1, 2. a) ¿Ndáaña ta̱xi Jehová ndaʼa̱yó? b) ¿Nda̱saa chíndeétáʼan Jehová xíʼinyó ña̱ vií ndaka̱xinyó ña̱ keʼéyó?

JEHOVÁ kúú ta̱ ta̱xi ña̱ tákuyó (Génesis 1:27). Ta kúni̱ra ña̱ viíní ná kooyó. Ña̱kán ta̱xira tu̱ʼunra ndaʼa̱yó ña̱ va̱ʼa ndaka̱xin viíyó ña̱ keʼéyó. Xíniñúʼu kuniñúʼuyóña ña̱ va̱ʼa kunda̱a̱ va̱ʼa iniyó xa̱ʼa̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa (Hebreos 5:14). Tá xíniñúʼuyóña, táxiyó sánáʼa̱ Jehová miíyó ña̱ ndakanixi̱níyó táki̱ʼva kúni̱ miíra. Tá kéʼéyó ña̱ káʼa̱n tu̱ʼunra, ta kíxáʼa xítoyó ña̱ va̱ʼaka ndóoyó, saá kúnda̱a̱-iniyó ña̱ ndáyáʼviníña.

² Sava íxayo̱ʼvi̱ña xíʼinyó, chi ku̱a̱ʼání yichi̱ yáʼayó nu̱ú sava ña̱ʼa ña̱ kǒo káʼa̱n káxi Biblia xa̱ʼa̱ á va̱ʼa keʼéyóña á va̱ása va̱ʼa. Tá kúú tá ku̱a̱ʼa̱nyó nu̱ú na̱ doctor sana ka̱ʼa̱nna xíʼinyó ña̱ kuniñúʼuyó ni̱i̱, soo miíyó xíniñúʼu ndaka̱xin ndáaña keʼéyó. ¿Ndáa ki̱ʼva ndaka̱xinyó keʼéyó ña̱ kútóo Jehová? Nu̱ú Biblia ndani̱ʼíyó texto ña̱ táxi yichi̱ nu̱úyó ña̱ va̱ʼa kunda̱a̱-iniyó ndáa ki̱ʼva ndákanixi̱ní Jehová xa̱ʼa̱ ña̱ tákuyó á xa̱ʼa̱ ni̱i̱. Tá ná kunda̱a̱-iniyó xa̱ʼa̱ña vií va̱ʼa ndaka̱xinyó ña̱ keʼéyó ta kǒo ña̱ sandi̱ʼi̱-iniyó (Proverbios 2:6-11). Ná ka̱ʼa̱nyó xa̱ʼa̱ sava texto yóʼo.

3, 4. a) ¿Ndáaña ndákanixi̱ní Ndióxi̱ xa̱ʼa̱ ni̱i̱? b) ¿Nda̱chun ndáyáʼviní ni̱i̱?

³ Ña̱ Biblia sánáʼa̱ña miíyó, nu̱ú Jehová ndáyáʼviní ni̱i̱ chi ña̱yóʼo táxi ña̱ tákuyó. Tándi̱ʼi xa̱ʼní ta̱ Caín ñanira ta̱ Abel, Jehová ni̱ka̱ʼa̱nra xíʼinra: “Ni̱i̱ ta̱ ñaniún nda̱a̱ nu̱ú ñuʼú káʼa̱n ku̱a̱chiña xíʼi̱n” (Génesis 4:10). Ni̱i̱ ta̱ Abel kúú ña̱ xi̱taxi ña̱ tákura, tá ni̱ka̱ʼa̱n Jehová xa̱ʼa̱ ni̱i̱ ta̱ Abel xa̱ʼa̱ ña̱ tákuvara ni̱ka̱ʼa̱nra.

⁴ Tándi̱ʼi ko̱on sa̱vi̱ kini, Jehová ni̱ka̱ʼa̱nra xíʼin ta̱ Noé xíʼin na̱ veʼera ña̱ kivi kuxuna ku̱ñu. Soo íyo iin ley ña̱ káxiní káʼa̱n ta̱xira ndaʼa̱na: “Va̱ʼava kuxundó ku̱ñu, soo ni̱i̱, kǒo kívi kuxundóña” (Génesis 9:4, nota). Ndiʼi na̱ se̱ʼe ta̱ Noé xi̱xiniñúʼu kuniso̱ʼona ley yóʼo, ta saátu miíyó na̱ ndóo tiempo vitin. Xíʼin ña̱yóʼo kúnda̱a̱-iniyó, nu̱ú Jehová ndáyáʼviní ni̱i̱ chi ña̱yóʼo táxi ña̱ tákuyó. Saátu xíniñúʼu kooña nu̱ú miíyó (Salmo 36:9).

