LECCIÓN 50
¿Ndáa ki̱ʼva si̱í koo na̱ familia? (táʼví 2)
Kuenta mií Jehová kúú na̱ va̱lí. Ta kúni̱ra ña̱ na̱ íyo se̱ʼe vií ná kundaana se̱ʼena, ta va̱ʼaní consejo táxira ndaʼa̱na ña̱ va̱ʼa keʼéna ña̱yóʼo. Ta saátu táxira consejo ndaʼa̱ na̱ va̱lí ña̱ vií koona xíʼin na̱ veʼena.
1. ¿Ndáa consejo táxi Jehová ndaʼa̱ na̱ íyo se̱ʼe?
Jehová ndátura ña̱ na̱ íyo se̱ʼe ná kuʼvi̱-inina kunina se̱ʼena, ta ku̱a̱ʼá tiempo ná kutáʼanna xíʼinna. Ta saátu kúni̱ra ña̱ ná kundaana na̱yóʼo nu̱ú tu̱ndóʼo ta sanáʼa̱nana ña̱ káʼa̱n Biblia (Proverbios 1:8). Ndióxi̱ káʼa̱nra ña̱yóʼo xíʼin ta̱a ta̱ níʼi yichi̱ nu̱ú na̱ veʼera: “Sakúaʼnundóna [...] nda̱a̱ táki̱ʼva kúni̱ mií Jehová” (kaʼvi Efesios 6:4). Jehová kúsi̱íní-inira tá na̱ íyo se̱ʼe sánáʼa̱na se̱ʼena ña̱ káʼa̱nra ta va̱ása sándakoona chiñu yóʼo ndaʼa̱ inkana.
2. ¿Ndáa consejo táxi Jehová ndaʼa̱ na̱ va̱lí?
Jehová káʼa̱nra xíʼin na̱ va̱lí “kuniso̱ʼondó ndiʼi ña̱ káʼa̱n na̱ yivándó xíʼinndó” (kaʼvindó Colosenses 3:20). Tá na̱ va̱lí xíniso̱ʼona ña̱ káʼa̱n yivána, sákusi̱ína-inina ta saátu sákusi̱ína-ini Jehová (Proverbios 23:22-25). Ta̱ Jesús va̱ʼaní ña̱ xi̱keʼéra ni va̱ása níxikuumiíra ku̱a̱chi, xi̱niso̱ʼora ta xi̱keʼéra ña̱ xi̱ka̱ʼa̱n na̱ yivára ta i̱xato̱ʼórana ni na̱ yiví ku̱a̱chi xi̱kuuna (Lucas 2:51, 52).
3. ¿Ndáaña kivi keʼé na̱ familia ña̱ va̱ʼa yatin koona xíʼin Jehová?
Tá íyo se̱ʼún sana kúni̱ún ña̱ ná kuʼvi̱-inina kunina Jehová nda̱a̱ táki̱ʼva kúʼvi̱-ini miíún xíniúnra. ¿Ndáa ki̱ʼva keʼún ña̱yóʼo? Kivi keʼúnña tá ndíku̱ún ña̱ káʼa̱n Biblia: “Xíniñúʼu sanáʼúnña [tu̱ʼun Jehová] se̱ʼún, ta ka̱ʼún xa̱ʼa̱ ña̱yóʼo tá nínduʼún veʼún, tá xíkaún yichi̱” (Deuteronomio 6:7). Ña̱ sanáʼa̱yó kúni̱ kachiña ña̱ ku̱a̱ʼá ka̱ʼa̱nyó xa̱ʼa̱ iin ña̱ʼa. Sana xa̱a̱ xíni̱vaún ña̱ ku̱a̱ʼá yichi̱ ka̱ʼún xa̱ʼa̱ iin ña̱ʼa xíʼin se̱ʼún ña̱ va̱ʼa kǒo nandósó-inina xa̱ʼa̱ ña̱yóʼo. Ña̱ kúni̱ kachi texto yóʼo kúú ña̱ xíniñúʼu taváún tiempo ña̱ va̱ʼa ka̱ʼún xíʼin se̱ʼún xa̱ʼa̱ Jehová ndiʼi ki̱vi̱. Ta iin ña̱ va̱ʼa kúú ña̱ ndiʼi na̱ familia ná tavána tiempo ndiʼi semana ña̱ inkáchi ná sakúaʼana xa̱ʼa̱ Biblia ta ndasakáʼnuna Jehová. Ta ni va̱ása íyo se̱ʼún tá ná kaʼviún Biblia ndiʼi semana, ña̱yóʼo chindeétáʼanníña xíʼún.
NÁ SAKUAʼAKAYÓ XA̱ʼA̱ÑA
Ná kotoyó sava consejo ña̱ chindeétáʼan xíʼin na̱ familia ña̱ vií koona ta si̱í koona.
4. Vií va̱ʼa sanáʼún se̱ʼún
Sana ixayo̱ʼvi̱ña xíʼún ña̱ sanáʼún se̱ʼún. ¿Ndáa ki̱ʼva kivi chindeétáʼan Biblia xíʼún? Kaʼvindó Santiago 1:19, 20 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva na̱ʼa̱ na̱ íyo se̱ʼe ña̱ kúʼvi̱-inina xínina se̱ʼena tá nátúʼunna xíʼinna?
