1, 2. ¿Ndáaña xíniñúʼu kunda̱a̱-iniyó xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa?

LIVINÍ koo ña̱ kundooyó nu̱ú ñuyǐví xa̱á ña̱ káʼa̱n Jehová taxira ndaʼa̱yó. Saá kúú ña̱ kundooyó nda̱a̱ táki̱ʼva xi̱kuni̱ra tá xa̱ʼa̱. Soo tiempo vitin, ta̱ Ndi̱va̱ʼa xíʼin na̱ ta̱chí ndi̱va̱ʼa kúú na̱ ndísochíñu ñuyǐví yóʼo (2 Corintios 4:4). Ni kǒo kívi kuniyóna, ña̱ ndixa kúú ña̱ íyovana ta ndakúnína.

² Nu̱ú capítulo yóʼo sákuaʼayó ndáa ki̱ʼva kuyatinyó nu̱ú Jehová ta kǒo ndakavayó ndaʼa̱ ta̱ Ndi̱va̱ʼa. Jehová káʼa̱nra ña̱ chindeétáʼanra xíʼinyó, soo siʼna xíniñúʼu kunda̱a̱-iniyó ndáa ña̱ʼa xíniñúʼu ta̱ Ndi̱va̱ʼa xíʼin na̱ ta̱chí ndi̱va̱ʼa ña̱ sandáʼvina miíyó.

3. ¿Ndáaña kúni̱ ta̱ Ndi̱va̱ʼa keʼéra xíʼinyó?

³ Ta̱ Ndi̱va̱ʼa káʼa̱nra xa̱ʼa̱yó ña̱ su̱ví xa̱ʼa̱ ña̱ ndixa kúʼvi̱-iniyó xíniyó Jehová kúú ña̱ ndásakáʼnuyóra, ta káʼa̱ntura tá ná kixi tu̱ndóʼo nu̱úyó sandákoovayó Jehová (kaʼvi Job 2:4, 5). Tá iinna kíxáʼana sákuaʼana xa̱ʼa̱ Jehová, ta̱ Ndi̱va̱ʼa kúnda̱a̱-inira xa̱ʼa̱ ña̱yóʼo ta ndi̱ku̱n ndúkúra sakúxíkarana nu̱ú Ndióxi̱. Sáa̱ní-inira tá iin na̱ yiví ndátaxina miína ndaʼa̱ Jehová ta  ndákuchina. Ña̱ Biblia káʼa̱nña xa̱ʼa̱ ta̱ Ndi̱va̱ʼa “nda̱a̱ táki̱ʼva íxaa iin tí león tí xíʼi̱ so̱ko chi kúni̱rí kaxírí iinna saá íxaara” (1 Pedro 5:8). Ta̱ Ndi̱va̱ʼa kúni̱ra sakúxíkara miíyó nu̱ú Jehová (Salmo 7:1, 2; 2 Timoteo 3:12).

4, 5. a) ¿Ndáaña kǒo kívi keʼé ta̱ Ndi̱va̱ʼa? b) ¿Ndáa ki̱ʼva kivi kuxíkayó nu̱ú ta̱ Ndi̱va̱ʼa?

⁴ Soo ná kǒo yi̱ʼvíyó kuniyó ta̱ Ndi̱va̱ʼa ni na̱ ta̱chí ndi̱va̱ʼa, saáchi Jehová va̱ása taxivíra ña̱ keʼéna ndiʼi ña̱ kúni̱ miína xíʼinyó. Jehová káʼa̱ntura ña̱ ku̱a̱ʼání na̱ yiví ka̱kuna tá ná koo ña̱ “tu̱ndóʼo káʼnu” (Revelación  [Apocalipsis] 7:9, 14). Ta̱ Ndi̱va̱ʼa kǒo kasivíra ña̱ xi̱nu ña̱yóʼo, saáchi Jehová kundaavara na̱ ñuura.

