Ta̱ loʼo ta̱ kúni̱ keʼé ña̱ kini xíʼin ñá Annette sa̱kánarañá nu̱ú ñuʼú ta ni loʼo kǒo níkunda̱a̱-iniñá ndáaña kúu. Ñá Annette káchiñá: “Xi̱kuni̱i̱ sa̱ñái̱ ta xi̱kuni̱i̱ nda̱ʼyi̱ kóʼi̱, soo ni loʼo kǒo níkivi ka̱ʼi̱n. Chi̱ndaʼíi̱ra, ka̱nii̱ra, ku̱a̱ʼáníkaña ke̱ʼíi̱... soo sa̱túkue̱ʼe̱ra yi̱ʼi̱ xíʼin iin cuchillo ta va̱ása níkivika keʼíi̱ ni iin ña̱ʼa. Ta nani saá, iin sa̱na-inii̱ ta kǒo níkivika ndakiʼii̱n tu̱ʼi̱n”.

¿Ndáaña keʼún tá miíún ná ndoʼo ña̱yóʼo?

Ni ná kiʼinníún kuenta ña̱ kakaún, tá kúú tá xíkaún tá ñuú, sana ndoʼovaún iin tu̱ndóʼo. Ña̱ Biblia káchiña “Su̱ví ndiʼi tiempoví kúchiñu na̱ kama xínu, [...] ni na̱ ndíchi su̱ví ndiʼi tiempo koo ña̱ʼana, [...] Chi ndiʼivayó ndákava tu̱ndóʼo nu̱ú” (Eclesiastés 9:11).

Ñá Annette va̱ása níxi̱xini̱víña ta̱ ke̱ʼé ña̱ kini xíʼinñá. Soo ku̱a̱ʼání na̱ ndóʼo ña̱yóʼo na̱ yiví na̱ xínitáʼanna xíʼin kúú na̱ kéʼé saá xíʼinna á sava yichi̱ na̱ veʼena kúúna. Ñá Noelia sa̱kán u̱xu̱ kuití ku̱i̱ya̱ñá ta iin ta̱ loʼo ta̱ íyo yatin nu̱ú íyoña ke̱ʼéra ña̱ kini xíʼinña. Ñá Noelia káchiñá: “Ni̱yi̱ʼvíníi̱ ta kininí xi̱kunii̱ ta nda̱a̱ ni iinna va̱ása níka̱ʼi̱n xíʼin xa̱ʼa̱ña tá sa̱kán ndo̱ʼi̱ña”.

Ñá Annette ndákanikaxi̱níñá ña̱ kúúmiíñá ku̱a̱chi xa̱ʼa̱ ña̱ ndo̱ʼoñá. Ñáyóʼo káchiñá: “Tuku ta tuku ndákaʼíi̱n xa̱ʼa̱ ña̱ ndo̱ʼi̱ ñuú saá ta ndákanixi̱níi̱ ña̱ sana kuchiñuvai̱ viíka ndakiʼii̱n tu̱ʼi̱n. Ña̱ nda̱a̱ kúúña kǒo níkunda̱a̱ka-inii̱ ndáaña ku̱u tá ndi̱ʼi ka̱nira yi̱ʼi̱ xíʼin cuchillo, soo ndákani̱xíníi̱ ña̱ sana ni̱xi̱yova iin ña̱ʼa ña̱ kivi keʼíi̱”.

Saátu ndóʼo ñá Noelia. Ñáyóʼo káchiñá: “Xi̱niñúʼu kiʼinkai̱ kuenta. Na̱ yivái̱ xi̱taxina ña̱ kusíkíndi̱ chí ke̱ʼe kuití tá kítáʼan u̱vi̱ saándi̱ xíʼin ku̱ʼvi̱i̱, soo va̱ása níkandíxai̱na. Ña̱kán ndákanixi̱níi̱ ña̱ ku̱a̱chi miíi̱ kúú ña̱ ku̱chiñura ke̱ʼéra ña̱ kini xíʼi̱n. Na̱ veʼi̱ ni̱xo̱ʼvi̱nína, ta ndákanixi̱níi̱ ña̱ ku̱a̱chi yi̱ʼi̱ kúúña. Ña̱yóʼo kúú ña̱ sákusuchíka-inii̱”.

Tá miíún ndákanixi̱níún táki̱ʼva ndákanixi̱ní ñá Annette xíʼin ñá Noelia, kǒo nandósóún ña̱ iin na̱ yiví na̱ tíin kúíʼnána, va̱ása kúni̱ví na̱yóʼo ña̱ keʼéna ña̱ kini xíʼinna. Savana káʼa̱nna ña̱ tá tíin kúíʼnána iin na̱ yiví su̱ví ña̱ ndeéví kúúña ta káʼa̱nna ña̱ miína kúúmií ku̱a̱chi xa̱ʼa̱ ña̱ ndo̱ʼona. Soo nda̱a̱ ni iin na̱ yiví va̱ása xíniñúʼu kundoʼoví ña̱yóʼo, chi iin ña̱ kininí kúúña. Tá miíún xa̱a̱ saá ndo̱ʼún, va̱ása kaka-iniún ña̱ su̱ví ku̱a̱chi miíún kúú ña̱ ndo̱ʼún saá.