5, 6. ¿Nda̱saa ni̱na̱ʼa̱ ley ña̱ ta̱xi Jehová ndaʼa̱ ta̱ Moisés ña̱ ndákanixi̱níra xa̱ʼa̱ ña̱ tákuyó xíʼin xa̱ʼa̱ ni̱i̱?

⁵ Nu̱ú ley ña̱ ta̱xi Jehová ndaʼa̱ ta̱ Moisés, ni̱ka̱ʼa̱nra: “Ni nda̱a̱ ndáaka na̱ ta̱a [...] tá ná kuxuna ni̱i̱, yi̱ʼi̱ sa̱íi̱ xíʼin na̱ xíxi ni̱i̱, ta sándiʼi-xa̱ʼíi̱na ti̱xin ñuundó. Saáchi ni̱i̱ kúú ña̱ táxi ña̱ tákundó” (Levítico 17:10, 11).

⁶ Ley ña̱ ta̱xi Ndióxi̱ ndaʼa̱ ta̱ Moisés káchiña, tá iinna xáʼnína kití kuxuna, xíniñúʼu katana ni̱i̱rí nu̱ú ñuʼú. Xíʼin ña̱yóʼo náʼa̱na ña̱ táxina ña̱ táku tí kití yóʼo ndaʼa̱ Jehová (Deuteronomio 12:16; Ezequiel 18:4). Soo Jehová va̱ása níka̱ʼa̱nra xíʼinna ña̱ tavána ndiʼiví  ni̱i̱rí ta saáví kuxunarí. Tá vií va̱ʼa ná tavána ni̱i̱rí, kiviva kuxuna ku̱ñurí ta kǒoka ña̱ sandi̱ʼi̱-inina. Tá vií kéʼéna xíʼin ni̱i̱ tí kití yóʼo náʼa̱na ña̱ íxato̱ʼóna Jehová, chi ta̱yóʼo kúú ta̱ ta̱xi ña̱ tákurí. Ña̱ ley káchikaña tá iinna kíʼvina ku̱a̱chi xíniñúʼu kaʼnína kití ña̱ va̱ʼa ndoo ku̱a̱china (koto nota 19 xíʼin 20).

7. ¿Ndáa ki̱ʼva ni̱na̱ʼa̱ ta̱ David ña̱ xi̱ndayáʼviní ni̱i̱ nu̱úra?

⁷ Inka ña̱ chíndeétáʼan xíʼinyó ña̱ kunda̱a̱-iniyó ña̱ ndáyáʼviní ni̱i̱ kúú ña̱ i̱xaa ta̱ David tá ni̱xa̱ʼa̱nra ka̱nitáʼanra xíʼin na̱ filisteo. Na̱ ta̱a na̱ kítáʼan xíʼinra xi̱nina ña̱ yíchi̱níra ti̱kui̱í, tasaá ni̱xa̱ʼa̱nna nu̱ú ñúʼu na̱ kánitáʼanna xíʼin, nda̱a̱ si̱lóʼo kuvina xa̱ʼa̱ ña̱ ni̱xa̱ʼa̱nna xa̱ʼa̱ ti̱kui̱í koʼora. Soo tá ki̱xaa̱na xíʼinrá va̱ása níxiinra koʼorará, ta xa̱tarará nu̱ú ñuʼú. Ta káchira: “Ni loʼo va̱ása keʼíi̱ ña̱yóʼo Jehová. ¿Nda̱chun koʼi̱ ti̱kui̱í yóʼo ta nda̱a̱ táki̱ʼva íyo ni̱i̱ na̱ ta̱a yóʼo saá íyorá?”. Ta̱ David xi̱kunda̱a̱-inira ña̱ tákuyó xíʼin ña̱ ni̱i̱ ndáyáʼviníña nu̱ú Jehová (2 Samuel 23:15-17).