⁵ Tá viíní ná kutáʼanyó xíʼin Jehová, ta̱ Ndi̱va̱ʼa va̱ása kuchiñura sakúxíkara miíyó nu̱ú Ndióxi̱. Ña̱ Biblia káchiña xíʼinyó: “Jehová íyora xíʼinndó tá ná kǒo sandákoondóra” (2 Crónicas 15:2; kaʼvi 1 Corintios 10:13). Ku̱a̱ʼání na̱ ta̱a xíʼin ná ñaʼá na̱ xi̱ndoo tiempo xi̱naʼá va̱ʼaní xi̱kitáʼanna xíʼin Jehová ta ku̱xíkana nu̱ú ta̱ Ndi̱va̱ʼa, tá kúú ta̱ Abel, ta̱ Enoc, ñá Sara xíʼin ta̱ Moisés (Hebreos 11:4-40). Táki̱ʼva i̱xaa na̱kán saátu kivi keʼé miíyó. Tu̱ʼun Ndióxi̱ káchiña: “Va̱ása keʼéndó ña̱ kúni̱ ta̱ Ndi̱va̱ʼa, ta ta̱yóʼo kuxíkara nu̱úndó” (Santiago 4:7).

6. ¿Ndáaña xíniñúʼu ta̱ Ndi̱va̱ʼa ña̱ sandáʼvira miíyó?

⁶ Ta̱ Ndi̱va̱ʼa kúnda̱a̱-inira ña̱ va̱ása taxi Jehová keʼéra ndiʼi ña̱ kúni̱ra xíʼinyó. Soo ni saá chíka̱a̱níra ndee̱ ña̱ sakúxíkara miíyó nu̱ú Ndióxi̱. Ta̱ Ndi̱va̱ʼa ni xa̱a̱ síín síínña xíniñúʼura ña̱ kúni̱ra sandáʼvira miíyó, soo ña̱ xi̱niñúʼura tiempo xi̱naʼá kúútu ña̱ xíniñúʼura tiempo vitin. ¿Ndáaña kúú sava ña̱ xíniñúʼura?

7. ¿Nda̱chun va̱xiní tu̱ndóʼo nu̱ú na̱ ndásakáʼnu Jehová íxaa ta̱ Ndi̱va̱ʼa?

⁷ Ta̱ apóstol Juan ka̱chira: “Ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa” (1 Juan 5:19). Ta̱ Ndi̱va̱ʼa kúú ta̱ sándaʼvi na̱ ñuyǐví yóʼo ta kúni̱tura sandáʼvira na̱ ndásakáʼnu Jehová (Miqueas 4:1; Juan 15:19; Revelación 12:12, 17). Kúnda̱a̱-inira ña̱ si̱lóʼo kuití tiempo kíndo̱o nu̱úra, ña̱kán chíka̱a̱níra ndee̱ ña̱ sandáʼvira miíyó ña̱ va̱ása nda̱kúka koo iniyó xíʼin Jehová. Sava yichi̱ chíka̱a̱ nda̱kúra tu̱ndóʼo nu̱úyó ta sava yichi̱ se̱ʼé se̱ʼéva kéʼéraña.

8. ¿Ndáaña xíniñúʼu kunda̱a̱-ini miíyó na̱ ndásakáʼnu Ndióxi̱?

 ⁸ Ña̱ Biblia káchiña: “Kánitáʼanyó [...] xíʼin na̱ ta̱chí ndi̱va̱ʼa na̱ ndóo chí ndiví” (Efesios 6:12). Xíniñúʼu kunda̱a̱-iniyó nani tá nda̱taxiyó miíyó ndaʼa̱ Jehová ki̱xáʼayó kánitáʼanyó xíʼin na̱ ta̱chí ndi̱va̱ʼa ta saátu xíʼin ta̱ Ndi̱va̱ʼa. Ña̱kán, nu̱ú carta ña̱ chi̱ndaʼá ta̱ Pablo ku̱a̱ʼa̱n ndaʼa̱ na̱ ñuu Éfeso, u̱ni̱ yichi̱ ni̱ka̱ʼa̱nra xíʼinna ña̱ xíniñúʼu ndakú koo inina (Efesios 6:11, 13, 14).

