Ndakanixi̱ní xa̱ʼa̱ ña̱yóʼo: Ñá Karen xa̱a̱ u̱xu̱ minuto ndíka̱a̱ñá iin vikó, ta iin kama, xíniso̱ʼoñá ña̱ káʼa̱n iinna xíʼinñá:

Tá nda̱kotoñá chí sa̱táñá, xi̱niñá migañá ñá Jessica, ta níʼiñá u̱vi̱ ndixi va̱xi xíʼinñá. Táxiñá iinra ndaʼa̱ ñá Karen ta káchiñá: “Su̱víka ñá loʼo kúún. Kiviva koʼún iinrá, ¿á su̱ví saá?”.

Ñá Karen kǒo kúni̱ñá koʼoñá ndixi chi ñá loʼova kúúñá, soo ni kǒo kúni̱tuñá ña̱ ndakanixi̱ní migañá ña̱ kǒo kúni̱ñá keʼéñá ni iin ña̱ʼa. Ta ñá Jessica iin ñaʼá va̱ʼava kúúñá. Tá ñáyóʼo xíʼiñá, sana su̱ví ña̱ ndeéví kúúña. Ta ndákanixi̱níñá: “Iinláva ndixi kúúrá, su̱ví táki̱ʼva íyo droga íyorá”.

Tá yóʼó níxi̱yo ñá Karen, ¿ndáaña keʼún?

Ña̱ kivi ndaka̱xiún ña̱ keʼún ña̱ va̱ʼa tá ndóʼún ña̱yóʼo, xíniñúʼu kunda̱a̱-iniún ndáa na̱ yiví kúún. Ña̱yóʼo chindeétáʼanña xíʼún ña̱ kunda̱a̱-iniún ndáa ña̱ va̱ʼa kúúmiíún. Ta saátu kundaaña yóʼó ta taxiña ndee̱ ndaʼún ña̱ kǒo keʼún ña̱ kúni̱ inka na̱ yiví (1 Corintios 9:26, 27).

¿Ndáa ki̱ʼva kivi keʼún ña̱yóʼo? Ña̱ siʼnaka kivi keʼún kúú ña̱ ndakanixi̱níún xa̱ʼa̱ pregunta ña̱ va̱xi yóʼo.

Tá xíni̱ún ndáa ña̱ʼa va̱ʼa kéʼún ta ndáa ña̱ʼa va̱ʼa kúúmiíún, ña̱yóʼo chindeétáʼan xíʼún ña̱ kǒo kaka-iniún.

EJEMPLO ÑA̱ VA̱XI NU̱Ú BIBLIA. Ta̱ apóstol Pablo ka̱ʼyíra: “Ni kǒo kúchiñuvai̱ ka̱ʼi̱n soo xíni̱vai̱ xa̱ʼa̱ ku̱a̱ʼá ña̱ʼa” (2 Corintios 11:6). Xa̱ʼa̱ ña̱ xi̱xini̱ra ña̱ va̱xi nu̱ú Biblia, ndakú ni̱xi̱yo inira tá xi̱ka̱ʼa̱n kúáchina xa̱ʼa̱ra. Xa̱ʼa̱ ña̱yóʼo, kǒo níndakava-inira tá xi̱ka̱ʼa̱n kúáchina xa̱ʼa̱ra (2 Corintios 10:10; 11:5).

NDAKANIXI̱NÍ NDÁA KI̱ʼVA ÍYOÚN. Kaʼyí iin ña̱ʼa ña̱ xíni̱ún keʼún.

Vitin kaʼyí iin ña̱ʼa ña̱ va̱ʼaní kúúmiíún (tá kúú ña̱ va̱ʼaní-iniún, ña̱ va̱ása xíʼndaún, mií hora ni̱ka̱ʼún xáún, á ña̱ kivi kandíxana ña̱ káʼún).

Nda̱a̱ táki̱ʼva kama táʼnda̱ iin cadena xa̱ʼa̱ ña̱ vitá iin táʼví ña̱ kúúmiíña, saátu yóʼó sana iin kama nandósó-iniún ndáa na̱ yiví kúún tá ná ndakava-iniún xa̱ʼa̱ ña̱ kǒo kívi keʼún.

EJEMPLO ÑA̱ VA̱XI NU̱Ú BÍBLIA. Ta̱ Pablo xi̱kunda̱a̱-inira ndáaña íxavitá-inira. Ña̱kán ka̱ʼyíra: “Mií ña̱ ndixa kúúña xíʼin ndinuʼu-inii̱ kúsi̱í-inii̱ xíʼin ley Ndióxi̱, soo íyo inka ley ña̱ kánitáʼan xíʼin ña̱ ndakanixi̱níi̱, ña̱yóʼo kúú ley ña̱ sándakava yi̱ʼi̱ nu̱ú ku̱a̱chi” (Romanos 7:22, 23).

