LECCIÓN 59
Kundeéva-iniún tá ná ixandi̱va̱ʼana xíʼún
Miíyó na̱ ndásakáʼnu Ndióxi̱ na̱ kasi kúúvana nu̱úyó á ixandi̱va̱ʼana xíʼinyó. Soo, ¿á xíniñúʼu yi̱ʼvíyó nu̱ú ña̱yóʼo?
1. ¿Nda̱chun va̱ása ndákanda̱-iniyó tá íxandi̱va̱ʼana xíʼinyó?
Biblia káxiní káʼa̱nña ña̱ “ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo Jesús, ixandi̱va̱ʼatuna xíʼin na̱yóʼova” (2 Timoteo 3:12). I̱xandi̱va̱ʼana xíʼin ta̱ Jesús saáchi va̱ása níxi̱kuura táʼan ña̱ ñuyǐví yóʼo, ta saátu kéʼéna xíʼin miíyó chi va̱ása kúúyó táʼan ña̱ ñuyǐví yóʼo ta va̱ása ndákanda̱-iniyó tá íxandi̱va̱ʼa na̱ chíñu á na̱ níʼi yichi̱ nu̱ú na̱ veʼe-ñuʼu̱ xíʼinyó (Juan 15:18, 19).
2. ¿Ndáa ki̱ʼva koo tu̱ʼvayó tá ná ixandi̱va̱ʼana xíʼinyó?
Vitin kúú ña̱ xíniñúʼu kandíxaníkayó Jehová. Ta ¿ndáa ki̱ʼva keʼéyó ña̱yóʼo? Xíniñúʼu taváyó tiempo ña̱ ndiʼi ki̱vi̱ ka̱ʼa̱nyó xíʼin Ndióxi̱ ta ka̱ʼviyó tu̱ʼunra. Ta saátu kǒo sandákooyó ña̱ ku̱ʼu̱nyó ndiʼi reunión. Ndiʼi ña̱yóʼo chindeétáʼanña xíʼinyó ña̱ ndakú koo iniyó ni íxandi̱va̱ʼana xíʼinyó á ni ná kasi na̱ veʼeyó nu̱úyó. Ku̱a̱ʼání yichi̱ i̱xandi̱va̱ʼana xíʼin ta̱ apóstol Pablo, xa̱ʼa̱ ña̱kán ka̱ʼyíra ña̱yóʼo: “Jehová kúú ta̱ chindeétáʼan xíʼi̱n. Va̱ása yi̱ʼvíi̱” (Hebreos 13:6).
Tá kǒo sándákooyó ña̱ natúʼunyó xa̱ʼa̱ Ndióxi̱ ña̱yóʼo chindeétáʼanña xíʼinyó ña̱ ndakú kooyó. Tá nátúʼunyó xíʼin na̱ yiví xa̱ʼa̱ Jehová, chíndeétáʼanña xíʼinyó ña̱ kundaaka-iniyóra ta va̱ása yi̱ʼvíyó nu̱ú na̱ yiví (Proverbios 29:25). Tá vitin ndakú va̱ʼa ná koo iniún, ña̱yóʼo chindeétáʼanña xíʼún ña̱ kǒo sandákoún ña̱ natúʼún xíʼin na̱ yiví ni ná ka̱ʼa̱n na̱ chíñu xíʼún ña̱ kǒo natúʼunkaún xa̱ʼa̱ Ndióxi̱ (1 Tesalonicenses 2:2).
3. ¿Tá ná kundeé-iniyó nu̱ú ña̱ íxandi̱va̱ʼana xíʼinyó á íyo iin ña̱ va̱ʼa ndakiʼinyó?
