LECCIÓN 43
Ña̱ ndákanixi̱ní na̱ ndásakáʼnu Ndióxi̱ xa̱ʼa̱ ndixi
Iníísaá ñuyǐví xa̱a̱ síín síín ndákanixi̱ní na̱ yiví xa̱ʼa̱ ndixi. Savana, sava yichi̱ kuití xíʼina ndixi xíʼin na̱ migona. Ta inkana va̱ása xíʼina ni nda̱a̱ ndáaka ña̱ kúúmií ndixi. Ta íyotu na̱ xíʼi nda̱a̱ xínina. ¿Ndáaña káʼa̱n Biblia xa̱ʼa̱ ña̱ koʼoyó ndixi?
1. ¿Á va̱ʼa koʼoyó ndixi?
Ña̱ Biblia kǒo káʼa̱nña ña̱ va̱ása va̱ʼa koʼoyó ndixi. Nu̱úka ña̱yóʼo tu̱ʼun Ndióxi̱ káʼa̱nña xa̱ʼa̱ tá vino “tá sákusi̱í-ini na̱ yiví” ña̱ kúúrá iin regalo tá ta̱xi Jehová ndaʼa̱yó (Salmo 104:14, 15). Ta saátu ña̱ Biblia káʼa̱nña xa̱ʼa̱ na̱ ta̱a xíʼin ná ñaʼá na̱ nda̱kú ni̱xi̱yo ini xíʼin Ndióxi̱ ta xi̱xiʼina ndixi (1 Timoteo 5:23).
2. ¿Ndáa consejo táxi Biblia ndaʼa̱ na̱ kúni̱ koʼo ndixi?
Jehová káʼa̱nra ña̱ va̱ása va̱ʼa koʼona nda̱a̱ xi̱nina ta saátu ña̱ koʼona ku̱a̱ʼání ndixi (Gálatas 5:21). Ña̱ Biblia káchiña: “Va̱ása kutáʼún xíʼin na̱ xíʼi ku̱a̱ʼá vino” (Proverbios 23:20). Xa̱ʼa̱ ña̱kán tá nda̱kaxinyó koʼoyó loʼo ndixi tá íyo iinlá miíyó á ndóo inkana xíʼinyó, ná va̱ása koʼoyó nda̱a̱ xi̱niyó ta kǒo kunda̱a̱ka-iniyó xíʼin ña̱ kéʼéyó á xíʼin ña̱ káʼa̱nyó á nda̱a̱ sana va̱ʼa iniyó. Ta saátu va̱ása xíniñúʼu koʼoyó ku̱a̱ʼání ndixi nda̱a̱ kiʼin kue̱ʼe̱ miíyó. Tá kǒo kívi koʼo loʼo kuitíyó ndixi va̱ʼaka ná va̱ása koʼoyórá.
3. ¿Ndáa ki̱ʼva náʼa̱yó ña̱ íxato̱ʼóyó ña̱ ndáka̱xin inkana keʼéna?
Iin tá iinyó xíniñúʼu ndaka̱xin á koʼoyó ndixi á va̱ása. Xa̱ʼa̱ ña̱kán va̱ása va̱ʼa ka̱ʼa̱nyó ña̱ va̱ása va̱ʼa xa̱ʼa̱ na̱ kúni̱ koʼo loʼo ndixi. Ta kǒo ixandúxayó xíʼin inkana tá va̱ása kúni̱na koʼona ndixi (Romanos 14:10). Ta saátu va̱ása va̱ʼa koʼoyó ndixi tá va̱ása va̱ʼa kúni̱ inkana xíʼinña (kaʼvi Romanos 14:21). Ña̱kán miíyó na̱ ndásakáʼnu Ndióxi̱ “ná keʼéyó ña̱ kivi chindeétáʼan xíʼin inkana, ta̱ su̱ví nda̱saa iinlá ña̱ kivi chindeétáʼan xíʼin miíyó” (kaʼvi 1 Corintios 10:23, 24).
NÁ SAKUAʼAKAYÓ XA̱ʼA̱ÑA
Ná kotoyó sava ña̱ va̱xi nu̱ú Biblia ña̱ chindeétáʼan xíʼún á koʼún ndixi á va̱ása ta nda̱saará koʼún. Ta ná kotoyó sava ña̱ kivi keʼún tá kúni̱ún sandákoúnrá.
