1-3. a) ¿Nda̱chun kíʼinní savana kuenta xíʼin se̱ʼena ña̱ limpio ná koona? b) ¿Nda̱chun kúni̱ Jehová ña̱ limpio koo na̱ káchíñu nu̱úra?

NDAKANIXI̱NÍ xa̱ʼa̱ iin nána ñá ndásavií iin ta̱ loʼo se̱ʼéñá ña̱ ku̱ʼu̱nra escuela. Ñákán kíʼinñá kuenta xíʼinra á xa̱a̱ chi̱chira, á limpio íyo ti̱ko̱to̱ra ta á vií íyoña. Chi ña̱yóʼo chindeétáʼanña xíʼinra ña̱ va̱ása kiʼin kue̱ʼe̱ra ta inkatuna xítona ña̱ va̱ʼaní ndáa na̱ yivárara.

² Jehová kúú yiváyó ta kúni̱ra limpio ná kooyó (Salmo 18:26). Ta̱kán kúnda̱a̱-inira ña̱ va̱ʼa miíyó  kúúña. Saátu tá kúúyó na̱ yiví limpio ndásakáʼnuyó ki̱vi̱ra (Ezequiel 36:22; kaʼvi 1 Pedro 2:12).

³ Soo ¿ndáaña kúni̱ kachi ña̱ kooyó na̱ yiví limpio, ta ndáa ki̱ʼva chíndeéña miíyó? Tá ná kixáʼayó kaʼviyó xa̱ʼa̱ ña̱yóʼo, sana kunda̱a̱-iniyó ña̱ xíniñúʼu nasamayó sava ña̱ kéʼéyó.

4, 5. a) ¿Nda̱chun xíniñúʼu limpio kooyó? b) ¿Ndáaña sákuaʼayó xíʼin ña̱ i̱xava̱ʼa Jehová?

⁴ Jehová va̱ʼaní yichi̱ táxira nu̱úyó ña̱ limpio kooyó (Levítico 11:44, 45). Xa̱ʼa̱ ña̱ kúni̱yó kundiku̱nyó yichi̱ Ndióxi̱ kúú ña̱ kúni̱yó limpio kooyó (Efesios 5:1).

⁵ Ña̱ʼa ña̱ i̱xava̱ʼa Jehová náʼa̱ña nu̱úyó ndáaña ndákanixi̱níra xa̱ʼa̱ ña̱ limpio kooyó. Jehová viíní i̱xava̱ʼara ñuʼú yóʼo ña̱ va̱ʼa limpio kooña kundooyó nda̱a̱ táki̱ʼva íyo iin veʼe ña̱ limpio. Tá kúú, tá ndíʼi kóon sa̱vi̱ ta kána ñu̱ʼu á ña̱ ka̱ndii, ti̱kui̱í ndúura yo̱kó niʼní, ta yo̱kó yóʼo ndáaña ku̱a̱ʼa̱nña ta ndúuña vi̱kó ta ña̱yóʼo sákoonña sa̱vi̱, ta ña̱yóʼo kúú ña̱ kúu ndiʼi yichi̱. Nu̱ú ñuʼú yóʼo íyotu ti̱kuxí válí tí sándiʼi-xa̱ʼa̱ ña̱ʼa ña̱ kivi tavá kue̱ʼe̱ xíʼinyó (Jeremías 10:12; Romanos 1:20).

6, 7. ¿Nda̱saa ni̱na̱ʼa̱ ley ña̱ nda̱kiʼin ta̱ Moisés ndáaña xi̱ndakanixi̱ní Jehová xa̱ʼa̱ ña̱ limpio kooyó?

⁶ Ley ña̱ ta̱xi Jehová ndaʼa̱ ta̱ Moisés chíndeéña miíyó ña̱ kunda̱a̱-iniyó ña̱ ndáyáʼviní limpio kooyó nu̱úra. Ná ka̱ʼa̱nyó xa̱ʼa̱ iinña. Ña̱ va̱ʼa kandíxa Jehová ndasakáʼnu na̱ ñuu Israel miíra, xi̱xiniñúʼu limpio koona.  Tá xi̱kiʼvi ta̱ su̱tu̱ káʼnu ini ña̱ santísimo xi̱xiniñúʼu kuchira u̱vi̱ yichi̱ (Levítico 16:4, 23, 24). Ta na̱ inka su̱tu̱ xi̱xiniñúʼu ndakatana ndaʼa̱na xíʼin xa̱ʼa̱na tá kúma̱níka taxina ña̱ʼa ndaʼa̱ Jehová (Éxodo 30:17-21; 2 Crónicas 4:6). Ta sava yichi̱, tá va̱ása níxikeʼéna ña̱yóʼo, castigo ña̱ xi̱ndakiʼinna kúú ña̱ kuvina xa̱ʼa̱ ña̱ va̱ása limpiona (Levítico 15:31; Números 19:17-20).

