Ndakanixi̱ní xa̱ʼa̱ iin ñaʼá ñá íyo se̱ʼe ña̱ ndásaviíñá ta̱ loʼo se̱ʼeñá ña̱ ku̱ʼu̱nra escuela. Ñáyóʼo kíʼinñá kuenta xíʼinra ña̱ xa̱a̱ chi̱chira, ta saátu limpio íyo ti̱ko̱to̱ra ta̱ vií náʼa̱ña. Ña̱yóʼo chíndeétáʼanña xíʼinra ña̱ va̱ása kiʼin kue̱ʼe̱ra ta saátu náʼa̱ña nu̱ú inkana ña̱ ndíʼi̱-ini na̱ yivára xa̱ʼa̱ra. Jehová kúú yiváyó ta kúni̱ra xínira miíyó saátu kúni̱ra ña̱ limpio ná kooyó ta saátu vií ná koo ña̱ kéʼéyó xíʼin ña̱ ndákanixi̱níyó. Ña̱ va̱ʼa miíyó kúú ña̱ limpio kooyó ta saátu káʼa̱n va̱ʼaña xa̱ʼa̱ Ndióxi̱.

1. ¿Ndáa ki̱ʼva limpio kooyó?

Jehová káʼa̱nra xíʼinyó: “Koondó na̱ yi̱i̱” (1 Pedro 1:​16). Ña̱ va̱ʼa kooyó na̱ yiví yi̱i̱, xíniñúʼu limpio kooyó ta saátu vií koo ña̱ kéʼéyó xíʼin ña̱ ndákanixi̱níyó. Náʼa̱yó ña̱ limpio íyoyó tá chíchiyó ta saátu tá limpio íyo ti̱ko̱to̱yó, ta veʼeyó vií íyoña ta saátu carroyó limpio íyonú. Ta saátu ndáya̱kúnyó Salón ña̱ Reino. Tá limpio íyoyó sana xa̱a̱ inkana ndasakáʼnuna Jehová (2 Corintios 6:​3, 4).

2. ¿Ndáaña kǒo xíniñúʼu keʼéyó ña̱ va̱ʼa limpio kooyó?

Ña̱ Biblia táxiña consejo yóʼo ndaʼa̱yó: “Ná kǒo ixayaku̱a̱yó ku̱ñuyó ni ña̱ ndákanixi̱níyó” (2 Corintios 7:1). Xa̱ʼa̱ ña̱kán kǒo xíniñúʼuyó nda̱a̱ ni iin ña̱ʼa ña̱ kivi ixayaku̱a̱ ku̱ñuyó á ña̱ ndákanixi̱níyó. Xa̱ʼa̱ ña̱ kúni̱yó sakusi̱íyó-ini Jehová chíka̱a̱níyó ndee̱ ña̱ va̱ása ndakanixi̱níyó xa̱ʼa̱ ña̱ kini (Salmo 104:​34). Ta saátu chíka̱a̱yó ndee̱ ña̱ viíní ná koo ña̱ káʼa̱nyó (kaʼvi Colosenses 3:8).

¿Ndáa inka ña̱ʼa kivi ixayaku̱a̱ miíyó, ña̱ kéʼéyó ta saátu ña̱ ndákanixi̱níyó? Íyo sava ña̱ʼa ña̱ kivi ixayaku̱a̱ ku̱ñuyó xa̱ʼa̱ ña̱kán va̱ása xíniñúʼuyó tabaco yuku̱ ndaʼa̱ tú coca ni va̱ása xíniñúʼuyó droga, ta va̱ása xíʼiyó ku̱a̱ʼání ta̱tán tá kǒo xíniñúʼuyó ña̱yóʼo. Ndáayó miíyó ta saátu náʼa̱yó ña̱ íxato̱ʼóyó ña̱ tákuyó. Tá kúú ña̱ va̱ʼa limpio koo ña̱ kéʼé iin na̱ yiví á ña̱ ndákanixi̱nína xíniñúʼu chika̱a̱na ndee̱ ña̱ va̱ása keʼéna ña̱ yaku̱a̱ tá kúú ña̱ kusíkí ndaʼa̱na xíʼin kaʼána á ña̱ kotona pornografía (Salmo 119:​37; Efesios 5:5). Kivi ixayo̱ʼvi̱ña xíʼinyó sandákooyó ña̱yóʼo xa̱ʼa̱ ña̱ xa̱a̱ ku̱a̱ʼá tiempo kéʼéyóña, soo Jehová íyo tu̱ʼvara ña̱ chindeétáʼanra xíʼinyó (kaʼvi Isaías 41:​13).

 NÁ SAKUAʼAKAYÓ XA̱ʼA̱ÑA

3. Tá limpio íyoyó ndásakáʼnuyó Jehová

Tá káʼviyó ley ña̱ ta̱xi Jehová ndaʼa̱ na̱ ñuu Israel tiempo xi̱naʼá, kúnda̱a̱-iniyó ña̱ ndáyáʼviní ña̱ limpio kooyó nu̱úra. Kaʼvindó Éxodo 19:​10 xíʼin 30:​17-​19, ta ka̱ʼa̱nndó xa̱ʼa̱ ña̱yóʼo:

• ¿Ndáaña káʼa̱n versículo yóʼo xa̱ʼa̱ ña̱ ndákanixi̱ní Jehová ña̱ xíniñúʼu limpio kooyó?

• ¿Ndáaña kivi keʼún ña̱ va̱ʼa chindeétáʼanña xíʼún ña̱ ndiʼi ki̱vi̱ limpio koún?

