LECCIÓN 38
Ná taxiyó tíxa̱ʼvi xa̱ʼa̱ ña̱ tákuyó
Ku̱a̱ʼání ña̱ kivi keʼéyó xa̱ʼa̱ ña̱ tákuyó. Ni yáʼayó nu̱ú tu̱ndóʼo kivi kusi̱í-iniyó xa̱ʼa̱ ña̱ livi íyo ña̱ tákuyó. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ tákuyó? ¿Ta ndáa xa̱ʼa̱ kúú ña̱ ndáyáʼviní ña̱ kivi keʼéyó ña̱yóʼo?
1. ¿Nda̱chun xíniñúʼu chindayáʼviyó ña̱ tákuyó?
Xíniñúʼu chindayáʼviyó ña̱ tákuyó chi iin ña̱ ta̱xi yiváyó Jehová ta̱ kúʼvi̱ní-ini xíni miíyó kúúña, chi ta̱yóʼo kúú “ta̱ táxi ña̱ tákuyó”, ta i̱xava̱ʼara ndiʼi ña̱ táku ña̱ íyo nu̱ú ñúʼu yóʼo (Salmo 36:9). “Miíra kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa” (Hechos 17:25, 28). Xa̱ʼa̱ ña̱kán, Jehová kúú ta̱ táxi ña̱ xíniñúʼuyó ña̱ va̱ʼa kutakuyó. Ta̱kán kúú ta̱ táxi ña̱ ná kusi̱í-iniyó kutakuyó (kaʼvi Hechos 14:17).
2. ¿Ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ tákuyó?
Tá na̱kunda̱a̱-ini na̱ yiváún ña̱ ndíka̱ún ti̱xin siʼún, Jehová ki̱xáʼa ndíʼi̱-inira xa̱ʼún. Ña̱yóʼo kúú iin oración ña̱ ni̱ka̱ʼa̱n ta̱ David ta̱ xi̱kachíñu nu̱ú Ndióxi̱, ka̱chira: “Xíniún yi̱ʼi̱ nda̱a̱ tá ndíka̱i̱ ti̱xin siʼíi̱” (Salmo 139:16). Ña̱ tákún ndáyáʼviníña nu̱ú Jehová (kaʼvi Mateo 10:29-31). Ta̱kán xóʼvi̱ní-inira tá iin na̱ yiví ná kaʼnína inkana xa̱ʼa̱ ña̱ kúni̱ miína á tá ná kaʼnína miína (Éxodo 20:13). a Saátu xóʼvi̱ra tá va̱ása chíndayáʼviyó ña̱ tákuyó ta saátu ta va̱ása ndáayó ña̱ táku inkana. Tá ndáayó ña̱ tákuyó ta íxato̱ʼóyó ña̱ táku inkana náʼa̱yó ña̱ chíndayáʼviyó regalo ña̱ ta̱xi Jehová ndaʼa̱yó.
NÁ SAKUAʼAKAYÓ XA̱ʼA̱ÑA
Ná kotoyó sava ki̱ʼva ña̱ na̱ʼa̱yó ña̱ táxiyó tíxa̱ʼvi xa̱ʼa̱ ña̱ tákuyó.
3. Kundaa miíún ña̱ va̱ása kiʼin kue̱ʼe̱ yóʼó
Na̱ ki̱ndo̱o xíʼin Jehová ña̱ keʼéna ña̱ kúni̱ra, chíka̱a̱na ndee̱ ña̱ keʼéna nda̱a̱ táki̱ʼva kúni̱ra. Nda̱taxina ña̱ tákuna ndaʼa̱ Ndióxi̱ nda̱a̱ táki̱ʼva íyo iin sacrificio ña̱ yi̱i̱, xa̱ʼa̱ ña̱kán xíniñúʼu kundaanaña. Kaʼvindó Romanos 12:1, 2 ta ka̱ʼa̱nndó xa̱ʼa̱ ña̱yóʼo:
-
¿Nda̱chun xíniñúʼu kundaún miíún ña̱ va̱ása kiʼin kue̱ʼe̱ yóʼó?
-
¿Ndáa ki̱ʼva kivi keʼún ña̱yóʼo?
4. Kundaa ña̱ tákún ta saátu ña táku inkana
Ña̱ Biblia táxiña consejo ndaʼa̱yó ña̱ ná kuxíkayó nu̱ú nda̱a̱ ndáaka ña̱ kivi sáxo̱ʼvi̱ miíyó. Kotondó VIDEO ta kiʼinndó kuenta ndáaña kivi keʼéyó ña̱ va̱ása kundoʼoyó iin tu̱ndóʼo.
Kaʼvindó Proverbios 22:3 ta ka̱ʼa̱nndó ña̱ kivi keʼé iinna tasaá va̱ása kundoʼona tu̱ndóʼo...
-
... ti̱xin veʼena.
-
... nu̱ú káchíñuna.
-
... tá sísikína.
-
... tá ku̱a̱ʼa̱nna xíʼin carro.
5. Ixato̱ʼó ña̱ táku na̱ va̱lí na̱ ta̱ʼán kaku
Liviní ni̱ka̱ʼa̱n ta̱ David xa̱ʼa̱ ña̱ táku na̱ yiví nda̱a̱ tá va̱xi kuaʼnuna ti̱xin siʼína. Káʼvindó Salmo 139:13-17 ta ka̱ʼa̱nndó xa̱ʼa̱ ña̱yóʼo:
-
Nu̱ú Jehová, ¿ama kíxáʼa ña̱ táku iin na̱ yiví: tá ndíka̱a̱kana ti̱xin siʼína á tá xa̱a̱ kákuvana?