⁷ ¿Ndáa ki̱ʼva íyotu tiempo vitin? Ley ña̱ ta̱xi Jehová ndaʼa̱ ta̱ Moisés ku̱a̱ʼání ña̱ʼa sánáʼa̱ña miíyó xa̱ʼa̱ra. Náʼa̱ káxiña ña̱ xi̱kuni̱ra limpio koo na̱ xi̱ndasakáʼnu-ñaʼá. Ña̱ ndákanixi̱ní Jehová xa̱ʼa̱ ña̱yóʼo ta̱ʼán nasamaña (Malaquías 3:6). Ta̱yóʼo kúni̱ra limpio koo miíyó na̱ ndásakáʼnu-ñaʼá tiempo vitin (Santiago 1:27).

8. ¿Ndáaña xíniñúʼu limpio kooyó xíʼin?

⁸ Ña̱ va̱ʼa limpio kooyó nu̱ú Jehová su̱ví kuití ti̱ko̱to̱yó á veʼeyó á miíyó xíniñúʼu limpio koo. Chi saátu xíniñúʼu koo ndiʼi ña̱ kéʼéyó, ki̱ʼva ña̱ ndásakáʼnuyó Jehová xíʼin ndiʼi ña̱ ndákanixi̱níyó.

9, 10. ¿Ndáaña xíniñúʼu keʼéyó ña̱ va̱ʼa limpio koo ña̱ ndásakáʼnuyó Jehová?

⁹ Ki̱ʼva ña̱ ndásakáʼnuyó Ndióxi̱. Va̱ása va̱ʼa kutáʼanyó xíʼin ni iin veʼe-ñu̱ʼu vatá. Tá xi̱ndoo na̱ ñuu Israel ti̱xin ñuu Babilonia, ku̱a̱ʼání na̱ yiví kán xi̱ndasakáʼnuna ndióxi̱ vatá ta xi̱keʼéna ña̱ kini tá xi̱ndasakáʼnunaña. Ta̱ Isaías ni̱ka̱ʼa̱nra ña̱ ndikóna ñuuna ta kixáʼa tukuna ndasakáʼnuna Jehová táki̱ʼva kúni̱ miíra. Jehová ni̱ka̱ʼa̱nra xíʼinna: “Keendó ti̱xinña,  kǒo tiinndó ña̱ yaku̱a̱; keendó ti̱xinña, limpio koondó”. Va̱ása kivi ndasakána ña̱ sánáʼa̱ na̱ veʼe-ñu̱ʼu vatá, ni costumbrena ni ña̱ kéʼéna xíʼin ña̱ ndásakáʼnuna Jehová (Isaías 52:11).

¹⁰ Tiempo vitin na̱ ndásakáʼnu Jehová va̱ása kéʼéna ña̱ sánáʼa̱ na̱ veʼe-ñu̱ʼu vatá (kaʼvi 1 Corintios 10:21). Iníísaá ñuyǐví, ku̱a̱ʼání ña̱ kándíxa na̱ yiví, ku̱a̱ʼání ña̱ kéʼéna ta ku̱a̱ʼání costumbre kúúmiína ta ndiʼi ña̱yóʼo ti̱xin ña̱ veʼe-ñu̱ʼu vatá va̱xiña. Ku̱a̱ʼání na̱ yiví kándíxana tá xíʼi̱yó kíta níma̱yó, ta ku̱a̱ʼáníka costumbre kúúmiína (Eclesiastés 9:5, 6, 10). Miíyó na̱ ndásakáʼnu Ndióxi̱ xíniñúʼu kuxíkayó nu̱ú ndiʼi ña̱yóʼo. Sava na̱ táʼanyó kivi ixandúxana xíʼinyó ña̱ keʼéyó táki̱ʼva kéʼéna. Soo va̱ása taxiyó sáxi̱nu̱na-iniyó chi kúni̱yó limpio kooyó nu̱ú Jehová (Hechos 5:29).

