LECCIÓN 34
¿Ndáa ki̱ʼva na̱ʼa̱yó ña̱ kúʼvi̱-iniyó xíniyó Jehová?
¿Á ndákanixi̱níún ña̱ yatinka íyoún xíʼin Ndióxi̱ nani tá ki̱xáʼún káʼviún Biblia? ¿Á kúni̱ún viíka xa̱ún kítáʼún xíʼin Ndióxi̱? Tá saá íyoña, ndakaʼán, tá ná kuni Jehová ña̱ kúni̱kaún xíniúnra ta̱kán ku̱ni̱kara yóʼó ta kundaara yóʼó. ¿Ndáa ki̱ʼva kivi na̱ʼún ña̱ kúʼvi̱-iniún xíniúnra?
1. ¿Ndáa ki̱ʼva náʼa̱yó ña̱ kúʼvi̱-iniyó xíniyó Jehová?
Tá xíniso̱ʼoyó ña̱ káʼa̱nra náʼa̱yó ña̱ kúʼvi̱-iniyó xíniyóra (kaʼvi 1 Juan 5:3). Jehová va̱ása íxandúxara xíʼin nda̱a̱ ni iinna ña̱ kuniso̱ʼona miíra. Táxira ña̱ ná ndaka̱xin iin iinyó á kuniso̱ʼoyóra a va̱ása. ¿Nda̱chun? Saáchi Jehová kúni̱ra ná kuniso̱ʼoyóra “xíʼin ndiʼi níma̱yó” (Romanos 6:17). Ña̱ kúni̱ kachiña kúú, ña̱ kuniso̱ʼún ña̱ káʼa̱nra xa̱ʼa̱ ña̱ kúʼvi̱-iniún xíniúnra ta su̱ví xa̱ʼa̱ ña̱ íxandúxana xíʼún. Ña̱ táʼví 3 xíʼin 4 ña̱ libro yóʼo chindeétáʼanña xíʼún ña̱ na̱ʼún ña̱ kúʼvi̱-iniún xíniún Jehová: ña̱ nu̱ú ña̱ keʼún ña̱ kútóora ta ña̱ u̱vi̱ ña̱ kǒo keʼún ña̱ va̱ása kútóora.
2. ¿Nda̱chun kivi ixayo̱ʼvi̱ña xíʼinyó ña̱ na̱ʼa̱yó ña̱ kúʼvi̱-iniyó xíniyó Jehová?
“Ku̱a̱ʼání kúú tu̱ndóʼo íyo nu̱ú na̱ nda̱kú-ini” (Salmo 34:19). Ndiʼiyó íyo iin ña̱ íxayo̱ʼvi̱ xíʼinyó xa̱ʼa̱ ña̱ kúúyó na̱ yiví ku̱a̱chi ta saátu yáʼayó nu̱ú sava tu̱ndóʼo tá kúú ña̱ kúma̱ní xu̱ʼún ndaʼa̱yó, tá kéʼéna ña̱ va̱ása va̱ʼa xíʼinyó á inkaka tu̱ndóʼo. Tá yáʼayó nu̱ú tu̱ndóʼo kivi ixayo̱ʼvi̱níkaña xíʼinyó ña̱ keʼéyó ña̱ kúni̱ Jehová. Saáchi va̱ása íxayo̱ʼvi̱víña xíʼinyó ña̱ kǒo kuniso̱ʼoyó ña̱ káʼa̱n Jehová. Soo tá chíka̱ún ndee̱ ña̱ keʼún ña̱ káʼa̱n Jehová xíʼún, náʼún ña̱ kúʼvi̱-iniún xíniúnra nu̱ú inkaka ña̱ʼa ta saátu náʼún ña̱ nda̱kú íyo iniún xíʼinra. Ta ta̱kán na̱ʼa̱ra ña̱ nda̱kú íyo inira xíʼún ta va̱ása sandákoora yóʼó (kaʼvi Salmo 4:3).
NÁ SAKUAʼAKAYÓ XA̱ʼA̱ÑA
Ná kotoyó nda̱chun ndáyáʼviní ña̱ kuniso̱ʼoyó ña̱ káʼa̱n Jehová ta ndáaña kivi chindeétáʼan xíʼinyó ña̱ nda̱kú koo iniyó xíʼinra.
3. Ta̱ Ndi̱va̱ʼa chíka̱a̱ra ku̱a̱chi yóʼó
Nda̱a̱ táki̱ʼva káchi Biblia ta̱ Ndi̱va̱ʼa ni̱ka̱ʼa̱nra ña̱ vatá xa̱ʼa̱ ta̱ Job, soo su̱ví xa̱ʼa̱ iinlá ta̱ Job níka̱ʼa̱nra ña̱yóʼo saáchi ni̱ka̱ʼa̱nraña xa̱ʼa̱ ndiʼi na̱ yiví na̱ kúni̱ kachíñu nu̱ú Jehová. Kaʼvindó Job 1:1 xíʼin 1:6–2:10, ta ka̱ʼa̱nndó xa̱ʼa̱ ña̱yóʼo:
-
¿Ndáa ña̱ vatá ni̱ka̱ʼa̱n ta̱ Ndi̱va̱ʼa xa̱ʼa̱ ta̱ Job? (Kotondó Job 1:9-11).
-
¿Ndáa ku̱a̱chi chíka̱a̱ ta̱ Ndi̱va̱ʼa sa̱tá ndiʼiyó na̱ yiví? (Kotondó Job 2:4).
Kaʼvindó Job 27:5b ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva ni̱na̱ʼa̱ ta̱ Job ña̱ ndixa xi̱kuʼvi̱-inira xi̱xinira Jehová?