Ley ña̱ ta̱xi Jehová ndaʼa̱ na̱ ñuu Israel xi̱ndaaña ná ñaʼá ná xi̱ñuʼu se̱ʼe ta saátu ña̱ loʼo ña̱ xi̱ndika̱a̱ ti̱xinná. Káʼvindó Éxodo 21:22, 23 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva xíto Jehová tá iin na̱ yiví xi̱xaʼnína iin ña̱ loʼo ña̱ ta̱ʼán kaku ní su̱ví xa̱ʼa̱ ña̱ kúni̱ miína kúú ña̱ ni̱xikeʼéna ña̱yóʼo?
-
Tasaá, ¿ndáaña ndóʼora tá ná keʼéna ña̱yóʼo xa̱ʼa̱ ña̱ kúni̱ miína? b
-
Ta yóʼó, ¿ndáaña túviún xíʼin ña̱ ndákanixi̱ní Ndióxi̱?
Nda̱a̱ iin ñá ñaʼá ñá chíndayáʼviní ña̱ táku, kivi ndakanixi̱níñá ña̱ sanúuñá se̱ʼeñá kúú iin ña̱ va̱ʼaníka keʼéñá. Kaʼvindó Isaías 41:10 ta ka̱ʼa̱nndó xa̱ʼa̱ ña̱yóʼo:
-
Tá íxandúxana xíʼin iin ñá ñaʼá ña̱ sanúuñá se̱ʼeñá, ¿ndáana xíniñúʼu ka̱ʼa̱nñá xíʼin ña̱ chindeétáʼanna xíʼinñá? ¿Nda̱chun?
ÑA̱ KÁʼA̱N SAVA NA̱ YIVÍ: “Iin tá iin ná ñaʼá xíniñúʼu ndaka̱xinná á sanúuná se̱ʼená á va̱ása. Saáchi miíná xíniñúʼu ndaka̱xin ndáaña keʼéná”.
-
¿Ndáaña sáxi̱nu-iniún ña̱ ndáyáʼviní ña̱ táku iin ñá ñúʼu se̱ʼe nu̱ú Jehová ta saátu ña̱ loʼo ña̱ ndíka̱a̱ ti̱xinñá?
ÑA̱ XA̱A̱ SA̱KUAʼAYÓ
Ña̱ tákuyó iin regalo Jehová kúúña, ña̱ Biblia sánáʼa̱ña ña̱ xíniñúʼu ixato̱ʼóyóña, kundaayóña ta kuʼvi̱-iniyó kuniyó ña̱ tákuyó ta saátu ña̱ táku inkana.
Ná ndakaʼányó xa̱ʼa̱ ña̱yóʼo
-
¿Nda̱chun va̱ʼa kúnda̱a̱-iniún ña̱ nu̱ú Jehová ndáyáʼviní ña̱ táku na̱ yiví?
-
¿Ndáaña ndóʼo Jehová tá iinna xáʼnína miína á xáʼnína inka na̱ yiví?
-
¿Ndáaña kútóokaún xa̱ʼa̱ ña̱ tákún?
NANDUKÚKA XA̱ʼA̱ÑA
¿Ndáa ki̱ʼva taxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira ña̱ tákuyó?
¿Á kivi ixakáʼnu-ini Ndióxi̱ xa̱ʼa̱ iin ñaʼá ñá sa̱núu se̱ʼe tá ya̱chi̱?
“¿Ndáaña káʼa̱n Biblia xa̱ʼa̱ ña̱ sánúuna se̱ʼena?” (Artículo ña̱ va̱xi nu̱ú jw.org)
Koto ndáaña ndákanixi̱ní Ndióxi̱ xa̱ʼa̱ ña̱ tákuyó ta saátu xa̱ʼa̱ ña̱ ndákanixi̱níyó kusíkíyó.
“¿Á kivi kusíkíyó nu̱ú kivi kuviyó?” (¡Despertad!, 8 tí octubre ku̱i̱ya̱ 2000)
Tá iin na̱ yiví ndákanixi̱nína ña̱ kaʼnína miína, koto consejo ña̱ káʼa̱n Biblia xa̱ʼa̱ ña̱yóʼo.
a Jehová ndíʼi̱ní-inira xa̱ʼa̱ na̱ ndákava-ini (Salmo 34:18). Ta̱yóʼo kúnda̱a̱-inira xíʼin ña̱ ndóʼo na̱ yiví na̱ ndákava-ini ta ndákanixi̱nína ña̱ kaʼnína miína, ta kúni̱ra chindeétáʼanra xíʼin na̱ ndóʼo saá. Koto nda̱chun va̱ʼaní consejo ña̱ táxira ndaʼa̱yó, kaʼvi artículo ña̱ naní “¿Á kivi chindeétáʼan Biblia xíʼi̱n tá va̱ása kúni̱kai̱ kutakui̱ ta kúni̱i̱ kaʼníi̱ miíi̱?”, ña̱ va̱xi ti̱xin ña̱ táʼví “Nandukúka xa̱ʼa̱ña” ña̱ va̱xi ti̱xin ña̱ lección yóʼo.
b Ná xa̱a̱ sa̱núu se̱ʼe tá ya̱chi̱ va̱ása xíniñúʼu chika̱a̱ná ku̱a̱chika miíná xa̱ʼa̱ ña̱yóʼo; Jehová íyo tu̱ʼvara ña̱ ixakáʼnu-inira xa̱ʼa̱ná. Ndaniʼíkandó ña̱ káʼa̱n xa̱ʼa̱ ña̱yóʼo nu̱ú artículo ña̱ naní “¿Ndáaña káʼa̱n ña̱ Biblia xa̱ʼa̱ ña̱ sánúuna se̱ʼena?”, va̱xiña ti̱xin táʼví “Nandukúka xa̱ʼa̱ña” nu̱ú ña̱ lección yóʼo.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
