1-3. a) ¿Ndáaña kúú iin ña̱ va̱ʼaní ta̱xi Jehová ndaʼa̱yó? b) ¿Ama kúú ña̱ sana va̱ása va̱ʼa kuniñúʼu viíyó tu̱ʼun ña̱ káʼa̱nyó? c) ¿Nda̱saa kivi kuniñúʼu viíyó tu̱ʼun ña̱ káʼa̱nyó?

NDAKANIXI̱NÍ ña̱ iin ta̱a, ta̱xira iin bicicleta ndaʼa̱ se̱ʼera. Kúsi̱í-inira ña̱ ta̱xira regalo yóʼo ndaʼa̱ se̱ʼera. Soo, ¿nda̱saa ndoʼora tá va̱ása xíniñúʼu va̱ʼa se̱ʼera bicicleta yóʼo ta sátukue̱ʼe̱ra inkana xíʼinnú?

² Jehová kúú ta̱ táxi ndiʼi ña̱ va̱ʼa ndaʼa̱yó (Santiago 1:17). Iin ña̱ va̱ʼaní ta̱xira ndaʼa̱yó kúú tu̱ʼunyó. Ña̱yóʼo kúu ña̱ táxi ka̱ʼa̱nyó ndáaña ndákanixi̱níyó á ndáaña ndíka̱a̱ níma̱yó. Ta ña̱ káʼa̱nyó kivi chindeéña inkana ta va̱ʼa kunina á kivitu sandákavaña-inina.

³ Tu̱ʼun ña̱ káʼa̱nyó ku̱a̱ʼání ña̱ kivi keʼéña, ta Jehová sánáʼa̱ra miíyó ndáa ki̱ʼva kuniñúʼuyóña. Káchira xíʼinyó: “Kǒo ka̱ʼa̱nndó tu̱ʼun ña̱ sáxo̱ʼvi̱-ini inkana chi ña̱ ka̱ʼa̱nndó xíniñúʼu chika̱a̱ña ndee̱ inkana ta ná chindeétáʼanña xíʼin na̱ xíniso̱ʼoña” (Efesios 4:29). Ná kotoyó ndáa ki̱ʼva keʼéyó xíʼin ña̱ káʼa̱nyó ña̱ va̱ʼa sakusi̱íyó-inira ta saátu ña̱ va̱ʼa taxiyó ndee̱ ndaʼa̱ inkana.

4, 5. ¿Ndáaña sákuaʼayó xíʼin tutu ña̱ Proverbios xa̱ʼa̱ ña̱ kuentaní kooyó xíʼin tu̱ʼun ña̱ káʼa̱nyó?

⁴ Tu̱ʼun ña̱ káʼa̱nyó ku̱a̱ʼání ña̱ kivi keʼéña, xa̱ʼa̱ ña̱yóʼo xíniñúʼu kiʼinyó kuenta xíʼin tu̱ʼun ña̱ káʼa̱nyó ta ndáa ki̱ʼva káʼa̱nyóña. Proverbios 15:4 káchiña: “Tu̱ʼun va̱ʼa ña̱ káʼa̱nyó táki̱ʼva íyo iin yitu̱n tú táxi ña̱ kutakuyó saá íyoña, soo tu̱ʼun ña̱ va̱ása va̱ʼa sándakavaña-iniyó”. Tá niʼníní kútóoníyó kooyó ti̱xin iin yitu̱n tú táxi ku̱nda̱tí, ta saátu tu̱ʼun ña̱ káʼa̱nyó tá vií íyoña sándi̱koña-ini inkana. Soo tá káʼa̱nyó tu̱ʼun yo̱ʼvi̱ saxóʼvi̱yó-ini inkana ta va̱ása va̱ʼa kúnina (Proverbios 18:21).