Va̱ása kúni̱yó ña̱ ná ixandi̱va̱ʼana xíʼinyó. Soo tá kúndeé-iniyó nu̱ú ña̱yóʼo, va̱ʼaníka xáa̱yó kándíxayó Ndióxi̱. Ta saátu yatinka íyoyó nu̱ú Jehová tá xítoyó ña̱ chíndeétáʼanra xíʼinyó tá túviyó ña̱ va̱ása kúchiñuyó ña̱ ya̱ʼa iinlá miíyó nu̱ú tu̱ndóʼo (kaʼvi Santiago 1:2-4). Jehová xóʼvi̱ra tá xítora xóʼvi̱yó soo kúsi̱í-inira tá va̱ása ndákava-iniyó. Biblia káchiña: “Tá kúndeé-inindó xóʼvi̱ndó xa̱ʼa̱ ña̱ kéʼéndó ña̱ va̱ʼa, ña̱yóʼo ndixa kúú ña̱ kúsi̱íní-ini Ndióxi̱ xíʼin” (1 Pedro 2:20). Ndiʼi na̱ kúndeé-ini ta nda̱kú íyo inina, Jehová taxira ña̱ kutakuna ndiʼi tiempo nu̱ú ñuyǐví nu̱ú va̱ása kooka na̱ sa̱a̱-ini kuni na̱ ndásakáʼnu Ndióxi̱ ta̱ nda̱a̱ (Mateo 24:13).
NÁ SAKUAʼAKAYÓ XA̱ʼA̱ÑA
Ná kotoyó ña̱ kivi chindeétáʼan xíʼinyó ña̱ nda̱kú koo iniyó xíʼin Jehová ni íxandi̱va̱ʼana xíʼinyó. Ta ná kotoyó ndáaña va̱ʼa taxi Jehová ndaʼa̱yó xa̱ʼa̱ ña̱ ndakú íyo iniyó.
4. Kundeéva-iniún ni sási na̱ veʼún nu̱ún
Ta̱ Jesús xi̱xini̱vara xa̱ʼa̱ ña̱yóʼo ta ni̱ka̱ʼa̱nra ña̱ sava na̱ veʼeyó kasina nu̱úyó ña̱ ndasakáʼnuyó Jehová. Kaʼvindó Mateo 10:34-36 ta ka̱ʼa̱nndó xa̱ʼa̱ ña̱yóʼo:
-
Tá iinna kúni̱na kachíñuna nu̱ú Jehová, ¿ndáaña kivi keʼé na̱ veʼena xíʼinna?
Ña̱ va̱ʼa kuniún sava na̱ ndo̱ʼo táʼan ña̱yóʼo, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña keʼún tá iin na̱ veʼún á iin na̱ migoún kúni̱na ña̱ ná sandákoún ña̱ ndasakáʼnún Jehová?
Kaʼvindó Salmo 27:10 xíʼin Marcos 10:29, 30. Tándi̱ʼi ka̱ʼvindó iin tá iin texto yóʼo ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva chindeétáʼan texto yóʼo xíʼún ña̱ kundeé-iniún tá iin na̱ veʼún á na̱ migoún sásina nu̱ún?
5. Ña̱ íxandi̱va̱ʼana xíʼún ná kǒo kasiña nu̱ún ña̱ ndasakáʼnún Jehová
Xíniñúʼu ndakú koo iniyó tá inkana sásina nu̱úyó ña̱ ndasakáʼnuyó Jehová. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña xi̱niún nu̱ú video yóʼo chindeétáʼan xíʼún ña̱ ndakú koo iniún?
Kaʼvindó Hechos 5:27-29 xíʼin Hebreos 10:24, 25. Tándi̱ʼi ka̱ʼvindó iin tá iin texto yóʼo ka̱ʼa̱nndó xa̱ʼa̱ ña̱yóʼo:
-
¿Nda̱chun ndáyáʼviní ndakundeéyó ndasakáʼnuyó Jehová ni na̱ chíñu ná ka̱ʼa̱nna xíʼinyó ña̱ va̱ása natúʼunkayó xa̱ʼa̱ Ndióxi̱ á ña̱ ndatakayó?
6. Jehová chindeétáʼanra xíʼún ña̱ kundeé-iniún
Na̱ testigo Jehová na̱ xa̱a̱ síín síín ku̱i̱ya̱ ta saátu xa̱a̱ síín ñuuna, nda̱kúva íyo inina xíʼin Jehová ni íxandi̱va̱ʼana xíʼinna. Ña̱ va̱ʼa kunda̱a̱-iniún ndáa ki̱ʼva kéʼéna ña̱yóʼo, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña chi̱ndeétáʼan xíʼin na̱ hermano yóʼo ña̱ ku̱ndeé-inina nu̱ú na̱ i̱xandi̱va̱ʼana xíʼinna?
