LECCIÓN 55
Chindeétáʼan xíʼin na̱ congregación
Iníísaá ñuyǐví íyo ku̱a̱ʼání congregación ta ku̱a̱ʼání na̱ yiví kúsi̱í-inina ndásakáʼnuna Jehová. Na̱ ndásakáʼnu Ndióxi̱ chíndayáʼvinína ña̱ káʼa̱nna xíʼinna ndáa ki̱ʼva keʼéna iin chiñu, ta saátu ña̱ níʼina yichi̱ nu̱úna ta ku̱a̱ʼá ki̱ʼva chíndeétáʼanna xíʼin na̱ congregación ta xíʼin ña̱ si̱í-ini kéʼéna ña̱yóʼo. ¿Á saá ndóʼún ti̱xin congregación ña̱ ndíka̱ún?
1. ¿Ndáa ki̱ʼva kuniñúʼún tiempo xíʼin ndeún ña̱ va̱ʼa chindeétáʼún xíʼin na̱ congregación?
Ndiʼivayó kivi chindeétáʼan xíʼin na̱ congregación. Tá kúú, ¿á íyo iin na̱ hermano na̱ xa̱a̱ chée ti̱xin congregación nu̱ú ndíka̱ún á iin na̱ kúúmií kue̱ʼe̱? ¿Á kivi chindeétáʼún xíʼinna ña̱ ku̱ʼu̱nna reunión? ¿Á íyo inka ki̱ʼva ña̱ chindeétáʼún xíʼinna, tá kúú ña̱ sataún á kueún ña̱ʼa ña̱ xíniñúʼuna á chindeétáʼún xíʼinna ña̱ keʼún iin chiñu ti̱xin veʼena? (Kaʼvi Santiago 1:27). Ta saátu kivi chindeétáʼanyó xíʼinna tá tíʼvína á tá sándaʼana salón. Nda̱a̱ ni iinna kǒo íxandúxa xíʼinyó ña̱ keʼéyó ña̱yóʼo saáchi kéʼéyóña xa̱ʼa̱ ña̱ kúʼvi̱-iniyó xíniyó Ndióxi̱ ta saátu na̱ hermano (Salmo 110:3).
Na̱ testigo na̱ xa̱a̱ nda̱kuchi íyo inka ki̱ʼva ña̱ chindeétáʼanna xíʼin na̱ congregación. Tá kúú, tá kéʼé na̱ hermano ña̱ káʼa̱n Biblia kivi xa̱a̱na koona siervo ministerial, tá ná ya̱ʼa tiempo nda̱a̱ kivi xa̱a̱na koona anciano. Ta ndiʼina ni kúúna na̱ hermano á ná hermana, kivi koona precursor ta ku̱a̱ʼáka tiempo natúʼunna xíʼin na̱ yiví xa̱ʼa̱ Ndióxi̱. Ta saátu sava na̱ testigo káchíñuna nu̱ú kúva̱ʼa veʼe nu̱ú ndásakáʼnuyó Ndióxi̱. Ta íyo sava na̱ nása̱ma ku̱a̱ʼa̱n inka ñuu ña̱ va̱ʼa chindeétáʼanna xíʼin na̱ congregación.
2. ¿Ndáa ki̱ʼva kuniñúʼuyó xu̱ʼúnyó á inkaka ña̱ kúúmiíyó ña̱ va̱ʼa chindeétáʼanyó xíʼin na̱ congregación?