-
¿Nda̱chun va̱ása va̱ʼa ka̱ʼa̱n iin ta̱a xíʼin se̱ʼera xa̱ʼa̱ ña̱ va̱ása va̱ʼa kéʼéna tá sáa̱ra? a
5. Kundaa se̱ʼún
Ña̱ va̱ʼa kundaún se̱ʼún ndáyáʼviní ka̱ʼún xíʼin iin tá iin na̱yóʼo xa̱ʼa̱ ña̱ kísi̱ xíʼin táʼan na̱ yiví. Sana va̱ása va̱ʼa kuniún ta ná ka̱ʼún xíʼinna xa̱ʼa̱ ña̱yóʼo. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Nda̱chun íxayo̱ʼvi̱ña xíʼin sava na̱ íyo se̱ʼe ña̱ ka̱ʼa̱nna xíʼin se̱ʼena xa̱ʼa̱ ña̱ kísi̱ xíʼin táʼan na̱ yiví?
-
¿Ndáaña xa̱a̱ chíndeétáʼan xíʼin sava na̱ íyo se̱ʼe ña̱ va̱ʼa ka̱ʼa̱nna xa̱ʼa̱ ña̱yóʼo xíʼin se̱ʼena?
Nda̱a̱ táki̱ʼva ni̱ka̱ʼa̱n Biblia, ñuyǐví ta̱ Ndi̱va̱ʼa kininíka ki̱xáʼa íyoña. Kaʼvindó 2 Timoteo 3:1, 13 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káʼa̱n ña̱ versículo 13 sava na̱ yiví na̱ ndi̱va̱ʼa-ini kísi̱na xíʼin na̱ va̱lí. Tá saá, ¿nda̱chun ndáyáʼviní ka̱ʼa̱n na̱ íyo se̱ʼe xíʼin se̱ʼena xa̱ʼa̱ ña̱yóʼo? ¿Ndáaña kivi keʼéna ña̱ va̱ʼa kundaanana tasaá va̱ása keʼé inka na̱ yiví ña̱ kini xíʼinna?
¿Á xa̱a̱ xíni̱ún xa̱ʼa̱ ña̱yóʼo?
Na̱ testigo Jehová xa̱a̱ távána ku̱a̱ʼání ña̱ chíndeétáʼan xíʼin na̱ íyo se̱ʼe ña̱ va̱ʼa ka̱ʼa̱nna xíʼin se̱ʼena xa̱ʼa̱ ña̱ kísi̱ xíʼin táʼan na̱ yiví. Ña̱yóʼo kúú savaña:
-
Kundaandó se̱ʼendó (video)
-
“¿Ndáa ki̱ʼva ka̱ʼún xíʼin se̱ʼún xa̱ʼa̱ ña̱ kísi̱ xíʼin táʼan na̱ yiví?” (¡Despertad!, núm. 5, 2016)
6. Ixato̱ʼó na̱ yiváún
Na̱ va̱lí xíniñúʼu ixato̱ʼóna na̱ yivána ta náʼa̱na ña̱yóʼo xíʼin ki̱ʼva ña̱ káʼa̱nna xíʼinna. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ʼaníka tá xíʼin ña̱ to̱ʼó ná ka̱ʼa̱n na̱ va̱lí xíʼin na̱ yivána?
-
¿Ndáa ki̱ʼva na̱ʼa̱ na̱ va̱lí ña̱ íxato̱ʼóna yivána?
Kaʼvindó Proverbios 1:8 ta ka̱ʼa̱nndó xa̱ʼa̱ ña̱yóʼo:
-
¿Ndáaña xíniñúʼu keʼé na̱ va̱lí tá káʼa̱n na̱ yivána xíʼinna xa̱ʼa̱ ña̱ kéʼéna?
7. Kaʼvindó xíʼin na̱ veʼendó xa̱ʼa̱ Jehová
Na̱ testigo Jehová távána tiempo ndiʼi semana ña̱ va̱ʼa kaʼvina xa̱ʼa̱ Ndióxi̱ xíʼin na̱ veʼena. ¿Ndáa ki̱ʼva kéʼéna ña̱yóʼo? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi chindeétáʼan xíʼún ña̱ ndiʼi semana kaʼviún xíʼin na̱ veʼún?
-
¿Ndáaña kivi keʼé na̱ íyo se̱ʼe ña̱ vií kaʼvina xíʼin na̱ veʼena ta kusi̱í-inina tá ná keʼéna ña̱yóʼo? (Koto na̱ʼná ña̱ va̱xi nu̱ú kíxáʼa lección yóʼo).
-
Ta miíún, ¿á íyo iin ña̱ kivi ixayo̱ʼvi̱ xíʼún ña̱ kaʼviún xíʼin na̱ veʼún? ¿Ndáaña?