⁵ Proverbios 12:18 káchiña ña̱ káʼa̱nyó iin ña̱ʼa soo va̱ása ndákanixi̱níyó xíʼinña “nda̱a̱ táki̱ʼva íyo iin yuchu̱ xi̱ín nu̱ú” saá íyoña. Tu̱ʼun yo̱ʼvi̱ kivi saxóʼvi̱ña-ini inkana ta nda̱a̱ kivi sandákoona ña̱ ka̱ʼa̱n xíʼin táʼanna. Sana ndákaʼún xa̱ʼa̱ iin tu̱ʼun yo̱ʼvi̱ ña̱ ni̱ka̱ʼa̱n iinna xíʼún ta ndeéní ni̱xo̱ʼvi̱ún xíʼinña. Soo tutu ña̱ Proverbios káʼa̱nkaña ña̱yóʼo: “Na̱ ndákanixi̱ní xíʼin tu̱ʼun ña̱ káʼa̱nna nda̱a̱ táki̱ʼva íyo na̱ sándaʼa saá íyona”. Tá ná ndakani va̱ʼa xi̱níyó xíʼin ña̱ káʼa̱nyó, kivi sakusi̱íyó-ini na̱ nda̱kava-ini ta kivi ndakutáʼan tukuyó xíʼin iin na̱ ni̱sa̱a̱ xíʼinyó (kaʼvi Proverbios 16:24). Tá ná kunda̱a̱-iniyó ña̱ tu̱ʼun ña̱ káʼa̱nyó kivi saxóʼvi̱ña inkana, kiʼinnívayó kuenta xíʼin ña̱ ka̱ʼa̱nyó.

6. ¿Nda̱chun íxayo̱ʼvi̱ña xíʼinyó ña̱ kiʼinyó kuenta xíʼin ña̱ káʼa̱nyó?

⁶ Inka xa̱ʼa̱ ña̱ xíniñúʼu kiʼinyó kuenta xíʼin tu̱ʼun ña̱ káʼa̱nyó kúúña saáchi na̱ yiví ku̱a̱chi kúúyó. Ña̱ Biblia káchiña, ña̱ ndíka̱a̱ níma̱ na̱ yiví nina ña̱ kini kúúña ta tu̱ʼun ña̱ káʼa̱nyó náʼa̱ña ndáaña ndíka̱a̱ níma̱yó (Génesis 8:21; Lucas 6:45). Sana ixayo̱ʼvi̱ña xíʼinyó ña̱ kiʼinyó  kuenta xíʼin tu̱ʼun ña̱ káʼa̱nyó (kaʼvi Santiago 3:2-4). Soo xíniñúʼu chika̱a̱yó ndee̱ ña̱ vií ka̱ʼa̱nyó xíʼin inkana.

7, 8. ¿Á kivika kutáʼanyó xíʼin Jehová tá va̱ása kíʼinyó kuenta xíʼin ña̱ káʼa̱nyó?

⁷ Xíniñúʼu kiʼinyó kuenta xíʼin ña̱ káʼa̱nyó á ndáa ki̱ʼva káʼa̱nyóña chi ndísoyó ku̱a̱chi xa̱ʼa̱ ña̱ káʼa̱nyó nu̱ú Jehová. Santiago 1:26 káchiña: “Tá iin ta̱a ndákanixi̱níra ña̱ va̱ʼaní ndásakáʼnura Ndióxi̱, soo va̱ása kíʼinra kuenta xíʼin ña̱ káʼa̱nra, sándaʼvira miíra, ta va̱ása ndáyáʼvi ña̱ ndásakáʼnura Ndióxi̱” (1 Corintios 15:17). Tá va̱ása kíʼinyó kuenta xíʼin ña̱ káʼa̱nyó, kivi kuxíkayó nu̱ú Jehová ta va̱ása kivika kutáʼanyó xíʼinra (Santiago 3:8-10).

⁸ Táki̱ʼva sa̱kuaʼayó íyo ku̱a̱ʼá xa̱ʼa̱ ña̱ xíniñúʼu kiʼinyó kuenta xíʼin ña̱ káʼa̱nyó á ndáa ki̱ʼva káʼa̱nyóña. Ña̱ va̱ʼa kuniñúʼuyó tu̱ʼunyó ña̱ káʼa̱nyó táki̱ʼva kúni̱ mií Jehová xíniñúʼu kunda̱a̱-iniyó ndáa tu̱ʼun kúú ña̱ kǒo kútóora.

9, 10. a) ¿Ndáa tu̱ʼun kúú ña̱ káʼa̱n ku̱a̱ʼání na̱ yiví tiempo vitin? b) ¿Nda̱chun va̱ása xíniñúʼu ka̱ʼa̱nyó tu̱ʼun kini?

