Na̱ sa̱kán ti̱ndaʼa̱ kúni̱na si̱íní koona ndiʼi ki̱vi̱ nda̱a̱ táki̱ʼva si̱í ni̱xi̱yona ki̱vi̱ ti̱ndaʼa̱na. Ta kiviva keʼéna ña̱yóʼo. Ta na̱ va̱ʼaníka kúnda̱a̱-ini xa̱ʼa̱ ña̱yóʼo kúú na̱ xa̱a̱ ku̱a̱ʼá ku̱i̱ya̱ ti̱ndaʼa̱ ta ndásakáʼnuna Ndióxi̱ saáchi chíka̱a̱na nde̱e ña̱ keʼéna ña̱ káʼa̱n Biblia.

1. ¿Ndáa consejo táxi Biblia ndaʼa̱ ta̱ xa̱a̱ ti̱ndaʼa̱?

Jehová ta̱xira chiñu ndaʼa̱ ta̱a ña̱ kuniʼira yichi̱ nu̱ú na̱ veʼera (kaʼvi Efesios 5:​23). Ta ndátura ña̱ vií ná koo ña̱ ndaka̱xinra keʼéra ta ná chindeétáʼanña xíʼin na̱ veʼera. Biblia táxiña consejo yóʼo ndaʼa̱ na̱ ta̱a na̱ xa̱a̱ ti̱ndaʼa̱: “Ndóʼó na̱ ta̱a na̱ íyo ñá síʼi ndakundeéndó kuʼvi̱-inindó kunindó ñá síʼindó” (Efesios 5:​25). ¿Ndáa ki̱ʼva keʼéna ña̱yóʼo? Ta̱ kúʼvi̱-ini xíni ñá síʼi vií kéʼéra xíʼinñá tá íyo iinlá miína ta saátu tá íyo inka na̱ yiví xíʼinna. Ndáarañá ta táxira ña̱ xíniñúʼuñá ña̱ va̱ʼa vií kooñá ta saátu ña̱ kusi̱í-iniñá (1 Timoteo 5:8). Ta iin ña̱ ndáyáʼviníka kéʼéra kúú ña̱ chíndeétáʼanra xíʼinñá ña̱ vií kutáʼanñá xíʼin Jehová (Mateo 4:4). Tá kúú, inkáchi kéʼéna oración ta saátu inkáchi káʼvina Biblia. Ta̱ ti̱ndaʼa̱, tá vií ndáara ñá síʼira vií kítáʼanra xíʼin Jehová (kaʼvi 1 Pedro 3:7).

2. ¿Ndáa consejo táxi Biblia ndaʼa̱ ñá xa̱a̱ ti̱ndaʼa̱?

Tu̱ʼun Ndióxi̱ káchiña “ná xa̱a̱ ti̱ndaʼa̱ xíniñúʼu ixato̱ʼóníná yiíná” (Efesios 5:​33). ¿Ndáa ki̱ʼva kivi keʼéñá ña̱yóʼo? Kivi ndakanixi̱níñá xa̱ʼa̱ ña̱ va̱ʼa ña̱ kúúmií yiíñá ta saátu ña̱ chíka̱a̱níra ndee̱ ña̱ kundaarañá xíʼin se̱ʼena. Ta saátu kivi na̱ʼa̱ñá ña̱ íxato̱ʼóñára tá chíndeétáʼanñá xíʼinra ña̱ vií kana ña̱ ndáka̱xinra keʼéra, viíní káʼa̱nñá xíʼinra ta saátu vií káʼa̱nñá xa̱ʼa̱ra ni va̱ása ndásakáʼnura Ndióxi̱.

3. ¿Ndáaña kivi keʼé na̱ xa̱a̱ ti̱ndaʼa̱ ña̱ viíka kutáʼanna?

Biblia káʼa̱nña ña̱yóʼo xa̱ʼa̱ na̱ xa̱a̱ ti̱ndaʼa̱: “U̱vi̱ saána iinlá xa̱a̱na nduuna” (Mateo 19:5). Ña̱yóʼo kúni̱ kachiña ña̱ kǒo xíniñúʼu keʼéna nda̱a̱ ni iin ña̱ʼa ña̱ kivi sákuxíka miína nu̱ú táʼanna. Xa̱ʼa̱ ña̱kán, chíka̱a̱na ndee̱ ña̱ ku̱a̱ʼá tiempo kutáʼanna, ta ka̱ʼa̱nna xa̱ʼa̱ ña̱ ndákanixi̱nína, ta saátu xa̱ʼa̱ ña̱ ndóʼona ta náʼa̱na ña̱ kúʼvi̱-inina xíni táʼanna. Iinlá Jehová kúú ta̱ ndáyáʼviníka nu̱úna ta va̱ása táxina ña̱ kundayáʼvi nda̱a̱ ni iin ña̱ʼa á inkaka na̱ yiví nu̱úna. Ta va̱ása inkáchi kéʼéna xíʼin inka na̱ yiví nda̱a̱ táki̱ʼva kéʼéna xíʼin na̱ ti̱ndaʼa̱ xíʼinna.