NDAKANIXI̱NÍ NDÁA KI̱ʼVA ÍYOÚN. ¿Ndáa ña̱ʼa kivi viíka keʼún?

¿Á ndaún iin carro ta ka̱ʼún xíʼin ta̱ káva carro yóʼo ná kavaranú nda̱a̱ ná ndiʼi gasolinanú? ¿Á su̱ví ña̱ ndixa kúú ña̱ kǒo keʼún ña̱yóʼo? Saáchi tá ná keʼún ña̱yóʼo yaʼviní kanaña nu̱ún.

¿Ndáaña sákuaʼún xíʼin ña̱yóʼo? Tá xa̱a̱ xíni̱ún ndáa ña̱ʼa kúni̱ún, kǒo sandíʼún tiempoún xíʼin ña̱ʼa ña̱ kǒo ndáyáʼvi. Chi xa̱a̱ xíni̱ún ndáa mií ku̱ʼún ta nda̱saa kivi xa̱ún.

EJEMPLO ÑA̱ VA̱XI NU̱Ú BÍBLIA. Ta̱ Pablo ka̱ʼyíra: “Yi̱ʼi̱ va̱ása xínu sána miíi̱” (1 Corintios 9:26). Ta̱ Pablo, nu̱úka ña̱ kundatura nda̱a̱ ná kixaa̱ mií iin ña̱ʼa nu̱úra, xi̱kunda̱a̱ káxi inira ndáaña xi̱kuni̱ra ta chi̱ka̱a̱ra ndee̱ ña̱ va̱ʼa kuchiñura keʼéraña (Filipenses 3:12-14).

NDAKANIXI̱NÍ NDÁA KI̱ʼVA ÍYOÚN. Kaʼyí u̱ni̱ ña̱ʼa ña̱ kúni̱ún keʼún ku̱i̱ya̱ vitin.

Tá kǒo xíni̱ún ndáaña kándíxaún, nina kaka-iniún xa̱ʼa̱ ndiʼi ña̱ʼa. Ndiʼi yichi̱ nasamaún ña̱ kéʼún ña̱ inkáchi ná kooña xíʼin ña̱ kéʼé na̱ migoún, ta nda̱a̱ táki̱ʼva íyo iin tí camaleón tí násama color saá koún. Na̱ kéʼé táki̱ʼva kéʼé tíyóʼo, kǒo xíni̱na ndáa na̱ yiví kúúna.

Soo tá xa̱a̱ káxi va̱ʼa kúnda̱a̱-iniún xa̱ʼa̱ ña̱ kándíxaún ni nda̱a̱ ndáaka ña̱ʼa kéʼé inkana, kǒo nandósó-iniún xa̱ʼa̱ ndáa na̱ yiví kúún.

EJEMPLO ÑA̱ VA̱XI NU̱Ú BIBLIA. Ta̱ Daniel, sana iin ta̱ loʼova xi̱kuura tá nda̱kiʼinnara ku̱a̱ʼa̱n xíʼinna inka ñuu. Soo ni saá “chi̱ka̱a̱-inira” kandíxara ndiʼi ña̱ káʼa̱n ley Ndióxi̱ (Daniel 1:8). Ke̱ʼéra ña̱ kándíxara ta kǒo nínandósó-inira ndáa na̱ yiví kúúra.

NDAKANIXI̱NÍ NDÁA KI̱ʼVA ÍYOÚN. ¿Ndáaña kándíxaún? ¿Á kándíxaún ña̱ íyo iin Ndióxi̱? ¿Nda̱chun kándíxaún ña̱ íyora?

¿Á chíndeétáʼan ña̱ va̱xi nu̱ú tu̱ʼun Ndióxi̱ xíʼún túviún? ¿Nda̱chun kándíxaún ña̱yóʼo?

¿Á kúni̱ún koún táki̱ʼva íyo iin yu̱ku̱ loʼo ña̱ ndáchí íxaa ta̱chí á iin yitu̱n tú kǒo ni iin ña̱ʼa ndóʼo ni ndeéní ná kani ta̱chí? Tá kúni̱ún koún táki̱ʼva íyo iin yitu̱n, kǒo nandósó-iniún ndáa na̱ yiví kúún. Ña̱yóʼo chindeétáʼan xíʼún ña̱ ndakuiún pregunta yóʼo: ¿Ndáa na̱ yiví kúi̱?