1-3. a) ¿Ndáa xa̱ʼa̱ kúú ña̱ ni̱sa̱a̱ní ta̱ Pablo chí Atenas? b) ¿Ndáaña sákuaʼayó xíʼin ña̱ ke̱ʼé ta̱ Pablo?

 TA̱ PABLO xíkara ku̱a̱ʼa̱nra ñuu Atenas (Grecia), ñuu nu̱ú xáa̱ na̱ yiví ña̱ kaʼvi va̱ʼana, xa̱a̱ íyo ku̱a̱ʼá ku̱i̱ya̱ ñuu yóʼo ta̱ filósofo Sócrates, ta̱ Platón xíʼin ta̱ Aristóteles xi̱sanáʼa̱na ña̱ xi̱ndakanixi̱nína. Tá ndákundeéra ku̱a̱ʼa̱nra, ta̱ Pablo sáa̱níkara, saáchi ñuu yóʼo na̱ yiví ndásakáʼnuna ku̱a̱ʼání ndióxi̱, ta ndiʼi táʼví íyo ña̱ʼa ña̱ ndásakáʼnuna, su̱ví kuití ini templo saáchi íyoña chí nu̱ú ya̱ʼvi ta saátu chí calle. Ta̱ Pablo xa̱a̱ xíni̱ra ndáaña ndákanixi̱ní Ndióxi̱ ta̱ nda̱a̱ xa̱ʼa̱ ña̱ʼa ña̱ ndásakáʼnuna (Éx. 20:4, 5). Nda̱a̱ táki̱ʼva kéʼé Jehová ña̱ ni loʼo va̱ása kútóora ña̱ ndasakáʼnuna inka ndióxi̱, saátu íyo ña̱ ndákanixi̱ní ta̱ Pablo.

² Tá ni̱xa̱a̱ra chí nu̱ú ya̱ʼvi, xi̱nira iin ña̱ʼa ña̱ kininí: chí táʼví noroeste chí nu̱ú íyo yéʼé nu̱ú kíʼvina, xi̱nira ku̱a̱ʼání na̱ʼná ndióxi̱ ña̱ naní Hermes, ña̱ kininí náʼa̱. Ta iníí saá nu̱ú ya̱ʼvi íyo nu̱ú ndásakáʼnunaña. ¿Ndáaña keʼé ta̱ Pablo ña̱ va̱ʼa natúʼunra xíʼin na̱ yiví ñuu yóʼo? ¿Á kuchiñura vitá koo inira ta ndani̱ʼíra ña̱ kivi natúʼunra xíʼin na̱ yiví yóʼo? ¿Á kuchiñura chindeétáʼanra xíʼinna ña̱ va̱ʼa nandukúna Ndióxi̱ ta̱ nda̱a̱ ta ndani̱ʼínara?

³ Nu̱ú Hechos 17:22-31 kivi kaʼviyó ña̱ ni̱ka̱ʼa̱nra xíʼin na̱ ta̱a na̱ ndíchi na̱ ni̱xi̱yo ñuu Atenas. Tá ná kaʼviyó ña̱ ni̱ka̱ʼa̱nra xa̱ʼa̱, kivi sakúaʼayó ndáa ki̱ʼva vií natúʼunyó xíʼin na̱ yiví, káxi ka̱ʼa̱nyó xa̱ʼa̱ña, sakúaʼakayó natúʼunyó xa̱ʼa̱ Ndióxi̱ ta saátu chindeétáʼanña xíʼinyó ña̱ kotoyó ndáaña ka̱ʼa̱nyó xíʼin na̱ yiví ña̱ va̱ʼa kixáʼana ndakanixi̱nína xa̱ʼa̱ ña̱ káʼa̱nyó xíʼinna.

4, 5. ¿Ndáa táʼví ñuu Atenas ni̱xa̱ʼa̱n ta̱ Pablo na̱túʼunra xa̱ʼa̱ Ndióxi̱, ta nda̱chun i̱xayo̱ʼvi̱níña xíʼinra?

⁴ Ta̱ Pablo ni̱xa̱ʼa̱nra ñuu Atenas a tá ku̱i̱ya̱ 50 tá yichi̱ u̱vi̱ ña̱ ni̱xa̱ʼa̱nra na̱túʼunra xa̱ʼa̱ Ndióxi̱ xíʼin ku̱a̱ʼání na̱ ñuu. Nani ndátura ña̱ kixaa̱ ta̱ Silas xíʼin ta̱ Timoteo ndakutáʼanna xíʼinra chi ni̱xa̱ʼa̱nna ñuu Berea, “ki̱xáʼara sánáʼa̱ra na̱ judío ini ña̱ sinagoga”, nda̱a̱ táki̱ʼva xi̱keʼéra ndiʼi yichi̱. Ta saátu ni̱xa̱ʼa̱nra nu̱ú kivi natúʼunra xíʼin na̱ ñuu Atenas na̱ va̱ása kúú judío: “chí nu̱ú ya̱ʼvi” á ña̱ xi̱kaʼa̱nna ágora xíʼin (Hech. 17:17). Nu̱ú ya̱ʼvi yóʼo xi̱kindo̱oña chí táʼví noroeste  ña̱ Acrópolis ta ki̱ʼva 5,000 metro ndíka̱ ni̱xi̱yoña. Soo, su̱ví iin ya̱ʼvi kuití níxi̱yoña chi ña̱yóʼo xi̱ndayáʼviníña saáchi yóʼo kúú nu̱ú xi̱ndakutáʼan na̱ ñuu Atenas. Nda̱a̱ táki̱ʼva káchi iin ta̱ xíni̱va̱ʼa, “yóʼo kúú nu̱ú xi̱ndakutáʼanna ña̱ xi̱kóna, ña̱ ka̱ʼa̱nna xa̱ʼa̱ política ta saátu ña̱ʼa ña̱ xi̱keʼéna ñuu kán”. Na̱ ndíchiní xi̱kutóonína ndakutáʼanna kán ña̱ va̱ʼa ka̱ʼa̱nna xa̱ʼa̱ ña̱ xíni̱na.

