LECCIÓN 47
¿Á xa̱a̱ íyo tu̱ʼvaún ña̱ ndakuchiún?
Xa̱ʼa̱ ña̱ xa̱a̱ káʼviún Biblia ku̱a̱ʼání ña̱ʼa xa̱a̱ sa̱kuaʼún xa̱ʼa̱ Jehová. Ta xa̱ʼa̱ ña̱ kúni̱ún keʼún ña̱ xa̱a̱ sa̱kuaʼún xa̱a̱ sa̱ndákoún sava ña̱ʼa ña̱ va̱ása va̱ʼa. Soo sana íyo ña̱ sási nu̱ún xa̱ʼa̱ ña̱kán ta̱ʼán ndataxiún miíún ndaʼa̱ Jehová ta ni ta̱ʼán ndakuchiún. Ña̱ lección yóʼo ka̱ʼa̱nña xa̱ʼa̱ ku̱a̱ʼá ña̱ʼa ña̱ sási nu̱ú na̱ káʼvi Biblia ña̱ xa̱a̱na ndakuchina soo ku̱chiñuvana ni̱ya̱ʼana nu̱úña, ta saátu yóʼó kuchiñuvaún.
1. ¿Á ku̱a̱ʼá ña̱ʼa xíniñúʼu kuxini̱ún xa̱ʼa̱ Biblia ta saáví ndakuchiún?
Ña̱ va̱ʼa ndakuchiún xíniñúʼu kunda̱a̱ káxi iniún míí ña̱ nda̱a̱ (1 Timoteo 2:4). Ña̱yóʼo va̱ása kúni̱ kachiña ña̱ xíniñúʼu kuxini̱ún ndiʼi ña̱ ndáka̱tu̱ʼunna xa̱ʼa̱ Biblia tá kúma̱níka ndakuchiún. Nda̱a̱ na̱ ndásakáʼnu Ndióxi̱ na̱ xa̱a̱ ku̱a̱ʼání ku̱i̱ya̱ nda̱kuchi xíniñúʼu sakúaʼakana xa̱ʼa̱ra (Colosenses 1:9, 10). Íyo iin ña̱ xíniñúʼu kunda̱a̱-iniún xa̱ʼa̱: xíniñúʼu kunda̱a̱-iniún xa̱ʼa̱ sava ña̱ sánáʼa̱ Biblia. Na̱ anciano na̱ íyo ti̱xin ña̱ congregación chindeétáʼanna xíʼún ña̱ kunda̱a̱-iniún á xa̱a̱ xíni̱ún sava ña̱ʼa xa̱ʼa̱ Biblia.
2. ¿Ndáaña xíniñúʼu keʼún tá kúma̱níka ndakuchiún?
Ña̱ Biblia káchiña: “Ndikó-inindó ta ndikóndó nu̱ú Ndióxi̱” (kaʼvi Hechos 3:19). Ña̱yóʼo kúú iin ña̱ xíniñúʼu keʼún tá kúma̱níka ndakuchiún. Soo ¿ndáaña kúni̱ kachi ña̱yóʼo? Kúni̱ kachiña ña̱ kúsuchíní-iniún xa̱ʼa̱ nda̱a̱ ndáaka ku̱a̱chi ña̱ ni̱ki̱ʼviún, ta xa̱ʼa̱ ña̱kán ndúkún ña̱ ná koo káʼnu-ini Jehová xa̱ʼún. Ta saátu chíka̱ún ndee̱ ña̱ kǒo keʼún nda̱a̱ ni iin ña̱ va̱ása va̱ʼa ta keʼún nda̱a̱ táki̱ʼva kúni̱ mií Ndióxi̱. Ña̱yóʼo kúni̱ kachiña ña̱ ki̱xáʼún kítáʼún xíʼin na̱ congregación chi xáʼún reunión ta xíkaún nátúʼún xa̱ʼa̱ Ndióxi̱ chi kúún publicador na̱ kúma̱ní ndakuchi.
3. ¿Nda̱chun va̱ása xíniñúʼu taxiún ña̱ yíʼviún kasiña nu̱ún ña̱ xa̱ún ndakuchiún?