⁹ Tiempo vitin ku̱a̱ʼánína káʼa̱nna tu̱ʼun kini. Ku̱a̱ʼánína ndákanixi̱nína ña̱ xíniñúʼu ka̱ʼa̱nna tu̱ʼun kini tá káʼa̱nna xa̱ʼa̱ iin ña̱ʼa ña̱ va̱ʼa kunda̱a̱-ini inkana xíʼinña. Nu̱ú tele á nu̱ú radio yáʼa sava na̱ tává si̱ki kini á káʼa̱nna tu̱ʼun kini ña̱ va̱ʼa sáku̱a̱ku̱na inkana. Soo ta̱ apóstol Pablo ni̱ka̱ʼa̱nra ña̱yóʼo: “Sandiʼi-xa̱ʼa̱ndó ndiʼi ña̱ ñúʼu-inindó: tá kúú ña̱ kue̱ʼe̱-inindó, ña̱ sáa̱-inindó, ña̱ ndi̱va̱ʼa-inindó, ña̱ káʼa̱n ndi̱va̱ʼandó, ña̱ káʼa̱n kinindó” (Colosenses 3:8). Ta ni̱ka̱ʼa̱nra ña̱ ni loʼoví ná kǒo kana si̱ki kini yuʼú miíyó na̱ káʼvi tu̱ʼun Ndióxi̱ (Efesios 5:3, 4).

¹⁰ Jehová va̱ása kútóora ña̱ ka̱ʼa̱nyó tu̱ʼun kini ta saátu miíyó na̱ kúʼvi̱-ini xíniñaʼá va̱ása kútóoyó ña̱yóʼo. Ña̱ yaku̱a̱ kúú ña̱yóʼo. Tá káʼa̱n Biblia xa̱ʼa̱ ña̱ yaku̱a̱, káʼa̱nña xa̱ʼa̱ ña̱ kútóo ku̱ñuyó (Gálatas 5:19-21). Ku̱a̱ʼání nu̱ú kúú ña̱ yaku̱a̱, tá kéʼéyó iinña kivi kixáʼayó keʼéyó inkaña. Tá iin na̱ hermano kúúmiína costumbre ña̱ káʼa̱nna tu̱ʼun kini ta va̱ása xíínna nasa̱mana, va̱ása kívika kuñuʼuna ti̱xin ña̱ congregación (2 Corintios 12:21; Efesios 4:19; koto nota 23).

11, 12. a) ¿Nda̱saa kivi nduu tu̱ʼun ña̱ nátúʼunyó iin ña̱ vatá? b) ¿Nda̱chun ni loʼo va̱ása va̱ʼa ña̱ ka̱ʼa̱nyó ña̱ síkí xa̱ʼa̱ inkana?

¹¹ Saátu xíniñúʼu kiʼinyó kuenta ña̱ ná kǒo ka̱ʼa̱nyó ña̱ vatá xa̱ʼa̱ inkana. Kiviva ndi̱ʼi̱-iniyó xa̱ʼa̱ na̱ veʼeyó xíʼin na̱ migoyó ta ka̱ʼa̱nyó xa̱ʼa̱ ña̱ va̱ʼa ña̱ ndóʼona. Na̱ cristiano na̱ xi̱ndoo tá siglo nu̱ú xi̱kuni̱na kunda̱a̱-inina á ndóo va̱ʼa na̱ ñanina á ku̱ʼvana ta ndáaña kivi keʼéna ña̱ chindeétáʼanna xíʼinna (Efesios 6:21, 22; Colosenses 4:8, 9). Soo tá nátúʼunyó xa̱ʼa̱ inkana ta va̱ása kíʼinyó kuenta xíʼin ña̱ káʼa̱nyó kivi nduuña ña̱ vatá, saáchi sana ka̱ʼa̱nyó  ña̱ va̱ása ndixa xa̱ʼa̱ inkana á ña̱ va̱ása xíniñúʼu ka̱ʼa̱nyó. Tá va̱ása kíʼinyó kuenta, ña̱ káʼa̱nyó kivi xa̱a̱ña nduuña iin ku̱a̱chi síkí. Na̱ fariseo chi̱ka̱a̱na ku̱a̱chi síkí sa̱tá ta̱ Jesús tá ni̱ka̱ʼa̱nna ña̱ vatá xa̱ʼa̱ra (Mateo 9:32-34; 12:22-24). Tá káʼa̱nyó ña̱ síkí xa̱ʼa̱ iinna va̱ása va̱ʼa kíndo̱ona nu̱ú inkana, sáxo̱ʼvi̱ñana, kánitáʼanna ta nda̱a̱ sándakoona ña̱ kítáʼanna xíʼin na̱ migona (Proverbios 26:20).