⁵ Sana i̱xayo̱ʼvi̱nívaña xíʼin ta̱ Pablo ña̱ natúʼunra xa̱ʼa̱ Ndióxi̱ chí nu̱ú ya̱ʼvi saáchi u̱vi̱ nu̱ú na̱ yiví na̱ ndíchi kúú na̱ xi̱ndakutáʼan kán: na̱ epicúreo xíʼin na̱ estoico. b Na̱ epicúreo xi̱kandíxana ña̱ iin sana kuití kúú ña̱ ki̱xaa̱yó íyoyó. Kivi kachiyó ña̱ siaʼa kúú ña̱ xi̱ndakanixi̱nína: “Kǒo xíniñúʼu yi̱ʼvíyó kuniyó Ndióxi̱. Tá xa̱a̱ ni̱xi̱ʼi̱yó kǒoka ña̱ ndóʼo iniyó. Kiviva xa̱a̱yó keʼéyó ña̱ va̱ʼa ta saátu kundeé-iniyó nu̱ú ña̱ va̱ása va̱ʼa”. Ta na̱ estoico xi̱kandíxana ña̱ kivi viíní kundoo na̱ yiví tá viíní ná ndakanixi̱nína xa̱ʼa̱ iin ña̱ʼa ta ná taxina kuniʼi ña̱yóʼo yichi̱ nu̱úna, ta saátu xi̱ndakanixi̱nína ña̱ su̱ví iin na̱ yiví ndixa kúú Ndióxi̱. Saátu, u̱vi̱ saá na̱yóʼo kǒo níxi̱kandíxana ña̱ ndataku na̱ ni̱xi̱ʼi̱ nda̱a̱ táki̱ʼva xi̱sanáʼa̱ na̱ discípulo ta̱ Cristo. Ña̱ xi̱kandíxa u̱vi̱ saá na̱yóʼo ni loʼo kǒo níxi̱kitáʼanña xíʼin ña̱ xi̱kaʼa̱n ta̱ Pablo xa̱ʼa̱: ña̱ xi̱sanáʼa̱ na̱ xi̱ndiku̱n ta̱ Cristo.

6, 7. ¿Ndáaña ke̱ʼé na̱ ta̱a griego na̱ ndíchiní tá na̱túʼun ta̱ Pablo xa̱ʼa̱ Ndióxi̱ xíʼinna, ta ndáaña kéʼé ku̱a̱ʼání na̱ yiví tiempo vitin tá nátúʼunyó xa̱ʼa̱ Ndióxi̱ xíʼinna?

⁶ ¿Ndáaña ke̱ʼé na̱ griego na̱ ndíchiní tá na̱túʼun ta̱ Pablo xíʼinna? Savana ni̱ka̱ʼa̱nna ña̱ kúúra “ta̱ sána” á “ña̱ kúúra ta̱ ndákaya si̱ʼva̱” (koto nota ña̱ estudio ña̱ va̱xi nu̱ú Hechos 17:18, nu̱ú Biblia de estudio). Iin ta̱ xíni̱va̱ʼa káchira: “Tu̱ʼun griego ña̱ xi̱niñúʼuna yóʼo xi̱kaʼa̱nña xa̱ʼa̱ saa válí tí xi̱ndakaya si̱ʼva̱; tá ni̱ya̱ʼa tiempo ki̱xáʼana xíniñúʼuna tu̱ʼun yóʼo ña̱ va̱ʼa ka̱ʼa̱nna xa̱ʼa̱ na̱ yiví na̱ xi̱xika nu̱ú ya̱ʼvi ta xi̱ndakayana ña̱ xi̱kindo̱o ña̱ xi̱xixi inkana á na̱ xi̱ndakaya inkaka ña̱ʼa. Tá ni̱ya̱ʼa tiempo ki̱xáʼana xíniñúʼuna tu̱ʼun yóʼo ña̱ va̱ʼa ka̱ʼa̱nna xa̱ʼa̱ na̱ yiví na̱ xi̱kandíxa ña̱ xi̱sanáʼa̱ inkana soo va̱ása kúchiñuna ndachitáʼanna ndiʼi ña̱yóʼo ta vií ndakanina xa̱ʼa̱ña”. Xa̱ʼa̱ ña̱kán na̱ ta̱a na̱ ndíchiní yóʼo xi̱kaʼa̱n-ndi̱va̱ʼana xíʼin ta̱ Pablo saáchi ña̱ xi̱kuni̱ kachina kúú ña̱ ni loʼo va̱ása xíni̱ra, ta xi̱kaʼa̱n kuitíra xa̱ʼa̱ ña̱ʼa ña̱ xi̱sanáʼa̱ inkana. Soo nda̱a̱ táki̱ʼva sakúaʼayó, va̱ása níyi̱ʼvíra xa̱ʼa̱ ña̱ ni̱ka̱ʼa̱n-ndi̱va̱ʼana xíʼinra.

⁷ Saátu íyo ña̱ kéʼé na̱ yiví tiempo vitin, ku̱a̱ʼánína kúsi̱kindaana miíyó xa̱ʼa̱ ña̱ kúúyó testigo Jehová ta kándíxayó ña̱ káʼa̱n Biblia. Tá kúú, íyo sava na̱ maestro na̱ sánáʼa̱ ña̱ ndixa kúú ña̱ ki̱xiyó ti̱xin kití ta káchina ña̱ tá na̱ yiví ndíchi kúúyó xíniñúʼu kandíxayó ña̱yóʼo. Nu̱ú na̱yóʼo na̱ kǒo xíín kandíxa ña̱yóʼo iin na̱ kíʼví kúúna. Na̱ ndíchi yóʼo káʼa̱nna ña̱ kúúyó na̱ kíʼví saáchi sánáʼa̱yó ña̱ káʼa̱n Biblia ta saátu náʼa̱yó ña̱ íyo iin na̱ i̱xava̱ʼa ndiʼi ña̱ʼa. Soo miíyó kǒo táxiyó ña̱ sayíʼvina miíyó, ndakú íyo iniyó ta káʼa̱nyó ña̱ ndiʼi ña̱ íyo nu̱ú ñuʼú íyo iin ta̱ ndíchiní i̱xava̱ʼaña, ta ta̱ ke̱ʼé ña̱yóʼo kúú Jehová Ndióxi̱yó (Apoc. 4:11).

