LECCIÓN 52
¿Nda̱chun ndáyáʼvi ki̱ʼva ña̱ ndásaviíyó miíyó?
Ndiʼiyó xa̱a̱ síín síín íyo ki̱ʼva ña̱ kútóoyó kundixiyó ta saátu ña̱ ndasaviíyó miíyó. Tá ná kundiku̱nyó ña̱ káʼa̱n Biblia kivi vií ndaka̱xinyó ña̱ kundixiyó ta saátu sakusi̱íyó-ini Jehová. Ná ka̱ʼa̱nyó xa̱ʼa̱ sava ña̱ va̱xi nu̱ú Biblia.
1. ¿Ndáaña káʼa̱n Biblia chindeétáʼan xíʼinyó ña̱ vií kundixiyó?
Na̱ ndásakáʼnu Ndióxi̱ vií xíniñúʼu ndaka̱xinna ti̱ko̱to̱ ña̱ kundixina ta saátu ki̱ʼva ña̱ ndasaviína miína ta xíʼin ña̱ to̱ʼó keʼéna ña̱yóʼo. Ta saátu va̱ása xíniñúʼu yaku̱a̱ koo na̱ ndásakáʼnuna Ndióxi̱ (1 Timoteo 2:9, 10). Koto ku̱mí ña̱ va̱xi yóʼo. 1) Ti̱ko̱to̱ vií ná kuna̱ʼa̱ña. Nda̱a̱ táki̱ʼva xa̱a̱ xi̱niún ti̱xin congregación, na̱ ñuu Jehová xa̱a̱ síín síín íyo ti̱ko̱to̱ ña̱ ndíxina xíʼin ña̱ chúʼunna xi̱nína, soo ni saá náʼa̱na ña̱ ndásakáʼnuna Ndióxi̱. 2) Tá vií ndíxiyó va̱ása ndakanixi̱ní inkana ña̱ va̱ása va̱ʼa xa̱ʼa̱yó. 3) Ta va̱ása ndíxiyó táʼan ña̱ ndíxi na̱ ñuyǐví yóʼo tá kúú ña̱ sa̱kán kána. 4) Ki̱ʼva ña̱ náʼa̱yó xíniñúʼu na̱ʼa̱ña ña̱ ndásakáʼnuyó Ndióxi̱. Chi saá inkana kunina ña̱ ndásakáʼnuyó Ndióxi̱ ta̱ nda̱a̱ (1 Corintios 10:31).
2. ¿Ndáaña kundoʼo na̱ hermano tá va̱ása vií ndáka̱xinyó ña̱ kundixiyó?
Kiviva ndaka̱xinyó nda̱a̱ ndáaka ti̱ko̱to̱ kundixiyó. Soo xíniñúʼu kiʼinyó kuenta ña̱ ná va̱ása sandákava ña̱yóʼo ini inkana, chi kǒo kúni̱yó ña̱ va̱ása va̱ʼa kuni inkana xíʼin ki̱ʼva ña̱ ndíxiyó. Xa̱ʼa̱ ña̱kán ndíku̱nyó consejo yóʼo: “Iin tá iin miíyó ná keʼéyó ña̱ʼa ña̱ sákusi̱í-ini na̱ táʼanyó ta saá va̱ʼa chindeétáʼanyó xíʼinna” (kaʼvi Romanos 15:1, 2).
3. ¿Tá vií ndásaviíyó miíyó ndáa ki̱ʼva chindeétáʼanña xíʼinna ña̱ sakúaʼana xa̱ʼa̱ Jehová?
