1, 2. a) ¿Ndáa ki̱ʼva ndákanixi̱ní na̱ sa̱kán ti̱ndaʼa̱? b) ¿Ndáa pregunta kúú ña̱ ka̱ʼa̱nyó xa̱ʼa̱ nu̱ú capítulo yóʼo?

NDAKANIXI̱NÍ xa̱ʼa̱ na̱ tíndaʼa̱. Mií ki̱vi̱ ña̱ íyo vikó ña̱ tíndaʼa̱na kúsi̱íkaví-inina ta ndákanixi̱nína ña̱ ndiʼi tiempo kundoona xíʼin táʼanna ta si̱íkaví kundoona.

² Ku̱a̱ʼánína tá sa̱kán tíndaʼa̱na va̱ʼava ndóona, soo tá yáʼa loʼo tiempo kíxáʼa tu̱ndóʼo nu̱úna. Soo ña̱ va̱ʼa kundoona xíʼin táʼanna ta si̱íní kundoona ndiʼi tiempo, xíniñúʼu kundiku̱nna yichi̱ ña̱ táxi Ndióxi̱ nu̱úna. Ná kotoyó ña̱ káʼa̱n Biblia xa̱ʼa̱ sava pregunta yóʼo: ¿Ndáaña kúú sava ña̱ va̱ʼa ndákiʼin na̱ tíndaʼa̱? ¿Nda̱saa kivi ndaka̱xiún iin na̱ va̱ʼa tindaʼa̱ xíʼún? ¿Ndáaña keʼún ña̱ va̱ʼa si̱í koún xíʼin ñá síʼún á yiíún? ¿Ndáaña keʼé na̱ xa̱a̱ ti̱ndaʼa̱ ña̱ va̱ʼa ndiʼi tiempo kundoona xíʼin táʼanna? (Kaʼvi Proverbios 3:5, 6).

3. ¿Á xíniñúʼu tindaʼa̱ iinna ña̱ va̱ʼa si̱í koona? Ka̱ʼa̱n xa̱ʼa̱ña.

³ Savana ndákanixi̱nína ña̱ va̱ʼa si̱í koona xíniñúʼu tindaʼa̱na. Soo su̱ví ña̱ ndixa kúú ña̱yóʼo. Ta̱ Jesús  ni̱ka̱ʼa̱nra ña̱ iin ña̱ va̱ʼava kúú ña̱ koo kúa̱anyó (Mateo 19:10-12). Ta̱ apóstol Pablo ni̱ka̱ʼa̱nra ña̱ íyo ku̱a̱ʼá ña̱ kivi keʼé ná kúa̱an (1 Corintios 7:32-38). Soo miíún xíniñúʼu ndaka̱xin á tindaʼún á koo kúa̱ún. Va̱ása taxiún ña̱ ixandúxa na̱ migoún á na̱ veʼún xíʼún ña̱ tindaʼún. Ni kǒo kundiku̱ún costumbre ña̱ íyo ñuún.

4. ¿Ndáaña kúú sava ña̱ va̱ʼa ndákiʼin na̱ tíndaʼa̱?

⁴ Ña̱ Biblia káʼa̱nña xa̱ʼa̱ ña̱ tindaʼa̱yó táki̱ʼva íyo iin regalo Ndióxi̱ saá íyoña. Jehová ni̱ka̱ʼa̱nra ña̱yóʼo xa̱ʼa̱ ta̱ Adán: “Va̱ása va̱ʼa ña̱ koo mitúʼun ta̱ ta̱a. Keʼíi̱ iin ñá chindeétáʼan xíʼinra, iin ñá va̱ʼa koo xíʼinra” (Génesis 2:18). Jehová i̱xava̱ʼara ñá Eva ña̱ kooñá ñá síʼí ta̱ Adán, na̱yóʼo kúú na̱ nu̱ú i̱xava̱ʼa Jehová nu̱ú ñuʼú yóʼo. Na̱ tíndaʼa̱ iin ña̱ va̱ʼa ndákiʼinna kúú ña̱ chíndeétáʼanna xíʼin táʼanna ta ndáa-ini táʼanna. Ta saátu tá ná kaku se̱ʼena, kivi sákuaʼnu u̱vi̱ saánana. Soo su̱ví xa̱ʼa̱ ña̱ koo kuití se̱ʼena tíndaʼa̱na (Salmo 127:3; Efesios 6:1-4).

