LECCIÓN 56
Ña̱ kivi keʼún ña̱ vií kutáʼan na̱ congregación
Tá ndákutáʼanyó xíʼin na̱ hermanoyó ndóʼoyó nda̱a̱ táki̱ʼva ndo̱ʼo ta̱ rey David. Ta̱yóʼo ka̱chira: “Kotondó, iin ña̱ va̱ʼaní kúú ña̱ inkáchi kítáʼan na̱ hermano” (Salmo 133:1). Ndiʼiyó xíniñúʼu chika̱a̱yó ndee̱ ña̱ vií kutáʼan ndiʼiyó.
1. ¿Ndáaña kéʼé na̱ ñuu Ndióxi̱ kúú ña̱ kútóokaún?
Tá ná ku̱ʼún inka congregación ña̱ íyo inka país sana va̱ása kunda̱a̱-iniún xíʼin tu̱ʼun ña̱ káʼa̱nna, soo va̱ʼaní ndakiʼinna yóʼó ta va̱ʼaní kuniún. ¿Nda̱chun? Ni nda̱a̱ ndáaka nu̱ú ná ku̱ʼún, kuniún ndi̱ʼi̱ na̱ testigo Jehová ña̱ inkáchi tutu xíniñúʼundi̱ ña̱ va̱ʼa sakúaʼandi̱ xa̱ʼa̱ Biblia. Ta saátu chíka̱a̱ndi̱ ndee̱ ña̱ kuʼvi̱-inindi̱ kunitáʼanndi̱. Ni nda̱a̱ ndáaka ñuu nu̱ú íyoyó, ndiʼiyó kúni̱yó ndasakáʼnuyó kivi Jehová ta inkáchi ndasakáʼnuyóra (Sofonías 3:9; nota).
2. ¿Ndáaña kivi keʼún ña̱ vií kutáʼan na̱ congregación?
“Xíʼin ndiʼi níma̱ndó kuʼvi̱ní-inindó kunitáʼanndó” (1 Pedro 1:22). ¿Ndáa ki̱ʼva kundiku̱nyó consejo yóʼo? Nu̱úka ña̱ kotoún ña̱ va̱ása va̱ʼa kéʼé inkana, koto ña̱ va̱ʼa ña̱ kúúmiína. Va̱ása kutáʼan kuitíún xíʼin na̱ kútóo táʼan ña̱ kútóo miíún, va̱ʼaka chika̱a̱ ndee̱ ña̱ kutáʼún xíʼin na̱ hermano na̱ xa̱a̱ síín síín ñuu. Ta tá ndíka̱a̱ ña̱ va̱ása va̱ʼa níma̱ún xa̱ʼa̱ inkana sandíʼi-xa̱ʼa̱ña (kaʼvi 1 Pedro 2:17). a
3. ¿Ndáaña keʼún tá kúúmiíún ku̱a̱chi xíʼin na̱ ndásakáʼnu Ndióxi̱?
Va̱ʼava kítáʼanyó, soo xa̱ʼa̱ ña̱ kúúyó na̱ yiví ku̱a̱chi sava yichi̱ sándakavayó-ini táʼanyó á sáxo̱ʼvi̱yó-ini táʼanyó. Xa̱ʼa̱ ña̱kán, tu̱ʼun Ndióxi̱ káʼa̱nña ña̱yóʼo: “Kǒo sandákoondó [...] ña̱ koo káʼnu-inindó”. Ta káchikaña: “Jehová xíʼin ndiʼi níma̱ra i̱xakáʼnu-inira xa̱ʼa̱ndó, xa̱ʼa̱ ña̱kán saátu xíniñúʼu keʼé miíndó” (kaʼvi Colosenses 3:13). Ku̱a̱ʼání yichi̱ sáxo̱ʼvi̱yó-ini Jehová soo ni saá íxakáʼnuva-inira xa̱ʼa̱yó. Xa̱ʼa̱ ña̱kán kúni̱ra ña̱ ixakáʼnu-iniyó xa̱ʼa̱ na̱ hermanoyó. Tá ki̱ʼún kuenta ña̱ sa̱xóʼvi̱ún-ini iinna, siʼnaka miíún ka̱ʼa̱n xíʼinna ña̱ ná ixakáʼnu-inina xa̱ʼún (kaʼvi Mateo 5:23, 24). b
NÁ SAKUAʼAKAYÓ XA̱ʼA̱ÑA
Nda̱kanixi̱ní ndáa ki̱ʼva chindeétáʼún xíʼin na̱ congregación ña̱ va̱ása koo ku̱a̱chi ta vií kutáʼanna.