8, 9. ¿Ndáa ki̱ʼva ndákanixi̱níyó xa̱ʼa̱ ni̱i̱?

⁸ Tá ni̱xi̱ʼi̱ ta̱ Jesús, na̱ ndásakáʼnu Ndióxi̱ va̱ása níxiniñúʼu kaʼníkana kití xa̱ʼa̱ ku̱a̱china, soo xi̱niñúʼu kunda̱a̱ va̱ʼa inina xa̱ʼa̱ ni̱i̱. Chiñu ña̱ xa̱ʼnda Jehová ña̱ kǒo kuniñúʼuna ni̱i̱, kúú táʼan savaka ley ña̱ sa̱ndákoora ndaʼa̱na ña̱ xi̱xiniñúʼu kandíxakana. Xi̱xiniñúʼu kandíxana ña̱yóʼo, nda̱a̱ táki̱ʼva kándíxana ña̱ kǒo keʼéna ña̱ kini xíʼin inkana á ña̱ ndasakáʼnuna ndióxi̱ vatá (Hechos 15:28, 29).

⁹ Ta saátu xíniñúʼu keʼé miíyó tiempo vitin. Xíni̱yó Jehová kúú ta̱ táxi ña̱ tákuyó xíʼin ndiʼika ña̱ʼa ña̱ kánda̱. Kúnda̱a̱-iniyó ña̱ ndáyáʼviní ni̱i̱ nu̱ú Jehová  chi ña̱yóʼo kúú ña̱ táxi ña̱ tákuyó. Ña̱kán chíka̱a̱níyó ndee̱ ña̱ kundiku̱nyó ña̱ káʼa̱n tu̱ʼun Ndióxi̱ tá viíní ndáka̱xinyó ndáaña keʼéyó tá ku̱a̱ʼa̱nyó nu̱ú na̱ doctor ta káʼa̱nna xíʼinyó ña̱ kuniñúʼuyó ni̱i̱.

10, 11. a) ¿Ndáaña ndákanixi̱ní miíyó na̱ testigo Jehová xa̱ʼa̱ ña̱ nde̱e ni̱i̱ miíyó á ña̱ kuniñúʼuyó iin táʼví loʼo ni̱i̱? b) ¿Ndáaña xíniñúʼu ndaka̱xin iin iinyó?

¹⁰ Miíyó na̱ testigo Jehová kúnda̱a̱-iniyó tá káʼa̱n Biblia ña̱ kǒo kuniñúʼuyó ni̱i̱, kúni̱ kachiña va̱ása kuxuyóña ta ni va̱ása koʼoyóña. Saátu va̱ása va̱ʼa taxiyó ni̱i̱yó ña̱ nde̱eña inkana, ta ni va̱ása taxiyó nde̱e ni̱i̱ inkana miíyó, ni ña̱ taxiva̱ʼana ni̱i̱ miíyó ta tándi̱ʼi tuku nde̱eña miíyó. Ku̱mí nu̱ú kúú ña̱ ndáta̱ʼví ni̱i̱: glóbulos rojos, glóbulos blancos, plaquetas xíʼin plasma. Ta ni iin ña̱yóʼo va̱ása xíniñúʼuyó.

¹¹ Ti̱xin ku̱mí ña̱yóʼo kivi kana táʼví válí ña̱ ni̱i̱ ta fracciones sanguíneas káʼa̱nna xíʼinña. Ta iin iin miíyó xíniñúʼu ndaka̱xin á kuniñúʼuyóña á va̱ása kuniñúʼuyóña. Saátu kúu xíʼin ña̱ kéʼé na̱ doctor tá xíniñúʼuna ni̱i̱ mií na̱ ndeé ndóʼo. Iin iinyó xíniñúʼu ndaka̱xin ndáa ki̱ʼva kuniñúʼuna ni̱i̱yó tá ndátána miíyó, á tá kotona á va̱ʼa íyoyó, á tá taxina ta̱tán ndaʼa̱yó (koto nota 21).

12. a) ¿Nda̱chun kíʼin Jehová kuenta xíʼin ña̱ ndáka̱xinyó keʼéyó? b) ¿Ndáaña xíniñúʼu keʼéyó tá káʼa̱n na̱ doctor xíʼinyó ña̱ kuniñúʼuyó ni̱i̱?