5, 6. ¿Ndáaña chindeé na̱ tíndaʼa̱ ña̱ va̱ʼa xa̱a̱na nduuna táki̱ʼva íyo yoʼo̱ ña̱ u̱ni̱ láso?

⁵ Ta̱ rey Salomón ni̱ka̱ʼa̱nra: “Va̱ʼaníka u̱vi̱na nu̱úka iinlána, chi ku̱a̱ʼání ña̱ va̱ʼa ndakiʼinna xa̱ʼa̱ chiñuna. Saáchi tá iinna ná ndakavana, na̱ kítáʼan xíʼinna kivi ndaniʼinana. Soo ¿ndáaña ndoʼo na̱ íyo mitúʼun tá ná ndakavana ta kǒo na̱ ndaniʼi miína? [...] Tá iin yoʼo̱ u̱ni̱ ná ka̱túntáʼanña va̱ása kama ta̱ʼnda̱ña” (Eclesiastés 4:9-12).

⁶ Tá chíndeétáʼan xíʼin táʼan na̱ ti̱ndaʼa̱, sándi̱kona-ini táʼanna ta ndáa táʼanna, ña̱yóʼo chíndeéñana ña̱  va̱ʼaníka xáa̱na kítáʼanna. Tá kúʼvi̱-inina xíni táʼanna va̱ʼaní chindeéñana, soo tá u̱vi̱ saána ndásakáʼnu Jehová va̱ʼaníka saá. Saáchi xa̱a̱na koona táki̱ʼva íyo yoʼo̱ ña̱ u̱ni̱ láso ña̱ tuunní kátúntáʼan. Ta ña̱yóʼo va̱ása táʼnda̱ kamaña nu̱úka yoʼo̱ ña̱ u̱vi̱ kuití kátúntáʼan. Na̱ tíndaʼa̱ ki̱ʼva saá xa̱a̱na ndakutáʼanna tá ndásakáʼnuna Jehová.

7, 8. ¿Ndáaña ni̱ka̱ʼa̱n ta̱ Pablo xa̱ʼa̱ na̱ kúni̱ tindaʼa̱?

⁷ Tá tíndaʼa̱ iin ta̱a xíʼin iin ñaʼá kivi ku̱su̱nna xíʼin táʼanna ta sákusi̱ína-ini táʼanna (Proverbios 5:18). Soo tá iinna tíndaʼa̱ kuitína xa̱ʼa̱ ña̱ va̱ʼa ni̱ʼína na̱ ku̱su̱n xíʼinna, sana va̱ása ndaka̱xin va̱ʼana na̱ tindaʼa̱ xíʼinna. Ña̱kán ni̱ka̱ʼa̱n ta̱ apóstol Pablo ña̱ va̱ʼa tindaʼa̱na tá xa̱a̱ xu̱xana á tá xa̱a̱ ni̱ya̱ʼa tiempo ña̱ ndeéní kútóona ku̱su̱nna xíʼin inkana (1 Corintios 7:36). Chi saá kúú ña̱ va̱ʼaka ndakanixi̱nína ta va̱ʼa ndaka̱xin viína na̱ tindaʼa̱ xíʼinna (1 Corintios 7:9; Santiago 1:15).

⁸ Tá ndákanixi̱níún tindaʼún, xíniñúʼu kunda̱a̱-iniún ña̱ ndiʼi na̱ tíndaʼa̱ va̱xi tu̱ndóʼo nu̱úna. Ta̱ Pablo ni̱ka̱ʼa̱nra na̱ tíndaʼa̱ koo tu̱ndóʼo nu̱úna (1 Corintios 7:28). Nda̱a̱ na̱ va̱ʼaní kítáʼan yáʼana nu̱ú ña̱ yo̱ʼvi̱. Ña̱kán, tá ndákanixi̱níún tindaʼún viíní ndaka̱xiún na̱ tindaʼa̱ xíʼún.

9, 10. ¿Ndáaña kivi ndoʼo iin na̱ hermano tá ná tindaʼa̱na xíʼin iin na̱ kǒo ndásakáʼnu Jehová?

