LECCIÓN 46
¿Nda̱chun ndataxiyó miíyó ndaʼa̱ Ndióxi̱ ta ndakuchiyó?
Tá iinna ndátaxina miína ndaʼa̱ Jehová, káʼa̱nna xíʼinra ti̱xin oración ña̱ iinlá miíra ndasakáʼnuna ta ña̱ ndáyáʼvika nu̱úna kúú ña̱ keʼéna ña̱ káʼa̱nra (Salmo 40:8). Tá xa̱a̱ nda̱kuchina saá náʼa̱na nu̱ú inkana ña̱ xa̱a̱ nda̱taxina miína ndaʼa̱ Ndióxi̱. Ña̱ ndataxiyó miíyó ndaʼa̱ Ndióxi̱ kúú iin ña̱ ndáyáʼviní keʼéyó. Ndáyáʼviníña saáchi nda̱a̱ násamaña ña̱ kéʼéyó. ¿Ndáaña chindeétáʼan xíʼún ña̱ va̱ʼa keʼún ña̱yóʼo?
1. ¿Ndáaña chindeétáʼan xíʼinyó ña̱ ndataxiyó miíyó ndaʼa̱ Jehová?
Xa̱ʼa̱ ña̱ kúʼvi̱-iniyó xíniyó Jehová ndátaxiyó miíyó ndaʼa̱ra (1 Juan 4:10, 19). Ña̱ Biblia káchiña: “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún ta xíʼin ndiʼi ndeún” (Marcos 12:30). Xíʼin ña̱ káʼa̱nyó ta saátu xíʼin ña̱ kéʼéyó náʼa̱yó ña̱ kúʼvi̱-iniyó xíniyó Jehová. Tá iin ta̱a kúʼvi̱ní-inira xínira iin ñaʼá tíndaʼa̱ra xíʼinñá, ki̱ʼva saá íyoña tá ndixa kúʼvi̱-iniyó xíniyó Jehová ndataxiyó miíyó ndaʼa̱ra ta ndakuchiyó.
2. ¿Ndáa bendición kúú ña̱ táxi Jehová ndaʼa̱ na̱ ndákuchi?
Tá ná ndakuchiún xa̱ún koún táʼan na̱ familia Jehová, ta na̱yóʼo si̱íní íyona. Tasaá kuniún ña̱ kúʼvi̱ka-ini Ndióxi̱ xínira yóʼó ta yatinka koún xíʼinra (kaʼvi Malaquías 3:16-18). Jehová xa̱a̱ra koora yiváún, ta kusi̱í-iniún kutáʼún xíʼin na̱ familiara na̱ íyo iníísaá ñuyǐví na̱ kúʼvi̱ní-ini xíni miíra ta saátu kúʼvi̱-inina xínina yóʼó (kaʼvi Marcos 10:29, 30). Tá kúma̱níka ndakuchiún siʼna xíniñúʼu keʼún sava ña̱ʼa. Xíniñúʼu sakúaʼakaún xa̱ʼa̱ Jehová, kuʼvi̱-iniún kuniúnra ta na̱ʼún ña̱ kándíxaún se̱ʼera. Saátu xíniñúʼu kindoún xíʼin Jehová ña̱ ndataxiún ña̱ tákún ndaʼa̱ra. Ta ná keʼún ndiʼi ña̱yóʼo ta ndakuchiún saá kúú ña̱ ni̱ʼún ña̱ kutakún ndiʼi tiempo. Tu̱ʼun Ndióxi̱ káchiña: “Ña̱ ndákuchindó [...] kúú ña̱ sakǎku ndóʼó vitin” (1 Pedro 3:21).
NÁ SAKUAʼAKAYÓ XA̱ʼA̱ÑA
Ná kotoyó nda̱chun ndáyáʼviní ndataxiún miíún ndaʼa̱ Jehová ta ndakuchiún.
