LECCIÓN 37
Ña̱ káʼa̱n Biblia xa̱ʼa̱ chiñu xíʼin xa̱ʼa̱ xu̱ʼún
¿Á xa̱a̱ ndíʼi̱ní-iniún sava yichi̱ xa̱ʼa̱ chiñu á xa̱ʼa̱ xu̱ʼún? Kivi ixayo̱ʼvi̱ña xíʼinyó ña̱ kuumiíyó ña̱ʼa ña̱ xíniñúʼuyó ta saátu ña̱ ndasakáʼnuyó Jehová nda̱a̱ táki̱ʼva kúni̱ miíra. Biblia va̱ʼaní consejo táxiña ndaʼa̱yó ña̱ kivi chindeétáʼan xíʼinyó ña̱ keʼéyó ña̱yóʼo.
1. ¿Ndáaña káʼa̱n Biblia xa̱ʼa̱ chiñu?
Ndióxi̱ kúni̱ra ña̱ ná kusi̱í-iniyó xíʼin chiñu ña̱ kúúmiíyó. Saáchi ña̱ Biblia káʼa̱nña, iin ña̱ va̱ʼaní keʼé na̱ yiví kúú ña̱ kusi̱í-inina xíʼin chiñu ña̱ kúúmiína (Eclesiastés 2:24). Jehová ndeéní káchíñura. Tá kéʼéyó táʼan ña̱ kéʼéra sákusi̱íyó inira ta saátu kúsi̱í-ini miíyó.
Chiñu ndáyáʼvivaña soo ná kǒo taxiyó ña̱ kundayáʼvikaña nu̱ú ña̱ ndasakáʼnuyó Jehová (Juan 6:27). Ndióxi̱ káʼa̱nra taxira ña̱ xíniñúʼuyó tá siʼna chiñu miíra kéʼéyó.
2. ¿Ndáa ki̱ʼva xíniñúʼu kuniñúʼuyó xu̱ʼún?
Ña̱ Biblia káʼa̱nña xíʼinyó ña̱ kiviva chindeétáʼan xu̱ʼún xíʼinyó, ta saátu káʼa̱nña xíʼinyó, xu̱ʼún va̱ása taxiña ña̱ kusi̱í-iniyó (Eclesiastés 7:12). Ña̱kán ña̱ Biblia káʼa̱nña xíʼinyó ña̱ ná va̱ása kuʼvi̱-iniyó kuniyó xu̱ʼún ta táxiña consejo yóʼo ndaʼa̱yó: “Kusi̱í-inindó xíʼin ña̱ʼa ña̱ xa̱a̱ kúúmiíndó” (kaʼvi Hebreos 13:5). Tá kúsi̱í-iniyó xíʼin ña̱ xa̱a̱ kúúmiíyó va̱ása ndíʼi̱-iniyó ña̱ ndukúyó ku̱a̱ʼákaña. Tasaá va̱ása kuníkáyó (Proverbios 22:7). Ta ni va̱ása kuni̱yó kusíkíyó xa̱ʼa̱ xu̱ʼún ni ña̱ kuni̱yó kamaní ndukúikáyó.
3. ¿Ndáa ki̱ʼva kuniñúʼuyó xu̱ʼún ña̱ chindeétáʼanyó xíʼin inkana?
Jehová Ndióxi̱ va̱ʼaní-inira ta ndíku̱nyó yichi̱ra tá va̱ʼa-iniyó ta táxiyó ña̱ kúúmiíyó ndaʼa̱ inkana (1 Timoteo 6:18). Iin ki̱ʼva ña̱ vií kuniñúʼuyó xu̱ʼúnyó kúú ña̱ taxiyóña ña̱ chaʼvina xa̱ʼa̱ ña̱ xíniñúʼuna ti̱xin ña̱ congregación ta saátu taxiyóña ndaʼa̱ na̱ kúma̱ní ña̱ʼa nu̱ú, ta na̱ chindeétáʼankayó xíʼin kúú na̱ hermanoyó. Ña̱ ndáyáʼvika nu̱ú Jehová kúú ndáa xa̱ʼa̱ kúú ña̱ táxiyóña su̱ví nda̱saaña táxiyó. Tá xíʼin ndiʼi níma̱yó táxiyóña saá si̱í kooyó ta saátu sakúsi̱íyó ini Jehová (kaʼvi Hechos 20:35).