⁹ Tá ndaka̱xiún na̱ tindaʼa̱ xíʼún, xíniñúʼu kundiku̱ún consejo ña̱ va̱xi nu̱ú 2 Corintios 6:14: “Va̱ása  kutáʼanndó xíʼin na̱ kǒo ndásakáʼnu Ndióxi̱”. Ta̱ apóstol Pablo tá ka̱ʼyíra tu̱ʼun yóʼo, xa̱ʼa̱ na̱ chíʼi nda̱kanixi̱níra xa̱ʼa̱. Chi na̱yóʼo va̱ása sákitáʼanna iin kití káʼnu tí ndakúní ña̱ kachíñurí xíʼin iin tí kití loʼo tí va̱ása ndakú, chi u̱vi̱ saárí ndoʼo. Ta saátu íyoña tá iin na̱ ndásakáʼnu Jehová tíndaʼa̱na xíʼin na̱ kǒo ndásakáʼnura, kixiva tu̱ndóʼo nu̱úna. Ña̱kán káʼa̱n Biblia ña̱ ná tindaʼa̱na xíʼin na̱ ndásakáʼnu Jehová (1 Corintios 7:39).

¹⁰ Iin ña̱ suchí-ini kúúña, sava na̱ hermano xáa̱na ndákanixi̱nína ña̱ va̱ʼaka ña̱ tindaʼa̱na xíʼin na̱ kǒo ndásakáʼnu Jehová nu̱úka ña̱ kindo̱o miína. Soo tá ná ya̱ʼandosóyó ña̱ káʼa̱n Biblia sana kixiva tu̱ndóʼo nu̱úyó ta va̱ása si̱í kooyó. Ña̱ xíniñúʼu kundayáʼvika nu̱úyó kúú ña̱ ndasakáʼnuyó Jehová. ¿Nda̱saa ndoʼún tá na̱ ti̱ndaʼa̱ xíʼún kǒo kútóona keʼéna chiñu Jehová? Xa̱ʼa̱ ña̱yóʼo, ku̱a̱ʼání na̱ ndásakáʼnu Jehová va̱ʼaka íyo kúa̱an miína nu̱úka ña̱ tindaʼa̱na xíʼin na̱ kǒo ndásakáʼnu Jehová (kaʼvi Salmo 32:8).

11. ¿Ndáaña chindeé yóʼó ña̱ va̱ʼa ndaka̱xin viíún na̱ tindaʼa̱ xíʼún?

¹¹ Soo su̱ví ña̱yóʼo kúni̱ kachiña nda̱a̱ ndáaka na̱ ndásakáʼnu Jehová va̱ʼa tindaʼún xíʼin. Tá kúni̱ún tindaʼún, tindaʼa̱ xíʼin iin na̱ kútóoníún xíniún, xíʼin na̱ va̱ʼaní kítáʼún xíʼin. Kundatún nda̱a̱ ná ndani̱ʼún iin na̱ kútóo keʼé táʼan ña̱ kéʼé miíún ta siʼnaka chiñu Ndióxi̱ ná kundi̱ʼi̱-inina xa̱ʼa̱. Ta xíniñúʼu taváún tiempo ña̱ va̱ʼa kaʼviún á ndakanixi̱níún xa̱ʼa̱ ña̱ tává na̱ ñuu Ndióxi̱ nu̱ú va̱xi consejo ña̱ káʼa̱n xa̱ʼa̱ na̱ kúni̱ tindaʼa̱ (kaʼvi Salmo 119:105).

12. ¿Ndáaña sákuaʼayó nu̱ú Biblia xa̱ʼa̱ ña̱ ke̱ʼé ta̱ Abrahán tá ndu̱kúra ñá síʼí ta̱ loʼo se̱ʼera?