 8. a) ¿Ndáaña ke̱ʼé inka na̱ yiví na̱ xi̱niso̱ʼo ña̱ ni̱ka̱ʼa̱n ta̱ Pablo? b) ¿Ndáaña kúni̱ kachi tu̱ʼun Areópago? (Koto nota).

⁸ Inka na̱ xi̱niso̱ʼo ña̱ ni̱ka̱ʼa̱n ta̱ Pablo, síínva íyo ña̱ ni̱ka̱ʼa̱nna. Na̱yóʼo ka̱china: “Xa̱ʼa̱ ndióxi̱ ña̱ inka ñuu nátúʼunra” (Hech. 17:18). Soo tá xa̱ʼa̱ ndióxi̱ inka ñuu sánáʼa̱ ta̱ Pablo chí Atenas, ku̱a̱ʼání tu̱ndóʼo kixi nu̱úra. Xa̱a̱ íyo  ku̱a̱ʼá ku̱i̱ya̱ chí sa̱tá chi̱kaa̱na ku̱a̱chi ta̱ filósofo Sócrates ña̱ ke̱ʼéra táʼan ña̱yóʼo, ña̱kán ni̱ka̱ʼa̱nna ña̱ ná kaʼnínara. Ta xa̱ʼa̱ ña̱kán kúú ña̱ ni̱xa̱ʼa̱nna xíʼin ta̱ Pablo chí Areópago c ña̱ va̱ʼa viíka ná ndakanira xa̱ʼa̱ ña̱ xi̱sanáʼa̱ra, saáchi nu̱ú na̱yóʼo síínní ni̱xi̱yoña. Ña̱kán, ¿ndáaña keʼé ta̱ Pablo ña̱ va̱ʼa vií ndakanira ña̱yóʼo nu̱ú na̱ yiví na̱ ni loʼo va̱ása xíni̱ xa̱ʼa̱ tu̱ʼun Ndióxi̱?

9-11. a) ¿Ndáa ña̱ʼa ña̱ xa̱a̱ xi̱xini̱ na̱ yiví kán kúú ña̱ xi̱niñúʼu ta̱ Pablo ña̱ va̱ʼa ka̱ʼa̱nra xíʼinna? b) ¿Ndáa ki̱ʼva kundiku̱nyó yichi̱ ta̱ Pablo tá nátúʼunyó xíʼin na̱ yiví?

⁹ Ná ndakaʼányó chi ni̱sa̱a̱ní ta̱ Pablo tá xi̱nira ku̱a̱ʼání ndióxi̱ ña̱ ndásakáʼnuna. Soo nu̱úka ña̱ kixáʼara ka̱ʼa̱n-ndi̱va̱ʼara xa̱ʼa̱ ndiʼi ña̱ʼa ña̱ xi̱ndasakáʼnuna, kúee ni̱xi̱yo inira, ta ña̱ va̱ʼa kuniso̱ʼo ndiʼi na̱ nda̱kutáʼan kán, viíní ni̱ka̱ʼa̱nra xa̱ʼa̱ iin ña̱ʼa ña̱ xi̱keʼé ndiʼi na̱yóʼo. Tá ki̱xáʼara káʼa̱nra, ka̱chira: “Ndóʼó na̱ ta̱a na̱ ñuu Atenas, xítoi̱ ña̱ ndíʼi̱níka-inindó xa̱ʼa̱ na̱ ndióxi̱ nu̱úka inkana” (Hech. 17:22). Yóʼo ni̱na̱ʼa̱ra ña̱ ndíchiní íyora, saáchi ni̱ka̱ʼa̱nra xíʼinna  ña̱ va̱ʼaní íyo ña̱ kéʼéna xa̱ʼa̱ ña̱ ndíʼi̱-inina xa̱ʼa̱ Ndióxi̱. Nda̱a̱ táki̱ʼva íyo ña̱ ni̱ka̱ʼa̱nra ña̱yóʼo xíʼinna saá ni̱xi̱yoña: “Xítoi̱ ña̱ kándíxanívandó ndióxi̱”. Xi̱kunda̱a̱-inira ña̱ na̱ kándíxa ña̱ vatá, va̱ʼava-inina ta kúni̱na sakúaʼana xa̱ʼa̱ ña̱ nda̱a̱. Saáchi ta̱ Pablo nda̱kunira ña̱ saátu ni̱xi̱yo ña̱ xi̱keʼé miíra tá va̱ása níxi̱kunda̱a̱-inira xa̱ʼa̱ Ndióxi̱ ta va̱ása níxi̱kandíxara (1 Tim. 1:13).

