LECCIÓN 36
Nda̱kú ná koo iniyó xíʼin ndiʼi ña̱ʼa
Ndiʼi na̱ yiví kúni̱na ña̱ nda̱kú ná koo ini na̱ migona xíʼinna, ta saátu kúni̱ Jehová ná koo na̱ migora xíʼinra. Soo yo̱ʼvi̱ní nda̱kú koo ini na̱ yiví nu̱ú ñuyǐví yóʼo, saáchi íyo ku̱a̱ʼání na̱ yiví na̱ sándaʼvi inkana. ¿Ndáaña va̱ʼa ndakiʼinyó tá nda̱kú íyo iniyó xíʼin ndiʼi ña̱ʼa? ¿Ndáaña kúú ña̱yóʼo?
1. ¿Nda̱chun ndáyáʼviní ña̱ nda̱kú koo iniyó?
Tá nda̱kú íyo iniyó xíʼin inkana, náʼa̱yó ña̱ kúʼvi̱-iniyó xíniyó Jehová tá íxato̱ʼóyóra. Ndakaʼán ña̱ kíʼin Jehová kuenta xíʼin ña̱ ndákanixi̱níyó saátu xíʼin ña̱ kéʼéyó (Hebreos 4:13). Tá ndáka̱xinyó ña̱ nda̱kú koo iniyó, kíʼinra kuenta xíʼinña ta chíndayáʼviníraña. Tu̱ʼunra káʼa̱nña: Jehová kúndasíra xínira na̱ yiví na̱ va̱ása nda̱kú-ini xíʼinra, soo va̱ʼaní kítáʼanra xíʼin na̱ nda̱kú íyo ini (Proverbios 3:32).
2. ¿Ndáaña kéʼéyó ki̱vi̱ tá ki̱vi̱ xíniñúʼu nda̱kú koo iniyó xíʼin?
Ña̱ keʼéyó ña̱ kúni̱ Jehová kúú ña̱ ka̱ʼa̱nyó ña̱ nda̱a̱ (Zacarías 8:16, 17). ¿Ndáaña kúni̱ kachi ña̱yóʼo? Ña̱yóʼo kúni̱ kachiña ña̱ va̱ása káʼa̱nyó ña̱ vatá xíʼin na̱ veʼeyó, ni na̱ káchíñu xíʼinyó, ni na̱ hermanoyó na̱ íyo congregación ni xíʼin na̱ chíñu. Na̱ yiví na̱ nda̱kú-ini va̱ása íxakuíʼnána ta ni va̱ása káʼa̱nna ña̱ vatá (kaʼvi Proverbios 24:28 xíʼin Efesios 4:28). Ta saátu cháʼvina impuesto (Romanos 13:5-7). Xíʼin ndiʼi ña̱ kéʼéyó náʼa̱yó ña̱ nda̱kú íyo iniyó (Hebreos 13:18).
3. ¿Ndáaña va̱ʼa ndakiʼinyó tá nda̱kú íyo iniyó?
Tá inkana kíʼinna kuenta ña̱ nda̱kú íyo iniyó kivi kandíxana miíyó, tasaá chindeétáʼanyó xíʼin na̱ congregación ña̱ va̱ʼaní kutáʼanna, nda̱a̱ táki̱ʼva íyo iin na̱ familia. Ta kusi̱í-iniyó xa̱ʼa̱ ña̱ va̱ʼa íyo ña̱ xínitúni̱yó. Xíʼin ña̱ nda̱kú íyo iniyó, kivi “kuni inkana ña̱ va̱ʼaní íyo ndiʼi ña̱ sánáʼa̱ Ndióxi̱ ta̱ sáka̱ku miíyó”, ta nda̱a̱ kuni̱ inkana kachíñuna nu̱ú Jehová (Tito 2:10).
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva kivi chindeétáʼan ña̱ nda̱kú íyo iniyó xíʼinyó ña̱ va̱ʼa kitáʼanyó xíʼin Jehová, ta saátu ná kotoyó ndáa ki̱ʼva nda̱kú koo iniyó xíʼin inkana.
4. Jehová kúni̱ra xínira na̱ nda̱kú-ini
Kaʼvindó Salmo 44:21 xíʼin Malaquías 3:16, ta ka̱ʼa̱nndó xa̱ʼa̱ ña̱yóʼo:
-
¿Á kivi ndakanixi̱níyó ña̱ chise̱ʼéyó ña̱ nda̱a̱? ¿Nda̱chun ndákanixi̱níún saá?