 ¹² Sava ñuu na̱ yivá na̱ va̱lí kúú na̱ ndúkú ñá síʼína á yiína chi na̱yóʼo kúú na̱ xíni̱ka ndáana va̱ʼa tindaʼa̱ xíʼin se̱ʼena. Xa̱a̱ tiempo xi̱naʼáví xi̱kuumiína costumbre yóʼo. Tá na̱ veʼún ndíku̱nna costumbre yóʼo, ña̱ Biblia kivi chindeéñana ña̱ va̱ʼa kotona ndáa ki̱ʼva koo na̱ ndukúna tindaʼa̱ xíʼin se̱ʼena. Táki̱ʼva ke̱ʼé ta̱ Abrahán tá ndu̱kúra ñá síʼí se̱ʼera ta̱ Isaac, ña̱ ni̱ndi̱ʼi̱-inira xa̱ʼa̱ kúúña ná ndasakáʼnuñá Jehová, su̱ví ña̱ kooñá iin ñá íyoní xu̱ʼún á iin ñá xa̱ʼnu ti̱xin veʼe na̱ ku̱i̱ká (Génesis 24:3, 67; koto nota 25).

13-15. a) ¿Ndáaña xíniñúʼu keʼé iin ta̱a ña̱ va̱ʼa koo tu̱ʼvara tá ná tindaʼa̱ra? b) ¿Ndáaña xíniñúʼu keʼé iin ñaʼá ña̱ va̱ʼa koo tu̱ʼvañá tá ná tindaʼa̱ñá?

¹³ Tá ndákanixi̱níún tindaʼún, siʼnaka ndakanixi̱níún á xa̱a̱ íyo tu̱ʼvaún. Sana ndákanixi̱níún ña̱ xa̱a̱ va̱ʼa tindaʼún. Soo yóʼo sákuaʼayó nda̱saa íyo na̱ xa̱a̱ íyo tu̱ʼva. Sana ndakanda̱-iniún xíʼin ña̱yóʼo.

¹⁴ Ña̱ Biblia káʼa̱n káxiña xa̱ʼa̱ ña̱ xíniñúʼu keʼé na̱ ta̱a saátu ná ñaʼá, chi xa̱a̱ síín síín kúú ña̱yóʼo. Ña̱kán tá kúma̱níka tindaʼa̱ iin ta̱a xíniñúʼu sakuaʼa kúeera ndáa ki̱ʼva koora xíʼin ñá síʼíra ta saátu ñá ñaʼá. Tá iin ta̱a kúni̱ra tindaʼa̱ra xíniñúʼu nda̱ka̱tu̱ʼunra miíra á xa̱a̱ íyo tu̱ʼvara ña̱ kiʼinra kuenta xíʼin ñá tindaʼa̱ xíʼinra. Ña̱ kúni̱ Jehová kúúña, ta̱ ta̱a kúú ta̱ xíniñúʼu kiʼin kuenta xíʼin ndiʼi ña̱ xíniñúʼu ñá síʼíra xíʼin na̱ va̱lí se̱ʼera. Soo ña̱ xíniñúʼu kundi̱ʼi̱ka-inira xa̱ʼa̱ kúú ña̱ sánáʼa̱ra na̱ veʼera xa̱ʼa̱ Ndióxi̱. Ña̱ Biblia káʼa̱nña tá iin ta̱a va̱ása ndáara na̱ veʼera, nda̱a̱ kíʼvika íxaa ta̱yóʼo nu̱úka na̱ kǒo kándíxa Ndióxi̱ (1 Timoteo 5:8). Ta̱ kúni̱ tindaʼa̱ xíniñúʼu ndakanixi̱níra ndáa ki̱ʼva kundiku̱nra consejo ña̱ va̱xi yóʼo: “Siʼnaka keʼún chiñún chí yuku̱, ta xa̱a̱ ná koo tu̱ʼva ndiʼi ña̱ʼún, tándi̱ʼi saá keʼún veʼún”. Ña̱yóʼo kúni̱ kachiña tá kúma̱níka tindaʼa̱ra xíniñúʼu kotora á ndixa sáxi̱nura ndiʼi ña̱ káʼa̱n Jehová ña̱ keʼé ta̱a ta̱ íyo ña̱ síʼí (Proverbios 24:27).