¹² ¿Á kíʼin Jehová kuenta xíʼin ndiʼi ña̱ ndáka̱xinyó keʼéyó? Kíʼinvara kuenta xíʼinña. Chi xíʼin ña̱ kéʼéyó náʼa̱yó ndáaña ñúʼu níma̱yó, ta Jehová kúni̱níra  kunda̱a̱-inira xa̱ʼa̱ ña̱ ndákanixi̱níyó xíʼin xa̱ʼa̱ ña̱ kéʼéyó (kaʼvi Proverbios 17:3; 24:12). Ña̱kán tá kúma̱níka ndaka̱xinyó ndáaña keʼéyó tá káʼa̱n na̱ doctor xíʼinyó ña̱ kuniñúʼuyó ni̱i̱, xíniñúʼu ka̱ʼa̱nyó xíʼin Jehová ná taxira yichi̱ nu̱úyó, ná kaʼvi va̱ʼayó xa̱ʼa̱ña ta saátu ná kuniñúʼuyó ña̱ xínitúni̱yó ña̱ va̱ʼa ndaka̱xinyó ña̱ keʼéyó. Kǒo xíniñúʼu nda̱ka̱tu̱ʼunyó inkana ndáaña keʼéna, ta ni kǒo taxiyó ña̱ ka̱ʼa̱n inkana xíʼinyó xa̱ʼa̱ ña̱ keʼéyó. Chi tá iin iinyó chaʼviyó xa̱ʼa̱ ña̱ kéʼéyó (Gálatas 6:5; Romanos 14:12).

13. Ña̱ ley ta̱xi Jehová xa̱ʼa̱ ni̱i̱, ¿ndáaña sánáʼa̱ña miíyó xa̱ʼa̱ra?

¹³ Ndiʼi ña̱ káʼa̱n Jehová xíʼinyó keʼéyó ña̱ va̱ʼa miíyó kúúña ta xíʼin ña̱yóʼo náʼa̱ra ña̱ kúʼvi̱-inira xínira miíyó (Salmo 19:7-11). Va̱ása xíniso̱ʼo kuitíyó ña̱ káʼa̱nra xa̱ʼa̱ ña̱ kúni̱yó chindeétáʼanra xíʼinyó. Chi kéʼéyó ña̱ káʼa̱nra xa̱ʼa̱ ña̱ kúʼvi̱-iniyó xíniyóra. Xa̱ʼa̱ ña̱yóʼo, va̱ása táxiyó nde̱e ni̱i̱ miíyó (Hechos 15:20). Ta ña̱yóʼo chíndeéña miíyó ña̱ kǒo kue̱ʼe̱ kiʼin miíyó. Ku̱a̱ʼání na̱ yiví xa̱a̱ kúnda̱a̱va-inina ndáaña kivi ndoʼona tá ná nde̱e ni̱i̱ miína, ta ku̱a̱ʼánítu na̱ doctor káʼa̱n ña̱ va̱ʼaka koo na̱ yiví na̱ ndátána tá kǒo ndée ni̱i̱ miína. Xíʼin ña̱yóʼo kúnda̱a̱-iniyó ña̱ va̱ʼaníka ña̱ káʼa̱n Jehová chi ta̱yóʼo ndíchiníra ta kúʼvi̱-inira xínira miíyó (kaʼvi Isaías 55:9; Juan 14:21, 23).

14, 15. a) ¿Ndáa ley ta̱xi Jehová ndaʼa̱ na̱ ñuu Israel xa̱ʼa̱ ña̱ kúni̱ra kundaarana? b) ¿Ndáa ki̱ʼva keʼún ña̱ káʼa̱n Ndióxi̱?

¹⁴ Ndiʼi ley ña̱ táxi Jehová ndaʼa̱ na̱ ñuura va̱ʼaní chíndeéña miína. Jehová ta̱xira ley ndaʼa̱ na̱ ñuu  Israel ña̱ chindeéña miína ña̱ va̱ʼa ná kǒo kixi tu̱ndóʼo nu̱úna. Iin ley ña̱ ta̱xira ndaʼa̱na káchiña tá kéʼéna iin veʼe, xíniñúʼu keʼéna iin nama̱ loʼo xi̱níña ña̱ va̱ʼa ná kǒo ndakava iinna (Deuteronomio 22:8). Inka ley káchiña tá iinna íyo iin toro sa̱na̱na tí kue̱ʼe̱ní, xíniñúʼu katúnnarí ña̱ va̱ʼa ná kǒo kaʼnírí inkana (Éxodo 21:28, 29). Tá iin na̱ ñuu Israel kǒo kándíxana ley yóʼo, ku̱a̱chi na̱yóʼo kúúña tá ná kaʼnírí iin na̱ yiví.