¿Ndáaña keʼún ña̱ va̱ʼa ndasaviún ku̱a̱chi xíʼin inkana?
4. Kǒo ka̱ʼún ña̱ va̱ása va̱ʼa xa̱ʼa̱ inkana ta kǒo kundasíún kuniúnna
Kúni̱yó na̱ʼa̱yó ña̱ kúʼvi̱-iniyó xíniyó ndiʼi na̱ hermanoyó. Soo sana ixayo̱ʼvi̱ ña̱yóʼo xíʼinyó ña̱ keʼéyóña xíʼin savana tá kúú na̱ síín náʼa̱ nu̱ú miíyó. ¿Ndáaña kivi chindeétáʼan xíʼinyó? Kaʼvindó Hechos 10:34, 35 ta ka̱ʼa̱nndó xa̱ʼa̱ ña̱yóʼo:
-
Ni nda̱a̱ ndáaka nu̱ú ke̱e na̱ yiví, Jehová ndákiʼinra ndiʼina ña̱ va̱ʼa xa̱a̱na koona testigora. Xa̱ʼa̱ ña̱ kúnda̱a̱-iniyó xa̱ʼa̱ ña̱yóʼo, ¿ndáaña xíniñúʼu keʼéyó xíʼin na̱ yiví na̱ síín íyo nu̱ú miíyó?
-
Nu̱ú íyoún, ¿ndáaña kéʼé na̱ yiví ña̱ náʼa̱na ña̱ kúndasína xínina inkana? ¿Nda̱chun va̱ása xíniñúʼu keʼún nda̱a̱ táki̱ʼva keʼéna?
Kaʼvindó 2 Corintios 6:11-13 ta ka̱ʼa̱nndó xa̱ʼa̱ ña̱yóʼo:
-
¿Ndáaña keʼún ña̱ va̱ʼa na̱ʼún ña̱ kúʼvi̱-iniún xíniún ndiʼi na̱ hermano?
5. Koo káʼnu-inindó ta ndasaviíndó ku̱a̱chi
Miíyó nda̱a̱ ni iin yichi̱ va̱ása xíniñúʼu ixakáʼnu-iniyó xa̱ʼa̱ Jehová, soo miíra xíʼin ndiʼi níma̱ra íxakáʼnu-inira xa̱ʼa̱yó. Kaʼvindó Salmo 86:5 ta ka̱ʼa̱nndó xa̱ʼa̱ ña̱yóʼo:
-
¿Ndáaña sánáʼa̱ versículo yóʼo miíyó xa̱ʼa̱ ña̱ íxakáʼnu-ini Jehová xa̱ʼa̱yó?
-
¿Á kúni̱ún taxiún tíxa̱ʼvi xa̱ʼa̱ ña̱ íxakáʼnu-ini Jehová xa̱ʼún? ¿Nda̱chun?
-
¿Ama kúú ña̱ ixayo̱ʼvi̱ña xíʼinyó ña̱ kitáʼanyó xíʼin inkana?
¿Ndáa ki̱ʼva kundiku̱nyó yichi̱ Jehová ta saá vií kutáʼanyó xíʼin na̱ hermanoyó? Kaʼvindó Proverbios 19:11 ta ka̱ʼa̱nndó xa̱ʼa̱ ña̱yóʼo:
-
Tá iinna kéʼéna ña̱ va̱ása kútóún á ña̱ sásáa̱ yóʼó, ¿ndáaña kivi keʼún ta va̱ása sa̱a̱kaún?
Sava yichi̱ miíyó kúú na̱ káʼa̱n ña̱ va̱ása va̱ʼa xíʼin inkana tá ná kuu ña̱yóʼo, ¿ndáaña keʼéyó? Kotondó VIDEO, ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva nda̱savií ñá hermana ñá xi̱niyó nu̱ú video ku̱a̱chi?
6. Koto ña̱ va̱ʼa ña̱ kéʼé na̱ hermano
Tá xíni̱ va̱ʼakayó na̱ hermano, kíʼinkayó kuenta ndáaña va̱ʼa kéʼéna ta saátu ndáaña íxayo̱ʼvi̱ xíʼinna. ¿Ndáaña kivi keʼéyó ña̱ va̱ʼa kiʼinyó kuenta xíʼin ña̱ va̱ʼa kéʼéna? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña chindeétáʼan xíʼún ña̱ va̱ʼa kiʼinka̱ún kuenta xíʼin ña̱ va̱ʼa kéʼé na̱ hermano?