Ndiʼi yichi̱ viíva ndáka̱xinyó ña̱ kundixiyó. Soo kíʼinníkayó kuenta xíʼin ña̱yóʼo tá ku̱a̱ʼa̱nyó reunión á ta ku̱a̱ʼa̱nyó natúʼunyó xíʼin na̱ yiví xa̱ʼa̱ Ndióxi̱. Va̱ása kúni̱yó ña̱ xa̱ʼa̱ ki̱ʼva ña̱ ndíxiyó ná ka̱ʼa̱nna ña̱ va̱ása va̱ʼa xa̱ʼa̱ tu̱ʼun Ndióxi̱ ña̱ ku̱a̱ʼa̱nyó natúʼunyó xíʼin na̱ yiví chi ña̱ ndáyáʼviní kúú ña̱yóʼo, chi ña̱ kúni̱yó kúú ña̱ chika̱a̱yó ndee̱ xíʼin inkana ña̱ sakúaʼana xa̱ʼa̱ “Ndióxi̱ ta̱ sáka̱ku miíyó” (Tito 2:10).
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva vií kundixiyó ta saátu ña̱ vií ndasaviíyó miíyó ña̱ va̱ʼa na̱ʼa̱yó ña̱ ndásakáʼnuyó Ndióxi̱.
Xíʼin ki̱ʼva ña̱ ndíxiyó ta saátu ña̱ ndásaviíyó miíyó náʼa̱yó ña̱ íxato̱ʼóyó na̱ chíñu, Jehová xítora ña̱ ñúʼu níma̱yó, ta xíʼin ki̱ʼva ña̱ ndíxiyó náʼa̱yó ña̱ íxato̱ʼóyóra.
4. Tá vií íyo ña̱ ndíxiyó náʼa̱yó ña̱ ndásakáʼnuyó Ndióxi̱
¿Ndáa xa̱ʼa̱ kúú ña̱ xíniñúʼu viíní ndaka̱xinyó ña̱ kundixiyó ta saátu ña̱ ndasaviíyó miíyó? Kaʼvindó Salmo 47:2 ta ka̱ʼa̱nndó xa̱ʼa̱ ña̱yóʼo:
-
Xa̱ʼa̱ ña̱ ndásakáʼnuyó Jehová, ¿ndáa ki̱ʼva xíniñúʼu koo ti̱ko̱to̱yó?
-
¿Á ndáyáʼvi kiʼinyó kuenta xíʼin ki̱ʼva ña̱ ndásaviíyó miíyó tá ku̱a̱ʼa̱nyó reunión ta saátu tá ku̱a̱ʼa̱nyó natúʼunyó xíʼin na̱ yiví? ¿Nda̱chun ndákanixi̱níún saá?
5. Ndáa ki̱ʼva vií ndaka̱xinyó ti̱ko̱to̱ kundixiyó ta saátu ki̱ʼva ña̱ ndasaviíyó miíyó
Va̱ása ndáyáʼvi á yaʼvi ti̱ko̱to̱ ña̱ ndíxiyó. Chi ña̱ ndáyáʼvi kúú ña̱ va̱ása yaku̱a̱ kooña ta vií ná kuna̱ʼa̱ña ni nda̱a̱ ndáaka nu̱ú ku̱a̱ʼa̱nyó. Kaʼvindó 1 Corintios 10:24 xíʼin 1 Timoteo 2:9, 10. Tándi̱ʼi ka̱ʼa̱nndó nda̱chun va̱ása xíniñúʼu kundixiyó ti̱ko̱to̱ ña̱...
-
... yaku̱a̱ á ña̱ va̱ása va̱ʼa náʼa̱
-
... ni̱ʼi náʼa̱ á ña̱ núna nu̱ú á ña̱ kuitíní
Ni miíyó na̱ ndásakáʼnu Ndióxi̱ va̱ása ndíkúnkayó ley ña̱ ta̱xi Ndióxi̱ ndaʼa̱ ta̱ Moisés, soo ña̱yóʼo chíndeétáʼanña xíʼinyó ña̱ kunda̱a̱-iniyó ndáaña ndákanixi̱ní Jehová. Kaʼvindó Deuteronomio 22:5 ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ása va̱ʼa náʼa̱ tá iin ñaʼá ná ndasaviíñá miíñá ta kuna̱ʼa̱ñá nda̱a̱ táki̱ʼva náʼa̱ iin ta̱a, á iin ta̱a ña̱ kuna̱ʼa̱ra nda̱a̱ táki̱ʼva náʼa̱ iin ñaʼá?
