Ndakanixi̱ní xa̱ʼa̱ ña̱yóʼo: Ta̱ Tim sísikíra xíʼin na̱ migora, ta iin sana ta̱ʼvíra parabrisa nu̱ú carro na̱ vecinora xíʼin pelota.

Tá yóʼó níxi̱yo ta̱ Tim, ¿ndáaña keʼún?

ÍYO U̱NI̱ ÑA̱ KIVI KEʼÚN:

1. Kunuún ku̱ʼún.

2. Chika̱ún ku̱a̱chi inkana.

3. Natúʼún xíʼin vecinoún ndáaña ku̱u ta ka̱ʼún xíʼinra ña̱ ndacháʼviún ña̱yóʼo.

Sana kutóokaún ndaka̱xiún ña̱ opción A. Soo ña̱ va̱ʼaka kúú ña̱ ndakuniún ña̱ va̱ása va̱ʼa níkeʼún ni nda̱a̱ ndáaka ña̱ kúúña.

1. Ña̱ va̱ʼa kúúña.

   Ña̱ Biblia káchiña: “Chi kúni̱yó nda̱kú ná koo ndiʼi ña̱ keʼéyó” (Hebreos 13:18).

2. Tá ndákuniún ku̱a̱chiún, inka na̱ yiví kivi ixakáʼnu-inina xa̱ʼún.

   Ña̱ Biblia káchiña: “Na̱ sási yuʼú xa̱ʼa̱ ku̱a̱china kǒo ña̱ va̱ʼa ndakiʼinna, soo na̱ náʼma̱ ku̱a̱china ta va̱ása kéʼékanaña koo káʼnuva-ini Ndióxi̱ xa̱ʼa̱na” (Proverbios 28:13).

3. Ta ña̱ ndáyáʼvika kúú ña̱yóʼo: sakusi̱íyó-ini Jehová.

   Ña̱ Biblia káchiña: “Chi na̱ kǒo kéʼé ña̱ nda̱kú kúndasí Jehová xínirana, soo va̱ʼaní kítáʼanra xíʼin na̱ kéʼé ña̱ nda̱kú” (Proverbios 3:32).

Ñá Karina, 20 ku̱i̱ya̱ñá, ta xi̱kuni̱ñá chise̱ʼéñá iin multa nu̱ú yiváñá ña̱ ta̱xina ndaʼa̱ñá xa̱ʼa̱ ña̱ ndeéní ku̱a̱ʼa̱nñá xíʼin carro, soo na̱kunda̱a̱va-inira xa̱ʼa̱ña. Káchi ñáyóʼo: “Tá ni̱ya̱ʼa iin ku̱i̱ya̱, yivái̱ xi̱nira multa ña̱ ta̱xina ndaʼíi̱ xa̱ʼa̱ ña̱ ndeéní xíkai̱ xíʼin carro. Iin tu̱ndóʼo ña̱ ndeéní xi̱kuuña”.

¿Ndáaña sákuaʼayó xíʼin ña̱yóʼo? Ñá Karina káchiñá: “Tá chíse̱ʼéyó ña̱ va̱ása va̱ʼa kéʼéyó, ku̱a̱ʼáka tu̱ndóʼo kixi nu̱úyó. Chi kixaa̱va iin ki̱vi̱ ndoʼoyó xa̱ʼa̱ ña̱ ke̱ʼéyó”.

Ña̱ Biblia káchiña: “Ndiʼiyó ku̱a̱ʼá yichi̱ kéʼéyó ña̱ va̱ása va̱ʼa” (Santiago 3:2). Ta táki̱ʼva xi̱niyó, tá ndákuniyó ña̱ va̱ása va̱ʼa kéʼéyó náʼa̱yó ña̱ vitá íyo iniyó.