9. ¿Ndáaña kúni̱ ta̱ Ndi̱va̱ʼa keʼéra xíʼinyó?

⁹ Ta̱ Ndi̱va̱ʼa xíʼin na̱ ta̱chí ndi̱va̱ʼa ku̱a̱ʼání ña̱ʼa xíniñúʼuna ña̱ va̱ʼa sandáʼvina miíyó. Tá xa̱a̱ ku̱chiñuyó ni̱ya̱ʼayó nu̱ú iinña, ná kǒo ndakanixi̱níyó ña̱ ni iinkaña kǒo kuchiñu xíʼinyó. Ta̱ Ndi̱va̱ʼa xíto va̱ʼara ndáaña kivi sandákava miíyó ta saá ndáka̱xinra ña̱ kuniñúʼura xíʼinyó. Soo ña̱ Biblia káʼa̱nña xa̱ʼa̱ ña̱ xíniñúʼura ña̱ va̱ʼa ná kǒo ndakavayó nu̱úña (2 Corintios 2:11; koto nota 31). Iin ña̱ xíniñúʼura kúú ña̱ keʼéyó ña̱ kútóo na̱ ta̱chí ndi̱va̱ʼa.

10. a) ¿Ndáa ña̱ʼa kútóo na̱ ta̱chí ndi̱va̱ʼa? b) ¿Ndáaña ndákanixi̱ní Jehová xa̱ʼa̱ ña̱yóʼo?

¹⁰ Ña̱ʼa ña̱ kútóo na̱ ta̱chí ndi̱va̱ʼa kúú ña̱ adivinación á ña̱ ndákú, ña̱ ndakuatiyó á ña̱ chika̱a̱yó ña̱ tási inka na̱ yiví á ña̱ ka̱ʼa̱nyó xíʼin na̱ ni̱xi̱ʼi̱. Ña̱ Biblia káʼa̱nña xa̱ʼa̱ Jehová ña̱ kúndasíra xínira ndiʼi ña̱ kúú kuenta na̱ ta̱chí ndi̱va̱ʼa. Kǒo kívi ndasakáʼnuyó Jehová ta kutáʼanyó xíʼin na̱ ta̱chí ndi̱va̱ʼa (Deuteronomio 18:10-12; Revelación 21:8). Miíyó ni loʼo va̱ása xíniñúʼu keʼéyó ña̱ʼa ña̱ kútóo na̱ ta̱chí ndi̱va̱ʼa (Romanos 12:9).

11. ¿Ndáaña kundoʼoyó tá ná kixáʼa kutóoyó ña̱ʼa ña̱ kúú kuenta na̱ ta̱chí ndi̱va̱ʼa?

¹¹ Ta̱ Ndi̱va̱ʼa xítora tá kútóoyó ña̱ʼa ña̱ kúú kuenta  na̱ ta̱chí ndi̱va̱ʼa ta kuniñúʼura ña̱yóʼo ña̱ sandákavara miíyó tasaá xa̱a̱yó kuxíkayó nu̱ú Jehová ta kǒo kutáʼankayó xíʼinra.

12. ¿Ndáaña kúni̱ ta̱ Ndi̱va̱ʼa ndakanixi̱ní na̱ yiví?

