LECCIÓN 58
Ndiʼi tiempo nda̱kú koo iniún xíʼin Jehová
Miíyó na̱ ndásakáʼnu Ndióxi̱ xa̱a̱ chi̱ka̱a̱-iniyó ña̱ kǒo taxiyó ña̱ kasi nda̱a̱ ni iin ña̱ʼa á nda̱a̱ ni iinna nu̱úyó ña̱ ndasakáʼnuyó Jehová. Sana saá íyo ña̱ ndákanixi̱níún ta nu̱ú Jehová ndáyáʼviní ña̱ nda̱kú íyo iniún xíʼinra (kaʼvi 1 Crónicas 28:9). ¿Ama kúú ña̱ kivi ixayo̱ʼvi̱ña xíʼinyó ña̱ nda̱kú koo iniyó xíʼin Ndióxi̱? ¿Ndáaña keʼún ña̱ va̱ʼa ya̱ʼún nu̱ú ña̱yóʼo?
1. ¿Ndáaña kivi keʼé savana ta ixayo̱ʼvi̱ña xíʼinyó nda̱kú koo iniyó xíʼin Jehová?
Sava na̱ yiví kuni̱na ña̱ ná sandákooyó ña̱ ndasakáʼnuyó Jehová. ¿Ndáana kivi keʼé ña̱yóʼo? Tá kúú sava na̱ sa̱ndákoo ña̱ nda̱a̱ ta vitin káʼa̱nna ña̱ vatá xa̱ʼa̱ na̱ ñuu Ndióxi̱ ta kúni̱na ña̱ ná va̱ása kandíxakayóra. Ta na̱yóʼo kúú na̱ apóstata. Ta saátu sava na̱ níʼi yichi̱ nu̱ú na̱ veʼe-ñúʼu káʼa̱nna ña̱ vatá xa̱ʼa̱yó, ta na̱ kándíxa ña̱yóʼo kúxíkána nu̱ú ña̱ nda̱a̱. I̱yoní ña̱ ka̱ʼa̱nyó xíʼin iin na̱ sáa̱-ini xíni Ndióxi̱, ta saátu ña̱ kaʼviyó libro á ña̱ kotoyó video á inkaka ña̱ʼa ña̱ sándaana nu̱ú internet. Ta̱ Jesús ni̱ka̱ʼa̱nra xa̱ʼa̱ ña̱yóʼo xa̱ʼa̱ na̱ kúni̱ sandíʼi-xa̱ʼa̱ ña̱ nda̱kú íyo iniyó xíʼin Jehová: “Kǒo kuniso̱ʼondó ña̱ káʼa̱nna. Na̱ kúáava kúúna ta níʼina yichi̱ nu̱ú inkana. Tá iin na̱ kúáa nu̱ú níʼina yichi̱ nu̱ú inka na̱ kúáa nu̱ú, u̱vi̱ saá na̱yóʼo ko̱yo ini iin ya̱vi̱” (Mateo 15:14).
2. ¿Ndáaña ndáka̱xinyó keʼéyó kivi ixayo̱ʼvi̱ xíʼinyó ña̱ nda̱kú koo iniyó xíʼin Jehová?
Xa̱ʼa̱ ña̱ kúʼvi̱-iniyó xíniyó Jehová kǒo kúni̱yó keʼéyó nda̱a̱ ni iin ña̱ʼa ña̱ kítáʼan xíʼin na̱ veʼe-ñúʼu vatá. Ni va̱ása kuumiíyó chiñu ña̱ kítáʼan xíʼin na̱ veʼe-ñúʼu vatá ta ni va̱ása kitáʼanyó xíʼin na̱ chíndeétáʼan xíʼinna, ta ni iin ña̱ʼa ña̱ kéʼéyó ná va̱ása kitáʼanña xíʼin ña̱yóʼo. Jehová káʼa̱nra ña̱yóʼo xíʼin na̱ ñuura: “Keendó ti̱xinña” ta ña̱ ke̱eyó ti̱xin kúú Babilonia ña̱ káʼnu (Apocalipsis 18:2, 4).