Savana yíʼvina ña̱ va̱ása kuchiñuna saxínuna ña̱ ki̱ndoona xíʼin Jehová. Ndixava, kivi kundoʼún ña̱yóʼo nda̱a̱ táki̱ʼva ndo̱ʼo ná ñaʼá xíʼin na̱ ta̱a na̱ nda̱kú ni̱xi̱yo ini xíʼin Ndióxi̱ na̱ káʼa̱n Biblia xa̱ʼa̱. Soo ndakaʼún, Jehová kúnda̱a̱-inira ña̱ ndiʼi na̱ káchíñu nu̱úra kúúna na̱ yiví ku̱a̱chi, ta su̱ví ndiʼiví tiempo va̱ʼa kána ña̱ kéʼéna (kaʼvi Salmo 103:13, 14). Ndióxi̱ kusi̱íní-inira tá ná chika̱a̱níún ndee̱ ña̱ keʼún ña̱ kúni̱ra. Ta saátu Jehová chindeétáʼanra xíʼún, saáchi miíra káchi ña̱ kǒo ni iin ña̱ʼa kivi sakúxíka miíyó nu̱ú ña̱ kúʼvi̱-inira xínira miíyó (kaʼvi Romanos 8:38, 39).
NÁ SAKUAʼAKAYÓ XA̱ʼA̱ÑA
Ná kotoyó ndáa u̱vi̱ ña̱ʼa chindeétáʼan xíʼún ña̱ ya̱ʼún nu̱ú nda̱a̱ ndáaka ña̱ sási nu̱ún ña̱ xa̱ún ndakuchiún: ña̱ kuxini̱ún Jehová ta kandíxaún ña̱ chindeétáʼanra xíʼún.
4. Kuxini̱ va̱ʼaka Jehová
¿Á ku̱a̱ʼání ña̱ʼa xíniñúʼu kuxini̱ún xa̱ʼa̱ Jehová tá kúma̱níka ndakuchiún? Xíniñúʼu kuxini̱ va̱ʼún Jehová ña̱ va̱ʼa kuʼvi̱-iniún kuniúnra ta kandíxaún kuniso̱ʼún ña̱ káʼa̱nra. Kotondó VIDEO ña̱ va̱ʼa kunda̱a̱-iniyó ndáa ki̱ʼva chíndeétáʼan ña̱yóʼo xíʼin na̱ káʼvi Biblia na̱ íyo iníísaá ñuyǐví. Tándi̱ʼi ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱niyó nu̱ú video, ¿ndáaña chi̱ndeétáʼan xíʼin sava na̱ káʼvi Biblia ña̱ koo tu̱ʼvana ta xa̱a̱na ndakuchina?
Kaʼvindó Romanos 12:2 ta ka̱ʼa̱nndó xa̱ʼa̱ ña̱yóʼo:
-
¿Á xíka-iniún xa̱ʼa̱ ña̱ sánáʼa̱ Biblia? ¿Á kándíxaún ña̱ sánáʼa̱ na̱ testigo Jehová ña̱ nda̱a̱?
-
Tá xíka-iniún, ¿ndáaña kivi keʼún?
5. Kiviva ya̱ʼún nu̱ú nda̱a̱ ndáaka ña̱ sási nu̱ún
Ndiʼivayó íxayo̱ʼvi̱ña xíʼin tá ndáka̱xinyó ña̱ ndataxiyó miíyó ndaʼa̱ Jehová ta ndakuchiyó. Ña̱ va̱ʼa kunda̱a̱-iniún xa̱ʼa̱ ña̱yóʼo kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáa tu̱ndóʼo ni̱ya̱ʼa ñá Narangerel ña̱ va̱ʼa kachíñuñá nu̱ú Jehová?
-
Ña̱ kúʼvi̱-iñiñá xíniñá Jehová, ¿ndáa kí̱ʼva chi̱ndeétáʼaña xíʼinñá ña̱ ni̱ya̱ʼañá nu̱ú ña̱yóʼo?
Kaʼvindó Proverbios 29:25 xíʼin 2 Timoteo 1:7, ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi chindeétáʼan xíʼinyó ña̱ va̱ʼa ya̱ʼayó nu̱ú ña̱ sási nu̱úyó?
6. Kandíxa ña̱ chindeétáʼan Jehová xíʼún
Jehová chindeétáʼanra xíʼún ña̱ keʼún ña̱ kúni̱ra. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Nda̱chun xi̱yiʼví ta̱ xi̱niyó nu̱ú video yóʼo ndakuchira?
-
¿Ndáaña chi̱ndeétáʼan xíʼinra ña̱ ka̱ndíxakara Jehová?