¹⁰ Tasaá ni̱ka̱ʼa̱nra xa̱ʼa̱ iin ña̱ʼa ña̱ xi̱naʼa̱ ña̱ kándíxana Ndióxi̱: saáchi xi̱kuumiína iin altar ña̱ ke̱ʼéna xa̱ʼa̱ iin Ndióxi̱ ta̱ kǒo xíni̱na. Iin tutu ña̱ káʼa̱n xa̱ʼa̱ ña̱yóʼo káchiña “na̱ griego ta saátu inka na̱ ñuu xi̱keʼéna altar nu̱ú ‘ndióxi̱ ña̱ kǒo xíni̱na’ xa̱ʼa̱ ña̱ xi̱yiʼvína ña̱ nandóso-inina xa̱ʼa̱ iin ndióxi̱, ta ndióxi̱ yóʼo sana sa̱a̱ña xíʼinna”. Xa̱ʼa̱ ña̱kán altar ña̱ ke̱ʼé na̱ ñuu Atenas xi̱naʼa̱ña ña̱ xi̱kandíxana iin Ndióxi̱ ta̱ kǒo xíni̱na xa̱ʼa̱. Ta̱ Pablo xi̱niñúʼura ña̱yóʼo ña̱ va̱ʼa ka̱ʼa̱nra xa̱ʼa̱ tu̱ʼun va̱ʼa xa̱ʼa̱ Ndióxi̱ xíʼinna. Ka̱chira: “Yi̱ʼi̱ káʼi̱n xíʼinndó xa̱ʼa̱ Ndióxi̱ ta̱ ndásakáʼnundó ni kǒo xíni̱ndóra” (Hech. 17:23). Ni viíní íyo ña̱ ni̱ka̱ʼa̱nra xíʼinna soo káxiní ni̱xi̱yoña. Ta̱yóʼo kǒo níxika̱ʼa̱nra xa̱ʼa̱ ndióxi̱ na̱ xa̱á xíʼinna á iin ndióxi̱ na̱ inka ñuu, nda̱a̱ táki̱ʼva xi̱kaʼa̱n savana. Nu̱úka ña̱yóʼo, ña̱ xi̱kuni̱ra ka̱ʼa̱nra xíʼinna kúú, xa̱ʼa̱ iin Ndióxi̱ ta̱ kǒo xíni̱na: Ndióxi̱ ta̱ nda̱a̱.

¹¹ ¿Ndáa ki̱ʼva kivi kundiku̱nyó yichi̱ ta̱ Pablo tá nátúʼunyó xíʼin na̱ yiví? Kivi kotoyó ña̱ kéʼéna, saá kivi kiʼinyó kuenta á ndíku̱nna iin religión. Sava tíkaa iin ña̱ʼa su̱kúnna á tíkaa ña̱yóʼo chí yéʼéna ña̱ náʼa̱ ndáa religión ndíku̱nna, ña̱kán kivi kachiyó xíʼinna: “Xítoi̱ ña̱ kándíxavaún Ndióxi̱. Kúsi̱íní-inii̱ káʼi̱n xíʼin na̱ yiví na̱ ndíʼi̱-ini xa̱ʼa̱ chiñu Ndióxi̱”. Tá ná ka̱ʼa̱nyó xa̱ʼa̱ ña̱ va̱ʼa kéʼéna ña̱ ndíʼi̱-inina xa̱ʼa̱ chiñu Ndióxi̱, chindeétáʼanña xíʼinyó ña̱ kotoyó ndáaña inkáchi ndákanixi̱níyó xíʼinna ta natúʼunkayó xa̱ʼa̱ ña̱yóʼo xíʼinna. Ná natúʼunyó xíʼin ndiʼi na̱ yiví ni nda̱a̱ ndáaka ña̱ kándíxana. Ná ndakaʼányó chi ku̱a̱ʼání na̱ kúú hermanoyó vitin, tá ya̱chi̱ ndinuʼu-inina xi̱kandíxana ña̱ xi̱sanáʼa̱ na̱ veʼe-ñu̱ʼu vatá, saáchi xi̱ndakanixi̱nína ña̱ kúúña ña̱ nda̱a̱.

12. ¿Ndáa ña̱ʼa kúú ña̱ na̱sama ta̱ Pablo ña̱ va̱ʼa natúʼunra xíʼinna?

¹² Ta̱ Pablo ku̱ndaa̱-inira ña̱ inkáchi ndákanixi̱níra xíʼin na̱ yiví kán xa̱ʼa̱ iin ña̱ʼa. Soo, ¿ndáaña keʼéra ña̱ va̱ʼa kuni̱kana kuniso̱ʼona miíra? Ta̱yóʼo xi̱kunda̱a̱-inira ña̱ xi̱xini̱nína xa̱ʼa̱ ña̱ xi̱sanáʼa̱ na̱ ndíchi nu̱ú na̱ griego soo ni loʼo kǒo níxi̱xini̱na xa̱ʼa̱ tu̱ʼun Ndióxi̱. Xa̱ʼa̱ ña̱kán ku̱a̱ʼá ki̱ʼva na̱samara ña̱ na̱túʼunra xíʼinna. Ña̱ nu̱ú, ni̱ka̱ʼa̱nra xa̱ʼa̱ ña̱ sánáʼa̱ tu̱ʼun Ndióxi̱ soo kǒo níka̱ʼa̱nra ndáa táʼví va̱xi ña̱yóʼo. Ña̱ u̱vi̱, ni̱na̱ʼa̱ra ña̱ inkáchi íyora xíʼin na̱ xi̱natúʼunra xíʼin, ña̱kán xi̱niñúʼura tu̱ʼun ndiʼiyó ta saátu miíyó. Ña̱ u̱ni̱, ni̱ka̱ʼa̱nra tu̱ʼun ña̱ xi̱xiniñúʼu na̱ xi̱kaʼyi libro tu̱ʼun griego, ña̱ va̱ʼa na̱ʼa̱ra ña̱ saátu na̱yóʼo ni̱ka̱ʼa̱nna táʼan ña̱ xi̱kaʼa̱nra xa̱ʼa̱. Soo, ¿ndáa ña̱ʼa ña̱ ndáyáʼviní sa̱náʼa̱ ta̱ Pablo na̱ ñuu Atenas xa̱ʼa̱ Ndióxi̱ ta̱ va̱ása níxi̱xini̱na? Ná kotoyó ndáaña kivi sakúaʼakayó xíʼin ña̱ viíní nda̱kanira nu̱úna.

13. ¿Ndáaña ni̱ka̱ʼa̱n ta̱ Pablo xa̱ʼa̱ ndáa ki̱ʼva ku̱vaʼa ndiʼi ña̱ʼa, ta ndáaña kúú ña̱ káxiní ni̱ka̱ʼa̱nra xa̱ʼa̱?