¹² Ta̱ Ndi̱va̱ʼa kútóora sakára xi̱ní na̱ yiví. Loʼo tá loʼo kíxáʼa xíka-inina íxaara ta kíxáʼa ndákanixi̱nína ña̱ va̱ʼa kúú ña̱ va̱ása va̱ʼa ta ña̱ va̱ása va̱ʼa kúú ña̱ va̱ʼa (Isaías 5:20). Ta̱ Ndi̱va̱ʼa kúni̱ra ná ndakanixi̱níyó ña̱ va̱ása va̱ʼa consejo ña̱ va̱xi nu̱ú Biblia. Kúni̱tura ná ndakanixi̱níyó ña̱ si̱íníka kooyó tá ná kǒo kundiku̱nyó ña̱ káʼa̱n Jehová.

13. ¿Ndáa ki̱ʼva sákaka ta̱ Ndi̱va̱ʼa iniyó? Ka̱ʼa̱n xa̱ʼa̱ sava ejemplo.

¹³ Iin ña̱ xíniñúʼuní ta̱ Ndi̱va̱ʼa ta va̱ʼaní kúchiñura xíʼinñá kúú ña̱ kaka-iniyó. Ña̱yóʼo kúú ña̱ ke̱ʼéra nani tá tiempo xi̱naʼáví. Ti̱xin jardín ña̱ Edén ni̱xi̱ka-ini ñá Eva i̱xaara tá ni̱nda̱ka̱tu̱ʼunrañá: “¿Á ña̱ nda̱a̱ kúú ña̱ ni̱ka̱ʼa̱n Ndióxi̱ xíʼinndó ña̱ kǒo kívi kaxíndó ku̱i̱ʼi ndaʼa̱ ni iin yitu̱n tú íyo nu̱ú ñuʼú livi yóʼo?” (Génesis 3:1). Tá tiempo ta̱ Job, ta̱ Ndi̱va̱ʼa ni̱nda̱ka̱tu̱ʼunra Jehová nu̱ú ndiʼika na̱ ángel, ta ka̱chira: “¿Á íxato̱ʼó mií ta̱ Job yóʼó túviún?” (Job 1:9). Tándi̱ʼi nda̱kuchi ta̱ Jesús, ta̱ Ndi̱va̱ʼa xi̱tondosórara ta ka̱chira xíʼinra: “Tá ndixa kúún se̱ʼe Ndióxi̱, ka̱ʼa̱n xíʼin yu̱u̱ yóʼo ná nduuña si̱táva̱ʼa” (Mateo 4:3).

14. ¿Ndáaña kéʼé ta̱ Ndi̱va̱ʼa ña̱ sándaʼvira na̱ yiví?

¹⁴ Tiempo vitin ta̱ Ndi̱va̱ʼa ndákundeéra sákakara-iniyó. Ña̱ va̱ʼa ná ndakanixi̱ní na̱ yiví ña̱ su̱ví ku̱a̱chiví kúú ña̱ kutóona ña̱ʼa ña̱ kúú kuenta na̱ ta̱chí ndi̱va̱ʼa ndásaliviraña nu̱úna. Nda̱a̱ sava na̱ hermano kǒo kíʼinna kuenta ña̱ iin ña̱ i̱yoní kúú ña̱yóʼo (2 Corintios  11:3). Ña̱kán, ¿ndáaña kivi keʼéyó ña̱ va̱ʼa ná kǒo ndakavayó ndaʼa̱ ña̱yóʼo? ¿Ndáaña kivi keʼéyó ña̱ va̱ʼa kunda̱a̱-iniyó ña̱ kǒo sándaʼvi ta̱ Ndi̱va̱ʼa miíyó? Ná ka̱ʼa̱nyó xa̱ʼa̱ u̱vi̱ ña̱ʼa ña̱ kivi kuniñúʼu ta̱ Ndi̱va̱ʼa ña̱ sandáʼvira miíyó: ña̱ xítonde̱ʼéyó á ta̱tán ña̱ kútátányó.

15. ¿Ndáa ña̱ʼa kivi chindaʼá miíyó ña̱ kixáʼa ki̱ʼviyó xíʼin na̱ ta̱chí ndi̱va̱ʼa?