Xa̱ʼa̱ ña̱ nda̱kú ni̱xi̱yo ini ta̱ Job ni̱na̱ʼa̱ra ña̱ xi̱kuʼvi̱-inira xi̱xinira Jehová.
Tá nda̱kú íyo iniyó xíʼin Jehová náʼa̱yó ña̱ kúʼvi̱-iniyó xíniyóra.
4. Sakúsi̱í níma̱ Jehová
Kaʼvindó Proverbios 27:11 ta ka̱ʼa̱nndó xa̱ʼa̱ ña̱yóʼo:
-
¿Ndáaña ndóʼo Jehová tá xíniso̱ʼún ña̱ káʼa̱nra ta vií ndáka̱xiún ña̱ keʼún? ¿Nda̱chun?
5. Kivi nda̱kú koo iniún xíʼin Jehová
Ña̱ kúʼvi̱-iniyó xíniyó Jehová chíndeétáʼanña xíʼinyó ña̱ kuni̱yó ka̱ʼa̱nyó xíʼin inkana xa̱ʼa̱ra. Ta ña̱ nda̱kú íyo iniyó xíʼinra chíndeétáʼanña xíʼinyó ña̱ natúʼunyó xa̱ʼa̱ra ni íxayo̱ʼvi̱ña xíʼinyó. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Á íxayo̱ʼvi̱ña xíʼún ña̱ ka̱ʼún xíʼin inkana xa̱ʼa̱ Jehová?
-
Nda̱a̱ táki̱ʼva xi̱toyó nu̱ú video, ¿ndáaña chi̱ndeé ta̱ Grayson ña̱ kǒo yi̱ʼvíkara?
Va̱ása ixayo̱ʼvi̱ña xíʼinyó ña̱ nda̱kú koo iniyó xíʼin Jehová tá kúʼvi̱-iniyó xíniyó ña̱ kúʼvi̱-inira xínira, ta sáa̱-iniyó xíniyó ña̱ sáa̱-inira xínira. Kaʼvindó Salmo 97:10 ta ka̱ʼa̱nndó xa̱ʼa̱ ña̱yóʼo:
-
Ña̱ xa̱a̱ sa̱kuaʼún nda̱a̱ vitin, ¿ndáaña kúú sava ña̱ kúʼvi̱-ini Jehová xínira? Ta, ¿ndáaña kúú ña̱ sáa̱-inira xínira?
-
¿Ndáa ki̱ʼva sakuaʼún kuʼvi̱-iniún kuniún ña̱ va̱ʼa ta sa̱a̱-iniún kuniún ña̱ va̱ása va̱ʼa?
6. Ña̱ kuniso̱ʼoyó Jehová va̱ʼaní chíndeéña miíyó
Tá ndiʼi tiempo xíniso̱ʼoyó ña̱ káʼa̱n Jehová va̱ʼaní chíndeétáʼanña xíʼinyó. Kaʼvindó Isaías 48:17, 18 ta ka̱ʼa̱nndó xa̱ʼa̱ ña̱yóʼo:
-
¿Á kándíxaún ña̱ xíni̱ Jehová ndáaña kúú ña̱ xíniñúʼuyó? ¿Nda̱chun ndákanixi̱níún saá?
-
¿Ndáa ki̱ʼva xa̱a̱ chíndeétáʼan Biblia xíʼún ta saátu ña̱ sákuaʼún xa̱ʼa̱ Jehová, ta̱ kúú Ndióxi̱ ta̱ nda̱a̱?
ÑA̱ KÁʼA̱N SAVA NA̱ YIVÍ: “Ndióxi̱ va̱ása kíʼinvíra kuenta xíʼin ña̱ kéʼíi̱”.
-
¿Ndáa texto kivi kuniñúʼún ña̱ va̱ʼa na̱ʼún ña̱ kivi sákusi̱íyó ini Jehová á kivi sákusuchíyó inira xíʼin ña̱ kéʼéyó?
ÑA̱ XA̱A̱ SA̱KUAʼAYÓ
Náʼún ña̱ kúʼvi̱-iniún xíniún Jehová tá xíniso̱ʼún ña̱ káʼa̱nra ta saátu tá nda̱kú íyo iniún xíʼinra ni yáʼún nu̱ú tu̱ndóʼo.
Ná ndakaʼányó xa̱ʼa̱ ña̱yóʼo
-
¿Ndáaña sákuaʼún xíʼin ña̱ ndo̱ʼo ta̱ Job?
-
¿Ndáa ki̱ʼva na̱ʼún ña̱ kúʼvi̱-iniún xíniún Jehová?
-
¿Ndáaña chindeétáʼan xíʼún ña̱ nda̱kú koo iniún xíʼin Jehová?
NANDUKÚKA XA̱ʼA̱ÑA
Sakúaʼa ndáa ki̱ʼva nda̱kú koo iniún xíʼin Jehová ta saátu xíʼin na̱ congregación.
Kunda̱a̱ka-ini xa̱ʼa̱ ña̱ vatá ña̱ ni̱ka̱ʼa̱n ta̱ Ndi̱va̱ʼa.
“Ta̱ Job nda̱kú ni̱xi̱yo inira” (La Biblia y su mensaje, sección 6)
Koto chi nda̱a̱ na̱ va̱lí kivi na̱ʼa̱na ña̱ kúni̱na xínina Jehová.
¿Ndáa ki̱ʼva kivi nda̱kú koo ini na̱ va̱lí xíʼin Jehová ni káʼa̱n inka na̱ va̱lí xíʼinna ná keʼéna ña̱ va̱ása va̱ʼa?
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