¹³ Ndióxi̱ i̱xava̱ʼara ña̱ íyo chí ndiví ta saátu ña̱ íyo nu̱ú ñuʼú yóʼo. Ta̱ Pablo  ka̱chira: “Ndióxi̱ ta̱ ke̱ʼé ñuyǐví xíʼin ndiʼika ña̱ʼa ña̱ íyo nu̱úña, ta̱yóʼo va̱ása íyora templo ña̱ íxava̱ʼa na̱ yiví” (Hech. 17:24). d Nda̱a̱ ni iin ña̱ʼa va̱ása níkuva̱ʼa miíña, saáchi Ndióxi̱ ta̱ nda̱a̱ kúú ta̱ i̱xava̱ʼa ndiʼi ña̱yóʼo (Sal. 146:6). Ta̱yóʼo kúúra Ndióxi̱ ta̱ káʼnuní chí ndiví ta saátu nu̱ú ñuʼú. Va̱ása íyora nda̱a̱ táki̱ʼva íyo ñá Atenea á inkaka ndióxi̱. Saáchi na̱yóʼo xi̱niñúʼu ndasakáʼnunana nu̱ú altar, nu̱ú xi̱sokóna ña̱ʼa nu̱úna á ini templo, soo kǒo ni iin templo ña̱ i̱xava̱ʼa na̱ yiví nu̱ú kivi koo Jehová (1 Rey. 8:27). Ta̱ Pablo káxiní ni̱na̱ʼa̱ra ña̱ Ndióxi̱ ta̱ nda̱a̱ káʼnuníkara nu̱ú inkaka na̱ xi̱ndasakáʼnuna chí ini templo: chi ña̱ʼa ña̱ i̱xava̱ʼa mií na̱ yiví kúú na̱yóʼo (Is. 40:18-26).

14. ¿Ndáa ki̱ʼva ni̱na̱ʼa̱ ta̱ Pablo ña̱ va̱ása xíniñúʼuví Ndióxi̱ ña̱ chindeétáʼanna xíʼinra?

¹⁴ Ndióxi̱ kǒo xíniñúʼura ña̱ chindeétáʼan na̱ yiví xíʼinra. Na̱ yiví xi̱sandákundixina ti̱ko̱to̱ yaʼvi ña̱ʼa ña̱ xi̱ndasakáʼnuna, xi̱sokóna ña̱ʼa yaʼvi nu̱úna ta saátu xi̱taxina ña̱ʼa ña̱ xi̱xixina ndaʼa̱na ta saátu ña̱ xi̱xiʼina, soo kǒo níxixiniñúʼuvína ña̱yóʼo. Sana saátu xi̱ndakanixi̱ní sava na̱ ndíchi na̱ xi̱xiniso̱ʼo ña̱ xi̱kaʼa̱n ta̱ Pablo, ña̱ va̱ása xíniñúʼuví na̱ ndióxi̱ ña̱ taxi na̱ yiví nda̱a̱ ni iin ña̱ʼa ndaʼa̱na. Ña̱kán nda̱kanixi̱nína ña̱ va̱ása ndátuví Ndióxi̱ “ña̱ chindeétáʼan na̱ yiví xíʼinra nda̱a̱ táki̱ʼva íyo iin ta̱ xíniñúʼu ña̱ʼa”. Ña̱ nda̱a̱ kúúña ta̱ i̱xava̱ʼa miíyó kǒo xíniñúʼuvíra ña̱ taxiyó ña̱ʼa ndaʼa̱ra. Nu̱úka ña̱yóʼo “miíra kúú ta̱ táxi ña̱ táku na̱ yiví, táxira ta̱chí ndákiʼinna xíʼin ndiʼika ña̱ʼa” tá kúú táxira ná kita ñu̱ʼu, ná kuun sa̱vi̱, ta táxitura ña̱ ná kana ña̱ʼa nu̱ú ñuʼú (Hech. 17:25; Gén. 2:7). Ña̱kán, Ndióxi̱ kǒo xíniñúʼura ña̱ chindeétáʼan na̱ yiví xíʼinra, saáchi miíra kúú ta̱ táxi ndiʼi ña̱ʼa ndaʼa̱yó.

15. ¿Ndáa ki̱ʼva chi̱ndeétáʼan ta̱ Pablo xíʼin na̱ ñuu Atenas ña̱ nasamana ña̱ va̱ása va̱ʼa ndákanixi̱nína, ta ndáaña sákuaʼayó xíʼin ña̱ ke̱ʼéra?

¹⁵ Ndióxi̱ i̱xava̱ʼa na̱ yiví. Na̱ ñuu Atenas xi̱ndakanixi̱nína ña̱ ndáyáʼvikana nu̱ú na̱ va̱ása níxikuu griego. Soo ña̱ ni̱nu kuniyó xa̱ʼa̱ razayó á ñuuyó va̱ása kítáʼanña xíʼin ña̱ sánáʼa̱ Biblia (Deut. 10:17). Ndíchiní ni̱xi̱yo ta̱ Pablo tá ni̱ka̱ʼa̱nra xa̱ʼa̱ ña̱yóʼo ta viíní ni̱xi̱yo ña̱ ke̱ʼéra. Sana, na̱ xi̱niso̱ʼo ña̱ ni̱ka̱ʼa̱nra  ki̱xáʼana ndákanixi̱nína tá ni̱ka̱ʼa̱nra ña̱yóʼo xa̱ʼa̱ Ndióxi̱: “Iin ta̱a kuití kúú ta̱ i̱xava̱ʼara, ta ti̱xin ta̱yóʼo kúú ña̱ ki̱xi ndiʼi na̱ ñuu” (Hech. 17:26). Ta̱ Pablo ta̱vára ña̱ ni̱ka̱ʼa̱nra xa̱ʼa̱ nu̱ú Génesis, saáchi nu̱ú ña̱yóʼo káʼa̱nña xa̱ʼa̱ ta̱ Adán ña̱ kúúra yivá ndiʼi na̱ yiví (Gén. 1:26-28). Xa̱ʼa̱ ña̱ kúúyó se̱ʼe ta̱ Adán, kǒo iin raza á iin ñuu ña̱ ndáyáʼvika nu̱ú inkaña. Va̱ʼaníva ku̱ndaa̱-inina xa̱ʼa̱ ña̱ ni̱ka̱ʼa̱nra xíʼinna. Ña̱ ke̱ʼé ta̱ Pablo sánáʼa̱ña iin ña̱ ndáyáʼviní miíyó: ni kúni̱yó ixato̱ʼóyó na̱ yiví ta viíní ka̱ʼa̱nyó xíʼinna, kǒo xíniñúʼu nasamayó ña̱ nda̱a̱, ña̱ va̱ʼa ná xa̱a̱na kandíxanaña.