NÁ SAKUAʼAKAYÓ XA̱ʼA̱ÑA
Koto ndáaña kivi keʼún ña̱ va̱ʼa nda̱a̱ ni iinna va̱ása sandíʼi-xa̱ʼa̱ ña̱ nda̱kú íyo iniún xíʼin Jehová. Ta saátu tá va̱ása kítáʼún xíʼin Babilonia ña̱ káʼnu náʼún ña̱ nda̱kú íyo iniún xíʼin Ndióxi̱.
3. Kiʼin kuenta xíʼin na̱ sánáʼa̱ ña̱ vatá
¿Ndáaña keʼéyó tá xíniso̱ʼoyó káʼa̱nna ña̱ va̱ása va̱ʼa xa̱ʼa̱ na̱ ñuu Jehová? Kaʼvindó Proverbios 14:15 ta ka̱ʼa̱nndó xa̱ʼa̱ ña̱yóʼo:
-
Koto ndáa ki̱ʼva vií kiʼinyó kuenta ta va̱ása kandíxayó ndiʼi ña̱ káʼa̱nna.
Kaʼvindó 2 Juan 9-11 ta ka̱ʼa̱nndó xa̱ʼa̱ ña̱yóʼo:
-
¿Ndáaña xíniñúʼu keʼéyó xíʼin na̱ apóstata?
-
Ni va̱ása kítáʼanyó xíʼin na̱ apóstata, ¿ndáaña kundoʼoyó tá xíniso̱ʼoyó ña̱ káʼa̱nna?
-
Tá ná kandíxayó ña̱ va̱ása va̱ʼa ña̱ káʼa̱nna xa̱ʼa̱ Jehová á xa̱ʼa̱ na̱ ñuura, ¿ndáaña kundoʼora túviún?
4. Nda̱kú koo iniún xíʼin Ndióxi̱ tá iin na̱ hermano ni̱ki̱ʼvina iin ku̱a̱chi ndeé
Tá ku̱nda̱a̱-iniyó ña̱ iin na̱ ndíka̱a̱ ti̱xin congregación ni̱ki̱ʼvina iin ku̱a̱chi ndeé, ¿ndáaña xíniñúʼu keʼéyó? Koto ndáaña kivi keʼún nu̱ú Ley ña̱ ta̱xi Ndióxi̱ ndaʼa̱ na̱ ñuu Israel. Kaʼvindó Levítico 5:1.
Nda̱a̱ táki̱ʼva káʼa̱n versículo yóʼo, tá ku̱nda̱a̱-iniyó ña̱ íyo iin na̱ ni̱ki̱ʼvi iin ku̱a̱chi ndeé, xíniñúʼu ka̱ʼa̱nyó xíʼin na̱ anciano xa̱ʼa̱ ña̱ xíni̱yó. Soo ña̱ siʼna keʼéyó kúú ña̱ vií ka̱ʼa̱nyó xíʼin na̱ ni̱ki̱ʼvi ku̱a̱chi ndeé yóʼo ña̱ ná ka̱ʼa̱nna xíʼin na̱ anciano xa̱ʼa̱ ña̱ va̱ása va̱ʼa ke̱ʼéna. Soo tá va̱ása xíínna keʼénaña miíyó kúú na̱ xíniñúʼu ka̱ʼa̱n xíʼin na̱ anciano chi nda̱kú íyo iniyó xíʼin Jehová. Tá kéʼéyó ña̱yóʼo, ¿nda̱chun náʼa̱yó ña̱ kúʼvi̱-iniyó ta nda̱kú íyo iniyó xíʼin...
-
... Jehová?
-
... na̱ yiví na̱ ni̱ki̱ʼvi ku̱a̱chi?
-
... na̱ congregación?
Tá iin na̱ hermano ndíka̱a̱na ndaʼa̱ tu̱ndóʼo, chindeétáʼan xíʼinna.
5. Kǒo kutáʼanndó xíʼin Babilonia ña̱ káʼnu
Kaʼvindó Lucas 4:8 xíʼin Apocalipsis 18:4, 5, ta ka̱ʼa̱nndó xa̱ʼa̱ pregunta yóʼo:
-
¿Á va̱xi ki̱vi̱i̱ nu̱ú tutu na̱ veʼe-ñuʼu̱ vatá?