Vitin sakuaʼa xíʼin ña̱ va̱ása va̱ʼa ke̱ʼún. Iin ñá loʼo ñá naní Vera káchiñá: “Xíʼin iin iin ña̱ʼa ña̱ va̱ása va̱ʼa kéʼíi̱ íyo iin ña̱ sákuaʼi̱. Iin iin ña̱yóʼo sánáʼa̱ña miíi̱ ña̱ xíniñúʼu keʼíi̱ ña̱ va̱ʼa tasaá xa̱i̱ koi̱ iin na̱ yiví va̱ʼaka. Saáchi tá ná ndoʼo tukui̱ táʼan ña̱yóʼo, xa̱a̱ xínii̱ ndáaña keʼíi̱ ña̱ vií kanaña”. ¿Ndáaña keʼé miíún tá ná ndoʼún táʼan ña̱ va̱xi yóʼo?

Yiváún ta̱xira bicicletara ndaʼún soo ndi̱ʼi-xa̱ʼa̱nú i̱xaún. ¿Ndáaña keʼún vitin?

• Kǒo ka̱ʼi̱n xíʼinra xa̱ʼa̱ ña̱ ku̱u; sana kǒo kunda̱a̱ví-inira xa̱ʼa̱ña.

• Natúʼi̱n xíʼinra míí ña̱ ndixa ku̱u.

• Ka̱ʼi̱n xíʼinra ndáaña ku̱u, soo chika̱i̱ ku̱a̱chi inkana.

Kéʼún iin examen soo kǒo níya̱ʼún saáchi kǒo níkaʼviún. ¿Ndáaña keʼún?

• Ka̱ʼi̱n ña̱ yo̱ʼvi̱ní ni̱xi̱yo examen.

• Ka̱ʼi̱n ku̱a̱chi miíi̱ kúúña chi kǒo níkaʼvii̱.

• Ka̱ʼi̱n ña̱ sáa̱-ini ta̱ maestro xínira yi̱ʼi̱.

 Vitin koto tuku u̱vi̱ saá ña̱yóʼo soo vitin ndakanixi̱níún ña̱ kúún 1) yiváún ta kúútún 2) maestroún. ¿Ndáaña ndakanixi̱nína xa̱ʼún tá ná ndakuniún ña̱ va̱ása va̱ʼa kéʼún? ¿Ndáaña ndakanixi̱nína xa̱ʼún tá ná chise̱ʼúnña?

Vitin ndakanixi̱ní xa̱ʼa̱ ña̱ va̱ása va̱ʼa níkeʼún ku̱i̱ya̱ ni̱ya̱ʼa ta ndakuiin pregunta ña̱ va̱xi yóʼo:

¿Ndáaña va̱ása va̱ʼa níkeʼún? ¿Ndáa ki̱ʼva ke̱ʼún?

• Xi̱kunii̱ chiseʼíi̱ña.

• Chi̱kai̱ ku̱a̱chi inkana.

• Kama na̱túʼi̱n xa̱ʼa̱ña.

Tá kǒo níndakuniún ña̱ va̱ása va̱ʼa ke̱ʼún, ¿nda̱saa ndo̱ʼún tándi̱ʼi?

• Va̱ʼaní ku̱nii̱, ka̱naña táki̱ʼva kúni̱ miíi̱.

• Ku̱suchíní-inii̱, saáchi su̱ví ña̱ nda̱a̱ níka̱ʼi̱n.

¿Ndáa ña̱ʼa xi̱niñúʼu viíka keʼún?

¿Ndáaña sa̱kuaʼún xíʼin ña̱yóʼo?

¿Nda̱chun íxayo̱ʼvi̱ña xíʼinyó ka̱ʼa̱nyó xa̱ʼa̱ ña̱ va̱ása va̱ʼa kéʼéyó?

¿Ndáaña ndakanixi̱ní na̱ yiví xa̱ʼún tá ndiʼi tiempo ná chise̱ʼún ña̱ va̱ása va̱ʼa kéʼún? Soo, ¿ndáaña ndakanixi̱nína tá ná ndakuniún ña̱ va̱ása va̱ʼa kéʼún? (Lucas 16:10).