LECCIÓN 41
¿Ndáaña káʼa̱n Biblia xa̱ʼa̱ ña̱ ku̱su̱n xíʼin táʼanna?
Ku̱a̱ʼání na̱ yiví va̱ása kútóona ka̱ʼa̱nna xa̱ʼa̱ ña̱ ku̱su̱n xíʼin táʼanna. Soo, tá káʼa̱n tu̱ʼun Ndióxi̱ xa̱ʼa̱ ña̱ ku̱su̱n xíʼin táʼan na̱ yiví, káxiníva káʼa̱nña xa̱ʼa̱ña ta xíʼin ña̱ to̱ʼó káʼa̱nña xa̱ʼa̱ ña̱yóʼo. Ña̱ káʼa̱n Biblia xa̱ʼa̱ ña̱yóʼo va̱ʼaní chíndeétáʼanña xíʼinyó. Ta va̱ʼa íyo ña̱ káʼa̱nña chi tu̱ʼun Jehová kúúña, ta̱kán kúú ta̱ i̱xava̱ʼa miíyó ta xíni̱ra ndáaña kúú ña̱ va̱ʼa keʼéyó. Ta̱kán náʼa̱ra nu̱úyó ndáaña kúú ña̱ va̱ʼa keʼéyó tasaá sakusi̱íyó-inira xíʼin ña̱ kéʼéyó tasaá xa̱a̱yó kutakuyó ndiʼi tiempo.
1. ¿Ndáaña káʼa̱n Jehová xa̱ʼa̱ ña̱ ku̱su̱n xíʼin táʼanna?
Jehová i̱xava̱ʼara ta̱a xíʼin ñaʼá ña̱ va̱ʼa ku̱su̱n xíʼin táʼanna, ta nda̱saa na̱ ti̱ndaʼa̱ kuití kivi keʼé ña̱yóʼo. Ta su̱ví xa̱ʼa̱ ña̱ koo se̱ʼe kuitína kúú ña̱yóʼo chi saátu keʼénaña ña̱ va̱ʼa na̱ʼa̱na ña̱ kúʼvi̱-inina xíni táʼanna ta va̱ʼa kunina. Xa̱ʼa̱ ña̱kán tu̱ʼun Ndióxi̱ káchiña: “Kusi̱í-ini xíʼin ñá ti̱ndaʼa̱ xíʼún tá ni̱xi̱yo loʼún” (Proverbios 5:18, 19). Jehová ndátura ña̱ na̱ ndásakáʼnu miíra nda̱kú ná koo inina xíʼin na̱ ti̱ndaʼa̱ xíʼinna. Xa̱ʼa̱ ña̱kán na̱ ndásakáʼnu Jehová va̱ása xíniñúʼu ku̱su̱nna xíʼin na̱ va̱ása níti̱ndaʼa̱na xíʼin (kaʼvi Hebreos 13:4).
2. ¿Ndáaña kúni̱ kachi ña̱ va̱ása ku̱su̱nna xíʼin na̱ va̱ása níti̱ndaʼa̱na xíʼin?
Ña̱ Biblia káchiña “na̱ yiví na̱ kéʼé ku̱a̱chi kini [...] va̱ása ki̱ʼvina ti̱xin Reino Ndióxi̱” (1 Corintios 6:9, 10). Tu̱ʼun griego ña̱ xi̱niñúʼu na̱ ka̱ʼyí Biblia tá ni̱ka̱ʼa̱nna xa̱ʼa̱ ku̱a̱chi kini kúú pornéia. Ña̱yóʼo káʼa̱nña xa̱ʼa̱ 1) tá kísi̱na xíʼin na̱ ta̱ʼán tindaʼa̱na xíʼin, a 2) tá kísi̱ iin ta̱a xíʼin inka ta̱a á iin ñaʼá xíʼin inka ñaʼá 3) tá kéʼéna ña̱ kini xíʼin kití. Tá va̱ása kíʼviyó ku̱a̱chi kini sákusi̱íyó-ini Jehová ta saátu ndákiʼinyó ku̱a̱ʼá ña̱ va̱ʼa (1 Tesalonicenses 4:3).
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi keʼún ña̱ va̱ása ki̱ʼviún ku̱a̱chi kini ta ndáaña va̱ʼa ndakiʼún tá kǒo kéʼún ku̱a̱chi kini.
3. Kuxíkándó nu̱ú ku̱a̱chi kini
Ta̱ José iin ta̱a ta̱ nda̱kú ni̱xi̱yo ini xíʼin Ndióxi̱ chi̱ka̱a̱níra ndee̱ ña̱ kǒo ki̱ʼvira ku̱a̱chi kini. Kaʼvindó Génesis 39:1-12 ta ka̱ʼa̱nndó xa̱ʼa̱ ña̱yóʼo:
-
¿Nda̱chun xi̱nu ta̱ José? (Kotondó versículo 9).