¹⁵ Tiempo vitin ku̱a̱ʼání video, película, programa ña̱ yáʼa nu̱ú tele, videojuego á página ña̱ Internet va̱xi ña̱ʼa ña̱ kúú kuenta na̱ ta̱chí ndi̱va̱ʼa nu̱úña, tá kúú ña̱ magia. Ku̱a̱ʼání na̱ yiví ndákanixi̱nína ña̱ su̱ví ña̱ ndeé kúúña ta kǒo kíʼinna kuenta ña̱ kíʼvina xíʼin na̱ ta̱chí ndi̱va̱ʼa. Savatuna kivi kixáʼana keʼéna ña̱ kúú kuenta na̱ ta̱chí ndi̱va̱ʼa, tá kúú ña̱ adivinación á ña̱ ndákú, tá xítona tu̱ni̱ ndaʼa̱ á xíʼin baraja, á tá kúni̱na kunda̱a̱-inina xa̱ʼa̱ xa̱ni ña̱ ni̱xa̱nína. Ta̱ Ndi̱va̱ʼa sándaʼvira miíyó ña̱ ndakanixi̱níyó xa̱ʼa̱ ña̱yóʼo ña̱ kǒo ña̱ ndoʼoyó xíʼinña saáchi ña̱ liviva kúúña ta sákusi̱íña-iniyó. Nda̱a̱ íyo sava na̱ káʼa̱n ña̱ kǒoví ku̱a̱chi ña̱ kusíkína á kotonde̱ʼéna iin ña̱ʼa ña̱ kúú kuenta na̱ ta̱chí ndi̱va̱ʼa tá su̱ví miína kéʼéña. ¿Nda̱chun iin ña̱ i̱yoní kúúña ná ndakanixi̱níyó saá? (1 Corintios 10:12).

16. ¿Nda̱chun xíniñúʼu kundasíyó kuniyó ña̱ʼa ña̱ kúú kuenta na̱ ta̱chí ndi̱va̱ʼa?

¹⁶ Ta̱ Ndi̱va̱ʼa xíʼin na̱ ta̱chí ndi̱va̱ʼa kǒo kívi kunda̱a̱-inina ndáaña ndákanixi̱níyó. Soo kiviva kunda̱a̱-inina ndáaña kútóoyó tá xítona ndáaña ndáka̱xinyó kotonde̱ʼéyó á kusíkíyó xíʼin na̱ veʼeyó. Tá ná kotonde̱ʼéyó película nu̱ú káʼa̱nña xa̱ʼa̱ na̱ ta̱chí ndi̱va̱ʼa á  kuniso̱ʼoyó yaa á kaʼviyó libro ña̱ káʼa̱n xa̱ʼa̱ na̱ ndákuati, na̱ kéʼé ña̱ tási, ná bruja xíʼin na̱ vampiro á inkaka ña̱ʼa, ta̱ Ndi̱va̱ʼa xíʼin na̱ ta̱chí ndi̱va̱ʼa kunina ña̱ kútóoyóña. Ta na̱yóʼo nda̱a̱ sana kuni̱na ná kixáʼayó keʼéyó ndiʼi ña̱yóʼo (kaʼvi Gálatas 6:7).

17. ¿Ndáa ki̱ʼva kivi sandáʼvi ta̱ Ndi̱va̱ʼa miíyó tá ndeé ndóʼoyó?

¹⁷ Inka ña̱ kivi kuniñúʼu ta̱ Ndi̱va̱ʼa kúúña tá kúni̱yó nduva̱ʼayó. Ku̱a̱ʼání na̱ yiví kíʼin kue̱ʼe̱na ta ku̱a̱ʼání ña̱ʼa kéʼéna ña̱ kúni̱na ndaʼana soo kǒo ni iin ña̱ chíndeétáʼan xíʼinna (Marcos 5:25, 26). Sava yichi̱, na̱yóʼo ni kǒo xíni̱kana ndáaña keʼéna ña̱kán nda̱a̱ xáa̱na  xítondosóna ndiʼi ña̱ʼa ña̱ va̱ʼa ndaʼana. Soo miíyó na̱ ndásakáʼnu Ndióxi̱ xíniñúʼu kiʼinyó kuenta ta kǒo kuniñúʼuyó ta̱tán ña̱ kúúmií magia (Isaías 1:13).