¹² Jehová kúni̱ra ña̱ ná kuniñúʼuyó tu̱ʼunyó ña̱ va̱ʼa chindeétáʼanyó xíʼin inkana á ña̱ chika̱a̱yó ndee̱na, su̱ví ña̱ kanitáʼanyó xíʼin na̱ migoyó. Chi ta̱kán kúndasíra xínira na̱ sákaku ku̱a̱chi xíʼin táʼan (Proverbios 6:16-19). Mií ta̱ nu̱ú va̱ʼa ta̱ ni̱ka̱ʼa̱n ña̱ síkí kúú ta̱ Ndi̱va̱ʼa chi chi̱ka̱a̱ síkíra ku̱a̱chi sa̱tá Jehová (Revelación [Apocalipsis] 12:9, 10). Tiempo vitin ku̱a̱ʼání na̱ yiví káʼa̱nna tu̱ʼun vatá xa̱ʼa̱ inkana, soo va̱ása xíniñúʼu kuu ña̱yóʼo ti̱xin congregación (Gálatas 5:19-21). Ña̱kán xíniñúʼu kiʼinyó kuenta xíʼin ña̱ káʼa̱nyó ta ndiʼi yichi̱ siʼna xíniñúʼu ndakanixi̱níyó ta saáví ka̱ʼa̱nyó. Tá kúma̱níka ka̱ʼún xa̱ʼa̱ iinna nda̱ka̱tu̱ʼun miíún: “¿Á ña̱ ndixa kúú ña̱ ka̱ʼi̱n? ¿Á ña̱ va̱ʼa kúúña? ¿Á chindeétáʼanña xíʼinna? ¿Á kutói̱ tá ná kuniso̱ʼo inkana ña̱ káʼi̱n xa̱ʼa̱na? ¿Nda̱saa ndo̱ʼi̱ tá saá ná ka̱ʼa̱nna xa̱ʼíi̱?” (kaʼvi 1 Tesalonicenses 4:11).

13, 14. a) ¿Ndáaña kivi ndoʼo inkana tá ná ka̱ʼa̱n ndi̱va̱ʼayó xíʼinna? b) ¿Ndáaña kúni̱ kachi ña̱ nda̱ʼyi̱ nu̱ú táʼanyó? c) ¿Nda̱chun va̱ása va̱ʼa ka̱ʼa̱n ndi̱va̱ʼayó xíʼin inkana?

¹³ Sava yichi̱ ndiʼivayó yáʼa yuʼú xíʼin ña̱ káʼa̱nyó ta tándi̱ʼi ndíkó-iniyó xa̱ʼa̱ ña̱ ni̱ka̱ʼa̱nyó. Soo va̱ása kúni̱yó iin costumbre nduuña nu̱úyó ña̱ ka̱ʼa̱nndaayó xa̱ʼa̱ inkana ni ña̱ ka̱ʼa̱n ndi̱va̱ʼayó xa̱ʼa̱na. Ta̱ Pablo ni̱ka̱ʼa̱nra: “Tavándó ndiʼi ña̱ ñúʼu inindó tá kúú ña̱ sáa̱ndó,  ña̱ ndáʼyi̱ nu̱ú táʼanndó, ña̱ káʼa̱n ndi̱va̱ʼandó” (Efesios 4:31). Xíniñúʼu sandákooyó ña̱ ka̱ʼa̱n ndi̱va̱ʼayó xíʼin inkana á ña̱ ka̱ʼa̱nyó tu̱ʼun yo̱ʼvi̱. Tá káʼa̱nyó ña̱yóʼo xíʼin inkana nda̱a̱ kivi xa̱a̱na ndakava-inina ta ndakanixi̱nína ña̱ va̱ása ndáyáʼvina. Na̱ kamaníka ndákava-ini xíʼinña kúú na̱ va̱lí, ña̱kán xíniñúʼuní kiʼinyó kuenta xíʼin ña̱ káʼa̱nyó xíʼinna (Colosenses 3:21).