11. ¿Ndáaña xíniñúʼu keʼéyó ña̱ va̱ʼa limpio koo ña̱ kéʼéyó?

¹¹ Limpio ná koo ña̱ kéʼéyó. Ña̱ va̱ʼa limpio kooyó nu̱ú Jehová, kǒo ku̱su̱nyó xíʼin na̱ kǒo kúú ñá síʼíyó á yiíyó (kaʼvi Efesios 5:5). Jehová xíniñúʼura Biblia ña̱ káʼa̱nra xíʼinyó ña̱ ná kǒo keʼéyó ña̱ kini. Ta káxiní káʼa̱nra na̱ yiví na̱ kéʼé ña̱ kini ta kǒo sandákoonaña kǒo ki̱ʼvina Reino Ndióxi̱ (1 Corintios 6:9, 10, 18; koto nota 22).

12, 13. ¿Nda̱chun xíniñúʼu limpio koo ña̱ ndákanixi̱níyó?

¹² Limpio ná koo ña̱ ndákanixi̱níyó. Ku̱a̱ʼání yichi̱, ña̱ ndákanixi̱níyó xáa̱yó kéʼéyóña (Mateo 5:28; 15:18, 19). Tá ndákanixi̱níyó xa̱ʼa̱ ña̱ va̱ʼa, ña̱ va̱ʼa keʼéyó. Ña̱ nda̱a̱ kúúña, xa̱ʼa̱ ña̱ kúúyó na̱ yiví ku̱a̱chi, sava va̱ása va̱ʼa ña̱ ndákanixi̱níyó. Soo tá ndóʼoyó saá, ndi̱ku̱n kama ná taváyóña xi̱níyó. Chi tá ná kǒo  keʼéyó saá, tá ná ya̱ʼa tiempo níma̱yó kuyaku̱a̱ña ta sana kixáʼayó kuni̱yó keʼéyó ña̱ xa̱a̱ ndákanixi̱níyó xa̱ʼa̱. Ña̱ va̱ʼa ná kǒo ndoʼoyó saá, xíniñúʼu ndakanixi̱níyó xa̱ʼa̱ ña̱ va̱ʼa (kaʼvi Filipenses 4:8). Xa̱ʼa̱ ña̱yóʼo va̱ása xítonde̱ʼéyó á sísikíyó xíʼin ña̱ʼa ña̱ kúúmií ña̱ kini á nu̱ú xáʼní-táʼanna. Viíní ndáka̱xinyó tutu ña̱ káʼviyó, ña̱ xítonde̱ʼéyó xíʼin ña̱ nátúʼunyó xa̱ʼa̱ (Salmo 19:8, 9).

¹³ Ña̱ va̱ʼa kuʼvi̱ka-iniyó kuniyó Ndióxi̱, ndiʼi ña̱ kéʼéyó xíniñúʼu limpio kooña, ki̱ʼva ña̱ ndásakáʼnuyóra xíʼin ña̱ ndákanixi̱níyó. Soo vitin sakuaʼayó, Jehová kúni̱ra ña̱ limpio kooyó veʼeyó.

14. ¿Nda̱chun ndáyáʼviní ña̱ limpio kooyó?

¹⁴ Ña̱ limpio íyoyó chíndeéña miíyó ta saátu na̱ ndóo yatin xíʼinyó. Va̱ʼa kúniyó, ta savakana nda̱a̱ kútóona kutáʼanna xíʼinyó. Soo íyo iin xa̱ʼa̱ mií ña̱ ndáyáʼvi va̱ʼaka ña̱ kéʼéyó ña̱yóʼo, chi saá ndásakáʼnuyó Jehová. Ndakanixi̱ní xa̱ʼa̱ ña̱yóʼo, ¿ndáaña ndakanixi̱níún tá ná kuniún ña̱ ndiʼi tiempo íyo yaku̱a̱ iin ta̱ loʼo? Sana va̱ása va̱ʼa ndakanixi̱níún xa̱ʼa̱ na̱ yivára. Saátu miíyó, tá va̱ása íyo limpioyó ta ni kǒo ndásaviíyó miíyó, sana va̱ása va̱ʼa ka̱ʼa̱nna xa̱ʼa̱ Jehová, chi ta̱kán kúú yiváyó. Ta̱ Pablo ni̱ka̱ʼa̱nra: “Kǒo kúni̱yó sándakavayó-ini nda̱a̱ ni iinna, ña̱ va̱ʼa ná kǒo ka̱ʼa̱nna ña̱ va̱ása va̱ʼa xa̱ʼa̱ ña̱ kéʼéyó nu̱ú Ndióxi̱; chi ndákundeéyó náʼa̱yó ña̱ kúúyó na̱ káchíñu nu̱ú Ndióxi̱” (2 Corintios 6:3, 4).