4. Ndaka̱xin á koʼún ndixi á va̱ása
¿Ndáaña xi̱ndakanixi̱ní ta̱ Jesús xa̱ʼa̱ ña̱ koʼona ndixi? Ña̱ va̱ʼa kunda̱a̱-iniyó xa̱ʼa̱ ña̱yóʼo ná kotoyó milagro ña̱ nu̱ú va̱ʼa ke̱ʼéra. Kaʼvindó Juan 2:1-11 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱niyó nu̱ú ña̱ relato yóʼo, ¿ndáaña ndákanixi̱ní ta Jesús xa̱ʼa̱ ndixi ta saátu xa̱ʼa̱ na̱ xíʼirá?
-
Xa̱ʼa̱ ña̱ va̱ása níka̱ʼa̱n ta̱ Jesús ña̱ va̱ása va̱ʼa koʼona ndixi, ¿ndáaña xíniñúʼu ndakanixi̱ní na̱ ndásakáʼnu Ndióxi̱ xa̱ʼa̱ na̱ kúni̱ koʼorá?
Soo ni kiviva koʼo na̱ ndásakáʼnu Ndióxi̱ ndixi kǒo kúni̱ kachiña ña̱ ndiʼi tiempo keʼéna ña̱yóʼo. Kaʼvindó Proverbios 22:3 ta ka̱ʼa̱nndó á va̱ʼa koʼo na̱ yiví ndixi tá kéʼéna ña̱yóʼo:
-
Tá kávana carro á inkaka máquina.
-
Tá ñúʼu se̱ʼe iin ñaʼá.
-
Tá ni̱ka̱ʼa̱n na̱ doctor xíʼinna ña̱ va̱ása va̱ʼa koʼona ndixi.
-
Tá va̱ása kúchiñuna ka̱ʼnu̱-inina ña̱ loʼo kuití ndixi koʼona.
-
Tá káʼa̱n ley ña̱ va̱ása va̱ʼa koʼona ndixi.
-
Tá íyoún xíʼin iin na̱ va̱ása kúni̱ koʼo ndixi á sa̱ndákoona ña̱ koʼonará.
¿Á xíniñúʼu taxiún ndixi koʼona vikó nu̱ú tíndaʼa̱na á inkaka vikó? Ña̱ va̱ʼa kunda̱a̱-iniún ndáaña keʼún, kotondó VIDEO.
Kaʼvindó Romanos 13:13 xíʼin 1 Corintios 10:31, 32. Tándi̱ʼi ka̱ʼvindó iin tá iin texto yóʼo, ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva chindeétáʼan ña̱ texto yóʼo xíʼún ña̱ vií koo ña̱ ndaka̱xiún keʼún ta sakúsi̱íún-ini Jehová?
Iin tá iin na̱ ndásakáʼnu Ndióxi̱ ndaka̱xin á koʼona ndixi á va̱ása. Sava yichi̱ ndaka̱xinna koʼona ndixi á sava yichi̱ va̱ása koʼonará.
5. Ndaka̱xin nda̱saa ndixi koʼún
Tá kúni̱ún koʼún ndixi ndakaʼán chi nu̱ú Jehová va̱ʼava ña̱ koʼoyó soo káʼa̱ntura ña̱ va̱ása va̱ʼa koʼoyó ku̱a̱ʼánírá. ¿Nda̱chun? Kaʼvindó Oseas 4:11, 18 ta ka̱ʼa̱nndó xa̱ʼa̱ ña̱yóʼo:
-
¿Ndáaña kuu tá iin na̱ yiví ku̱a̱ʼání ndixi ná koʼona?
¿Ndáaña kivi chindeétáʼan xíʼinyó ña̱ va̱ása ku̱a̱ʼání ndixi koʼoyó? Xíniñúʼu kiʼinyó kuenta nda̱saará koʼoyó. Kaʼvindó Proverbios 11:2 ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ʼaní tá ya̱chi̱ka ná ndaka̱xiún nda̱saa ndixi kivi koʼún?
6. Kiviva sandákoún koʼún ndixi
Koto ndáaña chi̱ndeétáʼan xíʼin iin ta̱a ña̱ sa̱ndákoora ña̱ koʼora ndixi. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña xi̱keʼé ta̱ Dimitri tá xi̱xiʼira ndixi?