Ña̱ Biblia káchiña: “Ndasakáʼnu Jehová xíʼin ndiʼi ña̱ va̱ʼa ña̱ kúúmiíún” (Proverbios 3:9). Nu̱ú miíyó ndáyáʼviní ña̱ taxiyó xu̱ʼún á inkaka ña̱ʼa ña̱ kúúmiíyó ña̱ va̱ʼa chindeétáʼanyó xíʼin na̱ congregación ña̱ va̱ʼa natúʼunna xíʼin na̱ yiví iníísaá ñuyǐví (kaʼvi 2 Corintios 9:7). Ta xu̱ʼún ña̱ táxiyó xíniñúʼunaña ña̱ va̱ʼa chindeétáʼanna xíʼin na̱ hermano na̱ yáʼa nu̱ú tu̱ndóʼo. Ku̱a̱ʼánína kútóona taxi va̱ʼana xu̱ʼúnna tasaá taxinaña (kaʼvi 1 Corintios 16:2). Kivi chika̱a̱naña ti̱xin caja ña̱ íyo ti̱xin veʼe nu̱ú ndásakáʼnuyó Ndióxi̱ á chindaʼánaña chi internet nu̱ú donate.pr418.com. Jehová kúni̱ra ná taxiyó ña̱ʼa ña̱ kúúmiíyó ña̱ va̱ʼa na̱ʼa̱yó ña̱ kúʼvi̱-iniyó xíniyóra.
NÁ SAKUAʼAKAYÓ XA̱ʼA̱ÑA
Ná kotoyó sava ki̱ʼva ña̱ chindeétáʼún xíʼin na̱ congregación.
3. Kivi kuniñúʼún ña̱ʼa ña̱ kúúmiíún
Jehová xíʼin ta̱ Jesús kúʼvi̱-inina xínina na̱ táxi ña̱ʼa ña̱ kúúmiína xíʼin ña̱ si̱í-ini. Ta̱ Jesús ki̱ʼinra kuenta xíʼin ña̱ ke̱ʼé iin ñaʼá ñá ndáʼvi ñá ni̱xi̱ʼi̱ yií ña̱ va̱ʼa taxiñá xu̱ʼún. Kaʼvindó Lucas 21:1-4 ta ka̱ʼa̱nndó xa̱ʼa̱ ña̱yóʼo:
-
¿Á xíniñúʼu ku̱a̱ʼání xu̱ʼún taxiyó ta saá kusi̱í-ini Jehová?
-
¿Ndáaña ndóʼo Jehová xíʼin ta̱ Jesús tá xíʼin ndiʼi níma̱yó táxiyó ña̱ kúúmiíyó?
Ña̱ va̱ʼa kunda̱a̱-iniún ndáa ki̱ʼva xíniñúʼuna xu̱ʼún ña̱ táxiyó, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
Xu̱ʼún ña̱ táxiyó, ¿ndáa ki̱ʼva chíndeétáʼanña xíʼin ndiʼi na̱ congregación na̱ íyo iníísaá ñuyǐví?
4. Kivi chindeétáʼún xíʼinna
Na̱ xi̱ndasakáʼnu Jehová tá ya̱chi̱ xíʼin ña̱ si̱í-ini xi̱kachíñuna ña̱ va̱ʼa sa̱ndaʼana veʼe nu̱ú xi̱ndasakáʼnunara, ta va̱ása nítaxi kuitína xu̱ʼún. Kaʼvindó 2 Crónicas 34:9-11 ta ka̱ʼa̱nndó xa̱ʼa̱ ña̱yóʼo:
-
¿Ndáaña ke̱ʼé ndiʼi na̱ ñuu Israel ña̱ va̱ʼa kundaana veʼe nu̱ú xi̱ndasakáʼnuna Jehová?
Ña̱ va̱ʼa kunda̱a̱-iniún ndáa ki̱ʼva ndíku̱n na̱ testigo Jehová ña̱yóʼo, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Nda̱chun ndáyáʼviní limpio koo salón ña̱ Reino ta saátu vií kooña?
-
¿Ndáaña kivi keʼé miíún?
5. Na̱ hermano kivi chika̱a̱na ndee̱ ña̱ keʼéna ku̱a̱ʼá chiñu
Biblia káʼa̱nña xíʼin na̱ ndásakáʼnu Ndióxi̱ ña̱ ná chika̱a̱na ndee̱ ña̱ ku̱a̱ʼáka ña̱ʼa kuxini̱na xa̱ʼa̱ Jehová, ta saá va̱ʼaka chindeétáʼanna xíʼin na̱ congregación. Ña̱ va̱ʼa kotoún iin ta̱ hermano ta̱ ku̱chiñu ke̱ʼé ña̱yóʼo, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña ke̱ʼé ta̱ Ryan ña̱ kuaʼnura xíʼin tu̱ʼun Ndióxi̱ ta saátu ña̱ chi̱ndeétáʼanra xíʼin na̱ congregación?