¹⁴ Ña̱ Biblia káʼa̱nña ña̱ va̱ása nda̱ʼyi̱ nu̱ú táʼanyó, ña̱yóʼo kúni̱ kachiña ña̱ va̱ása va̱ʼa kuniñúʼuyó tu̱ʼun yo̱ʼvi̱ ña̱ kuni̱yó sandákavayó-ini táʼanyó. Iin na̱ káʼvi tu̱ʼun Ndióxi̱ va̱ása va̱ʼa saá keʼéna xíʼin na̱ ti̱ndaʼa̱ xíʼinna ni xíʼin se̱ʼena. Tá iinna kéʼéna saá ta kǒo xíínna nasamana miína, va̱ása kivika kundika̱a̱na ti̱xin congregación (1 Corintios 5:11-13; 6:9, 10). Táki̱ʼva sa̱kuaʼayó yóʼo, tá káʼa̱nyó tu̱ʼun kini á ña̱ vatá á káʼa̱n ndi̱va̱ʼayó xíʼin inkana, va̱ása kivika kutáʼanyó xíʼin Jehová ni xíʼin inka na̱ yiví.

15. ¿Ndáa ki̱ʼva íyo tu̱ʼun ña̱ chíka̱a̱ ndee̱ inkana?

¹⁵ ¿Ndáa ki̱ʼva kúni̱ Jehová kuniñúʼuyó tu̱ʼun ña̱ káʼa̱nyó? Ni va̱ása káʼa̱n Biblia xíʼinyó xa̱ʼa̱ iin iin tu̱ʼun ña̱ xíniñúʼu ka̱ʼa̱nyó, soo káʼa̱nña xíʼinyó ña̱ ndiʼi tu̱ʼun ña̱ káʼa̱nyó “xíniñúʼu chika̱a̱ña ndee̱ inkana” (Efesios 4:29). Tu̱ʼun ña̱ chíka̱a̱ ndee̱ inkana xíniñúʼu vií kooña, to̱ʼó kooña ta ña̱ ndixa xíniñúʼu kooña. Jehová kúni̱ra tu̱ʼun ña̱ káʼa̱nyó ná taxiña ndee̱ ndaʼa̱ inkana ta ná chindeétáʼanña xíʼinna. Sana íxayo̱ʼvi̱ña xíʼinyó chi kamaníka va̱xi tu̱ʼun ña̱ va̱ása va̱ʼa yuʼúyó nu̱úka tu̱ʼun va̱ʼa (Tito 2:8). Ná kotoyó ndáa ki̱ʼva kivi chika̱a̱yó ndee̱ inkana xíʼin ña̱ káʼa̱nyó.

16, 17. a) ¿Nda̱chun xíniñúʼu ka̱ʼa̱nyó xíʼin inkana xa̱ʼa̱ ña̱ va̱ʼa ña̱ kéʼéna? b) ¿Ndáana kivi ka̱ʼa̱nyó xíʼin?

 ¹⁶ Jehová xíʼin ta̱ Jesús kútóonína ka̱ʼa̱nna xíʼinyó xa̱ʼa̱ ña̱ va̱ʼa kéʼéyó. Ta saátu miíyó kúni̱yó kundiku̱nyó yichi̱na (Mateo 3:17; 25:19-23; Juan 1:47). Ña̱ va̱ʼa chika̱a̱yó ndee̱ inkana xíniñúʼu na̱ʼa̱yó ña̱ xíʼin ndinuʼu-iniyó káʼa̱nyóña ta xíniñúʼu ndakani va̱ʼa xi̱níyó xa̱ʼa̱ ña̱ ka̱ʼa̱nyó xíʼinna. Proverbios 15:23 káchiña: “Iin tu̱ʼun ña̱ káʼa̱nna mií tiempo ña̱ xíniñúʼuyóña sákusi̱íña-iniyó”. Kúsi̱íní-iniyó tá iinna káʼa̱nna xíʼinyó xíʼin ndinuʼu-inina ña̱ va̱ʼaní ke̱ʼéyó iin chiñu á tá káʼa̱nna xíʼinyó ña̱ ndáyáʼviní chiñu ña̱ kéʼéyó nu̱úna (kaʼvi Mateo 7:12; koto nota 27).