-
¿Á kama sa̱ndákoora ña̱ koʼora ndixi?
-
¿Ndáaña ke̱ʼéra ña̱ va̱ʼa sa̱ndákoora ndixi?
Kaʼvindó 1 Corintios 6:10, 11 ta ka̱ʼa̱nndó xa̱ʼa̱ ña̱yóʼo:
-
¿Á iin ku̱a̱chi ndeé kúú ña̱ koʼoyó ndixi nda̱a̱ xi̱niyó? ¿Nda̱chun?
-
¿Nda̱chun va̱ʼa kúnda̱a̱-iniyó iin na̱ xíʼiní ndixi kivi sandákoonará?
Kaʼvindó Mateo 5:30 ta ka̱ʼa̱nndó xa̱ʼa̱ ña̱yóʼo:
-
Tá ni̱ka̱ʼa̱n ta̱ Jesús ña̱ xíniñúʼu kaʼndayó ndaʼa̱yó, xi̱kuni̱ra sanáʼa̱ra miíyó ña̱ xíniñúʼu sandákooyó sava ña̱ʼa tá kúni̱yó kindo̱o va̱ʼayó nu̱ú Ndióxi̱. Tá kúni̱ún sandákoún ña̱ koʼún, ¿ndáaña xíniñúʼu keʼún? a
Kaʼvindó 1 Corintios 15:33 ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi kundoʼún tá kítáʼún xíʼin na̱ xíʼi ku̱a̱ʼání ndixi?
ÑA̱ NDÁKA̱TU̱ʼUN SAVA NA̱ YIVÍ: “¿Nda̱chun va̱ása va̱ʼa koʼoyó ndixi?”.
-
¿Ndáaña ndákanixi̱níún?
ÑA̱ XA̱A̱ SA̱KUAʼAYÓ
Jehová ta̱xira ndixi ña̱ va̱ʼa kusi̱í-iniyó xíʼinrá, soo saátu káʼa̱nra ña̱ va̱ása va̱ʼa koʼoyó nda̱a̱ xi̱niyó á ña̱ koʼoyó ku̱a̱ʼání ndixi.
Ná ndakaʼányó xa̱ʼa̱ ña̱yóʼo
-
¿Ndáaña káʼa̱n Biblia xa̱ʼa̱ ndixi?
-
¿Ndáaña kundoʼoyó tá ná koʼoyó ku̱a̱ʼání ndixi?
-
¿Ndáa ki̱ʼva na̱ʼa̱yó ña̱ íxato̱ʼóyó ña̱ ndáka̱xin inkana xa̱ʼa̱ ndixi ña̱ koʼonará á va̱ása koʼonará?
NANDUKÚKA XA̱ʼA̱ÑA
¿Ndáaña xíniñúʼu kiʼin na̱ va̱lí kuenta xíʼin á koʼona ndixi á va̱ása?
Kiʼin kuenta ndáaña keʼún ña̱ va̱ʼa sandákoún ña̱ koʼún ndixi.
“Kiʼin kuenta nda̱saa ndixi koʼún” (La Atalaya, 1 tí enero ku̱i̱ya̱ 2010)
¿Á va̱ʼa keʼé na̱ ndásakáʼnu Ndióxi̱ brindi?
“Pregunta ña̱ kéʼé na̱ káʼvi tutu yóʼo” (La Atalaya, 15 tí febrero ku̱i̱ya̱ 2007)
Koto ndáaña ke̱ʼé iin ta̱a ña̱ sa̱ndákoora ndixi nu̱ú ña̱ nátúʼun xa̱ʼa̱ra “Va̱ása níxi̱chutú inii̱”.
“Biblia chi̱ndeétáʼan xíʼinna ña̱ na̱samana” (La Atalaya, 1 tí mayo ku̱i̱ya̱ 2012)
a Tá iin na̱ yiví va̱ása kívi sandákoona ña̱ koʼona ku̱a̱ʼání ndixi xíniñúʼuna ña̱ chindeétáʼan iin na̱ doctor xíʼinna. Ku̱a̱ʼání na̱ doctor káchina tá iin na̱ yiví xi̱xiʼina ku̱a̱ʼání ndixi va̱ása xíniñúʼu ndikóna koʼona nda̱a̱ ni loʼorá.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