Jehová kíʼinra kuenta xíʼin ña̱ va̱ʼa kéʼéyó. Kaʼvindó 2 Crónicas 16:9a ta ka̱ʼa̱nndó xa̱ʼa̱ ña̱yóʼo:
-
¿Ndáaña ndóʼún tá kúnda̱a̱-iniún ña̱ kíʼin Jehová kuenta xíʼin ña̱ va̱ʼa ña̱ kúúmiíún?
Nda̱a̱ iin seʼe̱ ña̱ ku̱va̱ʼa xíʼin ña̱ʼa ña̱ yaʼviní kúúmiívaña sava ña̱ va̱ása va̱ʼa soo ni saá ndáyáʼvinívaña. Saátu ndóʼoyó xíʼin na̱ hermano ni kúúna na̱ yiví ku̱a̱chi soo nu̱ú Jehová ndáyáʼviní iin tá iin na̱yóʼo.
ÑA̱ KÁʼA̱N SAVA NA̱ YIVÍ: “Ña̱ va̱ʼa koo káʼnu-inii̱ xa̱ʼa̱ inkana, siʼna xíniñúʼu na̱ʼa̱na ña̱ ndixa ndándikó-inina xa̱ʼa̱ ña̱ va̱ása va̱ʼa ke̱ʼéna”.
-
¿Nda̱chun ndiʼi tiempo xíniñúʼu ixakáʼnu-iniyó xa̱ʼa̱ táʼanyó?
ÑA̱ XA̱A̱ SA̱KUAʼAYÓ
Tá íxakáʼnu-iniún xa̱ʼa̱ na̱ hermano ta náʼún ña̱ kúʼvi̱-iniún xíniún ndiʼina, saá chíndeétáʼún xíʼin na̱ congregación ña̱ vií kutáʼanna.
Ná ndakaʼányó xa̱ʼa̱ ña̱yóʼo
-
¿Ndáaña keʼéyó ña̱ va̱ása kundasíyó kuniyó inkana ta kǒo ka̱ʼa̱nyó ña̱ va̱ása va̱ʼa xa̱ʼa̱na?
-
¿Ndáaña keʼún tá kúúmiíún ku̱a̱chi xíʼin na̱ ndásakáʼnu Ndióxi̱?
-
¿Á kúni̱ún ixakáʼnu-iniún xa̱ʼa̱ inkana nda̱a̱ táki̱ʼva kéʼé Jehová? ¿Nda̱chun?
NANDUKÚKA XA̱ʼA̱ÑA
Ta̱ Jesús xi̱niñúʼura iin ejemplo ña̱ va̱ʼa chindeétáʼanra xíʼinyó ña̱ kǒo ka̱ʼa̱nyó ña̱ va̱ása va̱ʼa xa̱ʼa̱ inkana. Koto ndáaña kúú ña̱yóʼo.
¿Á xíniñúʼu ndukúyó ña̱ ná koo káʼnu-inina xa̱ʼa̱yó ni ndákanixi̱níyó ña̱ kǒo níkeʼéyó ña̱ va̱ása va̱ʼa?
“Ná ndukúyó ña̱ koo káʼnu-inina, ña̱ kǒo ku̱a̱chi koo” (La Atalaya, 1 tí noviembre ku̱i̱ya̱ 2002)
Koto u̱vi̱ na̱ ta̱a na̱ xa̱ʼnu iin ñuu nu̱ú xi̱sa̱a̱-ini na̱ yiví xi̱xinitáʼanna, ta na̱yóʼo vií ni̱xa̱a̱na ki̱táʼanna.
Ta̱ Johny xíʼin ta̱ Gideon: tá ya̱chi̱ xi̱sa̱a̱-inina xi̱xinitáʼanna ta vitin kúúna hermano (6:42)
Koto ndáa ki̱ʼva ndasaviún ku̱a̱chi xíʼin inkana ta saá va̱ása taʼví táʼan na̱ congregación.
“Vií ná ndasaviíyó ku̱a̱chi” (La Atalaya, tí mayo ku̱i̱ya̱ 2016)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