¹⁷ Tá ndiʼi yichi̱ ná chika̱ún ndee̱ ña̱ kotoún ña̱ va̱ʼa kéʼé inkana, va̱ʼaní ni̱ʼún tu̱ʼun ña̱ ka̱ʼún xíʼinna xa̱ʼa̱ ña̱ va̱ʼa kéʼéna. Tá kúú tá xítoún iin na̱ congregación va̱ʼaní távána discursona á chíka̱a̱nína ndee̱ ña̱ va̱ʼa ndakuiinna ti̱xin reunión. Á iin ta̱ loʼo káʼa̱nra xa̱ʼa̱ ña̱ kándíxara Ndióxi̱ ti̱xin escuela á iin na̱ hermano na̱ xa̱a̱ chée nátúʼun ni̱ʼina xa̱ʼa̱ Ndióxi̱. Tu̱ʼun ña̱ ka̱ʼún xíʼinna sana mií ña̱yóʼo kúú ña̱ xíniñúʼuna. Saátu ta̱ ta̱a xíniñúʼu ka̱ʼa̱nra xíʼin ñá síʼíra ña̱ kúʼvi̱ní-inira xínirañá ta ndáyáʼviñá nu̱úra (Proverbios 31:10, 28). Táki̱ʼva íyo tú planta xíniñúʼunú ñu̱ʼu xíʼin ti̱kui̱í, saátu na̱ yiví xíniñúʼuna ña̱ ka̱ʼa̱n inkana xíʼinna ña̱ ndáyáʼvinína nu̱úna. Na̱ xíniñúʼu va̱ʼaka ka̱ʼa̱nyó xíʼin kúú na̱ va̱lí. Ña̱kán koto va̱ʼún ama kúú ña̱ kivi ka̱ʼún xíʼinna xa̱ʼa̱ ña̱ va̱ʼa ña̱ kéʼéna á xa̱ʼa̱ ña̱ chíka̱a̱nína ndee̱ xíʼin iin ña̱ʼa. Tá xíʼin ndinuʼu-iniyó káʼa̱nyó xíʼinna kivi chindeéyóna ña̱ ndakúka koo inina ta va̱ása yi̱ʼvína tasaá ndakundeékana keʼéna ña̱ va̱ʼa.

18, 19. a) ¿Nda̱chun xíniñúʼu taxiyó ndee̱ ndaʼa̱ inkana á ña̱ sándi̱koyó-inina? b) ¿Ndáaña kivi keʼéyó ña̱ va̱ʼa taxiyó ndee̱ ndaʼa̱ inkana á ña̱ sándi̱koyó-inina?

 ¹⁸ Tá sándi̱koyó-ini iinna á táxiyó ndee̱ ndaʼa̱na ndíku̱nyó yichi̱ Jehová. Ta̱kán ndíʼi̱ní-inira xa̱ʼa̱ “na̱ ndáʼvi” ta saátu xa̱ʼa̱ “na̱ ñúʼu tu̱ndóʼo” (Isaías 57:15). Kúni̱ra ña̱ ná chika̱a̱yó ndee̱ xíʼin táʼanyó ta ná sándi̱koyó-ini na̱ kúsuchí-ini (1 Tesalonicenses 5:11, 14). Ta̱kán xítora tá chíka̱a̱níyó ndee̱ ña̱ keʼéyó ña̱yóʼo ta kúsi̱íní-inira xíʼinña.

¹⁹ Sana xítoún ña̱ iin na̱ ku̱a̱ʼa̱n congregación náʼa̱ ña̱ nda̱kavaní-inina á náʼa̱ ña̱ kúsuchí-inina. ¿Ndáaña kivi keʼún ña̱ va̱ʼa chindeétáʼún xíʼinna? Sava va̱ása kivi  sakútaʼún tu̱ndóʼo ña̱ kúúmiína, soo kiviva na̱ʼún ña̱ ndíʼi̱-iniún xa̱ʼa̱na. Sana kivi taváún tiempo ña̱ ku̱ʼún koún xíʼinna iin rato loʼo. Kivi kaʼviún iin texto ña̱ Biblia nu̱úna ña̱ kivi taxi ndee̱ ndaʼa̱na á kivitu keʼún iin oración xíʼinna (Salmo 34:18; Mateo 10:29-31). Ka̱ʼa̱n xíʼinna ña̱ kúʼvi̱ní-ini na̱ hermano ña̱ congregación xíninana (1 Corintios 12:12-26; Santiago 5:14, 15). Ndiʼi ña̱ káʼún ná na̱ʼa̱ña ña̱ ndixa xíʼin ndinuʼu-iniún káʼún xíʼinna (kaʼvi Proverbios 12:25).