NÁ SAKUAʼAKAYÓ XA̱ʼA̱ÑA
Ná kotoyó ndáaña va̱ʼa ndakiʼinyó tá kíʼinyó kuenta xíʼin chiñuyó ta saátu kusi̱í-iniyó xíʼin ña̱ xa̱a̱ kúúmiíyó.
4. Tá va̱ʼa kachíñuyó ndásakáʼnuyó Jehová
Ña̱ vií kítáʼanyó xíʼin Jehová chíndeétáʼanña xíʼinyó ña̱ vií ndakanixi̱níyó xa̱ʼa̱ chiñu. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña ku̱tóokaún ña̱ ke̱ʼé ta̱ Jason nu̱ú káchíñura?
-
¿Ndáaña ke̱ʼéra ña̱ kǒo kundayáʼviní chiñu nu̱úra?
Kaʼvindó Colosenses 3:23, 24 ta ka̱ʼa̱nndó xa̱ʼa̱ ña̱yóʼo:
-
¿Nda̱chun ndáyáʼviní kachíñuyó xíʼin “ndiʼi níma̱yó”?
Chiñu ndáyáʼviva, soo kǒo taxiyó ña̱ kundayáʼvikaña nu̱ú ña̱ ndasakáʼnuyó Jehová.
5. Ña̱ va̱ʼa ndakiʼinyó tá kúsi̱í-iniyó xíʼin ña̱ʼa ña̱ kúúmiíyó
Ku̱a̱ʼání na̱ yiví kúni̱na kuumiína ku̱a̱ʼání xu̱ʼún, soo síínva consejo táxi ña̱ Biblia. Kaʼvindó 1 Timoteo 6:6-8 ta ka̱ʼa̱nndó xa̱ʼa̱ ña̱yóʼo:
-
¿Ndáa consejo táxi ña̱ Biblia?
Kivi kusi̱í-iniyó ni loʼo ña̱ʼa kúúmiíyó. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ʼa kúsi̱í-ini na̱ familia yóʼo ni loʼo xu̱ʼún kúúmiína?
Ta tá kúúmiíyó ku̱a̱ʼá ña̱ʼa ta kúni̱kayó kúúmiíyó ku̱a̱ʼákaña, ta̱ Jesús ni̱ka̱ʼa̱nra iin ejemplo ña̱ kivi kundoʼoyó tá ndákanixi̱níyó saá. Kaʼvindó Lucas 12:15-21 ta ka̱ʼa̱nndó xa̱ʼa̱ ña̱yóʼo:
-
¿Ndáaña sákuaʼún xíʼin ña̱ ni̱ka̱ʼa̱n ta̱ Jesús? (Kotondó versículo 15).
Kaʼvindó Proverbios 10:22 ta chitáʼandóña xíʼin 1 Timoteo 6:10. Ta tá ndi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña ndáyáʼvika túviún: ña̱ kooyó migo Jehová á ña̱ kuumiíyó ku̱a̱ʼání xu̱ʼún? ¿Nda̱chun?
-
¿Ndáaña kundoʼoyó tá ná kuni̱níyó kuumiíyó ku̱a̱ʼáníka xu̱ʼún?