¹⁵ Xíʼin ña̱yóʼo kúnda̱a̱-iniyó ña̱ tákuyó ndáyáʼviníña nu̱ú Jehová. Ña̱kán náʼa̱yó ña̱ ndáyáʼvituña nu̱ú miíyó ta kíʼinyó kuenta xíʼin veʼeyó ña̱ vií ná kooña ta saátu carroyó, ta xíniñúʼu vií kavayó carro ta viíní ná ndaka̱xinyó ña̱ kotonde̱ʼéyó á ña̱ kusíkíyó. Sava na̱ yiví ndákanixi̱nína ña̱ kǒo ña̱ kundoʼona, ña̱kán ku̱a̱ʼá ña̱ʼa kéʼéna ta kǒo ndákanixi̱nína xa̱ʼa̱ ña̱ kivi kixi nu̱úna. Na̱ íxaa saá kúú na̱ va̱lí. Soo Jehová va̱ása kúni̱ra ña̱ keʼéyó ña̱yóʼo. Ta̱yóʼo kúni̱ra ña̱ ná kundaayó ña̱ tákuyó xíʼin ña̱ táku inkana (Eclesiastés 11:9, 10).

16. ¿Ndáaña ndákanixi̱ní Ndióxi̱ xa̱ʼa̱ ná sánuu se̱ʼe?

¹⁶ Nu̱ú Jehová ndiʼiyó ndáyáʼvi, nda̱a̱ na̱ va̱lí na̱ kúma̱ní kaku ndáyáʼvi nu̱úra. Ña̱ ley ña̱ ta̱xi Ndióxi̱ ndaʼa̱ ta̱ Moisés káchiña, tá iinna iin sana ka̱nina iin ñaʼá ñá ñúʼu se̱ʼe ta ni̱xi̱ʼi̱ñá á nu̱u ña̱ loʼo se̱ʼeñá ta ni̱xi̱ʼi̱ña, nu̱ú Jehová na̱ yiví yóʼo ndísona xa̱ʼa̱ ña̱ ke̱ʼéna. Ni iin ña̱ sana ku̱uña, na̱ yiví yóʼo xíniñúʼu kuvina ña̱ va̱ʼa chaʼvina xa̱ʼa̱ na̱ ni̱xi̱ʼi̱ yóʼo (kaʼvi Éxodo 21:22, 23). Nu̱ú Jehová na̱ va̱lí na̱ ñúʼu ti̱xin siʼína xa̱a̱ iin na̱ yiví táku kúúna nu̱úra.  Tá saá, ¿ndáaña ndákanixi̱ní Ndióxi̱ xa̱ʼa̱ ná sánuu se̱ʼe? ¿Ndáaña ndóʼora túvi yóʼo xa̱ʼa̱ ña̱ xítora ku̱i̱ya̱ tá ku̱i̱ya̱ ku̱a̱ʼání ná ñaʼá sánuuná se̱ʼená?

17. ¿Ndáaña kivi sándi̱ko-ini iin ñaʼá ñá sa̱núu se̱ʼe tá kúma̱níka kunda̱a̱-iniñá xa̱ʼa̱ Jehová?

¹⁷ Tá iin ñaʼá sa̱núuñá se̱ʼeñá tá kúma̱níka kunda̱a̱-iniñá xa̱ʼa̱ ña̱ ndákanixi̱ní Jehová xa̱ʼa̱ ña̱yóʼo, xíniñúʼu kunda̱a̱-iniñá xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó kiviva koo káʼnu-ini Ndióxi̱ xa̱ʼa̱ñá (Lucas 5:32; Efesios 1:7). Tá ndixa ndíkó-iniñá xa̱ʼa̱ ña̱ ke̱ʼéñá, va̱ása xíniñúʼu ndakanikaxi̱níñá xa̱ʼa̱ ña̱ ku̱u tá ya̱chi̱. Ña̱ Biblia káchiña “Jehová iin Ndióxi̱ va̱ʼaní kúúra ta kúndáʼviní-inira xínira na̱ ndóʼo tu̱ndóʼo”, ta “nda̱a̱ tá xíka kíndo̱o nu̱ú kána ñu̱ʼu xíʼin nu̱ú kíʼviña saá xíka chíndoora ku̱a̱chiyó” (Salmo 103:8-14).