20, 21. ¿Nda̱saa xíniñúʼu koo iin consejo ña̱ va̱ʼa kǒo ixayo̱ʼvi̱ña xíʼin iinna ña̱ ndakiʼinnaña?

²⁰ Saátu kivi taxiyó ndee̱ ndaʼa̱ inkana tá táxiyó consejo ña̱ va̱ʼa ndaʼa̱na. Xa̱ʼa̱ ña̱ kúúyó na̱ yiví ku̱a̱chi,  ndiʼiyó xíniñúʼuyó ña̱ taxina consejo ndaʼa̱yó sava yichi̱. Proverbios 19:20 káchiña: “Kuniso̱ʼo consejo ta keʼé ña̱ káʼa̱nna, ña̱ va̱ʼa xa̱ún koún iin ta̱ ndíchi chí nu̱únínu”. Su̱ví iinlá na̱ anciano kúú na̱ kivi taxi consejo ndaʼa̱yó á ña̱ ka̱ʼa̱nna xíʼinyó xa̱ʼa̱ ña̱ va̱ása va̱ʼa kéʼéyó. Na̱ íyo se̱ʼe xíniñúʼu taxina yichi̱ nu̱ú se̱ʼena (Efesios 6:4). Ná hermana kivi taxiná consejo ndaʼa̱ táʼanná (Tito 2:3-5). Xa̱ʼa̱ ña̱ kúʼvi̱-iniyó xíniyó na̱ ñaniyó á ku̱ʼvayó xíniñúʼu kiʼinyó kuenta tá taxiyó consejo ndaʼa̱na ña̱ kǒo sandákavayó-inina xíʼin ña̱ ka̱ʼa̱nyó. ¿Ndáaña kivi keʼéyó?

²¹ Sana ndákaʼún tá ta̱xi iinna iin consejo ndaʼún ta va̱ása ní ixayo̱ʼvi̱ña xíʼún ndakiʼún consejo yóʼo. ¿Nda̱chun va̱ása ní ixayo̱ʼvi̱ña xíʼún? Sana ki̱ʼún kuenta ña̱ ta̱xinaña ndaʼún xa̱ʼa̱ ña̱ ndixa ndíʼi̱-inina xa̱ʼún. Á xa̱ʼa̱ ña̱ kǒo nínda̱ʼyi̱na nu̱ún ta viíní ni̱ka̱ʼa̱nna xíʼún (Colosenses 4:6). Ta sana consejo ña̱ ta̱xina ndaʼún nu̱ú Biblia ta̱vánaña (2 Timoteo 3:16). Ni ná kuniñúʼuyó Biblia á ni ná kǒo kuniñúʼuyóña tá taxiyó consejo ndaʼa̱ iinna, tu̱ʼun ña̱ ka̱ʼa̱nyó xíʼinna nu̱ú Biblia xíniñúʼu taváyóña. Ni iinna va̱ása xíniñúʼu ixandúxana xíʼin inkana ña̱ keʼéna ña̱ káʼa̱nna á ña̱ nasamana ña̱ káʼa̱n Biblia ña̱ va̱ʼa na̱ʼa̱na ña̱ ndixa kúú ña̱ káʼa̱nna. Tá ná ndakaʼún ndáa ki̱ʼva ta̱xina consejo ndaʼún, ña̱yóʼo chindeéña yóʼó ña̱ va̱ʼa taxiún consejo ndaʼa̱ inkana.

22. ¿Ndáa ki̱ʼva kúni̱ún kuniñúʼún tu̱ʼun ña̱ káʼún?

²² Jehová kúú ta̱ ta̱xi tu̱ʼunyó ña̱ káʼa̱nyó. Xa̱ʼa̱ ña̱ kúʼvi̱-iniyó xíniyóra viíní ná kuniñúʼuyóña. Ná ndakaʼányó chi tu̱ʼun ña̱ káʼa̱nyó kivi chika̱a̱ña ndee̱ iinna á kivi sandákavaña-inina. Ña̱kán ná chika̱a̱níyó ndee̱ ña̱ ndasandakúyó-ini inkana á ña̱ taxiyó ndee̱ ndaʼa̱na.