-
Tá káʼa̱nyó ña̱ nda̱a̱ ni íxayo̱ʼvi̱ña xíʼinyó keʼéyóña, ¿ndáaña ndóʼo Jehová xa̱ʼa̱ ña̱yóʼo?
Tá káʼa̱n na̱ va̱lí ña̱ nda̱a̱, sákusi̱ína-ini Jehová. Tá káʼa̱nyó ña̱ nda̱a̱ sákusi̱íyó-ini Jehová.
5. Nda̱kú ná koo iniyó ndiʼi tiempo
Ni ku̱a̱ʼání na̱ yiví ndákanixi̱nína ña̱ nda̱kú koo iniyó su̱ví ña̱ va̱ʼa kúú ña̱yóʼo, soo íyova iin xa̱ʼa̱ ña̱ kivi nda̱kú koo iniyó. Koto ndáaña kúú ña̱yóʼo. Kotondó VIDEO.
Kaʼvindó Hebreos 13:18 ta ka̱ʼa̱nndó ndáa ki̱ʼva nda̱kú koo iniyó xíʼin...
-
... na̱ veʼeyó.
-
... nu̱ú káchíñuyó á ti̱xin escuela.
-
... inkakaña.
6. Tá nda̱kú íyo iniyó ndákiʼinyó ña̱ va̱ʼa
Xa̱ʼa̱ ña̱ nda̱kú íyo iniyó kivi kixi ku̱a̱ʼání tu̱ndóʼo nu̱úyó, soo ña̱yóʼo kúú iin ña̱ va̱ʼaníka keʼéyó. Kaʼvindó Salmo 34:12-16 ta ka̱ʼa̱nndó xa̱ʼa̱ ña̱yóʼo:
-
¿Á viíka kooyó tá nda̱kú íyo iniyó?
-
Tá nda̱kú íyo ini na̱ xa̱a̱ ti̱ndaʼa̱ xíʼin táʼanna, viíníka koona.
-
Tá nda̱kú íyo ini na̱ káchíñu nu̱ú inkana, na̱ káchíñuna nu̱ú kundaaka-ininana.
-
Tá na̱ yiví nda̱kú íyo inina, nda̱a̱ na̱ chíñu káʼa̱n va̱ʼana xa̱ʼa̱na.
ÑA̱ KÁʼA̱N SAVA NA̱ YIVÍ: “Su̱ví ña̱ ndeéví kúú ña̱ ka̱ʼa̱nyó iin ña̱ vatá loʼo”.
-
¿Á ndákanixi̱níún ña̱ sáa̱-ini Jehová xínira ndiʼi ña̱ vatá? ¿Nda̱chun ndákanixi̱níún saá?
ÑA̱ XA̱A̱ SA̱KUAʼAYÓ
Jehová kúni̱ra ña̱ ndiʼi na̱ migora nda̱kú ná koo inina xíʼin ndiʼi ña̱ káʼa̱nna ta saátu xíʼin ndiʼi ña̱ kéʼéna.
Ná ndakaʼányó xa̱ʼa̱ ña̱yóʼo
-
¿Ndáa ki̱ʼva na̱ʼa̱yó ña̱ nda̱kú íyo iniyó?
-
¿Nda̱chun su̱ví ña̱ va̱ʼa kúú ña̱ ndakanixi̱níyó ña̱ chise̱ʼéyó ña̱ nda̱a̱?
-
¿Nda̱chun va̱ʼa nda̱kú koo iniún ndiʼi tiempo?
NANDUKÚKA XA̱ʼA̱ÑA
¿Nda̱saa kivi sanáʼa̱ na̱ íyo se̱ʼe na̱ va̱lí se̱ʼena ña̱ nda̱kú koo inina?
¿Ndáaña va̱ʼa ndákiʼin na̱ sáxi̱nu ña̱ káʼa̱nna?
Koto á xíniñúʼu chaʼviyó impuesto ni tá va̱ása vií xíniñúʼuna xu̱ʼún.
“¿Á xíniñúʼu chaʼviún impuesto?” (La Atalaya, 1 tí septiembre ku̱i̱ya̱ 2011)
¿Ndáaña chi̱ndeétáʼan xíʼin iin ta̱a ta̱ xi̱ ixakuíʼna ña̱ na̱samara ña̱ kéʼéra ta vitin nda̱kú íyo inira?
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