18. Tá sáa̱-iniyó xíniyó iinna, ¿nda̱chun xíniñúʼu taváyóña xi̱níyó?

¹⁸ Ña̱ va̱ʼa na̱ʼa̱yó ña̱ ndáyáʼvi ña̱ tákuyó nu̱úyó xíʼin ña̱ táku inkana, nda̱a̱ níma̱yó xíniñúʼu kana ña̱yóʼo. Ta̱ apóstol Juan ni̱ka̱ʼa̱nra: “Ndiʼi na̱ sáa̱-ini xíni ñanina táki̱ʼva íyo na̱ xáʼní saá íyona” (1 Juan 3:15). Sava yichi̱ ni kǒo kíʼinyó kuenta ta kivi kixáʼayó sa̱a̱-iniyó kuniyó iin na̱ kǒo kítáʼan va̱ʼayó xíʼin. Xa̱ʼa̱ ña̱yóʼo sana nda̱a̱ kǒo ixato̱ʼóyóna, á nda̱a̱ ka̱ʼa̱nyó ña̱ vatá xa̱ʼa̱na á nda̱a̱ kuni̱yó ná kuvina. Soo Jehová kúnda̱a̱va-inira ndáaña ndákanixi̱níyó xa̱ʼa̱ inkana (Levítico 19:16; Deuteronomio 19:18-21; Mateo 5:22). Ña̱kán, tá sáa̱-iniyó xíniyó iinna, xíniñúʼu chika̱a̱yó ndee̱ ña̱ taváyóña xi̱níyó (Santiago 1:14, 15; 4:1-3).

19. ¿Ndáa inkaka ña̱ʼa xíniñúʼu keʼéyó ña̱ va̱ʼa na̱ʼa̱yó ña̱ ndáyáʼvi ña̱ tákuyó nu̱úyó?

 ¹⁹ Ta saátu xíniñúʼu ndakaʼányó, Jehová “kúndasíra xínira ndiʼi na̱ kéʼé ña̱ kini” (Salmo 11:5). Tá ndáka̱xinyó kusíkíyó á ña̱ kotonde̱ʼéyó nu̱ú xáʼní-táʼanna, náʼa̱yó ña̱ kútóoyó ña̱ kini, chi táxiyó kíʼviña xi̱níyó xíʼin tu̱ʼun kini. Ña̱ va̱ʼa na̱ʼa̱yó ña̱ ndáyáʼvi ña̱ tákuyó nu̱úyó xíniñúʼu ña̱ va̱ʼa taányó xi̱níyó (kaʼvi Filipenses 4:8, 9).

20-22. a) ¿Ndáa ki̱ʼva íyo na̱ ñuyǐví ta̱ Ndi̱va̱ʼa nu̱ú Jehová? b) ¿Ndáa ki̱ʼva náʼa̱yó ña̱ kǒo kítáʼanyó xíʼin na̱ ñuyǐví yóʼo?

²⁰ Na̱ ñuyǐví ta̱ Ndi̱va̱ʼa kǒo íxato̱ʼóna ña̱ tákuyó, ta nu̱ú Jehová na̱yóʼo kúú na̱ ndísoku̱a̱chi xa̱ʼa̱ ni̱i̱ na̱ yiví na̱ xa̱a̱ ni̱xi̱ʼi̱. Xa̱a̱ ku̱a̱ʼání tiempo, na̱ chíñu ñuyǐví yóʼo ku̱a̱ʼání na̱ yiví xáʼnína, nda̱a̱ na̱ ndásakáʼnu Jehová xáʼnína. Ña̱ Biblia káʼa̱nña xa̱ʼa̱ na̱ chíñu yóʼo ña̱ íyona táki̱ʼva íyo kití yukú tí ndi̱va̱ʼa-ini (Daniel 8:3, 4, 20-22; Revelación [Apocalipsis] 13:1, 2, 7, 8). Ñuyǐví nu̱ú ndóoyó vitin, sava na̱ yiví ku̱a̱ʼání xu̱ʼún távána ña̱ íxi̱kóna tu̱xi̱í. Ña̱yóʼo náʼa̱ káxiña ña̱ ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa (1 Juan 5:19).