6. Jehová taxira ña̱ xíniñúʼuyó
Tá kǒo chiñu kúúmiíyó ta saátu tá kúma̱ní xu̱ʼún ndaʼa̱yó ña̱yóʼo chindeéña miíyó ña̱ kunda̱a̱-iniyó á kándíxaníyó Jehová. Kotondó VIDEO ña̱ va̱ʼa kunda̱a̱-iniún ndáa ki̱ʼva ya̱ʼún nu̱ú tu̱ndóʼo, ta tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáa tu̱ndóʼo kúú ña̱ ni̱ya̱ʼa ta̱ hermano ta xi̱toyó nu̱ú video?
-
¿Ndáaña ke̱ʼéra ña̱ va̱ʼa ni̱ya̱ʼara nu̱ú tu̱ndóʼo yóʼo?
Kaʼvindó Mateo 6:25-34 ta ka̱ʼa̱nndó xa̱ʼa̱ ña̱yóʼo:
-
¿Ndáaña káʼa̱n Jehová taxira ndaʼa̱ na̱ siʼnaka ndíʼi̱-ini xa̱ʼa̱ chiñura?
ÑA̱ KÁʼA̱N SAVA NA̱ YIVÍ: “Xíniñúʼu ndeéní kachíñui̱ ña̱ va̱ʼa taxii̱ ña̱ xíniñúʼu na̱ veʼi̱. Va̱ása kívi ku̱ʼi̱n reunión ndiʼi semana”
-
¿Ndáa texto ña̱ va̱xi nu̱ú Biblia kúú ña̱ sáxi̱nu̱-iniún ña̱ va̱ʼaníka, tá siʼna Jehová ndásakáʼnuyó?
ÑA̱ XA̱A̱ SA̱KUAʼAYÓ
Chiñu xíʼin xu̱ʼún xíniñúʼuvayóña, soo ná kǒo taxiyó ña̱ sakuxíkaña miíyó nu̱ú Jehová.
Ná ndakaʼányó xa̱ʼa̱ ña̱yóʼo
-
¿Ndáaña kivi chindeétáʼan xíʼún ña̱ va̱ása kundi̱ʼi̱ní-iniún xa̱ʼa̱ chiñu?
-
¿Ndáaña va̱ʼa ndakiʼún tá kúsi̱í-iniún xíʼin ña̱ xa̱a̱ kúúmiíún?
-
Xa̱ʼa̱ ña̱ káʼa̱n Jehová taxira ña̱ xíniñúʼu na̱ káchíñu nu̱úra, ¿ndáa ki̱ʼva na̱ʼún ña̱ kándíxaúnra?
NANDUKÚKA XA̱ʼA̱ÑA
Koto á káʼa̱n ña̱ Biblia ña̱ va̱ása va̱ʼa xa̱ʼa̱ xu̱ʼún.
“¿Á kúúmií xu̱ʼún ku̱a̱chi xa̱ʼa̱ ndiʼi ña̱ va̱ása va̱ʼa kúu?” (Artículo ña̱ va̱xi nu̱ú jw.org)
Koto ña̱ taxiyó ña̱ʼa ndaʼa̱ inkana sákusi̱íña-ini Jehová.
“¿Ndáaña káʼa̱n Biblia xa̱ʼa̱ ña̱ taxiyó ña̱ʼa ndaʼa̱ inkana?” (Artículo ña̱ va̱xi nu̱ú jw.org)
¿Á va̱ása va̱ʼa kusíkíyó xa̱ʼa̱ xu̱ʼún?
“Ña̱ káʼa̱n Biblia xa̱ʼa̱ ña̱ kusíkíyó xa̱ʼa̱ xu̱ʼún” (¡Despertad!, tí marzo ku̱i̱ya̱ 2015)
Ndáaña chi̱ndeétáʼan xíʼin iin ta̱a ña̱ na̱samara ña̱ kéʼéra ta kǒo nísasíkíkara xa̱ʼa̱ xu̱ʼún ni ña̱ ixákuíʼnakara.
“Biblia chi̱ndeétáʼan xíʼinna ña̱ na̱samana” (La Atalaya, 1 tí noviembre ku̱i̱ya̱ 2011)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