-
¿Á ña̱ va̱ʼa kúú ña̱ ke̱ʼé ta̱ José? ¿Nda̱chun?
¿Ndáa ki̱ʼva kundiku̱n na̱ va̱lí kúa̱an yichi̱ ta̱ José ta kuxíkána nu̱ú ku̱a̱chi kini? Kotondó VIDEO.
Jehová kúni̱ra ña̱ ndiʼiyó ná kǒo keʼéyó ku̱a̱chi kini. Kaʼvindó 1 Corintios 6:18 ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi sandákava iin na̱ yiví ña̱ keʼéna ku̱a̱chi kini?
-
¿Ndáa ki̱ʼva kuxíkáún nu̱ú ku̱a̱chi kini?
4. Kuchiñuvaún nu̱ú ña̱ kivi sandákava yóʼó
¿Ndáaña kivi ixayo̱ʼvi̱ xíʼinyó ña̱ kuxíkáyó nu̱ú ku̱a̱chi kini? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Ta̱ hermano ta̱ xi̱niyó nu̱ú video tá ki̱ʼinra kuenta ña̱ va̱ása va̱ʼa íyo ña̱ kéʼéra saáchi kivi ki̱ʼvira ku̱a̱chi ta va̱ása nda̱kúka koo inira xíʼin ñá síʼira, ¿ndáaña ke̱ʼéra?
Nda̱a̱ na̱ nda̱kú íyo ini xíʼin Ndióxi̱ xíniñúʼu chika̱a̱na ndee̱ ña̱ kǒo ndakanixi̱nína xa̱ʼa̱ ña̱ va̱ása va̱ʼa, ¿ndáaña keʼún ña̱ kǒo ndakanixi̱níún xa̱ʼa̱ ña̱ kini? Kaʼvindó Filipenses 4:8 ta ka̱ʼa̱nndó xa̱ʼa̱ ña̱yóʼo:
-
¿Ndáa ña̱ʼa xíniñúʼu ndakanixi̱níyó xa̱ʼa̱?
-
Tá ná kaʼviyó Biblia ta ná kundi̱ʼi̱-iniyó keʼéyó chiñu nu̱ú Jehová, ¿á chindeétáʼan ña̱yóʼo xíʼinyó ña̱ va̱ása ki̱ʼviyó ku̱a̱chi? ¿Nda̱chun?
5. Ña̱ káʼa̱n Jehová chíndeétáʼanña xíʼinyó
Jehová kúnda̱a̱-inira ndáaña kúú ña̱ va̱ʼa chindeétáʼan xíʼinyó. Xa̱ʼa̱ ña̱kán káʼa̱nra xíʼinyó ña̱ ná kǒo keʼéyó ku̱a̱chi kini ta káʼa̱ntura xíʼinyó ndáaña va̱ʼa ndakiʼinyó tá kǒo kéʼéyó ña̱yóʼo. Kaʼvindó Proverbios 7:7-27 á kotondó VIDEO, ta ka̱ʼa̱nndó xa̱ʼa̱ ña̱yóʼo:
-
¿Ndáaña kúú ña̱ ke̱ʼé ta̱ loʼo yóʼo tasaá nda̱kavara ndaʼa̱ tu̱ndóʼo? (Kotondó Proverbios 7:8, 9).
-
Nda̱a̱ táki̱ʼva káchi Proverbios 7:23, 26, ku̱a̱ʼání tu̱ndóʼo va̱xi nu̱ú na̱ kíʼvi ku̱a̱chi kini, ¿ndáa tu̱ndóʼo kǒo kixi nu̱úyó tá va̱ása kéʼéyó ku̱a̱chi kini?
-
Ña̱ kǒo keʼéyó ña̱ yaku̱a̱, ¿ndáa ki̱ʼva chíndeétáʼanña xíʼinyó ña̱ kutakuyó ndiʼi tiempo?