Biblia káʼa̱nña ndáaña kúú ña̱ xíniñúʼu keʼé na̱ hermano na̱ kúni̱ koo siervo ministerial á anciano. Kaʼvindó 1 Timoteo 3:1-13 ta ka̱ʼa̱nndó xa̱ʼa̱ ña̱yóʼo:
-
¿Ndáaña xíniñúʼu keʼé na̱ hermano na̱ kúni̱ koo siervo ministerial á anciano?
-
¿Ndáaña xíniñúʼu keʼé na̱ veʼena? (Kotondó versículo 4 xíʼin 11).
-
Tá na̱ hermano chíka̱a̱nína ndee̱ ña̱ saxínuna ña̱yóʼo, ¿ndáa ki̱ʼva chindeétáʼanña xíʼin na̱ congregación?
ÑA̱ NDÁKA̱TU̱ʼUN SAVA NA̱ YIVÍ: “¿Ndáa míí kána xu̱ʼún ña̱ xíniñúʼu na̱ testigo Jehová ña̱ va̱ʼa keʼéna chiñuna?”.
-
¿Ndáaña ndakuiún?
ÑA̱ XA̱A̱ SA̱KUAʼAYÓ
Nu̱ú Jehová ndáyáʼviní ña̱ xíniñúʼuyó tiempoyó, ndee̱yó xíʼin ña̱ʼa ña̱ kúúmiíyó ña̱ va̱ʼa chindeétáʼanyó xíʼin na̱ congregación.
Ná ndakaʼányó xa̱ʼa̱ ña̱yóʼo
-
¿Ndáa ki̱ʼva kuniñúʼuyó tiempoyó xíʼin ndee̱yó ña̱ chindeétáʼanyó xíʼin na̱ congregación?
-
¿Ndáa ki̱ʼva kuniñúʼuyó ña̱ʼa ña̱ kúúmiíyó ña̱ chindeétáʼanyó xíʼin na̱ congregación?
-
¿Ndáaña kúni̱ún keʼún ña̱ va̱ʼa chindeétáʼún xíʼin na̱ congregación?
NANDUKÚKA XA̱ʼA̱ÑA
Koto nda̱chun kǒo kúni̱ Ndióxi̱ ná taxi na̱ káchíñu nu̱úra diezmo.
“¿Ndáaña káʼa̱n Biblia xa̱ʼa̱ ña̱ diezmo?” (Artículo ña̱ va̱xi nu̱ú jw.org)
Biblia káʼa̱nña ña̱ íyo sava chíñu ña̱ xíniñúʼu keʼé na̱ ta̱a na̱ xa̱a̱ ndakuchi. Soo ¿á kivi keʼé iin ñá hermana chiñu yóʼo?
“Na̱ níʼi yichi̱ nu̱úyó ti̱xin congregación” (Tutu Ña̱ Nátúʼun xíʼinyó, tí febrero ku̱i̱ya̱ 2021)
Koto ña̱ kéʼé sava na̱ testigo na̱ chíka̱a̱ní ndee̱ ña̱ va̱ʼa kuumií na̱ hermano tutu ña̱ tává na̱ ñuu Ndióxi̱.
Koto nda̱chun síín íyo ki̱ʼva ña̱ xíniñúʼu na̱ testigo Jehová xu̱ʼún ña̱ keʼéna chiñuna nu̱ú inka religión.
“¿Ndáa míí kíʼin na̱ testigo Jehová xu̱ʼún ña̱ xíniñúʼuna?” (Artículo ña̱ va̱xi nu̱ú jw.org)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