 NÁ SAKUAʼAKAYÓ XA̱ʼA̱ÑA

4. Ta̱ xa̱a̱ ti̱ndaʼa̱, kuʼvi̱-iniún kuniún ñá síʼún ta kundaúnñá

5. Ñá xa̱a̱ ti̱ndaʼa̱, kuʼvi̱-iniún kuniún yiíún ta ixato̱ʼúnra

Biblia táxiña consejo ndaʼa̱ ñá xa̱a̱ ti̱ndaʼa̱ ña̱ ná ixato̱ʼóñá yiíñá ni ndásakáʼnura Jehová á va̱ása. Kaʼvindó 1 Pedro 3:​1, 2 ta ka̱ʼa̱nndó xa̱ʼa̱ ña̱yóʼo:

• Tá yiíún va̱ása ndásakáʼnura Jehová, sana kúni̱ún ña̱ ná xa̱a̱ra ndasakáʼnurara. Ndáaña chindeétáʼanka xíʼún, ¿ña̱ ndiʼi tiempo ka̱ʼún xíʼinra xa̱ʼa̱ Ndióxi̱, á ña̱ kotora ña̱ vií íyo ña̱ kéʼún ta íxato̱ʼúnra? ¿Nda̱chun ndákanixi̱níún saá?

Na̱ xa̱a̱ ti̱ndaʼa̱ kivi vií koo ña̱ ndaka̱xinna keʼéna. Ñá xa̱a̱ ti̱ndaʼa̱ su̱ví ndiʼiví tiempo kuni̱ñá keʼéñá ña̱ kúni̱ yiíñá keʼéra. Tá saá ná kuu, kivi ka̱ʼa̱nñá xa̱ʼa̱ ña̱ ndákanixi̱níñá ta kúee koo iniñá  ta xíʼin ña̱ to̱ʼó keʼéñáña. Soo xíniñúʼu ndakaʼánñá ña̱ mií Jehová kúú ta̱ ta̱xi chiñu ndaʼa̱ yiíñá ña̱ ndaka̱xinra ndáaña kúú ña̱ va̱ʼaka chindeétáʼan xíʼin na̱ veʼera. Ta saátu xíniñúʼu chindeétáʼanñá xíʼinra ña̱ vií kana ña̱ ndáka̱xinra keʼéra. Ta ná keʼéñá ndiʼi ña̱yóʼo chindeétáʼanñá xíʼin na̱ veʼena ña̱ si̱í koona. Kaʼvindó 1 Pedro 3:​3-5 ta ka̱ʼa̱nndó xa̱ʼa̱ ña̱yóʼo:

• ¿Ndáaña ndóʼo Jehová tá xítora iin ñá xa̱a̱ ti̱ndaʼa̱ íxato̱ʼóñá yiíñá?

6. Na̱ xa̱a̱ ti̱ndaʼa̱ kivi ya̱ʼana nu̱ú tu̱ndóʼo ña̱ íxayo̱ʼvi̱ xíʼinna

 ÑA̱ XA̱A̱ SA̱KUAʼAYÓ

Na̱ xa̱a̱ ti̱ndaʼa̱ kivi si̱í koona tá kúʼvi̱-inina xíni táʼanna, tá íxato̱ʼó táʼanna ta kéʼéna ña̱ káʼa̱n Biblia.

Ná ndakaʼányó xa̱ʼa̱ ña̱yóʼo

• Ta̱ xa̱a̱ ti̱ndaʼa̱, ¿ndáaña kivi keʼéra ña̱ va̱ʼa si̱í koora xíʼin ñá síʼira?

• Ñá xa̱a̱ ti̱ndaʼa̱, ¿ndáaña kivi keʼéñá ña̱ va̱ʼa si̱í kooñá xíʼin yiíñá?

• Tá xa̱a̱ ti̱ndaʼún, ¿ndáaña va̱xi nu̱ú Biblia chindeétáʼan xíʼún ña̱ viíka kutáʼún xíʼin na̱ ti̱ndaʼa̱ xíʼún?