tá ná ndiʼi, ta̱ Jesús ndataxira ña̱ xáʼndachíñura ndaʼa̱ yivára, Jehová. Ta ki̱vi̱ Ndióxi̱ nduyi̱i̱ña ndiʼi tiempo (Mateo 6:9, 10). Ta tiempo saá na̱ʼa̱ Jehová ña̱ va̱ʼaní xáʼndachíñura ta ndáara na̱ ñuura. Tasaá Jehová sandíʼi-xa̱ʼa̱ra ta̱ Ndi̱va̱ʼa xíʼin na̱ ta̱chí ndi̱va̱ʼa á inkaka na̱ va̱ása íxato̱ʼó ña̱ xáʼndachíñura (Apocalipsis 20:7-10). Ndiʼi ña̱ va̱ʼa ña̱ keʼé Reino Ndióxi̱ kooña ndiʼi tiempo.
NÁ SAKUAʼAKAYÓ XA̱ʼA̱ÑA
Ná kotoyó nda̱chun kivi kandíxayó ña̱ saxínu Ndióxi̱ ti̱xin Reinora ndiʼi ña̱ ni̱ka̱ʼa̱nra ña̱ va̱xi nu̱ú Biblia ña̱ viíní kooyó chí nu̱únínu.
4. Reino Ndióxi̱ sandíʼi-xa̱ʼa̱ña ndiʼi na̱ xáʼndachíñu ñuyǐví yóʼo
“Xa̱ʼa̱ ña̱ xáʼndachíñu na̱ yiví nu̱ú táʼan miína nina tu̱ndóʼova íyo” (Eclesiastés 8:9). Jehová ti̱xin Reinora ndasaviíra ndiʼi ña̱ va̱ása va̱ʼa kúú nu̱ú ñuʼú yóʼo.
Kaʼvindó Daniel 2:44 xíʼin 2 Tesalonicenses 1:6-8, ta ka̱ʼa̱nndó xa̱ʼa̱ ña̱yóʼo:
-
Jehová xíʼin se̱ʼera ta̱ Jesús ¿ndáaña keʼéna xíʼin na̱ xáʼndachíñu ñuyǐví yóʼo ta saátu xíʼin na̱ kítáʼan xíʼinna?
-
Ña̱ kúnda̱a̱-iniún xa̱ʼa̱ Jehová ta saátu xa̱ʼa̱ ta̱ Jesús, ¿ndáa ki̱ʼva chindeétáʼanña xíʼún ña̱ kunda̱a̱-iniún ña̱ viíní ndatiinna ku̱a̱chi xíʼin na̱ yiví?
5. Ta̱ Jesús kúú iin rey ta̱ va̱ʼaní
Xa̱ʼa̱ ña̱ kúú ta̱ Jesús Rey ti̱xin Reino Ndióxi̱ keʼéra ku̱a̱ʼání ña̱ va̱ʼa ña̱ chindeétáʼan xíʼin na̱ yiví na̱ íyo iníísaá nu̱ú ñuʼú. Kotondó VIDEO ña̱ va̱ʼa kunda̱a̱-inindó ndáa ki̱ʼva ni̱na̱ʼa̱ ta̱ Jesús ña̱ kúni̱ra chindeétáʼanra xíʼin na̱ yiví ta saátu Ndióxi̱ ta̱xira ndee̱ ndaʼa̱ra ña̱ va̱ʼa keʼéra ña̱yóʼo.
Ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo náʼa̱ña ña̱ keʼéra táʼan ña̱yóʼo ti̱xin Reino Ndióxi̱. Ña̱ ni̱ka̱ʼa̱n Ndióxi̱ ña̱ va̱xi yóʼo, ¿ndáaña kúú ña̱ kútóokaún kuniún xi̱nu? Kaʼvindó ndiʼi texto nu̱ú va̱xi ña̱ ni̱ka̱ʼa̱n Ndióxi̱ keʼéra.
|
NU̱Ú ÑUʼÚ, TA̱ JESÚS... |
NDA̱A̱ CHÍ NDIVÍ, TA̱ JESÚS... |
|---|---|
|
|
|
|
|
|
|
|
6. Tíxa̱ʼvi Reino Ndióxi̱ viíní kooyó chí nu̱únínu
Reino Ndióxi̱ saxínuña ki̱ʼva ña̱ xi̱kuni̱ Jehová ña̱ ná koo na̱ yiví nda̱a̱ tá xa̱ʼa̱. Koona nu̱ú ñuʼú livi ndiʼi tiempo. Kotondó VIDEO ña̱ va̱ʼa kunda̱a̱-inindó ndáa ki̱ʼva xíniñúʼu Jehová se̱ʼera ta̱ Jesús, ña̱ va̱ʼa saxínura ña̱ kúni̱ra.
Kaʼvindó Salmo 145:16 ta ka̱ʼa̱nndó xa̱ʼa̱ ña̱yóʼo:
-
¿Ndáaña ndóʼún tá kúnda̱a̱-iniún ña̱ taxi Jehová ndiʼi ña̱ xíniñúʼu na̱ yiví?
ÑA̱ KÁʼA̱N SAVA YIVÍ: “Tá ndiʼiyó inkáchi ná kachíñuyó kuchiñuvayó ndasaviíyó ndiʼi tu̱ndóʼo ña̱ kúú nu̱ú ñuʼú yóʼo”.
-
¿Ndáa tu̱ndóʼo kuchiñu Reino Ndióxi̱ ndasaviíña ña̱ va̱ása kúchiñu na̱ chíñu ñuyǐví yóʼo ndasaviína?
ÑA̱ XA̱A̱ SA̱KUAʼAYÓ
Reino Ndióxi̱ saxínuña ña̱ kúni̱ra. Ndasaliviña nu̱ú ñuʼú yóʼo nu̱ú koo na̱ yiví na̱ kéʼé ña̱ va̱ʼa ta ndasakáʼnuna Jehová ndiʼi tiempo.
Ná ndakaʼányó xa̱ʼa̱ ña̱yóʼo
-
¿Ndáaña keʼé Reino Ndióxi̱ ña̱ ndasayi̱i̱ña ki̱vi̱ Jehová?
-
¿Nda̱chun va̱ʼa kúnda̱a̱-iniyó ña̱ saxínu Reino Ndióxi̱ ndiʼi ña̱ va̱xi nu̱ú Biblia?
-
Ndiʼi ña̱ saxínu Reino Ndióxi̱, ¿ndáaña kútóokaún kuniún?
NANDUKÚKA XA̱ʼA̱ÑA
Kunda̱a̱-ini ndáaña kúú Armagedón.
Koto ndáaña kuu ti̱xin ña̱ 1,000 ku̱i̱ya̱ ña̱ kaʼndachíñu ta̱ Jesús ta saátu tá ná ndiʼi ña̱yóʼo.
¿Ndáa ki̱ʼva kivi ndakanixi̱ní na̱ familia ña̱ si̱íní koona tá ná saxínu Reino Ndióxi̱ ña̱ ni̱ka̱ʼa̱nra koo?
Kaʼvi xa̱ʼa̱, “Ku̱a̱ʼání pregunta xi̱kuumií” ña̱ va̱ʼa kotondó ndáa ki̱ʼva nda̱ni̱ʼí iin ta̱ xi̱kitáʼan xíʼin na̱ político ña̱ xi̱kuni̱ra kunda̱a̱-inira.
“Biblia chi̱ndeétáʼan xíʼinna ña̱ na̱samana” (La Atalaya, 1 tí enero ku̱i̱ya̱ 2012)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