16. ¿Ndáa xa̱ʼa̱ kúú ña̱ ke̱ʼé Ndióxi̱ na̱ yiví?

¹⁶ Ndióxi̱ kúni̱ra ná kuyatin na̱ yiví nu̱úra. Sana, na̱ yiví ndíchi na̱ ñuu kán xa̱a̱ ku̱a̱ʼání ku̱i̱ya̱ nátúʼunna ndáa xa̱ʼa̱ kúú ña̱ tákuyó. Tá saá xi̱keʼéna, va̱ása kuchiñuvína kunda̱a̱-inina xíʼin ña̱yóʼo. Soo ta̱ Pablo káxiníva ni̱ka̱ʼa̱nra xa̱ʼa̱ ña̱yóʼo xíʼinna: ta̱ i̱xava̱ʼa ndiʼi ña̱ʼa ke̱ʼéra na̱ yiví “ña̱ va̱ʼa nandukúna Ndióxi̱ tá ná chikaa̱na ndee̱ ña̱ nandukúnara ndani̱ʼívanara, chi mií ña̱ nda̱a̱ va̱ása xíká íyora nu̱ú iin iinyó” (Hech. 17:27). Ña̱kán kiviva xa̱a̱yó kuxini̱yó Ndióxi̱ ta̱ va̱ása níxi̱xini̱ na̱ ñuu Atenas. Ta̱kán yatinva íyora xíʼin na̱ chíkaa̱ ndee̱ ña̱ va̱ʼa ndani̱ʼínara ta sakúaʼana xa̱ʼa̱ra (Sal. 145:18). Ña̱kán, tá ni̱ka̱ʼa̱n ta̱ Pablo “iin iinyó”, nda̱a̱ miíra xi̱kaʼa̱nra xa̱ʼa̱ ña̱ xi̱niñúʼu chikaa̱níra ndee̱ ña̱ va̱ʼa nandukúra Ndióxi̱.

17, 18. ¿Nda̱chun xíniñúʼu kuni̱ miíyó na̱ yiví kunda̱a̱-iniyó xa̱ʼa̱ Ndióxi̱? ¿Ndáaña sákuaʼayó xíʼin ña̱ ke̱ʼé ta̱ Pablo ña̱ va̱ʼa kuniso̱ʼokana miíra?

¹⁷ Na̱ yiví xíniñúʼu kuni̱na kuxini̱na Ndióxi̱. Ta̱ Pablo ka̱chikara: “Xa̱ʼa̱ ta̱kán kúú ña̱ tákuyó, kánda̱yó ta íyoyó”. Sava na̱ xíni̱ va̱ʼa káchina xa̱ʼa̱ ta̱ Pablo ña̱  ni̱ka̱ʼa̱nra tu̱ʼun ña̱ ni̱ka̱ʼa̱n ta̱ Epiménides, iin ta̱ poeta ta̱ ñuu Creta ta̱ ni̱xi̱yo tá siglo i̱ñu̱ tiempo xi̱naʼá, ta̱yóʼo xi̱kuura iin ta̱ ndáyáʼviní nu̱ú na̱ ñuu Atenas. Tándi̱ʼi, ta̱ Pablo ni̱ka̱ʼa̱nra ndáa xa̱ʼa̱ kúú ña̱ xíniñúʼu kuxini̱ na̱ yiví Ndióxi̱, ka̱chira: “Nda̱a̱ táki̱ʼva ni̱ka̱ʼa̱n sava na̱ káʼyí tutu nu̱úndó: ‘Saáchi se̱ʼe ta̱kán kúútu miívayó’” (Hech. 17:28). Ña̱kán, ndiʼiyó kiviva ndakanixi̱níyó ña̱ kúúyó na̱ veʼe Jehová, saáchi ta̱yóʼo kúú ta̱ i̱xava̱ʼa ta̱a ta̱ kúú yivá ndiʼi na̱ yiví. Nda̱a̱ táki̱ʼva xi̱niyó, ña̱ va̱ʼa kuniso̱ʼokana ta̱ Pablo, xi̱niñúʼura sava tu̱ʼun ña̱ ni̱ka̱ʼa̱n na̱ ta̱a griego na̱ xi̱ ixato̱ʼóní na̱ ñuu kán. e Nda̱a̱ táki̱ʼva ke̱ʼé ta̱ Pablo saátu miíyó kivi kuniñúʼuyó sava libro ña̱ káʼa̱n xa̱ʼa̱ historia, enciclopedia á inkaka tutu ña̱ íxato̱ʼó na̱ yiví. Tá kúú, tá vií va̱ʼa ná ndaka̱xinyó iin ña̱yóʼo, na̱ yiví na̱ nátúʼunyó xíʼin kivi kiʼinna kuenta ndáa míí ka̱na sava ña̱ kéʼéna á ña̱ kéʼé veʼe-ñu̱ʼu ña̱ ndíku̱nna.