Kaʼvindó Isaías 41:10, 13 ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ása xíka-iniún ña̱ kivi sáxi̱nún ña̱ ki̱ndoún xíʼin Jehová tá nda̱taxiún miíún nda̱ʼara?
7. Taxi tíxa̱ʼvi ndaʼa̱ Jehová xa̱ʼa̱ ña̱ kúʼvi̱-inira xínira yóʼó
Tá ná ndakanixi̱níún xa̱ʼa̱ ña̱ kúʼvi̱-ini Jehová xínira yóʼó, kuni̱kaún taxiún tíxa̱ʼvi ndaʼa̱ra ta saátu kuni̱kaún kachíñún nu̱úra ndiʼi tiempo. Kaʼvindó Salmo 40:5 ta ka̱ʼa̱nndó xa̱ʼa̱ ña̱yóʼo:
-
¿Ndáaña ta̱xi Jehová ndaʼún ndáyáʼvika nu̱ún?
Ta̱ profeta Jeremías xi̱kuʼvi̱ní-inira xi̱xinira Jehová ta saátu tu̱ʼunra ta saátu xi̱ndayáʼviní nu̱úra ña̱ kuniʼira ki̱vi̱ Ndióxi̱. Ta ka̱chira: “Tu̱ʼún sa̱kúsi̱íña-inii̱ ta saátu níma̱i̱, chi yi̱ʼi̱ níʼi̱ ki̱vi̱ún Jehová” (Jeremías 15:16). Ta vitin ndakuiin pregunta yóʼo:
-
¿Nda̱chun iin ña̱ ndáyáʼviní kúúña koún testigo Jehová?
-
¿Á kúni̱ún ndakuchiún ta xa̱ún koún testigo Jehová?
-
¿Á íyo iin ña̱ sási nu̱ún?
-
¿Ndáaña kivi keʼún ña̱ va̱ʼa xa̱ún ndakuchiún?
ÑA̱ KÁʼA̱N SAVA NA̱ YIVÍ: “Yíʼvii̱ ña̱ va̱ása kuchiñui̱ keʼíi̱ nda̱a̱ táki̱ʼva kéʼé iin na̱ testigo na̱ xa̱a̱ nda̱kuchi”.
-
¿Á saá ndóʼo miíún?
ÑA̱ XA̱A̱ SA̱KUAʼAYÓ
Mií Jehová chindeétáʼan xíʼún ña̱ kuchiñún ya̱ʼún nu̱ú nda̱a̱ ndáaka ña̱ sási nu̱ún ña̱ xa̱ún ndakuchiún.
Ná ndakaʼányó xa̱ʼa̱ ña̱yóʼo
-
¿Á xíniñúʼu kuxini̱ún ku̱a̱ʼání ña̱ʼa xa̱ʼa̱ Biblia tasaá ndakuchiún?
-
¿Ndáaña xíniñúʼu keʼún tá kúma̱níka ndakuchiún?
-
¿Nda̱chun va̱ása xíniñúʼu taxiún kasi ña̱ yíʼviún nu̱ún ña̱ va̱ʼa ndakuchiún?
NANDUKÚKA XA̱ʼA̱ÑA
Koto ndáa xa̱ʼa̱ kúú ña̱ xíniñúʼu ndakuchiún.
“¿Á xa̱a̱ íyo tu̱ʼvaún ña̱ ndakuchiún?” (Tutu Ña̱ Nátúʼun xíʼinyó, tí marzo ku̱i̱ya̱ 2020)
Koto ndáaña kivi keʼún ña̱ va̱ʼa ya̱ʼún nu̱ú ña̱ sási nu̱ún ña̱ va̱ʼa xa̱ʼún ndakuchiún.
“¿Ndaáña sási nu̱úi̱ ña̱ va̱ʼa ndakuchii̱?” (Tutu Ña̱ Nátúʼun xíʼinyó, tí marzo ku̱i̱ya̱ 2019)
Koto ndáaña chi̱ndeétáʼan xíʼin iin ta̱a ña̱ va̱ʼa ni̱ya̱ʼara nu̱ú ña̱ sási nu̱úra, ta ni̱xa̱a̱ra nda̱kuchira.
Tá xa̱ʼa̱ iin ta̱a ta̱ naní Ataa ni̱xi̱ka-inira xa̱ʼa̱ ña̱ ndakuchira. Koto ndáaña chi̱ndeétáʼan xíʼinra ña̱ va̱ʼa ke̱ʼéra iin ña̱ ndáyáʼviní yóʼo.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