¹⁵ Saátu ñá kúni̱ tindaʼa̱ xíniñúʼu nda̱ka̱tu̱ʼunñá miíñá á xa̱a̱ íyo tu̱ʼvañá ña̱ keʼéñá chiñu ña̱ kéʼé ná xa̱a̱ ti̱ndaʼa̱, tá kúú ña̱ kundaañá se̱ʼeñá tá ná koona.  Tu̱ʼun Ndióxi̱ káʼa̱nña ña̱ ku̱a̱ʼání kúú ña̱ʼa ña̱ kivi keʼéñá ña̱ kundaañá yiíñá xíʼin na̱ va̱lí se̱ʼeñá (Proverbios 31:10-31). Tiempo vitin, ku̱a̱ʼání na̱ tíndaʼa̱ ndákani kuití xi̱nína xa̱ʼa̱ ndáaña kivi taxi na̱ ti̱ndaʼa̱ xíʼinna ndaʼa̱na. Soo Jehová kúni̱ra ña̱ ná ndakanixi̱níyó xa̱ʼa̱ nda̱saa kivi chindeétáʼanyó xíʼin na̱ ti̱ndaʼa̱ xíʼinyó.

16, 17. Na̱ kúni̱ tindaʼa̱, ¿ndáaña xíniñúʼu ndakanixi̱nína xa̱ʼa̱?

¹⁶ Tá kúma̱níka tindaʼa̱ iinna xíniñúʼu ndakanixi̱nína ndáaña káʼa̱n Jehová keʼé ta̱ ta̱a á ñá ñaʼá. Ni ta̱ ta̱a kúú ta̱ níʼi yichi̱ nu̱ú na̱ veʼera, su̱ví ña̱yóʼo kúni̱ kachiña ña̱ kivi kundi̱va̱ʼara xíʼin ñá síʼíra á se̱ʼera. Ña̱ xíniñúʼu keʼéra kúú ña̱ kundiku̱nra yichi̱ ta̱ Jesús, chi ta̱yóʼo va̱ʼaní xi̱kiʼinra kuenta xíʼin na̱ xi̱kitáʼan xíʼinra (Efesios 5:23). Ñá ñaʼá xíniñúʼu ndakanixi̱níñá tá ná tindaʼa̱ñá ndáa ki̱ʼva chindeétáʼanñá xíʼin yiíñá (Romanos 7:2). Xíniñúʼu nda̱ka̱tu̱ʼunñá miíñá á si̱í kooñá ña̱ kuniʼi iin ta̱a ta̱ kúúmií ku̱a̱chi yichi̱ nu̱úñá. Tá va̱ása si̱í kooñá túviñá, va̱ʼaka ná koo kúa̱anñá ta kundatu loʼoñá.

¹⁷ Na̱ xa̱a̱ ti̱ndaʼa̱ xíniñúʼu kundi̱ʼi̱ka-inina xa̱ʼa̱ ñá síʼína á yiína nu̱úka miína (kaʼvi Filipenses 2:4). Ta̱ Pablo ni̱ka̱ʼa̱nra: “Ta iin iinndó kuʼvi̱-inindó kunindó ñá síʼíndó nda̱a̱ táki̱ʼva kúʼvi̱-inindó xínindó miíndó; ta saátu ná si̱ʼí to̱ʼó ná kooná xíʼin yiíná” (Efesios 5:21-33). Ña̱ ndixa kúúña ni kúúyó ta̱a á ñaʼá kútóoyó ña̱ kuʼvi̱-inina kunina miíyó ta ixato̱ʼóna miíyó. Ña̱ va̱ʼa si̱í koo na̱ ti̱ndaʼa̱ xíʼin táʼanna, ta̱ ta̱a kúni̱ra ná na̱ʼa̱ ñá síʼíra ña̱ íxato̱ʼóñára, ta ñá ñaʼá kúni̱ñá ná na̱ʼa̱ ta̱ yiíñá ña̱ kúni̱ra xínirañá.

18. ¿Ndáaña va̱ása va̱ʼa keʼé na̱ xíka xíʼin táʼan?

