Jesucristo ni̱ka̱ʼa̱nra xíʼin na̱ xi̱ndiku̱n sa̱tára: “Ta saá ndóʼó naye̱ʼendó nu̱ú na̱ yiví ña̱kán va̱ʼa ná kunina ña̱ kéʼéndó tasaá ndasakáʼnuna Yivándó Ndióxi̱ ta̱ íyo chí ndiví” (Mateo 5:16). Xa̱ʼa ña̱yóʼo kúúña xíniñúʼundi̱ ña̱ Internet. Nu̱ú página jw.org/jw-mxg, yóʼo kúú nu̱ú káʼa̱nña xa̱ʼa ña̱ kándíxa ndi̱ʼi̱ na̱ testigo Jehová xíʼin xa̱ʼa chiñu kéʼéndi̱. ¿Ndáaka ña̱ káʼa̱nña xa̱ʼa?

Káʼa̱nña xa̱ʼa ña̱ʼa ña̱ va̱xi nu̱ú Biblia ña̱ ndákatu̱ʼun ku̱a̱ʼá na̱ yiví. Yóʼo kunda̱a̱-iniún xa̱ʼa tu̱ʼun ña̱ ndáyáʼviní ña̱ ndákatu̱ʼun na̱ yiví. I̱ñu̱ ña̱ʼa ña̱ ndákatu̱ʼun na̱yóʼo va̱xiña nu̱ú tutu ¿Á kixa̱a̱ iin ki̱vi̱ ña̱ kǒo ndoʼokayó? xíʼin ña̱ ¿Á va̱ʼa ndataku na̱ ni̱xi̱ʼi̱? Xa̱yáʼa i̱ñu̱ ciento nu̱ú tu̱ʼun íyoña nu̱ú Internet. Kivi ndani̱ʼún nu̱ú va̱xi Biblia ña̱ Traducción del Nuevo Mundo xa̱yáʼa iin ciento o̱ko̱ u̱xu̱ nu̱ú tu̱ʼun íyoña, va̱xi tutu ña̱ va̱ʼa chindeé miíún sakuaʼún xa̱ʼa Biblia tá kúú ña̱ naní ¿Ndáña kúú míí ña̱ ndixa sánáʼa̱ Biblia?, vaxitu La Atalaya xíʼin ¡Despertad! ña̱ sa̱kán kána. Kivi kaʼviúnña á kuniso̱ʼúnña nu̱ú Internet xíʼin archivo MP3 á kivitu taváúnña xíʼin archivo PDF á EPUB. Tá kúni̱ún kivi taváún nu̱ú impresora copia tutu ña̱ va̱xi tu̱ʼun miíún ta va̱ʼa na̱ʼúnña nu̱ú inka na̱ kúni̱ sákuaʼa xa̱ʼa Ndióxi̱. Nu̱ú Internet va̱xi película ña̱ va̱xi tu̱ʼun séña ku̱a̱ʼá nu̱ú tu̱ʼun va̱xiña. Va̱xi nu̱ú kuniso̱ʼún nu̱ú káʼvina Biblia ta nátúʼunna xa̱ʼaña, va̱xi drama ña̱ kána nu̱ú Biblia, va̱xitu yaa ña̱ va̱ʼa kuniso̱ʼún ta va̱ʼa taváún ndiʼi ña̱yóʼo.

Ña̱ nátúʼun xa̱ʼa na̱ testigo Jehová. Ña̱ Internet ña̱ xíniñúʼundi̱ nu̱ú ña̱yóʼo va̱xi videoclips nu̱ú káʼa̱nña xa̱ʼa ndiʼi chiñu ña̱ kéʼéndi̱ iníísaá ñuyǐví, káʼa̱nña xa̱ʼa ña̱ ndóʼondi̱, ta saátu káʼa̱nña xa̱ʼa nda̱saa chíndeé táʼanndi̱ tá íyo tu̱ndóʼo. Nu̱ú ña̱yóʼo kivi ndani̱ʼún nu̱ú káʼa̱nña xa̱ʼa asamblea ña̱ xi̱ku̱nu̱mi̱ koo, ta yóʼo va̱xitu nu̱ú káʼa̱nña ndáaña keʼún ña̱ va̱ʼa taaún nu̱ú na̱ Betel.

Tixaʼvi ña̱ íyo Internet va̱ʼa xáa̱ ku̱a̱ʼá na̱ yiví kunda̱a̱-inina xa̱ʼa Ndióxi̱ iníísaá ñuyǐví, nda̱a̱ ñuu ña̱ ñúʼu xíka tá kúú ñuu nu̱ú vi̱xinní ña̱ naní Antártida. Ná ka̱ʼa̱nyó xíʼin Jehová ña̱ kama ná ku̱ʼu̱n tu̱ʼunra iníísaá ñuyǐví ña̱kán va̱ʼa ndasakáʼnunara (2 Tesalonicenses 3:1).

• ¿Nda̱saa chíndeé ña̱ página jw.org/jw-mxg ña̱ ku̱a̱ʼáka na̱ yiví xa̱a̱ kunda̱a̱-ini xa̱ʼa ña̱ nda̱a̱ ña̱ sánáʼa̱ Biblia?

• ¿Ndáaña kúni̱ún nandukún nu̱ú páginandi̱?