Kaʼvindó 1 Corintios 10:32, 33 xíʼin 1 Juan 2:15, 16, ta ka̱ʼa̱nndó xa̱ʼa̱ ña̱yóʼo:
-
Tá na̱ yiví na̱ íyo ñuu nu̱ú íyoyó á na̱ íyo ti̱xin congregación va̱ása va̱ʼa kúnina xíʼin ki̱ʼva ña̱ ndíxiyó, ¿á xíniñúʼu kíʼinyó kuenta xíʼin ña̱yóʼo? ¿Nda̱chun?
-
¿Ndáa ti̱ko̱to̱ kúú ña̱ ndíxina ñuu nu̱ú íyoún ta saátu ndáa ki̱ʼva ndásaviína miína?
-
¿Á túviún ña̱ va̱ása va̱ʼa kundixi na̱ ndasakáʼnu Ndióxi̱ saá? ¿Nda̱chun ndákanixi̱níún saá?
Ku̱a̱ʼá ki̱ʼva kivi kundixiyó ta ndasaviíyó miíyó ta saátu ndasakáʼnuyó Jehová.
ÑA̱ KÁʼA̱N SAVA NA̱ YIVÍ: “Yi̱ʼi̱ kivi kundixi ña̱ kúni̱ miívai̱”.
-
¿Á va̱ʼa ndákanixi̱nína túviún? ¿Nda̱chun?
ÑA̱ XA̱A̱ SA̱KUAʼAYÓ
Tá vií ndáka̱xinyó ña̱ kundixiyó ta saátu ña̱ ndasaviíyó miíyó náʼa̱yó ña̱ íxato̱ʼóyó Jehová ta saátu inkana.
Ná ndakaʼányó xa̱ʼa̱ ña̱yóʼo
-
¿Nda̱chun ndáyáʼvi nu̱ú Jehová ki̱ʼva ña̱ ndásaviíyó miíyó?
-
¿Ndáaña kivi chindeétáʼan xíʼinyó ña̱ vií ndasaviíyó miíyó?
-
¿Ndáaña ndakanixi̱ní inkana xa̱ʼa̱ Ndióxi̱ ta̱ ndásakáʼnuyó xa̱ʼa̱ ki̱ʼva ña̱ ndásaviíyó miíyó?
NANDUKÚKA XA̱ʼA̱ÑA
Koto ndáaña ndákanixi̱ní inkana xíʼin ki̱ʼva ña̱ ndíxiún.
“¿Ndáaña ndákanixi̱ní inkana xa̱ʼa̱ ki̱ʼva ña̱ ndíxiyó?” (Artículo ña̱ va̱xi nu̱ú jw.org)
Koto nda̱chun xíniñúʼu vií ndakanixi̱níún tá kúni̱ún keʼún iin tatuaje ku̱ñún.
“¿Á va̱ása va̱ʼa keʼéyó tatuaje ku̱ñuyó?” (Artículo ña̱ va̱xi nu̱ú jw.org)
Koto ndáaña va̱xi nu̱ú Biblia chindeétáʼan xíʼún ña̱ vií koo ña̱ ndaka̱xiún keʼún.
“¿Ki̱ʼva ña̱ ndíxiyó ná ndasakáʼnuña Ndióxi̱?” (La Atalaya, tí septiembre ku̱i̱ya̱ 2016)
Koto ndáaña chi̱ndeétáʼan xíʼin iin ñá ñaʼá, ña̱ vií ndakanixi̱níñá xa̱ʼa̱ ña̱ ndáka̱xin inkana kundixina.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