 ¹⁸ Tiempo ña̱ kúúna novio, kivi kunina ini táʼanna ta saá kotona ndáa ña̱ va̱ʼa kúúmií iin iinna. Ta xíniñúʼu ka̱ʼa̱nna ña̱ nda̱a̱ xíʼin táʼanna ña̱ va̱ʼa kunda̱a̱-inina á ndixa kúni̱na koona xíʼin táʼanna ndiʼi tiempo. Tá xíkana xíʼin táʼanna saá kúú ña̱ sákuaʼana natúʼun táʼanna ta va̱ʼa kúnda̱a̱-inina ndáaña ndíka̱a̱ níma̱ iin iinna. Tá ku̱a̱ʼáka tiempo kítáʼanna, xáa̱na kútóokana xíni táʼanna. Soo xíniñúʼu kiʼinna kuenta ña̱ va̱ʼa ná kǒo keʼéna ña̱ yaku̱a̱. Xa̱ʼa̱ ña̱ kúʼvi̱-inina xíni  táʼanna chindeéñana ña̱ ndakú koo inina ta va̱ása keʼéna ña̱ yaku̱a̱, ta va̱ʼaka xa̱a̱ u̱vi̱ saána kutáʼanna ta va̱ʼanítu kutáʼanna xíʼin Jehová (1 Tesalonicenses 4:6).

19, 20. ¿Nda̱saa xíniñúʼu ndakanixi̱ní na̱ káʼvi tu̱ʼun Ndióxi̱ xa̱ʼa̱ ña̱ tindaʼa̱na?

¹⁹ Ku̱a̱ʼání na̱ yiví ndákanixi̱nína tá ná tindaʼa̱na si̱íní kundoona ta ni loʼo kǒo tu̱ndóʼo kixi nu̱úna. Soo su̱ví saá íyoña, chi tá tíndaʼa̱na táki̱ʼva íyo na̱ sa̱kán kíxáʼava saá íyona. Jehová kúú ta̱ chi̱ndúʼú xa̱ʼa̱ ña̱ tindaʼa̱yó ta kooyó ndiʼi tiempo xíʼin táʼanyó (Génesis 2:24).

²⁰ Tiempo vitin, ku̱a̱ʼání na̱ yiví va̱ása ndákanixi̱nína ña̱ koona xíʼin táʼanna ndiʼi tiempo. Nu̱ú na̱yóʼo va̱ása yo̱ʼvi̱ tindaʼa̱na ta ni va̱ása yo̱ʼvi̱ kaʼndana tutu ña̱ ti̱ndaʼa̱na. Soo ndakaʼán xa̱ʼa̱ yoʼo̱ ña̱ u̱ni̱ láso ña̱ tuunní kátúntáʼan ña̱ káʼa̱n Biblia xa̱ʼa̱. Iin yoʼo̱ ña̱ íyo saá va̱ása táʼnda̱ kamaña. Tá ná ndukúyó ndee̱ nu̱ú Jehová va̱ʼava kundooyó ndiʼi tiempo xíʼin na̱ tindaʼa̱ xíʼinyó. Ta̱ Jesús ni̱ka̱ʼa̱nra: “Na̱ xa̱a̱ ti̱ndaʼa̱ i̱xaa Ndióxi̱, ni iin ta̱a kǒo kívi ndataʼvírana” (Mateo 19:6).

21. ¿Ndáaña chindeé na̱ ti̱ndaʼa̱ ña̱ kǒo sandákoona ña̱ kuʼvi̱-inina kuni táʼanna?

²¹ Ndiʼiyó íyo ña̱ va̱ʼa kúúmiíyó soo íyotu sava ña̱ va̱ása va̱ʼa kéʼéyó. Sava kamaníka xítoyó ña̱ va̱ása va̱ʼa kéʼé inkana, víʼika tá yiíyó á ñá síʼíyó kúúna. Soo tá saá ná keʼéyó va̱ása si̱í kooyó. Soo tá ná kotoyó ña̱ va̱ʼa kúúmií na̱ xa̱a̱ ti̱ndaʼa̱ xíʼinyó si̱íníka kooyó saá. ¿Á kivi kotoyó ña̱ va̱ʼa kúúmií iin na̱ yiví ku̱a̱chi? Kiviva. Tá kúú  Jehová xíni̱ra xa̱ʼa̱ ndiʼi ña̱ va̱ása va̱ʼa kéʼéyó, soo ña̱ kíʼin kuitíra kuenta xíʼin kúú ña̱ va̱ʼa kéʼévayó. ¿Ndáaña kuu tá ná kǒo keʼéra saá? Iin ta̱ ka̱ʼyí libro ña̱ salmo káchira: “Tá ndiʼi ku̱a̱chi ña̱ kíʼvi na̱ yiví ná kotoún Jehová, ¿ndáana kivi kuyatin nu̱ún?” (Salmo 130:3). Na̱ ti̱ndaʼa̱, va̱ʼa kundiku̱nna yichi̱ Jehová ña̱ kotona ña̱ va̱ʼa ña̱ kúúmií ñá síʼína á yiína. Ta ndiʼi yichi̱ koo káʼnu-inina xa̱ʼa̱ táʼanna (kaʼvi Colosenses 3:13).