18. ¿Ndáa ta̱tán kúú ña̱ va̱ása va̱ʼa kuniñúʼuyó?

¹⁸ Tá tiempo xi̱naʼá, sava na̱ ñuu Israel xi̱xiniñúʼuna ña̱ magia, soo Jehová ka̱chira xíʼinna: “Tá ndániʼindó ndaʼa̱ndó chí ndiví, kǒo xítoi̱ nu̱úndó. Ni ku̱a̱ʼákaví yichi̱ káʼa̱nndó xíʼi̱n, va̱ása xíniso̱ʼi̱ ña̱ káʼa̱nndó” (Isaías 1:15). Nu̱ú Jehová, su̱ví ña̱ va̱ʼa kúú ña̱ xi̱keʼéna, ña̱kán va̱ása níxixiniso̱ʼora ña̱ xi̱ka̱ʼa̱nna xíʼinra. Miíyó kǒo kúni̱yó keʼéyó iin ña̱ʼa ña̱ kivi sakúxíka miíyó nu̱ú Jehová, ta xa̱ʼa̱ ña̱yóʼo va̱ása chindeétáʼanra xíʼinyó tá ndeé ndóʼoyó (Salmo 41:3). Ña̱kán xíniñúʼu nda̱ka̱tu̱ʼunyó á nandukúyó xa̱ʼa̱ ta̱tán ña̱ kuniñúʼuyó á va̱ása kítáʼanña xíʼin na̱ ta̱chí ndi̱va̱ʼa á ña̱ tási (Mateo 6:13). Tá ndákanixi̱níyó ña̱ sana su̱ví ña̱ va̱ʼa kúú ña̱yóʼo, va̱ʼaka ná kǒo kuniñúʼuyóña (koto nota 32).

19. ¿Nda̱chun ku̱a̱ʼání na̱ yiví yíʼvina xínina ta̱ Ndi̱va̱ʼa?

¹⁹ Sava na̱ yiví ndákanixi̱nína ña̱ su̱ví ña̱ ndixa kúú ña̱ íyo ta̱ Ndi̱va̱ʼa ni na̱ ta̱chí ndi̱va̱ʼa. Soo savatuna kúnda̱a̱-inina xa̱ʼa̱ ña̱ ndo̱ʼo miína ña̱ ndixa kúú ña̱ íyova na̱ ta̱chí ndi̱va̱ʼa. Ku̱a̱ʼánína yíʼvina xínina na̱ ta̱chí ndi̱va̱ʼa yóʼo á kándíxana ña̱ yíʼna. Íyotu sava na̱ kúni̱ sáyíʼvi inkana ta nátúʼunna xíʼinna xa̱ʼa̱ ña̱ʼa ña̱ kini ña̱ kéʼé na̱ ta̱chí ndi̱va̱ʼa xíʼin inka na̱ yiví. Ku̱a̱ʼánína kútóona ña̱yóʼo ta kútóonítuna natúʼunna xa̱ʼa̱ña. Xa̱ʼa̱ ña̱yóʼo ku̱a̱ʼání na̱ yiví yíʼvina xínina ta̱ Ndi̱va̱ʼa.

20. ¿Ndáa ki̱ʼva kivi kixáʼayó natúʼunyó cuento xa̱ʼa̱ ta̱ Ndi̱va̱ʼa?