Kaʼvindó Romanos 8:35 xíʼin 37-39, ta saátu Filipenses 4:13. Tándi̱ʼi ka̱ʼvindó iin tá iin texto yóʼo ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva chíndeétáʼan texto yóʼo xíʼún ña̱ kiviva kundeé-iniún ni ná ya̱ʼún nu̱ú nda̱a̱ ndáaka tu̱ndóʼo?
Kaʼvindó Mateo 5:10-12 ta ka̱ʼa̱nndó xa̱ʼa̱ ña̱yóʼo:
-
¿Nda̱chun kivi kusi̱í-iniún ni íxandi̱va̱ʼana xíʼún?
Ku̱a̱ʼání na̱ ndásakáʼnu Jehová xa̱a̱ kúchiñuna yáʼana nu̱ú tu̱ndóʼo ña̱ sási nu̱úna ña̱ ndasakáʼnunara. Ta saátu yóʼó kuchiñuvaún.
ÑA̱ KÁʼA̱N SAVA NA̱ YIVÍ: “Va̱ása kundeé-inii̱ tá ná ixandi̱va̱ʼana xíʼi̱n”.
-
¿Ndáa texto ña̱ va̱xi nu̱ú Biblia kivi chindeétáʼan xíʼin na̱ ndákanixi̱ní saá ña̱ ndakú koo inina?
ÑA̱ XA̱A̱ SA̱KUAʼAYÓ
Nu̱ú Jehová ndáyáʼviní ña̱ chíka̱a̱yó ndee̱ ña̱ ndasakáʼnuyóra ni íxandi̱va̱ʼana xíʼinyó. Tá ná chindeétáʼanra xíʼinyó kuchiñuvayó.
Ná ndakaʼányó xa̱ʼa̱ ña̱yóʼo
-
¿Nda̱chun va̱ása xíniñúʼu ndakanda̱-iniyó na̱ ndásakáʼnu Ndióxi̱ tá íxandi̱va̱ʼana xíʼinyó?
-
¿Ndáaña kivi keʼún vitin ña̱ koo tu̱ʼvaún tá ná ixandi̱va̱ʼana xíʼún?
-
¿Nda̱chun va̱ʼa kándíxaún ña̱ kiviva ndasakáʼnún Jehová ni nda̱a̱ ndáaka ña̱ ná kuu?
NANDUKÚKA XA̱ʼA̱ÑA
Koto ndáa ki̱ʼva chi̱ndeétáʼan Jehová xíʼin iin ta̱ hermano loʼo tá xi̱ndika̱a̱ra veʼe-ka̱a xa̱ʼa̱ ña̱ kǒo níki̱ʼvira xíʼin ña̱ íyo ñuyǐví yóʼo.
Koto ndáaña chi̱ndeétáʼan xíʼin iin na̱ matrimonio ña̱ nda̱kú ni̱xi̱yo inina xíʼin Jehová ni ku̱a̱ʼání ku̱i̱ya̱ xi̱sasina nu̱úna.
Sakúaʼa ndakú koo iniún tá ná ixandi̱va̱ʼana xíʼún.
“Ná koo tu̱ʼvayó vitin nu̱ú tu̱ndóʼo ña̱ va̱xi” (Tutu Ña̱ Nátúʼun xíʼinyó, tí julio ku̱i̱ya̱ 2019)
Tá ná kasi na̱ veʼeyó nu̱úyó, ¿ndáaña xíniñúʼu keʼéyó? ¿Ndáaña keʼéyó ña̱ kǒo ku̱a̱chi koo xíʼin na̱ veʼeyó ta saá nda̱kú koo iniyó xíʼin Jehová?
“Xa̱ʼa̱ ña̱ nda̱a̱ koo ku̱a̱chi nu̱úyó” (La Atalaya, tí octubre ku̱i̱ya̱ 2017)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