22, 23. ¿Ndáaña kivi sakuaʼa na̱ ti̱ndaʼa̱ xíʼin ña̱ ke̱ʼé ta̱ Abrahán xíʼin ñá Sara?

 ²² Tá yáʼa tiempo ku̱a̱ʼa̱nña na̱ ti̱ndaʼa̱ kivi xa̱a̱na va̱ʼaníka kutáʼanna xíʼin táʼanna. Ta̱ Abrahán xíʼin ñá Sara ku̱a̱ʼání ku̱i̱ya̱ ni̱xi̱yona xíʼin táʼanna ta si̱íní ni̱xi̱yona. Tá ni̱ka̱ʼa̱n Jehová xíʼin ta̱ Abrahán ña̱ ná sandákoora ñuura ña̱ Ur, ñá Sara sana xa̱a̱ 60 ku̱i̱ya̱ xi̱kuumiíñá. Sana i̱xayo̱ʼvi̱ña xíʼinñá ña̱ sandákooñá veʼe va̱ʼa ña̱ xi̱kuumiína ta ku̱ʼu̱nna koona veʼe ña̱ ndáʼvika ni̱xi̱yo. Soo ñá Sara va̱ʼaní xi̱kitáʼanñá xíʼin yiíñá ta xíʼin ndiʼi iniñá i̱xato̱ʼóñára. Ña̱kán ndiʼi ña̱ nda̱ka̱xinra keʼéra chi̱ndeétáʼanñá xíʼinra ña̱ va̱ʼa ná kana ndiʼiña (Génesis 18:12; 1 Pedro 3:6).

²³ Ña̱ va̱ʼa si̱í koo na̱ tíndaʼa̱ xíʼin táʼanna, kǒo kúni̱ kachiña ndiʼi yichi̱ inkáchi ndakanixi̱nína xa̱ʼa̱ ña̱ kéʼéna. Iin yichi̱ va̱ása inkáchi níndakanixi̱ní ta̱ Abrahán xíʼin ñá Sara xa̱ʼa̱ iin ña̱ʼa, soo Jehová ni̱ka̱ʼa̱nra xíʼinra: “Kuniso̱ʼo ña̱ káʼa̱nñá”. Ta saá i̱xaa ta̱ Abrahán ta va̱ʼaní ka̱naña (Génesis 21:9-13). Tá va̱ása inkáchi ndákanixi̱níndó xa̱ʼa̱ iin ña̱ʼa, kǒo ndakava-inindó. Ña̱ ndáyáʼvika kúú ña̱ kuʼvi̱-inindó kuni táʼanndó ta ixato̱ʼó-táʼanndó ni va̱ása inkáchi ndákanixi̱níndó.

24. ¿Ndáaña xíniñúʼu keʼéyó ña̱ va̱ʼa ndasakáʼnuyó Jehová tá ná tindaʼa̱yó?

²⁴ Ku̱a̱ʼání na̱ testigo Jehová si̱íní íyona xíʼin na̱ ti̱ndaʼa̱ xíʼinna. Tá kúni̱ún tindaʼún, ndakaʼán ña̱ xíniñúʼu ndaka̱xin va̱ʼún na̱ tindaʼa̱ xíʼún chi ndiʼi tiempo koona xíʼún. Ña̱kán ka̱ʼa̱n xíʼin Jehová ná chindeétáʼanra xíʼún. Saá kúú ña̱ kivi ndaka̱xin va̱ʼúnna, koo tu̱ʼvaún ña̱ tindaʼún ta va̱ʼaní kutáʼanndó xíʼin táʼanndó tasaá ndasakáʼnundó Jehová.