15, 16. ¿Ndáaña xíniñúʼu keʼéyó ña̱ va̱ʼa limpio kooyó?

 ¹⁵ Ku̱ñuyó xíʼin ti̱ko̱to̱ ña̱ ndíxiyó. Ndiʼi ki̱vi̱ xíniñúʼu limpio kooyó. Tá ña̱ kívi kúúña, ndiʼi ki̱vi̱ xíniñúʼu kuchiyó. Saátu xíniñúʼu ndakatayó ndaʼa̱yó xíʼin na̱má tá xa̱a̱ keʼéyó ña̱ʼa kuxuyó, á tá xa̱a̱ kuxuyó, á tá ni̱xa̱ʼa̱nyó baño á tá ti̱inyó iin ña̱ʼa yaku̱a̱. Sana ndákanixi̱níyó ña̱ ndakatayó ndaʼa̱yó su̱ví ña̱ ndáyáʼviníví kúú ña̱yóʼo, soo xíniñúʼu keʼéyóña ña̱ va̱ʼa ná kǒo kaku kue̱ʼe̱ xíʼinyó. Soo tá kǒo baño á drenaje ñuu nu̱ú íyoyó kivi keʼéyó nda̱a̱ táki̱ʼva xi̱keʼé na̱ ñuu Israel, chi xi̱xa̱ʼa̱n xíkana nu̱ú íyo veʼena á nu̱ú távána ti̱kui̱í tasaá xi̱kaanna iin ya̱vi̱ ta kán xi̱taánnaña (Deuteronomio 23:12, 13).

 ¹⁶ Va̱ása xíniñúʼu yaʼviní koo ti̱ko̱to̱yó, ni ña̱ liviní kooña á moda ña̱ sa̱kán kána kooña. Soo xíniñúʼu limpio kooña ta vií ná kuna̱ʼa̱ña (kaʼvi 1 Timoteo 2:9, 10). Viíní ndáka̱xinyó ti̱ko̱to̱ ña̱ kundixiyó chi kúni̱yó ndasakáʼnuyó Jehová (Tito 2:10).

17. ¿Nda̱chun xíniñúʼu limpio koo veʼeyó xíʼin yatin nu̱ú ndóoyó?

¹⁷ Veʼeyó xíʼin yatin nu̱ú ndóoyó. Nda̱a̱ ndáaka ñuu ndóoyó, xíniñúʼu limpio koo veʼeyó. Saátu kíʼinyó kuenta ña̱ limpio ná koo carroyó, motoyó, bicicletayó, víʼika tá ku̱a̱ʼa̱nyó reunión á tá xíkayó nátúʼunyó xa̱ʼa̱ Ndióxi̱. Chi tá xíkayó nátúʼunyó xíʼin na̱ yiví káʼa̱nyó xíʼinna xa̱ʼa̱ ña̱ liviní koo nu̱ú ñuʼú yóʼo ta limpio kooña (Lucas 23:43; Revelación [Apocalipsis] 11:18). Veʼe nu̱ú ndóoyó náʼa̱ña á xa̱a̱ íyo tu̱ʼvayó ña̱ kundooyó ti̱xin ñuyǐví xa̱á.

18. ¿Nda̱chun kúni̱yó ña̱ limpio koo nu̱ú ndátakayó sákuaʼayó xa̱ʼa̱ Ndióxi̱?

¹⁸ Nu̱ú ndásakáʼnuyó Ndióxi̱. Náʼa̱yó ña̱ ndáyáʼvi ña̱ limpio kooyó tá kiʼinyó kuenta xíʼin veʼe nu̱ú ndákutáʼanyó ña̱ sakuaʼayó xa̱ʼa̱ Jehová á tá ku̱a̱ʼa̱nyó asamblea. Ku̱a̱ʼání na̱ yiví tá ku̱a̱ʼa̱nna yichi̱ nu̱ú xíʼinyó veʼe nu̱ú ndásakáʼnuyó Jehová, ndákanda̱ní-inina chi limpioní íyoña. Ta ña̱yóʼo ndásakáʼnuña ki̱vi̱ Jehová. Ndiʼiyó xíniñúʼu kiʼinyó kuenta xíʼinña saátu ña̱ limpio ná kooña (2 Crónicas 34:10).