Savana ndákanixi̱nína ña̱ káʼa̱n Biblia ña̱ va̱ása va̱ʼa ku̱su̱n iin ta̱a xíʼin inka ta̱a á iin ñaʼá xíʼin inka ñaʼá náʼa̱ña ña̱ va̱ása kúʼvi̱-ini Jehová xínirana. Soo Jehová Ndióxi̱ kúʼvi̱va-inira xínira ndiʼi na̱ yiví ta kúni̱ra ná kutakuna ndiʼi tiempo, soo ña̱ va̱ʼa ndakiʼinyó ña̱yóʼo xíniñúʼu keʼéyó ña̱ káʼa̱nra xíʼinyó. Kaʼvindó 1 Corintios 6:9-11 ta ka̱ʼa̱nndó xa̱ʼa̱ ña̱yóʼo:
-
Ña̱ kutóo iin ta̱a inka ta̱a á iin ñaʼá inka ñaʼá, ¿á iinlá ña̱yóʼo kúú ña̱ va̱ása va̱ʼa nu̱ú Ndióxi̱?
Ña̱ va̱ʼa sakusi̱íyó-ini Ndióxi̱ ndiʼiyó xíniñúʼu nasamayó ña̱ kéʼéyó, ¿á íyo ña̱ va̱ʼa ndakiʼinyó tá ná keʼéyó ña̱yóʼo? Kaʼvindó Salmo 19:8, 11 ta ka̱ʼa̱nndó xa̱ʼa̱ ña̱yóʼo:
-
¿Ndáaña túviún, á va̱ʼa ña̱ káʼa̱n Jehová xíʼinyó? ¿Nda̱chun ndákanixi̱níún saá?
Jehová xa̱a̱ chíndeétáʼanra xíʼin ku̱a̱ʼánína ña̱ kandíxana ña̱ káʼa̱nra, ta saátu chindeétáʼanra xíʼún.
ÑA̱ KÁʼA̱N SAVA NA̱ YIVÍ: “Kǒo ku̱a̱chiví ña̱ ku̱su̱n na̱ yiví na̱ ta̱ʼán tindaʼa̱ xíʼin táʼan nani kúʼvi̱-inina xíni táʼanna”.
-
¿Ndáaña ndákanixi̱níún?
ÑA̱ XA̱A̱ SA̱KUAʼAYÓ
Jehová i̱xava̱ʼara ta̱a xíʼin ñaʼá ña̱ va̱ʼa ku̱su̱n xíʼin táʼanna, ta nda̱saa na̱ ti̱ndaʼa̱ kuití kivi keʼé ña̱yóʼo.
Ná ndakaʼányó xa̱ʼa̱ ña̱yóʼo
-
¿Ndáaña kéʼé na̱ yiví káʼa̱nyó ku̱a̱chi kini xíʼin?
-
¿Ndáaña chindeétáʼan xíʼinyó ña̱ va̱ása ki̱ʼviyó ku̱a̱chi kini?
-
¿Ndáaña va̱ʼa ndákiʼinyó tá xíniso̱ʼoyó ña̱ káʼa̱n Jehová xíʼinyó?
NANDUKÚKA XA̱ʼA̱ÑA
Kaʼvi nda̱chun kúni̱ Ndióxi̱ ná ti̱ndaʼa̱ iin ta̱a xíʼin iin ñaʼá tá kúni̱na koo xíʼin táʼanna.
Sakúaʼa nda̱chun ña̱ káʼa̱n Biblia xa̱ʼa̱ ña̱ kútóo iin ta̱a inka ta̱a á iin ñaʼá inka ñaʼá va̱ása káʼa̱nña ña̱ sa̱a̱-iniyó kuniyóna.
“¿Á va̱ása va̱ʼa kutóo iin ta̱a inka ta̱a á iin ñaʼá inka ñaʼá?” (Artículo ña̱ va̱xi nu̱ú jw.org)
Kaʼvi ndáa ki̱ʼva ndáa ña̱ káʼa̱n Biblia miíyó xa̱ʼa̱ ña̱ ku̱su̱n xíʼin táʼanna.
“¿Ña̱ tiʼvindaana kaʼá táʼanna á iin ku̱a̱chi kini kúúña?” (Artículo ña̱ va̱xi nu̱ú jw.org)
¿Ndáaña chi̱ndeétáʼan xíʼin iin ta̱ xi̱kutóo ta̱a ña̱ na̱samara ña̱ kéʼéra tasaá sakúsi̱íra-ini Ndióxi̱? Kaʼvi xa̱ʼa̱ ña̱ ndo̱ora “Va̱ʼaní ke̱ʼéna xíʼi̱n”.
“Biblia chi̱ndeétáʼan xíʼinna ña̱ na̱samana” (La Atalaya, 1 tí abril ku̱i̱ya̱ 2011)
a Inka ña̱ kítáʼan xíʼin ku̱a̱chi kini yóʼo kúú ña̱ tiʼvindaana á yákundaana kaʼá táʼanna, xíʼin ña̱ xíi̱nna chí sa̱tána, ta saátu ña̱ kusíkí ndaʼa̱na xíʼin kaʼá táʼanna.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