3. Ndiʼiyó xíniñúʼu ndaka̱xin ndáana kachíñuyó nu̱ú
Tiempo xi̱naʼá na̱ ñuu Israel xi̱ndakanixi̱nína ña̱ kivi ndasakáʼnuna Jehová ta saátu ndasakáʼnuna ndióxi̱ vatá Baal. Soo va̱ása va̱ʼa níxi̱ndakanixi̱nína. Xa̱ʼa̱ ña̱kán Jehová chi̱ndaʼára ta̱ profeta Elías ña̱ ná ka̱ʼa̱nra xíʼinna ña̱ nasamana ña̱ kéʼéna. Kaʼvindó 1 Reyes 18:21 ta ka̱ʼa̱nndó xa̱ʼa̱ ña̱yóʼo:
-
¿Ndáaña nda̱kaxin na̱ ñuu Israel ke̱ʼéna?
Nda̱a̱ táki̱ʼva ke̱ʼé na̱ ñuu Israel saátu miíyó xíniñúʼu ndaka̱xinyó ndáana kachíñuyó nu̱ú. Kaʼvindó Lucas 16:13 ta ka̱ʼa̱nndó xa̱ʼa̱ ña̱yóʼo:
-
¿Á kivi ndasakáʼnuyó Jehová ta saátu ndasakáʼnuyó inkana á inkaka ña̱ʼa?
-
¿Ndáaña kivi keʼéyó ña̱ va̱ʼa koto Jehová ña̱ nda̱kaxinyó ña̱ ndasakáʼnuyó iinlá miíra?
4. Ndakanixi̱ní ña̱ kúʼvi̱ní-ini Jehová xínira yóʼó
Ku̱a̱ʼání ña̱ va̱ʼa xa̱a̱ táxi Jehová ndaʼa̱yó, ¿ndáaña kivi taxi miíyó ndaʼa̱ra? Kotondó VIDEO.
¿Ndáa ki̱ʼva xa̱a̱ náʼa̱ Jehová ña̱ kúʼvi̱-inira xínira miíyó? Kaʼvindó Salmo 104:14, 15 xíʼin 1 Juan 4:9, 10, ta ka̱ʼa̱nndó xa̱ʼa̱ ña̱yóʼo:
-
Ndiʼi ña̱ xa̱a̱ táxi Jehová ndaʼa̱yó, ¿ndáaña kúú ña̱ táxikaún tíxa̱ʼvi xa̱ʼa̱?
-
Tá ndákanixi̱níún xa̱ʼa̱ ña̱yóʼo, ¿ndáaña ndóʼún xa̱ʼa̱ Jehová?
Tá iinna táxi iin regalo ña̱ kútóoníyó, kúni̱yó ña̱ ná kunina ña̱ táxiníyó tíxa̱ʼvi ndaʼa̱na. Kaʼvindó Deuteronomio 16:17 ta ka̱ʼa̱nndó xa̱ʼa̱ ña̱yóʼo:
-
Tá ndákanixi̱níún xa̱ʼa̱ ndiʼi ña̱ ta̱xi Jehová ndaʼún, ¿á kúni̱ún taxiún iin ña̱ʼa ndaʼa̱ra? ¿Ndáaña taxiún ndaʼa̱ra?
5. Tá ná ndataxiún miíún ndaʼa̱ Ndióxi̱ ku̱a̱ʼání bendición ndakiʼún
Ku̱a̱ʼání na̱ yiví ndákanixi̱nína ña̱ kuxini ku̱a̱ʼá na̱ yiví miína, á ña̱ kaʼvi va̱ʼana, á ña̱ kuumiína ku̱a̱ʼání xu̱ʼún taxiña ña̱ si̱í koona soo, ¿á ña̱ nda̱a̱ kúú ña̱yóʼo? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Ta̱ xi̱toyó nu̱ú video ni xi̱kutóoníra fútbol, ¿nda̱chun sa̱ndákooraña?
-
Nda̱taxira miíra ndaʼa̱ Jehová ta va̱ása sísikíkara fútbol. ¿Á va̱ʼa ña̱ ke̱ʼéra túviún? ¿Nda̱chun?