Kamaníva káʼa̱nyóña, soo yo̱ʼvi̱va kandíxayóña. Sana na̱ ndo̱ʼo ña̱yóʼo va̱ása nátúʼunna xa̱ʼa̱ ña̱ ke̱ʼéna xíʼinna ta iinlá miína xóʼvi̱ ta ndákanixi̱nína ña̱ ku̱a̱chi miína kúúña á inkaka ña̱ʼa. Soo tá ná kǒo natúʼún, ¿ndáana chíndeétáʼún xíʼin? ¿Xíʼin miíún á xíʼin na̱ ke̱ʼé ña̱ kini xíʼinvaún? ¿Á su̱ví ña̱ ndixa kúú ña̱ va̱ʼaníka ña̱ ka̱ʼún xíʼin iinna ña̱ chindeétáʼanna xíʼún?

Ña̱ Biblia káʼa̱nña, tá tiempo ña̱ xóʼvi̱ní ta̱ Job, ta̱yóʼo ka̱chira: “Ndiʼi ña̱ sákusuchí-inii̱ natúʼi̱n xa̱ʼa̱ña” (Job 10:1). Sana ña̱yóʼo kivitu chindeéña yóʼóva. Natúʼun xíʼin iin na̱ ndáa-iniún saáchi ña̱yóʼo kivi chindeétáʼanña xíʼún xa̱ʼa̱ ña̱ ndo̱ʼún ta va̱ʼaka kuniún saá.

Saá kúú ña̱ ke̱ʼé ñá Annette ta chi̱ndeétáʼanvaña xíʼinña. Ñáyóʼo káchiñá: “Na̱túʼi̱n xíʼin iin migai̱ ñá va̱ʼaní kítáʼi̱n xíʼin ta ni̱ka̱ʼa̱nñá xíʼi̱n ña̱ ná natúʼi̱n xíʼin na̱ anciano na̱ congregación nu̱ú ndíka̱i̱. Kúsi̱íní-inii̱ ña̱ saá ke̱ʼíi̱. Ku̱a̱ʼá yichi̱ na̱túʼunna xíʼi̱n ta ni̱ka̱ʼa̱nna mií ña̱ xíniñúʼi̱: ña̱ su̱ví yi̱ʼi̱ kúúmií ku̱a̱chi xa̱ʼa̱ nda̱a̱ ni iin ña̱ ndo̱ʼi̱”.

Ñá Noelia na̱túʼunñá xíʼin na̱ yiváñá xa̱ʼa̱ ña̱ ndo̱ʼoñá, ñáyóʼo káchiñá: “Chi̱ndeétáʼannína xíʼi̱n, ta ni̱ka̱ʼa̱ntuna xíʼi̱n ña̱ ná natúʼi̱n xa̱ʼa̱ña, ta ña̱kán kúú ña̱ chi̱ndeé yi̱ʼi̱ ña̱ va̱ása sa̱i̱ xíʼin miíi̱ ta va̱ása kusuchíní-inii̱”.

Inka ña̱ chi̱ndeétáʼanní xíʼinñá kúú ña̱ ka̱ʼa̱nñá xíʼin Ndióxi̱. Ñáyóʼo káchiñá: “Ña̱ ni̱ka̱ʼi̱n xíʼin Ndióxi̱ chi̱ndeéníña yi̱ʼi̱, ta chi̱ndeé va̱ʼakaña yi̱ʼi̱ tá kǒo ni iin na̱ kivi natúʼi̱n xíʼin xa̱ʼa̱ ña̱ ndo̱ʼi̱. Tá káʼi̱n xíʼin Ndióxi̱, va̱ʼa káʼi̱n xíʼinra xa̱ʼa̱ ndiʼi ña̱ ndákanixi̱níi̱, ta ña̱yóʼo sándi̱koníña-inii̱”.

Kivitu kunda̱a̱-ini yóʼó ña̱ kixaa̱ iin tiempo ña̱ ndaʼa-iniún (Eclesiastés 3:3). Kundaa miíún ta kiʼún kuenta xíʼin ña̱ ndákanixi̱níún, ta saátu ndakindee̱ va̱ʼún. Soo mií ña̱ ndáyáʼvi va̱ʼaka keʼún kúú ña̱ nandukún Jehová ña̱ chindeéra yóʼó, saáchi ta̱kán kúú ta̱ sándi̱ko-iniyó (2 Corintios 1:3, 4).