²⁰ Ndakanixi̱ní xa̱ʼa̱ ña̱yóʼo: ta̱ Ndi̱va̱ʼa kúni̱ra ná yi̱ʼví  na̱ yiví kuninara (2 Tesalonicenses 2:9, 10). Xa̱ʼa̱ ña̱ kúúra ta̱ vatá, xíni̱ra ndáa ki̱ʼva sandáʼvira na̱ yiví na̱ kútóo ña̱ʼa ña̱ kúú kuenta na̱ ta̱chí ndi̱va̱ʼa. Sana na̱ yiví yóʼo kíxáʼana nátúʼunna xa̱ʼa̱ ña̱ʼa ña̱ ndákanixi̱nína ña̱ xi̱nina á xi̱niso̱ʼona ni su̱ví ña̱ ndixa kúúña. Tá kíxáʼana nátúʼunna xa̱ʼa̱ ña̱yóʼo, ku̱a̱ʼákaña chínúuna sa̱táña. Miíyó kǒo kúni̱yó chindeétáʼanyó xíʼin ta̱ Ndi̱va̱ʼa ña̱ natúʼunyó cuento ña̱ sáyíʼvi na̱ yiví (Juan 8:44; 2 Timoteo 2:16).

21. ¿Ndáaña kivi natúʼunyó xa̱ʼa̱ nu̱úka ña̱ natúʼunyó xa̱ʼa̱ cuento na̱ ta̱chí ndi̱va̱ʼa?

²¹ Tá iin na̱ ndásakáʼnu Jehová ndo̱ʼona iin ña̱ʼa i̱xaa na̱ ta̱chí ndi̱va̱ʼa, va̱ása xíniñúʼu natúʼunna xa̱ʼa̱ ña̱yóʼo xíʼin inkana. Miíyó kǒo xíniñúʼu yi̱ʼvíyó kuniyó ta̱ Ndi̱va̱ʼa á na̱ ta̱chí ndi̱va̱ʼa. Va̱ʼaka ná ndakanixi̱níyó xa̱ʼa̱ ta̱ Jesús, ná natúʼunyó xa̱ʼa̱ra ta saátu xa̱ʼa̱ ndee̱ ña̱ ta̱xi Jehová ndaʼa̱ra (Hebreos 12:2). Ta̱ Jesús va̱ása níxinatúʼunra cuento xa̱ʼa̱ na̱ ta̱chí ndi̱va̱ʼa xíʼin na̱ discípulora. Ña̱ xi̱ndi̱ʼi̱-inira xa̱ʼa̱ kúú ña̱ natúʼunra xa̱ʼa̱ Reino Ndióxi̱ xíʼin xa̱ʼa̱ ña̱ va̱ʼa ña̱ kéʼé Ndióxi̱ (Hechos 2:11; Lucas 8:1; Romanos 1:11, 12).

22. ¿Ndáaña chíka̱a̱-iniún keʼún?

²² Ná kǒo nandósóyó ña̱ kúni̱ ta̱ Ndi̱va̱ʼa sákuxíkara miíyó nu̱ú Jehová, ta ku̱a̱ʼání nu̱ú ña̱ʼa keʼéra ña̱ kuni̱ra sandákavara miíyó. Soo xíni̱vayó ña̱ xíniñúʼura ta xa̱a̱ chi̱ka̱a̱-iniyó ña̱ kundasíyó kuniyó ndiʼi ña̱ʼa ña̱ kúú kuenta na̱ ta̱chí ndi̱va̱ʼa. Va̱ása taxiyó ña̱ sandákava ta̱ Ndi̱va̱ʼa miíyó (kaʼvi Efesios 4:27). Tá ná kuxíkayó nu̱ú ta̱ Ndi̱va̱ʼa, kuchiñuyó ndakú koo iniyó nu̱ú ña̱ xíniñúʼura ta va̱ása yi̱ʼvíyó kuniyóra saáchi Jehová kundaara miíyó (Efesios 6:11).