²¹ Soo miíyó na̱ ndásakáʼnu Ndióxi̱ va̱ása kítáʼanyó xíʼin na̱ ñuyǐví yóʼo. Ni va̱ása kíʼviyó xíʼin ña̱ política ni kǒo xáʼa̱nyó nu̱ú ku̱a̱chi. Va̱ása xáʼníyó na̱ yiví, ta ni kǒo chíndeétáʼanyó xíʼin na̱ kéʼé ña̱yóʼo (Juan 15:19; 17:16). Tá íxandi̱va̱ʼana xíʼinyó, kǒo kánitáʼanyó xíʼinna. Ta̱ Jesús sa̱náʼa̱ra miíyó ña̱ xíniñúʼu kuʼvi̱-iniyó kuniyó nda̱a̱ na̱ sáa̱-ini xíni miíyó (Mateo 5:44; Romanos 12:17-21).

 ²² Saátu ku̱a̱ʼání na̱ yiví xíʼi̱na xa̱ʼa̱ ña̱ religión. Ña̱ Biblia káʼa̱nña xa̱ʼa̱ ña̱ Babilonia ña̱ káʼnu ña̱ kúú ndiʼi ña̱ veʼe-ñu̱ʼu vatá ña̱ íyo ñuyǐví yóʼo: “Ndísoku̱a̱chiña xa̱ʼa̱ ni̱i̱ na̱ profeta xíʼin ni̱i̱ na̱ santo xíʼin ni̱i̱ ndiʼi na̱ xa̱ʼníña nu̱ú ñuʼú”. ¿Á kúnda̱a̱-iniún ndáa xa̱ʼa̱ kúú ña̱ káʼa̱n Jehová xíʼinyó: “Ndóʼó na̱ ñuu miíi̱, keendó ti̱xinña”? Saáchi na̱ ndásakáʼnu Jehová su̱ví kuenta na̱ veʼe-ñu̱ʼu vatá kúúna (Revelación 17:6; 18:2, 4, 24).

23. ¿Ndáaña xíniñúʼu keʼéyó ña̱ va̱ʼa keeyó ti̱xin Babilonia ña̱ káʼnu?

²³ Ña̱ va̱ʼa keeyó ti̱xin ña̱ Babilonia ña̱ káʼnu, xíniñúʼu na̱ʼa̱yó ña̱ kǒo kítáʼanyó xíʼin ni iin veʼe-ñu̱ʼu vatá. Sana xíniñúʼu ka̱ʼa̱nyó xíʼin na̱ veʼe-ñu̱ʼu nu̱ú xi̱ñuʼuyó ña̱ ná ndakatana ki̱vi̱yó nu̱ú listana. Saátu xíniñúʼu kundasíyó ndiʼi ña̱ʼa kini ña̱ kéʼé na̱ veʼe-ñu̱ʼu vatá. Chi na̱yóʼo táxina kéʼé na̱ yiví ña̱ kini ta nda̱a̱ miína kéʼéña, kútóona koo ku̱a̱ʼá ña̱ʼana ta kíʼvituna xíʼin ña̱ política (kaʼvi Salmo 97:10; Revelación 18:7, 9, 11-17). Xa̱ʼa̱ ña̱yóʼo ku̱a̱ʼání na̱ yiví xíʼi̱.

24, 25. ¿Nda̱chun kúsi̱í-iniyó ndóoyó ta kǒo ña̱ʼa sándi̱ʼi̱-iniyó?

²⁴ Tá kúma̱níka sakuaʼayó xa̱ʼa̱ Jehová, ndiʼiyó xi̱keʼéyó ña̱ʼa ña̱ íyo nu̱ú ñuyǐví ta̱ Ndi̱va̱ʼa. Soo xa̱a̱ na̱samayó. Xa̱ʼa̱ ña̱ kándíxayó ña̱ ni̱xi̱ʼi̱ ta̱ Jesús xa̱ʼa̱yó, nda̱taxiyó miíyó ndaʼa̱ Ndióxi̱ ta vitin si̱íní ndóoyó. Xa̱ʼa̱ ña̱ kúnda̱a̱-iniyó ña̱ íxasi̱íyó-ini Jehová xíʼin ña̱ kéʼéyó, va̱ʼaní ndóoyó ta kǒo ña̱ sándi̱ʼi̱-iniyó (Isaías 1:18; Hechos 3:19).