-
¿Á kítáʼi̱n xíʼin sava na̱ kítáʼan xíʼin na̱ veʼe-ñuʼu̱ vatá?
-
Chiñu ña̱ kúúmiíi̱, ¿á chíndeétáʼanña xíʼin na̱ veʼe-ñuʼu̱ vatá?
-
¿Á íyo savaka ña̱ kéʼíi̱ ña̱ kítáʼan xíʼin na̱ veʼe-ñuʼu̱ vatá?
-
Tá saá íyoña, ¿ndáaña xíniñúʼu keʼíi̱ ña̱ va̱ʼa nasamai̱ ña̱yóʼo?
Nda̱a̱ ndáaka ña̱ ná ndaka̱xiún keʼún vií ná koo ña̱ xínitúni̱ún ta ná na̱ʼa̱ña ña̱ nda̱kú íyo iniún xíʼin Jehová.
¿Ndáaña keʼún tá iinna káʼa̱nna xíʼún ña̱ ná chindeétáʼún xíʼin iin organización ña̱ kítáʼan xíʼin na̱ veʼe-ñuʼu̱ vatá?
ÑA̱ KÁʼA̱N SAVA NA̱ YIVÍ: “Soo tá va̱ása xíni̱i̱ ña̱ káʼa̱n na̱ apóstata xa̱ʼa̱ na̱ testigo Jehová, ¿ndáa ki̱ʼva ka̱ʼi̱n xa̱ʼa̱ ña̱ nda̱a̱?”.
-
¿Á va̱ʼa keʼéyó saá? ¿Nda̱chun?
ÑA̱ XA̱A̱ SA̱KUAʼAYÓ
Tá kúni̱yó nda̱kú koo iniyó xíʼin Jehová va̱ása xíniñúʼu kutáʼanyó xíʼin na̱ kúni̱ sandáʼvi miíyó.
Ná ndakaʼányó xa̱ʼa̱ ña̱yóʼo
-
¿Nda̱chun va̱ása xíniñúʼu kuniso̱ʼoyó ña̱ káʼa̱n na̱ apóstata?
-
¿Ndáaña xíniñúʼu keʼéyó tá ku̱nda̱a̱-iniyó ña̱ ni̱ki̱ʼvi iin na̱ hermano iin ku̱a̱chi ndeé?
-
¿Ndáaña xíniñúʼu keʼéyó ña̱ va̱ʼa kandíxayó ña̱ káʼa̱n Ndióxi̱ ña̱ va̱ása kutáʼanyó xíʼin na̱ veʼe-ñuʼu̱ vatá?
NANDUKÚKA XA̱ʼA̱ÑA
Koto ndáaña kivi keʼún tá káʼa̱nna ña̱ vatá xa̱ʼa̱ na̱ testigo Jehová.
“¿Á xa̱a̱ kúnda̱a̱ va̱ʼa iniyó xa̱ʼaña?” (Tutu Ña̱ Nátúʼun xíʼinyó, tí agosto ku̱i̱ya̱ 2018)
¿Ndáa ki̱ʼva kunda̱a̱-iniún á iin organización á inkaka ña̱ʼa kítáʼanña xíʼin Babilonia ña̱ káʼnu?
¿Ndáaña kéʼé sava na̱ sáa̱-ini xíni ña̱ nda̱a̱ ña̱ ná sandákooyó kandíxayó Ndióxi̱?
Kaʼvi xa̱ʼa̱ “Nda̱a̱ tá loʼi̱ xi̱nandukúi̱ Ndióxi̱”, ña̱ va̱ʼa kunda̱a̱-iniún ndáa ki̱ʼva iin ta̱ su̱tu̱ ta̱ xi̱kandíxa ña̱ sintoísmo sa̱ndákoora veʼe-ñuʼu̱ vatá.
“Biblia chi̱ndeétáʼan xíʼinna ña̱ na̱samana” (La Atalaya, 1 tí julio ku̱i̱ya̱ 2011)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
