Tá si̱lóʼo kúma̱ní kuvi ta̱ Jesús, ta̱vá síínra ta̱ Pedro, ta̱ Santiago, ta̱ Juan xíʼin ta̱ Andrés, tasaá na̱túʼunra xíʼin na̱yóʼo xa̱ʼa ña̱ koo chí nu̱únínu ña̱ tíempo nu̱ú ndíʼi, tasaá ni̱ka̱ʼa̱nra ña̱yóʼo: “¿Ndáa ta̱ kúú ta̱ ndinuʼu-ini káchíñu ta vií ndákanixi̱níra xíʼin chiñu ña̱ ta̱xi ta̱ kúúchée nu̱úra ndaʼa̱ra, ña̱ taxira kuxu na̱ yiví míí tíempo xíniñúʼunaña?” (Mateo 24:3, 45; Marcos 13:3, 4). Xa̱ʼa ña̱ kúú Jesús ta̱ chée nu̱úna tu̱ʼun ña̱ ni̱ka̱ʼa̱nra ni̱na̱ʼa̱ña ña̱ ndaka̱xinra iin grupo na̱ taxi kuxu na̱ ndíku̱n sa̱tára, ta su̱ví ña̱ʼa ña̱ xíxiyó níkáʼa̱nra xa̱ʼa chi ña̱ ni̱ka̱ʼa̱nra xa̱ʼa kúú ña̱ sanáʼa̱na miíyó xa̱ʼa Ndióxi̱va. ¿Ndáana kúú na̱ grupo yóʼo?

Na̱ ndákaxin Ndióxi̱ ku̱ʼu̱n chí ndiví tixin na̱yóʼo kána iin tiʼvi loʼona ta na̱yóʼo kúú na̱ ndíku̱n ta̱ Jesús. Ta na̱yóʼo kúúna kíʼin cuenta xíʼin na̱ ñuu Ndióxi̱ na̱ testigo Jehová ña̱ iníísaá ñuyǐví. Ta na̱yóʼo kúú na̱ sánáʼa̱ miíyó xa̱ʼa Ndióxi̱, ta ndáa-iniyóna ña̱ va̱ʼaka kunda̱a̱-iniyó xa̱ʼa tu̱ʼunra míí tíempo ña̱ xíniñúʼuyóña (Lucas 12:42).

Kíʼinna kuenta xíʼin na̱ ñuu Ndióxi̱ (1 Timoteo 3:15). Jesús kúú ta̱ ta̱xi iin chiñu káʼnu ndaʼa̱na ña̱ kaʼndana chíñu nu̱ú na̱ ñuu Jehová. Ta kundaana ndiʼi ña̱ kúúmií Jesús nu̱ú Ñuʼú yóʼo, ta kiʼinna kuenta xa̱ʼa ña̱ ku̱ʼu̱n tu̱ʼun Ndióxi̱ nu̱ú ndiʼi na̱ ñuyǐví, soo su̱ví ña̱yóʼo kuití kéʼéna sánáʼa̱tuna na̱ congregación. Xa̱ʼa ña̱ táxina míí ña̱ xíniñúʼuyó ña̱kán távána tutu Ndióxi̱ va̱xi ndaʼa̱yó tá kúú ña̱ xíniñúʼuyó tá ku̱a̱ʼa̱nyó natúʼunyó xíʼin na̱ yiví xa̱ʼa Ndióxi̱, ta sanáʼa̱na miíyó tá xáʼa̱nyó veʼe nu̱ú sákuaʼayó xa̱ʼa Ndióxi̱ ta saátu ña̱ sákuaʼayó tá xáʼa̱nyó asamblea.

Na̱ kéʼé chiñu yóʼo viíní kéʼénaña chi káʼa̱nna nina ña̱ nda̱a̱ ña̱ va̱xi nu̱ú Biblia ta kéʼéna ña̱ ni̱ka̱ʼa̱n Jesús ña̱ ku̱ʼu̱n tu̱ʼun Ndióxi̱ nu̱ú ndiʼi na̱ ñuyǐví, ta vií ndákanixi̱nína ña̱ ndíʼi-inina xa̱ʼa ña̱ kúúmií Jesús nu̱ú Ñuʼú yóʼo (Hechos 10:42). Jehová kúú ta̱ chíndeé miína xíʼin chiñu ña̱ kéʼéna, xa̱ʼa ña̱yóʼo íyo ku̱a̱ʼáka na̱ Testigo vitin ta íyo ku̱a̱ʼáka ña̱ʼa sanáʼa̱na miíyó xa̱ʼa Ndióxi̱ (Isaías 60:22; 65:13).

• ¿Ndáana kúú na̱ nda̱ka̱xin Jesús ña̱ sanáʼa̱na miíyó xa̱ʼa Ndióxi̱?

• Na̱ ta̱xi Jesús chiñu ndaʼa̱, ¿ndachun káʼa̱nyó xíʼin ndinuʼu-inina káchíñuna ta vií ndákanixi̱nína xa̱ʼa ña̱ kéʼéna?