19. ¿Ndáaña kúú ña̱ kǒo xíniñúʼu keʼéyó?

¹⁹ Ni va̱ása káʼa̱n káxi Biblia xíʼinyó xa̱ʼa̱ ndiʼi ña̱ xíniñúʼu sandákooyó, soo táxiña yichi̱ nu̱úyó ña̱  va̱ʼa kunda̱a̱-iniyó ndáaña ndákanixi̱ní Jehová xa̱ʼa̱ña. Ta̱kán va̱ása kúni̱ra kaʼmiyó, ni ña̱ koʼoyó ku̱a̱ʼání ndixi ni ña̱ kuniñúʼuyó droga. Tá kúúyó migo Ndióxi̱ kǒo keʼéyó ña̱yóʼo, chi ndáyáʼvi ña̱ tákuyó nu̱úyó. Chi ndiʼi ña̱yóʼo va̱ása ku̱a̱ʼá tiempo taxiña kutakuyó ta táváña kue̱ʼe̱ xíʼinyó saátu xíʼin na̱ ndóo yatin xíʼinyó. Ku̱a̱ʼání na̱ yiví kúni̱na sandákoonaña chi táváña kue̱ʼe̱ xíʼinna. Soo na̱ kúú migo Ndióxi̱ sándakoonaña chi kúʼvi̱-inina xínina Jehová. Iin ñá loʼo ka̱chiñá: “Jehová kúú ta̱ chi̱ndeétáʼan xíʼi̱n ña̱ sa̱ndákoi̱ ndiʼi ña̱ xi̱keʼíi̱”. Ta ni̱ka̱ʼa̱nkañá: “Tá xíʼin ndee̱ miíi̱ níxikuuña sana va̱ása kuchiñuvíi̱ sandákoi̱ña”. Ná sakuaʼayó xa̱ʼa̱ u̱ʼu̱n texto ña̱ chindeé miíyó ña̱ sandákooyó ña̱ yaku̱a̱.

20, 21. ¿Ndáa ña̱ʼa kúni̱ Jehová sandákooyó?

²⁰ “Xa̱ʼa̱ ña̱ xa̱a̱ kúúmiíyó ndiʼi ña̱ ki̱ndo̱o Ndióxi̱ xíʼinyó, ná kǒo keʼéyó ña̱ kivi sákuyaku̱a̱ xi̱níyó xíʼin ku̱ñuyó, ta ná ndakatayó miíyó nu̱ú Ndióxi̱” (2 Corintios 7:1). Jehová kúni̱ra ná sandákooyó ndiʼi ña̱ yaku̱a̱ ña̱ kivi sándiʼi-xa̱ʼa̱ ña̱ ndákanixi̱níyó á ku̱ñuyó.

²¹ Iin xa̱ʼa̱ ña̱ ndáyáʼviní limpio kooyó kúú ña̱ káʼa̱n 2 Corintios 6:17, 18 xa̱ʼa̱, chi yóʼo káʼa̱n Jehová xíʼinyó: “Kǒo keʼéndó ña̱ kini” á ña̱ yaku̱a̱. Tándi̱ʼi káʼa̱ntura ña̱yóʼo: “Yi̱ʼi̱ koo yivándó, ta ndóʼó koondó se̱ʼei̱”. Nda̱a̱ táki̱ʼva kúʼvi̱-ini na̱ íyo se̱ʼe xínina se̱ʼena, saátu Jehová kuʼvi̱-inira kunira miíyó tá ná kǒo keʼéyó ña̱ yaku̱a̱.

22-25. ¿Ndáa texto kúú ña̱ chindeé miíyó ña̱ kǒo keʼéyó ña̱ yaku̱a̱?