¹⁸ Nda̱a̱ táki̱ʼva íyo ña̱ sa̱kúaʼayó, ta̱ Pablo ni̱ka̱ʼa̱nra xa̱ʼa̱ ña̱ʼa ña̱ ndáyáʼviní xa̱ʼa̱ Ndióxi̱, ta saátu viíní ni̱xi̱yo ña̱ ke̱ʼéra saáchi ni̱ka̱ʼa̱nra xa̱ʼa̱ ña̱ xa̱a̱ xi̱xini̱ na̱ yiví kán. Soo, ¿ndáaña xi̱kuni̱ra ná keʼéna xíʼin ndiʼi ña̱ xi̱niso̱ʼona? Ña̱yóʼo kúú ña̱ nda̱kanira nu̱úna tá xa̱a̱ ndi̱ʼi.

19, 20. a) ¿Ndáaña ni̱ka̱ʼa̱n ta̱ Pablo ña̱ va̱ʼa na̱ʼa̱ra ña̱ kǒo xíniñúʼu kuniñúʼuvína inka ña̱ʼa ña̱ ndasakáʼnuna Ndióxi̱? b) ¿Ndáaña xi̱niñúʼu keʼé na̱ ñuu Atenas?

¹⁹ Vitin xi̱niñúʼu chika̱a̱ ta̱ Pablo ndee̱ xíʼin na̱ xi̱niso̱ʼo miíra ndáaña xi̱niñúʼu keʼéna. Xa̱ʼa̱ ña̱ xa̱a̱ ni̱ka̱ʼa̱nra xa̱ʼa̱ na̱ ta̱a griego na̱ ka̱ʼyi tutu, ka̱chikara: “Xa̱ʼa̱ ña̱ kúúyó se̱ʼe Ndióxi̱, va̱ása xíniñúʼu ndakanixi̱níyó ña̱ íyo Ndióxi̱ nda̱a̱ táki̱ʼva íyo ña̱ oro, ña̱ plata á yu̱u̱, á nda̱a̱ ndáaka ña̱ʼa ña̱ íxava̱ʼa mií na̱ yiví” (Hech. 17:29). Ña̱ ndixa kúúvaña, tá Ndióxi̱ i̱xava̱ʼa na̱ yiví, ¿á iin ña̱ʼa ña̱ i̱xava̱ʼa na̱ yiví kivi ndakiʼinña nu̱ú Ndióxi̱? Xa̱ʼa̱ ña̱ viíní ni̱ka̱ʼa̱n ta̱ Pablo xíʼinna, ni̱na̱ʼa̱ra nu̱úna ña̱ va̱ása va̱ʼa ndasakáʼnuna ña̱ʼa ña̱ i̱xava̱ʼa na̱ yiví (Sal. 115:4-8; Is. 44:9-20). Va̱ása ixayo̱ʼvi̱víña xíʼinna kandíxana consejo ña̱ ta̱xira, saáchi nda̱a̱ miíra ni̱ka̱ʼa̱nra xa̱ʼa̱ tá ka̱chira“va̱ása xíniñúʼu ndakanixi̱níyó”.

²⁰ Tasaá ka̱chikara: “Ndióxi̱ i̱xakáʼnu-inira xa̱ʼa̱na tiempo saá xa̱ʼa̱ ña̱ kǒo níxi̱xini̱nara, soo vitin iníí káʼa̱nra xíʼin ndiʼina ña̱ ná ndikó-inina” (Hech. 17:30). Ña̱kán, xa̱a̱ ni̱ya̱ʼava tiempo ña̱ kivi ndakanixi̱nína ña̱ kuniñúʼuna iin ña̱ʼa ña̱ ndasakáʼnuna Ndióxi̱. Ña̱kán ta̱ Pablo káxiní ni̱ka̱ʼa̱nra xíʼinna ña̱ xi̱niñúʼu ndikó-inina. Sana nda̱kanda̱-ini savana xa̱ʼa̱ ña̱yóʼo soo ta̱ Pablo ni̱na̱ʼa̱ káxira ña̱ Ndióxi̱ kúú ta̱ ta̱xi ña̱ tákuna, ta xa̱ʼa̱ ña̱kán xi̱niñúʼu ndataxina kuenta ndaʼa̱ra xa̱ʼa̱ ña̱ kéʼéna xíʼin ña̱yóʼo. Xi̱niñúʼu nandukúnara, sakúaʼana xa̱ʼa̱ ña̱ nda̱a̱, sakúaʼana xa̱ʼa̱ra ta saátu kutakuna nda̱a̱ táki̱ʼva kúni̱ miíra. Na̱ ñuu Atenas xi̱niñúʼu ndakunina ña̱ iin ku̱a̱chi ndeé kúú ña̱ xi̱ndasakáʼnuna ña̱ʼa ña̱ i̱xava̱ʼana, ta xi̱niñúʼu sandákoona keʼéna ña̱yóʼo.

21, 22. ¿Ndáa tu̱ʼun xi̱niñúʼu ta̱ Pablo tá sa̱ndíʼira ni̱ka̱ʼa̱nra, ta ndáaña kúni̱ kachi tu̱ʼun kán?

 ²¹ Káxiní íyo ña̱ ni̱ka̱ʼa̱n ta̱ Pablo tá sa̱ndíʼira ni̱ka̱ʼa̱nra xíʼinna, ta̱yóʼo ka̱chira: “Saáchi [Ndióxi̱] nda̱kaxinra iin ki̱vi̱ ña̱ kuniñúʼura ta̱ nda̱kaxinra ña̱ nda̱kúní ndatiinra ku̱a̱chi xíʼin na̱ yiví na̱ ndóo nu̱ú ñuʼú yóʼo. Ta sa̱ndátakura ta̱yóʼo tasaá kúú ña̱ ni̱na̱ʼa̱ra nu̱ú ndiʼi na̱ yiví ña̱ ndixa kúú ña̱ kixaa̱ ki̱vi̱ yóʼo” (Hech. 17:31). Xa̱ʼa̱ ña̱ xi̱kunda̱a̱-inina ña̱ kixaa̱ iin ki̱vi̱ ña̱ ndatiin Ndióxi̱ ku̱a̱chi xíʼinna, ña̱yóʼo chi̱ndeétáʼanña xíʼinna ña̱ nandukúnara ta ndani̱ʼínara. Ta̱ Pablo va̱ása níka̱ʼa̱nra nda̱saa naní ta̱ ndatiin ku̱a̱chi xíʼinna. Soo ni̱ka̱ʼa̱nra iin ña̱ ndáyáʼviní xa̱ʼa̱ ta̱yóʼo: ña̱ xi̱kuura iin ta̱a, ni̱xi̱ʼi̱ra, ta sa̱ndátaku Ndióxi̱ ta̱yóʼo.