Tá kúma̱níka kixáʼa ta̱ apóstol Pablo ndasakáʼnura Ndióxi̱ xi̱kuumiíra iin chiñu ña̱ ndáyáʼviní. Saáchi iin ta̱ xi̱xini va̱ʼa xa̱ʼa̱ ley na̱ judío xi̱sanáʼa̱ miíra. Soo sa̱ndákoora ndiʼiña ña̱ va̱ʼa ndasakáʼnura Ndióxi̱. Tá ni̱ya̱ʼa tiempo, ¿á ndi̱kó-inira xa̱ʼa̱ ña̱yóʼo? Kaʼvindó Filipenses 3:8 ta ka̱ʼa̱nndó xa̱ʼa̱ ña̱yóʼo:
-
¿Nda̱chun ni̱ka̱ʼa̱n ta̱ Pablo ndiʼi ña̱ʼa nda̱a̱ táki̱ʼva íyo mi̱ʼí á kuayi saá íyoña nu̱úra?
-
¿Ndáaña va̱ʼa nda̱kiʼinra xa̱ʼa̱ ndiʼi ña̱ sa̱ndákoora?
-
¿Á va̱ʼaka koo ña̱ tákún tá ná ndasakáʼnún Jehová? ¿Nda̱chun ndákanixi̱níún saá?
Tá ni̱xa̱a̱ ta̱ Pablo nda̱sakáʼnura Ndióxi̱ ku̱a̱ʼáníka ña̱ va̱ʼa nda̱kiʼinra nu̱úka ña̱ sa̱ndákoora.
ÑA̱ KÁʼA̱N SAVA NA̱ YIVÍ: “Va̱ása ndáyáʼviví ña̱ ndataxiyó miíyó ndaʼa̱ Ndióxi̱”.
-
¿Á túviún ña̱ iin ña̱ va̱ʼa kúú ña̱ ndataxiún miíún ndaʼa̱ Ndióxi̱? ¿Nda̱chun?
ÑA̱ XA̱A̱ SA̱KUAʼAYÓ
Xa̱ʼa̱ ña̱ kúʼvi̱-iniyó xíniyó Jehová ndátaxiyó miíyó ndaʼa̱ra ta ndákuchiyó.
Ná ndakaʼányó xa̱ʼa̱ ña̱yóʼo
-
¿Nda̱chun xíniñúʼu kuʼvi̱-iniyó kuniyó Jehová xíʼin ndiʼi níma̱yó ta ndasakáʼnuyóra?
-
¿Ndáaña táxi Jehová ndaʼa̱ na̱ xa̱a̱ nda̱kuchi?
-
¿Á kúni̱ún ndataxiún miíún ndaʼa̱ Jehová?
NANDUKÚKA XA̱ʼA̱ÑA
Koto nda̱chun nda̱kaxin iin ñá xíta ta saátu iin ta̱ sísikí ña̱ ndataxina miína ndaʼa̱ Jehová.
Na̱ va̱lí ndáka̱tu̱ʼunna... ¿Ndáaña xíniñúʼu keʼíi̱? Tá ndákaʼíi̱n xa̱ʼa ña̱ ke̱ʼíi̱ (6:54)
Koto ndáa xa̱ʼa̱ kúú ña̱ xíniñúʼu ndataxiún miíún ndaʼa̱ Jehová.
“¿Nda̱chun ndataxiyó miíyó ndaʼa̱ Jehová?” (La Atalaya, 15 tí enero ku̱i̱ya̱ 2010)
Koto video nu̱ú xítana ta kúsi̱íní-inina ña̱ nda̱taxina miína ndaʼa̱ Jehová.
Kaʼvi nda̱chun iin ñá ñaʼá na̱samañá ña̱ xi̱keʼéñá nu̱ú ña̱ káʼa̱n xa̱ʼa̱ñá “Ku̱a̱ʼání ku̱i̱ya̱ xi̱ndakatuʼíi̱n miíi̱ nda̱chun íyoyó yóʼo”.
“Biblia chi̱ndeétáʼan xíʼinna ña̱ na̱samana” (La Atalaya, 1 tí noviembre ku̱i̱ya̱ 2012)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