Tá novioún á noviaún káʼa̱nna xíʼún ña̱ keʼún iin ña̱ yaku̱a̱, káxi va̱ʼa ka̱ʼún ña̱yóʼo xíʼinna: “Kǒo keʼún saá” á “Sákutaʼa ndaʼún sa̱tái̱”. Kǒo chise̱ʼé yuʼún xa̱ʼa̱ ña̱ yíʼviún ña̱ sandákoona yóʼó. Tá ná sandákoona yóʼó, kúni̱ kachiña su̱ví na̱ ndixa kúni̱ xíni yóʼó kúúna. Saáchi yóʼó xíniñúʼún iin na̱ yiví na̱ íxato̱ʼó yóʼó ta saátu ña̱ kándíxaún.

“Tá xi̱kuumiíi̱ 13 á 14 ku̱i̱ya̱, na̱ va̱lí na̱ xi̱kaʼvi xíʼi̱n xi̱kaxi̱ítana brasier ña̱ ndíxii̱ ta xi̱ka̱ʼa̱nna ña̱ʼa yaku̱a̱ xíʼi̱n, tá kúú ña̱yóʼo: ‘Va̱ʼakaví kuniún tá ná ku̱su̱ún xíʼi̱nʼ” (Coretta).

¿Ndáaña kúú ña̱ xi̱keʼé na̱ va̱lí yóʼo túviún?

1. ¿Á na̱ sísikí kúúna?

2. ¿Á na̱ káʼa̱n livi kúúna xíʼinñá?

3. ¿Á iin ña̱ kiniva kúú ña̱ kúni̱na keʼéna xíʼinñá?

“Tá ku̱a̱ʼa̱nndi̱-ini autobús, iin ta̱ loʼo ki̱xáʼara káʼa̱nra ña̱ kini xíʼi̱n ta ki̱xáʼara tíinra yi̱ʼi̱. Ka̱nii̱ra ta ni̱ka̱ʼi̱n xíʼinra ná ku̱taʼara. Ta nda̱kotora nu̱úi̱ nda̱a̱ táki̱ʼva xítora iin ñá sána” (Candice).

¿Ndáaña kúú ña̱ ke̱ʼé ta̱ loʼo yóʼo túviún?

1. ¿Á ta̱ sísikí kúúra?

2. ¿Á ta̱ káʼa̱n livi kúúra xíʼinñá?

3. ¿Á iin ña̱ kiniva kúú ña̱ kúni̱ra keʼéra xíʼinñá?

“Iin ta̱ loʼo iníísaá ku̱i̱ya̱ ni̱ka̱ʼa̱nra xíʼi̱n ña̱ kútóora yi̱ʼi̱ ta kúni̱ra kakara xíʼi̱n. Nina xi̱ka̱ʼi̱n xíʼinra ña̱ va̱ása kúni̱i̱. Sava yichi̱ xi̱tiinra ndaʼíi̱. Ni xi̱ka̱ʼi̱n xíʼinra ña̱ va̱ása keʼékara saá, xi̱keʼévaraña. Iin ki̱vi̱, tá ndákatúi̱n sa̱tá zapatoi̱, ni̱xa̱a̱ra ta ka̱nira iin xa̱ʼndá te̱ʼé kaʼíi̱” (Bethany).

¿Ndáaña kúú ña̱ ke̱ʼé ta̱ loʼo yóʼo túviún?

1. ¿Á ta̱ sísikí kúúra?

2. ¿Á ta̱ káʼa̱n livi kúúra xíʼinñá?

3. ¿Á iin ña̱ kiniva kúú ña̱ kúni̱ra keʼéra xíʼinñá?

U̱ni̱ saá ña̱ ni̱ka̱ʼa̱nyó xa̱ʼa̱ yóʼo ña̱ va̱xi ti̱xin opción C kúúña.

¿Nda̱chun su̱ví iin kúú ña̱ kusíkína xíʼin iin na̱ yiví á ña̱ ka̱ʼa̱n livina xíʼinna nu̱úka ña̱ keʼénana xa̱ʼa̱ ña̱ kúni̱na keʼéna ña̱ kini xíʼinna?

Va̱ása va̱ʼa kúni na̱ yiví na̱ tuku ta tuku káʼa̱nna xíʼin ña̱ keʼéna ña̱ kini, ni xa̱a̱ ni̱ka̱ʼa̱nna xíʼinna ña̱ kǒo kúni̱na keʼénaña.

Iin ña̱ ndeéní xa̱ʼa̱ kúúña, saáchi na̱ yiví na̱ káʼa̱nña nda̱a̱ kivi xa̱a̱na tiin kúiʼnána inkana ta keʼéna ña̱ kini xíʼinna.