²² “Xíniñúʼu kuʼvi̱-iniún kuniún Jehová xíʼin  ndiʼi níma̱ún, xíʼin ndiʼi ña̱ tákún ta xíʼin ndiʼi xi̱níún” (Mateo 22:37). Ña̱yóʼo kúú ley ña̱ ndáyáʼvi va̱ʼaka (Mateo 22:38). Xíniñúʼu kuʼvi̱-iniyó kuniyó Jehová xíʼin ndiʼi níma̱yó. Soo va̱ása kivi keʼéyó ña̱yóʼo tá xíniñúʼuyó ña̱ xáʼní miíyó á ña̱ sándiʼi-xa̱ʼa̱ xi̱níyó. Ña̱ xíniñúʼu keʼéyó kúúña chika̱a̱níyó ndee̱ ña̱ na̱ʼa̱yó nu̱ú Jehová ña̱ ndáyáʼviní ña̱ tákuyó nu̱úyó chi miíra ta̱xiña ndaʼa̱yó.

²³ “[Jehová] táxi ña̱ táku ndiʼi na̱ yiví xíʼin ndiʼi ña̱ʼa ña̱ i̱xava̱ʼara” (Hechos 17:24, 25). Tá iin na̱ migoún ná taxina iin regalo ndaʼún, ¿á sákanaúnña á sandiʼi-xa̱ʼúnña? Ña̱ tákuyó táki̱ʼva íyo iin regalo ña̱ ta̱xi Jehová ndaʼa̱yó saá íyoña. Xa̱ʼa̱ ña̱ ndáyáʼviníña nu̱úyó, kúni̱yó kuniñúʼuyóña ña̱ ndasakáʼnuyó Jehová (Salmo 36:9).

²⁴ “Xíniñúʼu kuʼvi̱-iniún kuniún ñanitáʼún táki̱ʼva kúʼvi̱-iniún xíniún miíún” (Mateo 22:39). Ndiʼi ña̱ʼa yaku̱a̱ su̱ví mií kuitíyó táváña kue̱ʼe̱ xíʼin. Távátuña kue̱ʼe̱ xíʼin na̱ ndóo yatin xíʼinyó, sava yichi̱ mií na̱ kúni̱kayó xíniyó. Tá iinna íyona xíʼin na̱ yiví na̱ xáʼmi, kivi kiʼin kue̱ʼe̱na xa̱ʼa̱ ña̱ ndákiʼinna xi̱ko̱ña. Tá ná sandákooyóña, na̱ʼa̱yó ña̱ kúʼvi̱-iniyó xíniyó inkana (1 Juan 4:20, 21).

²⁵ “Ka̱ʼa̱n xíʼinna ná kǒo sandákoona keʼéna ña̱ káʼa̱n na̱ chíñu” (Tito 3:1). Íyo ku̱a̱ʼání ñuu nu̱ú va̱ása kívi kuumiína droga á ña̱ kuniñúʼunaña. Jehová káʼa̱nra xíʼinyó ña̱ ná kuniso̱ʼoyó ña̱ káʼa̱n na̱ chiñu xíʼinyó, ña̱kán kándíxayó ley ña̱ táxina (Romanos 13:1).

26. a) ¿Ndáaña xíniñúʼu keʼéyó ña̱ va̱ʼa kooyó migo Jehová? b) ¿Nda̱chun iin ña̱ va̱ʼaní kúúña nu̱ú Ndióxi̱ tá limpio ná kooyó?

 ²⁶ Sana xa̱a̱ na̱kunda̱a̱-iniyó ña̱ xíniñúʼu nasamayó sava ña̱ kéʼéyó ña̱ va̱ʼa xa̱a̱yó kooyó migo Jehová. Tá saá íyoña, ndi̱ku̱n xíniñúʼu nasamayó ña̱ kéʼéyó. Sava íxayo̱ʼvi̱ña xíʼinyó keʼéyóña. Soo kuchiñuvayó keʼéyóña chi Jehová káʼa̱nra ña̱ chindeétáʼanra xíʼinyó. Káchira: “Yi̱ʼi̱, Jehová, kúú Ndióxi̱ miíún, yi̱ʼi̱ kúú ta̱ sánáʼa̱ yóʼó xa̱ʼa̱ ña̱ va̱ʼa miíún, yi̱ʼi̱ kúú ta̱ káʼa̱n xíʼún ndáa yichi̱ xíniñúʼu ku̱ʼún” (Isaías 48:17). Tá ná chika̱a̱níyó ndee̱ ña̱ kǒo keʼéyó ña̱ yaku̱a̱, saá ndasakáʼnuyó ki̱vi̱ Jehová.