Ña̱ va̱ʼa kooyó na̱ yiví limpio xíniñúʼu taváyó tiempo ta saátu chika̱a̱yó ndee̱ ña̱ va̱ʼa keʼéyóña. Soo kiviva keʼéyó ña̱yóʼo ni nda̱a̱ ndáaka nu̱ú íyoyó ni kúúyó na̱ ku̱i̱ká á na̱ nda̱ʼví. Kotondó VIDEO ta ka̱ʼa̱nndó xa̱ʼa̱ ña̱yóʼo:

• Tá na̱ yiví na̱ nátúʼunyó xíʼin xítona ña̱ limpio íyo ña̱ kúúmiíyó, ¿á kivi chindeétáʼan ña̱yóʼo xíʼinna ña̱ xa̱a̱na ixato̱ʼókana Jehová? ¿Nda̱chun?

4. Kǒo keʼékaún ña̱ va̱ása va̱ʼa

Tá xáʼmiún, á xíʼún ku̱a̱ʼá ta̱tán á xíniñúʼún droga, sana kúnda̱a̱va-iniún ña̱ yo̱ʼvi̱ní sandákoún ña̱yóʼo. Iin ña̱ kivi keʼún kúú ña̱ ndakanixi̱níún ndáaña kéʼé ña̱yóʼo xíʼún. Kaʼvindó Mateo 22:​37-​39, ta ka̱ʼa̱nndó xa̱ʼa̱ ña̱ tabaco á inkaka ña̱ʼa ña̱ sándiʼi-xa̱ʼa̱ ña̱ vií kítáʼan iin na̱ yiví...

• ... xíʼin Jehová.

• ... xíʼin na̱ veʼena á inkaka na̱ yiví.

Ndakanixi̱ní xa̱ʼa̱ ña̱ kivi keʼún ña̱ va̱ʼa sandákoún ña̱ va̱ása va̱ʼa kéʼún. a Kotondó VIDEO.

Kaʼvindó Filipenses 4:​13 ta ka̱ʼa̱nndó xa̱ʼa̱ ña̱yóʼo:

• ¿Á túviún ña̱ ka̱ʼa̱nyó xíʼin Ndióxi̱ ndiʼi ki̱vi̱, ña̱ kaʼviyó Biblia ta saátu ña̱ ku̱ʼu̱nyó reunión, kivi taxiña ndee̱ ndaʼa̱ iin na̱ yiví ña̱ va̱ʼa sandákoona ña̱ va̱ása va̱ʼa kéʼéna? ¿Nda̱chun ndákanixi̱níún saá?

 5. Kǒo keʼún ña̱ kini ta va̱ása ndakanixi̱níún xa̱ʼa̱ña

Kaʼvindó Colosenses 3:5 ta ka̱ʼa̱nndó xa̱ʼa̱ ña̱yóʼo:

• ¿Nda̱chun va̱ʼa kúnda̱a̱-iniyó ña̱ pornografía, ña̱ sexteo b xíʼin ña̱ kusíkí ndaʼa̱na xíʼin kaʼánna iin ña̱ kini kúúña nu̱ú Jehová?

• ¿Á ña̱ va̱ʼa kúú ña̱ káʼa̱n Jehová xíʼinyó ña̱ limpio ná koo ña̱ kéʼéyó ta saátu ña̱ ndákanixi̱níyó? ¿Nda̱chun?

Koto ndáa ki̱ʼva sandákoún ña̱ ndakanixi̱níún xa̱ʼa̱ ña̱ yaku̱a̱. Kotondó VIDEO.

Ta̱ Jesús ni̱ka̱ʼa̱nra xa̱ʼa̱ iin ña̱ sánáʼa̱ miíyó ndáaña xíniñúʼu keʼéyó ña̱ va̱ʼa limpio kooyó ta saátu ña̱ kéʼéyó xíʼin ña̱ ndákanixi̱níyó. Kaʼvindó Mateo 5:​29, 30 ta ka̱ʼa̱nndó xa̱ʼa̱ ña̱yóʼo:

• Ta̱ Jesús va̱ása ni̱ka̱ʼa̱nra ña̱ ná sáxo̱ʼvi̱yó miíyó, chi ña̱ xi̱kuni̱ra kachira kúú ña̱ ná kíʼinyó kuenta xíʼin ña̱ kéʼéyó. ¿Ndáaña xíniñúʼu keʼéyó tasaá va̱ása ndakanikaxi̱níyó xa̱ʼa̱ ña̱ yaku̱a̱? c

Tá xa̱a̱ chíka̱ún ndee̱ ña̱ va̱ása ndakanixi̱níún xa̱ʼa̱ ña̱ yaku̱a̱, ndakaʼán chi nu̱ú Jehová ndáyáʼviní ña̱ chíka̱ún ndee̱ ña̱ sándakoún ña̱ va̱ása va̱ʼa. Kaʼvindó Salmo 103:​13, 14 ta ka̱ʼa̱nndó xa̱ʼa̱ ña̱yóʼo:

• Tá íxayo̱ʼvi̱ña xíʼún ña̱ sandákoún keʼún iin ña̱ yaku̱a̱, ¿á túviún ña̱ kivi chindeétáʼan ña̱ versículo yóʼo xíʼún? ¿Nda̱chun?

 ÑA̱ XA̱A̱ SA̱KUAʼAYÓ

Sákusi̱íyó-ini Jehová ta limpio íyoyó, ta saátu ña̱ ndákanixi̱níyó xíʼin ndiʼi ña̱ kéʼéyó.

Ná ndakaʼányó xa̱ʼa̱ ña̱yóʼo

• ¿Nda̱chun ndáyáʼviní limpio kooyó?

• ¿Ndáaña keʼéyó ña̱ va̱ʼa limpio kooyó?

• ¿Ndáaña keʼéyó ña̱ va̱ʼa ndiʼi tiempo limpio koo ña̱ kéʼéyó ta saátu ña̱ ndákanixi̱níyó?