²² Ndiʼi miíyó káxiní kúnda̱a̱-iniyó ndáaña kúni̱ kachi tu̱ʼun ña̱ xi̱niñúʼu ta̱ Pablo tá sa̱ndíʼira ni̱ka̱ʼa̱nra. Kúnda̱a̱-iniyó Ndióxi̱ nda̱kaxinra ta̱ Jesucristo ña̱ ndatiinra ku̱a̱chi xíʼin na̱ yiví (Juan 5:22). Saátu kúnda̱a̱-iniyó ña̱ ki̱vi̱ ña̱ ndatiinra ku̱a̱chi xíʼinna kooña 1,000 ku̱i̱ya̱, ta si̱lóʼoní kúma̱ní kixáʼa ña̱yóʼo (Apoc. 20:4, 6). Ta saátu kúnda̱a̱-iniyó ña̱ tá ná ka̱ʼa̱n ta̱ ndatiin ku̱a̱chi xíʼinyó ña̱ nda̱kú ni̱xi̱yo iniyó saá kúú ña̱ ndakiʼinyó ku̱a̱ʼání bendición, xa̱ʼa̱ ña̱kán va̱ása yíʼviyó ña̱ kixaa̱ ki̱vi̱ kán. Ta, ¿ndáaña náʼa̱ nu̱úyó ña̱ ndixa kixaa̱ ki̱vi̱ yóʼo? Iin milagro ña̱ káʼnuní: ña̱ nda̱taku ta̱ Jesucristo.

23. ¿Ndáaña ke̱ʼé na̱ yiví tá xa̱a̱ ndi̱ʼi xi̱niso̱ʼona ña̱ ni̱ka̱ʼa̱n ta̱ Pablo?

²³ Tá sa̱ndíʼi ta̱ Pablo ni̱ka̱ʼa̱nra, xa̱a̱ síín síín íyo ña̱ ke̱ʼéna. Tá ni̱ka̱ʼa̱nra xa̱ʼa̱ ña̱ ndataku na̱ ni̱xi̱ʼi̱, “savana ki̱xáʼana kúsi̱kindaanara”. Inkana to̱ʼó ni̱xi̱yona, soo kǒo níxiinna kindo̱ona keʼéna nda̱a̱ ni iin ña̱ʼa, ta ka̱china: “Inka yichi̱ saá kuniso̱ʼondi̱ ña̱ káʼún” (Hech. 17:32). Soo ni̱xi̱yo sava na̱ va̱ʼaní xi̱niso̱ʼo. Saáchi ña̱ káʼa̱n xa̱ʼa̱ ña̱yóʼo káchiña: “Sava na̱ ta̱a nda̱kutáʼanna xíʼinra ta ndu̱una discípulo ta̱ táta Jesús. Ta xíʼin na̱kán xi̱ndikaa̱ ta̱ Dionisio, ta̱ xi̱kuu juez ña̱ Areópago ta saátu iin ñaʼá ñá xi̱naní Dámaris xíʼin inkakana” (Hech. 17:34). Saátu íyo ña̱ ndóʼoyó tiempo vitin tá nátúʼunyó xíʼin na̱ yiví: savana kúsi̱kindaana miíyó, savana to̱ʼóva íyona soo kǒo kúni̱na sakúaʼana, soo íyo sava na̱ kándíxa ña̱ káʼa̱nyó xa̱ʼa̱ Reino Ndióxi̱ ta ndúuna Testigo, ta ña̱yóʼo sákusi̱íníña-iniyó.

24. ¿Ndáaña sákuaʼayó xíʼin ña̱ ni̱ka̱ʼa̱n ta̱ Pablo?

²⁴ Tá ná kiʼinyó kuenta xíʼin ña̱ ni̱ka̱ʼa̱n ta̱ Pablo, ña̱yóʼo kivi sanáʼa̱ña miíyó ña̱ xíniñúʼu viíní koo ña̱ ka̱ʼa̱nyó xíʼin na̱ yiví ta káxiní kooña, saátu kiʼinyó kuenta xíʼin ña̱ ndóʼo na̱ yiví. Saátu sánáʼa̱ña miíyó ña̱ xíniñúʼu kúee koo iniyó xíʼin na̱ yiví na̱ kándíxa ña̱ sánáʼa̱ veʼe-ñu̱ʼu vatá ta to̱ʼó ka̱ʼa̱nyó xíʼinna. Ta inka ña̱ ndáyáʼvi sákuaʼayó xíʼin ña̱yóʼo kúú ña̱ kǒo nasamayó ña̱ nda̱a̱ xa̱ʼa̱ ña̱ kǒo kúni̱yó ná sa̱a̱ na̱ yiví. Tá ná keʼéyó ña̱ sa̱kúaʼayó yóʼo, saá koo tu̱ʼvakayó ña̱ chindeétáʼanyó xíʼin inkana ta viíka sanáʼa̱yóna. Miíyó na̱ kúú publicador viíka natúʼunyó xíʼin na̱ yiví ta na̱ níʼi yichi̱ ti̱xin congregación viíka sanáʼa̱na. Tasaá kooyó nda̱a̱ táki̱ʼva ni̱xi̱yo ta̱ Pablo, saáchi ta̱yóʼo chi̱ndeétáʼanra xíʼin inkana ña̱ nandukúna Ndióxi̱ ta nda̱ni̱ʼívanara (Hech. 17:27).