²⁵ Tá ya̱chi̱ sana xi̱kitáʼanyó xíʼin na̱ yiví na̱ kǒo íxato̱ʼó ña̱ táku inkana, soo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó kiviva koo káʼnu-ini Jehová xa̱ʼa̱yó. Ta̱yóʼo ta̱xi ña̱ táku ndiʼiyó ta ndáyáʼviña nu̱úyó. Ta náʼa̱yó  ña̱ ndáyáʼviña nu̱úyó tá chíka̱a̱yó ndee̱ ña̱ nátúʼunyó xíʼin inka na̱ yiví ña̱ sakuaʼana xa̱ʼa̱ Jehová, tasaá sandákoona ñuyǐví ta̱ Ndi̱va̱ʼa ta xa̱a̱na kutáʼanna xíʼin Ndióxi̱ (2 Corintios 6:1, 2).

26-28. a) ¿Ndáa chiñu xa̱ʼnda Jehová nu̱ú ta̱ Ezequiel? b) ¿Ndáaña káʼa̱n Jehová xíʼinyó keʼéyó?

²⁶ Tá tiempo xi̱naʼá, Jehová ni̱ka̱ʼa̱nra xíʼin ta̱ profeta Ezequiel ña̱ ná ka̱ʼa̱nra xíʼin na̱ ñuu Israel ña̱ xa̱a̱ ku̱nu̱mí ndiʼi-xa̱ʼa̱ ñuu Jerusalén ta ndáaña xíniñúʼu keʼéna ña̱ va̱ʼa ka̱kuna. Tá ná kǒo ka̱ʼa̱n ta̱ Ezequiel xíʼinna, Jehová ndatiinra ku̱a̱chi xíʼinra xa̱ʼa̱ na̱yóʼo (Ezequiel 33:7-9). Ta̱ Ezequiel ni̱na̱ʼa̱ra ña̱ ndáyáʼvi ña̱ táku inkana nu̱úra, chi chi̱ka̱a̱níra ndee̱ ña̱ ni̱xi̱kara na̱túʼunra xíʼinna xa̱ʼa̱ Ndióxi̱.

²⁷ Jehová káʼa̱nra xíʼinyó ña̱ ná natúʼunyó xíʼin na̱ yiví ña̱ xa̱a̱ ku̱nu̱mí ndiʼi-xa̱ʼa̱ ñuyǐví ta̱ Ndi̱va̱ʼa. Ta xíniñúʼu chindeétáʼanyó xíʼinna ña̱ ná sakuaʼana xa̱ʼa̱ Jehová ta ná kunda̱a̱-inina ndáaña xíniñúʼu keʼéna ña̱ va̱ʼa ka̱kuna ta xa̱a̱na koona ñuyǐví xa̱á (Isaías 61:2; Mateo 24:14). Kúni̱yó chika̱a̱níyó ndee̱ ña̱ natúʼunyó xíʼinna xa̱ʼa̱ Ndióxi̱. Tasaá kivi ka̱ʼa̱nyó ña̱ ni̱ka̱ʼa̱n ta̱ Pablo: “Va̱ása níkái̱ xa̱ʼa̱ ni̱i̱ ni iin na̱ yiví, saáchi ndiʼi tiempo xi̱ka̱ʼi̱n xíʼinna xa̱ʼa̱ Ndióxi̱” (Hechos 20:26, 27).

²⁸ Ña̱ va̱ʼa keʼékayó ña̱ kúni̱ Ndióxi̱ xíniñúʼu ixato̱ʼóyó ña̱ tákuyó saátu ni̱i̱, soo su̱ví ña̱yóʼo kúú ndiʼiña. Chi xíniñúʼu limpio kooyó nu̱ú Jehová. Nu̱ú inka capítulo sakuaʼayó xa̱ʼa̱ ña̱yóʼo.