Tiempo xi̱na̱ʼa̱, Jehová xi̱kuni̱ra na̱ familia na̱ ni̱xi̱yo ñuu Israel ná kǒo sandákoona ña̱ ka̱ʼa̱nna xa̱ʼa̱ tu̱ʼun Ndióxi̱. Kaʼvindó Deuteronomio 6:6, 7 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva keʼún ña̱ káʼa̱n consejo yóʼo?
Ña̱ kivi keʼún tá káʼviún xíʼin na̱ veʼún:
-
Xa̱a̱ ya̱chi̱ka kaʼvindó ña̱ ka̱ʼa̱nna xa̱ʼa̱ ti̱xin reunión.
-
Kaʼvindó ta ka̱ʼa̱nndó xa̱ʼa̱ relato ña̱ va̱xi nu̱ú Biblia ña̱ kivi chindeétáʼan xíʼin ndiʼi na̱ familia.
-
Tá íyo na̱ va̱lí se̱ʼún, sánuu ña̱ káʼa̱n xa̱ʼa̱ na̱ va̱lí nu̱ú jw.org.
-
Tá íyo na̱ va̱lí kúa̱an se̱ʼún, ndaka̱xin iin artículo ña̱ káʼa̱n xa̱ʼa̱ na̱ va̱lí kúa̱an nu̱ú jw.org.
-
Inkáchi ndanaʼa̱ndó historia ña̱ káʼa̱n Biblia xa̱ʼa̱.
-
Kotondó ta ka̱ʼa̱nndó xa̱ʼa̱ iin video ña̱ va̱xi nu̱ú jw.org.
ÑA̱ KÁʼA̱N SAVA NA̱ YIVÍ: “Yo̱ʼvi̱ní ña̱ káʼa̱n Biblia ta va̱ása kunda̱a̱-ini na̱ va̱lí xíʼinña”.
-
¿Ndáaña ndákanixi̱níún xa̱ʼa̱ ña̱yóʼo?
ÑA̱ XA̱A̱ SA̱KUAʼAYÓ
Jehová kúni̱ra na̱ íyo se̱ʼe ná kuʼvi̱-inina kunina se̱ʼena, ná sanáʼa̱nana ta ná kundaana na̱yóʼo; ta saátu na̱ va̱lí ná ixato̱ʼóna na̱ yivána ta kuniso̱ʼona na̱yóʼo, ta ndiʼi na̱ familia ná ndasakáʼnuna Jehová.
Ná ndakaʼányó xa̱ʼa̱ ña̱yóʼo
-
Na̱ íyo se̱ʼe, ¿ndáa ki̱ʼva sanáʼa̱na ta kundaana se̱ʼena?
-
Na̱ va̱lí, ¿ndáa ki̱ʼva ixato̱ʼóna na̱ yivána?
-
¿Ndáaña va̱ʼa ndakiʼinyó tá ná taváyó tiempo ndiʼi semana ña̱ kaʼviyó xíʼin na̱ veʼeyó xa̱ʼa̱ Ndióxi̱?
NANDUKÚKA XA̱ʼA̱ÑA
¿Ndáaña chindeétáʼan xíʼin se̱ʼún tá ná kuaʼnuna?
“6 ña̱ʼa ña̱ kivi chindeétáʼan xíʼin se̱ʼún” (¡Despertad!, núm. 2, 2019)
Kaʼvi sava consejo ña̱ chíndeétáʼan xíʼin na̱ ndáa iin na̱ xa̱a̱ chée.
“¿Á kúni̱ Ndióxi̱ ná kundaayó na̱ yiváyó tá xa̱a̱ ku̱chéena?” (Artículo ña̱ va̱xi nu̱ú jw.org)
Koto ndáaña ke̱ʼé iin ta̱a ta̱ va̱ása níxi̱kunda̱a̱-ini ndáa ki̱ʼva sakuaʼnura se̱ʼera soo vií ni̱xa̱a̱ra sa̱kuaʼnurana.
Jehová sa̱náʼa̱nra ndi̱ʼi̱ ña̱ va̱ʼa sa̱kuaʼnundi̱ se̱ʼendi̱ (5:58)
Koto ndáaña kivi keʼé iin ta̱ íyo se̱ʼe ña̱ viíka kutáʼanra xíʼin se̱ʼera.
“¿Ndáaña kivi keʼé na̱ íyo se̱ʼe ña̱ va̱ása kuxíkána nu̱ú se̱ʼena?” (La Atalaya, 1 tí noviembre ku̱i̱ya̱ 2011)
a Tá káʼa̱n Biblia xa̱ʼa̱ ña̱ sanáʼa̱na se̱ʼena, káʼa̱nña xa̱ʼa̱ ndáaña ka̱ʼa̱nna xíʼin se̱ʼena, ta saátu ña̱ ka̱ʼa̱nna xíʼinna xa̱ʼa̱ ña̱ va̱ása va̱ʼa ke̱ʼéna. Ta va̱ása káʼa̱nña xa̱ʼa̱ ña̱ ixandi̱va̱ʼana xíʼinna á ña̱ kanina na̱ va̱lí yóʼo (Proverbios 4:1).
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
